كرونيك : انتى سبابي
من أروع لكرونيكات التونسية الشعبية
:بقلم
Mk KHOULOUD..❤❤❤
منقولة
حكاية حب بين مد و جزر من المشاعر...قصة حب من طرف واحد ...عقل اتعبته ظروف الحياة...و قلب يعشق حتى النخاع..رفض ..حب يولد من رحم المستحيل..في خضم الحومة الشعبية
♡♡♡♡♡♡♡♡♡♡♡♡♡♡♡♡♡♡♡
حبك يا عميقة العينين
تطرف
تصوف
عبادة
حبك مثل الموت و الولادة
صعب ان يعاد مرتين
••••••••••••••••••••••••••••••••••••••••••••••••••
في ليلة ممطرة كانت الناس تتجارى باش تحمي روحها مالعاصفة القوية لي عايشتها هالبلدة الصغيرة ....بلاصة لاهي ريف و لاهي مدينة. .. في وحدة من حومها القديمة اسمها ""حومة البدادعة"" كان يعيش اكبر سكارجي اسمو وليد و تراش من واحد باندي و يموت عالعرك و المشاكل اما زادا رجلة و وين تقول يا وليد يقلك حاضر... الناس الكل تدعيلو بالهداية خاطرو مايستاهلش يضيع مستقبلو ... كان ماشي بدبوزتو في يدو فماش ما يدفى في هالبرد وقت سمع ضحكهم و تبوليدهم على طفلة ...
- اه قطوس ضايع ياخي !!!
- ماتخافش مروحة وحدك في الليل !! ايجي لهنا
- سيبني يا ساقط ابعدني ماتمسنيش .... خيالو العريض كان باين في الظلمة و عمالو و يقرب بدبوزتو في يدو صحيح شارب اما موش لدرجه مايميزش صوتها. .
- ايمان اش تعمل هوني ؟ حب يحكي قبل و هو مازال موصلهاش فماش ماتسمع صوتو و تهدى... هكا كان ماشي في بالو. .
- أنت ؟؟؟ طالس عليا كلابك يا وليد !! اش تحب مني مزال !!! ابعدني. ..هيا تحكي و جايبة ماعندها و ماترى كان في واحد منهم طايح و دمو شرتيلة من خشمو. ..
- سسسس ...سيبو قتل..قتلتو .....لخر هرب ماحبش يطيح بين يديه كيما جرا لصاحبو ...
- ماهمش كلابي. ..و انا كان نحب نعمل حاجة والا نقول حاجة نجي وحدي كي الرجال و انت تعرفني
-.................
- برا روح على روحك ....سبقاتو تجري ولو ما اطيقوش و تنفر منو و من ريحتو لي ديما بالشراب الا انها تونست بيه وراها و احتمات بيه... شيعها بعينيه لباب دارهم لي ما يبعد كان حكاية أمتار قليلة على عتبة دارو. .و كمل ثنيتو مازال ليلو طويل و حافل بمغامراتو ...
- تخيل يا علي قاتلي طالس عليا كلابك !!! لهالدرجة نبان مانسواش انا !!!
- تي هاذكم هوما البنات يا صاحبي كي تعمللها قدر تركب عليك و كي تبخسها تجري وراك تي ق....... الكل
- اسسسس رد بالك تكلاسيها كيفهم رد بالك نهدلك فمك راني
- باهي باهي سامحني ..انا من غلبتي عليك حكيت
- مابيني شي انا جوست ...عاشق ولهان ..نعشقها باش نهبل عليها نتمنى تخزرلي من غير الاشمئزاز الدايم لي في عينيها مني ...نتمنى.. سكت هز دبوزتو كفا لي مازال فيها على فمو و طيشها ..حتى الق.... هذي وفات هات دبوزتك...
- اش عملت في حكاية الكانكيري متاع بوك. .باش تشدها انت ولا وائل
- انا ..علاش !! شعل سيقاروه و نفخ
- لا شي اما والله فرصة تي شبيك رأس مالها كبير و زيد بالشطر باش تقسمو انت و بوك
- الساعة لازم ندبرو لوائل الفيزة باش يقرى و بعد ساهل يعني الشهرين هاذم لي باش تجيبو الكانكيري في مكتوب ولد امي
- ربي معاه رتاح من هالخربة والله بلاد م.........
- هههههههه شد شد اشرب انا لازمني نروح ..معلومك صابح نخدم
- هههههههه و انا صابح عريس...
- زايد ممسوخ.... روح يترنح كي عادتو ..امو مايغمضلهاش عين مسكينة كان ماتشوفو حل الباب و دخل ..بوه عارفو حالة ميؤوس منها درا باش يضربو و هو اطول منو و موش صغير المشكل 30 سنة اش مازال فيه باش يتضرب.... عرضاتو في الباب ياخي عمللها يبدو "اخطاني غدوة ساهل اذبحني كان تحب" ..دخل يلقى خوه مازال فايق ..
- السلام عليكم..
- ما انتنك يا راجل ..ماكش راقد معايا كان ما ادوش. .
- خليني شويا و نقوم
- وليد !!!
- باهي اش من مراج حتى انت كي امك
- كان جيت امك راني ربيت والديك
- ههههههههه....وليد و وائل ماكانوش مجرد خوات كانو صحاب و اكثر برغم الطبيعة المتناقضة فيهم من رأسهم لساسهم. .وائل ابيض كي امو و ياسر مزيان قراي و لاهي بروحو ماعندوش الخروج و الدخول و المغامرات الفاسدة كيما سي وليد الباندي لي كان موش مزيان ياسر كي وائل اما زينو رجولي اسمر اللي زاد حلاه ضربة بغرزتين في الطرف تحت عينو ليسار كي يضحك يبانو واضحين و طبعا ماتكون كان مخلفات عركة دموية. .. صاحبنا قاري كونطابيليتي و بطال حال لبلاد اما خوه لي يصغرو ب 3 سنين كان عكسو الرحمة لا مع القراية اش خلاه باش يكمل قرايتو البرة مهندس طيران جوست يستنى في الفيزة و طرف فلوس من بوه ...
-ايا سيدي هانا دوشنا انجمو نتمرقدو !!! قالها و هو يلبس في سروالو
- هانك وليت عبد تو... انغمس في كتابو كي عادتو... خطفو منو وليد و بدل يقرأ..
- ترى هات نشوفو Mécaniques ..électrique. ..transporteur ...هههههههههههه تي هاهم يسببو فيك الجماعة
- سيب يا جاهل ...اش يفهمك تعرف بقداه الكتاب !!
- 4800 مليم كان موش اقل
- 120 دينار
- ههههههههه انت اكيد هبلت .. تي يعرسولي انا 120 دينار
هههههههه ؟
الحلقة2
- خليني نرقد غدوة نهار طويل في القنصلية
- يكلمك واحد قوللي
- أي اي خويا الباندي
- صحيت.... سكت و سرح في السقف بعينيه يتفكر فيها و في كلامها قبيلة مستحيل قلبو يتعبى عليها بالعكس حتى عركها ليه و نبزها يحبهم خاطر يشوف فيهم فرصة باش ياقف عليها و يسمعها تحكي ... من اخر مرة بعثلها فيها باش تصوحبو و كان ناوي عالخير اما هي نبزاتو و قاتلو "" عرس بيا و زيد علمني الشراب "" تلفت لخوه لي غام على راسو..
- وائل
- أم
- يا وااائل
- اممم
- رقدت !!
- شبي .......... سيبنا عاد
- هههههههه تطور ملحوظ على مستوى الألفاظ البذيئة
- يا احكي يا فوتني
- اليوم ريت ايمان زادا
- وو يااا ايمان . علاش و وين ريتها زادا. ..نفخ
- في الدورة..حكالو لي صار الكل .... اما والله نحبها
- تي بربي اخطاني تو هذا حب !!! شوف حالتك شوف روحك كيفاش ريحتك سابقاتك بالخمرة المنتنة ..بابا هلك و هو يقلك ايجا اخدم معايا و كون روحك ..شوف اندادك وين.. شوف .... بربي خليني ساكت ..تو انت من كل عقلك تحب الطفلة تعبرك ولا تحب فيك! !! عندها الحق اصلا ...
- راجل و مايعيبني شي ..و الشراب تو يجي نهار و نبطلوه و هي كان ادور تونس كاملة و الله والله و الله لا تلقى شكون يحبها كيما حبها وليد ...و قول خويا طحان و مش راجل كان ماناخذهاش
- ربي يهديك ولد امي..
- على ذكر امك... غدوة نهار مغلق عالصباح
- انا بنفصع شوف شكون يحامي عليك
- زايد مستحيل تتبدل... حدفو بالمخدة و كمل تخمامو لين هزو النوم....
●●●●●●●●●●●●●
- ايمان عيش بنتي ايجا مدلي المنشقة
- لحظة بابا ... مسحت يدها مالماء لي كانت تغسل بيهم في الصابون.... سايس روحك شد المنشفة
- خليتيه الصابون ماكش تشوف في البرد يا كبدي وين باش تنشرهم تو
- لا عادي تو نخليهم و غدوة كي نروح نتصرف فيهم انا قلت نغسلهم و نرتاح منهم
- يزيك و ايجي ارقدي
- لحظة.. انت صلي على روحك و شد فرشك
- تي راهي قريب الساعتين متاع الفجر يا ايمان !!
- يا بابا تو تعرفني ماعنديش فضا في النهار باش نقيمها الدار
- ربي يعينك اش بنقلك
- صلي صلاتك و ادعيلي هههههه
- ربي يهديك و يوفيك
- امين .... تحرك و مخها يخدم... هالخدمة كسرتلها ظهرها في مصنع متاع مابل هاي هزت هاي حطت و مع مرج الكليونات تروح خضرة مسكينة. 250 دينار في الشهر خير من بلاش تعيش بيهم و تعيش بوها الحاج عمار لي لاعاد فيه لا حيل لا قوة للخدم و التمرميد دابو الجامع و القهوة و الدار نفس الريتم كل يوم...
بنتو ايمان الصغيرة و عند و بنتو تهاني الكبيرة معرسة. . ايمان بنية حقانية خدامة و عصامية ماتحبش تذل روحها لحد تي حتى تهاني كل مرة تجي تعاونها و تقلها فلوس راجلك مستحيل نمد يدي على فرنك احمر منهم مادامني حية مانعتاز لحد غير ربي و زراعي. .. كانت مزيانة زينها شرقي مليانة شوية اما خيالها لمكعبر زايدها أنوثة ..ماهيش مهملة روحها ديما لاهية بلبستها و شعرها كيما اي طفلة ..شعرها لكحل لمبوكل مرة في الفال تجبدو .. بوكلي هايج زيد طويل ... صحاب هي و الحومة الكل تحب الناس الكل كان وليد ولد علي لي ديما في جرتها فددها في روحها هي مستغربة كيفاش المخلوق هذاك ولد عم علي و طا لطيفة و خو وائل العاقل التو ماهيش عارفة تركيبتو مش فاهمة... اما كي تفهمو ممكن تتغير نضرتها ليه ...
نهار جديد ..نهار أحد الناس الكل صابحة لي راقد راقد و لي ساري للقهوة ساري و النساء كل وحدة قايمة بدارها و مستحيل ننساو الحكاوي من التقطيع للترييش عالصباحات ... اخبار الحومة الكل تلقاها عند منيرة انتاربول وحدة هجالة كيما مسميينها نساء الحومة ما يغيب عليها طير طاير ..قداش تعجبها ايمان بنت عمار ديما تقلها كان جاء عندي ولد والله لا نفلتك اما الطحان راجلي مايجيبش خلاني بلاش ضنى...
- اهلا بالغزالة..
-صباح الخير خالتي منيرة...
- من بعيد لبعيد !! هات نبوسك. ..ايمان مش على حاجة اما تعرف بوها كان يشوفها معاها يعمللها عرعور
- لباس عليك شنو احوالك
- لي خلق ما يضيع انا كيما يقولو "" باع و روح"" اخطاك مني ايجي اشربي قهوة
- لالا بطيت والله
- باهي في لمان
- سلام.... طارت روحت خايفة شويا من بوها و شوي من خيالو لي يطارد فيها ...بخطوات متثاقلة وصل عند عتبتها بعد ماكان متأمل انو يلحق عليها...
- اه مقصوص الريزو اليوم !!!
- وليد ولد لطيفة صباح النور
- وليد ولد علي يا "هجالة " اه اش فما جديد في الحومة...يحكي و عينيه تشيع فيها كل ماتميل بشعرها قلبو يميل معاها...
- الباندي متاعنا اش يحب يعرف بالضبط. !!! عنا الاقتصاد ..الاجتماع.. و كيف حطينا ساقينا في امور القلب ربي يسهللنا ان شاء الله هانا نسترزقو
- مللخر ااا منيرة
- مانحبش نكثر عليك..... باكو مالبورو اكاهو
- اكاهو !!!!!! رخيص ماهو البالبورو ...يتمقصص عليها اما مجبور باش تودو باخبارها ....باهي نفيص ساعة و نرجعلك حظر التقرير برك.....بفليزتو لي معبية بالماتيريال متاع الضو و الماء دق بابها ..
- اشكي
الحلقة 3
-اشكي !! اش تحب زادا...
- وعليكم السلام .... يا عم عمار ..عم عمااار... كان ينادي و عينيه في عينيها نظرات الخبث باينة فيها
- فصالة زايد. ..مشات خطوتين و ماتحس فيه كان في ظهرها شاد جرتها... لباس ياخي وين........
- وليد ؟ بطيت ساعة لتالي عيطلك...تدخل باباها طمنها و خلاها تبررلو وقاحتو و تماديه الزايد. ...
- جيت من بكري كان عطلتني بنتك في الباب. .. غمزها و فاتها بخطوات الثابتة
- ههههه ياخي مستحيل تتباغو انتم !!! ...كلام عم عمار شعلو نارو..ااااه لو كان تعرف اش عمل فيا حبها بنتك هذي..
- بابا ياخي عنا حاجة ماتخدمش باش جاء...هذا...
- احشم خوك اكبر منك راهو تقلو "هذا" . ..بربي لا تأخذ عليها صغيرة مازالت.... شدو من كتفو و هزو معاه للكوجينة....صلحلهم السبالةالمقصوصة من برة .عامل فيها يفهم اما كان عيطلو واحد آخر من الحومة راهو تلفو طول اما حجة باش يراها ... جاء خارج يلقاها ادخل في الصابون..
- بس بس ..
- شررر
- هههههه اما انت لسانك طويل ااه..باش اتعبني
- علاه وخي نتعب فيك اش بيناتنا بابا
- ايمان!! ياخي لدرجة هاذي باردة معايااا !!!
- باللاهي شنهي !!! ياخي انت مشكلتك معايا شنيا بالضبط !! تحبني !! حب على روحك اما راهو مفماش مكتوب
- المكتوب بيد ربي يا بنت الناس ...و انا شاريك
- انا مانحبكش ياخي تو نورمال شوف روحك شوي عاداتك ال...... خليني ساكتة
- معناها كان جيت مانشربش ممكن تحبيني! !! الشراب هو لي بيني و بينك !!!
- لا
- اش معناها لا هذي !!!!
- ياخي باش تقلبها استجواب انت..يلا روح عيش خويا كان انت راجل و مايطلعش فيك انا بنية و نخاف على روحي
- خسارة ...ماتعرفنيش يا ايمان خسارة عاملة ضلالة بينك و بين حبي ليك. ..انا لي يخمم برك يدور بيك نمحيه و كان لزم نسيل الدم
- ما تعملش باندي عليا يا وليد. .. خرجني من مخك و يرحم والديك
- انت. .......
دخلت و سكرت الباب في وجهو. .كبس على يدو يحس في دمو فااار و معاش فيه باش يتحمل التنمر متاعها هو لي الحوم الكل القريبة و البعيدة تهاب ذكر اسمو تصغرو فقصة بنت 22 سنة !! يلعن بو الحب و الي جاب الحب. .. في ثنيتو تعدى على منيرة انتاربول حدفلها باكو الدخان...
- قداش تعجبني كي تعطي كلمتك وليدو...خربت في باكو الدخان كالمحششة
- موش على سواد عيونك اما يجيك نهار و نستحقوك غمزها و كما ثنيتو ...
●●●●●●●●●●●●
- اسمع يا مخلوقة ولدك هذا زودها ياسر راهو
- يا علي يزي عادك بيه روح بربي لا تكلمو انا..انا تو نحكي معاه
- تي الكلو منك انت ..انت سباب الداء. .دلالك و تخبايتك فيه وصلو لهوني و وصلني نتحاشى في الناس من ال معارف للبرنية في جرة تجوبيرو ..انا علي الصيد يكلولي وجهي في القهوة جرتو !!!
- يا حليييلي رااكم باش تجلطوني بيناتكم اش نعمل انا نسايرك ولا نسايروو و لا نهج ظربة وحدة....هاو وائل جاء ..سلم ولدي احكي معا بوك
- أمي عندو الحق بابا حتى وليد خرا فيه ياسر راهو
- اس اس لا يسمعك
- أمي خوفك المبالغ فيه عليه و منه هو لي خلاه يتمرد و معاش عامل حساب لا للكبير لا للصغير. ..
- السلام يا قوم...سكتت الناس الكل كي خلط... في غيابو الناس الكل صيودة اما وقت يحضر الناس الكل تبدى ترمق في بعضها و تشوط في الكلام بين بعضها احكي انت احكي انا ....علاش حاس كنتم تحكو عليا !!!! ...ذيب راهو ذيب و ماتتعداش عليه....
- ياللي عاد يا امو يا لحنينة موش قدامك عاد ورينا اش باش تعمل معاه...استغفر الله العظيم ....هز برنوسو و قصد ربي للصلاة اليوم جمعة و لازمو يخلط في وقتو كي عادتو ...وائل مازلت ؟؟؟
- لا بابا انا باش نفطر و نرجع للفاك. ....تلفتو الزوز لوليد لي كان يلعب بالتلفون و لا على بالو
- يا ولد الكلبة اش عامل احكي بوك باش تجلطو راك
- لطيفة ماكثر حسك. .انت مايواتيكش الغش و الحسابات هذي ..جيبيلنا نفطرو...يبشبش بيها باش يبلفطها..
- ابعد عليا ما اقل حياك يا راجل الشيب و العيب
- وائل شبيها لطوف !!!
- طفي روحك وليد ........ في الكوجينة كانت تاكل و باعثاتو و هو يتبولد عليها يحب يفصع من كلامها لي يمرجو كل مرة...
- شد غص هاك...بكل برود مدتلو الخبز موش عوايدها لي ديما تبشبش بيه و ماتاكل كان في حظورو
- اللطف عليا.... مازال يحاول فيها باش تلين كيما كل مرة
- ......................وائل ياكل و يقحرلو
- شبيك سي الخرا؟ ؟؟
- ياخي وجهك ماينديش ؟؟؟
- تي فك على ......... ..... شبيكم كبشتو ياخي ؟؟ اول مرة ياخي ؟؟؟
- هات الصحيح وليد باش تبلفطني كيما كل مرة ؟؟
- يا ميمتي عركة كالعادة و....و لباس ماصار شي ك .....
- الراجل 12 غرزة في يدو و ماصار شي ؟ اش مازال بيصير ؟؟ هذي هي مخلفات السم لي تزع فيه
- و رأس امي ماني شارب. ..علي و ولد ناجية كلمني قال يسالهم فلوس و فاصعين ياخي جبتهملو
- و انت اش جابك لولد ناجية حشيش و دعارة و بلا أزرق اش مدخلك فيه يمشي يجيب فلوسو وحدو
- تي صاحبي يامي و بربي سكتولي هالغناية راني فديت منها!
الحلقة 4
و الشراب مانيش مبطلو و لي يستحق الضرب مايشوف مني كان تكسير لعظام..انا مانظلم حد و مانمد يدي على حد عبث اما لي يحفرلي شبر نحفرلو قبر....قام و خلاهم في حالة يأس كيما كل مرة ..موضوع ليس قابل للنقاش من ناحيتو ..تعبهم و مازال باش يتعبو ..
- أمي .. تو يهديه ربي
- خسارة شبابو لي مضيعو بين الهمال و الكلوشارات
- هههههههه لطيفة تعرفيهم الكلوشارات !!
- اخطاني انت زادا و برا الحق على خوك زيد احكي معاه
كان يمشي و الغليان واكللو بقايا العقل لي مازال فيه ...تلامحاتو جاي يزرب بعض الامتار تفصلهم عن اللقاء الغير مرغوب فيه من ناحيتها اما يفاجئها بالجفاء متاعو ... وضعو ماكان ناقصو كان هي ..رؤيتها زادت من غليانو كره المكان و الزمان ... خلاها على أطلال سحابة من الدخان الخانق.. مستغربة تجاهلو ليها و هي متعودة يفددها في روحها في كل دورة و كل زنقة اما رتاحت منو كي ماكلمهاش....
كملت ثنيتها لدار خالتها فتحية لمقابلة دارو اليوم باش تتعشى عندهم كيما كل ويك اند مع لبنات. ..
هو ماهو معروف عاد و سيطو ذايع في البلاد في كل دورة يلقى كعبة...و طبعا الكعب انواع منها متاع صحب و منها متاع بروموات و منها متاع شيخة كيما حليمة بنت سعاد هذي عاد بروفيسيونال ماتحكيش عارضاتو و في يدها زوز بقات و باكو رايب. ...
- وينك يا فحل ..ماجييتش ليك مديدة
- حلومة. ...وقفلها اكييد خاطر الأشكال هاذم متاع تفرهيد و يبعدووك على تكسير الكرايم. ... ياخي تزيان يا طفلة ولا شنيا لحكاية ؟؟
- بلفطني عاد ...هاكي المرة ستنيتك و عملتها بيا
- و راسك نعوضهالك اصبر عليا مشخشب هالايامات. .
- اييه واشبيه نفرهدو الباشا غار يحن علينا برك
-ههههههههههه....قرب منها عللخر و هي ذابت في دبشها تستخايبو دراش يعمللها ياخي خطف منها وحدة بقات. ... بلاش فطور راني
- ص..صصحة و..و فرحة .... تنهدت و عضو على شفايفها ...
- حلومة مانيش مزروب راني شد روحك شويا هههههه غمزها و كمل ثنيتو للكانكيري ...
ايمان من لي دخلت لدار خلاتها و هي راس راس مع بنات خالتها هدى و نعيمة .... .
نعيمة - شفتو ؟؟؟؟
ايمان- بربي لا عاد تجبدهولي ...لصق كالبق الهم لا حب يسيبني عيفني في روحي
نعيمة -ماصاب يلصق فيا و راس امي نكتب عليه طوووول راهو يهبل راهو يجلط
هدى - كب سعدك يا هاملة سيب الطفلة و انت تحرضي فيها و انت ايمان رد بالك تعطيه جنب كلوشار متاع وذني
نعيمة - يحبها ياخي معاش تحسو معاش تفرووو تي مشلقة يموت عليك و يفنى... ايمان كلام هدى طيشو في البحر كان باش اتبعها راك باش تبووور
ايمان - معناها ندفن روحي مع سي وليد متاعك !!! انا على شكون نرضى و مازلت بعقلي ناخذ سوكارجي يتخلط عليه ليلو بنهارو. ..
نعيمة - ماتدري عالخيرة وين و في شكون ..الطفل راهو شاريك ماتحكمش عليه . ....
هدى - انت سكري! و انت ايمان قوم خلينا نهبطو عند خالتك خير من تكسير الراس. .. عوجت لنعيمة و خرجو
التمو الصبايا باش يعملو العصبان كيما جرات العادة و العوايد ليلة الجمعة ..الحاج عمار و الحاج موسى يجو من صلاة المغرب طول لدارو يتعشو و يسهرو و بعد يروح بنتو.... محلاها اللمة و محلاه الصبى لا راجل يحكم فيك و لا حمى تنقرز و لا صغار يصايحو ... شكون فينا عرست و ماحنتش للمات و هداري قعدة متوسطها براد التاي ....
خالتها- ايييه تو تعرسو الكل و تبدو مشتافات في اللمة هذي و في عصباني
هدى - معناها عرسيلنا الكل في ضواحييك
نعيمة - اش خص .... غمزت لايمان تلمحلها
ايمان - معناش رجال تمنع نساها نحنا هههههههه
خلاتها - محسوب تو تشوفوه الراجل لي ميتين عليه من لي تبات تحلم بالعسل تلقى روحك مصبحة تقشر في البصل هههههههه اللطف على بناتي إن شاء الله ربي يزهي مكتوبكم
ايمان - هييي هذا هو الكلام لي بتسمع ... باهي مدلي خليني تزيد نقص معاك المعدنوس..
هدى - ياخي ماعودتش وصيتو بابا هانا ناقصين معدنوس تو... منين نجيبو انا تو حتى المولدي لحول الخضار هج يصلي الجمعة...
امها - برى سلم بنتي لخالتك لطيفة... غارسة جردة صغيرة في قفا دارها برا...
هدى - والله لا قصيتها خطوة المرة لي فاتت مشيت انا هاني بنتك قلها..
امها- بو بوك الكلب يا ....... تحلفي عليا !!! ...تلعج عليها بشلاكة البلاستيك ..اصابة في مستوى الظهر
نعيمة - هاي ايمان يام عمرها لا مشات ...خزرتلها بخبث خاطر تعرف امها باش تقلها بري انت يصلح رايك هاك تشوف بناتي الفاجرات ماحبوليش و فعلا ظنها في بلاصتو...
امها - سلم بنتي بري هالفاجرات لي عندي شمو صنانهم و بداو يحلفو فيا ..برا تو تلقى خالتك فضيلة. ... مسكينة مشات مكرهة و مجبورة تشوف في خالتها كشاكشها طالعة و زيد كان تقلها لا ماتتصورش اش تنجم تعمل فيهم الثلاثة... ياسر خالتها تفكرها في امها يرحمها نفس الصمايل نفس نبرة الصوت نفس الخيال قصيرة و بصحتها و نفس التجريح ههههه مشات خطوة القدام و عشرة لتالي تعرف اش يستنى فيها تعرف باش تواجهو و تعرف كي اطيح في يدو باش يمرجها كيما العادة
الحلقة 5
-ايمان !! اهلا بنيتي شنيا احوالك. .. جاتها للا لطيفة الضحكة مالية وجها قداش تحبها اما موش واحدها معاها مرافقة
- امونة سافا !! ايجا نبوسك ...طبعا شكون غيرها ... هاذي منيرة انتاربول في جولتها المسائية...
- اهلا طاطا اهلا منيرة لباس !! انا بعثتني خالتي للجردة باش....
- أي اي تفضل هايكة ورا الدار ....شيعتها بعينيها و التبسيمة على وجها قاطعتها منيرة و شي مايفوتها
- مصاب يلحمها معاها و الله قداه تواتيه
- ايييييه قداش شاهيتهالو و حق النبي محمد
- عليه الصلاة و السلام... اييه ازدم مالا
- تو بربي يا منيرة تحبني نحشم روحي مع خويا عمار !! تو هكا تو ؟؟ هاك تشوف الطفل صايع ليعديه دايخ اكثر من لي يعديه صاحي و زيد شايم في كل تركينة يظربلي واحد...
- تي بربي اخطاني وليد راجل و الف من يتمناه و زيد تو يفد و رأس اختي الكل يجربو و يفدو
- ثلاثين عام راهو ؟؟
- اسكت برك هاي جات التفاحة... اه يا عسلة كاهاو
- اي كاهاو.. عيشك طاطا
- خلينا نشربوك حويجة
- لا يعيشك لازمني نمشي
- تي هيا برك ماتتعطلش.... شدت فيها منيرة و دخلتها معاها بعد ما غمزت لطيفة لي مافهمت والو ... قعدة في الكوجينة دوبة سخنو القهوة و بداو يترشفو .. يسمعو في حثلة عند الباب ..
- هذا مايكون كان الحاج علي
- طاطا لازمني نمشي بطيط ... قامت و منيرة في جرتها من قبيلة و هي تتبسم و تتبهنس..
- سلم على خالتك و قلها ماتنسنيش في العصبان هههه
- أن شاء الله ..غزرت لمنيرة لي كانت عينيها في الباب ...منيرة مروحة !!
- اي اي مروحة .... قص على حكاياتهم و ضحكهم كحة الحاج علي و هو داخل
-ايا قلنا السلام عليكم ... يفسخ في صباطو و لطيفة مشاتلو كالعادة باش تهز عليه برنوصو
- و عليكم السلام..
-لباس يا حاج شنيا احوالك !! تعرفو مايهضمهاش اما ديما ترمي في روحها منيرة. ..ايمان واقفة ردت السلام و سكتت. .لكنها فيسع ما ترهوجت كي شمت برفانتو وجها تقلب و بدات تلعن في روحها خاطر بقات محلقة و نسات الي هو ممكن يجي و يلقاها... مازال كي حط ساقو في العتبة و بوه تكلم..
- شكوني هالبنية ؟؟ يسأل في لطيفة
- ترا طلعها وحدك الساعة الشبيهة باينة يا حاج ههه
- والله شي ضاعت عليا ههه... ايمان حاشمة كيفاش يخزرولها و زادت ستلبست كي راتو واقف مع الباب مارق فيها بعينيه. . وقفتو المعروف بيها ديما يديه في جيابو شطر تبسيمة تعبر على الحب الكبير في عينيه..
- تي ماهي ايمان بنت عمار يا شومي !!
-درا كبرت !!ماشاء الله على بنتي ولات صبية هاي تي تقول خديجة يرحمها ايجا بوسي خالك ايجا...نتفكر فيك قد الوزغة و انت تجري في حانوت بوك هيييه عالايام. .. مشات باساتو حاشمة و تحس في فوارة مكنتها. . عينيها الكل بينو و بين منيرة لي ماتحبهاش تسبق و تخليها في وجهو وحدهم...
- عيشك خال علي ..ايا بسلامة بطيت لازمني نمشي .. شاهية طيبة... سبقت للباب هاربة منو هي تعرف الي مستحيل يكلمها قدام عايلتو اما ماتحبش حتى تحكي معاه ماقسى قلبها للدرجة هذي موش حاسة بيه ... منيرة وراها اتبع فيها و فيه و طبعا كان مايقول كلمة ولا زوز
- خسارة فيك باكو المالبورو تي ليجار و شوف وشوف
- يا حسرة عليك انا نستحق المالبورو و الميريت و كان لزم شيشة تفاح .. اليوم هاك ريتها تصول و تجول في داركم غدوة الله اعلم وين ... غمزاتو و لحقت عليها في الباب وين عرضهم وائل ... راها كيف سلمت على خوه مدتلو يدها ضحكتلو تراش حكاو و بعد خرجت... للحظة حس بالغيرة من خوه ..هو يعرف الي خوه مستحيل تركبلو ايمان في راسو و زيد يعرفو يعشقها اما الله غالب حس بالغيرة ممكن من تلقائيتها معاه ... اما هي هاي مرتاحة و تضحك على عكس كي تشوفو تقول هد عليها حرس....في الوقت هذاك كان الحاج عمار و لطيفة في الكوجينة يعملو في قهوة كانو يحكو و كل واحد هازو واد موش فاهمين بعضهم ..
- ماصاب عندنا بنية والله راهي هازتلنا كبرنا يا حاج
- حكم ربي..هاني عندك قسمك. . تو يجيبولك كناين و اعمليهم بناتك
- زعما ... تنهيدة فيها بارشا كلام... تعرف يا حاج قداش دخلت قلبي هاكي الطفلة ايمان.. مدتلو القهوة و جبدت كرسيها و قعدت .....مصاب يكتب المكتوب و الله
- باينة بنية زوالية و بنت عيلة و بربي اش تستنى من عمار و خديجة يجيبو تبارك الله تربية و حذاقة
- اي والله حتى تهاني أختها مايخلو ما يحكو دار حموها عليها ماشاء الله
- هههههه لطوف هات مللخر حاسك ترافاش تطبخي يا مرا و مادام هاكي منيرة متوسداتك صباح و عشية اكيد فما حاجة في الوسط
- هههههه زايد ماتتعداش عليك انت ... يا سيدي انا عاجبتني الطفلة و نحبها كنتي
- اب اب اب بشويا يا مرا درا شق دق هيا. . دنيا كبيرة راهي
- غار طاوعني نحن مستحيل نلقاو خير منها و لاهي باش تلقى خير منا.... تي راهي آخر كعبة في الفيترينة
- محسوب انت مالوجتيش هنا و غادي ... يترشف في قهوة و عامل جو على عجوزتو ... تي يا من راك قلبتيها الحومة على بنية
-هههههههه امالا نعجبك راني ... المهم تو اش قلت !!
-شاور الطفل قبل
<><>
يا حاج الطفل مبلع فيها غار ربي يهديه
- اي هذا الكل متفاهمين فيه اما الطفلة ... سالتوهاش عندكمش فكرة عليها ميالة ليه ولا. ..تمشيش تحشمي روحك و تحشميني معاك
- لي نعرفو ماعندها حد في حياتها يعني ماعندهاش علاه ترفض
- دبري راسك ااعفيني من خناركم و اكيد مدامها هاكي دايرة بيك اكيد طبخينها على نار هادية
- انت قول ربي يسهل و خلي الباقي عليا ... تو انا نزيد نكبس عليه الطفل شويا فماش ما يرزن ...في الوقت هذاك وليد كان متعدي للتوالات و سمع اسمها عرفهم يحكيو عليها قعد واقف ماد وجهو
- اما اش باش نعملولو في قرايتو هاو قالك يجري على البعثة متاعو البرة و زيد بنت الناس ت. ....
- قراية اشنهي !! و بعثة اشنهي!!!! ماتقليش تحكي على وائل ؟؟؟
- انت لي ماتقليش تحكي على وليد ؟؟؟؟ لا عاااااد لا عاااد ... كلام بوه و هو مستغرب كلام لطيفة لي كانت تقصد فيه هو بحديثها جرحو و وجعو في قلبو على مرتين باش يهد عليهم يقلب الكوجينة فقاني تحتاني و يقلهم باش ناخذها كان انا و حد ما يفتي ...
- يا راجل شبيك تو وائل مزال بعيد عالماخذة و شكون جاب سيرتو ..انا نحكي على وليد
- لا انت اكيد ضبعتي تو باش تمرمد بنت الناس في جرت واحد طايش !!
- شبيه ولدي راجل و سيد الرجال .. خدام و لباس عليه و زيد عينو في البنية و نعرف ولدي يهني عليها و مايوصلهاش بالخايب تي كبدتي و نعرفو ..تصدق احن من وائل والله و ارطب ..هاني ندعيلو بالهداية تي طيش تو يفد و يعقل كي يعمل مسؤولية تو يعقل
- لا الاه الا الله. .. اسمعني تو مانغير مانغطو عين الشمس بالغربال يا لطيفة. .. صلح ولدك الساعة خليه يفيق على وضعو و يبطللي هالسناسة و الخلط الزفتة وتو يعمل الله دليل اما انك تلزيني باش نحشم روحي مع عمار لا ..الطفلة كيف الوردة ماتهونش و ماهيش هاربة الطفلة كان فما مكتوب و راسك ماتبات كان عندو. ..يصلح روحو برك...
- باهي صل عالنبي ... انا نعرف كيف نتصرف معاه ..اشرب قهوتك راي بردت ....
دخل و طربق الباب على قوة جهدو فاد مخنوق و موش عارف اش يعمل يفبري بكلو ... يحبها يموت عليها اما ستانس بالشراب موش منجم يبطلو يا خوفو يتحول للادمان وقتها ينساها جملة وحدة ايمان ... باهي هذي طبيعتو واعر و مشاكلي ساعات اما مايظلم حد. .. يزيد دمو يفور كي يتفكر بكري كيف تتضيحك مع خوه وهو موش معبراتو جملة يتفكر في كلام بوه و كيف يستخايب كلام مرتو على وائل ..ايمان و وائل !!!!! لااااا ... يحس براسو باش يترشق شدو يحك في شعرو بصوابعو فازة يعملها كي تهس عليه كمية اما لا مش وقت شرب تو ...
تحت بوطون الضو كانت تشيع فيها منيرة بعينيها و تطبخ على نار هادية ...
- وينك يا بنتي !!! نص ساعة على ورقتين معدنوس !!
- هاكا حدي خالتي شدتني طاطا لطيفة و منيرة بالحديث
- منيرة الهجالة !!! خيييت ديما تسعسع كالكلبة
- ههههههههههههههه ... وينهم لبنات.؟؟
- مشاو كلمهم بوهم باش يمسحلو المغازة .. برا كان تحب
- لا تو نبقى نعاونك
- باهي سلم بنتي حطلي الكسكسي النهار راح ... تلفونها صونا ...
- الو !!
- أخرج هاني تستنى فيك ورا دار خالتك
- ع...ععلاش ..احم ...شكون! ! خالتها تخزرلها مركزة معاها و هي مالصدمة شلقت على روحها. .. صوتو رهوجها و ماتوقعتشي يوصل يتواقح للدرجه هاكي معاها هو عرفاتو من نبرة صوتو ...بقات ساكتة ممزقة بين تلفونو و بين عينين خالتها لي باش تكلها ..
- كلمتين يا تهبط يا نطلع نهد عليك غادي و تعرفني نعملها را .....
- باهي باهي ...علقت و هربت تشوف للكسكاس من خزرة خالتها
- شكون !!
- مم... مفيدة صاحبتي قاتلي شفتك عند خالتك
- امم باهي اغسلي الصينية واهبطلها كان تحب
- باهي... قالتها بغصرة تتمنى تقلها راهو هو وراني مانحبش نهبطلو اما خايفة يفضحني في الحومة و يبدى ينادي كي مانهبطلوش يعملها راهو مجنون... مام با درجين و هبطت اما لي زاد خوفها الدنيا لي بدات تظلم ..تمشي بزربة و تتلفت وراها خايفة يشوفهاش حد مالحومة و هي تدعي عليه و تسحسح دخلاني ... تلوج بعينيها شافاتو قاعد على حجرة يتكيف ...من حسن حظها الي البلاصة جاية الداخل ماتتشافش كالخربة ورا دار خالتها ...حس بيها و بخطواتها المتسارعة مالربثة و الخوف ...
- شبيك اش تحب !! قالتها اما مش كالعادة المرة هاذي نبرة كلها انهزام و خوف. .خوف خاطرها تغلبت اليوم جابها و رضخت ليه بالسيف عليها ...
- ادخل !! شدها يكركر فيها من زندها للخربة لداخل
- تي سيب ....سيب !!نورمال ياخي !!! اش تحب ياخي ماتحشمش على روحك !!!
- اليوم تتفظ و هوني. ..
- اش عدنا نفظو يا وليد! ! أفهم انا مانحبكش راني مانحبكش ياخي بالسيف !!!
- انا نحبك.. نموت فيك. .. بنهبل عليك ماكش حاسة بيا علاه علاااااه !!!!! معاك راجل و عمري ماخممت نضرك مانيش.. سكت شويا وكمل يحكي... مانيش عارف علاه تصدي فيا و تخزريلي بإحتقار
- عيشك وليد عيش خويا افهم. .. افهم اللي راني.....
- انت لي افهم انت ...درا ماشي في بالك باش نخليك لغيري !!!!! تحلم و ربي تحلم
مسح على خشمو بصوابعو و هزها ينبه فيها ...
- حرمتك على غيري من اول نهار دق على خاطرك هذا..ضرب على صدرو... هوني سكنتك يا ليا انا يا ماتكوني لحد غيري...
- ياخي انت من اناهي طينة مصنوع !!! ماتحسش ماتسمعش ماتفرش لكلام !!! كيفاش قابل تجري وراء طفلة ماتحبكش ؟؟ كيفاش. .شوف قداه ذليت روحك..
- هههههههههه ..شداتو هستيريا تاع ضحك ختمها بتنهيدة تحكي وجعو من كلامها... ذل !!! تسمي هذا ذل !! ... قرب منها و بدأ يضرب على جبينها بصبعو. . الحب اسمو الحب لي انت مادامك تخمم بالطريقة هذي يعني مازالتي ماتعرفيهشي. .باش بنقنعك تو ..تحبيني نقتل روحي نشلط روحي ولا نشد عبد نفشخو اش نعمل راك قهرتيني يا طفلة..شادها من اكتافها يخض فيها و وقت لي هربت منو و بعدت زاد هبل. ..
- يا د... امي باش ناكلك انا !!! شو كيفاه تتهرب مني !! خايفة مني ايمان ؟؟
- رد بالك تحط عليا يدك وليد رد بالك ..عينيها حمارو بنظرات ثابتة تشوفلو في عينيه كينها تهدد فيه... نظرات حادة ماضية اخترقت صدرو خلاتو يوخر و يعطيها بظهرو ياقف و بعد يخرج و يخلاها...
خلاها تبكي موش عارفة اش تعمل في هالبلوة لي بلاها ربي بيها مش حاب يفهم و يبعدها ..حساتو خنقها بكلامو و تصرفاتو... حايرة بين تشكيه لبوها و لا لخوه و لا اش تعمل... كي حست روحها تفرهدت و قلبها برد و دمعتها نشفت قامت روحت ..تحمد ربي لي مازال بوها و راجل خالتها في الجامع هذاكا علاش زربت خطوتها باش ماتوحلش مع خالتها تعرفها باش تمضغها. ..
كانو لبنات يستناو فيها باش ينصبو الميدة زيد الشتوية لازمها حاجات سخونة للسهرية و كل ليلة جمعة يتفننو في حاجة ..
- بفففف كان بتت غادي خير وين كنتي يا زحي تي وحلوني في الزمر بروحي؟؟ .. هدى خلوقها لخشمها خاطر لكدوها في قصان السلاطة ...
- هاني جيت...
- نعرف جيت اما وين كنتي !!
- عند مفيدة
- اخزرلي ايمان!! ماتعرفش تكذب راك ..مفيدة كانت معايا في المغازة تقضي و روحنا فرد ثنية و فرد وقت. . وين كنت
- حلت عينيها تفجعت و قربتلها تجري توشوش... ماتقليش قلت لامك الي كنتي مع مفيدة !!!!
- لا ..علاش ؟؟
- خاطر هبطت و قلتلها ماشية نشوف مفيدة تعيطلي
- هييييه يا زحي كيف كذبت و مفيدة معايا ...انت ويييين ؟؟؟
- وليد... هدى لعبت عليها الدوخة. ..كنت مع وليد !!!!
-و شبيكي هبلتي ؟؟؟
- اسسسس ..بربي نقص حسك لاتسمعك خالتي... نضرتها تبدلت و اجتاحها الحزن...
- كيف خايفة من خالتك اش لازك عليه لي مايتسماش هذاك ... ياخي تحبي تكبر عليك لحكاية !! تخيل كان شافك حد مالحومة و رأس امي ماترحمي كان على روحك لاااااا و زيد مع وليد ولد علي !!!!!
- درا تستخايلني ميتة عليه انا الطحان !!! تي بالسيف و رحمة امي بالسيف عليها .. اش تحبني نعمل ... مشيت شفتو و سمعتو اما خير ولا يعملي فضيحة !!!
- ماخممتيش في الفضيحة كان شافوك معاه في الظلام !!!
- تي اكاهو عاد قصي..... ما شافني حد و زيد ربع ساعة و صرفتو ..خليه يفكني يعتقني...
- حطت يدها على فمها... باهي هاني سكتت تو . .. اما عدنا مانزيدو بعد لعشاء واياك تجيب سيرة لنعيمة توحلي راك ...
- شبيها نعيمة !! فاش باش توحل زادة !!!! ... هدت عليهم نعيمة تقول فرقة مكافحة الارهاب. .. شبيكم سكتوووو ؟؟؟؟
- مخيب راسك يا هم ماهو اعمل صوت كي تدخل هكاك هدان بففففف ... خزرت لايمان و عضت على شفايفها.. كنا نحكو على نعيمة بنت التوهامي تخطبت و قلتلها وحلت روحها بالسيف. .رتحت توا !!!!
- امممممم ..هيا ازربو هاو الرجال روحو
ساعتين تعداو من لي راها و تصدم للمرة الألف منها و من كلامها و نبرة صوتها. ..قاعد راس راس مع علولو عشيرو ماروحش للدار موش في جوو ...الغريب في القعدة الي هي خالية من الشرب ..ماهوش وقت سكرة تو ..تو لازمو يخمم بعقلانية و يحسبها و يعرف كيفاش يجيبها و يكسبها...
- شبيك كوبي انت !!! تي حتى كمية و حرمتنا منها
- علولو اش قولك في لي صار هاك تشوف خويا كل شي قدامك
- يييييييه تي راك نفختلي ........ منها هالحكاية الحولة افهم راهي بعثاتك وراء البلايك صديقي .
- ..................
- خويا ... تريقل في قعدتو و كمل يحكي. .. اسمعني كل شي بالمكتوب اما انت ياسر كبشت يا خويا خليها تتنفس بنت الناس. ..انت راك بالفازات متاعك تزيد تكرهها فيك
- انا شنوا فيا مايعجبش !!!! شنوا ناقصني !!!!... بدى صوتو يعلا مكنو لعصب صايي. .. والدين امها الدنيا ماعكستني كان في ايمان! !!
- علي بقى ساكت يسمع. . خاطر كان باش يزيد معاه باش يزيد يهبل... وليد يحكي مازال ماسكتو كان صونري التلفون ..رقم مايعرفوش...
- ناقص انا تو! !!
- شكون !!
- نعرش بفففف... حك شعرو بصوابعو كيما كل مرة يسخن و يفد....هز. ..
- وي !!
-(الو... وليد !!)
- اي.شكونك انت ؟؟
-(انا هدى بنت خال ايمان ... اكيد تعرف علاش طلبتك و بربي لا تعملي فيها الحمل الوديع و وابعد عالطفلة راك عملت الريحة... )
- ياامعلم .شبيك يا طفلة لباس ماهو داخلة فيا ترينو ؟؟؟ استنى الساعة انت اش مدخلك بيها؟
محامية وكلوك باش تحل فمك معايا !!
- زايد ولد شارع و كلوشار. .. كانك راجل ماتتهددتش عالطفلة و تضغط عليها باش تهبطلك .. كانك....
- شبي امك انت اعرف اش تخرج من جلغتك يا طفلة ..فروخ متاع وذني. .اصلا عديهالي خليها تحكي هي انا ماعندي ما نعمل معاك انت
- اصلا هذا كلامها دونك تعتبر الي هي قالتهولك سافا !!!
- تعرف اش تعمل انت ولا ؟؟ تقلب منظرك و تمشي تغسل ساقيك و ترقد عيش بنتي ..و فوتيني ننصحك ماتوحليش معايا و بنت خالتك قلها حسابك معايا ... علق عليها و يشد التلفون يفشخو عالحيط ...
- قوم نروحو
- شبيك ماو..........
- ما تزيدش على د......... امي راني لهنا. ...
ايمان ماكنتها الرعشة من تلفون هدى لي عيات و هي تقلها لا ماتكلموش فكنا منه اما هدى شدت صحيح و قالتلها لازم يفهم روحو ..و زيد كلامو في البارلار و غشو الواضح من نبرة صوتو زادت رعبتها. .. ناداها بوها باش يروحو كاهاو وقيت زيد غدوة خدامة. .. مشات خرجت على توصيات هدى و توشويشها ....
- نعيمة و هي تلح على خالها عمار ... بربي خالي خليها تبات هالليلة و غدوة تمشي للخدمة من هوني
- انا بنيتي ماشديتهاش كان تحب تبات على راحتها
- لا بابا خليها مرة اخرى اصلا عندي حوايج باش نريقلهم الليلة نستحقهم غدوة. .. هي في العادة تبات اما خوفها منه و من قرب دارو لدار خالتها خلاتها تتكهن حكايات حولة عليه في هاو بيهد عليها في هاو ممكن يعرضلها غدوة و بلا بلا بلا. ..
في اول النهج كانت معنكشة في بوها تحت البرنوص كالبنيات الصغار. .رات خيال عمل الدورة و عمالو و يقرب ... هو يقرب و هي تزيد تكبش في بوها ..
- بنيتي هذا الكل برد !!!
-عينيها معلقة فيه و هو زادم عليهم. . خيالو و وهرتو ديما حاضرين و هاكي الهية ديما يديه في جيابو و ينده قرب منهم و تلاقت العينين... في الوقت لي كانت هي تستنى في نضرات مميتة منه معبية تهديد و تلميح هو مرق فيها طول و طفاها و ماخزرلهاش بشطر عين..
- السلام... لباس عم عمار
- وليد لباس ولدي !! اش عامل
- هانا راكشين و برا ..انت لباس !
- الحمد لله ..كالعادة كنا عند الجماعة
- اممم باهي مالا عم عمار على خير
- على خير ليلتك زينة... كمل ثنيتو بخيال قاتم كل ما يزيد يخش الزناقي لمظلمة .. تتلفت مستنكرة الهدوء متاعو..على شعرة و تجي في القاعة مالرعب. .. هي ماتعرفش الي هو ذيب مستحيل يكون طبيعي وهي قدامو اما لازمو يظهر هكاك لازمو يبعد ....
ليام تجري خف لف ... هي غاطسة في خدمتها و هو لاهي في اومور الكانكيري.. من لي شدها و هي تعطي في خيرها طبعا باش تكون هكاك ماننسوش الي هو كونطابلي بطال حالو حال شطر لولاد في هالبلاد... يعرف يكنبص و يحسبلها تي حتى الحاج مرات وين يجي يطل عليه. ..
ايمان تعاني مسكينة لي كتبلها في جرت الخبزة المرة و الأمر منها الاستغلال لي تعاني فيه هي و صاحباتها لي يخدمو معاها... لا يزي المعاملة الخايبة و المنطق المرزي لا يزي السالار لمتفش... الله غالب في بلاد يتهان فيها الزوالي و خاصة بنات المعامل ماتنجم كان تسكت و ترضى بالذل في جرت الخبزة.. بنات الله اعلم بحالهم كيفاش وحدة مبطلة مالقراية وحدة أرملة وحدة مطلقة و وحدة يتيمة تعاني في خواتها... هذي الحاجات لي تخلي بنات في عمر الورد تقاصي السريان مالفجاري برد الشتاء وقبلي الصيف لي يحرق باش تخلص زوز صوردي مقابل ثلاثين يوم دهك يمشو شطرهم بين كريدي الحانوت و الترونصبور.... الشتاء بدأ يخرج و يودع و ليامات ولات تسخن الواحد ماذابيه يخفف في الدبش زيد المعمل يقلي بالسخانة. ..
- اش اش يا طفلة يا ايمان نكلم فيك ... !!
- شبي عزاك ابعدني لايشوفنا العرف ينحيلنا مالشهرية
- هههههه كنت باش نحكيلك عليه...
- شبيه زادة ؟؟؟
- مضروب فيك نبصم بالعشرة
- كب سعدك يا مفضوحة ..اش جي لبالك كي تخيلتي هالموال في الطاسة متاعك! !
- لا مانيش نتخيل اصلا لبنات الكل شلقو بيه يحوم بسوايحك و انت عاملة فيها مولا الدار موش هوني يا وحيدة...شافتلها بخبث... قر قر
- و رحمة امي لا عندي فيها لحكاية يا بنتي يهديك ماتكبرهاش عليا ..اش يهمني فيه خلي يحوم ولا حتى يا يبربص...
- صدقتك اما رد بالك منه راهو ساقط و ياما عداها على بنات قبل ..انا ماريتش اما لبنات قالولي الي راهو ملعب رد بالك
- شنيا نرد بالي و شنيا عداها عالبنات! !! يا بنتي فوتيني اش بيني و بينو يبعدني و يحط بلاه على غيري ايوااه
- اسكت هاو جاء ..ان شاء الله مايطلعش فاق بينا نحكو و سلمنا في الخدمة .....
-لبنات شنوا تو !! اكبسو رواحكم موش معقول راهو ..تلفت لايمان يذبل في عينيه مخيب منظرو... لباس مادمازال !!
- لباس.. ديراكت خزرت لصاحبتها ...
- أمم كي تكمل اخلط عليا للبيرو اومور الخدمة ماتعجبش خلاها مزبهلة في كلامو و تصرفاتو اش يقزز ...صاحبتها حطت صبعها على جبينها...
- قتلكش !!!!
- هههههههههه اما انت يقوى عليك ربي. ...
قدام الكانكيري كان ضاربلها قهوة مع شلتو احتفالا بال golf6
الجديدة متاعو ..يستاهل خاطرو خدم على روحو
و زيد فرح خوه بالكونط لي فتحهولو في فرنسا باش يسهللو البعثة متاعو...
- اه حومة!! ..ولد ناجية جابد عليه بالمقلوب ..الخدمة و ضمناها.. الكرهبة و شريناها .. وائل و اومورو مريقلة ..ماناقص كان الموجيرة ههههههههه
- ااش تحكي يا خويا تي سيب الراجل و صلي عالنبي محرش عينيك ... علي حاس بصاحبو تنرفز كي جبدلو ولد لحرام عالعرس تلفت شيرة القهوة. .. مصطفى !! يا صطوفة! ! هات وحدة بوقا لولد ناجية خل يبرد على قلبو
- هههههههههههههه توم و جيري زايد تقول خوات على روس بعضكم. ... سكت شويا مركز مع حاجة متعدية لفتتلو انتباهو ...
- تكلم ولد ناجية. .. تي هاذي موش ايمان بنت عمار !!
- جاوبو علي ... اي هي و انت اش دخلك ؟؟ اش يهمك تلهى في روحك يا ديني و انت تقول منيرة الهجالة
- تحكيلي عليها صاحبتي تخدم معاها في المعمل... كمل يترشف في كعبة البوقا... ظاهرة تلعب مليح... وليد عينيه حمارو كبس على بونيتو كان مش علي حط يدو على ساقو يهدي فيه. ..
- اتقى الله يا راجل منين ليك تحكي عالبنية يتيمة! !
- هههه مايتيمة كان امي .. تي عرفها حاط عينو عليها باش ياكلها ماكلة و هي عاملة فيها تتعزز .. ماغباكم في بوليتيك لبنات عاد
- لا لا مستحيل ايمان بنت حومتي ..مستحيل تعمل فازات المفرخ هذي
- انا قتلك لي سمعتو و الله اعلم إن كنت بحلم. .. كمل يشرب في قازوزتو و وليد يشرب في عرقو لي يتصبب على جبينو و رقبتو من كلام ولد الهاملة لي بحذاه ..كان موش علي شدو يهدي فيه بعينيه راهو كلالو ولديه بطريحة...خلاه لين غبر و نطرلو يدو يكلم فيه بغش...
- سيب ...... موش كان خليتني حككيتلو والديه بطريحة موش خير مامكتفني ضربة ضبرتين تغمزني ؟؟ اش نهدى بربي اش يهديني
- اسسسس القهوة تسمع مقابلتنا
- تي يمشو ...... .. الكل .. سكت شوي و كمل يحكي بنبرة اهدى شوي عاض على سنيييه. .. نبعد عليها شهر و نص شوف اش قاعد يصير !!! شوف اش قاعدة تعمل هي !! و هاك الطحان كمال عرفها اش يحب منها درا ماكفاتوش الطرايح لي كلاها في جرت خمجو و تبزنيسو على بنات الناس !!!
- يا وليد استهدى بالله ..تو ولد ناجية و تعرفو مايعرفش يحكي و زيد ايمان ماتعملهاش مع الساقط هذاك ..
- هذاك اش مكسرلي راسي انا .. اما لازمني نفهم لازمني..
- باهي اخطانا تو منها و خلينا مركحين جونا و راني مازلت طامع في دورة في هالكعبة راهي هبلتني
- ههه لي يسمعك يقول يحكي على طفلة..يدور في مفاتح الكرهبة
- يا ولدي ناخذ كريهبة كيما هاذي نصبح نبوس فيها و لا مرا تمرجني هههه
- انا غار ناخذ ايمان تمرجني كيما تحب يا صاحبي و حلال عليك هالgolf 6
- اووووو هذي لازمها كنباص ههههههه ..ااه يا صاحبي ربي يسهللك ...
ركبو عملو دورة كيما جات ..جربو فيها الكرهبة و تفرهدو شويا .. حبو يبعدو على الجو لمكهرب اما هو دخلاني يرحي منها و من كلام ولد ناجية قبيلة عليها و على الكلب عرفها. ..
مع الساعتين رجعت للمعمل تزرب ..سخانة تشوي البرة ماذابيها توصل في اسرع وقت... لقات لبنات كملو فطورهم و بداو الخدمة ... بعد سويعة يدخل سي كمال العرف مشحط روحو في سروال دجين و بودي لاصق يحب يصغر روحو بالسيف و هو مكهب عالاربعين ..كالعادة كان مايلصلص عينيه عالبنات و يكحل بالقدا... شافها تفارع في المابل الجديد لي كيف هبطوه مشالها يزرب. ..
- لا لا لا خلي عليك هاو لولاد هوني يا سليم !! فوزي !!! ارتاح ايمان موش خدمتك هاذي الرزن و الهم. .. هي مصدومة خاطر في العادة تكلت و تعاني في هالهم لي يحكي عليه ...كمل لي في يدك و ايجاني للبيرو عنا مانريقلو ..
- باهي سي كمال ... بقات تتسأل شبيه اش يحب منها؟ ؟ خزرت لصاحبتها تلقاها مركزة معاها و تعمللها بصبعها على عينها "رد بالك "
عامل روحو غاطس بين لوراق و مقطع روحو بالخدمة وقت دقت هي الباب ..
- ادخل... ماهزش راسو مالبيرو
- سي كمال ماو لباس شنوا لي موش عاجبك في الخدمة !!
- كل شي يا ايمان كل شي
- في بالي مريقل كل شي و نتصور هذاكا حدهم الجماعة. .. لتوا موش فاهمة اش يحب بالضبط
- نو نو...صفية موش عاجبتني خدمتها و زيد ماهيش منجمة تتلهى بالخدامة في غيابي و زيد كعبة لا في الحسابات
- أي مادامها كيما قلت حضرتك موش كفؤ شوف غيرها أهل للمنصب هذا و رتح مخك سي كمال... خزرلها بتمعن و تبسم...
- البديل موجود قدامي .... ايمان هزت حاجبها باستنكار مازالت تربط في الخيوط بكلامو و تلوج في ايجابات لعديد الأسئلة المستعجلة في راسها..وقت اختصر عليها هو تعبها الكل بالكلمات لي زادهم ...
- وي انت باش تكون المشرفة الجديدة على توكة لبنات. ..انت إنسانة خدامة و طموحة و مثقفة و الحاجات هاذم ماتتمتعش بيهم صفية للاسف و لبنات آخرين
- لا لا لا سي كمال الله لا يجعلني جرة باش نقطع رزق حد و خاصة صفية يااسر زوالية مافي حالهاش انا اهون منها عالاقل انجم نديباني روحي بالسالار الموجود اما هي مستحقة المنصب هذا و الفلوس. ..
- هههههههههههه اما انت ياااسر تتعامل بالعاطفة ااااااااه... تنهد ..
تنهد و قدم ظهرو بعد ماكان متبرص عالكرسي... شو يا.. ايمان عمرك لا تتعامل بالعاطفة في البزنس هوني كون ذيب باش ماتكلكش الذيوبة فهمتني !! و علاش باش تقطعلها رزقها انت !! هي شدت البوست هاذي بما فيه الكفاية و عدم الكفاءة متاعها خلاتني نشوف غيرها. ..كيما تنجم تجي غيرك زادة اما جات فيك انت...
- والله اش باش نقلك سي كمال. .... خليني نخمم ميسالش !! وتو نرجعلك
- خمم للا خمم اما ماتبطاش علينا الخدمة ما ترحمش راهي و عنا سلعة جديدة نحب نضرب ضربتي المرة هذي في السوق هذاك علاش نحب ناس فايقة معايا و حاذقة..
- باهي.. باهي سي كمال ان شاء الله مانبطاش ...جات خارجة ياخي عيطلها
- ايمان!!..تلفتتلو ....ماذابيا كان تنقصلي مالرسميات شنيا هذي سي سي .؟؟ كمال .. عيطلي كمال..
- باهي ... خرجت و طربقت الباب اش غزلها السخطة. .اما عرضو ليها موش بطال حتى طرف تي شبيه معناها باش تولي تخلص اكثر من 600دينار !! باش تولي عرفة على زميلاتها لبنات خاطر لولاد عندهم عرف واحدهم. .. زعما زهرت معاك يا طفلة و باش يخف التعب و السريااان ؟؟ باش تبدى تلعب بالفلوس و توفر لروحك و لبوك عيشة ماخير ؟؟؟ باش تحلق يا بنتي و تبدا بقيمتك اكثر و اكثر بين زميلاتك و في حومتك ... اما...اش عملنا في صفية! ! زوالية مسكينة و ام يتامة ربي يعينها...حرام عليا كان نقبل و نبهذل بحالها ...اما انا اش مدخلني !! ماضربتوش على يديه و قتلي خدمني في بلاصتها اصلا كيما قال هو كان موش انا راهو غيري باش يشد ..اما عن استحقاق خذيتها و هي خذات فرصتها اما موش كفؤ كيما قال. ... كانت تخدم موش مركزة جملة راسها تنفخ والأفكار واحدة تهزها و لخرى تجيبها....اما قداهاش مسكينة عداها عليها و مازال باش يتمادى خاطرها دغفة ... عبالها راسها بكلامو على النشاطة والثقافة و الكفائة لي عمرو ماقبل خدام من خدامتو على أساسها.... طاحت على راسها خاطر فيها فلوس و تعبها أقل طبعا... باش تخمم هي لكن هو حسم الأمر و قام بالخطوة لي لازم يعملها هكا و الا هكا ...
- سي كمال الكميونة وصلت هيا نهبطو. ..
- اقعد صفية اقعد.... بقى ساكت مشوار عارفها رزينة يجيبهالها على غفلة اما مايهموش كان في مصلحتو و مصلحتو نسرين توا ..... صفية نشوف فيك تاعبة و زيد الحمل ثقيل عليك دارك و صغارك و زيد مسؤوليتك تجاه خدمتك .. ربي يعينك
- لي خلق ما يضيع سي كمال. .. خيركم سابق ...ان شاء الله برك مانكونش مقصرة في حاجة ؟؟ سكتت و كيما اي مرا قلليلة مشى في بالها باش يمدلها تفتوفة بريم مادامو جبدلها على صغيراتها. ...
- شوف اختي صفية. .هاك تشوف لحسابات كثرت و خدمتنا لي كانت عالورق ولات بالماشين ..بيسييات و لوجيسيالات عندهم ناس قاريتهم و فاهمة فيهم
- اي تبارك الله يربحو الوقت و الفلوس... مسكينة بوهالية لتوا لا فهماتو لوين يحب يوصل اما هو ماعندوش وين يدور الريح ذدم فرد مرة خاطر طلعتلو السخانة بتبهليلها....
- نجيك مللخر يا صفية.. معاش نلتزمولك في البوست هاذي خاطر لقينا شكون غيرك افهم منك و زيد اصغر و انشط. ..
- ع..علاش !!!! شوفتو اي تقصير مني !!! انا شكون شكاني ليكم لا سمح الله! !!!!
- لا لا لا...نفخ .... خدمتك على عيني و راسي و بارك الله فيك اما كيما قتلك لازمنا بارسونال قاري
- عينيها دمعت الكازي تسخف. .. غلبتها العبرة و تحس بالكلام ذاب في مدفع فمها. .. راني زوالية ..تعرف الي شديتها لبلاصة خاطركم ساخفين عليا و انا مانستاهلهاش اما. ... تمسح في دموعها...
- نو نو نو ماتخافش يا صفية فليساتك حتى كان نقصو ماهمش باش ياثرو يعني ماتخافش
- بالحق سي كمال. .. كان تحب نزيد سوايع زايدة. .نمسح و نلم الكرادن المهم الشهرية مانتقص بربي شوفلي بعين الرحمة...
- صفية يا صفية انا قتلك باش نبدلك من البوست موش باش انحيلك فلوسك..ايا قوم عيش اختي شوف خدمتك
- بارك الله فيك سي كمال... ربي يفضلك ربي يعطيك ماتتمنى ربي يدوملك رزقك..
- باهي صفية باهي ..برا شوف خدمتك .... عدى يديه على شعرو يحس في لذة التقدم نحو الهدف متاعو و الظفر بيها ... اكاهو وقيت باش يبدى في الصحيح لازمو يحسبلها بالقدا بالرغم يعرف إلى هي موش باش اتعبو خاطر تظهر بااارشا على نياتها اما لازمو مايخليلهاش ثغرة وحدة للشك. ...
●●●●●●●●●●●●
الليلة وائل باش يركب لفرانسا و يباشر قرايتو غادي بالطبيعة حاجة تفرح. .هذاكا علاش الحاج حلف مايتذبح كان علوش للبركة يقول لازم نسيلو الدم باش تهبط البركة.... الجيران الكل ملمونين في دار الحاج علي مع ريحة الكسكسي لي تفحفح من اخر النهج .. لبنات تحرك و العزارة تنبر و تفدلك عليهم. .الا ايمان لتو لا جات اليوم مخرة على غير عادتها ..وليد هايج موجة تجيب و موجة تهز فيه في راسو ألف و الفين فكرة و هاجس ..هو يعرف وقت خروجها مالخدمة اما اليوم وينها شبيها مابانتش .... هي خرجت في وقتها متاع العادة و من غير ما توخر اما عرفها عطلها و شدها بالكلام ...
- اه اش قلت تو؟؟
- سي كمال .
<><>
الحلقة 6
يا حاج الطفل مبلع فيها غار ربي يهديه
- اي هذا الكل متفاهمين فيه اما الطفلة ... سالتوهاش عندكمش فكرة عليها ميالة ليه ولا. ..تمشيش تحشمي روحك و تحشميني معاك
- لي نعرفو ماعندها حد في حياتها يعني ماعندهاش علاه ترفض
- دبري راسك ااعفيني من خناركم و اكيد مدامها هاكي دايرة بيك اكيد طبخينها على نار هادية
- انت قول ربي يسهل و خلي الباقي عليا ... تو انا نزيد نكبس عليه الطفل شويا فماش ما يرزن ...في الوقت هذاك وليد كان متعدي للتوالات و سمع اسمها عرفهم يحكيو عليها قعد واقف ماد وجهو
- اما اش باش نعملولو في قرايتو هاو قالك يجري على البعثة متاعو البرة و زيد بنت الناس ت. ....
- قراية اشنهي !! و بعثة اشنهي!!!! ماتقليش تحكي على وائل ؟؟؟
- انت لي ماتقليش تحكي على وليد ؟؟؟؟ لا عاااااد لا عاااد ... كلام بوه و هو مستغرب كلام لطيفة لي كانت تقصد فيه هو بحديثها جرحو و وجعو في قلبو على مرتين باش يهد عليهم يقلب الكوجينة فقاني تحتاني و يقلهم باش ناخذها كان انا و حد ما يفتي ...
- يا راجل شبيك تو وائل مزال بعيد عالماخذة و شكون جاب سيرتو ..انا نحكي على وليد
- لا انت اكيد ضبعتي تو باش تمرمد بنت الناس في جرت واحد طايش !!
- شبيه ولدي راجل و سيد الرجال .. خدام و لباس عليه و زيد عينو في البنية و نعرف ولدي يهني عليها و مايوصلهاش بالخايب تي كبدتي و نعرفو ..تصدق احن من وائل والله و ارطب ..هاني ندعيلو بالهداية تي طيش تو يفد و يعقل كي يعمل مسؤولية تو يعقل
- لا الاه الا الله. .. اسمعني تو مانغير مانغطو عين الشمس بالغربال يا لطيفة. .. صلح ولدك الساعة خليه يفيق على وضعو و يبطللي هالسناسة و الخلط الزفتة وتو يعمل الله دليل اما انك تلزيني باش نحشم روحي مع عمار لا ..الطفلة كيف الوردة ماتهونش و ماهيش هاربة الطفلة كان فما مكتوب و راسك ماتبات كان عندو. ..يصلح روحو برك...
- باهي صل عالنبي ... انا نعرف كيف نتصرف معاه ..اشرب قهوتك راي بردت ....
دخل و طربق الباب على قوة جهدو فاد مخنوق و موش عارف اش يعمل يفبري بكلو ... يحبها يموت عليها اما ستانس بالشراب موش منجم يبطلو يا خوفو يتحول للادمان وقتها ينساها جملة وحدة ايمان ... باهي هذي طبيعتو واعر و مشاكلي ساعات اما مايظلم حد. .. يزيد دمو يفور كي يتفكر بكري كيف تتضيحك مع خوه وهو موش معبراتو جملة يتفكر في كلام بوه و كيف يستخايب كلام مرتو على وائل ..ايمان و وائل !!!!! لااااا ... يحس براسو باش يترشق شدو يحك في شعرو بصوابعو فازة يعملها كي تهس عليه كمية اما لا مش وقت شرب تو ...
تحت بوطون الضو كانت تشيع فيها منيرة بعينيها و تطبخ على نار هادية ...
- وينك يا بنتي !!! نص ساعة على ورقتين معدنوس !!
- هاكا حدي خالتي شدتني طاطا لطيفة و منيرة بالحديث
- منيرة الهجالة !!! خيييت ديما تسعسع كالكلبة
- ههههههههههههههه ... وينهم لبنات.؟؟
- مشاو كلمهم بوهم باش يمسحلو المغازة .. برا كان تحب
- لا تو نبقى نعاونك
- باهي سلم بنتي حطلي الكسكسي النهار راح ... تلفونها صونا ...
- الو !!
- أخرج هاني تستنى فيك ورا دار خالتك
- ع...ععلاش ..احم ...شكون! ! خالتها تخزرلها مركزة معاها و هي مالصدمة شلقت على روحها. .. صوتو رهوجها و ماتوقعتشي يوصل يتواقح للدرجه هاكي معاها هو عرفاتو من نبرة صوتو ...بقات ساكتة ممزقة بين تلفونو و بين عينين خالتها لي باش تكلها ..
- كلمتين يا تهبط يا نطلع نهد عليك غادي و تعرفني نعملها را .....
- باهي باهي ...علقت و هربت تشوف للكسكاس من خزرة خالتها
- شكون !!
- مم... مفيدة صاحبتي قاتلي شفتك عند خالتك
- امم باهي اغسلي الصينية واهبطلها كان تحب
- باهي... قالتها بغصرة تتمنى تقلها راهو هو وراني مانحبش نهبطلو اما خايفة يفضحني في الحومة و يبدى ينادي كي مانهبطلوش يعملها راهو مجنون... مام با درجين و هبطت اما لي زاد خوفها الدنيا لي بدات تظلم ..تمشي بزربة و تتلفت وراها خايفة يشوفهاش حد مالحومة و هي تدعي عليه و تسحسح دخلاني ... تلوج بعينيها شافاتو قاعد على حجرة يتكيف ...من حسن حظها الي البلاصة جاية الداخل ماتتشافش كالخربة ورا دار خالتها ...حس بيها و بخطواتها المتسارعة مالربثة و الخوف ...
- شبيك اش تحب !! قالتها اما مش كالعادة المرة هاذي نبرة كلها انهزام و خوف. .خوف خاطرها تغلبت اليوم جابها و رضخت ليه بالسيف عليها ...
- ادخل !! شدها يكركر فيها من زندها للخربة لداخل
- تي سيب ....سيب !!نورمال ياخي !!! اش تحب ياخي ماتحشمش على روحك !!!
- اليوم تتفظ و هوني. ..
- اش عدنا نفظو يا وليد! ! أفهم انا مانحبكش راني مانحبكش ياخي بالسيف !!!
- انا نحبك.. نموت فيك. .. بنهبل عليك ماكش حاسة بيا علاه علاااااه !!!!! معاك راجل و عمري ماخممت نضرك مانيش.. سكت شويا وكمل يحكي... مانيش عارف علاه تصدي فيا و تخزريلي بإحتقار
- عيشك وليد عيش خويا افهم. .. افهم اللي راني.....
- انت لي افهم انت ...درا ماشي في بالك باش نخليك لغيري !!!!! تحلم و ربي تحلم
الحلقة 7
مسح على خشمو بصوابعو و هزها ينبه فيها ...
- حرمتك على غيري من اول نهار دق على خاطرك هذا..ضرب على صدرو... هوني سكنتك يا ليا انا يا ماتكوني لحد غيري...
- ياخي انت من اناهي طينة مصنوع !!! ماتحسش ماتسمعش ماتفرش لكلام !!! كيفاش قابل تجري وراء طفلة ماتحبكش ؟؟ كيفاش. .شوف قداه ذليت روحك..
- هههههههههه ..شداتو هستيريا تاع ضحك ختمها بتنهيدة تحكي وجعو من كلامها... ذل !!! تسمي هذا ذل !! ... قرب منها و بدأ يضرب على جبينها بصبعو. . الحب اسمو الحب لي انت مادامك تخمم بالطريقة هذي يعني مازالتي ماتعرفيهشي. .باش بنقنعك تو ..تحبيني نقتل روحي نشلط روحي ولا نشد عبد نفشخو اش نعمل راك قهرتيني يا طفلة..شادها من اكتافها يخض فيها و وقت لي هربت منو و بعدت زاد هبل. ..
- يا د... امي باش ناكلك انا !!! شو كيفاه تتهرب مني !! خايفة مني ايمان ؟؟
- رد بالك تحط عليا يدك وليد رد بالك ..عينيها حمارو بنظرات ثابتة تشوفلو في عينيه كينها تهدد فيه... نظرات حادة ماضية اخترقت صدرو خلاتو يوخر و يعطيها بظهرو ياقف و بعد يخرج و يخلاها...
خلاها تبكي موش عارفة اش تعمل في هالبلوة لي بلاها ربي بيها مش حاب يفهم و يبعدها ..حساتو خنقها بكلامو و تصرفاتو... حايرة بين تشكيه لبوها و لا لخوه و لا اش تعمل... كي حست روحها تفرهدت و قلبها برد و دمعتها نشفت قامت روحت ..تحمد ربي لي مازال بوها و راجل خالتها في الجامع هذاكا علاش زربت خطوتها باش ماتوحلش مع خالتها تعرفها باش تمضغها. ..
كانو لبنات يستناو فيها باش ينصبو الميدة زيد الشتوية لازمها حاجات سخونة للسهرية و كل ليلة جمعة يتفننو في حاجة ..
- بفففف كان بتت غادي خير وين كنتي يا زحي تي وحلوني في الزمر بروحي؟؟ .. هدى خلوقها لخشمها خاطر لكدوها في قصان السلاطة ...
- هاني جيت...
- نعرف جيت اما وين كنتي !!
- عند مفيدة
- اخزرلي ايمان!! ماتعرفش تكذب راك ..مفيدة كانت معايا في المغازة تقضي و روحنا فرد ثنية و فرد وقت. . وين كنت
- حلت عينيها تفجعت و قربتلها تجري توشوش... ماتقليش قلت لامك الي كنتي مع مفيدة !!!!
- لا ..علاش ؟؟
- خاطر هبطت و قلتلها ماشية نشوف مفيدة تعيطلي
- هييييه يا زحي كيف كذبت و مفيدة معايا ...انت ويييين ؟؟؟
- وليد... هدى لعبت عليها الدوخة. ..كنت مع وليد !!!!
-و شبيكي هبلتي ؟؟؟
- اسسسس ..بربي نقص حسك لاتسمعك خالتي... نضرتها تبدلت و اجتاحها الحزن...
- كيف خايفة من خالتك اش لازك عليه لي مايتسماش هذاك ... ياخي تحبي تكبر عليك لحكاية !! تخيل كان شافك حد مالحومة و رأس امي ماترحمي كان على روحك لاااااا و زيد مع وليد ولد علي !!!!!
- درا تستخايلني ميتة عليه انا الطحان !!! تي بالسيف و رحمة امي بالسيف عليها .. اش تحبني نعمل ... مشيت شفتو و سمعتو اما خير ولا يعملي فضيحة !!!
- ماخممتيش في الفضيحة كان شافوك معاه في الظلام !!!
- تي اكاهو عاد قصي..... ما شافني حد و زيد ربع ساعة و صرفتو ..خليه يفكني يعتقني...
- حطت يدها على فمها... باهي هاني سكتت تو . .. اما عدنا مانزيدو بعد لعشاء واياك تجيب سيرة لنعيمة توحلي راك ...
- شبيها نعيمة !! فاش باش توحل زادة !!!! ... هدت عليهم نعيمة تقول فرقة مكافحة الارهاب. .. شبيكم سكتوووو ؟؟؟؟
- مخيب راسك يا هم ماهو اعمل صوت كي تدخل هكاك هدان بففففف ... خزرت لايمان و عضت على شفايفها.. كنا نحكو على نعيمة بنت التوهامي تخطبت و قلتلها وحلت روحها بالسيف. .رتحت توا !!!!
- امممممم ..هيا ازربو هاو الرجال روحو
ساعتين تعداو من لي راها و تصدم للمرة الألف منها و من كلامها و نبرة صوتها. ..قاعد راس راس مع علولو عشيرو ماروحش للدار موش في جوو ...الغريب في القعدة الي هي خالية من الشرب ..ماهوش وقت سكرة تو ..تو لازمو يخمم بعقلانية و يحسبها و يعرف كيفاش يجيبها و يكسبها...
- شبيك كوبي انت !!! تي حتى كمية و حرمتنا منها
- علولو اش قولك في لي صار هاك تشوف خويا كل شي قدامك
- يييييييه تي راك نفختلي ........ منها هالحكاية الحولة افهم راهي بعثاتك وراء البلايك صديقي .
- ..................
- خويا ... تريقل في قعدتو و كمل يحكي. .. اسمعني كل شي بالمكتوب اما انت ياسر كبشت يا خويا خليها تتنفس بنت الناس. ..انت راك بالفازات متاعك تزيد تكرهها فيك
- انا شنوا فيا مايعجبش !!!! شنوا ناقصني !!!!... بدى صوتو يعلا مكنو لعصب صايي. .. والدين امها الدنيا ماعكستني كان في ايمان! !!
- علي بقى ساكت يسمع. . خاطر كان باش يزيد معاه باش يزيد يهبل... وليد يحكي مازال ماسكتو كان صونري التلفون ..رقم مايعرفوش...
- ناقص انا تو! !!
- شكون !!
- نعرش بفففف... حك شعرو بصوابعو كيما كل مرة يسخن و يفد....هز. ..
- وي !!
-(الو... وليد !!)
- اي.شكونك انت ؟؟
-(انا هدى بنت خال ايمان ... اكيد تعرف علاش طلبتك و بربي لا تعملي فيها الحمل الوديع و وابعد عالطفلة راك عملت الريحة... )
- ياامعلم .شبيك يا طفلة لباس ماهو داخلة فيا ترينو ؟؟؟ استنى الساعة انت اش مدخلك بيها؟
الحلقة 8
محامية وكلوك باش تحل فمك معايا !!
- زايد ولد شارع و كلوشار. .. كانك راجل ماتتهددتش عالطفلة و تضغط عليها باش تهبطلك .. كانك....
- شبي امك انت اعرف اش تخرج من جلغتك يا طفلة ..فروخ متاع وذني. .اصلا عديهالي خليها تحكي هي انا ماعندي ما نعمل معاك انت
- اصلا هذا كلامها دونك تعتبر الي هي قالتهولك سافا !!!
- تعرف اش تعمل انت ولا ؟؟ تقلب منظرك و تمشي تغسل ساقيك و ترقد عيش بنتي ..و فوتيني ننصحك ماتوحليش معايا و بنت خالتك قلها حسابك معايا ... علق عليها و يشد التلفون يفشخو عالحيط ...
- قوم نروحو
- شبيك ماو..........
- ما تزيدش على د......... امي راني لهنا. ...
ايمان ماكنتها الرعشة من تلفون هدى لي عيات و هي تقلها لا ماتكلموش فكنا منه اما هدى شدت صحيح و قالتلها لازم يفهم روحو ..و زيد كلامو في البارلار و غشو الواضح من نبرة صوتو زادت رعبتها. .. ناداها بوها باش يروحو كاهاو وقيت زيد غدوة خدامة. .. مشات خرجت على توصيات هدى و توشويشها ....
- نعيمة و هي تلح على خالها عمار ... بربي خالي خليها تبات هالليلة و غدوة تمشي للخدمة من هوني
- انا بنيتي ماشديتهاش كان تحب تبات على راحتها
- لا بابا خليها مرة اخرى اصلا عندي حوايج باش نريقلهم الليلة نستحقهم غدوة. .. هي في العادة تبات اما خوفها منه و من قرب دارو لدار خالتها خلاتها تتكهن حكايات حولة عليه في هاو بيهد عليها في هاو ممكن يعرضلها غدوة و بلا بلا بلا. ..
في اول النهج كانت معنكشة في بوها تحت البرنوص كالبنيات الصغار. .رات خيال عمل الدورة و عمالو و يقرب ... هو يقرب و هي تزيد تكبش في بوها ..
- بنيتي هذا الكل برد !!!
-عينيها معلقة فيه و هو زادم عليهم. . خيالو و وهرتو ديما حاضرين و هاكي الهية ديما يديه في جيابو و ينده قرب منهم و تلاقت العينين... في الوقت لي كانت هي تستنى في نضرات مميتة منه معبية تهديد و تلميح هو مرق فيها طول و طفاها و ماخزرلهاش بشطر عين..
- السلام... لباس عم عمار
- وليد لباس ولدي !! اش عامل
- هانا راكشين و برا ..انت لباس !
- الحمد لله ..كالعادة كنا عند الجماعة
- اممم باهي مالا عم عمار على خير
- على خير ليلتك زينة... كمل ثنيتو بخيال قاتم كل ما يزيد يخش الزناقي لمظلمة .. تتلفت مستنكرة الهدوء متاعو..على شعرة و تجي في القاعة مالرعب. .. هي ماتعرفش الي هو ذيب مستحيل يكون طبيعي وهي قدامو اما لازمو يظهر هكاك لازمو يبعد ....
ليام تجري خف لف ... هي غاطسة في خدمتها و هو لاهي في اومور الكانكيري.. من لي شدها و هي تعطي في خيرها طبعا باش تكون هكاك ماننسوش الي هو كونطابلي بطال حالو حال شطر لولاد في هالبلاد... يعرف يكنبص و يحسبلها تي حتى الحاج مرات وين يجي يطل عليه. ..
ايمان تعاني مسكينة لي كتبلها في جرت الخبزة المرة و الأمر منها الاستغلال لي تعاني فيه هي و صاحباتها لي يخدمو معاها... لا يزي المعاملة الخايبة و المنطق المرزي لا يزي السالار لمتفش... الله غالب في بلاد يتهان فيها الزوالي و خاصة بنات المعامل ماتنجم كان تسكت و ترضى بالذل في جرت الخبزة.. بنات الله اعلم بحالهم كيفاش وحدة مبطلة مالقراية وحدة أرملة وحدة مطلقة و وحدة يتيمة تعاني في خواتها... هذي الحاجات لي تخلي بنات في عمر الورد تقاصي السريان مالفجاري برد الشتاء وقبلي الصيف لي يحرق باش تخلص زوز صوردي مقابل ثلاثين يوم دهك يمشو شطرهم بين كريدي الحانوت و الترونصبور.... الشتاء بدأ يخرج و يودع و ليامات ولات تسخن الواحد ماذابيه يخفف في الدبش زيد المعمل يقلي بالسخانة. ..
- اش اش يا طفلة يا ايمان نكلم فيك ... !!
- شبي عزاك ابعدني لايشوفنا العرف ينحيلنا مالشهرية
- هههههه كنت باش نحكيلك عليه...
- شبيه زادة ؟؟؟
- مضروب فيك نبصم بالعشرة
- كب سعدك يا مفضوحة ..اش جي لبالك كي تخيلتي هالموال في الطاسة متاعك! !
- لا مانيش نتخيل اصلا لبنات الكل شلقو بيه يحوم بسوايحك و انت عاملة فيها مولا الدار موش هوني يا وحيدة...شافتلها بخبث... قر قر
- و رحمة امي لا عندي فيها لحكاية يا بنتي يهديك ماتكبرهاش عليا ..اش يهمني فيه خلي يحوم ولا حتى يا يبربص...
- صدقتك اما رد بالك منه راهو ساقط و ياما عداها على بنات قبل ..انا ماريتش اما لبنات قالولي الي راهو ملعب رد بالك
- شنيا نرد بالي و شنيا عداها عالبنات! !! يا بنتي فوتيني اش بيني و بينو يبعدني و يحط بلاه على غيري ايوااه
- اسكت هاو جاء ..ان شاء الله مايطلعش فاق بينا نحكو و سلمنا في الخدمة .....
-لبنات شنوا تو !! اكبسو رواحكم موش معقول راهو ..تلفت لايمان يذبل في عينيه مخيب منظرو... لباس مادمازال !!
- لباس.. ديراكت خزرت لصاحبتها ...
- أمم كي تكمل اخلط عليا للبيرو اومور الخدمة ماتعجبش خلاها مزبهلة في كلامو و تصرفاتو اش يقزز ...صاحبتها حطت صبعها على جبينها...
- قتلكش !!!!
- هههههههههه اما انت يقوى عليك ربي. ...
قدام الكانكيري كان ضاربلها قهوة مع شلتو احتفالا بال golf6
الجديدة متاعو ..يستاهل خاطرو خدم على روحو
الحلقة 9
و زيد فرح خوه بالكونط لي فتحهولو في فرنسا باش يسهللو البعثة متاعو...
- اه حومة!! ..ولد ناجية جابد عليه بالمقلوب ..الخدمة و ضمناها.. الكرهبة و شريناها .. وائل و اومورو مريقلة ..ماناقص كان الموجيرة ههههههههه
- ااش تحكي يا خويا تي سيب الراجل و صلي عالنبي محرش عينيك ... علي حاس بصاحبو تنرفز كي جبدلو ولد لحرام عالعرس تلفت شيرة القهوة. .. مصطفى !! يا صطوفة! ! هات وحدة بوقا لولد ناجية خل يبرد على قلبو
- هههههههههههههه توم و جيري زايد تقول خوات على روس بعضكم. ... سكت شويا مركز مع حاجة متعدية لفتتلو انتباهو ...
- تكلم ولد ناجية. .. تي هاذي موش ايمان بنت عمار !!
- جاوبو علي ... اي هي و انت اش دخلك ؟؟ اش يهمك تلهى في روحك يا ديني و انت تقول منيرة الهجالة
- تحكيلي عليها صاحبتي تخدم معاها في المعمل... كمل يترشف في كعبة البوقا... ظاهرة تلعب مليح... وليد عينيه حمارو كبس على بونيتو كان مش علي حط يدو على ساقو يهدي فيه. ..
- اتقى الله يا راجل منين ليك تحكي عالبنية يتيمة! !
- هههه مايتيمة كان امي .. تي عرفها حاط عينو عليها باش ياكلها ماكلة و هي عاملة فيها تتعزز .. ماغباكم في بوليتيك لبنات عاد
- لا لا مستحيل ايمان بنت حومتي ..مستحيل تعمل فازات المفرخ هذي
- انا قتلك لي سمعتو و الله اعلم إن كنت بحلم. .. كمل يشرب في قازوزتو و وليد يشرب في عرقو لي يتصبب على جبينو و رقبتو من كلام ولد الهاملة لي بحذاه ..كان موش علي شدو يهدي فيه بعينيه راهو كلالو ولديه بطريحة...خلاه لين غبر و نطرلو يدو يكلم فيه بغش...
- سيب ...... موش كان خليتني حككيتلو والديه بطريحة موش خير مامكتفني ضربة ضبرتين تغمزني ؟؟ اش نهدى بربي اش يهديني
- اسسسس القهوة تسمع مقابلتنا
- تي يمشو ...... .. الكل .. سكت شوي و كمل يحكي بنبرة اهدى شوي عاض على سنيييه. .. نبعد عليها شهر و نص شوف اش قاعد يصير !!! شوف اش قاعدة تعمل هي !! و هاك الطحان كمال عرفها اش يحب منها درا ماكفاتوش الطرايح لي كلاها في جرت خمجو و تبزنيسو على بنات الناس !!!
- يا وليد استهدى بالله ..تو ولد ناجية و تعرفو مايعرفش يحكي و زيد ايمان ماتعملهاش مع الساقط هذاك ..
- هذاك اش مكسرلي راسي انا .. اما لازمني نفهم لازمني..
- باهي اخطانا تو منها و خلينا مركحين جونا و راني مازلت طامع في دورة في هالكعبة راهي هبلتني
- ههه لي يسمعك يقول يحكي على طفلة..يدور في مفاتح الكرهبة
- يا ولدي ناخذ كريهبة كيما هاذي نصبح نبوس فيها و لا مرا تمرجني هههه
- انا غار ناخذ ايمان تمرجني كيما تحب يا صاحبي و حلال عليك هالgolf 6
- اووووو هذي لازمها كنباص ههههههه ..ااه يا صاحبي ربي يسهللك ...
ركبو عملو دورة كيما جات ..جربو فيها الكرهبة و تفرهدو شويا .. حبو يبعدو على الجو لمكهرب اما هو دخلاني يرحي منها و من كلام ولد ناجية قبيلة عليها و على الكلب عرفها. ..
مع الساعتين رجعت للمعمل تزرب ..سخانة تشوي البرة ماذابيها توصل في اسرع وقت... لقات لبنات كملو فطورهم و بداو الخدمة ... بعد سويعة يدخل سي كمال العرف مشحط روحو في سروال دجين و بودي لاصق يحب يصغر روحو بالسيف و هو مكهب عالاربعين ..كالعادة كان مايلصلص عينيه عالبنات و يكحل بالقدا... شافها تفارع في المابل الجديد لي كيف هبطوه مشالها يزرب. ..
- لا لا لا خلي عليك هاو لولاد هوني يا سليم !! فوزي !!! ارتاح ايمان موش خدمتك هاذي الرزن و الهم. .. هي مصدومة خاطر في العادة تكلت و تعاني في هالهم لي يحكي عليه ...كمل لي في يدك و ايجاني للبيرو عنا مانريقلو ..
- باهي سي كمال ... بقات تتسأل شبيه اش يحب منها؟ ؟ خزرت لصاحبتها تلقاها مركزة معاها و تعمللها بصبعها على عينها "رد بالك "
عامل روحو غاطس بين لوراق و مقطع روحو بالخدمة وقت دقت هي الباب ..
- ادخل... ماهزش راسو مالبيرو
- سي كمال ماو لباس شنوا لي موش عاجبك في الخدمة !!
- كل شي يا ايمان كل شي
- في بالي مريقل كل شي و نتصور هذاكا حدهم الجماعة. .. لتوا موش فاهمة اش يحب بالضبط
- نو نو...صفية موش عاجبتني خدمتها و زيد ماهيش منجمة تتلهى بالخدامة في غيابي و زيد كعبة لا في الحسابات
- أي مادامها كيما قلت حضرتك موش كفؤ شوف غيرها أهل للمنصب هذا و رتح مخك سي كمال... خزرلها بتمعن و تبسم...
- البديل موجود قدامي .... ايمان هزت حاجبها باستنكار مازالت تربط في الخيوط بكلامو و تلوج في ايجابات لعديد الأسئلة المستعجلة في راسها..وقت اختصر عليها هو تعبها الكل بالكلمات لي زادهم ...
- وي انت باش تكون المشرفة الجديدة على توكة لبنات. ..انت إنسانة خدامة و طموحة و مثقفة و الحاجات هاذم ماتتمتعش بيهم صفية للاسف و لبنات آخرين
- لا لا لا سي كمال الله لا يجعلني جرة باش نقطع رزق حد و خاصة صفية يااسر زوالية مافي حالهاش انا اهون منها عالاقل انجم نديباني روحي بالسالار الموجود اما هي مستحقة المنصب هذا و الفلوس. ..
- هههههههههههه اما انت ياااسر تتعامل بالعاطفة ااااااااه... تنهد ..
الحلقة 10
تنهد و قدم ظهرو بعد ماكان متبرص عالكرسي... شو يا.. ايمان عمرك لا تتعامل بالعاطفة في البزنس هوني كون ذيب باش ماتكلكش الذيوبة فهمتني !! و علاش باش تقطعلها رزقها انت !! هي شدت البوست هاذي بما فيه الكفاية و عدم الكفاءة متاعها خلاتني نشوف غيرها. ..كيما تنجم تجي غيرك زادة اما جات فيك انت...
- والله اش باش نقلك سي كمال. .... خليني نخمم ميسالش !! وتو نرجعلك
- خمم للا خمم اما ماتبطاش علينا الخدمة ما ترحمش راهي و عنا سلعة جديدة نحب نضرب ضربتي المرة هذي في السوق هذاك علاش نحب ناس فايقة معايا و حاذقة..
- باهي.. باهي سي كمال ان شاء الله مانبطاش ...جات خارجة ياخي عيطلها
- ايمان!!..تلفتتلو ....ماذابيا كان تنقصلي مالرسميات شنيا هذي سي سي .؟؟ كمال .. عيطلي كمال..
- باهي ... خرجت و طربقت الباب اش غزلها السخطة. .اما عرضو ليها موش بطال حتى طرف تي شبيه معناها باش تولي تخلص اكثر من 600دينار !! باش تولي عرفة على زميلاتها لبنات خاطر لولاد عندهم عرف واحدهم. .. زعما زهرت معاك يا طفلة و باش يخف التعب و السريااان ؟؟ باش تبدى تلعب بالفلوس و توفر لروحك و لبوك عيشة ماخير ؟؟؟ باش تحلق يا بنتي و تبدا بقيمتك اكثر و اكثر بين زميلاتك و في حومتك ... اما...اش عملنا في صفية! ! زوالية مسكينة و ام يتامة ربي يعينها...حرام عليا كان نقبل و نبهذل بحالها ...اما انا اش مدخلني !! ماضربتوش على يديه و قتلي خدمني في بلاصتها اصلا كيما قال هو كان موش انا راهو غيري باش يشد ..اما عن استحقاق خذيتها و هي خذات فرصتها اما موش كفؤ كيما قال. ... كانت تخدم موش مركزة جملة راسها تنفخ والأفكار واحدة تهزها و لخرى تجيبها....اما قداهاش مسكينة عداها عليها و مازال باش يتمادى خاطرها دغفة ... عبالها راسها بكلامو على النشاطة والثقافة و الكفائة لي عمرو ماقبل خدام من خدامتو على أساسها.... طاحت على راسها خاطر فيها فلوس و تعبها أقل طبعا... باش تخمم هي لكن هو حسم الأمر و قام بالخطوة لي لازم يعملها هكا و الا هكا ...
- سي كمال الكميونة وصلت هيا نهبطو. ..
- اقعد صفية اقعد.... بقى ساكت مشوار عارفها رزينة يجيبهالها على غفلة اما مايهموش كان في مصلحتو و مصلحتو نسرين توا ..... صفية نشوف فيك تاعبة و زيد الحمل ثقيل عليك دارك و صغارك و زيد مسؤوليتك تجاه خدمتك .. ربي يعينك
- لي خلق ما يضيع سي كمال. .. خيركم سابق ...ان شاء الله برك مانكونش مقصرة في حاجة ؟؟ سكتت و كيما اي مرا قلليلة مشى في بالها باش يمدلها تفتوفة بريم مادامو جبدلها على صغيراتها. ...
- شوف اختي صفية. .هاك تشوف لحسابات كثرت و خدمتنا لي كانت عالورق ولات بالماشين ..بيسييات و لوجيسيالات عندهم ناس قاريتهم و فاهمة فيهم
- اي تبارك الله يربحو الوقت و الفلوس... مسكينة بوهالية لتوا لا فهماتو لوين يحب يوصل اما هو ماعندوش وين يدور الريح ذدم فرد مرة خاطر طلعتلو السخانة بتبهليلها....
- نجيك مللخر يا صفية.. معاش نلتزمولك في البوست هاذي خاطر لقينا شكون غيرك افهم منك و زيد اصغر و انشط. ..
- ع..علاش !!!! شوفتو اي تقصير مني !!! انا شكون شكاني ليكم لا سمح الله! !!!!
- لا لا لا...نفخ .... خدمتك على عيني و راسي و بارك الله فيك اما كيما قتلك لازمنا بارسونال قاري
- عينيها دمعت الكازي تسخف. .. غلبتها العبرة و تحس بالكلام ذاب في مدفع فمها. .. راني زوالية ..تعرف الي شديتها لبلاصة خاطركم ساخفين عليا و انا مانستاهلهاش اما. ... تمسح في دموعها...
- نو نو نو ماتخافش يا صفية فليساتك حتى كان نقصو ماهمش باش ياثرو يعني ماتخافش
- بالحق سي كمال. .. كان تحب نزيد سوايع زايدة. .نمسح و نلم الكرادن المهم الشهرية مانتقص بربي شوفلي بعين الرحمة...
- صفية يا صفية انا قتلك باش نبدلك من البوست موش باش انحيلك فلوسك..ايا قوم عيش اختي شوف خدمتك
- بارك الله فيك سي كمال... ربي يفضلك ربي يعطيك ماتتمنى ربي يدوملك رزقك..
- باهي صفية باهي ..برا شوف خدمتك .... عدى يديه على شعرو يحس في لذة التقدم نحو الهدف متاعو و الظفر بيها ... اكاهو وقيت باش يبدى في الصحيح لازمو يحسبلها بالقدا بالرغم يعرف إلى هي موش باش اتعبو خاطر تظهر بااارشا على نياتها اما لازمو مايخليلهاش ثغرة وحدة للشك. ...
●●●●●●●●●●●●
الليلة وائل باش يركب لفرانسا و يباشر قرايتو غادي بالطبيعة حاجة تفرح. .هذاكا علاش الحاج حلف مايتذبح كان علوش للبركة يقول لازم نسيلو الدم باش تهبط البركة.... الجيران الكل ملمونين في دار الحاج علي مع ريحة الكسكسي لي تفحفح من اخر النهج .. لبنات تحرك و العزارة تنبر و تفدلك عليهم. .الا ايمان لتو لا جات اليوم مخرة على غير عادتها ..وليد هايج موجة تجيب و موجة تهز فيه في راسو ألف و الفين فكرة و هاجس ..هو يعرف وقت خروجها مالخدمة اما اليوم وينها شبيها مابانتش .... هي خرجت في وقتها متاع العادة و من غير ما توخر اما عرفها عطلها و شدها بالكلام ...
- اه اش قلت تو؟؟
- سي كمال .
<><>
انتى سبابي
من انجح الكرونيكات التونسية
#انتي_سبابي #كرونيك
الحلقة 11
سي كمال. ان شاء ماتكونش تسرعت. .
- لا لا انت توكلي على ربي و ان شاء الله الناس الكل فرحانة
- ربي يسهل
- تنجم من غدوة تبدى راهو مافما حتى مشكل لومور الكل مريقلة
- الله يبارك .. شكرا سي كمال. .ان شاء نكون في المستوى و عند ثيقتك فيا
- لا هكاكا ثيقتي فيك عمياء. .. غزرتلو باستغراب... نقصد ثيقتي في كفاءتك كبيرة .. تبسم يحب يبلفطها
- باهي امالا انا لازمني نروح تو ياسر وخرت
- تحبش نوصلك
- لا لا موش لازم اصلا موش بعيدة ربع على ساقيا و نوصل ... خرجت تزرب موش عارفة علاش قلبها مقبوض موش عارفة علاه وافقت على العرض متاعو اما ترجع و تقول إلى فلوسها بارشا هالبوست تولي تسكت و تعديها كيما جات لحكاية... تمشي لين تلفونها صونا
- وي اهلا منيرة
- اه تفاحة وينك لتوا !!
- هاني مروحة ..لباس ماهو؟ ؟؟مستغربة تلفون منيرة انتاربول ليها
- لباس لباس اما الحومة الكل متعشيين عند خالك الحاج علي ذابحين علوش خاطر وائل باش يمشي الليلة
- اه باهي مبروك عليه..بابا غادي ؟؟
- تي ايييه موش قتلك الجيران الكل !! ايا خف روحك و اخلط اعمل حاجة مع البنات ... علقت و غزرتلو كيف قريب يدخل في التلفون بوذنيه...
- ابعدني و انت كالفقر لاصقني. .. هاي جات سمعتها .؟؟
- سمعتها ..يا بنتي زايد مع الهجالة
- مد عاد ههههههه
- والله ما فوقي كان زوز سواقر هزهم هاك .. تو بعد نخرج و نجيب لحبي باكو مكشطي...
كانت تتبختر فوق من نفسها حتى ولو وائل باش يسافر مش ضروري بوها يمشي يتعشى عندهم زيد تو هي مجبورة تخلط عليه خاطر واحدها في الدار تخاف .. عرضلها وليد عينيه مليانة حب ..فرحان لي جات و باش تحرك في دارهم قدام عينيه زيد كلام امو عليها و تلحليحها بيها يفرحوه ...
- عسلامة .... عينيه قريب تاكلها
- سلام... متلفاتو جممملة مازالت مانساتس آخر عملة عملهالها
- شبيك لتو. .هاك تشوف لبنات من قبيلة هوني الا انت
- نخدم على روحي و زيد حصلت جيت خاطر بابا هوني ... تمشي ولا على بالها بيه لين رات بوها ناداتو... اول مارا عمو عمار عمل الدورة باش مايشوفوش يلحلح بيها ... لقات المهرب الوحيد هو بوها خاطر لصق ماحبش يبعدها ...
ايا بنتي برا شوف خالتك لطيفة و لبنات اش يعملو عاونهم عيش بنتي
- باهي اما نتعشو و نروحو طول عيش بابا تاااعبة و ماعيني في قعدات
- باهي باهي ايا قوم فز. .. لعشاء طاب و الشقالة في جرت اختها تتسربا كسكسي بنة عالمية من يديات لطوف و صفية خالة ايمان .. هو عامل فيها مالعوالة هاو جاب البانوات و رجع هز الشقايل و ضربة ضبرتين رابثهم على الغلة و القازوز و هو عين عليها و عين على لي في يدو..اما هي فادة مشلقة بيه زيد كي توقفو منيرة و يبداو يتضومرو و يخزرولها مرة مرة... واقفة في الكوجينة مع نعيمة بنت خالتها ..هو حب يستفرد بيها عندو كلام يحب يحكيهولها ..
- اهلا وليد سافا
- نعامة البطبوطة سافنني شنيا احوالك
-سافا نتفارع انا و الباك. . انت يا خويا لي حاللة معاك في النوار golf 6 و مشاريع ربي يبارك
- عيشو الصغرون. ... يسرق في النظرات لايمان لي كانت واحة في الماعون تغزل منو فاشة غلها الكل في الصحون و الكيسان مساكن كلاو على ريوسهم
- اه حومة سايس عالقربج بالفلوس راهو
-...................
- و راني في بالي بزوز كيسان لي في البوبال. .. رد بالك نهار آخر ماتلقى باش تعول يا بنتي
-ههههههههههههههههههه.. نعيمة اطرشقت بالضحك ماسكتتها كان ايمان وقت حمرت عينيها فيها..اما فهمت روحها لازمها تخليهم وحدهم خاطر باين عندو ما يحكي...كعادتو و من غير مقدمات يهد عليك طول بالحديث. ...
- شبيه معاك هاك الساقط !!!!
- نعم !! شكون مالسقاط كاثرين هالايامات...... سكتت شويا خاطر فما شكون دخل عليهم هز طرف غلة و خرج. ...
- كمال شكون غيرو ؟؟؟
- شبيه معايا !! جيتك نشكي! ! اصلا انت ماك ديما في جرتي مافماش شكون ماكلاش طريحة من يديك
- اي اما مانيش معاك في المعمل متاع وذني
- شنوا تو !!
- ماتعليش صوتك يا للا. .. انا راني شامها من بعيد قارصة رد بالك
- من كمال !!!
- ماندريش من لي تحب. .هاني نبهتك
- مالا شد عندك ..كمال لي تحكي عليه رقاني و انا تو عرفة نخلص السالار لي نطلبو انا
- والله مسكينة انت ... كان واقف مع الرخامة بجنبها تلفتلها بكلو عاقد حواجبو .. تو من كل عقلك فما قطوس يصطاد لربي ؟؟؟؟ ماسالتش روحك علاش حتى يعين فيك "عرفة"يتبع فيها كيفاش تحكي...
- سلم قرايتي... شوف عاد هاكي المستوى تي هي باك انفو و بلاش شهادة زادة.... اصلا مانيش فاهماتك فارحلي و الا مقلقتك لحكاية !!!
- يا بنتي تبديش وزيرة المرأة مايهمنيش فيك اما حل عينيك و كون بنت الحومة العربي مايعديها عليك حد ... ولا ماتعمل فيها لسين كان معايا ؟؟؟
- ماكش باش تعرف مصلحتي اكثر مني... نشفت يديها و جات خارجة ...
- هاك قلوب
- يعملو الغاز.... طفت ضو الكوجينة و خلاتو في الظلمة يعشق فيها..في تفاصيلها الكل. . شعرها الفلو طرف الروج لي عملاتو و هاكي العينين لي سحروه..
#انتي_سبابي #كرونيك #كرونيكات
الحلقة 12
سروالها المحزوق و مريولها لبينلها تفاصيل صدرها المليان قداش مغري... في كل مرة يحاول يتمالك روحو في حظورها اما موش منجم عينه ديما تخونو و تهرب بيه لعالمها الأنثوي لي مايحب يكون كان هو فيه.. ضحك سخن و حك شعرو كيما كل مرة...
●●●●●●●●●●●●●●●
تو اكثر من عشرين يوم على سفرة وائل قداش خلا بلاصة في الحومة و في دارهم و خاصة في البيت لي مستانس يتقاسمها مع وليد... الناس الكل تخدم في خدمتها وليد مقطع روحو بين الخدمة و العسة على بنت عمار سلطانة قلبو. . ايمان ستانست بجو الخدمة و خذات عالريتم طبعا صفية كثر خيرها ماقصرتش معاها... و اكثر واحد قاعد يخدم هو العرف كمال حاربها الدنيا بالتكنبيص خاصة انو بعد مآحتك بايمان ظهرتلو موش ساهلة كيما كان متوقعها لقمة باردة و جاتو ليديه .. عاود حساباتو الكل و جاها بالريق لي تحبذو طبيعتها طبيعة الطفلة بنت الحومة العربي.
شاءت الاقدار انو بوها يمرض شويا و على تلفون منو كانت هي تراجع في الحسابات معا كمال ... فرصة و جاتو لبين يديه هزها بالكرهبة و دعسة للسبيطار تهنات لي بوها لباس و طبعا حلف كان مايدفع الفاتورة المحنونة...في طريق المرواح ...
- عيشك وليدي كثر منك الناس
- من غير مزية يا حاج راك في مقام الوالد
- عيشك كمال ربي يخليك والله كان موش انت .... قص عليها
- الناس لبعضها شوف الظروف اليوم تعرفت عالوالد في الظرف هذا... ماتدريش غدوة تواتي و نتقابلو على حكايات اخرى ... سكتت عرفاتو لاش يلمح حاولت تعديه ماتحبش تتسرع في حتى قرار ..
- مرة اخرى عيشك ربي يفضلك..ايا بابا سايس روحك. .. في الوقت هذاك كان علولو مروح يتبخطر اول ماشاف كرهبة كمال و ايمان و عم عمار هابطين يزرق تلفون لوليد ديراكت
- وي عليوة ...
- انت وين! !!
- في الدار ماك تعرف لكليب تكور صاحبي
-ياخي عمك عمار مريض ؟؟
- شبيه لباس ؟؟؟؟
- تو انا لي نسأل فيك موش انت سي الخرا ؟؟ الحاصل تو شفتها داخلة بيه باين تاعب و .....
- و شنوا ؟؟ حل فمك عليوة ماتنطقشي .......
- تي لي مايتسماش هذاك هو لي وصلهم و الاغلب هو لي هزهم مللول. .
- شكون !! كمال !!! ينعنبوه الكلب الطحان اش يجيب ........ والديه الم ...... ..
- بففففففف حسيتو قلقني لق........ لازمو تفريكة برجولية
- اصبر عليا و حق ربي لي خلقني كان مانشربلو من دمو ال ........... متاع وذني موش راجل
- ههههههههه يزيه صاحبي وافييت و كفيت الليلة
- وووووه سكر زدت كر....تني هاي لكليب خاسرة زادة
- يا روووووووما يا روووووما .. اسمع اسمع انت تواتيك هذي. .. بنت الحي يا وخياني تكوي كي
- هههههههههههه زايد معاك حبي الحوت عليك .... ايا طير خليني نمشي نسأل على نسيبي
ديما يختموها بطرح هبال و غناء يشنعوها في التلفون تقول متكيفين الزاكاتاكا... ايمان تفارع في بوها شرباتو دواه و شدت فرشها بعد مامرجتها تهاني في التلفون ....
- هكا توا يمرض بابا تسمع الحومة الكل كان انا !!!
- اش تكذبي يا طفلة حد ماسمع جيتو انا مع كمال مالخدمة طول و روحنا لا من شاف لا من سمع
- باهي المهم لباس لباس !!! موش لازم نجي !!!!
- اش تجي يا بنتي نحن شدينا فروشاتنا صايي
- باهي باهي اللطف... سكتت و بدأت تصلب فيها بالحديث.. اه اش عملنا في هاكي لحكاية !! اش قتلو؟ ؟
- اما حكاية ؟؟ حبت اتلفها اما تهاني ركبتلها في راسها الليلة كان ماتاخذ الزبدة ..
-حكاية المولدي لحول .. تي ماو البصل عرفك
- ماعندي ما عملت مازلت نخمم هاني. .. مانحبش نتسرع موش لعب راهو
- يا بنتي الراجل داخل مالباب لكبير تو كانو ملعب هكا ولا هكا راو باين عليه
- اما كان بزناس يحكيو عليه لبنات ..
- محسوب رجال تونس الكل تبزنس ..تي هاني انا ماو نسيبك بزنسني اما تكلفتلو صداق ههههههه
-هههههههه انت عاد لفعى
- اي كون كيفي واكسبي الوز عندك ..اش ناقصو بربي كبير بعقلو بفلوسو الله مصلي عالنبي. .الف من تتمناه و زيد مالي عينو منك يا هم افهم. ..
- اقسم بالله فاهمة كلامك و عارفاتو اما .... مانعرش فما حاجة رزينة نحس درا كيفاش... ااوووف
- وسع بالك ..انت مافاتك شي خمم في عقلك اما موش تحربها بالتخمام و حط في بالك إلى هذي فرصة و جاتك ليديك. .. ..اي وينو ولد علي مازال شاد جرتك ؟؟
- بربي ناقصني كان وليد تزيدي تمرجيني بيه ايا اخطاني منك بري راجلك ينادي. .
- كان قول عاد امااااان
- بري روحي.... علقت عليها و مازال قلبها معلق في كلمة ولد علي ... سارحة بخيال فارغ عباتو صونوري تلفونها...
- تفضل اش تحب !!!
- نحبك انت
- المطلوب ؟؟
- ارحمني يا بنت الناس .... تنهد من قلب موجوع...ايمان ... نحبك
- وليد شارب !!!
- و شنوا الفرق ماهو كيف كيف ظايع و ظلمة بلاش بيك
- وليد..وليد
- حب وليد و عيونو و روحو و عمرو الكل لي مايتحسبش بلاش بيك
- مامليتش !! علاش تعذب في روحك
#انتي_سبابي #كرونيك #كرونيكات
الحلقة 13
علاه ظالم روحك. .. الناس خلوق يا ولد الناس ..حاول شوف حياتك حاول لوج على شكون تحبك غيري انا ... ماتعرفش علاش المرة هاذي جاتها صعيبة كي قالتها .... انا مانحبكش
- حاولت انتي تحس بيا! !! حاولت تفهمني و تسمعني !! حاولت تقنع قلبك و عقلك بحبي ليك! !! حبي ليك كبيييييييييييير. .نعطيك عمري عينيا روحي ..روحي ماتغلاش عليك شي مايغلى عليك يا نسرين شي
ليلها عداتو ساهرة تحاول تنضم امورها و تخمم برصانة. . من شيرة وليد لي ميت عليها اما هي رافضتو خاطر ماكانش الرجل لي تتمناه بسبب فازاتو ..و من شيرة عرفها لي عرض عليها بصفة رسمية الخطبة عرض بالنسبة ليها هي كطفلة موش عايشة حالة حب فرصة العمر و بهيمة كان ترفض اما علاش ماهيش فرحانة بيه موش حاسة بالقبول اما كل مرة تحسها تضغط على روحها باش تعديه بمساطتو و تقول ممكن خاطرني موش خبرة ... ليلة كيما جات تقلبت فيها ايمان يمين و يسار كالراقد عالملال.... على بعد عشرات الأمتار كان غارق في حلمتو يتبسم وحدو و زادت نشوتو كي قتلو نحبك وليد ...شاخ الفكرون. ...
بعد ما خلات بوها في أيادي أمينة عند تهاني اختها لي جات مالفجورات ...كلمت الخدمة و قالتلهم هاني جاية و ماكم تعرفو الواحد يجيه الكلام كان كي يبدا لخر مغصور ولا مزروب ... كانت تجري من حاجة لحاجة تلم في صاكها و تلبس في صباطها ...
- تهاني ابعد خليني نقد شعري بففففف
- باش احكي معاه اليوم !!!
- اي ..
- صحيتي ..رد بالك تعميها عاد
-امممم باهي
- خليه يجي طول دوب ماتوافقي
- باهي بااااااااهي ..الهم راك خنقتني ابعد قود
- هههههههه عنبوك عنبوك عنبوك
- كب سعدك بوك وراك. ..... خرجت تزرب قاصدة الخدمة ..تمشي و تتلف
#انتي_سبابي #كرونيك #كرونيكات
الحلقة 14
تتلفت ماراتوش اليوم و هذي غريبة في حد ذاتها ..وانها تتلفت هذي ولات فيها سناسة خاطرها والفت بيه و بغدراتو بيها من تركينة لتركينة يشيعها ليييين توصل ...
قصدت ربي تشق في طريقها ماشية تخدم و ماشيتلو باش تعطيه ردها عالعرض متاعو ... هو ماكانش خير منها .من نهار لي قالها راك تعجبني و راني ناوي عليك في الخير وهو يستنى على احر مالجمر في موافقتها لي متأكد منها اما يساير فيها كي قاتلو خليني نخمم قبل ... وصلت مشات صبحت عليه و شدو يتخادمو عندهم باارشا حسابات ... كل مرة يهز عينو فيها كاينو يستنى فيها تأخذ منعرج آخر غير الخدمة و تحكيلو على قرارها اما هي مازالت تتهرب مازالت خايفة المجهول لي ناوية عليه معاه... وقت لفطور مستانسة تخرج مع لبنات ياخي قالها خلينا نخرجو نفطرو البرة و نحكو براحتنا .. طلعت معاه فوق من نفسها تحسها تعمل في حاجات ماكنتش مقتنعة بيهم. .كرهبة، فطور البرا ، و الاغرب جابها لبلاصة الكلها كوبلوات...
- كمال علاش جبتنا لهنا؟ ؟
- شبيها لبلاصة ماعجبتكش !! الساعة يااسر تحفونة
- مانيش واخذة راحتي هذاك علاش ... سكتت بقات تدور في عينيها في العالم لي لاهية تتلومس في بعضها و تبوس و تعنق بلاش حشمة و لا جعرة... مواقف ممكن تشوفها في اليوم عشرات المرات اما مع صحباتها ولا بنات خالتها اما مع راجل لا.. و هو بالذات لي يستنى في رد موافقة على عرض ماخذة... ماتوقعتشي يكون بالجراة المبتذلة هاذي ..كيفاه يجيبها للبلاصة هاذي بلاصة متاع تعدية وقت و تفوريخ وهو لي ناوي لومور الجدية معاها ... فدت تخنقت من فازتو لي موش عارفاتو مش قاصدها ولا هذاك هو كمال و يتصرف عادي ...مازالت في حرب الاعصاب لي خلقها خيالها الواسع وقت حست بيدو تحطت على يدها من غير سابق انذار ..بطريقة عفوية جدا جبدت يدها مفجوعة حست برعشة سرات في بدنها رعشة تاع نفور مالجاست لي صارت. ..
- شبيك !! هز حاجبو مستغرب
- رجعتلو ضحكة مصفارة حبت تبرد فازتها... مازال بكري عالحركات هذي كمال ...انا مانيش متعودة و نحسهم موش متاعي...
- هههههه تو تتعود ..معيا تتعود على كل شي. .. و نحن محسوب مصوحبين رانا يعني عادي
- لا ماناش مصوحبين. .انا مازال ماقتلك شي على رايي في اخر كلام حكيناه
- وي ... وخر عالكرسي و تحل في قعدتو. .. وي اما زادة مارفضتش و هاذي حاجة إيجابية بالنسبة ليا. ..
- شطر تبسيمة. .. تعدي في شعرها ورا وذنيها ... هاني مازلت نخمم ههه
- انت لازمهم يسموك" ايمان تخمام" تي بربي اخزرلي تو نورمال الجاذبية هذي الكل و انت تقلي نخمم !! ...سكت و بقا يدور في عينيه للجموع لي تتمعشق شايخ بالمناظر لي يشوف فيها و عاود خزرلها. ... شوف كيفاش عايشين الحب ..ريت الرغبة و الفرحة في في عينيهم ... مانيش عارف كيفاش شاد روحي عليك لتوا ....هي تخزرلو مزبهلة بكلامو صدمتها تعبر على وجها لي صفار في لحظتها.... اي مانيش حاشم منك ايمان انا شتهيتك من اول ماريتك ضربتلي في مخي طول ياسر سكسي راك عندك المقومات في تثير اي راجل يخزرلك تبارك الله عليك ... مانيش مسؤول على تصرفاتي معاك هاني نقلك هههههه
- بلعت ريقها. ..مازالت تستوعب و ترتب في كلامو كانت قادرة تقلب الطاولة عليه و تخرج ...اما تريثت و ضبطت أعصابها ورغم انو صعيب الموقف لي تحطت فيه اما لازمها توزن كلامها كي تخرجو ...
- انا نشوف إلى شطر لي قاعدين هوني كان مش أغلبهم جايين للمتعة و مضيعة الوقت ... بربي وينو الحب لي عايشينو ؟؟؟ الحب موش بوستين و تعنيقة موش تستفرد بوحدة وتشبع غريزتك و تقلها انت مرتي... موش كلمتين تذوبها بيهم ..هذا انا شخصيا مانسميهش حب ..الحب مواقف ...سكتت تحس الي بردت على قلبها و سكتاتو بكلامها خاطر تشوف فيه مركز مع كل كلمة تقولها ..جاء بيحكي ياخي عاودت تكلمت و حسمت الموقف لصالحها.....
- ايا وقيت لازمنا نرجعو. .. لطفت الجو بضحكة و وقفت بدات تلم في صاكها تحس في غصة تنحات عليها و تحمد في ربي لي ماعطاتوش لا حق لا باطل عملت زينة لعقل كي ماستعجلتش في موافقتها و زادت لروحها فرصة تزيد ترتب امورها ...
في الليل قاعدين يسهرو هي و بوها و اختها و نسيبهم و زادت حلاوت السهرية كي جات خالتها و بناتها يطلو على بوها ...
-شحوالك يا عمار يا خويا ان شاء الله ماتشوف باس
- الحمد لله على ما عطى
- سايس روحك انت عاد و نظم ماكلتك شويا
- منظم وراس اختي منظم غير مافهمتش الدم منين طلعلي ...
- لباس لباس ... تلفتت لنعيمة و قالتلها .. قوم شوف خواتك في الكوجينة اعمل معاهم حاجة ...
- تهاني كانت لاهية تحرك في بيبرون للبيبي متاعها ... خليها خالتي هانهم زوز صبايا الداخل ماعجبتكش ههه !!
- ميسالش خليها ... قوم عاد مازلتي محلقة !! مشات نعيمة كيما قالتلها امها تشوف اش مزالو يعملو لبنات هالوقت هذا الكل على حارة لوز يحمصو فيها. . كي قبربت للباب باش تدخل تسمع فيهم يوتوتو...
-و انت اش قتلو !! راك تقلي رفضتي عاد ؟؟
- مازال ماعطيتو شي هاني نخمم اما درا كيفاش مانيش متفرهد
#انتي_سبابي #كرونيك #كرونيكات
الحلقة 15
-عزاااك ..درا مازال فيها تخمام هي و شبيك يا طفلة ضبعتي !! و الله والله بقرونك كان ترفض كمال
- هو ماخاصو شي عايلتو معروفين ماعندوش فازات لولاد تاع الهمل هذا الظاهر و بدارو و خدمتو و زيد يظهر مالي عينو مني اما. ... اما لبنات يحكيو عليه بزناس....تعرف داخلة في حيط
- بربي اخطاني تحبهم الكل صدق الله العظيم! !!! و كيما يقولو كل زين فيه لولة ... انت لي تتمنيه في الراجل لقيتيه في كمال ..فاش تستنى امالا لين تجي بنت امها تغورلك عالصفا ؟؟ شوف كيفاش تفرهدت امورك بعد ماتبدل سالارك ..شبيك تموتي كان الفقر و الحوم لمقودة ..خوذيه و عيشي حياتك اليوم هاك صانعة و شهارة غدوة تصبحي مولة المول و كانك عالحب يجي وكان ماجاش لفلوس و لفيس يجيبوه هههههه
- هههههههههههههه اش تموتي عالمادة يا طفلة
- مالا وينك الدنيا مع الواقع عزيزتي. ...
نعيمة مصدومة من لكلام لي سمعاتو و غاضها بطلها الباندي وليد كيفاش حب حياتو ايمان باش يفكوهالو ...في البيت تطلب فيه و تعاود لين هز عليها
- الو ..وليد .
- اهلا بطبوط... شبيك تحكي بالشوي! !!
- اسمعني برك عندي ليك كلام. . عيش خويا نحبك تكون قوي و ما تعمل شي ..نعرف لخبر باش يق ......
- نعيمة عيشك انطق برك. . ايمان بيها حاجة !! قلقها شكون !!! احكييييي
- ب..باش يييخخطبوها.. س..سسمعت ..........
-شنياااا ؟؟؟؟؟؟ شكون بيخطب شكون !!!!!!
- ايمان ... ايمان يحب يخوها كمال عرفها
- يخوها ... هكا !!!! اي عاد هي ماوفقتش طبعا ؟؟
-..........سكتت ماهيش عارفة تقلو لي سمعاتو ولا
- اااااانطق .. صوتو علا في التلفون فجعها مسكينة ... هي اش قاالت !!
- تخمم ... مازالت تخمم ... اما موش رافضة زادة الفكرة و زيد هدى اختى تعمرلها في راسها بيه
- تعرف الي اختك كلبة بالرسمي !!! لا وزيد بنت خالتك اللا دغفة لي يواتي يصلبها على راسها ... وهذا كمال حسابو معايا والله الاما اندمو على النهار لي خزر فيه ليها لمسخ ...
- باهي انا لي عليا عملتو و كالعادة لا ريتك لا ريتني
-عليك امان الله ..باهيشي تو !!
- ايا باي لازمني نعلق
- سلام ...... بقى شاد التلفون على مرتين باش يشد يظربو عالحيط اما تدارك في اخر لحظة. . كانت الأفكار تتدافع في راسو واد يهز و واد يجيب فيه " اكاهاو عاد انت زعيم كان في تكسير التلفونات و التبوريب و غيرك يخطب في مرتك ... انت ابقى في عنادك معاها لين تزيد تنفر منك اكثر ماهي نافراتك لين هانها تتلقى في عروض العرس.. ايمان تعرس !!! و تخليني !!!! لا لا مستحيل نخليها. .مستحيل نخلي غيري يهنى بيها والله و كان نموت. ... قام على صوت امو لي تنادي فيه ...من لي كان عالسطح يتكيف كعاتدو يعمل تنقيزة يجي في بلكون الكوجينة عند راسها
- اسم الله لعظيم الرحمان الرحيم... فجعتني يا هم
- شبيك تنادي.. اكيد حاجة مالثلاثة ..يا "" جيبلي قضية "" و هاذي لا خاطر قضيتلك بكري يا "" كلملي وائل خوك"" و هذي زادة لا خاطر عملناها في الفطور تبقالنا لخيرة الي هي "" هزني لبلاصة "" وين ماشية ؟؟؟
- مابلدك راك ماسط... ايا هزني نطل على عمك عمار تعب و ماشفتوش عيب. ..
- أي و منها اخطبيلي بنتو راهي غلبت عليا
- ماو قلنا ساهل عاد
- تي الطفلة يخطبو فيها يام و انت تقلي ساهل !!
- ايا برك و يزيك احشم يا راجل
- فمي و سكرتو هاه....
هزها لدار الحاج عمار كيما قتلو... يزرب بيها على ساقيهم في هالليل... كبشت فيه باش يدخل يطل عالراجل جارهم عيب مايمسيش عليه... كانو قاعدين وقت دق الباب مشات تهاني تحل... فرحت بيهم الحق
-مرحبا خالتي لطيفة ايا تفضل .... وليد خويا لباس ..عمللها براسو لباس
- عيشك. وينو بوك ابركشي شويا ! عندكم شكون الداخل ؟؟
- لا لا مافما حد براني خالتي و بناتها و توفيق راجلي
- ايا باهي ...
دخلو سلمو عالجماعة الكل وليد اكتفى بالسلام من بعيد مع قحرة لهدى لي طول عمرو يمقط بيها و هي اعظم منو. ..
- عم عمار ان شاء الله ماتشوف باس
- عيش ولدي ..والحمد لله يا ربي غصرة و تعدات
- الحمد لله ... تلفت لامو. .. يام انا خارج هاني للقهوة كان بطيت عليك روح مع خالتي زهرة و البنات... مخلاهاش حتى ترجع عليه خطف الباب وراه و خرج يعجعج في الدخان .. حب يشوفلها في عينيها و يفهم منها لحكاية اما هي ماهزتش عينيها فيه بقات حاشية راسها في التلفون هاربة منو و من نظراتو لتعريها في كل مرة ماحبتش تشوفلو كالعاملة عملة و متخبية...
بقاو الجماعة يسهرو عدوها بين ضحك و لعب و حكاوي. . وليد الوقت الكل يكتب في المساجات و يفسخ لكلام كثر عليه و معاش عارف مايعمل ..حاس روحو بين نارين ..نارها هي لي تكوي في جواجيه لرفضها الدايم ليه و لحبو لكبير و نار الغيرة لي عمالها و تزيد كل مايحس بالتهديد من غريب يحب يفكها منو و يخوهالو... ساعات يقول يطلبها اما عارفها ماهيش باش تهز كان ماتمرجو و حتى كان صار و هزت ماهيش باش تسمعو و باش تقوم تجرح بالكلام كالعادة ... فد و خلا القعدة و الجموع لي مافهمو والو منو
<><>
#انتي_سبابي #كرونيك #كرونيكات
الحلقة 16
وليد لي يحكيو ببونيتو للكبار و الصغار لي تهابو لمجرمة و السراق. . كلوشار الحوم العربية تذلو فقصة بنت البارح في ليام. .تمرث بحالتو طفلة حفى و هو يجري في جرتها ..بات الليالي واكلو البرد و السميتري واقف على شباك دارها ما يروح كان كي تطفي ضوها و ترقد ..هكا جرات العادة و هذا هو وليد .. هاو الليلة واقف في نفس لبلاصة و على نفس الحيط متكي يتكيف يستناها لين ترقد و يشد يكمل ثنيتو لدارو.
نهار و هو قاعد بجنب الخربة هو و علي.. تلامحها مروحة تتبختر. .غمز علي باش يمشي و يخليه خاطر عندو كدس كلام باش يقولهولها كيف وصلاتو قاملها و زدم عليها زدمان ...مزالت تستنا باش تعملو عرعور و يهو خطفها دخلها في رمشة عين للخربة
- ايجاني لهوني ...هاو شديتك و لا فيبالك كي ما تهزش التليفون يعني هربت مني!!
-"اوووووووو فكني عاد اش مازال تحب. . سبيلي يدي وجعتني ...تعرف شنبدلو رقمي باش ترتاح
--يزي مالصياح و اسمعني عندي ما نحكي معاك...منيش باش نحكي على روحي باش نحكي لمصلحتك انت و لازم تسمع و تستوعب الي باش نقولو..ستنا ساعة شبيك لتوا انت؟؟
-" شوف اا سيدي !!! تو نقدملك تقرير على دخولي و خروجي وقتاه .. يعجبكشي !!! سكتت شويا .. هاني نسمع فيك ازربلي روحك معاش بكري عليا عطلتني
--(نفخ بعصب و جاوبها) ايمان....كمال عرفك بينك و بينو حاجة؟؟
-"لا "
--ايمان جاوبني بالصحيح...الحكاية موش عناد راهي ..كانو داير بيك و حاب عليك فك عليك منو سيرتو موش باهية
- باللاهي شنهي !!! قال شنوا.. سيرتو... انت اخر واحد يحكي على السيرة والاخلاق. .. وعلاش فكني منو الساعة موش بطال حتى طرف..
--(كبس على سنيه و حاول يهدي روحو) اسمعني...انا منيش راجل و منيش متربي و كلوشار و عندك حق اكرهني كيما تحب..اما انا مستحيل نسمحلك ترمي روحك هالرمية الكلبة..(قربلها و كان صوتو موجوع حنين مكبوس ما تفهموش) نعرف الي انا ما نستاهلكش و منيش متاعك...نحبك تفرح نحبك تاخو الي يستاهلك ...خليني نموت انا خليني نضيع خليني ندفن قلبي بيدي المهم انت نحبك مع الي يستحقك...(حب يشدلها يديها) راك اغلى من كلشي ايمان
-رد بالك. ..رد بالك تعاودها و تلمسني يا وليد... هزت صبعها تنبه فيه... بعدين انت اش يدخل فيك في اومور غيرك تلهى في روحك ابعدني معاش تمرجني راك تعبتني راك عمالك و اطيح من عيني ...استجمعت قوتها و هزت عينيها فيه و بكل تحدي .... نرمي روحي وين مانحب و لشكون نحب انت برك خليك بعيد عليا انا نولي لباس ... و كمال جاني مالباب علاش مانخممش فيه ترا قوللي !!!
--(مسح على شعرو و تكلم) يا بنت الناس افففهم راهو كلب ساقط نهار الكل و هو كان الصنايع الفاسدة و النسا و الشراب...افهم راهو مهوش متاعك و موش كيفنا ...(بدا يحكي معاها بالسياسة) اخطاك منو ايمان و قلو منيش موافقة ...حتى و لو جاك مالباب راهو ما يحياش...الاولاد يعرفوه و قالو الي هو مسخ ما يصفاش...(كي شافها متلفتو شدها من يديها و بدا يصيح) يزي من كسوحية راسك و استوعب فاش نحكيلك...ما تخليش كرهك ليا يعميلك عينيك...الكلام الي نقلك فيه لازم تصدقو انا امتا كذبت عليك؟؟ امتا عملت حاجة موش في مصلحتك...انا مستحيل نسمح لحد يضرك حتى بكلمة خليا هذا جاي و يحب ياخذك...يكذب و الله يكذب عليك
-علاش ماتكونش انت غاير منو مثلا. .. ضحكت بخبث ... يعني.. موش الناس الكل كيف كيف كانك انت تعمل في العمايل هاذم موش معناها الناس الكل كيفك .. نحب نقلك إلى راو مازال خير في الناس و في البلاد . .. الراجل ماريت منو شي هكا والا هكا ...
عارفاتو كلامو موش من فراغ خاطر هاكي المرة كي فطرو شافت من كمال سلوكات و كلام خلاها تستغربلو شويا ..اما تكابر ماشي في بالها يدز في فازتو خاطرها ترفض فيه في كل مرة
--(قاعد يسمع في الاهانات مسكين و ساكت) قول الي تحب عندك حق...راني نخاف عليك اكثر من روحي يا ايمان عيشك افهم ...لمرة وحدة اسمعني و صدقني...و الله برشا يحكيو عليه شعامل في بنات المعمل و ما يجيكش عجب يركح فيك بحكاية الخطبة خاطر لقاك موش ساهلة ...و الله و غلاوة حبك الي في قلبي يا بنت الناس خايف عليك...تحبش معادش نقلقك و معادش ندور بيك اوكي نبعدك اما توا لازمك تصدقني...باهي تحبش تمشي معايا و تو نوريك كيفاه يحكيو عليه..(كان ملهوف مسكين) عارف روحي باش يجي نهار و نراك لغيري و نموت بالحيا...عارفك تكرهني كره كبير عارف حبي ما يعنيلك شي...ضيعتك بعمايلي اما مستحيل نخليك تضيع روحك...(بدا يتنرفز) على جثتي كان الكلب كمال يتربط اسمو باسمك...(بدا يخض فيها) معادش تراه و لا تكلمو و بطل امها الخدمة ابعد عليه ما نسامحش روحي كان تصيرلك حاجة..
-بدات تبكي و خطات وجها بيدها كي شد يخض فيها من كتافها... " علاش كل واحد يجبد فيا من شيرة ..علاش الناس الكل مستسهلتني و تجري في جرتي. ...تبكي بالشهقة.... اليوم وجيعتي تزيد تكبر كي نحس الي غياب الخو و السند يخليك لقمة سايغة في فواه الناس. .. عمركم الناس الكل ماحسستوني اني كبيرة و نفه
#انتي_سبابي #كرونيك #كرونيكات
الحلقة 17
و قادرة نميز الخير و الشر ..الكل استصغرتوني و خليتوني في تبعية. .اعمل .. ماتعملش ماتمشيش ماتجيش رد بالك... و رد بالك تقلي خاطركم تحبوني... ميسالش خلوني نختار وحدي خلوني نغلط نطيح و ناقف كالناس ..
--(غاضتو كي بدات تحكي هكاكة...قربلها لين معاد بينهم شي و تكلم بالشوي) ايمان انا نحكي معاك هكا خاطرني نحسك مسؤولة مني...رد بالك مزلت تحكي هكا (صوتو موجوع) نحس روحي منيش راجل كي انت تحس بالوحدة و تحس انو معندكش سند.. نعرفك كبيرة و بمخك عندي فيك ثقة عمياء اما معنديش ثقة في الناس...يا ايمان اقسم بالله على خاطرك نهد الدنيا...مالليوم معادش باش نقلقك و حبي مدامو واجعك لهالدرجة انا نوعدك نبعد اما بالربي لا تهز روحك للهاوية بيديك...راني نحبك راني مصلحتك عندي اهم من
مصلحتي...راك و الله باش تندم
-مسحت دموعها و تنهدت "ااااااه .. قريب نندم خاطر جيت لهالدنيا والله... تسمع في حضبة لبرة اما ماعدلتش عليها ... انت قلت لي حبيت تقولو و انا سمعتك كيما حبيت انت زادا .. خليني نمشي على روحي امان ..مانحب حد يشوفني في هالموقف و خاصة هالبلاصة
-- شدها من يدها.... باهي اوعدني تخمم في الي قلتهولك
جات باش تعاود تفوح فيه و تقولو "نحيني من مخك و رتح روحك ماكش مجبور تكون مسؤول مني ".ياخي شهقت و عينيها خرجت مالصدم
جات باش تعاود تفوح فيه و تقولو "نحيني من مخك و رتح روحك ماكش مجبور تكون مسؤول مني "... اما ماتشوف كان في الحاكم هاد عليهم شافتلو باستغراب اما هو فهم كل شي و عرفها اتخذت على ريوسهم الزوز اما على روحو مش مخمم لكن هي يفنى و لا تتمس بكلمة ولا نبزة...في لحظة خمم و حسبها و فهم شنية يلزمو يعمل...ايمان و سمعتها خط احمر ...قبل ما الشرطي يتمادى باكثر من ضحكتو الساخرة ...وليد جبدها من يديها كبس عليها و قلها..
-مزلت تتملص و تحب تهرب؟؟ (خزرتلو موش فاهمة شي كانت ترعش و هو غمزها) فرحت خليتها على راسي سيا؟؟..
-""ش.شنوا ...ش..شبيك تحكي هكا انت !!! سيبني ؟؟ سيب. .وليييد ؟؟؟؟
قص عليهم البوليسي " اه سبيها عاد احشمو مني عالاقل (وليد كي سمع شعلت فيه النار و ما يسمع فيها كان قتلو بالشوية) حطمتني و وصلت للي حبيت عليه...نكرهك يا وليد نكره النهار الي حبيتني فيه هالحب المسخ..(تلفتت للبوليسي و علات في صوتها جات باش تتكلم و ما تسمع فيه كان تكلم من وراها)
-انا الي تعرضتلها و دخلتها لهوني...حبتش تسمعني ياخي ما لقيت حتى حل...خلاتها بالبكا لين سمعت العباد...(طبس راسو) ستنيتها مالصباح لين جات من خدمتها.....البوليسي قدم جبدها من يديه ...
-صااار هي الحكاية هكا...ما تحشمش على روحك تتعرض لبنات الناس فيبالك لعبة و باش تتعدالك بالساهل!!!!
كان يخزرلها ...قلبو كان ينزف من كلمة نكرهك الي سمعها منها ...
-ما لقيت حتى حل ...نهار الكل نحب نكلمها و هي تتجبد...ما كنت باش نعمللها شي كنت باش نحكي معاها و نفض حكاية كهو...قال شنية تعملي ما نحكيش معاك و تسب فيا...
تكلمت هي من ورا البوليسي لي كان يحطلو في الكلابشات ..
- سيدي والله لا سبيتو ... امان وليد علاه تعملي هكا باش ضريتك انا ...سيدي والله راني زوالية يتيمة و.. هو..هو ديما في جرتي ماحبش يخطاني ...
- البوليسي يجبد عليه بمشطة يطيحو على ركايبو... تو تشوف التعمريص متاعك وين باش يوصلك غادي كي يفرحو بيك الجماعة. . وانت بنتي كي هو يقلق فيك علاه ماشكيتش بيه ..
- هاك تشوف حومة عربي و الناس الكل تعرف بعضها خفت الحق من كلامات الناس. ..
- باهي ..برا روح انت تو معاش عندك ماتعمل هوني.. وانت سي الشباب قوم تجبد عاد ... كان يمشي و يتلفتلها بعينين حزينة منهزمة خايفة و متحيرة عليها .. عارف روحو ماهوش باش يخرج قبل جمعتين عارف روحو باش يخليها وحدها للذيوبة مانغيرو باش تضيع هو عارف ...
- ايمان.. سامحني.. ايمان رد بالك تأخذ قرار غالط تندم عليه راك مافاهمة شي والله ماك فاهمة تو يجي نهار و تفهم. .انت جوست ماتقلو شي هاك الكلب ماتوافقش و انا نوعدك نخرج و نحكيلك عمايلو و نبررلك لي عملتو اليوم. ..ايمان امان اسمعننننييييي .ايمااااان...
- تي سكر......... فمك. .. الطفلة روحت و انت تناديلها يا زحي ..اركب ..... ... يا .......... اركب
عينيها امبحرة بالدموع لي ماكفتش مرة تجري و مرة تاقف تتنفس باش تموت من قهرتها عمرها لا تصورت انو وليد يوصل يهينها للدرجة هذي ..انو ماتشغلوش سمعتها و شرفها كي عرضلها و كذب عالحاكم. ماعملش حساب كان الحاكم شد فيها الصحيح و هزوها شنيا موقفها قدام بوها !! "شعمتلك يا ولد الناس باش تضرني .. كان حبك ليا يوصل يدمرني و يهيني بناقص منو و منك. . نحمد ربي لي عمري ماعطيتك الجنب و رفضتك خاطر واطي و اناني ..الله لا تربحك كسرت بخاطري... " ريقها شاح من الجرية و الكلام لي تخرج فيه باش تبرد شويا... ماحستش كان بين جبدتها من تالي. .و صاحت فرد صيحة..
- ابعععععد...
- ايمان لباس !!! شبيك !!! ساعة نعيطلك..وينو وليد! !
- وليد !! الله لا تربحو الله يهلكو و يهلكك معاه ..برا
اقلب وجهك من قدامى اقلللللللب. . براالو هانا شدينو الحاك
#انتي_سبابي #كرونيك #كرونيكات
الحلقة 18
ان شاء الله مشية بلا رجعة
- حرام عليك والله
- خليني حرام عليا ..اي انا بلاش رحمة و خايبة و مغرورة و أنانية و مانسواش اما صاحبك مايذوقش شعرة مني.. يموت و يجيني حافي و مانرحموش.. درا شوي لي عملو فيا !!
- راك والله لا فاهمة شي راهو هالكلب ك ......
- قتلك برا على روحك علي.. وفينااااااااا ..... عطاتو بظهرها و كملت ثنيتها قدامها هدف واحد ..شخص واحد و قرار واحد
- تو انت راجل !!!
-..........................
- تكلم عاد حل فمك ...ماك كنت عامل فيها عنتر غادي في الخربة قدام لبنية !!!! شنوا تبدل سي وليد !!!
-.........................
- عطاه كف فلقلو بيه شفتو .... مانيش نخدم عند ....... تكلم حل ..... فمك اش بجيبك لبنت الناس ؟
- نحب ناخوها
- وهي ماتحبش ياخي بالسيف الماخذة !!
- هي ماهيش عارفة مصلحتها و فما شكون داير بيها عاميلها عينيها
- ايييييه و انت اش يهمك تلهى في روحك ..الطفلة قتلك ابعدني يعني حرة تاخو مين مان كان يا اخي حرة
- الكلب هاك بالذات كان ياخوها نقتلو بيديا والله
- شو كيف يتهدد !!!! زادو بونيا على شداقو. ... في مركز بابا راك مش في قهوة الحومة ..الراجل باندي و يتهدد زادا ... ايا سيدي اضرب عندك باش تشرفنا هالجميعتين و ان شاء الله نقومو بواجبك
. ..كمل رئيس المركز المحضر متاعو ختمو و قام كي جاء خارج بالباب عيطلو وليد
- معلم سيقارو !
- ههههههههههههههه زايد سلعة عربية... طيشلو زوز سواقر و ولاعة و خرج وخلاه يعجعج وحدو يحلف و يتكتف. .اما جمعتين يا بو قلب و هو بعيييد اش باش يعديهم و زيد مخاوفو عمالها و تكبر زعما اش باش تعمل يا ايمان ان شاء الله ماتتشمتش فيا و تغرق روحك. .
هي كانت في بيتها ملي روحت لا كلمت حد لا خلات حد يدور بيها ..تبكي و تغرد على سعدها المكبوب ..اما في لحظة كاينو شي ما كان و لا صار قامت وقفت قدام لمرايا مسحت دموعها و نتهدت "" لين امتا! !! لين امتا باش تبقى تحت رحمتو وليد متاع وذني معاش خايفة منو انت معاش باش ترفض حتى حد على خاطرو كل وين يخطبني حد يشد يمرمدو لين يطيرو و يبعد .. يزي ما سكتيلو و يزي ما ضعفتي قدامو..صايي اليوم انت حرة تاخذي القرار لي تحبي عليه و طز في وليد ..هو اصلا في الحبس و كي يخرج نكون انا سلكت اوموري و بابا عطاني صايي. .كاهو يمشي يزمر... تلفتت يمين يسار كاينها تلوج على حاجة و فعلا كانت تلوج على تلفونها حطت نومروه و طلبت...
توا حكاية جمعتين تعداو من هاك النهار لمشوم كيما تسميه ايمان...جمعتين تعداو عليها من ارزن مافما من شيرة قبولها لكمال و بوها لي ماعارضش جملة قلها مدامو عاجبك منقولكش لا بالرغم الباين فما كلام حب يقولهولها اما سكت...ومن شيرة الفرق لي حساتو في غياب وليد ما كانتش تتصور لي حظور وليد في حياتها و هو شاد جرتها كان شادد عليها هم الدنيا و سقاطة عبادها خاطر في منظور الناس الكل هاكي تابعة وليد الباندي. . اما في غيابو رات الناس على حقيقتها رات الذيوبة لي تتكلم و شوف شكون ياخولك حقك ..كل وين يبزنسها حد والا يسمعها كلام قبيح تتفكر هاكي الليلة في الشتاء كي عرضولها زوز همال و كلاو طريحة قدام عينيها. .نارها تزيد تشعل و هي تردد في كلامو ليلتها وهو يقلها"" ماهمش كلابي. ..و انا كان نحب نعمل حاجة والا نقول حاجة نجي وحدي كي الرجال و انت تعرفني ""
اي يا وليد نعرف كان تحب تعملي حاجة راك عملتها و قادر تعملها و تعاودها اما انت ماعملتهاش و عمرك ما ضريتني و لا استغليتني بالرغم بارشا مواقف جات لصالحك اما ماغتنمتش الفرصة فيا ..منين مصنوع انت يا وليد شنوا حبك هذي. .كيفاش قادر تحب و تعطي و انت محروم. .عمرك ماكرهتني برغم نفوري ليك عمرك ماوصلتني بكلمة خايبة قد ما وصلتك و جرحتك. .. لكن كيما يقولو "فاقد الشي لا يعطيه"" انت ماعندكش الكره يا وليد كيفاش باش تكرهني مالا...
تسمع في حضبة و تزفير تحت دارهم في القهوة لي مقابلة..قامت تشوف اش فما ..اول ماهزت الريدو شافاتو ..شافت وليد ولد حومتها شافت وليد لي حبها و عشقها شافاتو بين اهلو واصحابو لي فرحانين برجوعو بعد ربطية قصيرة وبالرغم من قصرها الا انو خلا بلاصتو في قلوبهم و قلبها هي زادة ..شعور عانت منه طول الجمعتين لي فاتو و هي توهم في روحها و تكبت فيه اما اول ماراتو قلبها فرفط ..علاش !!! موش مهم علاش المهم تبسمت كي راتو و زادت ذوبتها هاكي اللحية لخفيفة الظاهر رباها في الحبس..اول مرة تشوفو باللحية اما كان الله مصلي عالنبي نوارة بين اصحابو... بالرغم ماكانتش حابة تهز عينيها من عليه اما صورتو و هو يكذب فيها قدام الحاكم هاكي النهار طغت على تفكيرها و بسرعة كبيرة جبدت الريدو و بدات تبكي و تتغصور لتو مافاهمة شي ...
كي عاودت تشوف من تحت الريدو راتو داخل القهوة مع علولو ولات و مشات على روحها...
-ههههههههه اقسم بالله الوحيد ليواتيه الحبس هو انت
- ههههههه علاش ؟، زينت زعما؟؟
-شنيا زينت يا ولدي الله مصلي عالنبي على خويا تقول عريس ههههه
- عريس هجال تسمع بيها هههههه
- اما برجولية وهرة و الدجاج يكح ..لحية و هلماني و رحمة بابا الاما نعاود نبوسك...قام يبوس فيه كلاه ماكلة
- تي ابعد فضحتنا ...ومنين ليك البرفان !!
- سكر عاد موش باش تذلني على عقاب دبوزة الزح
- عقاب دبوزة من قجري يا سارق. .لعنة الله عليك ههههه
- هههههههههههه ....
ضحك و سكت يترشف في قهوتو المرة ..معاش يطعم فيها اصلا مرة كيما ايامو مرار في مرار ...تلفت شيرة دارها لي مقابلة القهوة في اخر النهج الضيق...
- وليد
- أمم
- بنت عمار...
-نعرف... شعل سيقارو.... نعرف عملتها و تشمتت فيا عرض و طول. .نعرف هاك الطحان مافلتهاش و انا بعيد..
- الم........ ماكفاووش لكفوف لي كلاهم وقتها
- هذاك من النوعية لي لازمها طهور من اول و جديد صاحبي ...
- و ايمان !!
- شبيها !!..يخزرلو و يطفي في السيقارو في الصندرية... ربي يهنيها
- لا عاااد ..مانصدقش
- صدق خويا صدق ... ريت في هالجمعتين لي بعدت فيهم شديت في مخي حاجة وحدة الي حكايتي معاها وفات.انا بديتها و انا كملتها و سكرتها. .. صحيح موش بالساهل اما الوقت يداوي و ينسي. .هي ماختارتنيش اصلا عمرها ماحبتني وانا فهمت روحي حتى كان امخر اما اني نخليها تاخذ اسقط واحد وقتها نولي موش راجل بالرسمي.. تاخو لي تحب عليه وانا مستعد نسلم فيها اما ماتهلكش روحها مع واحد مايسواش
- اما انت. ....
- انا صفحة قديمة...ايا قوم لفطور عندنا في الدار... خلاه مزبهل و قام يخطف في كرهبتو....
بعد لفطور طلعو للسطح يعملو في سواقر و يحكيو .. علولو موش حاملها في صاحبو كيفاش سلم فيها كيفاه الظروف حكمت ضدو وهو لي هاويها و يبات ليالي يغني عليها ..في سكرتو في صحوتو ديما وجها حاضر ماهوش مصدق الي وليد بالهدوء هذا و بالرصانة هذي و خاصة في حكاية تخص ايمان و مش مجرد حكاية هذي خطبتها من غيرو ... اما كانو بالحق يعرف صاحبو و عشيرو اكيد هاذا يسموه هدوء ماقبل العاصفة... حب يجبدو بالكلام و يقنعو مايسلمش اما وليد و صعوبيتو و كسوحية الرأس اللي فيه ماخلالوش وين يدور الريح... مسكين موش عارف الي هذي يسموه حرارة الروح ..الله غالب مازال مصدوم مازال دمو بارد عليها مازال ماراهاش بعد الحبس و شوم لياليه بعد شوفتها.. مازال يقنع في روحو بالبعد اما اش بيعمل وقت تجي لعين في العين ..تو جمعتين ماراهاش جمعتين ماصبحش على وجها و هو كان النهار لي يقصر فيه يشوفها مرتين اقل حاجة ...صاحبو فتر معاه و هو يحاول يفهم منو اما قداش موش حملها فيه. .اش ينذل الراجل يا زحي ...
من غدوة مشاتلو للمعمل على اساس ماتحبوش يجيها للدار باش يهزها تاخو حاجات الخطبة...تحسو مش قاد بعضو يسوق و يتلفت و كلمة و قص معاها..
- كمال !!
-وي
- لباس !! تظهر موش قاد بعضك
- لباس
- اامم شبيها طاطا ماجاتش معاك
- لاهية
- انا زادة تهاني موش فاضية راهو.....
- ياخي نورمال انت !!!!....شد فران قوي خلاها تصيح بالفجعة .... شبيك كل وين نخرجو تكركرلي حد من فاميلتي والا فاميلتك...تي رانا مخطوبين يا زحي وانا تقول مصوحبك تتحيشم و تتخيوف من الناس..تي حتى جرد بوسة حارمتني منها تي أبسط حاجة نشدلك يدك تتحججلي بالف حجة باش نسيبك..كمال اطرشق سايي معاش ضابط روحو قدامها يحس في دمو فار عليها و هي عمالها و تبني في حاجز بيناتهم ..كلامو صحيح اما موش من محبتو فيها اطرشق هكاكا..هو حاب يشيخ و يتفرهد معاها حتى قبل العرس و زيد الكابوس لي يطارد فيه رجع باش يمرمدو من جديد ..اي وليد رجع و هذا اش مخليه معاش ضابط لا كلامو و لا تصروفاتو خاطر يعرف الي عملتو لخرة باش تتكلفلو غالية من وليد.. بالرغم حب يحرقو بايمان و يذلو بيها و شنهي شنهي اختارتني انا اما هذا الكل مايلعبش مع وليد لي ماتبرد نارو كان مايشركو.... هي مازالت مش مستوعبة كلامو شبيه ثار عليها فجأة شبيه يحاسب فيها على حاجات متفاهمين عليها ..هي كانت صريحة معاه وقت قتلو مانحبش الحركات لي يحكي عليهم هو... مستغربة طريقة تفكيرو فيها كيفاش مجرد جسد يبوسو و يفرهد بيه على روحو....اي صحيح جانب كبير مالحب هكاك اما موش لازم نصرحو بيه. ..هي في حد ذاتها تشمأز كي تسمعو لكلام هذاك فما بالك تخمم فيه و مع كمال !!! لتو الفكرة موش حابة تركحلها في مخها معاه... نفخت و قتلو ..
- انا كل يوم نزيد نتصدم فيك كمال. ..شبيك تحكي كالمراهقين ياخي اش مازال على خطبتنا و عرسنا و انت تحكيلي على... افف
- حبيبي سامحني مانيش عارف شبيني هالمدة لكل على اعصابي...الله غالب جات في وجهك ...هزلها يدها و باسهالها. .. اضحك عاد
- باهي برك ... ههه هيا نهبطو الوقت يجري
- نهيرين و حبي تصدر بجنبي ...احلى عروسة... باسها من خدها و هي فوق من قلبها خلاتو خاطر كان باش تزيد تصدو المرة هاذي باش تمصتها بالرسمي معاه... مع لعشية موخر روحت تفارع في صيكانها.. شعرها هابط عليها مش مخليها على راحتها يد بالساشيات و يد في شعرها تفاصيل مستحيل تغيب على ناظر وليد لي كان يمشي و رجع بالتوالي كي شافها جاي
#انتي_سبابي #كرونيك #كرونيكات
الحلقة 19
فرد ثنية..اكتفى بالشوفان ليها و هو يتبسم حاجة اقوى منه و اقوى من القرارات لي طاحت في الماء اول ماجات عينو عليها و هذا لي كان خايف منو ...خلاها لين دخلت و كمل ثنيتو ممروج من شوفتها و من شوفت لي في يديها محملة بيه. .. في الطرف لخر مالحومة كانت قاعدة مهمومة تخمم بقلبها و عقلها ..قلبتها منا و منا مالقات بيها وين ...
- اش بيك يا مرا! !
- جيت يا حاج !!
- أي من بكري اما انت لي ماكش هنا جملة. .فاش سارحة
- مديدة اخرى خطبة ايمان بنت عمار
- اي في بالي
- في بالك ؟؟
- اي في بالي ... حكيت مع عمار هاك النهار
- مكتوب...قالتها و الحسرة ماكلتها
-الله غالب قلب الطفلة مش ميال لولدك.. عمار كان حاب على وليد و قال النهار المبروك اما مادام الطفلة شارهة على لخر و قالت نحب نشوف حياتي معاه بالرغم مش من طبعهم اما مانجمش يعرضلها مسكين
- حليلي على وليدي... تخيل مديدة لتالي كان يقلي يام اخطبهالي راني نحب عليها و انا نمني فيه خاطر كنت مالية يدي منها اما بالفارغ...
- اكاهو الدنيا مكاتيب و الطفلة يتيمة ربي يهنيها بالك مكتوبها خير منو... نحن عملنا لي علينا و هذا ولدنا و هي بنتنا و باش نفرحو بيها كيما الناس
-أن شاء الله... عاودت خزرتلو بنظرات الحزن لي بانت على تقاسيم وجها ...
-انا حكيت مع عمار و حلفت عليه اللمة بماجاميعها عليا زوالي مسكين مافي حالتوش و قالك ناسهم برانية
- كيف برانية وماهمش من جلدتنا و لا من عاداتنا اش لازهم عليهم... باش يتعبو خاطرهم
- حال و احوال. .المهم قول لولدك يوصلهم
- خاطيه ولدي معاش عندو مايعمل غادي يزي .. بدات تبكي...رصاتلو من لي جايين يباركو معناها !!
- استهدي بالله يا مرا عيب راهو... و بعدين الطفلة ممكن حتى مش سامعة بيه يحب عليها و الناس خلوق في لخر
- استغفر الله... انا من جمرتي على ضنايا نحكي راني باقي بنت الناس كيما بنتي و معزتها والله والله مايعرفها كان ربي
-نعرف لطوف الباهية رزينة و صاحبة واجب ايا قوم شوف القضية لي جيبتها ناقصاش حاجة باش تهزوها للجماعة وانت مانتساش الطفلة بحويجة تفرحها بيها
-من يوم يومك صاحب واجب والله..الله لا ينحيك علينا يا ربي
-و يخليك ليا يا لطوف ههههه
ليام خف لف و الخطبة عمالها و تقرب ..وليد غيابو عالحومة اكثر من حظورو لي يعديه بعيد عليها و على جو التحضيرات ارتح ليه ..يخاف يرتكب بعد الحماقات تخليه ينقض الوعد لي قطعو لروحو و يزيد يذل روحو ليها. .مازال عندو فرصة وحدة ..الفرصة هذي مش باش يضفر بيها و يخليها ليه الفرصة هذي باش تفيق على روحها و تشوف كمال على حقيقتو و بعدين تاخو لي تحب المهم يكون يستاهل الشخص لي باش تكون معاه حتى على حساب سعادتو... نهار قبل الخطبة مشات للحمام مع بنات خالتها لي كانو يتناقرو و يتناحرو حمام كامل وحدة فارحتلها بكمال و تشوف فيها حكمت عقلها و اختارت الأفضل ليها و لخرة تشوف في حب محلاه حاملو وليد صديقها في قلبو قاعد يتلاشى و يموت.. حلفو عليها كان ما تبقى تتعشى عندهم ياخي ماحبتش و دوبة خرجت لقات الدنيا ظلمت
مروحة من دار خالتها ساقيها أعلى من راسها الدنيا ظلامت و ماكارهاش وخرت في المرواح. ..زادت رعبتها وقت رات خيال يتبع فيها في الظلام ماتشوف كان في سيقاروه لي يشعل .. عمالها تزرب و عمالو و يقرب لين وصلها. ..
-وليد !!! شبيك اتبع فيا !!!!
- هو مصدوم اكثر منها خاطر ماكانش يحسابها هي لحقيقة عندو مدة يتجنب في شوفانها.... سامحني ماقصدتش نخوفك ..اصلا والله ماعقلتك في الظلام. .. جا ماشي ياخي وقفاتو حست كلامو فيه برود مش متعودة بيه.
-معناها تحب تقلي الي معاش تميزني في الظلمة؟؟ حبت تستفزو بالكلام فماش مايقول كلمة تحس في روحها تحب تسمعو تحبو يرجع يمرجها خاطر من لي خرج مادارش بيها
-وقف عاطيها بظهرو يحكي فوق من قلبو معاها مش حااملها و مش حامل وجودو حذاها...ماتعلمناش نخزرو لحاجات غيرنا...كلمة تغرست في قلبها خلاتها تبلع و تغص منها ماحملتهاش كي قلها حاجات غيرنا. ..
حبت تتمادى في الكلام معاه اما هو سكتها على طريقتو "كلمتين يا بنت الناس انت عملت لي في راسك و هزك غرورك و شماتك فيا للهاوية كنت مستعد لآخر نفس معاك اما انت بايعتني ..علاه نبقى شاريك انا ؟؟
هاني بعيد و ابعد مما تتصوري اما حطي في بالك كل ما تستحقي وليد تلقيه...ربي يهنيك اش تحبني نقلك... كان يحكي معاها يديه في جيابو ماشافش لمعان عينيه و هو يحكي معاها مش مصدق الاصطناع لي يقول فيه رغم يعرف روحو يكذب اما قال لي لازمو يتقال...
- قدمتلو و هزت عينيها فيه...انا نسامحك على كل شي الا حاجة برك عمري مانسامحك عيها يا وليد
-ما تسامحينيش..اصلا ماك فاهمة شي و زايد لحديث تو لا بيقدم و لا بيوخر نهارها سمعتيني كلمتين عديت حياتي كاملة نتجنب فيهم منك و نقول مادامها ماقالتهمش معناها مازال فما امل انك تحبني اما انت تكرهني يجيك نهار و تفهم حبي ليك اما ياخوفي ياكلك الندم و ماتلقاش وليد
خلاها و هي تعاودلو في كلمة..انت شعرة لا باصيتني بعمايلك قدام الحاك
خلاها و هي تعاودلو في كلمة "" انت شعرة لا باصيتني بعمايلك قدام الحاكم علاش باش نندم ترا !!!. ...
تلفتلها و قلها ثلاث كلمات سكتت على جرتهم طول "صحة ليك بيه
#انتي_سبابي #كرونيك #كرونيكات
الحلقة 20
عداتها ليلة كاملة تمولج نوم ربي ماراتوش. .. متيقرة و فادة و تحس في غصة عمالها و تكبر عندها ..علاش تخمم فيه هو موش خطيبها علاش كل وين تغمض عينيها يزورها خيالو و ماتسمع كان كلامو في وذنيها. .كابوس ولالها وليد أكثر تأثير فيها مما كان عليه قبل... ولات ماتبرد و تركح كان ماتشوفو حتى من بعيد ..غريبة فيها شبيها ولات هكا هذي لي كانت تبخر بريحتو و ماتوفرش فرصة الا و تنبزو فيها قبل ولات تحس في حاجات قوية و جديدة عليها حاجات لبكوها و دخلوها في حيط...
في الصباح بكري قامت على صوت بوها لي روح مالجامع ديما مستانس يسبح و يرتل صوتو طالع يتسمع لبيتها ماهيش حاجة جديدة عليها اما اليوم بالذات حاستها و بقات تسمع فيه على غير العادة و تتبسم ..تبسيمة تقتلت على شفايفها وقت جات عينيها على تصويرة امها لي معلقة عالحيط.. تنهدت و شدت روحها في اخر لحظة عالبكاء ..تحس في الغصة مازالت و عمالها و تكبر في حلقها. .. قامت خرجت من بيتها و من جو الذكريات لي كانت هايمة فيه مشات وين بوها لقاتو قاعد في الفيراندا يسبح. ..
- بابا
- كان موش خطبتك راك في سابع نومة
- طبست باساتو... والله كان تقلي خليك ماتمشيش مانمشيش انا عليها نلوج
- لا عاد الطفلة ضيفة في دار بوها لين يجي مكتوبها
- لا انا بطلت سايي و باش نبقى معاك هههههه
- اش خص .اش خص والله فرحتى بيك ماتوفاش
-سكتت بقات تخزرلو و تتبسم..... بابا !
- اه بابا... شبي بنتي الغالية
- نعرف الي الوقت موش متاع خطبة و ظروفنا على قدها سامحني بابا كبدتك في هالمشقة...
- ههههه يزي ماعاش تقول هالكلام وراس بنتي مايغلى عليك شي و ماتحط شي في بالك
- ربي يخليك ليا بابا الغالي و لا ينحيك عليا....
- الصغرون كبر و ولاو يخطبو فيه ...هاكي النهار جاني عمك علي ..هي من لي كانت تضحك تكبست
- شبيه لباس !!
- قاللي وليد حاب على ايمان و مذابينا كان تقبل و نحن مانلقوش خير منها ..هذا لكلام ليه مديدة قبل مايخرج مالحبس ياخي كيف جيتني و قتلي على كمال و ريتك شادة فيه الصحيح وليت و سكت. ..
- انا هاني في الكوجينة خليني نطيب قهوة.... قامت و كان زادت بجنبو دقيقة زايدة راهي تفضحت من وجها لي مشى الوان.. دخلت و سكرت الكوجينة على روحها تتنفس بزربة وتفيق في روحها بالماء البارد ..ماتعرفش علاش هذا الكل علاش حاسة بالخنقة هذي الكل ..معناها وليد كان حاب عليها بالرسمي !! كل كلمة قالها عالعرس و الخطبة و دارهم كانت صحيحة !! يعني حبو كان حقيقة موش يلعب والا كان ناوي يلعب بيها !! اما ...اما لا هو مايستاهلكش ..هو انسان طايش مستهتر و يفسد ياسر انسان كيما هذا مايهانيش عليك و عمرو ماباش يكون مسؤول منك ..ختمت حرب الاعصاب بزوز كفوف على خدودها باش تفيق.... فيق ايمان فيق اليوم خطبتك و انت تخمم في وليد !! ... فطرت و لمت حوستها هوما دارين صغار ماهمش باش يكيدوها و بقات تستنى في اختها و بنات خالتها هي هكاك و تسمع في تزمير البرة قامت تزرب فتحت الباب. .. دقيقة من زمان و الدار تملات و كثرت الحركة فيها بعد ماكانت كان هي و بوها ..من زغروتة لزغروتة و مباركات و الفرحة لي مالية العينين... و ماتحلى القعدة كان بللة النسا لطوف و هي تتبختر بكل اناقتها و ضخامتها ..عرضتلها ايمان عنقتها من اول ماقربت منها بقاو معنقين بعضهم و في الخاطر الف خاطرة و حكاية...
- عيشلي بنتي باربي وريريريريريريريييي. . تبارك الله تبارك الله...لطوف مسكينة تخمس و تحوت عليها و غلبتها العبرة بكات مسكينة اما فيسع ماتداركت روحها و كملت تسلم علبنات... سرات العادة انو الكبيرة في الدار هي لي تبخر للبنية نهار خطبتها واصلا ايمان من غير ماتشعر قالتلهم نحب طاطا لطيفة هي لي تعملي السبر... في البيت كانت تحضر في روحها و لطيفة تحضرلها في البخور و تقرا عليها في المعوذات ...
- ايجي اقعد بحذايا ..ماشاء الله على بنتي المزيونة ... لطيفة ماكانتش منجمة تخبي اعجابها بها و حرقتها من لي صار ... قداش تمنيتك تكون حلالو قداش تمنيت نعملك كنتي و بنتي لي ماعطاهاليش ربي... ماكنتش نتصور نهار نشوفك عروسة لغير وليد والله لتوا مانيش متقبلة الفكرة. ..
- خالتي لطيفة نعرفك تحبني و تعزني وانا...انا والله حاسباتك في مقام امي الله يرحمها ..
- الله يرحمها ... والله كي تتبسم تقول هي قداش تشبهلها ...جبدت ساكها و خرجت منه باكو صغير ... هذا كادو صغير من خالتك ان شاء الله يعجبك. ..
- فتحاتو عينيها وساعو و دمعتها ماكانتش عزيزة. .. يااا محلاها ربي يخليك ...طاحت عليها عنقتها و هي تبكي... عيشك عيشك ربي يخليك طاطا .. انا من نهارت لي باعلي بابا خلخال امي باش يعرس بيه تهاني و انا بغصتي خاطرو الحاجة الوحيدة لي بقاتلي من امي ..
- ايا يزي عاد اليوم فرحة. . تو تعيش و تشري و يجيبلك راجلك و تلبسي ما احلى منها.
<><>
<><>
انتي سبابي
من أنجح الكرونيكات التونسية
#انتي_سبابي #كرونيك #كرونيكات
الحلقة 21
- ربي يخليك ليا والله في مقام امي و ربي يشهد .. ان شاء الله في حجة
- حجتي كي نشوف اولادي متهنيين... شادين جنبي و على عيني مايغيبوش والله فراق الحي امر من فراق الميت..نبات ليالي خالتك نخمم على وائل زعما ياكل بالباهي زعما متغطي و الا عريان يرقد مليح ولا مقطع بالخدمة هذا الكل وأنا شارقة بيه خاطرو صغير و بعيد و كانك عالكبير ....تنهدت و خزرتلها خزرة تاع لوم و حسرة و غصة ماتفهمهاش شنية. ... ااااه من وليد و من عمايل وليد. ... ايمان شدها لحديث و ركزت معاها كي جات سيرتو ..حطت الروبة على جنب و قعدت مقابلتها.... تعرف الي من صغرتو عامل البطيط تي من لي كان في كرشي كان مهرج تعبني برشا و وصلت خالتك نزرق و من سبيطار لسبيطار باش ركحوهولي و تعدات ايامات وحم و حبالة الله لا يوريهم لونيس..
- ههههههههه مالا الشي مش من عدم. ... ضحكت و فيسع ما سكتت تستنى في بقية لحديث
- وليد كسوحية راسو وصعبو كان مع الناس لي توصل روحها معاه .. صحيح عندو النطرة اما مش لدرجة سميوه الباندي ههههههه والله مانعرف منين جابوهالو الساعة حنين و سخوفي و ياااااسر فدلاك .(ايمان تتبسم وحدها هازها موال آخر حاضر فيه كان وليد و عمايل وليد .. ) تعرف يقولولي وائل طبايعو خير من وليد ..و انا نعرف أولادي و ماعنديش فرق بيناتهم و صحيح وائل ارزن و اعقل اما وليد بو قلب كبير و لي عندو موش ليه عمرو مايرقد كان مايمسي عليا عمرو ما تفوتو حاجة فيها خير للناس ..الله غالب جات مديدة فسد فيها و ياااسر كثرلها اما نحمد ربي لي فاق على وضعو و رجع الثنية... شدتلها طرف صوابعها بيدها و حطت يدها لخرى فوقهم.. نعرف الي انت سبب في هذا الكل نعرف الي انت بقصد والا بلاش رجعتيلي ولدي لي عديت سنين نستنى فيه يفيق من سبهتو .. انت يا ايمان كنت و مازلتي باش تكونى اول مرا حبها وليد اول مرا خمم فيها كمرتو مش مجرد نزوة انت الوحيدة لي كي تتجبد سيرتك يولي عبد اخر يولي كالصغار لي تلوج على حاجة...
- خالتي انا.....
- خليني نكمل خليني نفرغ قلبي. .ممكن معاش باش تواتيني فرصة أخرى اني نحكيلك اش عملتي في ولدي .. تعرف يا ايمان نهار لي مشالو بوه في الحبس و كبش فيه يمشي لبوك و يخطبك منو قالي الحاج عمري ماريت وليد ممروج على حكاية أكثر من حكاية ايمان تخيل نسى حشمتو من بوه و ماخلاه يخرج كان ماحلفو يطلع من الزيارة و ديراكت يروح لبوك يطلبك منو. . كان يقولو "" برالو الحاج عمار و قلو بنتك ماتبات كان عندي "" ههههههه تخيل الحاج علي روح يضحك يحكيلي راو ولدك ضبع سايي عليه ماعاد حاشم من حد ...
ايمان متفاعلة معاها بعينيها لي تلمع دوب يتذكر اسمو ..بقلبها لي بين نارين و لتو ماهي فاهمة شنوا سبب هالحرايق لي ماقالت نخمد... بانفاسها لي طالعة هابطة و بين كل نفس و نفس يتذكر وليد ...
- نعرف القلب و مايريد و انت قلبك مش لولدي نعرف هذا الكل ولي نحكي فيه.. المكتوب حكم اما خالتك تعرفني نحبك و ياما تمنيتك كنتي و مرتو وليد .. كنت ديما نقول ماتواتيه كان انت اما مكتوب و المكتوب مامنو مهروب... ايمان مشبكة صوابعها في بعضهم تسمع و بينها و بين روحها تقول " علاه الناس الكل شافت حب وليد ليا كان انا تعميت عليه و الا انا لي عميت روحي بروحي و خليتلوش الفرصة يقرب باش نشوف هالحب و نحس بيه. .. علاش الناس الكل تشوف في وليد بالعين الباهية الا انا شفتو كان بالعاطل و نفرتو ..فما شكون يحب للدرجة هذي !! فما ام تشوف في حلم ولدها قاعد يضيع و هي تحكيلك قداش نحبك و قداش تمناتك تكون حلالو في الوقت لي هي تعرف الي انتي رافضاتو اكثر من ثلاثة آلاف مرة و تزيد تهديلك سلسلة و براسلي ذهب يااسر مضخمين و ظاهرين غاليين !! اليوم تتعلم يا ايمان الي لي يحب بقلبو عمرو مايكره عمرو ما يشوفك بنظرة النقص و الكره مهما عملت و كثرت.. بوسة لطوف عاودت فيقتها من سرحتها. .
- شبيك يا طفلة وليت تسرح ياسر راك ايا عاد شد روحك شويا لايقولو غشونا هههههه ...جات قايمة ياخي نسرين شدتها من يدها ..
- خالتي لطيفة انا نحب نقولك الي و....... الباب تفتح و لبنات عملو هلماني في البيت ولات و سكتت ممكن احسن كي تسكت خاطر معاش فما شي يتقال ...
●●●●●●●●●●●
- انت ماكش راجل و طحان سافا !!!!!
-................
- والله لاني فاهمك انا ياخي نورمال تخليهالو ؟؟؟ لباس في مخك !!!!! باش حشيتو راسك لي كالسطل كي خممت في هالعملة ؟؟؟؟؟؟
-..............
- ولييييييد راك نطقت ........... شبي........... عبرني و انا لي باش نتجلط يا زحي !!!
- وووووووووه سكر ولدين ام فمك اش تحكي يا ......... تحب تجرمني هالعشية !! نمشي نقتلو نغفسو و نطيش و الم ....... .متاع وذني باش ترتاح الناس الكل !!!! مانخافش راني و الخوف كان من لي خلقني اما لا...لا خليه هو يغلطلو غلطة باش تفيق البهيمة لي نحبها على وضعها ..نحب نشدو بالكمشة يعمل في خمجو و تق.....بو باش هي تقتنع و ترجع بالتوالي و تشوف وين كانت ماشية في هاوية....
- علاش !!! علاش مش تو
علاش موش قبل اليوم راهي خطبتها ؟؟
- انت قلتها ...خطبة يعني موش صداق ..انا وراه لين يطيح في يدي الساقط وقتها تعرف اش كنت نقلها و نفهم فيها
- أي و مبعد ؟؟ تعييش في سعادة و هناء !!!
- انا فرحتي بفرحتها كي تكون متهنية حتى مع غيري.. ريت بلي بنحكي و نشكي مستحيل تحس بيا و بحرقتي يا علولو مستحيل يجي لبالك حالتي و انا نتخايل فيها تضحكلو و تقلو نحبك و ناري لي ما تخمد كي نتصور فيه شادلها يدها والا يحاول يبوس......... سكت وليد و تقتلت الكلمات على شفايفو مايحبش تجي لبالو فكرة البوسة لي ممكن تصير بينها و بين كمال. .الله غالب كان يعرف الي راهو ماصارتش هالبوسة لتوا راهو تفرهد شوي ...
- صاحبي..حطلو علولو يدو على كتفو... و حق لي زرع هاللحية مانيش راجل كان نخلي حبك يمشي خسارة بين الساقين
- رد بالك تعملك حاجة راني والله لا عاد......
- لا عاد شنوا ؟؟؟ لا عاد تكلمني ؟؟؟ طز فيك و في كلامك انت اكبر خواف انت جبان لي مادفعتش على الحب متاعك مادافعتش على مرتك و خليتها تمشي لغيرك ..وليد سايي تحمل بما فيه الكفاية كلام علولو كان ياسر مستفز...
- سككككككر ....و يفرشو ببونية على قوة جهدو... سكر سكر علي سكر فمك اسسسس كلمة ماعاد تزيدها.... انا ايمان لي حبيت دفنتها من نهار الخربة ماتت ايمان في قلبي من نهار لي قاتلي نكرهك.. وفينا انا واياها وفينا وكان تشوف فيا مشغول راهو خاطر ماهوش ليها الطحان و ماتستاهلوش و هي أجدر لواحد خير منو تي حتى انا مانيش ليها ...خليني نتمرمد نطيح و نقوم وحدي و ليام تنسيني فيها ....سكت يشوف لبعيييييد في الشمس لي عمالها تميل للغروب. . .علولو هز روحو و مشى مقهور عليه و منه لكن كلامو منطقي رغم قسوتو...
تلفون و يصوني هز ديراكت ..
- وي بابا
- ياخي وينك اش عملنا في قضية الجماعة عيب بطينا رانا!
- هاني جيت... جبد آخر نفس من السيقارو و طيشو ... اليوم وليد كي حكي حكي بكل عقلانية وكل ثبات ..اليوم يشوف في طريق مسدود كان يمشي فيه مللول وحدو عاش يتخيل في وجودها في اخر الطريق... قرارات خذاها بكل نضج و كل حس بالرصانة تجاه حب من جهة وحدة حب تعبو و ذلو وكان باش يواصل فيه مازال باش يتعب .. يرحي في الكياس رحيان على غناية كان و مازال يحبها اصلا يحس ماتكتبت و تغنات كان ليه و لحكايتو لحزينة..
●●انت سبابي عيشتيني في الدوت ●●
●●حيي عليا كل يوم نحيا و نموت ●●
●●وطال الحال ما بغاش عليا يفوت ●●
●● آ رايي آ رايي
●● بغيتي لكمال و قلتيلي سايي ●●
●●و انا فعشقك وحدي نباطايي●●
●● و تهمتيني قلتي داير رايي ●●
●●آ رايي آآ وعدي ●●
●● او كنتي تسواي عندي الدنيا ●●
●●و رضاو عليك حتى والديا●●
●●كنت عاقل امعاك انت انا كنا فور●●
●●ديرولها لعقل بالي راني ●●
●●نبغيها ومزال هي عمري راني معاها نا فيدال جامي نشوجياا ●●●
وصل لدارهم خطف القضية و قصد ربي .. موش حاب يمشي اما لازمو يوصل أمانة بوه. .بساق لقدام و عشرة لتالي وصل و مع تزمير لكرهبة خرجو لبنات... هي كانت لاهية تعمل في عرف حرقوس وقت جاتها نعيمة...
- نعيمة شكون التزمير ؟؟ تلفتلها و رجعت مدت يدها للبنية لي تحرقس
- وليد .... وليد جاب القضية لي بعثها عم علي. .هي تقول تستنى في شكون يجيب سيرتو قدامها و يقلها هاو وليد جاء قامت بلاش رادا منها تخزر من ورا الريدو لبيض تشوف فيه يهبط في قضية باينة تستاهل المناسبة لي تجابت على خاطرها. .. وقت شافاتو يهبط في مان الكرهبة مانجمتش تشد روحها عليه مشاتلو و خلات الحرقاسة مستغربة و نعيمة تقلها الحب يعمل ....
دار فتح الباب و ركب باش يخطف كرهبتو ويطلع و هي خرجت و يا ريتها ما خرجت و لا حيراتو من اول و جديد.. وقفت تخزرلو بجنب الباب و هو عينيه ماتهزتش من الحرقوس لي مزين يدياتها لي يعشق لمستهم و يتمناها و لو مرة. ..
- يعطيك الصحة وليد ... مالقات ماتقول اصلا ماهيش عارفة اش مخرجها و علاش واقفة هوني توا! !
- ماعطاش بال لكلامها اصلا اش تخرفي يقلها في سرو انا وين و انت تقوليلي يعطيك الصحة...ملامح وجهو كانت جامدة ..منغير سابق انذار سألها بكل وجيعة "فرحانة؟؟؟ "
-تتلفت لكل بلاصة كان عينيه لي مارقة فيها... اي ..كيما اي بنية..
- تبسم بقهرة... انت فرحانة و انا نكركر في قضيات خطبتك..كبس بيديه عالفولون... اش مزالت الدنيا باش تعمل فيا اخر...
-تعدي في قصتها ورا وذنها ..مكتوب .. انت زادة تو تلقى بنت لحلال... خير مني و الاهم تحبك. ...
-عاود خزرلها و في عينيه تعب الدنيا الكل... ههه انا الايام و المكتوب و الفازات الكل بيا غرو...تنهد.... بعدك يحرم عالقلب يدق لغيرك
-زلقت بالحديث موش عارفة كيف... القلب ميت من هاك العام الحب لي يحكو عليه عمري ماعشتو و لا نعرفو ... عاودت ركحت شعرها لي هازو الريح.... تمنيت ..تمنيت باارشا حاجات ...
-تلفتلها باهت و سألها بلهفة... يعني ما ت...ما تحبوش؟؟ يعني انت الي قاعد يصير ما تمنيتوش؟؟هبط مالكرهبة و قابلها و كمل يحكي ....
#انتي_سبابي #كرونيك #كرونيكات
الحلقة 22
ايمان ...اسمعني ما تاخونيش اكرهني احقد عليا انفرني.. اما نهار إلي تختار نحبك تكون فرحانة نحبك مقتنعة...انا بعدت باش نخليك تفرح موش باش تعمل حاجة انت ما تمنيتهاش
-وخرت هاربة من حظورو و اسئلتو.. " معاش تربط روحك بكل كلمة نقولها وليد ارتحلك و ارتحلي. .. نحبو مانحبوش هذيكا بالوقت تجي لي نعرفو الي هو مناسب ليا فيه لي تلوج عليه أي مرا... هزت عينيها فيه لي كانو يحرقو بالدمعة المكبوتة. ... تمنيتك.... تمنيتك.... حست لي ولات مفضوحة و كملت بزربة كلامها .. تمنيتك ت ..تفهمني ..ساعات الظروف تفرض عليك تولي مسير موش مخير
-فشل من كلامها وخر تكا عالكرهبة و تكلم بحزن لهالدرجة؟؟ لهالدرجة جنتك في بعدي و نارك في قربي؟؟ لهالدرجة حبي ما عنالك شي...تاخو حد باش تحبو بالوقت و انا إلي اسمك محفور لنا (حط صبعو على قلبو) طول الوقت...فرصتي....(تنهد) علاه الفرصة الي عطيتها لغيرو ما كانتش فرصتي؟ يمكن كنت تحبني زادة انا بالوقت...(تبسم بوجيعة) اه انا منيش مناسب و موش إلي تلوج عليه...(هز راسو و خزرلها) الظروف إلي تحكي عليها مخليتني نحضر لخطبة الطفلة الي القلب تربا عليها و الروح تمناتها...فما ظروف أصعب من هكا؟؟(سكت شوية و سألها) نسألك حاجة و جاوبني عليها...(ضم شفايفو و سألها) علاه تكرهني لهالدرجة؟؟ عمرك لا نهار قلبك هكا مالي حتى شوية؟؟ (مزالت مصدومة من سؤالو و هو كمل) توا كلشي وفا و غدوة تولي ملك غيري و يمكن معادش نجم نسألك حاجة هكا...كان ..كان جيت مستكفي بروحي و خدام كنت تنجم تحبني؟؟
-وجها لخلخ تشوفلو بملامح الهزيمة من كلامو لي كانلها كيما السكينة... اي كلامو صحيح عمرها لا خممت كان جاء مكتفي بروحو اش كانت تنجم وقتها تعمل في حبو ليها .. " انا مانكرهكش.... ككلمة خرجت قلتها ..سكتت مش عارفة ماتقول سؤالو مراوغ لدرجة ماتوقعتش يسالهولها نهار
-الوجيعة الي في قلبو خلات صوتو يخرج ضعيف ....اما ما تحبنيش زادة.... خزرلها و لمعة الدموع في عينيه... انا نتمنى نراك اسعد وحدة موش كيما قتلي انت إلي انا نفرح كي نراك حزينة...حبيت نقلك اني كلشي ما يسوى شي قدام فرحتك و رغبتك...بلع ريقو باش ينجم يكمل حبيتك اكثر من كلشي يا ايمان..حبيتك لدرجة إني كلمة نكرهك كي تخرج من لسانك حتى كان ما تقصدهاش انا توصل لقلبي كي الرصاصة...تبسم بوجيعة... إلي واجعني موش خسارتك خاطر انا خاسرك من اول نهار..إلي واجعني إنو حبي ليك هو إلي كرهك فيا ههه...كانت ضحكتو حزينة تذبح...هز فيها عينيه لمبحرة بالدموع هاني بديت نحربط على كونترا لبرا..مسألة وقت و نمشي على روحي...نش....منغير ما تشعر قصت عليه..."البرا !!! انت لي حياتك كاملة رافض فكرة لخروج و ياما عييت في خوك باش مايمشيش تجي توا و تحب تخرج ؟؟؟ هذا الكل خاطرني ....خاطرني ... (مانجمتش تقولها تحس كلامو عليها و عشقو فيها بالدموع لي واضحة في عينيه مانجمتش تعاود تجرحو بكلمة "خاطرني لغيرك " بقات تشوف فيه تتامل مانجمتش تهز عينيها من عليه كاينها تودع فيه ولا معاش باش نشوفو هو لي حسب نظراتها ليه تجي شفقة تجي نقمة تجي كل شي الا انها حب ولات ماتشبع بيه كان كي تشوفلو في عينيه.... نتفكر ....(قدمتلو شويا و هو أستغرب مالجاست متاعها كي حطت يدها تحت عينو ... ) نتفكر الضربة هاذي بالقدا.. و كل مانتفكر الموافق لي مريت بيها و انت حاميلي ظهري نزيد نحس بفقد الخو السند و الدرع لي عمري ماحسيتو كان معاك باش تمشي انت و لشكون باش تخليني بعدك شكون باش يحاكي عليا.. كلامها خارج من غير تخمام من غير تفكير تحكي على لسان قلبها لي ذاب ..تحس في دفئ يدو على يدها وقت حطها عليها و هزها شيرة قلبو و بدى يضرب بيدها على صدرو ما فاقش بروحو كيف بلبزلها الحرقوس..
-لازمني نبعد لازمني نمشي...هذا ما يحيا كان بيك و ما يتحملش يراك لغيرو..(غص في الكلام) ما نجمش نتحمل خسارتك...صحيح عمرك ما كنت ليا اما من داخل كان عندي امل نهار تحس بيا...عمري ما تصورت نكون فرايجي في خطبتك...لازمني نبعد باش ترتاح خاطرني تعبتك اما مهما ما نبعد يا ايمان تأكد انو وليد ديما في ظهرك ديما وراك...ملي وعييت عالدنيا و انا حاسك مسؤوليتي ...(شعل سيقارو و كمل يحكي بمرارة) كي كنت نجي للمعمل و نبدا نتبع فيك من تالي ما كانش قصدي نخوفك و الا نقلقك كنت نحب نطمان عليك...هز راسو و شاورلها بصبعو لشباك بيتها...اناما نتهنى إلا ما نرا الضو هذاكة طفا و نعرفك رقدت...كان صوتو يذبح... الي عملتو الكل عملتو خاطر نحبك عملتو باش نقربك ياخي انت نفرتني...القلوب يا تميل يا ما تميلش و انت يا بنت الناس قلبك موش ليا..نفخ الدخان و نطق اسمها كل حرف وحدو) إ..ي..م..ا..ن.ههه تو بالحق خسرتك؟؟ بالمنجد إلي حلمت بيه حياتي الكل مرهون في تزغريدة غدوة؟؟ تزغريدة تربطك بواحد اخر و تقطعني انا مالدنيا جمملة..(تنهد) حياتي الكل نخسر.أمي تقلي العضمة الحارمة و بابا يقلي العايق و صحابي يقولولي الفاشل هههه عمري ما حسيت بالفشل قد و انا واقف معاك توا و نقلك ربي يهنيك مع غيري.
-حبك الحاجة الوحيدة الثابتة و الصادقة في حياتي..الحاجة إلي مخليتني نستنا في غدوة اما توا..هههه تو كان نقلك نحب نحملك لاول مرة و اخر مرة تزيد تكرهني ولا تشفق عليا و تخليني و تدخل؟؟
وجها مغصور تغمض في عينيها و تكبس عليهم تحب تتمالك روحها كلامو زاد دخلها في حيط زاد على مابيها و زاد من همها لي حاسة بيه لي ماحبش ينزاح من نهار لي وافقت على كمال. .. من غير ما يستناها تقلو قدم خطوة و هزها بين يديه قوة التعنيقة و حرارتها خلاتها تحس روحها طايرة. .هي طايرة صحيح خاطرو حملها خلاها بين وطى و فضاء. .."و..ليد ..ولي..." زاد لزها ليه ما خلاهاش تحكي ما اكبرها من فرحة و هو يستنى فيها هالتعنيقة عشرة سنين ...حشا راسو في شعرها و وحل غادي لحظات مايحبش يوفاو خلاص. ..هي تربثت من دفى صدرو و دقات قلبو لي قريب يخرج... سلمت روحها ليه.. للحظة لي ممكن مستحيل تتعاود و في نظرها معاش باش تتعاود .. سلمت روحها لاحساس جديد و قوى تجاه وليد احساس بالجنة في قربو لاول مرة ... بكات اي اي بكات و زادت في البكية. .علاش !! مش عارفة علاش..تعرف احساس الحارق و هو يشوف في اخر طرف لليابسة من الوطن متاعو ... سكتت ..ختارت انها تسكت. ..
ما كانش يحب يبعد ما كانش يحب يسيبها...روحو تعلقت في هاك التعنيقة إلي على قد فرحتو بيها على قد ما قلبو بكا كي تفكر إني تعنيقة الوداع. كان يستنشق في ريحتها و يعاود يحب يعبي صدرو بريحتها على قد ما يقدر...دموعو هبطت اييي وليد بكا ...بكا على حلمو إلي ضاع بكا على حبو إلي خسرو...بكا على نسرين إلي مشات...جبد روحو شوية الموقف كان كما الزلزال إلي رهوجهم الزوز...تعنيقة كانت كيما الذكرى الصغيرة إلي تمناها اما تمناهاش تكون شفق النهاية...جبد روحو و خزرلها في عينيها و قلها
-عمري ماني باش ننساك ..جرا للكرهبة باش ما تراش انهيارو و قلها بصوت مخنوق بالبكا...في لمان يا عمري...
دموعها مانشفتش ماحبتش تكف لا بتعنيقتو و لا بعدو و هو عامل الدورة بالكرهبة مافقتش بروحها كيف اتبع فيه بخطوات غير متزنة من ركايبها لي يضربو في بعضهم .. مازالت مرهوجة من لي عاشاتو معاه او بالاحرى لي هو عيشهولها... لقات روحها بعدت طريف على عتبة دارها شادة جرتو و تلهث باسمو رغم ماهيش تجري.." وليد...و..وليد ...و..لي...د.. " خديها تحرق بالدموع ... هو ماكانش يبكي ..كان يعيط و يصيح و يضرب في روحو ..دمعتو العزيزة ولات شرتيلة اليوم...يشوف فيها في الريتروفيزار معاش حاس بشي غمض عينيه و زاد في الفيتاس و غبر..
#انتي_سبابي #كرونيك #كرونيكات
الحلقة 23
كانت متصدرة في فراحة دارهم المتواضعة ودار خطيبها دايرين بيها فما لي فرحان و فما لي موش عاجبو لا لحومة و لا الفقر لي ساكنة فيه... هو كان شاد جنبها لصق كالعلكة الهم ماقالش نبعد. .. أهلها و ناسها و جيرانهم الكل حاطيين الحطة و فرحانين بيها يااسر يحبوها رغم التواضع المادي لي عايشين فيه الا انهم كانو يحبو بقلوبهم و قلوبهم صافية هاذم هوما لبدادعة الكرم و الكلمة الطبية... و طبعا ماتحلى اي لمة و اي فرح كان بدار وليد ليلا لطيفة و الحاج علي هوما يتسماو من الناس لي لباس بيهم في الحومة و مالكبارية و تقصدهم لعباد في الشاردة و الواردة... ضيافة و شطيح و رديح خلات الجو يحلى مع تلبيس الخواتم ..ايمان كانت تلوج بعينيها عليه كاينها تحب تتخبى منو و ماتحبوش يشوفها كي تلبس الخاتم لي باش يبعدها عليه سايي.. صحيح تتبسم و حاطة الحطة اما القلب مليان مهموم و باارد موش مرتاحة و ماكانتش تستنى في روحها باش تكون بالبرود هذا و الجفاء تجاه كمال ... تحب تطرد هالافكار لمغيمة و موش منجمة داخلة بعضها و مافاهمة شي تكتفي بتبسيمة ليه كل ما وشوشلها في وذنها ولا يكلمها واحد مالحظور... ماصدقت لربي روحو و بقاو حومتها صافيين و توا وين باش يحلى الجو توا وين قامت الجماعة و بدات تشطح على راحتها و يعملو في هاكي الفازات متاع ولاد الحومة و الجو العربي و التفريك ..صحيح الكل فرحان اما فما لي متحير على حلم كان ينجم يكون احلى لو تخطبت ليه اليوم .. عيون تضحك فارحة اما القلب ينزف على كبدة هايمة تحطمت ..على صاحب و عشير يبات ينادي بإسمها. .على بنت الخالة لي ركبت راسها و عمروهولها بالفارغ و غرو بيها و هي تبعتهم. .. كانت تشطح و متفاعلة مع لولاد الحومة لي عطاو كادواتهم ليها كيما جرات العادة هاني كل واحد يمد حويجة لي يقدر عليها فلوس لبسة شركة و حتى كعبة ميلفاي المهم لولاد الكل يمدو. .
في الوقت هذاك كان في بيتو هازو بين يديه يتامل فيه قداه محلاهو و قداه ينجم يكون محلاه على ساقيها البيض. .يدور فيه بين يديه و يتحسر على حلمتو المزيانة و افكارو لي هزوه للهاوية كي كان يقنع في روحو انو يجي نهار و تكون حلالو و ماتدخل الا و هالخلخال في سقيها.. قداش كان يستنى في اللحظة و هو يشوف في فرحتها بيه كي باش تشوف الخلخال و تلبسو خاطرو يعرف معزة هالخلخال و قداش بكات و تمنات تلبسو في عرسها ... في عز اوهامو تلفون ماقالش يسكت...
- شبيك !!
- وين انت !!
في دارنا علاه لبا
علاه لباس تكلم فيا !
- ماكش جاي !! الجماعة روحت راو و هانا جرابة صافييت تي هيا عاد
- تي افهمني الزح علولو شبيك كبشت ..مانحبش نمشي نخاف نبلبزها...خليني رايض
- شارب وليد !!
- لا
-باهي الأمانة ماو لازم تعطيهالها
- انا كي قريب نوصل اخرجلي مدهالها
- مثبت تحبني انا لي نمدهالها !!
- اوووووه على زحي يا علي تي قيلنا عاد .... علق عليه و قام حطو في باكوه و رجع اتكى عالفرش غمض عينيه و حظورها طغى من جديد اش يعمل و طيفها يطارد فيه... عاود تلفونو يصوني و المرة هاذي هز بكفرة ..
- شبي دين...... ماتملش !!
- ههههههههه شكون المغبون لي جاباتو ساقيه لحظوظك يا خويا والله مشى فيها
- ابو الويل. ..شحوال خويا لباس ... تي هذاك علولو نطقني كالعادة. ..وينك انت اش عامل
- هاني نسال على اخباركم ..و انت شنهي قالي بابا عديت ربطية جمعتين اش عامل زادة ؟؟
- يا ولدي إجراءات روتينية ههههههه
- هههههههههه زايد شتلة راك. ..اييه شنهي الجو اش فما جديد ويني الحب اش عاملة فيك.. والله ما كانتلك كان هي ند و كاسرتلك شوكتك دائما و ابدا
- زيد مع شوكتي قلبي يا ولد امي. ..ليوم خ.خخطبتها.. غص في الكلمة ماطلعها كان بالقدرة... الله غالب مكتوب خويا
- لا عاد ماتقليش لي انت سلمت فيها بعد لي صار الكل بعد اكثر من عشرة سنين حب !!
- سنييين حب اما حب وليد حب جبتو انا حبيت نفرضو عليها بالسيف اما المكتوب اقوى و قال كلمتو و هي احتمات بالمكتوب و سكتتني ...
- وليدو. .انت عملت لي عليك و اي واحد حب بالحق كان يعمل لي عملتو و اكثر و نعرف خويا مستحيل يتراجع في حاجة حطها في راسو اللاهم غلباتو الدنيا و خذلاتو نفس الحاجة لي كان حاطها بين عينيه ... ولد امي نقولك لي هي مشات اختارت تكون مع غيرك و رسمت حياتها بارادتها انت نحبها ادعيلها بالهناء و خليها وراك و تعدى تلفت لعمرك زادة ما تاقفش عالاطلال و ماتخليش حبك ليها يهدك خليه درس ليك و خلي راسك ديما في السماء خاطر لي يحب بالحق يضحي و انت ضحيت لي يحب ما يتملكش اخر وانت خليتها طارت كالحمامة خاطرها كانت تلوج على حريتها و حريتها موش معاك ..انا مانعرفش خاطيبها لي ممكن يكون اخيب منك في كل شي كيما ينجم يكون خير منك و ببارشا اما الحاجة لي متاكد منها انو مستحيل يكون كيف وليد بحب وليد و لهفة وليد و بطول بال وليد لي تحمل السنين هذي الكل باش في لخر يتوج حبو بأكبر خسارة ليه و هي خسارتها ...
- كان منسجم مع كل كلمة يقولها خوه ولد امو لي حاس بيه و بوجيعتو و مايخفف عليه كان هو. .. كان يسمع مرتاح خاطر نفس لكلام كان في قلبو اما قتلو على شفايفو الله غالب مانجمش يسمعو من روحو و يقنع روحو بيه ..... ياخي من وقتاه وليت فيلسوف يا قفصة ولا الفرنسيس عرقو عليك ههه
- هههههه ياخي حتى و انت تنزف كان ماتسيب بسالتك يا ماسط
- الاخوان ماسط و لاسط... سكت شويا. . اااااه كثر الهم يضحك تعرف انا بيدي مافهم شي
- اسمعني انا لازمني نعلق وصلني ايمايل لازمني نشوفو ان شاء الله في اقرب فرصة نكلمك عندي مانحكيلك
- باهي في لمان ... علق. . شارد في السقف و كلام خوه يتعاود في وذنيه موش عارف اش باش يعمل اما كلامو ريحو شويا كان محتاج لدعم في اللحظة هاذي كان محتاج لصفعة تفيقو من سبهتو...
في الزنقة لي بجنب دارها كان راكش تحت شباكها بالضبط يشوف في خيالها لي عاكسو الضو من ورا الريدو صوتها و صوت ضحكتها مع لبنات خلاووه يتمنى يطلعلها يسرقها و يغبر بيها لوين مايلقاهم حد بالسيف عليها و تسكر فمها اما كمال و اما خطبة و بوزقليف.. قصلو جملة قراراتو المصيرية دقات علولو عالبلار لي جاء باش يطلع ياخي شاورلو وليد يبدو و مدلو الباكو. .
- شد خوذ و من غير ما تطلع نعرفك بتمرجني
- سكر برك يا طيح سعدك ..فرحان بروحك خليتهالو !!اقسم بالله كان تراه الطحان كيف كان بكري متصد.....
- غزرلو بكل غش و حكا بنطرة ... هز الكازي عطيهولها يا علي و سكر عليا راك نفختلي..... ديمارا و خلاه في الغبرة... كالفالح مشالها مداها للباكو
- اهلا خويا علي !! استغربت من الباكو لي في يدو...
- تفضل ... هذا ليك
- مرسى علي اما راك عطيتني كادو يرحم والديك
- ميسالش خوذ اكيد لي في وسطو مش كيما الكادوات آخرين هذا سبيسيال شويا...جاء ماشي ياخي قتلو و هي تسكر في الباب. .
- قول لصاحبك كثر خيرك و ان شاء الله فرحتك يا علي
ديراكت لبيتها متجاهلة الكادوات الكل و تحل في متاعو لي كانت مستنياتو زعما اش ينجم يكون بعثلها كانت تتوقع في كل شي الا انو يكون لي قاعدة تشوف فيه قدامها توا. .عينيها وساعت مع لمعة واضحة فيهم مسبوقة بشهقة خلاوها تتمادا للورقة لمكتوبة معاه
"""""" نعرف الي راك تبكي و انت تقرا تو في الورقة..الورقة لي بتت ليالي و انا نكتب و نعاود فيها ..اش مازال يتكتب و اش مازال يتحكى... مانيش باش نتصطنع القوة و نعمل فيها عاقل لاااااا ا...نا تو إنسان مدمر إنسان خسر حاجة كان يجري عليها حياتو كاملة ..انت ماكنتيش حلمة يا ايمان
#انتي_سبابي #كرونيك #كرونيكات
الحلقة 24
انت ماكنتيش حلمة يا ايمان ماكنتيش أمنية بعيدة ..انت كنت قدامي كنت الماضي و الحاضر و كنت انا ناويك المستقبل لي رسمتو انا باوهام عاشق للاسف كان يحلم... كسرتيلي ظهري يا بنت الناس كنت عايش على فتيل شمعة كنتي تضويها انتي لكنك حرمتيني للمرة الآلف منك ... تعرف نجي نقارن بين الطريق لي خترتيه و الموت نلقى الموت أهون خاطر ندفنك و نأيس منك اما فكرة انك لغيري ملك غيري و مرت غيري مستحيل كان باش نقبلها نهار ... ربي يصبرني عليك .. و ربي يهديك ... ان شاء الله يصونك و عيشك كيما تمنيتي تعيشي بعيدة عليا ... ممكن ماتحبش تتفكرني خااطرني عيفتك في روحك اما حبيت نفرحك بخلخال خالتي خديجة لي كان مخبياتو ليك باش تخرج بيه عروسة. .. نعرفو يعز عليك وانا شريتو و خبيتو عندي لاني تمنيت نلبس هولك و انت مرتي و حلالي و نفرحك ...انت تمنيت و انا تمنيت اما اش تجي امنيتي قدام قيمة هالخلخال عندك... هههههه طبعا كان ماعطيتو طريحة السايغي باش رجعهولي ....
حبي.. ربي يهنيك و يكتبلك الوقت الطيب.. حاجة وحدة حطها بين عينيك وليد الكلوشار الخايب السوكارجي عمرو ماهو باش ينساك .. يزي مالبكاء عاد صايي وليد باش يعتقك و يبعدك اخيييرا اضحكي عاد....""""
دموعها يقطرو عالورقة غسلتها غسلان و الحبر عمالو و يتنحى منها و بالصدفة و هي تمسح في دموعها مالورقة لقاء كلمة ""ماكنتيش أمنية بعيدة"" تفسخت يتسمى بدموعها لي تقطر ... تخزر للورقة و تحكي كاينو مقابلها..انا من يوم يومي امنية بالنسبة ليك اما الله غالب ماتحققتش انشاء الله مانكونش ظلمتك يا ولد الناس معايا... الخلخال و ذكريات السنين لي تعدات و انا نلبس فيه من يدين امي رجعتلي وقت رجعتهولي انت .. اما اش انجم نعطيك في المقابل شي مانجم نعطيه شي كان ندعيلك ربي يعطيك على قد قلبك و يعطيك ما خير مني ... كلامها قهرها وجعها و خلى دمعتها تسيل ما كفتش مازال امالا كان يسمعو وليد اش يعمل. ..
وليد لي في عالم آخر هازو موال آخر هازو غشو و حبو و رغبتو بيها لعالم النسيان لعالم الخمرة و النسا لي تنسيك في همك يقولو لي المرا تنسيك في المرا اما وليد الف مرا ماتنسيهش في حلمتو ماتنسيهش في المرا الوحيدة لحب و عشق ماتنسيهش في ايمان ...جابتو ساقيه لدار العهر لوكر الساقطة حلومة بنت سعاد هذي تسكن في اول الحومة تقول حاطيينها في الاستقبال...دق الباب و كانت دهشتها بيه ماتتوصف تتلوى و تتمعجن في روبتها اللاصقة لي موريتلها اكثر من شطر افخاذها و الصدر لي على برة خلاه يدز الباب و يدخل. ..
- ايجا اقعد وليد... كانت تجبد فيه من يدو و هو ضايع فيها ماعلى بالو بشي. ... يا خايب هكا تخلينا نتوحشوك !!
- هاني جيت موش عاجبك نروح راو. ..كان صوتو مخدر و هو مالشرب ماشي خيط
- هههههههههههه...ضحكت ضحكتها متاع العادة لي توحي بمستواها الساقط... اي جيت جيتني بعد ماتعبتني في جرتك بعد ما نبات نعد الليالي و نقول الليلة يدق بابي الليلة يجيك يا حلومة وافرح بيه... رمات روحها عليه تعدي في يدها على وجهو لين وصلت للغرزتين لي تحت عينو باستها .. بوستها فايقاتو شوي من السرحان لي كان فيه هزلها وجها من دقنونتها بطرف صوابع...
- محلاك. .. محلاك بروبتك هذي محلاك بشعرك و غمازاتك ...زاد قدملها ولى يتكلم في وجها قريب ليها... تعرف كل ما تضحك و يغطسو غمازاتك نغرق فيهم انا.. عينيه هربت بيه لصدرها و ترشقو غادي... حتى الوحمة متاعك لي متخبية شفتها اي شفتها و زدت لهبت بيك...قصت عليه حلومة مستغربة ...
- غمازات و وحمة ياخي شبيك وليد اول مرة تشوفلي في وجهي ولا تشوفلي بدني !! وين شفت الغمازة و الوحمة يهديك ...ماخلهاش تكمل ..
- اششش شبيك تحكي ياسر انت كان ماتعبني ديما.. و جبدها ليه يبوس فيها ببكل لهفة بوسة حط فيها حب سنين بغشهم و وحشهم و نقمتهم و قهرتهم كان وين يسمعها تتوجع يزيد يتقوى عليها يحب يذوقها وجيعتو كيف لا وهو كان يشوف فيها ايمان ..مسكين مازادش دقيقتين و طاح لتالي دايخ ماكانش واعي بشي يهتري و يقول كلام ماليه حتى طعمة ...حلومة بعد ما أيست منو يقوملها و يكمل لي بداه مشات جابتلو فراشية و غطاتو
كان راقد مش مرتاح يتحرك و قالق مش في فورمة اليوم كالعادة...كي كان يجيها كل مرة يتفرهد و يفرهدها معاه بقات ساهرة تخزرلو و في راسها بارشا اسئلة لين هزها النوم... توا الثلاثة متاع الفجر و على تحريكة وليد يطيح الدبوزة لي بجنبو تتكسر و على حسها يقوم مفجوع... بقى مرهوج مالاول يتذكر وين هو اما وين شافها قامت تخزرلو بدى يستوعب ...
- قداش الوقت حلومة !! شاد راسو لي يوجع فيه
- ايا الحمد لله لي ناديتني بإسمي يا ولدي... قامت جات قعدت بجنبو.. علاه صاير فيك هذا الكل. .علاش ضلماتك الدنيا علاش ايمان ما راتش الحب هذا الكل في عينيك
- انت زادة لاحظتي همي لي نعاني فيه...ضحك بحسرة و هو يحك في عينيه و عدى يديه على شعرو كيما كل مرة يفد فيا. .. خليني نمشي ...قام يفركس في جيب سروالو التيلاني مدلها خمسين دينار ورقة... هذا اش عندي الله غالب.
- هزتها منو عاودت طبقتها و حطيتهالو في جيبو... موش لازم ..صحيح خدمتي بالفلوس و خدمة تاع فلوس و عهر اما نبقى مرا في لخر نبقى إنسانة نفهم و نحس و حتى كان كنت بنت ليل و المتعة اما مانيش حرايمية و مانخذ فلوس كان على تعبي...خوذ فلوسك وليد انا ماعطيتك شي البارح اصلا ماقربتنيش ...مشات قعدت على الكانابي مقابلاتو...تعرف ليلة عديتها تهتري باسمها تنوح و تلوم في ايمان بنت عمار. .. نحب نقولك الي هي خسرت حب كان ينجم يوصلها لسابع سمى معاك في الوقت لي قبلت بالموش راجل كمال الحوات لي مايسواش زوز فرانك في سوق الرجال
- تعرفو انت كمال !!
- نعرفو اما موش كيما ماشي في بالك انا صحيح هذي خدمتي اما مانحبش نكون مع أشباه الرجال ههههه اما انت شي اخر يا ولد علي...عضت على شفتها.
- تو لي صار صار ربي يهني و لي اختار شورو يتحملو و كيما يقولو لي عمل بيدو ربي يزيدو...طبس هز دبوزتز و خرج يكمل في سهريتو لي ماتكملش كان مع الفجورات تحت شجرة التوت لي في الطلعة كان راكش في كرهبتو كافي الدبوزة على فم عامل فيها يسمع في طرف غنا اما هو موش موجود جملة سارح بعينيه للحومة الصغيرة بضواوها الشاعلة من بعيد... ااااه قداكش صغيرة يا حومتي اما حكاياتك كبار حكاياتك و ناسك لي كلاهم الهم و الشغلة لي ليعهم الحب و بعدتهم الغربة... تحول بعينيه شيرة دارها لي تبان مالطلعة طافي ضوها ظلمة كيما قلبو... الجو كان هادي هواء بارد داخل للكرهبة مع نسمات الفجر لي قريب يبزغ...خلاه يهبط بدبوزتو يكمل شربو تحت الشجرة لكبيرة لي ياما لعب تحتها هو و وائل خوه و علولو و اندادو مالحومة كي كانو صغار ياما ضحكو و لعبو و عملو بعمايلهم و هاو كل واحد هزاتو الدنيا لشيرة تفرقو و كل واحد ليه حياتو كان هو من لي كان يضحك تحت هالشجرة في صغرو ولا مايجيها تو كان باش يبكي بعيد عالناس وحدو لين يتفرهد ... لحظات و قام صوت لذان صوت الحق الله اكبر الله اكبر..
وليد كيف باش يترشف آخر رشفة و يسمع في أذان ..بعدها على فمو و بقى يسمع لين كمل.. لذان كمل و هو قام ما مشاش خطوتين و عرف كبير طاح في بلاصتو مالشجرة هرب يجري من هول الطيحة و ماصدقش ربي لي منع بجلدو كان طاح عليه يقتلو طول ستر ربي... وليد شاد في كبوط الكرهبة يتنفس بزربة و يتلفت ايمين ايسار مفجوع طيش الدبوزة من يدو و شد يفركس في الكرهبة على دبوزة ماء غسل بيها وجهو لين فاق شوي...
- ااااخ يا وليد كنت باش تموت و انت سكران ميت. .تخيل كان طاح عليك اللهم الكل راو غفصك باش ماشي تقابل ربك كان موش اذان فيقك على روحك راك مطيش جنازة توا كان موش صوت الحق ناداك و قمت راك ميت بفضيحتك و ريحته المزفرة. ..الحمد لله يا ربي ما اكرمك ما ارحمك. .موش عارف كيف ساق الكرهبة و روح طشاشة للدار حب يتخلص من بقايا الشراب لي مازالت واحلة فيه..دخل عمل دوش لبس و كالعادة سمع صوت بوه و هو خارج للجامع...
- بابا ..
- اه بابا !! لباس فايق تو ا !!
- ماشي للجامع ؟
- كان كتب يا وليدي .. ايا خليني ماتعطلنيش
- هانا ماشين مع بعضنا...
- للجامع !! مع بعضنا للجامع !! تبسم الحاج علي باستنكار
- اي بابا اي و عيشك من غير تنبير عاد
- هههههه ربي يهديك يا كبدي و يثبتك
- ايا عاد تعطل فيا راك ههههههه ... قصدو ربي للجامع دبة دبة لين وصلو. .قامت الصلاة و وليد مازال يطعم في حلاوة التوبة مازال يذوق في طعم الخشوع و هو بين يديه مولاه... لحظات رغم قصرهم الا انها ترسخت في قلبو و عقلو هز يدو و دعى دعى لين بكى. .قداش كان بعيد على ربي و قداش ضاع و ضيع ياسر وقت في جرة الفساد اما باب التوبة مفتوح ديما و المرة هذي دخل منو مش كيما المرات لي فتاة يدقو و يرجع بالتوالي ... الجماعة الكل فرحت بيه أولهم بوه بالطبيعة و الحاج عمار و امام الجامع و رجال الحومة لي حظرو الصلاة...
- ايامات جدد على وليد لي تحسو ولى يوالم التغيير الجذري لصارلو فرحان بروحي و مرتاح اكثر من قبل.. متصالح مع روحو و مع لعباد ..امو لتوا مصدومة فيه.. ماصدقت الا ما تبعتو بالصلاة بالصلاة و ساعات يسبقها و يقلها انت صليتي... الحاجة الوحيد لي مانجمهاش لتوا هي كيفاش ينسى حبو لايمان كيفاش يبعد هالهلواس من مخو و قلبو.. تعب و مازال باش يتعب خاطر لكلام موش كيما الفعل اما يحاول مايشوفاش و مايدورش بيها أقلها السلام السلام ولى يتجنب حتى يقولهولها يزي كاهاو فيه البركة هكا احسن ليه و ليها... هي لي عايشة في دوامة من نهار الخطبة معاش فاهمة لي صايرلها الكل الراحة مش مرتاحة الفرحة موش باينة على وحدة كيف تخطبت ولات ما تلوج كان على وليد و قرب وليد و خنقان وليد ليها و تفديدو.. تحب تشوفو تحب يعمل العرك على خاطرها كيما قبل تحبو يتعرضلها و يمرجها بحبو توحشت وليد لقديم توحشت هاكي ليامات علاش !! مافماش علاش غير انها حاسة بالنقص.. تبات تعس من شباكها لين ترا كرهبتو راكت و على غير العادة مايفوتش العشرة البرا ..ااه و لي زاد غاضها كيفاش زيان بين ليلة و نهار كيما يقولو.. قداش موهر و هاكي اللحية ....
#انتي_سبابي #كرونيك #كرونيكات
الحلقة 25
لي من اول ماراتها ذابت فيها...
غايضتها روحها كيفاش ولات بالهشاشة هذي في غيابو في الوقت لي هي بعثاتو موش هي لي قتلو كرهتك !! مش هي لي قتلو ماحجتيش بحبك لمسخ موش هي قتلاتو بنظرات اللوم نهار الخربة ... كاهاو إمالا سيبي الراجل ابعدي خليه يعيش حياتو كيما اخترتي انتي تعيشيها بعيدة عليه هو خلاك كيما انت خليتيه بعد ما انت بعدتي و خليتيه... الندم بعد لقضى بدعة كيما يقولو ...
كانت في الخدمة و هو لاصقلها يسيب في بسالتو عليها وقت لي جاها تلفون مالبنات يحبو يخرجو يتفرهدو..
- كمال انجم نخرج تو!! كلموني لبنات باش نعملو قهوة لبرا
- اي برا على روحك..
- الخدمة تو نكملها غدوة ان شاء الله
- اي كالعادة نعملو سويعتين بعد ماتروح الجماعة الكل ارتحلنا و النقص جوجمة
- اي ستانست.. مانبطاش و اول مانوصل للدار تو نكلمك
- باهي باهي ..ماناقصك شي !!
- لا عيشك... خرجت بخيبتها بعد ماكانت متوقعة سؤالو متاع وين ماشين ؟ و مع شكون ؟، و انا قهوة ماشينلها و راك تبطى و كلمني اول ماتوصل و رد بالك على روحك و و و... أسئلة حبت تسمعهم منو حبت تحس بقيمتها عندو كي اي مرا تعلم خطيبها كي تخرج مع صحباتها اما هو لا حياة لمن تنادي... الزح تي وليد لي طول الوقت و هي تبعث فيه كان مارجها تقول مرتو و كاتب عليها في وينك!! شبيك لتواا !! وين خارجة مع شكون و شبيه لبسك هكا و علاه وجهك هكا !!!.. توترت و لي زاد عليها المقارنة لي ولات ديما حاضرة في خيالها بين كمال و وليد ..نفخت بالقوى و خرجت خذات تكسي...
- اهلااااا هاي جات لعروسة(ميساء )
- اهلا عزيزتي شحوالك لباس.. لبنات سافا اش عاملين ...سلمت عليهم وحدة وحدة و قعدت... يا هربات من هاكي الليلة ريحتكم مافماش
- هههههه الله غالب هاك تشوف الفضى مافماش.. تي قهيوة ولينا مشتافين فيها... اسراء تحكي و عينيها في الماشي و الجاي
- هدى بنت خالتها و نعيمة كيف خلطو يزربو... اهلا اهلا ديزولي لبنات والله زحمة تخنق
- ميسالش احنا بيدنا كيف جينا...خذاو اش حاجتهم و بقاو يترشفو في قهاويهم و ضحكهم مالي القهوة...
في قهوة الحومة قهوة مصطفى كيما يقول علولو قبل بنص ساعة كان قاعد يستنى فيه لين يجي ..علولو عامل كيف بالقهوة يشرب و يتبنن و يكحل..لين طل صاحبنا بكرهبتو البيضة...
- وليدو ...قدم باسو كالعادة.. وينك يا راجل هلال العيد وليت !!
-هاني صاحبي كنت غاطس عندي شور نقضي فيه...قعد عالكرسي و نفخ...سافا انت؟
- كي شفتك وليت سافا يا صاحبي..والله توحشتك... يا مصطفى زوز سيرري كالعادة... باهي ماكش باش تنحيها هاللحية !!
-تلهى في سرت سروالك يا اخي وجهي ولا وجهك هو !!و شبيك انت شاددلي في توحشتك هالزحي ما عوايدكش تكون رومنسي
- برا. ....... انا الغالط قلت راو طايح مونك. .. تي على خاطرك اجلت سهرياتي و هاني خوك شاهي كعبة مازلت نركح فيها اما قلت نشاور صاحبي يحبش يذوق السلعة ههههه
-لا كعبة لا ثنين...(حب يتلف) طايح مونك على شيشة تفاح ههه بربي هبطلي شيشة هبط و نقص مالتروميز متاعك..(خزرلو لوجهو) و شبي خليقتك هكا انت العين زارقة و الشعر لا شعرة مع اختها...هذا وجه الواحد يقابل بيه العباد
- هههههههههه عيشو صديقي البوقوس ماو يا بهيم لازم واحد فيها يطير العين على خوه تعرف كان نحطو الحطة الزوز نهبلو ثلاث أرباع بنات الحومة... ريييت..عملو بصبعو على جبينو...صطوفة جيبلو شيشة تفاح شاهي كعبة تفاح ولد علي (غمزو و ضحك )
-هههههههههه علاه الربع لاخر شبيه؟؟ زيد انت هكا قسما بالله يا قاعد معاك شبهة اصلا...انت موش تطير العين انت تقطع الخميرة مالدار هههههه
- ككككككككككك عامل روحك ضامر ! ايييييييه (تنهد و اتكى عالكرسي ) تعرف نخخم في حرقة للامبادوزا يا صاحبي تي هاك تشوف لا خدمة لا دار لا مرا لا وذني يا ولدي حتى بنات يرحم عمي طالعولنا في التسعيرة و ولاو يصرخو الفوق الواحد يبربص و مايلقاش مرا ....... تبرد عليه ريت كيف الزوالي قطعولو خبزتو تي نسخف خوك اصل اما كان ادبرلي خدمة و تلقالي مرا انحيها فكرة الحرقان نوعدك هههه
-لامبادوزا ههههههههه بالك تحساب روحك ماشي باش تخدم سفير غادي و الفلوس بالبالة...حط حط مخك في راسك و بالحق و راس صاحبي (حطلو يديه على كتافو) خمم علي اعمل حاجة وقيت راهو...يزي الصغر خذا وقتو بالوافي توا لازم نعملو على رواحنا..و ريق مرا و درا شنية نحي عليك منو ...القلم هذاكة جربتو خوك و هاو كلشي على عينيك...(كبس عينيه) مدام فيك نفس و ربي عاطيك عقل خبزتك ما يقطع هالك حد ...تنهد... الخدمة نعمل راي مع الشايب و غدوة تبدا معايا اما (و هز صبعو) خدمة خدمة...خلينا نعملو على رواحنا
- اوووو كلام كبير راو... انت تو لسانك قرضتو و قتلي باش تخدمني تحمل مسؤوليتك راني لا والي لا تالي زوالي عشيرك. ..(عقد حواجبو ) واش تقصد خدمة خدمة !! أرجوك الضغط مانحملوش لازمني نتفرهد أحيانا كثيرة هكا وصاني الطبيب هههه تعرفو الطبيب ماو ههههه... كي شافو حرر فيه عينيه استوا في قعدتو ... تي نفدلكو حومة شبيك وليت لكز
.....
<><>
#انتي_سبابي #كرونيك #كرونيكات
الحلقة 26
-باهي اا سيدي الخدمة ثم الخدمة ثم الهملة هههههه سافا !
-علي تعرفني نأمنك على الدنيا الكل و كان الناس الكل غالطة فيك انا نعرف صاحبي كلمتو شرف و وعدو دين...اما ماك تعرف بابا لازم تاخولو بخاطرو ساعات و ماكش باش تنقل الحجر انت باش تخدم في راحتك و لاباس...بابا يخمم يحل في بلاصة وحدة اخرى هو باش يتلها غادي و انا وياك نشاله لنا(تبسم) اسمع عاد رد بالك مالسكانار الي في عينيك راهي تهلكك و ماك تعرف الشايب الزلقة بفلقة معاه...و (مزال باش يكمل كلامو و سمع الاذان قام ترشف اخر رشفة من قهوتو و تلفت لعلي) ابدا في الشيشة هاني جيت...نصلي العصر و نجي
- علي ما شد ولا كلمة من لي قالهولو وليد الا ""نصلي العصر و نجي""... نصلي .. نصلو.. تصلي !!!! وليد ..ولييييد..يشوف فيه بالرسمي ماشي للجامع. .. مصطفى يا مصطفىىىىى ياخي شبيه ولد علي زادم عالجماعة تصلي! ! ياخي بالرسمي ولى يصلي !! (خزر لمصطفى يسأل فيه ) بفففف بربي اقلب وجهك انت اش عارف اصلا. . طبس على شيشتو يجبد و ينفخ يستنى فيه
نصيف ساعة..و دخل للقهوة بكل ثبات و وهرة ..تعدا على طاولة الجماعة الي بجنبهم قرا كف ولد صالحة و فركهم عليه و مشا لطاولتو تبزع فوق الكرسي و خذا نفس مالشيشة..هذا الكل و علي باهت فيه ...شلق بيه مركز معاه قلو
-صاحبي انت يظهرلي ذاقت بيك الدنيا و وليت تكحل على بعضو هههه شبيك هبط معميتك ...
- يا خاين. ..يا واطي. ..تو تحشمش على طولك. ..اش متفاهمين احنا ااه !! موش تفاهمنا كل شي نعملوه مع بعضنا تقوم انت تصلي و تسبح و انا مخليني لولد صالحة و ناجية !!! (علولو هذاك حد نيتو هاني صلي و اركع و ديما يمشي)...سيب الكازي جاي و يحبني نخلص عليه شيشة ماصح من رقعتك ...خطف منو الشيشة خلاه شايخ بالضحك عليه
-يا ولدي و الله انا ربي هداني ليوم وين تعرف تنجم انت غدوة...(تنفس براحة) يااااا علي يا خويا راني حاسس اجبال فوق ظهري و بدات تتنحا...زيد انا لبارح هداني ربي موش باش نجي نفتي...(دق على صدرو) لازم كلشي يطلع من هوني...هاني انا ولد الحاج و ما ادراك...وصاني شوية؟ وقضتني امي شوية على وضعي؟؟ و انا شي شارد على طريق ربي ..هاني حمد لله نهار الي ربي هداني تهديت....شافو هز حاجبو فد عليه...هبط عينيك خيرلك نحكي بجدي راني
- اي اش معناها !!! راك تقلي بطل الشيشة و الدخان وقتها نشلطك بالرسمي ..تي اخطانا عاد موش لينا الدين يا ولدي...انا مانجمش بلاش بيهم و زيد التكحيل بالوراثة عندي و هاذم الكل عيب و حرام وانا مانحشمش روحي مع ربي الحق(مسكين ثقافتو المحدودة خلاتو يشوف للموضوع من الكوتي هذي )..تضحك يا طحان !!
-موش نضحك عليك و الله..اسمعني علي انا راني موش طحت جيت في حجري كتاب قرآن...هاني خوك عارف روحي عندي اغلاط اما الصلاة راهي من فروض الاسلام و حق ربي علينا..ابدا بالشوية و ربي و الله ما يباركلك ...صدقني يا علي انا تتفكر كي نقلك الشراب ما نجمش نبطلو..من نهار الي عملت على ربي صدقني عملت عزيمة و باش نحيه...اغلط و صلح يا علي...ضيع و ارجع...خلي الطريق للربي موجود...تعمل على ربي...يزينا ما ضعنا و ضيعنا..ما قتلكش برا اعمل كهف راني و رتل فيه هههه لا هذي صلاة و احنا مسلمين و فينا برشا حاجات باهية و برشا حاجات خايبة..عالاقل خلي الكفة تميل للباهي ...
- باهي هاني باش نتبعك و ان شاء الله ربي يهديني اما في رقبتك راني..... باهي العصر قداه من ركعة هو ؟؟
اقسم بالله نتفكر عام الرابعة ابتدائي قراوهولنا و منذ ذلك اليوم يا ولدي دولة ظالمة تهزك للغريق طول (معاش باش يسكت توا و هو جابد عالدولة و السياسة يبدى يفلم هاك حدو و طبعا كان مايسكتو وليد )
-بالله سكر ما تنفخليش قلبي بالدولة و هاك الريق..منيش نفذلك راني...لازمك تتعلم بالباهي و توكل على ربي و لا كلامي و لا كلام غيري باش ينفعك ولا يسيرك..انا ننصحك و نفيقك و نحب خويا يفيق كيفي قبل لا يفوت علينا الفوت اما نحبك انت...انت علي تعزم و تفهم و تستوعب ..فهمت ولا.
- امممم باهي عاااد.. غدوة نبدى ان شاء الله ..خلينا تو راكشين اما بالرسمي وليد ... استوى في كرسيه .. تعرفني صاحبي نفرحلك كيما خويا و اكثر و بعيد عالتفدليك و الركاكة انا فخور بيك خاطرك خويا و عشيري و فارحلك راني و ربي يثبتك و يهديني.. سامحني بربي على كل كلمة خذيت بخاطرك بيها مني سامحني.. مانحبش نرجع بيك بالتوالي اما راك بالدنيا انا نحبك كيما قبل و نموت فيك اما تو زدت حبيتك يا سلعة. .. و نقولك من تو كان تخمم نهار تنحيها اللحية لي عملتها إنساني واضح !!
-ياولدي الحكاية موش باللحية راهي...اللحية عاجبتني و مخليها اما موش حاطتها دليل على اني نحب نستقيم و نحي الفساد ههههه يعني نمشيش نحيها نهار تقول صاحبي رجع في كلامو...ههههه (مزال باش يكمل و بنات خالتها تعداو هيجو المحاين...ضحكتو خفت و طبس راسو كمل يشيش..علي فاق بيه حب يتلف )
- تعرف الي الباك غدوة !! زعما تنجح نعيمة بنت الروج ! ..حقا ياخي كان انا نكرها اختها هدى و الا نمشي نعدي ؟
-هههههه شطر الحومة تكرها ههههههه مانعرفش شكون مكبوب السعد لي باش يطيح في صدافتها الاما تمررلو عيشتو حليل امو .. اما و الله نسيت الي ايم...(شوية لا غلط في اسمها..بلع ريقو) هدى باك..ااه غدوة نشيخو قازوز ههه ربي ينجحهم..
- نعيمة لي تعدي الباك موش البايرة اختها يا مسطك. .. انت وقيلة عروق الدماغ مش ولابد. .ايا قوم شوفلي الشايب و مانوصيكش اشكرني قدامو
-خايف نجي نشكر ما نلقا ما نقول هههههه ايا قوم قوم امي توصي و تعاود على الحوت خليني ناخولها و هيا امشي معايا مدامك ليوم كونجي هههههههههههههههههههه
- ههههههه مافيها باس تزيد تغديني هاني يمشي مبروك الخدمة بالمسبق تي حوت الزح راهو
-قتلك امشي معايا نجيبوه موش ستدعيتك...هههههه ياسر راهو نرا وجهك كل يوم و تزيد تغطس معايا في طنجرتنا
- شوفو الموش راجل... نسيت روحك كي اطيح في طنجرتنا ايام لي يطردك بوك عالهملة هههه هامالا شماتة فيك نزيد نتعشى و كانك ولد امك طردني
-صحا ليك امي تحبك و الله ايا ايا اطلع.. تعرف كان جات عندي اخت صبية من المستحيلات السبعة ندخلك عتبتنا هههه انت شبهة الصراحة
- اممممم جاب ربي مالا جيتو زوز ولاد. .. علولو عامل فيها مغشش...
#انتي_سبابي #كرونيك #كرونيكات
الحلقة 27
حكاياتهم ماتكملش و ماتوفاش و طبعا ما تخلاش من الأسئلة الماسطة عل "' خطشيبي و خطشيبك""
- ااه امونة وينو سي كمال اش عامل فيك و الا انت لي عاملة فيه هههههه. .. أسئلة كيما هاذي ماتجي كان من اكبر نسناسة اسراء لي ما تخلي حد في حالو
- لا عاملة لا شي. ..كالعادة هانا لاهيين بالخدمة و كل مرة نعملو حاجة تعرف الصيف عالابواب... ايمان تحكي و تحسها تنافق في روحها و في لبنات كلامها على الصيف و العرس و الجهاز ماكانوش من قلبها تحسها تحكي باش تسكتهم كلام و برا. ..
- هدى كان ماتشعلها بكلامها... هههههه شفتوها كيف تتجبد بالحديث عيشو المغيار. . امشي برك احكيلنا عاد عالحب و رومنسية يا حلو..
- بفففف ممسطكم سيبوها وانتم شديتو كمال اش عملك اش قولك ناقص كان تردوه سوبرمان ... نعيمة اطرشقت في وجوهم كي حستها مش مرتاحة لكلامهم اما هي جاوبتهم. ..
- تعرفوني انا نخاف مالظلام و نرتعب كي يقص الضو هاك الليلة قبل حتى الخطبة قص الضو في الحومة ياخي كلمتو تخيلو نص الليل و حكاية مشى جاب الستاg خاطرو يعرفني مانحملش و رجعولنا الضو مالمجمع... هههههه ضحكت و هزت تترشف في كاس الماءتحس ريقها شاح ... تعرفو اول مرة حضني فيها هزني بين يديه طيرني للسماء والله حسيت روحي مانيش عالارض جملة قداش حنين و دافي..محلاها كي تسمع نحبك منو و كي يقلك انت اول و اخر مرا سكنت قلبي و مستحيل غيرك تاخو بلاصتك... كانت تحكي و اللمعة في عينيها واضحة و كيفاش تحكي بيديها و تعبر تقول لي فما وصل... من شيرة أخرى نعيمة لي مبهمة فيها و مستغربة حكاياتها خاطر صحيح ولحكايات لي حكاتهم صارو و بحضورها اما بطل لحكاية وليد موش كمال خطيبها ...وليد هو لي حظنها و هو لي جاب جماعة الستاg هاك الليلة و هو نفسو الراجل لي تلمع عينيها كي تجيب سيرتو. ..
- اممممممممممم صحة ليبييك بيه والله انا واحد كي هذا و يعملي هذا الكل والله والله الاما نشد فيه بيديا و ساقيا و سنيا. ..ااااااه فما شكون مزال يحب هكا !! قلبي قلبي...اسمعوني لبنات انا قررت نلوج على حبيبي الضايع و باش يكون بنفس المواصفات و قولو قالتها اسراء...
- هههههههههههه و النبي محمد لاك باش تلقيه خاطرو لي تحكي عليه ايمان آخر كعبة في الفيترينة...نعيمة تحكي و تغمز في ايمان يعني راني فاهماتك كان انا.... كملو قعدتهم و قامو مع المغرب مروحين خذاو تاكسي و صلتهم لراس النهج و كملو على ساقيهم... ايمان ساكتة تحس في قلبها مكسورة خاطر كذبت عالجماعة قبيلة و لي زاد عليها حظور وليد في كلامها...
- اااه يالبنات الباك مازللها نهايرين زعما نسلكها !! والله كان ننجح نشنعوها سهرية ماك تعرفو جو للولاد كي نتلمو ياااااي جو جو
- كان انجح الساعة و انت تخمم كان في الجو و وحكايات التافهة اصلا تعرف بوك سهريات بالفوق مستحيل يحبلك عليهم حط في بالك...
- ميسالش المهم نعملو إحنا جو و زيد لولاد يحفلوها علولو و حمزة و عطية والله جو فيهم
- وليد باش يجي زعما !!! هيا قالت هالكلمة و لبنات تلفتولها مستغربات ...شبيكم تخزرولي سألت و برة. .نعيمة تبسمتلها فهمتها تحب تشوفو...
- اي اي باش يجي لازمو يجي خاطرو واعدني بقضية باش يجيبهالي ههههه ... ايمان كلاها الفضول باش تعرف اما قضية باش يجيبها وليد هي مزالت باش تتمادى في الحديث و كرهبة شعلت فيهم الضو و بحكم النهج ضيق وقفو لاصقين للحيط باش تتعدا. .. ايمان مازالت في دهشتها بيه و ماتشوف كان في نعيمة تصطبلو
- اقف اقف ههههههه وليد ولد حومتي يا غالي
- نعيمة البطبوطة بنت حومتي الصغرونة سافا اش عاملة... يحكي مالبلار لي هبطو باش حشات نعيمة راسها تنابش فيه... لباس لبنات !! و طفاهم ديراكت...اه نعمان اش عملنا في الباك؟ ؟
- و الله لعمال على ربي انا هذاك حد
ااه تو لي فيها فيها بري ربي يفرحك و ينجحك
- اممممم ماكش ناسي عاد اش وعدتني ولا !!!!
- ههههههه اش وعدتك زادا
- اماااااان !!
- ههههههههههه نفدلك يا بنتي والله متفكر غير انجح برك و كان مانجحتش زادة نجيبوه قداه عنا من بطة في الحومة احنا
- عيشك عيشك عيشك ترمات عليه باساتو على خدو و هو شاخ بالضحك في الوقت لي ايمان اجتاحها احساس غريب تجاه الجاست لي صارت ..بقات تحكي في سرها اما كادو و شبيها تبوس فيه نعيمة تي هو هو شبيه بالضمار هذا الكل و الحنية هذي الكل ياخي يصطنع والا هذا هو وليد لي ماشفتوش انا قبل... شيعاتو بعينيها للجامع وين هبط باش يصلي المغرب و على هاكي الوهرة بودي بلو و الدجين زادت تازمت..
وصلو لبنات لدار ايمان و قد ماشدت فيهم يبقاو ماحبوش. .. دخلت للدار الفارغة تعرف بوها في الجامع.. جبدت تلفونها على امل منها تلقاه طالبها اما لا حياة لمن تنادي طيشاتو على فرشها و قامت تبدل في دبشها بكل غزول من روحها لي ستنات منو اي مبادرة ولا حتى يسأل عليها روحت و الا مزال تحب تحس بحزارتو عليها و غيرتو كيما الرجال لي تحزر على نساها كي تخرج كيما ...وليد .. ااه وليد و حزارتو و هبلتو عليها كي كانت تروح و يبدى في راس النهج يستنى ساعات من شجرة التوت لي في الطلعة يبدى يستنى في التكسي لين تحبس بيها و يمرجها...وليد لي ماكانتش عندها علاقة بيه غير انو حبها و هبل على حبها...خزرت في المراية و تكلمت..يا ندرا مازال يحبني !! مازال تعنيه يا ايمان مازال يهبل في مخو كي يشوفك !! انا..انا..ن..نحبو..نحبو ... و سالت دمعة من عينيها ضحكت عليها و مسحتها ... علاش تبكي انت تو ياخي نسيني روحك مش بكيتيه راجل و بكى على جالك و انت بعثتيه انت فرطي فيه و هو كاسر شوكتو معاك ديما و انت خشمك كان لفوق في السماء غراتك الدنيا اما رجعتي ذليلة بلاش بيه بعد ما اخترتي راجل ماكلفش خاطرو يسال و يبربش وراك. .. تنهدت ..هزت دبشها و دخلت للدوش فماش ما تنحي هم هالنهار على كتافها....
من غدوة مشات للخدمة كي عادتها شي ماهو عاجبها شي ماهو قاعد يصير كيما حبت و شتهات ..
- صباح الخير امونتي
- اهلا... طفاتو و كملت خدمتها من روا البيسي متاعها. .
- شبيك تحكي معايا بعشرة وافي! !
- امان كمال راسي يوجع و مانيش ناقصة كلامات و تقرير عالصباحات
- انت ماكش عاجبتني راك هالنهارين راو ... قعد مقابلها يخزر فيها كيفاش هاربة بعينيها منو تشوف لكل حاجة قدامها و بين عينيها كان هو الحاجة لي نرفزاتو... كي نحكي معاك اخخخززرلييييي واااضح.. طربق بيدو عالطاولة خلعها الهم
- ماتصيحش شبيك انت !!
- انا شبيني يا ايمان !! ماكش ترا في روحك ضايعة فيها جملة ..و انا !! ياخي مخطوبين في بالي
- اي اش نعملك !! انت حبيت عالخطبة فيسع و تخطبنا سي بون
- يعني انت ماحبتش عليها !!
- اوووو كمال شبيك تحكي في كلام مالحيط تو انا اش عندي قتلك ياخي! ! سبحان الله متقلقة شويا و مانيش قد بعضي هالمديدة
- انت ديما متقلقة و ماعاجبك شي تي رانا أكثر من شهرين مع بعضنا بعد الخطبة بخلاف لمديدة لقبلها لكل فاهمك راني و نعرفك علاش تمشي و علاش تجي
- هي معاش فيها اطرشقت في وجهو تحس لازمها تخرج لكلام لي في صدرها باش ترتاح... انت تعرفني !! انت تفهمني !! انت تحس بيا اصلا !!..تحكي بيديها متفاعلة بكلامها لي يوجع القلب... انت عمرك لوجت عليا عمرك حزرت عليا والا ويني وين مشيت و. . وصلت لباس للدار ولا !! أمس برك أمس قتلك راني خارجة مع لبنات و انت اش عملت !! خسرت عليا كان برا ...رد عليها مستغرب ...
- اي اش تحبني نقولك لا !! تعرفني عمري لا منعتك من حاجة و خاصة خرجاتك مع لبنات
- امنعني يا سيدي قولي لا قولي اش هازك ماك كل يوم معاهم لبنات.. نفخت مالفدة... تمنيتك تقوم توصلني ولا تمرجني بتلفوناتك وصلت والا و شبيك لتوا ... قامت مالكرسي... ياخي كان مانقول انا كمال !!! فما حاجات لازمك تعرفهم وحدك تعملهم خاطرهم يعبرو على غيرتك و حزارتك اما انت ماتعمل في حتى رياكسيون من خرجاتي و تلفوناتي و لبستي و شعري و ياسر حاجات كمال ياااسر...
- والله غريبة فيك يا ايمان تو شنيا لي فيها كان ماكلمتكش و الا ماعلقتش على لبستك !! يااا لطيف منكم انتم لبنات كان حكينا كيف كان ماحكيناش كيف... و بعدين علاش نعمل في هذا الكل انا عندي فيك الثيقة و نعرفك بنت عايلة و ماتفوتنيش والا تفوت بوك بحاجة خايبة. .ايا عاد يزي مالدلال و هات بوسة. ..قام مشالها باش يرضيها ياخي هي قامت تلم في صاكها. .
- كمال بربي اخطاني شنية بوسة هذي... بعدت عليه خلاتو هابل و خزرتلو... نحب نرتاح كمال
- اي المطلوب !!
- باش ناخو 10 ايام كونجي امان كمال والله نحس في روحي نبلبز من قلة التركيز
- اي ايمان و الخدمة !!!
- هاني لولاد شوف شكون يخدم خدمتي هالمديدة لين نرجع ...ماكفاتوش حتى يجاوبها هزت روحها و خرجت باش تتنفس باش تتفرهد تحس روحها تخنقت لداخل... ااااخ زايد لحديث مع كمال خاطرو موش مالرجال لي تسخن و تحزر و تمر
#انتي_سبابي #كرونيك #كرونيكات
الحلقة 28
ماهوش متقلق من خروجها و دخولها ماهوش مشغول من لبستها و تكحيل العزارة عليه ..هي ماتحبش لاسبري و ريق ثيقة... لكلو خاطرو بارد و انسان ماحبش و ماتليعش بنار الحب دمو موش حامي... موش وليد هذا..
اليوم نتيجة الباك... نعيمة على أعصابها و ستراست الجماعة الكل معاها..كلمت ايمان باش تجيها و توسع بالها معاها خاطر هدى تخدم...
- تي وينك ساعة باش تجي !! قدمت حملتها و كبست عليها
- كاملة عزيزتي قضية الدار منا ومنا ههه مابركها خذيت كونجي
- حقه سنية حكاية الكونجي في بالي ماتحبش القعدة في الدار انت تجي توا تاخو كونجي و بعشرة ايام !!!
- متقلقة شويا و تعبتني الخدمة والله... حبت اتلفها. .. اي اخطاك مني يا بنتي و تلها في الباك متاعك اش قالو الناس تطلع؟؟
- والله مانعلم تو الجماعة في القروب قناة مع نص النهار و اش يجييييبها نص النهار انا باش نموت من تو
- ههههه اللطف على البطبوطة تعرف اختي تسلمها أي راك لولة متاع الليسي
- هههههههه حتى انت وليت تقول بطبوكة كي وليد بففف خرجها عليها الكناية السخطة
- على ذكر وليد على فكرة معاش بيان جملة تخيل من نهار لي شفناه المغرب ماريتوش
- و انت اش عندك قداه تلوج عليه... تبسمت بخبث تستجوب فيه
- يا بنتي نسأل و برة عيب ياخي !! انا قبل اقلها نشوفو مرتين في النهار
- هذا قبل يا ايمان قبل ما تتخطب و تختار تبعد ياخي موش انت لي قتلو ابعدني !!
- اي انا قتلو اما هو عليها يلوج انا قتلو منا و هو بعد منا على اساس يحبني و صعيب يبعد و ينسى
- شكون قالك نساك! ! صحيح بعد خاطر هكا خير ليك و ليه شوف انت جرحتيه باارشا و هو مازال يخمم فيك و في سمعتك تخيل كان مازال يحوم بيك و انت مخطوبة! ! موش باش يضرك هكاكا! ! كاهاو البعد أحسن حل اختارو هو و انت اخترتو قبلو...
- سكتت ماعرفت ماتزيد تحكي خاطر كلام نعيمة صحيح...
- انا معاش فيا بصراحة وقتاه تطلع هالباك المحنونة... نعيمة حبت تبعد بيها على سيرة وليد خاطر مشلقة بالضياع لي في عينيها و هي تلوج عليه و على اخبارو...
- لباس لباس ...تبسمت تبسيمة صفراء تعبر على الزحام في داخلها ...
جات نص النهار و لتوا لا حس و لا خبر.. نعيمة مسكينة لي تعديه في التوالات اكثر ملي تعديه معاهم ركبها البوصفير...وقت لي جاء الميساج كانت مسكرة على روحها في الدوش تسمع فيه يصوني .. هزاتو ايمان تقرا فيه و غمزت الجماعة ...
- وووووه يااا لطيف... نعيمة يا نعيمة
- لا مانيش خارجة .. خليني نعرف بلبزتها... والله لاني باش نعاود لا كونترول لا العام و الله لا عاد عفستو الليسي. ..و بدات تبكي
- ايمان تضحك و توشوش الجماعة... يا بنتي باش تبقى حابسة روحك غادي !! موش اخر الدنيا راهي
- ايمان اقلب منظرك مانحب نحكي مع حد. ..
-ههههههههههههههههه اقسم بالله كان بهيمة دوريجين انت لها الهدرجة ماعندكش الثيقة في روحك؟ ؟
- ايمان بنت عمار اش تقصد... حلت الباب عينيها قريب تخرج خناينها تسر و شعرها مشبشب.... هات الوز جاي. ..خطفت التلفون من يدها تقرأ فيه و بعد تلفتلها تضرب فيها...عنبوك عنبوك عنبوك يا ساقطة يا واطية هكا تعمل فيا !!
- هههه سيبي ههه تي سيبيني يا هم عاد كيف انت يجد عليك كل شي اش نعملك انا..اما والله بالدموع خالتي شادة روحها عالتزغريط كان بالسيف
- هههههههههه الحمد لله يا ربي هيا امي زغرطي عاااد زغرطي هههههه
- وريريريريريريريريري مبروك لبنيتي مبروك تستاهل تعبت و لقيت...... حضنتها و بداو يبكيو ايمان اثر فيها المشهد بكات هي زادة خاطر نهار الباك متاعها مانجمتش تحضن امها يرحمها... رمات روحها عليهم و تخلطت الدموع بالفرحة و الزغروطة لي تتسمع لآخر الحومة
في ليلتها تذبح العلوش و اطيب الكسكسي كيما في كل مناسبة ..تلمت الجيران و لعايلة ولحباب .. محلاها المناسبة كيف تلم وجوه فرقتها مشاغل الدنيا الخدمة و الصغار .. اليوم الدار تملى و تفرغ لي جاي يهني و لي جاي يحب عالكسكسي بالعلوش..
كملو تعشاو و ريقلو جوهم بقو يسهرو و يلعبو لولاد و بنات الجيران...
-كانو ملمومين جو و ضحك و تنبير...ايا السلام عليكم ... الجماعة الكل هزت عينيها اولهم ايمان لي كانت لابسة روبة بيضة فوق الركبة شوي بيضاء و باسكات ابيض و شعرها لي كالليل... وليد اول ما دخل خزرلها ديراكت حاجة اقوى منو...ههه كاهاو خليتو الشيابين على جنب و تلميتو جرابة صافيين ههه
-(نعيمة عينيها قلوب ) وليد مرحبا و الله توا كملت القعدة...الجو ما يحلا كان بيك
- علي ياكل في برج بقلاوة... اوووو هاي مساطت القعدة عاااد...اش بجيبك قعدة نوع عملة هذي و انت خاطيك يا شيخنا هههههه الجماعة الكل ضحكت كان ايمان مازالت تملى في عينيها منو قداه ليها تحب تشوفو...
-نعيمة تنطرت عليه باندفاع خلاهم الكل باهتين..تي بالله العظيم توا وين بدات السهرية الصحيحة ايجا ايجا وليد الليلة و فراقها صباح ...هذا الكل و ايمان عينيها ما تهزتش عليه..توحشتو توحشت خيالو توحشت صوتو عندها قداه ترا كان في طيفو متعدي..
- هههه بشوية يا هم شعرة لا طيحتني هاك شد ..و راس امي نهارين و انا نلوج على سماه هالدبدوب ..مانيش عارف لبنات علاش تموتو عالفروخ هاذم... و انت سي الخرا تعلم كيف تحكي مع عرفك .. و حدفو بدبوزة ماء
- ايمان تشوفلو و تستناه يخزرلها و يملأ عينيه منها كيما هي باش تاكلو بعينيها اما حساتو يتهرب منها و يشوف و يضحك للكل كان ليها هي لا
-حبت تفرض روحها عليه.. نعيمة وريني يااا محلاه صحة لختي.. تحس في الغيرة باش تاكلها للحظة تمنات يكون الدبدوب ليها
-هدى حبت تكهرب الجو...مزلت صغيرة انت على الدبادب..هههه شنية سي وليد صلا و عبادة و دبادب هههه بدلت القلم ولا شنية (تضحك في ضحكة خبيثة)
-اس اس انت نعرفك ما تزين مضحك في عوض تستكثر خيرو الي خذا بخاطري و تفكرني...
-علي مخزل عليها...صحوبة ايجا بجنبي خلينا عنا قداه على قعدة هكا...ايا يا جماعة الزهو و الطرب توا
- ايمان ايماااان... بنت عمة نعيمة كانت قاعدة من لي رات وليد جات واقفة ..تكلم في ايمان و تشوشولها بكل إعجاب بيه.. تي نكلم فيك يا سخطة شكونو هالبوقوس يا نهار مغلق من هذا يا هذا. .. عضت على شفايفها الشي لي زاد على ايمان بلة و خلاتها بلاش ما تشلق بروحها تزلق بالكلام و تقلها .. سيبو مخطوب و يموت عليها خطيبتو...
-ياااا لطيف..سي نرمال وخيتي السلعة هذي مطلوبة برررشا هههههههههه بصراحة حقو يتنقب موش يصلي برك هذا فتنة يا ناس ايمان هبلت...يزي يزي شنية هالكلام ووه يا ديني الطفل سكانيتيه ملي وصل..زيد ما يحبش راهو هالتزعبين...يحب وحدة و مستحيل يبدلها
-توا ثبتلي روحك خاطب ولا يحب؟
-يحبها و امبوسيبل نهار يخزر لغيرها...خزرتلو و كملت تحكي...قلها قدامي الي تحرم عليه النسا بعدها...يحبها لدرجة انو حبو ليها امان احتواء ما تحس بروحها مأمنة كان معاه...حاطتها في حباب عينيه...تعرف (تنهدت ) قلها مرة انتي النفس الي يدخل و يخرج
- قالهالك انت و الا شنيا توا لحكاية !! يا بنتي ماهيش هوني ماهي خطيبتو ..خليني نعوم بحري هههههه
-ايمان اعصابها توترت ...ياخي نرمال؟؟ صدقني لا يكلمك انا نعرفو
-ايا شقولك نتخاطرو ايا نجرب؟ قالتهالها و عينيها وكلها خبث ..
نار الغيرة سرات فيها نعيمة و دبدوبها من شيرة و اللكزة الكوزينة من شيرة اخرى.. خلاتها تقوم تتبختر بروبتها تستفز فيه بالقصير لي لابساتو..و هو من داخل يغلييييي
-علي كان يسمع في العرض الكل تكا على صاحبو و قلو كان تحب توريها نجوم الليل ..الي جايتك طاوعها
-ما فهموش...شتحكي يا ولدي اما ليل و اما نطاوعها !!!
-قتلك الي جايتك طاوعها...فما شكون منغادي يعس عليك...كان تحب تشكب الليلة سلم على الطفلة..ملا بهيم كي كنت منحرف كنت اذكى الزح و تفهمها طووول
-وليد فهم ديراكت...لخرا جات تتبختر..مدتلو يديها...عسلامة و مرحبا بيك..نحطلك تتعشى جيت مخر انت اما ميسالش عشاك في الحفظ و الامان
-هو كان يغلي علي شاردة فيه و تاكل فيه بخزراتها...و متقزز ملي جاية ترمي عليه في بلاها اما كان لازم يحط نهاية لتصوراتها انو مزال رابط قلبو بامل تلفت ليها...هو انا تعشيت راهو اما كاس جي ما نقولش لا...و يعطيك الصحة يا....ما قتليش عالاسم الكريم !!
- ههه اه اسمي !! اسمي ر..جاء... قالتها تتمعجن تقزز منها اما ماحبش يحس على روحو... طبعا تنجم تناديني روجة ههههه.. تلفت لعلي و غمزو يحب يقلو هاذي سلعتك يا معلم ...
- ايا عاد ماتفسدوليش السهرية متاعي بالكوبي بففف ... علي سيب الصحن الجماعة مازال ماكلوش و انت رجاء ايجاني خلينا نقدو حاجة نعدو بيها وقيت باهي كان مانقول يا جماعة تحلحزو الزح
- ايمان تغلي في بلاصتها تحس بالملال ماكنها كانت تتمنى تمشيلها تقطعلها شعرها هاكي الكوزينة اللصقة و هو لي جكارة فيها عامل بالعاني و يتضيحك ناقص كان ترمي روحها عليه خييت ... قامت بلاش رادة منها وقت لي سيباتو لخرى. .. وليد لباس.. تخزرلو في عينيه لي موش حاب يرشقهم فيها اما هي ماسلمتش بقات تستنا فيه بخزرلها و يرجع عليها حتى بكلمة...
-للحظة بينو و بين روحو استنشق الكلمة و اسمو من فمها و أطعم قربها و عكس إلي يحس فيه تصرف.تلفتلها ببسمة باردة و بنبرة عادية مستحيل تخلي حد يشك ولا يفيق بالغليان الي فيه ولا الوحش الي مفتفتلو قلبو ...جاوبها ببرود...اهلا ايمان لاباس..
-فشلت من ردة فعلو بقات تخزر هي باش تجاوبو و زوز صغار جاو يجيريو لوليد...وقفو قدامو سألو لول.. عمي وليد موش السهرية متاع الليلة متاع نعيمة يعني هي العروسة...
-الطفل الثاني قص عليه....لا موش صحيح. تلفت لايمان...العروسة هي ايمان ...طاطا موش انت العروسة متاع الحومة و لبستي روبة و يزغردو عليك..
-ايمان مسكينة لسانها تعقد زيد هالفروخ هلكو الدنيا قعدت تبلع و تغص...وليد طبس للطفل شبشبلو شعرو..الليلة عروستنا هي نعيمة اما طاطا ايمان ولات عروسة و كملت..هزراسو و عينيه خزرتلها خزرة موش معبرتها جملة..الحاجة الي زادت على ما بيها
-طاطا يعني معادش عروسة
- تكلمت اكا هدى ماهي مسمتمة و تحب تنبز وليد...ايجا يا صغرون نقل
#انتي_سبابي #كرونيك #كرونيكات
الحلقة 29
-امونة احلا عروسة و أشهرة اخرين و تولي عاد عروسة بالفم و الملا اسأل عمك وليد كان ماكش مصدقني ههههههه
-ايمان ولا وجها اصفر رجعت لبلاصتها و هو عاود قعد ..و ما خزرلهاش...نعيمة حست بيهم تكلمت..ايا ايا نلعبو لعبة الصراحة !! علولو هات هاك الدبوزة و ايا تلمو يا جماعة....هوما بداو يتلمو و من سوء الحظ ولا من حسنو المهم وليد جا مقابل ايمان و لخرا ترمات في وسطهم هو و علي
- ايمان قاعدة هافتة ما عملت حتى رياكسين كان عينيها تحكي... هو يبان مطفيها اما تحسو ياكل فيها بعينيه كي تغفل تعرف الي مزال حبها ساكن فيه تعرف الي الروبة هذي تجننو منها عللخر من قصرها اما لبستها باش تلفت انتباه و هو مشلق بيها. .. وهي شاردة فيه صاحت الجماعة الكل ..ايمااااااان ههههههه ... بدات رجاء تسأل بعد ماختارت ايمان الصراحة. .. امم امونة انت مازلتي كيف تخطبتي ياندرا عن حب والا مصلحة !! بقات مبهمة في سؤالها و كرشها وجعتها و هي تشوف فيه يخزرلها بعينين تسال و تقلها ايا جاوب... ايا عاد ايمان هذا الكل تخمام !!! والا حاشمة ههههههه.. نتحنحت شويا... مكتوب... قالتها و عدت قصتها ورا وذنيها هذي الفازة مايفهمها كان وليد لي يحس بتوترها كي تعملها... ضحك على جنب يتحسر و مد يدو طول للدبوزة و دورها..
تحسو حتى و هو بعيد مازال ينقذ فيها بالمواقف البايخة لي تنجم تحرجها بالرغم كان حاب يسمع منها جوابها كان حاب يزيد يفقد الأمل من حبو العذري
- تشوف فيه ما هزش عينو من منقالة يدو.. كانت تتمنى تقلو امان صلي حتى هوني موش لازم تمشي للجامع.. كانت فارحة بكل دقيقة يزيدها معاهم... تزيد تفيق من شرودها على دور علولو و هوما يفركو فيهم عليه. ..
- سألو حمزة ولد حومة...علولو تو وقتاه نراووك عريس...
-طرشق بالضحك ههههه يا ولدي انا ديما عريس...شوف روحك وقتاه متفاضي و ايجا ههههههههههههههههه
- وليد تنرفز من كلامو ... يا خرا يا علي سكر.. انت صوابك سكاااات خلطتنا راااك...
ضحكو لكلهم و دورو الدبوزة جات قدام هاك المسبوعة سالتها نعيمة ...عجبتك الحومة !!
-عجبتني الحومة و واهل الحومة و خزرت لوليد تذبل في عينيها
-وليد حب يزيد على توتر ايمان قلها...ايا باهي مالة مزلت بحذانا...
-مزالت باش تجاوب و ايمان تنطرت كي المصروعة... سؤال واحد قلنا موش محاضرة زيد نعيمة هي الي تسال موش انت..
- هههههههه ميسالش منها نلعبو و منها نتعرفو مافيها باش... بقى مبرق فيها عينيه " شد ببوشتك و اركح" ايمان تحس فيه زلعها تقهرت و عينيها ولاة يحرقو تحب تبكي...كان حاسس بيها هو زادة موجوع اما كهو كل حد في طريقو..مزال يرعش في ساقيه و يسمع في نعيمة قتلو
-وليد ههههه حبيت قبل؟؟؟؟ نعيمة كانت حاسة بيها و حبت تخرج منو كلام يبرد نار ايمان شوية قلبها واجعها عليها
- تلفتلها و شبشبلها شعرها. .و هاكي اللصقة تستنى في جوابو...هههه نعيمة يا نعيمة تفرك فيهم حتى انت...سكت شويا و جماعة ربثوه هيا هيا
اي حبيت اما طلع الحب موش للرجال... الرجال تحب و تربي و الطحانة تهز بالبارد انا ربي بلاني ههه و حبيت...جل من لا يخطئ هههه و الحمد لله نسيت..
- اكاهو هي شنعت و مكنتها رعشة ...اش باش تقول و اش باش تزيد مازال.. تحس لعبت عليها الدوخة من كلامو توقعت كل شي الا انو يقول هالكلام لي قسملها قلبها اي انانية هي انانية في حبو تحب تملكو حتى كان بعدت عليه...هدت أعصابها اما توترها واضح و علولو مشلق بيها و هي شلقت الي علولو مركز معاها.. زادت على مابيها الخرا لي ترمات عليه
-شنيا اكثر حاجة ندمت عليها ؟؟ و خزرت لايمان و قالتلها انت رد بالك تقلي سؤال واحد و لا شنيا ههههه..
- تبسمتلها شطر تبسيمة مزعزعة بنظرات حزينة و انكسااار واضح. .. خوذ راحتك عزيزتي شكون انا لي باش نمنعك تسألو...خزرتلو و كملت .. لولاد الحب عندهم بالكيف تحبو مديدة و تنساو الكل كيف كيف ريق حب و بنات و.. شيخة..بلعت ريقها معاش فيها...
هو يخزرلها مركز عليها مركز مع كل كلمة تقولها يحسها في قلبو و غاضتو كيفاه تخمم موش فاهمها شبيها ولات بالهشاشة هذي شبيها ولات فراجيل و حساسة و نظرات الحزن لمدمعة لي في عينيها...كان باش يكمل يحكي اما علولو قص عليه بضربة على مرفقو و وشوشلو... يزيها يا معلم كثرتلها راك يا زحي اش تفلم و اش تكذب.. ماو اكذبلك كذبة نصدقها انا عالاقل ههه.. هز عينو فيها و كمل...اما والله نعرش علاه غاضتني بففف مابسلها هاللعبة غمتلي على قلبي...
-هو قلبو تمعس معادش فيه ...حط يديه فيجيبو باش يخبي توترو...ندم اي نعم ندم كي قلها هكاكة...لمعة الدموع في عينيها حيرتو...و مهمشتو..أش تحب منو...علي طبس عليه..وليد قص يزي و الله غاضتني..وليد يا خويا الطفلة ترعش و تتكرم بكلام متاع وحدة عاشقة فانية...
-وشوشلو....صاحبي انت هو إلي قص...تلفت لهاك المايعة...ندمت على الشراب.. خسرني في برشا حاجات اما لاباس..تلفتلها بخزرة مليانة وجيعة و لوم...مع الوقت فهمت و استوعبت برشا حاجات...ساعات فما حاجات تعيش فيك تعيش فيك و يجي نهار تقرر باش تقلعه
- ههههههه شبيكم يا جماعة !! ماتركزوش عاد و كيما قال شكسبير " كلام الليل مدهون بالزبدة "" موش كل شي نقولوه صحيح راو ههه... هو مازال يحكي و هي قامت تتنفض ساقيها يضربو في بعضهم و دموعها شادة في كحة تعدات بجنبو طشاشة خلات كانت ريحتها متاع العادة لي خدراتو...
دخلت للدار باش تبرد وجها خلطت نعيمة في جرتها تسأل فيها و تعاود قتلها شي...فاقت شوية من صدمتها و جات راجعة تسمع في فضيلة جارتهم
-لطيفة وخيتي حتى انت ماهو ربي هداه زيد وليد من يوم يومو رجال و اي وحدة تتمناه و بيناتنا انا حاطة عيني على وحدة باش ننعتك عليها
-وخيتي انا هذاكة نهار السعد ...هو ربي ضوالو بصيرتو وليدي و نشاله نا بيدي نخمم راني و هاني باش نشاورو و نشوفلو بنت الحلال...كلام دخل وذنيها كيما الرصاص قلبها غم عليها..خرجت تجري قبل ما لخرا تزيد تستفرد بيه...خزرت ما لقاتوش معاهم...ساقيها تعبو رمات روحها على الكرسي
-علي فهمها تلوج عليه وشوشلها..مشا يصلي طمانت شوية و بقات تستنا فيه...دخلو البنات جابو الحلو و السهرية بدات تحلا و عاودولها طرح متاع قازوز هههه و هو لتو لا رجع...طوالت هالساعة و هي تستمر.. قاعدة على طرف التيراس مشيعة عينيها للنهج فماش ما تشوفو جاي تصرفات متاع طفلة مراهقة لكلها سذاجة .. اما شي تو اكثر من ساعة و ريحتو مافماش... ضمت يديها محملة روحها و تعاود في كل كلمة سمعتها منساوين للداخل.. شكون هاذي لي باش ينعتو طاطا عليها لوليد اكيد عفشة اكيد طايحة عليه و ماتحبوش هو زادة مستحيل يخزرلها و لا يحبها مستحيل يحب غيري هو قالي قلبي ماتسكنوش مرا غيرك. .اما علاه يقهر فيا بكري علاه شماتة فيا خلاها تتمعجن كيما تحب اكيد يحب يغيضني بيها...
السهرية على عقابها و الجموع بدات تخف كعبة ولا زوز مازالو و هي لبدن في الحوسة لي ينظفو فيها و القلب و لعقل في وليد و جية وليد
-شوية و لمحتو في راس النهج...بدات تستوي في روحها و حاطة في مخها مادام علي معاهم في الحوسة هو زادة تو يجي...لكن هو هز يديه ليهم..
-تصبحو على خير يا جماعة.. علولو غدوة الثمنية ان شاء الله..كمل كلمتو و بدا يحل في باب الدار
- تحس في روحها كي لي صب عليها سطل ماء من فازتو...خزرت لنعيمة لي هازتلها بكتافها تقلها " مانعرش شبيه روح و مارجعش اصلا هاي لطوف مازالت ساهرة".. في غفلة منهم هي دخلو تنطرت طشاشة فم اش ماتلحق عليه...
مزال يفارع في الباب و ما يحس كان بحثلة وراه و ريحتها اخترقت قلبو...كبس عالباب و تلفتلها بوجهو الناشف
-عروستنا...شتعمل لنا؟؟
#انتي_سبابي #كرونيك #كرونيكات
الحلقة 30
- بقات تشوفلو كابسة على طرق روبتها بيدها باش ماتبكيش قدامو... نظراتها كانو حارين و ثاقبييين.... اكتفات بالسكوت لي استفزو باش يكمل كلامو..
-شفما...(تنهد و سيب الباب و تكا عالحيط) مزال باش يكمل و هي بحركة موش عادية خلات قلبو يرعش ....جبدتو من يديه و هزتو...ما كانش عندو قوة لا باش يسأل لا باش يتكلم...دزتو لبلاصة بين دارهم و دار جيرانهم جاية متخبية بحيط دارهم و خزرتلو
-لازم نحكيو و نحي عليا هالماسك الي حاطو وليد ..
-بلع ريقو...تو جايبتني لهوني موش خايفة يهد علينا الحاكم و نزيد نتسببلك في فضيحة و نضرب شهر في قلبو هههه ..ضحكة كان تجي كلشي الا متاع عبد في وعيو
- مايهمنيش... انا كي نحب نحكي معاك شي ما يمنعني وليد... حتى اللكزة لخرى لي عامل فيها تغيض فيا بيها ..يزيك وليد
-نغيض فيك؟؟ علاه باش نغيضك..تو هذي حكاية جايتني في هالوقت تحكي فيها...عرفها باش تمشي بالحوار لبلاصة هو ما يحبهاش و خايف يضعف...بدا يدور في المفاتح في يديه...امونة نحكيو مرة اخرى غدوة الصباح عندي خدمة ..برا كمل سهريتك مع الجماعة
- امونة و اختي ايمان و لباس و ياااسر كلام قاعد تقلي فيه موش منك و لا عمرك قلتهولي اي هذا مايتسماش غيضان و مجاكرة فيا!!! ..سكتت خاطرها تحطت في موقف بايخ عندو الحق هو خاطر ماعندو باش وصلها و هي جاية تحاسب فيه اما علاه تحاسب و اش يهمها اصلا ...
-عدا يديه على شعرو و هرب من كلامها بسؤال فيصل و فاصل...ايمان اش تحب مني؟؟؟تو قلقتك؟؟؟تعرضتلك؟؟ضريتك؟؟ قربتك؟؟ قلي اش تحب مني؟ كاااان بعدتك تقلي كيفاه كان قربتك تقلي كيفاه...يا ايمان راك مرت راجل حتى كان بخطبة كهو انت توا مرتو و انا ما نتعداش على زرع غيري باش حد ما يتعدالي على متاعي نهار اخر...وجهو سخن ولا يتنفس بالقوي اما سيطر على روحو...احنا ولاد حومة و حتى كان وصلتك بالخايب قبل طلبت السماح و تحاسبت بالوافي...كان غلطت معاك في حاجة قلي كلام
اخر ما فماش علاش..نقلك ارجع اسهر على روحك و صدقني راني لا عندي معاك حتى مشكلة و لاني نتصرف معاك لا بمجاكرة لا شي...ههه اش بيناتنا باش نغيضك يا ايمان؟؟؟
- اطرشقت في وجهو ...تكذب والله تكذب. .انت مازلت تحبني و عينيك فاضحيينك تستخايلني مانعرفش والا كي تتجنبني باش تنساني !! انت مستحيل تنساني وليد مستحيل تكون عندك متاعك و تسميها متاعي تعرف علاه !! خاطرني هوني.. تضرب فيه بصبعها على صدرو. . انا ساكنة فم و حتى مرا تنجم تخوها لبلاص
<><>
<><>
انتي سبابي
من انجح الكرونيكات التونسية
#انتى_سبابي #كرونيكات #كرونيك
الحلقة 31
هاكي و الا تخمم حتى.. تتنفس بقوة صدرها يتهز و يتحط تحت الروبة لي شعلاتو...
-قربها و لمستها...زينها و روبتها...منطق الاستحقاق الي تحكي بيها خلاه يخطفها من كتافها و يقربها ليه...كان يتنفس تقول يجري...النفس متاعو في وجها..وجهو يرعش .كان باش يعمل حاجة و بعد سيبها تلفت مسح وجهو بيديه و تلفتلها....شنوة هالإستحقاق الي تحكي بيه....و شنية هالانانية...نستعرف ك....ك..كنت نحبك ..اما نهارت الي اسمك مقرون بغيري ...يحرم على عينيا حتى تخزرلك غير انك بنت حومة...زيد حبي ماهو مقلقك و مفددك علاش تسأل فيا و تحكي...بدا يصيح ...على شنية جاية تحكي....برا يا بنت الناس اخطاني و الكلام هذا معادش نحب نسمعو..انت في طريق و انا زادة شديت طريق واحد اخر...تكا عالحيط ...حط يديه على قلبو...البلاصة إلي تحكي عليها ستناتك ستناتك و تسكرت...و الوقت يداوي كلشي...و نزيد نطمنك يا للا الايامات الي جاية باش تأكدلك إني مشيت على روحي...كلامو و كلام لطيفة دخلوها بعضها تحسابو بالحق باش يخطب كمل يحكي..ايمان انت حبيتك و فنيت عليك اما انت اخترت طريقك و نشاله ربي يوفقك..انت توا انسانة قاعد ننسى فيها و باش ننساها...تقعد ذكرى مزيانة و تقعدي الشطر المزيان في حياتي هههه بالباهي و الخايب انت تقعد حاجة انا منيش نادم عليها و كان يرجع بيا الوقت نعاود نحبك..اما في المستقبل انت معندك حتى بلاصة و معندك علاه قاعدة في قلبي...الكلام عليك و الحلم بيك ولات حاجة تخنق و تقتل و صار لازم نننسى...نقدرك و نحترمك و صدقني من قلب قلبي نتمنالك الباهي و معنديش معاك حتى مشكلة اما انت...هز يديه يفسرلها ...من كثرة التمثيل هي بيدها صدقت..كمل يحكي بيديه..انت ذكرى حلوة بالنسبة لقلب وليد و بنت حومة و حب صغر ...ما تكونش انانية و خليني رايض و معادش تجبد عليا هالموضوع و صدقني يا ايمان رحلة نسيانك مشيت فيها مشية باهية و معادش نحب نرجع بالتوالي حتى بمجرد الكلام...تصير راهي ياما قصص وفات و كل حد شد ثنيتو خليا انا مهيش قصة هههههه خرافة...زيد الحمد لله ما جيتش تحبني ولا راهو نسيانك كان اصعب...نشاله نفرحو بيك في الصيف و ناقف مع بنت الربط متاعي و توصل للراجل الي اخترتو و نراك متهنية في دارك..
- كلامها لاخر لي كانت معملة باش تزيد تقولهولو تكسر على الحيط لي بناه بيناتهم... كلامو و تمثيلو و خزرتو القاسية فيها شتتها و بعثر فيها بارشا حكايات كانت حابة توصللهم... ساقيها ماعاش حاملينها تحس في الدم رقد فيهم كيما رقدت دموعها على شوافر عينيها... في الظلمة لي تحكي مرارة الحب بين قلبين تحرقو بفرط العشق و الغيرة وخرت بالتوالي و بلمعة من عينيها تسيبو دموعها...ماحبتش تتفضح اكثر من هكا قدامو و هو لي ظهر بايعها من هاك النهار..مسحتهم و كملت تحكي بقلب محروق.. ما تنكرش الي انت حبيتني و مازلت تحبني و حتى كانك مشيت اشواط في نسياني اما مزال عندي معزة في قلبك.. نفورك مني و هروبك بعد كل مانتقابلو ماهوش باش يداوي الجروح يا وليد حبيتني و باش تنساني اما خليك قريب خليك كيما قبل الساس لي نحتمي بيه لي كي نمشي في الظلمة نغمض عينيا خاطر نعرف الي وليد ورايا... بلعت ريقها ... صحيح هبلت عليك في باارشا مرات و وصلت سمعتك كلام ماتحبوش اما نبقى ديما... ديما م..محتاجتك معايا مانحس بالأمان كان في حظورك
-قلبو تفتفت...موش عارف ياما ستناها تقلو بربي ما تنسانيش راني نحبك...ستناها تقلو كلام اخر و هو كان باش يقلها راني ناري زادت شعلت راني عمري لا نسيتك و مستحيل نهار ننساك..اما كان لازم الحوار يشد
ثنية الكذب خيرلو..خزرلها...انا ديما معاك اما من بعيد يا ايمان...منيش نتبهلل عليك اما هو لازم يكون سندك و الحيط إلي تتكا عليه...حبينا ولا كرهنا لازم نتصنع البرود و نتعمد الهروب باش نقلعك جملة من قلبي...ما نجمش نكون وليد متاع قبل خاطر...خاطر هز عينه للسما...معادش عندي الحق...صدقني كان باش نبقاو ضربة ثنين نحتك بيك ما عملنا شي...غدوة تمشي لدارك و راجلك و نبقى انا نتخبط لنا...ما تكونش انانية كيما قتلك ايمان...في حضوري ولا في عيابي وليد ديما ساندك و معاك و كل ماتستحقني انا موجود..اما خايف نهار يجيني شكون يقلي علاه و وقتها ما نجمش نجاوبو خاطر عندو الحق...قبل عملت كلشي باش نفك بلاصتي عندك اما توا نجمش خاطر ولات ملك غيري.اسمعني ايمان نقلك حاجة ماليوم تعلم عمل على روحك انا معاك مش بالضرورة الا ما تراني اما ننصحك ابدا عمل على روحك ليوم انا موجود غدوة منيش موجود...الراجل الي
معاك باش يولي. .غص في الكلمة.. باش يولي الحضن الي لازم تهربلو كي تستحق و انا متأكد الي عندو ايمان كان لزم يعمل طريق في البحر على خاطرها ...انا معاك كولد حومة اما نقلك لازم عودك يشتد و تبدا تتقبل في فكرة انو لا انا لا بوك لا غيرنا الي لازم تستحقهم..لازم تعمل على ايمان في حد ذاتها و تعمل على الراجل إلي اخترتو باش تكمل معاه المشوار و صغارك باش يناديولو بابا ..كلمة صغارك حرقتها و حرقتو...بو اولادك ...ههه
#انتى_سبابي #كرونيكات #كرونيك
الحلقة 32
- ههه ..ضحكت بحسرة.. تعرف عمرو لا قالهالي انا سندك و تنجم تعمل عليا و انا نعمل على جالك و نفعل. .. قبلو هو و الا بعدو انا ايمان لي ماتبدل فيها شي انا طلي ما نضافش حتى جديد بخطيبها و لا بلاش بيه انا لي حتى طنغيب ماعندوش اللهفة متاعك عليا اللهفة متاع انسان فقدك و حاس بغيابك. .. مانعرفش انا بالضبط شنيا بالنسبة ليه اما لي نعرفو إلى هو خذاني لغاية أخرى بعيدة كل البعد على منطق الحب.. خاطر لي يحب يحسسك بحبو بابسط لحوايج اولهم خزرة حنينة تلخص أسئلة و غيرة معدومة في عينيه..
-زاد هبل ...زاد جن يعني هذا الي ربطت روحها بيه...تحكم شوية في مشاعرو باش ما يرميهاش في حضنو و يقلها كان الدنيا الكل تخليك انا مستحيل تشرق عليا شمس منغير ما نخمم فيك و إلا نحنلك...تنهد خزر في عينيها إلي مضببة بالدموع..معندو حتى خيار الا انو
يطمس مشاعرو...إنت إخترتو و انت وافقت عليه...انا نبهتك منو و موش لازم نرجعو لتالي و انت خذيت قرارك..نعرش يمكن إلي انا مختلف فيه معاه كان طيش صغر و يمكن كي خطبك و قرر يستقر يبطل و يشد الثنية الصحيحة...نحبك تكون قد قرارك و ما تظهر ضعفك لحد لحتى حد ايمان...نهار إلي تحس روحك مامش مرتاحة في العلاقة قصها..انت مزلت عالبر و بوك الي يهمو هو هناك و فرحتك...و بالنسبة ل...ل...تنهد..لخطيبك نحبكش تفقد الثقة في روحك ..خاطر الي يكون معاك و ما يحمدش ربي كل دقيقة و ما يحطكش في ممو عينيه يتسمى اعمى...نعرش يمكن حاطط حدود بينك و بينو خاطر يعرف مبادئك و نشاله تو بعد ما....حبش يقولها تعرسو....تو كلشي يتبدل و تو يولي بيناتكم رابط اقوى من زوز مخطوبين و تولي تحتمي بيه و يولي هو يحسسك بلي تحب تحسو اي مرا...حك شعرو و ضحك خاطر ريقو شاح و لسانو تعقد من كثرة ماهو شاد روحو بالسيف...منيش معلم في العلاقات راني هههههه اما نقلك
حاجة وحدة انا كنت نرا في قرارك غالط خاطرني عاشق و الي عشقها اختارت غيرو اما توا و بالوقت بغض النظر على كمال إلي لليوم لغدوة انا خايف عليك منو ...اما صدقني توا تفهمت موقفك انت طفلة نطيفة و اشرف مالشرف لقات روحها عابدها واحد كيفي سكارجي و كلوشار توا فهمت موقفك مني و عرفت إني غلطت معاك و مشاعري بالحق ضروك برشا...دقق فيها عينيه...سامحني ...سامحني خاطر حاولت نوصل لقلبك حاولت نخليك تحبني اما فشلت...الطريقة كانت غالطة...ما حبيتش نفهم إنو كلشي بالسيف كان المحبة بالكيف...نحبك قوية ايمان و صدقتي ربي متأكد انو كاتيلك كل خير خاطرك تستاهلو...محبتي ..و.و كبس جبينو و خوفي عليك و سؤالي عليك باش يبقاو ديما...يمكن نهار تشرق شمس الحومة و انا منيش فيها اما نحبك تعرف انك ماكش محتاجة لا ليا لا لغيري ...انت تنجم تتغلب على كلشي و تنحم تسطر لحياتك بالصحيح و تعيشها فرحانة...حب روحك و عيش و افرح وحدة كيفك تستحق
الحب الف مرة و نشاله نسمع عليك كان الباهي...قلتها و نعاود نقولها كنت و باش تبقى الشطر الاروع في حياة وليد و معادش تلوم روحك خاطر حاجات فاتو سيا...حس قلبو باش ياقف ...حاسس روحو يكذب و قاعد يفلم قاعد يحرق في اخر ذرة صبر و قوة مصطنعة...غمزها و حب يفذلك عليها...حاجة وحدة بربي الروبة هذي بعد عرسك ما تلبسهاش و صغارك بربي لا تخليهم يناديولي عمي ههه خليهم يناديولي خالي عاد تولي أهون...و ما تحكيلهمش وليد الكلوشار اش عمل فيك..و ديما ديما أضحك نحب كل ما نراك نراك تضحك اوعدني...نحبك تكون احسنت الإختيار هذيكة الحاجة الوحيدة إلي باش تخليني ننساك فيسع
على خيبات الأمل متاعها و متاعو. .روح كل واحد لدارو بروح تتألم و قلب مكسور و عينين تحكي و تتسمعش.. تمنات تسمع منو لكلام لي مستانس يقولهولها في كل مرة تمنات يعاود يحلف و يتكتف و يقلها مستحيل نخليك لغيري والا لي يدور بيك قاتلو و شارب من دمو اما هو بكل برود و جفا قاعد يخزرلها و يتعامل معها كاينها وحدة مالبنات كيما نعيمة و هدى و الفة و سناء. .. غاضتها حالها و غلبتها العبرة تخنقت كان مادخلتش تحت الماء البارد ماتعرفش اش يصير فيها ...
هو ماكانش احسن منها حالتو و هو يخزرلها و هي تبعد كانت بالويل خاطر موش اول مرة يحس بعدها ديما هو واقف و هي تبعد و تخليه " انا هوني يا عمري علاه انت ديما تختاري البعد و قلة وصالي.. انا وين خليتني على عهدك و وعدك و حبك اما انت بعتيني ولغيري عطوك. . جاية تحاسبي فيا و في قلبي لي لامس لليوم لغدوة تحرم عليه النساء... اي انت غلبتيني في عوض الغلبة زوز. .مرة كي تخطبتي و مرة كي حكمتي على قلبي حبك يا ظالمة. .اش عمالنا و جاء مليح مكتوب علينا عشقك مكتوب عليا هواك و مكتوبلي الشقاء في جرتك قريبة كنت ولا بعيدة ... "" هواجس كانت تاكل في مخو و قلبو فوق السطح وين كان يعجعج في الدخان.. يسمع في ضحك نعيمة. .تبسم صحة ليها مزالت صغيرة مازالت تضحك من قلبها مازال ماتليعتش بنارو لي تكوي... يسمع في هدى تنادي لايمان عرفها الليلة بايتة في دار خالتها.. " ايمان إيجي خلينا ترقدو و سكري الشباك الناموس شواني..
#انتى_سبابي #كرونيكات #كرونيك
الحلقة 33
كلمات كان يسمع فيهم لين تصورتلو هي في الشباك لي تفارع فيه باش تسكرو... اي كانت بكل ما يعنيه الجمال من أية.. الشعر لي بلون الليل و البدن ابيض و هاكي البريتال الكحلة كانت عبارة في الظلمة و تتوهج منها كان هي كالبلارة تبارك الله عليها.. بقى شارد حاجة اقوى منو... عينيه تلمع حب و شهوة في معشوقتي لي كانت كالبدر.. يحس في روحو سخن و هو يشوف فيها بالمنظر المغري هذاك .. لي صار فيه و كيفاش هيجاتو خلاه يفيق و يتنهزر فيها..." ياخي نورمال ساعة باش تسكرو د...امو الشباك سكر الكازي كان يتعدى حد من الزنقة و انت ربنا هكا خلقتنا !!! " ماشلقش بروحو كيفاش بانت حزارتو المعتادة لي كان طول الوقت يخبي فيها عليها.... هي تربثت بقات تتبنن في كلامو و صياحو عليها رجعتلو تبسيمة متاع نصر رغم انها ماكانتش مقصودة الفازة اما خذات اش تحب منها. .. فيقاتو هدى و هي تصيح عليها " يا هم سكرتيش هالشباك رانا تهلكنا بالناموس "" وخر لتالي و عطيها بظهرو عامل روحو لا علاقة بيها اما هو حصل و هي حصلاتو .. سكرت الشباك و تمدت. . كانت عينيها الكل قلوب و هي تتفكر فيه كيف قاعد يشوفلها كيفاش حازر عليها و الأهم نظراتو لي باش تأكلها ماكلة حشمت انو شافها بلبسة النوم لمخلعة غطت راسها تتضيحك مالفرحة و نعيمة جابدة عليها بالمقلوب ..
- اه قطوس هاك زاهي قبيلة باش تتطرشق بالغزول ...
- اسسسس هدى مزالت فايقة
- ههههههههه يا بنتي هاكي ملي تحط راسها الله يرحمها.. قربت قرصتها من فخذها ... يا هاملة مالشبابيك ولينا !!
- ههه يزي امان .. ايمان حشمت و لأول مرة تحشم من نعيمة كي تحكي على وليد... و الله صدفة
- يا بنتي و كيما قال شكسبير "ربة صدفة خير من الف ميعاد" اااااه مسكين راك ذوبتيه كي راك هكا مسكين وليد وخي ياسر عليه راهو ... ههههههه ستنى الساعة ياخي ماتقليش راك بهذي !!! لا عاد هذي تكون كل شي كلللل شي الا خلعة ههههه ووووه و زيد شطر القفل مفتوحين يا واطية !!!
- نعييييمة امااان والله لتوا مانيش مصدقة اني نسيت روحي قدامو هكا .. تعرف تكونسييت اصل و هو يخزرلي ... زعما مايقولش شبيها معرية روحها !!!
- يا بنتي اش عندك فيه ياخي هديتي عليه في دارو و قلتيلو شوفني !!! هو لي عينيه تسكاني نهار كامل ااااه قلبو هوني في الشومبر و عينيه زادة كان ماجاش مركز اخوتي كيفاش باش يشوفك هههههههههههه مسكين الراجل اش يعديهالو هالليلة الكلبة
- ههههههههه...يا نعيمة مزال يحبني والله يحبني كيما قبل
- واكثر من قبل .. و رأس اختي وليد حبك من كل قلبو و راهو وصل يحلف براسك.. صحيح افعالو لقديمة خلاتك تنفر منو و انا عاذراتك اما الحب كان باين في عينيه
- انا زادة نحبو والله و رحمة امي نحبو وقتاش وكيفاش و علاش مانعرش لي نعرفو اني تنعب كان نهار مانشوفوش و الا نسمع صوتو ... تخيل وصلت نغييير حتى انو يحكي مع غيري و الا يفدلك معاهم دمي يفوور
- يا وحيدة مالا انا زادة غايرة مني! ! كب سعد العار. .
- ههههههه موش هكاكا نعيمة تعرفني مانخدمش مخي معاك انا كوزينتكم بففف اش لصقت فيه لا و نسحها تجاكر فيا !!!
- ماهو حتى انت راك شلقتي على روحك راكي كالجحيمة شاعلة كان صبيت عليك الماء راو طلع منك الدخان ... قلت نبعدها الطفلة عليك لا تدغريها بحاجة ولا حاجة
- خخخيت موش للدرجة هذي عاد حرام عليك
- حرام عليك انت لابستلو هاكي الروبة اقسم بالله عينيه باش تاكلك... ياخي نسيتي روحك انت راك مليانة و عندك ماتقول في روحك .. شوف صدرك كبير شويا و عريضة من لوطة راك و بلوندة اش تحبيه يعمل بربي الراجل يقوم يتحمل بوطونة الضو !!!
- ههههههههههههههههههه اومورو
- يا بنتي انا لي نعرف راهم الحاجات هذي تجذب الراجل... استوات في قادتها عاملة فيها تفسر و جايبة ماعندها .... شو الصدر المليان و خاصة كي يكون ابيض راهو كارثة بالنسبة الراجل !!
- بالحق تحكي !!!
- تي اييي و هاك الهونش خاصة كي يولي عريض والله الراجل يموت على مرا فيها الزايد في البلايص هاذم
- كيفي انا معناها !! معناها وليد تعجبو الحاجات هذي !!! نعجبو انا هكا؟؟
- شنيا تعجبو يا بنتي الراجل فريزتيه من بعضو نقولك حاجة ؟؟ والا خلي عليك كبيرة على مخك و ممكن ياسر ماتعرفهاش مازلت صغيرة ههههه
- بربي !!! اكبر منك راني ...ستنى الساعة انت منين ليك يا فقصة ؟؟؟ اب اب اب يقوى عليك ربي
- مالا نمشي لليسي كان للقراية !! راهو التحليق مع البنات يعلم يا اختي يا بكة ... ااااخ اش بنعاني منك بصراحة و مانغير غش انت وحدة جاهلة جنسيا هههههههه
- سكر فمك و احشم مني راو بيناتنا أربعة سنين
- اما انا سابقاتك أربعة سنين ثقافة عامة هههههههه
- خليني نرقد نفختلي راسي
- ارقد عزيزتي ارقد ناري على لي بايت الليل يتمحطر و يتخبط ماجاهش النوم مالحب و الشي لي شافو
- نعييييييمة سكر
- ههههههه... سكتت شويا و عاودت ادندن عليها. . و من الشباك لارمييلاك حااالي. ..هههههههههه ايمان ... ايمان !! ياخي بالرسمي رقدت ؟؟
في جوان معروفة الشمس تقلي و الطقس يفدد بالسخانة ... الناس الكل شادة ديارها مقيلة الا هي تعدي أكثر من شطر النهار لاصقة في الشباك تعس عالماشي و الجاي فماش ماتشوفو متعدي توا من هاكي لليلة متاع سهرية الباك ماراتوش ماشافاتوش ..بلغة اخرى كان يتهرب منها و معاش يحب يضعف كي يشوفها اصلا هو كان لاهي في قضية عندو مديدة يخدم عليها خلاتو يعمل ثنية عالعاصمة هاو ماشي هاو جاي تي حتى الكونكيري مخليها لعلي.. هي مسكينة بعد ما تبقى بالسوايع تستنى فيه تأيس و تشد فرشها تقيل و الا تعمل حاجة تنفع اصلا الكونحي مازال ماكملش و كان تلقى معاش تمشي و كمال موش سائل عليها تي أربعة ايام كونجي كلمها مرتين و الا ثلاثة و اغلب كلامو عالخدمة و الميزيرية ماقاللهاش حتى كلمة حلوة و الا سأل بالقدا على حالها و أحوالها و على بوها.. زادت فدت منه و عملت عليه رونفوا باش تفتك من مساطتو الهم اش كانت دغفة كي وافقت عليه... ياخي اش جابو ليها هي حساسة صاحبة جو و حنينة و هو لا علاقة بيها اما الله غالب لزتها ليام و الوقت الظالم و زيد كسوحية راسها ...
مارزنها ايام في غيابو قداش توحشتو و قداش حابة تحكي معاه حتى كلمتين صباح الخير ... تحسو مطفيها و باعثها و هذا الشي قاهرها و مخليها تهبل. .كي تتفكر كلامو كيفاش قالها راني مشيت اشواط في نسيانك ديما يتردد في وذنها بين طيرلها نومها و سقمهاا عالماكلة .. فكرة انو امو تخطبلو وحدة أخرى مخوفتها عللخر .. كيفاش مرا اخرى مع وليد هكا كانت تتقزز مالتخمام في الهدرة هذي .. هالانانية الكل كان معاه كان فيه هو أي حتى خطيبها نساتو اصلا عمرو مكان حاضر لا في خيالها و لا في قلبها ...
اليوم نهار جمعة اما المرة هذي موش كيما جرات لعوايد خاطر نعيمة هي لي باش تجي تتعشى عند ايمان و منها تبات و تونسها خاطرها موش قد بعضها هالايامات و نعيمة حاسة عليها اما مافي حالهاش تعمل شي ...
- نعيمة تعطيني تلفونك !!
- وي عزيزتي هاني يشرجي ...قامت تجري بعد ماجات لمخها حكاية حبت تثبت منها... حطت نومروه و طلبت يصوني مرة و ثنين و الثالثة هز ديراكت ..
- وي بطبوط سافا !!
-..........................
- الو حل فمك يا طفلة الو! ! عاملة بالعاني ههههه
-......................... ساكتة تسمع فيه و تتحسس في صوتو لي حارمها منو ليه مدة... دمعتها هبطت اول ما سمعتو يضحك في التلفون ....
- نعيمة تو نكلمك بعد توا في القهوة عندي طرح راميي و نتلهى باختي سلام....هو علق و هي تفجرت بالبكاء
- اسم الله عليه ... ايمان شبيك توا خليتك مابيك شي شبي اختي اسم الله. .. نعيمة تفجعت بعد ماخلاتها عادية جات مالدوش تلقاها في حالة. ..
- م..مدلي ..نششرب امانك ... عطيني نشرب ... ريقها شرح مسكينة عكس دموعها لي تسر. .. شوفتو كيفاه يعمل معايا !! شوفتو كيفاه هز كي طلبتو من نومروك !!
- ياخي على شكون تحكي يا ايمان !! شبيك كنت في سينة وليتي في سينة !! هات جاي خليني نشوف ...هزت منها التلفون و شافت النومرو. .. امونة انتي ياخي مامليتش امان عزيزتي يزيك مالبكاء .. علاه هذا الكل توا علاه تعذب في روحك حرام عليك
- يا نعيمة راهي نار شاعلة فيها... تضرب على صدرها... مانعرش علاش و كيفاش و وقتاش اما راني توحشتو توحشتوووو.. قداه ليا ماريتوش نحب نشوفو نحب نراه حتى من بعيد علاه يتجنب فيا علاه
- بربي ايمان يزيك راهو ماعندك وين توصل توا...كل شي مشا كيما حبيتي انت موش لازم تقلب عليك الصحن. ..ايجي كولي حاجة راك نهارين ماحطيت شي في فمك..
- ماعينيش ماعيني في شي ماعيني في حد ..نحب نشوفو نحب نراه و نحكي معاه...شدتها من يدها بالقوي تتراجى فيها.. امان نعيمة ماك تشوف فيه الباب في الباب معاه ..اش عامل ماسالكش عليا !! ماجابش سيرتي !!
- لا والله انا بيدي تتعدى حتى ثلاثة ايام و مانشوفوش و حتى كي نقابلو سلام سلام الحق يااسر متبدل وليد...
شد تلفونك خطيبك يطلب ياخي عاملتلو رونفوا !!!
- بربي هز طيش الوز غادي مانحبش نحكي معاه و هو كبش الخرا اش يلصق اله
#انتي_سبابي #كرونيك #كرونيكات
الحلقة 34
- يا نعيمة راهي نار شاعلة فيها... تضرب على صدرها... مانعرش علاش و كيفاش و وقتاش اما راني توحشتو توحشتوووو.. قداه ليا ماريتوش نحب نشوفو نحب نراه حتى من بعيد علاه يتجنب فيا علاه
- بربي ايمان يزيك راهو ماعندك وين توصل توا...كل شي مشا كيما حبيتي انت موش لازم تقلب عليك الصحن. ..ايجي كولي حاجة راك نهارين ماحطيت شي في فمك..
- ماعينيش ماعيني في شي ماعيني في حد ..نحب نشوفو نحب نراه و نحكي معاه...شدتها من يدها بالقوي تتراجى فيها.. امان نعيمة ماك تشوف فيه الباب في الباب معاه ..اش عامل ماسالكش عليا !! ماجابش سيرتي !!
- لا والله انا بيدي تتعدى حتى ثلاثة ايام و مانشوفوش و حتى كي نقابلو سلام سلام الحق يااسر متبدل وليد...
شد تلفونك خطيبك يطلب ياخي عاملتلو رونفوا !!!
- بربي هز طيش الوز غادي مانحبش نحكي معاه و هو كبش الخرا اش يلصق الهم
- الله يهديك يا ايمان تو عاجبك لي قاعد تعيش فيه اش باش تعمل من شيرة خطيبك و كلمة بوك و من شيرة قلبك و حالتك ...يا روحي ايجي عندي امان معاش تبكي
- هذاك اش قاهرني انا توا انني مانجمش نرجع بالتوالي مانجمش نفوت كلمة بابا و مانجمش نهز عيني في وليد و نقلو نحبك والله مايخسر عليا كان تكذب. ..
- اي اما انت ماكش مرتاحة معاه كمال و اصلا ملول ماكش شارهة عليه غير الله غالب عليك بنية خالتي و اكاهو...هزتلها راسها بالشوية ... اخزرلي عيش اختي انا راني باش نحكي خاطرني غايضني حالك ريت خلي وليد على جنب و الدنيا مكتوب اما كانك ماكش مرتاحة و ماتنجمش تكمل معاه خطيبك قصها و السلام المهم راحتك يا ايمان
- تعرف والله حتى وليد قالهالي ... قالي ماتاخذنيش اكرهني كان تحب اما كمال لا و كانك ماكش مرتاحة بطل و بوك تو يتفهمك خاطر مايلوج كان في مصلحتك...
- اي والله كلامو الكل صحيح ... اخخخ فالدنيا قداش ظلمتكم. .زادت ضمتها ليها
- ياخي كرهني للدرجة هذي !! معاش يطيقني و لا يطيق حتى شوفتي و كلامي معاه!! شوفتيه كيفاه هز على نومروك اما انا لا تو ثلاثة ايام و انا نطلب و نعاود منهم لي يعلق عليا و منهم لي يصوني اكثر من العشرة مرات و مايهزش. .. مسحت دموعها... تعرف يا نعيمة انا نستاهل لي صارلي الكل خاطر..خاطر وصل هو في يوم مالايام هبل عليا كيما هابلة عليه انا توا اما انا بعدت و و خليتو و زدت بعدتو عليا ..لا شفت حبو و لا نظرتو ليا يااااسر وجعتو و قهرتو انا يا نعيمة اما ..اما والله نحبو والله نموت بلاش بيه يا نعيمة عندو الحق يبعد و ينساني اصلا علاش باش يخمم فيا و الا يحسني مالي الا حب مات و تعدى كيما قال ..تخيل مانجمش نواجهو و نقولو نحبك مانجمش ماعنديش القوة يا نعيمة. .. شدت رقبتها ..نحس بغصة هوني موش حابة تنزاح نحس في هموم الدنيا خانقتني و...و باش نموت ..تفهم فيا ولاااا ..بدات تصيح عليها و تقلب في الدنيا و تكسر.. نموت بلاش بيه كان يبعد و يخليني نمووت كان تاخولو امو طفلة وحدة اخرى و تعرسلو بيها .. لهذا هو يقول باش ننساك و نشوف حياتي لا هو ماعندوش حياة بلاش بيا ما عندو شي .. هو عامل بالعاني يحب يتوبني يحبني تذوق مالكاس لي ذوقتو منو..انا نعرفو باش يرجعلي باش يحبني و يقلي امونة راني مزلت نحبك و مانخليكش لغيري و انا نقصها طول مع كمال طوول الهم اش نكرهوو هو السبب هو لي بعدني عليه كان ماجاش في حياتي في لحظة ضعف عمري لا ناخذو. .. تصورو شعري يا نعيمة قداش من مرة نقول خليني نقصو باش نرتاح معاش نخمم فيه وليد خاطرة يحبو بااارشا شعري و كان ديما يقلي شعرك بلون الليل...طاحت على ركايبها بعد طرح التكسير لي عملاتو في بيتها..بعينيها لمدمعة التاعبة. .. قلي راو باش يرجع على خاطري... ماهوش باش يسلم و باش يبقى يحبني... تنهدت ضمت ساقيها و رقدت عالسطح البارد فماش ما تطفى نارها. . نعيمة مصدومة في العاصفة لي صارت و من انهيارها للدرجة هذي قدام هالحب لي باش يقتلها..حب اقوى و أعمق و اشرس مالحب لي حبهولها وليد... ولات تخوف حالتها و ينخاف عليها خاطر حالتها الصحية كانت بالويل. .قربتلها وين كانت غارسة راسها في الفرش. .كانت هادية تتنفس دوب اللاش حالتها تكرب ضايعة تاعبة معاش فيها حيل باش تتكلم و تلوم و تصيح. .. هزتها و رقدتها على فرشها و بدأت تمسحلها على شعرها لين هزها النوم بعينين مدمعة. .. من غدوة فاقت راسها يوجع فيها عينيها منفوخين حالة يخوفو لقات نعيمة مزالت راقدة مصبحة صيف الدنيا تقلي... هبطت تشوف في بوها تلامحاتو في القهوة مع الشيابين يشربو في قهوتهم كالعادة ..قعدت عالكرسي شادة راسها تتفكر في ليلة البارح و مرارها تنهدت و قامت غسلت حالتها لمت شعرها و خرجت للعطار تشري في قهوة وقت سمعت زازة في النهج لي يهز لدار خالتها و دار وليد استغربت الباك و تعدات شنوا هالهيصة توا هي هكاك و تشوف في منيرة خارجة مالعطار تزغرط في التلفون معاها علي
- منيرة ههههه هاك زاهية زغاريط و جو شنوا تخطبت !! تلفتت لعلي ... اهلا خويا علي لباس ! كانت تتحاشى فيهم بعينيها لمنفخين اما علي شلق بيها. ..
-اهلا امونة سافا لاباس عالاخر ...انت شعاملة..مزال يحكي و تسمع في زغاريد اخرى ...تبسم علي و خزر لمنيرة هههههه الحومة الكل سمعت ههههه
- ههههههههه باش نشبعو بالعلوش يا معلم اما صاحبك الطحان مازلت نسالو باكو مالبورو ناوي يغدرني ببيه و الله كان نخلط عليه لParis يخلصو يخلصو. ..تلفتت لايمان لي مازالت تضحك مافيبالها بشي. . ااه بنت عمار ايا ندبو مع بعضنا لدار خالتك لطيفة هاو وليد مسافر قالو جاتو الفيزا لبلاد لقورة وين خوه
-للحظة الارض دارت بيها و غم عليها قلبها...ترهوجت لدرجة انو علي لاحظ عليها...القلب يرجف و اللسان رزين..خزرت لعلي تستنجد بيه و سألتو هي مكبشة في ساشي الخبز مالخوف...ع...علي بالحق؟؟؟ وليد مسافر؟؟؟ كيفاش و وقتاش؟؟؟
- حك شعرو مسكين غاضاتو موش عارف اش يجاوب تمنى مايتحطش في الموقف هذا... اي...اي هو ليوم جاتو و..عندو مديدة من لي عمل المطلب بعد خطبتك بايامات... حب يبردها شويا. .. تي حكاية خدمة مديدة و راجع ... قالها كذبة من راسو باش يطمنها...
- راجت في الهوا لين علي عرضلها يديه ...ايمان لاباس؟؟
-علاش علاش ماشي...ماكم تشاركتم و تبارك الله الكونكري لاباس و سمعت الي باش توسعو...كبست راسها بيديها...وقتاه ماشي و قداه باش يقعد مانغير ماتخبي عليا على امان راهي فيزا يعني موش ساهل يمشي و يجي امتا يحب ؟؟
-علي اول مرة يحس عليها...وليد قرر و حب يشوف مستقبلو لبرا...دبر كونترا بخمسة سنين...باش يخليني وحدي ههه اما كهو ربي معاه صاحبي قلبو باهي و هاي سلكتلو..
-قصت عليه...مستحيل مستحيل يمشي ...ياخي شييني ما فيياليش...شبيه ما قليش و انت شبيك ما قتليش..
مزال باش يجاوبها و هي ساقيها هزتها تمشي و عينيها هايمة...تزرب و نفسها بالسيف خارج و دموعها ماخذة ساقية على خدودها..تزرب تلوج عليه...تحب تفهم تحب تستوعب..
بربي تفاعلو شوية
<><>
#انتي_سبابي #كرونيك #كرونيكات
الحلقة 35
علي خلط وراها .. ايمان هو راو موش هوني توا
- وينو مالا !!
- في تونس عندو حكاية يركح فيها في القنصلية نهرين و يروح ..
- باهي. ..خلاتو و مشات هايمة مهيش مصدقة لخبر لي كان اخر مايمكن انها تخمم فيه.. يبعد يتجنبها و يطفيها اما انو يسافر البرة و بخمسة سنين خدمة !!! دخلت لبيتها تلقى نعيمة مزالت راقدة ..تصرفاتها كانت هادئة كاينها تلقت خبر طفاها طفاها كالجمرة لي كانت شاعلة و لاهبة اما توا طفات ... نعيمة ..نعييمة...كانت تقوم فيها قعدت على حافة الفرش مقابلتها و راسها لوطة ..
- صبااح الخيرر. .امونة اختي لباس توا !! احسن !! الناس فق ......قصت عليها تخبر فيها
- وليد مسافر
- شنوا !!!!! شكون قتلك !! امتا صار هالحديث؟ ؟؟
- مانعرش ..الزغاريط مالية الحومة و انا شفت علي و اكدلي لخبر ...
- لا لا باااز يفدلك علي يحب يغيضك و برا يا بنتي منين ليه الفيزا امتا خلط عملها و ريقل اوراقو
- جاتك شويا البريود تاع شهرين... لحكاية من خطبتي ..تخيلي !! حد ماهو عالم ...
- نعيمة مستغربة الهدوء المفرط من ايمان و كلامها و هي تعطي فيها في الأخبار استنكرتها... نعرفو ماينجمش بلاش الحومة و بلاش لولاد اكيد يفد و يروح ماك تعرفو مايحبش الحسرة. .و..و ماينجمش بلاش بيك بلاش مايشوفك
- لا ينجم. ..قامت تلم في فرشها. .. مادامو وصل خطى الخطوة هذي مادامو ينجم و بلاش بيا قاعد يقدم و ينسى. .. وتحبني نمشي نقلو وليد راني نحبك !!
- امونتيي !!
- لا نعيمة لاا الراجل رسم حياتو حياة مافيها لا ايمان لا حبها و لا عذابها...
- نعيمة بقات ساكتة مالقات ما تزيد عالكلام لي سمعاتو اش باش تعمل منا تكوي و منا تشوي ...
- اما لازمني نشوفو و نفهم منو بااارشا حاجات خليه يروح برك ...
في الوقت هذاك وليد كان مروح من تونس يرحي في الطريق رحيان. .. ماهوش فرحان بالحاجة لي عملها اما مالقى بيها وين و زيد وائل عمرلو راسو هو هكاكة و طلبو ...
- وي سي الخرا آخي موش ساعتين لتالي كنت تكلم فيا !!!
- توحشتك ولد امي هههههههه
- هاني جايك غادي اشبع بيا خمسة سنين هانهم ..
- والله ماتتصورش قداش فرحان يا وليد ريت خويا رانا مانتفارقوش يا حبي ...
- يا طحان الحب الزايد لي هبط عليك فجأة هذا اش وراه. . ماكنتش تبيع فيا بعشرة لاف للحاج باش تقلو سكرت والا ؟؟
- ههههههههههه الكلو لمصلحتك يا ساقط ....و الله وين نتفكر هاكي ليامات نموت بالضحك
- خاصة كي بتت عند حلومة بنت سعاد هههه
- وووووه هههههه خلي عاد هذيكا في الذاكرة
- كلها جرايرك ديما تقود بيا لبوك يا ولدي ليلتها نجري في الكياس و نلبس في سروالي خفت يخلط عليا بالكرهبة هههههه
- باشيكاتكات هههههههه... قالوها فرد وقت و اطرشقو بالضحك ... ااااه والله يا وليدو كان تجيني برك الاما نشنعوها هوني في بلادهم و نبدو نفركو فيهم عليهم
- يسهل ربي تستخايلني ميت عليه السفر اما دين امها الدنيا تلزك
- احسن وراس خويا تو تشوف مع ليام كل شي يركح و يريض. ..ايا نخليك و رد بالك و انت تسوق... سياقة مجنونة لااا
- لا عادي اصلا كيف طيحتها للمية و أربعين ههههه
- زايد مهبول ايا سلم عالشيباني و العزوزة و بوسهااالي
- يوصل. ..علق و زاد في السيدي لي حاطو متاع الشاب عقيل الصغير "انا وانت عائلة وحدة" ..
بعد ساعتين كان في الدار وين كانت امو و بوه يتفرجو في التلفزة عالاخبار اول ما راتو عينيها لمعت. .
- ايا بابا سعدي بوليدي هاو خلط ...و قامت تبوس و تعنق...
- عسلامتكم يا جماعة اه لطوف ياخي في نهارين زينتي طول يا طفلة
- أي ماني رتحت من منظرك يا هامل هههههه نحطلك تتعشى !!
- و والله ميت بالشر يا امي ماحطيت شي في فمي من الفطور ...هي مشات و هو قعد بجنب بوه لي عامل روحو مركز مع لخبار ... حاج !!
- أمم
- باش تبقى ساكت !!
- اش تحبني نقول! !
- مانعرش ..يعني اش رايك في سفرتي
- هذي حياتك و انت حر فيها .. جايني بعد ماركحت امورك و تقلي رأيك ؟؟
- يا بابا يهديك انا عندي اسبابي راهو ..ولا كان وائل عندو لحق يشوف حياتو و مستقبلو !!
- يا وليد عيش ولدي راهو موش كيف كيف انت راك عمدة الدار من بعدي و ساسها المتين... حتى سفرة وائل ماكنتش عيني فيها اما قلت صغير خليه يتعلم اما انت لا مانحملهاش والله رزييينة يا وليد
- معاش تحكي هكا عيش بابا انت لكبير و انت راجل الدار ربي يطول في عمرك و يخليك فوق راسنا.. اما كلها من دباير وائل خممت فيها ظهرتلي موش بطالة الفكرة
- شوف امك من قبيلة في حالة لا فطرت و لا تعشات من لي جانا التلفون و هي تبكي بينك بينها كان خلاتك هي انا نقولك زينة
- هههه لطوف هذيكا دبارها عندي ...يا لطيفة لطيييفة !
- شبيك لحظة هاني نحطلك في السلاطة. .هذا الكلو جوع !!
- يسلم عليك قريد العش و قالي بوسهالي
- اممممممم هاكي السوسة والله هو لي لعبلك بمخك و خلاك تخلط عليه والله مانوريه اما تحلم كان نخليك تمشي
- أمي ؟؟
- مفماش مشي يعني مفماش مشي ياخي دموعي لي بكيتها على خوك لتوا لا نشفت تحب تعميني انت زادة !!
#انتي_سبابي #كرونيك #كرونيكات
الحلقة 36
-يا راجل قول كلمة مع ولدك ياخي باش تجلطوني راكم. .. عاجبك ليقول فيه !!!
-كان واقف قدام امو و دموعها و بوه و ترددو.. خزر لامو..امي علااه البكا عيش امي ادعيلي خلي ربي يحلها في وجهي...
-بوه كان مقهور و عارف دا ولدو اما يحبش يشد معاه الصحيح و يعطلو...يا مرا ياخي باش يستقر هو تو يجي في الصيف ديما و خمسة سنين شنو هوما...كبس عينيه و بخبرة سنين تلفتلو و تكلم..عيش ولدي يصلح
رايك لا انا لا امك متعرضين ليك اما...اما زيد خمم و كان شاد ااصحيح ربي يجيبك في ااصواب
-بابا و الله فيها افاق و فيها مستقبل...و بعد عليهم عينيه..و انا تيقرت من هالبلاصة و نحب نمشي...خليوني بربي نمشي مطمان علاه الشغبة...قعد قدامها على ركبة و نص.. لطوفة يا حنينة و الللللله كان جيت نجم راني بقيت اما قرايتي و نحب نخدم في دوماني و نكون..حب يفذلك معاها...زيد هاو باش يفضالك الجو عاد ههههههه ماك تقلي ملي ولدتك بوك نسا الكلام الحلو كهو رجعو شبابكم هههه
- قلب لام خبيرها و هي مستحيل يتوهها بكلمتين
دموعها تصب...وليد و راس ولدي لا نطيق مشيانك عليا انت زادة بالله لا تحمم قلب ميمتك ..عالاقل انت نرا فيك و نصبر بيك روحي على بعد خوك...لوج هوني على خدمة.. عيش ولدي ما تخليش برور و بحور تفرقني عليك يا ضو عينيا
-يا مرااا يا مرااا علاش هكا توا...خليه يرا مستقبلو و يمشي لخوه...و تو غمض عينيك وفاو السنين و يجي و تو يوعدني باش يهبط مرتين نشاله في العام...خزر لوليد..وليدي انا راني ساكت قدام رغبتك كان ليا ما تمشيش اما مدام مستقبلك في الحكاية برا ولدي يعليك و ينجيك
-امي شو بابا كي فهمني انت زادة عيش امي قول ربي يسهلك و ادعيلي دعيوة باهية و و زيد مع بعضنا باش تتهنى علينا..خليني نمشي نشوف حظي عيش لطوفة الغالية و خليني نشق طريقي لنا تخنقت امي و حطيت مخطط لحياتي
-تنطرت من بلاصتها...الله يهدي الي كان السبب الله يهدي الي ودر فكرك و شغل بالك وليدي..ما نسامحهاش و ما نسامحش الي من وراها انت هارب و مخلي بلاد كاملة وراك و قلب ميمتك ممعوس
-عض على شفايفو و تكلم بغصرة...امي امي امي قصصصصص عيشك...رااااااااني قراري و خديتو انا و وائل و مشيتي الكل خاطر نحب نضمن مستقبلي و نخدم و نكسب الفلوس ...يزي مالحكايات هذي خاطر لا عندها ساس لا راس...بلاد باركة و حالها واقف و انا الحمد لله الحاج طول عمرو مغرقنا في خيرو و لاباس علينا اما نحب ناقف على ساقي و نعمل على روحي و نرا دنيا جديدة..
- نعرف راهو كلام و برا نعرف الي يمشي غادي معاش يروح يخالط لقورة و ياكل ماكلتهم و يأخذ نساهم ياما نااس كلاتها الغربة و معاش حابة تروح نسات الدار و الاهل و الأصل و سكنت بلاد الناس .. ياخوفي يصير فيا كيما الناس يا خوفي من ولادي لا يخلوهاا بيا .. خمسة سنيين !! لاهم خمسة ايام و لاهم خمسة شهور راهو يدخلو ولد امس للمدرسة خمسة سنين راهي تعيش نااس و تموت ناس يا وليدي ...
-باهي لطيفة ما تحبش ولدك يرتاح...ما تحبش ولدك يضمن مستقبلو...فديت امي مالحومة و جو الحومة و زاد وائل مشا...و انا نحب نخدم بقرايتي لي تعبت عليها...و تهنا و راس لطوفة كيما وعدتك .ناقف على ساقي و نركز أموري و يكون وائل كمل قرايتو و نرجعو..وريني هاك الضحكة و سمعيني رضاك يا حنينة
- برا الله يرضى عليك وليدي و يهدي سرك انت و خوك اما راني من قهرتي نحكي خاطر ماحملتهاش في روحي تمشو من بين يديا ... باساتو من شعرو و هو زاد لز روحو لحضنها يحب يتخبى يحب يبقى لغادي مقهوووور يحب يبكي عند امو راحتو و جنتو... امي لزني ليك نحبك تحضني عيش أمي. .. قلب الام دليلها حاسة بوجيعتو و مقهورة لقهرتو دورت يدها و حشات خشمها في شعرو و بدات تبكي و تبوس مسكينة...تعشى و حلف عليها كان ماتاكل معاه خاطرها ماكلت شي كيما قال الحاج ...
في الوقت هذاك نعيمة كانت متولية المراقبة من شباك بيتها لي يطل على عتبة دارو و شافاتو كي دخل و خرج ... ساقيها اعلى من راسها جرية لايمان لي كانت في عالم الاحزان و المتاهات ..تفحعت اول ماراتها واقفة تتبسم في الباب. .
- نعيمة اش تعمل هوني لباس !!
- وليد روح...
- تنطرت من فرشها جات في وجها .. احلف !!!
- و الله لعظيم كان روح وصل بعد المغرب و تو تو خرج الظاهر ماشي للقهوة. ..
- اكيد مع علي مدامو روح ... نعيمة نحب نشوفو
- باهي ان شاء الله خليني نشوف اش باش نعمل ..هزت تلفونها و طلبت علي ياخي علق عليها شوي و عاود طلبها ..
- هاو علي يطلب لحظة ... الو اهلا علي لباس! ! بالرسمي وقتاه !! عاملة فيها ماهيش سامعة بمرواح وليد ...ايمان تنطرت جات لاصقة للتلفون ..امان علي وينكم انتم توا !!
-هانا في الستوديو..اسمعني نعيمة و الله على خاطر وعدتك هاني طلبتك ...هو جا باش يلم دبشو و يبقا مع دارهم نهيرين و بعد غدوة نشاله ماشي قاصد ربي للعاصمة مرة اخرى باش يتوكل نهار الجمعة الجاية
- باهي علي امان حاول تلهيه شويا فيما جيت انا و ايمان... عندها ماتقلو امان.
-نعيمة نعرش الي عملتو صحيح ولا غالط اما انا نعرف انو لازم تراه باش يحطو نقطة و كل حد فيهم يشد ثنية
-اي انا زادة هذاك اش قلت... بعدت عليها شويا خلاتها تلم في شعرها... علي عيش خويا اسمعني ايمان راهي تااااعبة و ممكن حتى تقصها مع كمال اسمع بيناتنا راهو.. تعرف في حالة من قبيلة و هي تنعي مافهمتلهاش ساس من راس... هانا جايين و تو نزيد نحكيلك
-تقصها؟؟؟هذي الي قالتلهم اسكتو...باهي باهي ايا فيسع ايجاو باش نلهيه على قد ما نقدر...
- عيشك عيش خويا ... ايمان هيا عيش اختي... عم عمار رقد ماهو !! ..عملتلها ايمان براسها اي و خرجو طشاشة... كي وصلو قدام الباب كان التردد باين عليها ..
- نعيمة.. لا مانجمش ...كانت تحكي وجها اصفر مفجوعة .... اش مازالي هوني يا نعيمة جاية نحير في لجراح لقديمة خليني نعاني وحدي نعاني و نتحمل و هو ربي يسهلو ... نعيمة فدت منها.... بربي جايبتني نلهث في هالليل و تو تقول في هالكلام !! تحرك خلينا ندخلو هيا !!
دقو الباب و هو خزر لعلي فادد...يييه شكون زعما...كان واحد مالاولاد وزعو من غادي لغادي ما عيني باش نرا حد...نحب نقعدو ترونكي انا وياك شوية و نعملو سهرية و نروح مشا علي يحل..هو كان متكي عالكانابي و ما يحس بريحتها كان استعمرت البلاصة..
للوهلة لولة يحساب روحو يتوهم لكن اول ما هز عينيه راها هي و بجنبها نعيمة...قام مفجوع وقف و خزرلها في عينيها...اخر حاجة كان يتمناها انو يراها...خايف من شوفتها و كان معمل يمشي من سكات لكن القدر باغتو مرة اخرى...تربث و بعد طبس لبنات شتعملو لهوني..خزر لعلي يعني راني شلقت بيك
- ماناش باطيين وليد نعرف الي خرجتنا في الظلام واحدنا ماليها حتى طعمة اما...اما حبينا نشوفوك ... إيمان حبت تشوفك...خزرت لايمان لي كانت كي الشليقة ذابلة لعينين محوقين و الوجه اصفر ... ايمان عزيزتي هاني لهوني وقت ماتحب نروحو... غمزت لعلي باش يخرجو و يخلوهم...
-قلبو كيانو و قوتو الكل تهدت..جاية و جايبة معاها ملح للجرح..جاية و جايبة معاها وجيعة للقلب...بلع ريقو و تبسملها...مقوى سعدي الناس الكل جاية تودع فيا..ههه ك..كنت باش نجي نسلم عليكم انت و الحاج
- بخطوات رزينة و شعور بالوجيعة ما ارزن قدمتلو .. وقفت بالضبط قدامو العين في العين بحركة ضعيفة منها يقودها احساسها الجارف و الغضب تهز يدها و تعطيه كف.. تحملها في روحو و سكت يحب يشوفها وين باش توصل... بعينين دامعين ثاقبين معبيين لوم و حيرة قاتلو ... باش تجي تودعني ؟؟ تجي تسلم و تمشي محلاك.. يعني ماتشعفش مالكذب !!! ماكش باش تنحيه هالقناع لي مكسح بيه قلبك !! انا جمعتين في جرتك و انت عامل بالعاني ... تحكي و تشالي بيدها لي مرة في شعرها مرة في دمعتها لي تمسح فيها ... يعني رخاص للدرجة هاذي إحنا !!
-غمض عينيه باش يسترجع شوية من طاقتو باش ينجم يواجه هالسيل الجارف متاع الوجيعة المخلطة بالحب المخلطة بالحنين المخلطة بالهروب...كبس بيديه في جيبو و بعد بعينيه...ما تلهيتش كنت عندي قضيات زيد الايام لف لف تي..تي حتى علي ليوما وين ريتو...لبو العرق..موش منجم يتجاهل قربها و دموعها وخر خطوة بحركة منو للهروب شوية من سيطرتها ...اما كيما قتلك كنت باش نجي نبقيكم بخير ...
-لا ماتجينيش .ماحجتيش بيك ..شكون قالك برا اغلط و سلم عليهم !! رد بالك تغلط رد بالك حتى شويا تخمم و تجي .. تحكي و تعمل و بصبعها "حتى شويا" ... انت اخترت ... بلعت ريقها ... و انا اخترت زادة اما فقت. . هو ماركزش ياااسر مع كلامها خاطرو كان يقاوم في رغبتو لي هيجتها فيه انو يحملها و يبوسها ... هي وخرت لتالي باش تتنفس براحتها خاطر ريحتو غلبت عليها... ربي معاك ...ربي معاك وليد و لفتت عطاتو بظهرها و عينيها ماقلتش نجف مالدموع...
-معدتو وجعتو و قوتو الكل وفات و هي تقول في اخر كلامها...جبدها من يديها و تكلم بصوت متقطع ..ما نحبش اخر حوار بيناتنا يمكن يوفا هكا...ما نحبش نمشي و نخليك متغشة مني...ايمان ..دورها و دموعها ذبحوه..سكت شوية رجع النفس و تكلم...نشاله ربي ي...يوفقك و رد بالك على بوك و على روحك
- ضعفت و هي بين يديه... امان وليد خل...خلييك ما تمشيش امممان.. نعرف الي انا السبب في هذا الكل و نعرف انكم ماخذين مني موقف اما والله لا تهون يا وليد... برحمة امي لا تبعد ...كانت تحكي ماكنتها الهستيريا قلبها يدق و يديها يرعشو... وليد عارفها باش ادوخ و هاذي حاجة متوقعة خاطرها عندها ضيق التنفس.. شربها الماء و بدأ يهدي فيها ...
--ترعش بين يديه كيف الورقة الي ميطرها الريح...قعدها على الكانابي...خزرلها بنظرة مكسورة و حزبنة..انت ما عندك ذنب في شي و صدقني منيش ماخذ منك حتى موقف..لازم نمشي ايمان تخنقت فديت...شبك يديه في بعضهم و خزر قدامو و بدا يحكي...تخنقت و تعبت..كل مرة نطيح انا مزلت نداوي في جروح الطيحة لولة و تجيني طيحة اخرى..خليني نمشي نجرب نعيش و نجرب نعمل حاجة تصلح في حياتي..خزرلها بنظرة عاشق يودع و قاعد يحط في اخر السطور...هنيني عليك و كون قوية كيما عرفتك ...
#انتي_سبابي #كرونيك #كرونيكات
الحلقة 37
و انت تجاهد و تجري و تفرض روحك...يمكن ساعات ما تفاهمناش في حاجات اما من داخل انا نعرف انك ديقوردية و تقد روحك...كي يفوتو سنين ..هالقعدة باش تتبدل و احنا زادة و معادش نجم يمكن نحكي معاك بالقرب هذا ..نحب نوصيك على بوك و على روحك خليك كيما نعرفك و اعرف وين تحط ساقيك..و الله مشغوب عليك انت و امي...نحب نسمع عليك كان الباهي و ربي يحميك و انا توا بالحق ندعي لربي نطلع غالط و يعيشك لاخر احسن عيشة نشاله يا ربي ...معادش نحبك تخمم انو حاجة صارت بسببك ولا انا ماخو منك موقف...يزي من تحميل روحك اكثر من طاقتك...
- عينيها معاش حاملين دموع يزيهم تحرقو في جرتها و هي نهار كامل تنحب... وليد.. هزت عينيها ... ماتمشيش. . خمسة سنيين الكلهم اش يعديهم. ميمتك باش تزيد انت تمشي و تخليها..قربتلو و شداتو من مرفقو تسأل فيه.. اخزرلي وليد انت تعمل في الحاجات هذي الكل باش تنحيني من مخك! ! تتجنب فيا و ماتحبش تحكي معايا لا في الطريق و لا في التلفون علاش !! عاونك الشي هذا باش تبعد و تنساني !! لا و زيد تحب تخرج مالبلاد جملة !! ياخي كارهني لدرجة تهج ..معادش باش نتقابلو و نحكيو؟ هذا الكل خاطر كرهتك في البلاد؟
-كبس في شفايفو و تبسم بالسيف...انا نكرهك؟؟ ايمان صدقني كان جات فما فرصة صغيرة باش نبقى راني ما قصدتش الغربة...فما حاجات نجمش نفسر هملك...مثلا ..مثلا...ما نحبكش تتغشش خليني نفرغ قلبي...دارلها عينيه ضايعة....ما نجمش نقوم و نخزر للسما و انا نعرف انك في دار اخرى...نجمش نجمش نقوم الصباح و نسمع زغاريد في داركم...ما نجمش..بلع ريقو..ما نجمش نبات و انت زافينك لغيري...يا ايمان راااااني ما نتحملش ناخو نفس في نفس البلاصة الي انت فيها اما تميلي و تستعدلي في دار غيري...نجمش نراك بصغارك...في البلاد هذي غير امي و باب بقالي كان قبر جداتي و قبر دفنت في ذكرياتي ...دفنت فيه حاجات تمنيتهم يصيرو و ما صاروش...منيش متغشش و لا نكرهك اما لازمني نمشي نتنفس بعيد...يلزمني برور و بحور باش كي نتوحشك و ما نلقاكش نسب البعد و الغربة ما نسبش الدنيا الي كتبتك لغيري..ضحك بالشوية...عالقليلة بعد خمسة سنين نولي نجم نبلع و نغص اما نعدي...نجم كي نراك نقول يعمبو المكتوب هههه المكتوب كافر يا ايمان...اوكا عندك في يديك خمسة سنين عرس و تبدل..نحبك الغمازات متاعك يتنحاو و خزرة عينيك المزيانة نحب تولي خااايبة اه و شعرك الاكحل سواد الليل اصبغو نحب كي نراك نقول اوووه مخيبها ههه تكا عالحيط و هي دموعها هابطة...نحب نقلك حاجة كي نجي بعد السنين هذيكة الكل و تراني و تسألني و نقل
-مسحت دموعها يلعنبوهم كي ماحبوش يطفو... انت لي علاه ماشي في بالك كي باش تبعد و تشق برور و بحور باش تزهالي الدنيا و تولي وردية. .. انت تو حكيت قلت مكتوب يعني المكتوب يدور و يقلب باارشا موازين يعني موش مشروط نعرس و ناخذ و ترجع انت بعد سنين تلقاني بصغاري...
-ههه تقول انت نروح نلقاك مزلت ما عرستش مزلت تكون ههه و نعاود انا نسافر باش ما نحضرش لعرسك و لفي بينا يا دنياههههه
-تخزرلو بكل حب الزح قداش محلاه و هو فاد و هو يكذب عليا و هو يتظومر ... قداشني معمية كنت يا ربي صبرني و قويني. . تنهدت. .. ماتدري عالدنيا والله كل شي جايز حتى الموت .. ممكن تروح ماتلقانيش في الدنيا...
تنطر من بلاصتو تقول ضربو الضو..وقف قدامها
اسسسس معادش تقول هكا...لطف عليك...باش تعرس و تكبر و تشيب و تعيش ايامات ما ميفهمش...بدا يضعف في صوتو...انا اعطيني انت فرحانة و ما يهمني في شي...خليك متفائلة و قوية و معادش تحمل روحك حتى غلطة و حتى مسؤولية...انا الجاجة الي بعدتني و مخليتني ماشي و مطمن هي اني نسمع عليك كان
الباهي...رددد بالك مزلت تعاودها...تصيرلك اقل حاجة نموت ايمان ...روحك مهيش ملكك وحدك لازمك ترد بالك عليها و الي يبردلي قلبي اني كي نجي نحب نلقاك عايشة كيما انت تسنتاهل خاطرك تستاهل...مماتي قبل كي كنت نبكي خاطر عصفوري طار و ما رجعليش..قتلي نهارتها وليد في الدنيا هذي كي تحب حد و تحبو معاك...كيما انت تحس بالفرحة كان معاه هو زادة يحس بفرحتو مع غيرك...كان جا ليك راهو بقا معاك...قربلها و شد خصلة من شعرها و عينيه مبحرة بالدموع...الي يحب ما يلزموش يكون اناني و انا نتمنالك كان الباهي ايمان...نحب العينين هضوما يقعدو يضحكو ديما...ردلي بالك على روحك
- و..ولييد.. بلعت ريقها تحس في قلبها باش يخرج من قربو ليها و ريحتو لي تغلغلت في خشمها... هزت عينيها لعينيه لكبار لحمر مالدمع.. عينين مستحيل تكون كان حبت بصدق...تتنفسلو في وجهو بنفس دافئ و شفايف يرعشو ..ولييد ...'
-صوتو ولا يرعش و هي قريبتلو و بين يديه...ولا يتنفس بين الحرف و الكرف..تكلم بصوت قريب للهمس...قربلها لين المسافة بيناتهم ولات ما تتسماش...صوتو كان متناغم مع
رعشة بدنو...ايمان نحبك ايمان ...عمري لا حبيت و لا باش نحب غيرك و حتى مرا ما باش تتجرأ تاخو بلاصتك القلب تسمى عليك...نحبك ايمان اكثر من كرهك ليا..نحبك اكثر من قلة بختي في هالدنيا...نحبك اكثر مالليالي الي مزلت باش نعديهم موجوع عليك...و الله لو يكون اخر نفس في عمري تبقى انت في قلبي و مستحيل تغيبي...هز يديه بحنية على وجها...باش نتوحشك باش نموت من بعدك باش نكره روحي خاطر باش نعيش مع طيفك...انت الوحيدة الي معاك يتفسخ كلشي و يقعد كان هالقلب ينبض باسمك...هارب منك ليك...هارب منك و عارف لو كان اخر الدنيا باش يبقى وجهك دليلي...ايمان...ايمان ايمان ههه خليني نشبع من اسمك...حط جبينو على جبينها...باش يهزك المكتوب و هذي اخر مرة نجم نراك فيها هكا...طبس بشفايفو الي يرعشو و بدنو المخدر...سامحني ايمان علي باش نعملو...مزلت باش تجاوبو و هو دفن راسو في رقبتها و يديه على ظهرها...
هي مالربثة ماعرفت ماتعمل اصلا اش عندها تعمل و هي بين يديه و اخيرا بين يديه...تشوف في المسافة تتلاشى بيناتهم..نظراتها و نفسها خانوها ترهوجت و غمضت عينيها. ..و ماتحس كان بحاجة سخونة على رقبتها... احساس غريب اول مرة تحسو موقف اول مرة تعيشو و الاحلى من هذا مع وليد... كبست على عينيها مالوجيعة لي عيشهالها و هو يبوس فيها من رقبتها... وجيعتها مخلطة بين شفايفو و لحيتو لي هبلتها و هي تحس بيها ادق..حست بوجيعة في كرشها استحلاتها موش فاهمة اش قاعد يصيرلها معاه ... استسلمت ليه و مامنعاتوش الحاجة لي خلاتو يزيد يتمادى معاها لشفايفها لموردين لي يرعشو و ينطقو بأسمو..و..ل..ي..د...ولييد ..صوتها و هي ذابلة العينين بين يديه زادو هيجوه ..زاد لزها ليه من مسلانها و دزها عالحيط و غطس في شفايفها يبوس بكل لهفة قداااش ليه متمني هاللحظة معاها.. صوتها و هي تنين بين يديه و تفرفط مامنعوش يزيدها عضة صغيرة على شفتها الفوقانية...حست روحها الفوق طايرة للجنة مجنحة عايشة لحظتها مع الراجل لي بهذل بحالة قلبها و سهرها ليالي صحيح توجعت منه اما يهون المهم عاشت الحب معاه كي تقوى عليها أكثر بدات تنين بالشوية و تحكي بصوت متقطع ... اماااان .. يزييي ..ا..ماان...و.ليد..وليييد .اررحمنننني... تفارع فيه بيدياتها الصغرونات و ادز فيه من صدرو مش نفور منو اما يزيها معاش تنجم تتحمل تحس في روحها سخنت و هاجت معاه اول مرة تحس الإحساس هذا عمرها لا عاشت لا بوسة لا شي اما المرة هذي جاتها أقوى من ما كانت متوقعة.. هو كان في عالم آخر عالم مافيه كان هو و رغبتو الجارفة و معشوقتو لي طيراتو ببوستها لولة لاحلى مالشهد ...يعرف روحو غلط و ياااسر كثرلها اما ضعف الله غالب ضعف قدام شهوتو و تعدى لحدود معاها... مافاقش غير بلمستها على صدرو و هي ادز فيه و تقولو .." ارحمني " ..
- ايمان نتمنى نبقى حاجة سبيسيال بالنسبة ليك يا عمري ..نحبك تنسى كل شي خايب عملتهولك حتى..حتى لي صار قبيلة نحبك تنساه... اما خليك متذكرة كلمة مني و الا ضحكة تخليك كي تتفكرني تتبسم. .. اخخخ اش باش يعديهم في بعدك و من بعدك ..حلت الباب و هو شدها من يديها..قبل ما تهبط هات نعطيك رقم جماعة الستاق ...هز راسو لبيتها...قلبو تمعس...رجع صوتو مكسر و معادش فيه...قلها بنبرة ترعش..اخزرلي...تلفت اخر مرة و اخزرلي..تلفتتلو لقات دموع محصورة و وجهو مغصور..." ربي يهنيك " لفت وجهو باش يمسح دمعة غدراتو في الظلمة...
- تعرف كي يبدى المكتوب قايل كلمتو زايد لحديث و زايد اي كلام و الا ملام ... كلامك باش يبقى في وذني نوعدك نتفكرك بالباهي بالرغم تو كي فهمت إلى الكلو باهي لي عملتو على جالي قبل. .اما. ..تنهدت .. فما حاجات مانوعدكش بيهم و تو كان قدر و سمعت بيهم تو تفهمني...كانت تقصد باش تقصها مع كمال ماحبتش تقلو خاطر قطعت آخر امل يمكن يخلي وليد يرجع لحبها و يرجع في قرار سفرتو اصلا هي بعداتو...
-ما نحبكش تمشي...هاك الباب نحبوش يتسكر..تنهد...تو بالحق سيا؟؟؟
-كان فما باب تسكر راهو عليا...انت باش تبعد اما باش تتحلك بواب الخير ان شاء الله..نحبك تخدم و تكون و تعمل الي تحلم بيه...يمكن اول مرة نقولهالك اما انت راك سيد الرجال و تستاهل تسافر و تحقق الي تطمح بيه ..ما تخلي شي يحبطك راك تستاهل فرحة الدنيا الكل...وليد نحبك ت........حط ايديه على شفايفها..يزي برحمة ميمتك خليني ناقف عند اخر كلمتين خليني نعدي بيهم الباقي الي مزال من عمري ..اقسم بالله يا ايمان نحبك و لا عمري باش نحب غيرك...تو برا اهبط خليني نبقا نتفكرلك اخر كلمتين قلتهم...
- ربي معاك وليد ... و سامحني مرة أخر
#انتي_سبابي #كرونيك #كرونيكات
الحلقة 38
هبطت و وقفت عند العتبة تاع الباب تشوف فيه ...كان يخزرلها في الريتروفيزار يملى في عينيه منها و هي واقفة غايضاتو كيفاش ذابلة كيفاش دمعتها ماكفتش زعما هذا الكل خاطر حاسة بالذنب و الا .. و الا حاجة أخرى !! لا مايحبش يخمم في حاجة أخرى خاطر باش يتعب. .كاهاو يا وليد قررت موش في اخر لحظة باش تبطل على خاطر توهمت انها حباتك تبقى و..و ممكن تحبك.. هههههه تحبني !! لا عاد موش لدرجة تحبني مستحيل ايمان تحبك يا..يا فاسد... دينارا و خلاها واقفة ..
- ايا عيش اختي خلينا ندخلو قبل مايشوفنا حد والجيران..دزت الباب و دخلت. .تمظت على فرشها و عينيها في السقف. .
- ايمان .. اش باش تعمل تو !!
- غطت وجها بيدها و مسحت عليه... شي يا نعيمة شي... شنوا مازال يستاهل نعمل حاجة على خاطرو.. وليد و خسرتو شنوا فيه ربح مازاللي بعدو ..
- و كمال باش تقصها معاه !!!
- كمال عمرو ماكان حاجة مهمة في حياتي و عمري ما حسيت بشي ناحيتو ..الله غالب جاء في وقت و سد الفراغ لي كنت خايفة ياخذو وليد. .. و الاهم ماحبيتوش والله حاولت تقنع روحي فيه و تقول ان توالمو و تحبو اما شي ماصار شي.. كاهاو كل واحد على روحو ربي يطيحو بماخير مني ...بفففففف راسي باش يطرشق...
- و وليد !!
- وليد..وليد..وليد.. ربي يجيبهالو زينة ... تعرف عمري ماشفت وليد جدي في حكاية كيما حكاية السفر و البعد.. نعرف الي الكل بسبتي و هروب مني باش ينسى و هذاكا اش باش يصير لازمو ينساني لازمو يوالم ...
- انت اكيد هبلت !!! يعني باش تقصها مع كمال و باش تخليه يسافر !! لا عاااد هاذي قالتلهم ارقدو. .
- اخزرلي نعيمة .. رد بالك ..رد بالك تجيب سيرة لحد رااك وعدتني
- تكذب ماوعدتكش
- اي اوعدني توا !!
- امااااان امونة براس امك برحمة طا خديجة لا تعمل هكا علاه تحرم روحك مالفرحة علاه ما تعطيش روحك فرصة اكيد يسامحك وليد و يفهم حبك
- نستاهل لي صاير فيا خاطرني. .. عملتو بيديا خليني نتحمل دغوفيتي و غفصاني في الفارغ ...صحيح لي قال لعناد موش للمرا و شوف عنادي وين وصلني ... و كانك على وليد خليه يعيش يزيه ما مرمدتو...
- هو يحبك والله يحبك يموت فيك عمرو مانساك و موش ساهل ينساك يا ايمان راهم عشرة سنين و هو يحب فيك و يعشق باش يجي تو يقلك ننساك و كذا !! انت برالو و قلو و تو تشوف والله يسلم في الدنيا و يجيك
- ااااااه يا نعيمة هاك قلتها صعيب ينساني اما موش مستحيل. .. بربي اش نمشيلو عيش اختي ..ماتحكيليش عالكرامة في الحب خاطر انا مانحبش من منطلق كرامة اني نحكي من حشمتي منو كي نمشيلو لازمني نعمل حدود لتصرفاتي معاه خاطر يااسر ظلمتو معايا و تو كان باش نمشيلو باش نكون أنانية و عملت كان لي يرضيني انا و لي يريحني انا هو في وقت اللي قالي نحبك و ناخذك و ماتتهني كان عندي انا رفضتو و عايرتو بحاجات ماخطرليش يجي نهار و يتوب عليها و يهديه ربي و يبعدها...
- الله يهديك ..الله يهديك. .. طيشت شالها بغل عالفرش و قامت ... انت مافيكش فايدة و تو تندم .. طفات الضو و رجعت لفرشها
- الندم موش حاجة جديدة عليا... هكا قالت و سكتت .. هي مارقدتش ما غمضتلهاش عين اما ساكتة ماقالت شي. ..
من غدوة قامت بكري لفت قضية الدار خاطرها غدوة تخدم ماتحبش ترجع اصلا معاش باش ترجع خاطر باش تبطل من الخدمة و مولى الخدمة ذات ..
- الو
- اهلا ايمان صباح الخير
- هاني نسأل على أحوالك
- هههههههه و الله عندك الحق مغششة مني تلهيت عليك المدى لي فاتت تعرف خدمة و زيد انت الكونجي فسدت البيعة الكل ...
-كمال فاضي نشوفك لعشية !!
-اي تحب نتقابلو لبرة ! نجي نهزك نفطرو لبرة ؟؟
-لا لا لا تو نجيك انا للمعمل ..امتا تفضى
- اممم لعشية موخر مع الستة هكاكا
- باهي ستناني. ..
علقت... تلفتت تلقى نعيمة تضحك
- والله فرحانة لي تشجعتي و خذيتي القرار هذا
- كاهو لازم... هيا خلينا نفطرو. ..
طبعا قهوة الصباح ماتحلى كان في القهوة تاع الحومة العربي وين ريحة البن و شيشة التفاح و عياط صطوفة و ضحك ولد ناحية و تفريك علولو و فازات حمزة و المولدي لحول. .. عباد تعدات في حياة وليد بحلوها و مرها ..كان قاعد هايم بالجماعة لي محلقين معاه...
- ااه حومة كاهو Paris mon amour
- ههههههههههههه كاهاو صاحبي ان شاء نشوفك غادي في حرقة. ..
- وليد تو انت اش باش تعمل غادي يعني فما خدمة
- اي ركحت لأمور الحمد لله و وائل من غادي ينسق ههه
- حمزة في يدو شيشة و لكلو دخاخن .. يا ولدي هذا الخو والا لوح ..تي انا خويا الطحان من لي عرس بالق.... مرتو قصت عليا الماء و الضو. . آخرتها قاتلو معاش يساعدني خوك في داري. .. تخيل و الدار لي بانيها بعرقي باش عاونت عزاه تجي هي تخرجني منها قال شنوا داري هههههه
- قسوات صاحبي ... تلفت ولد ناجية لي علي لي كان يعزوه يقبل لعزاء ... عليوة شبيه صوتك سمعنا حويجة
- برا فوتني ولد ناجية مش ناقصك. ..
- ههههههههه هذاك حارقو لحليب على وليد ... يا ولدي مديدة و يرجع ياخي باش يعمر غاد
- وليد يا صاحبي يا عشيري والله ماني حابهالك هالسفرة من أساسها بفففف
- شنوا تو علي باش نبقو نمضغو في نفس الهدرة مرة و اثنين و ثلاثة !! مانا قلنا عاد و انت الوحيد لي تعرف اسبابي. ..
- الزح ياخي ساهل عليك تخلي العشرة و الصحبة و القهوة و عروسات الحومة و جوها و العرك مع لحوم لخرين .. نسيت الحاج و كسكسي فضيلة و الكانكيري
- مانسيت شي ياخي باش نموت انا !! ماهو مديدة و راجع و كان ماعحبنيش الجو نقص طول باهيشي هكا. .
- اطرشق حمزة بالضحك... يا علي صاحبك نسى حاجة أخرى هههههه باكو المالبورو تاع منيرة الهجالة
- ههههههههههههه ضحكت الجماعة الكل و تلاشى شوي التشنج لي كان معكر القعدة. ..
- ايا علي قوم قوم الحاج عادك بيه سبقنا الكانكيري
- تي برا قود
- عرفك راني احشم لعنة الله عليك هههه.. في الثنية كملو حديثهم لي كان يكسر راس وليد
كان الطقس مخيبو و زاد غيم بعد العصر.. رمل و عجاج و دنيا مسحبة كان موش جوان تقول باش تصب لمطر..
- ايمان خليني نمشي معاك هاك تشوف في الدنيا البرة
- لا نعيمة انت ابقى هوني لين نجي مانبطاش نفيص ساعة كان طارت و نكون بحذا اختي. ..بابا في الجامع نتصور نروح قبل ما يخرج ... عيش اختي حط اللوبيا عالقاز ..
- باهي برا و ماطبطاش ..رد بالك على روحك .والله كان خليتني مشيت معاك
- ايا ايا ادخل عجاج عليك ... طارت تزرب اول ما عملت الدورة تلامحها وليد بين و بين روحو "" وين خارجة هذي في هالعجاج !! "" بعد كمل ثنيتو خاطر شافها دخلت الصيدلية مشى في بالو تشري لبوها في الدواء
#انتي_سبابي #كرونيك #كرونيكات
الحلقة 39
كان الطقس مخيبو و زاد غيم بعد العصر.. رمل و عجاج و دنيا مسحبة كان موش جوان تقول باش تصب لمطر..
- ايمان خليني نمشي معاك هاك تشوف في الدنيا البرة
- لا نعيمة انت ابقى هوني لين نجي مانبطاش نفيص ساعة كان طارت و نكون بحذا اختي. ..بابا في الجامع نتصور نروح قبل ما يخرج ... عيش اختي حط اللوبيا عالقاز ..
- باهي برا و ماطبطاش ..رد بالك على روحك .والله كان خليتني مشيت معاك
- ايا ايا ادخل عجاج عليك ... طارت تزرب اول ما عملت الدورة تلامحها وليد بين و بين روحو "" وين خارجة هذي في هالعجاج !! "" بعد كمل ثنيتو خاطر شافها دخلت الصيدلية مشى في بالو تشري لبوها في الدواء. .
- عسلامة اختي
- تفضل مادمازال ..حكات معاها و خرجت مصدومة مالكلام لي سمعاتو و مشاتلو و في يدها اكبر سبب ينجم يخليها تفصلها معاه...
كي وصلت لقات الخدامة كيف مروحين سلمت عالجماعة لي تعرفهم و دخلت تلوج عليه ..طلباتو ياخي قلها تستناه في البيرو عندو قضية في الديبو يكملها و يجيها يحاول مايبطاش... ستنات ربع ساعة نص ساعة ساعة كاملة و هي ماشية جاية فدت و زيد الدنيا ظلمت. .علقت خاطر عمرها مابطات اللهم جاتها خدمة اكيييدة... خرجت تلوج عليه خاطر تطلب فيه يطلعلها مشغول ..هي تمشي و الصوت يقرب صوت ضحك الظاهر يحكي بالتلفون طمانت كي سمعت صوتو و زدمت باش تمشيلو
- هههههه يا ولدي مالا راحة منو اش نكره ...... المنظر
-.......................
- بالرسمي !!! محسوب تو يظربني عالطيارة لي حاجتي بيه ولى عندي اما مانيش ناسي الكف لي عطاهولي والله لتوا لا بردتها و يجيه نهار و يرجعلو
-.............
- ماتابش الطحان من نهار الخربة اما صحة ليه جاتو في جمعتين ربطية اما ايمان تعدت عليها. .تخيل كان باش يطيحلي اللعب الكل في الماء كان باش بأثر عليها و هي كالبهيمة تصدق طول اما جاب ربي كلمتهم و هدو عليهم طول ... ايمان تسمع و لتوا ماكذبة وذنيها تحس في روحها لبها لعرق و تخنقت ..قلبها باش يخرج و هي قدام مكيدة تحاكتلها من الإنسان لي اختارت انها تكمل حياتها معاه رغم لي قالوه اما عملت فيها وذن عروس و كملت معاه. .. مانعرفش منين جاتها القوة اتدز الباب و تهد عليه. .
- كماااااال ؟؟؟؟؟؟؟ وجها كان مغصور و عينيها كانو يشعلو غل و غزول عليه
- لا...او.. تو..نككلمك بعد..علق مربوث تصدم كي لقاها قدامو. .. عزيزتي..ايمان بطيت عليك ممم ... من وقتاش انت هوني! !
- من لي تحكيلو على الخربة و كيفاش انا بهيمة و نصدق... اما والله بالحق انا بهيمة
- فاش تحكي هههه يا بنتي تراتش كلام انا و زياد يفرك فيهم علولاد متاع الح. ..قصت عليه
-مزلت تتلعط و تكذب...قدمتلو و هزت يديها تحكي..ياخي مزلت تحب تدغفني اكثر من هكا...يعني انت ورا حكاية ربطية وليد!!!شدت راسها...يا ربي وين كان مخي يا ربي راهم نصحوني..عاودت خزرتلو...تو تحس في روحك عبد هكا؟؟ تحس في روحك عبد كي تخون ثفة ولية و تلعب بالناس...
- يا بنتي راك فاهمة بالغالط ..مزال يحكي بربثة و العرق يصب منو... اما وليد !!شكون وليد ؟؟ عزيزتي راك فاهمة بالغالط... (خليها تحكيلو عالدواء كيفاش سألت عليه و طلع موش متاع سكر و انو طلع يتعاطى و يزرق )
-عينها يشعلو ....خزرتلو بخباثة....هاك عارق تطلعش السكر طاحلك؟؟ هزت يديها...وينو دواك متاع السكر امشي اشربو..اما فيبالك الي انا سئلت الفارميان و قتلي مهوش دوا سكر...علات في صوتها...تستهبل فيا يا كمال...تزرق و تتعاطى و تقلي دوا...يعطيني داااااا انا الي صدفتك
- اييييييييييه شبيك تصيح يا للا !! و هبط يدك هببببط... نزرق نسكر نهمل و نفعل لي يظهرلي انت اش دخلك امك جاية تحاسب فيا !! لحظة انت غايضاتك روحك والا غاضك الطحان وليد !!
-هزت صبعها تحذر فيه...امي تجبدهاش علسانك يلي ما تحياش... وليد و امي نبهوني منك و انا ركبت راسي...امي جاتني في الحلم و قتلي الما الي يشرب منو كمال موش صافي اخطاك...و وليد جاني الحقيقة و قلي ..اما انا تعنيت و ربطت روحي بواحد كيفك...ياخي تحشمش على روحك...تعمل في الصنايع هذي الكل و جايبها خطبة و سترة و عقولية....زيد وليد هذاكة راجل و سيد الرجال موش محتاجني باش نخاف عليه...انت حاطط كلاب تخدم فيهم و تبعث فيهم الناس خاطر تنجمش تعمل شي منغير كلابك..
هههههههه زايد وحدة قعرة و ماتعرفش تحكي مع اسيادك. .. تو براس امك انا كمال الحوات باش نملى ايدي بوحدة كانت صانعة عندي! !! لا و زيد ميت فيها ولد حومتها الباندي لي عامل فيها بطل و باربو عالعباد اما انا عرفت كيفاه نكسرو عرفت منين ننخرلو عظمو و وصلت للي حبيت عليه.
و هانو باش يهج مقهووور ... شو كيف تخزرلي مبهمة يزي امانك راك تفددني "بالبراءة" متاعك
-وليد شعرة منو أغلى منك يا خامج...و الصانعة تخدم بعرق جبيتها...و الله لا تحياها زايد تحبوش المرا انتوما تحبو كان التمرميد...و الله لا تجي راجل و الله...من كثرة الغش تهز يديها للسما حبت تقلبلو وجهو بكف باش توريه النسا اما...
- شوف الق...... باش تضرب !!! تهز في يدك و باش تعطيني كف !! و شنوا قتلي موش راجل هههه انا موش راجل ؟؟ مسح على خشمو و شد كركرها من شعرها و هي تصيح ..تو نوريك الرجال اش تعمل يا هاملة ... زعما زعما قلت مانخسرش نحل سرت سروالي على وحدة قعرة كيفك اما طلع لسانك أطول شعرك ...
- سيبني كمال سيبنييي ... ااااااه هبلت ياخي !!!!!
- هههههههههههههه مازال تو تشوف الهبلة على أصولها... جيتني بساقيك ههههه اي حتى الخدامة شاهدين على دخولك قدايا
- اش تقصد اااااه امان سيبلي شعري برأس امك سيبني
- تحب تعرف اش نقصد !!!! .... خطفها من يدها و طيشها عالكانابي لي في بيروه...باش تعرف كيفاش تحكي مع اسيادك يا هاملة...كانت تشوف فيه كيفاش تحول في لحظة لانسان واحد آخر بوجه آخر عمرها ما راتو في كمال بللي كانت تتوقع يكون بزناس يكون نسونحي يكون اووفر اما موش انو يشرب قدامها و عمالو و يقربلها عينيه حمر و ريحتو بالشراب
- ابعدني ... براس امك فيق ياخي شارب !!!!! كمال ؟؟ والله كان تزيد خطوة نعمل سبة في روحي ولا والله نقتلك انت ... تحكي و تصيح و الخوف ماليها ماعرفتش اش تعمل تحس في موتها قرب موتها لي يتمثل حتى في لمسانو ليها خلي يا يتعدى عليها
- اقتل عاااد هيا ايجاني و اقتلني ههههههههه اقتلني بهاكي ليدين الضغرونات لبيض هيا عاد .... شدلها يديها و بدى يعدي فيهم على رقبتو و صدرو و وجهو وهي تحاول تتملص منو متقززة منو و خوفها زاااد ... تعرف الوحيدة لي مازلت ماذقت منك شي !! حتى جرد بوسة حرمتيني منها و انا مصبر روحي على هاكي الشفايف لموردين و هاك لبدن و هاك الدريار ااه. .. عض على شفايفو بحركة مقززة و برك عليها يحب يبوسها من رقبتها كانت تصيح تحتو و تفارع فيه اما كان أقوى منها و زيد شادلها يديها. . كانت تموت الف موتة كي يعدي شفايفو على رقبتها و الا يتنفس فيها ...تفارع فيه بريحتو و حيوانيتو و سقوطيتو و تلعن في روحها الف لعنة خاطرها عداها عليها. ..
- الله يهلكك الله يهزك لله ينتقم منك ااااه سيبني سيبنييي ااه ااه. .. وليييييييييد وينك يا وليييد...والله ياما يقتلك والله يشرب من دمك. .امان كمال سيبني برحمة امي سيبني. ...دموعها شرتيلة على خديها
- يا ولييييييييد يا وليييد ههههههههههههههه شوف هاك سوبر مان عاد لي تنادي عليه يا بنتي باعك وليد سايي نساك نحاك من مخو و زيد كي باش نشبع بيك تو باش يزيد يمقت بيك و يتقزز منك
- حرام عليك والله ربي تو يرزيك في عمرك يا ساقط يا واطي
- سككرر ام فمك ... دورلها وجها بكف فلقلها خشمها بالدم. .. تحلم كان باش ينسى في بالك باش تسلم فيك و نضيع الفرصة لي جاتني هههههه والله نتخيل من تو في وجهو كي باش يسمع بيك حليت ساقيك ليا ههههههه.. اوووو سكر بربي لا عاد تتدمع و تنوح على راسي خليني عامل كيف ...
- يا طحااااان ماكش رااااجل والله ساقط و مريييض ... تتملص منو و كل مرة تخبشو من و جهو و الا تضربو بمرفق ترا كيفاش لقات فرصة و خطفت روحها منه هي جات تمرد على ساقيها للباب ياخي خلط عليها و شدها من مريولها لي تقطع على ظهرها ماكافاهش هذا الكل زاد نزل على ظهرها بالظرب بخيط تاع ضو. ... يا كلبة باش تهرب !!! قتلك و نعاودهالك ماكش خارجة من هوني كان مانذوق السلعة يا سلعة. ..
- كانت تحكي و صوتها مخلط بالبكاء و الخوف و كانت داهشة ... يخيروني بين انك تحط يدك لمسخة عليا و بين الموت نختار الموت حتى محروقة ولا توصل للوسخ لي مخك .. زادت ماتت بالخوف كي راتو هايج عاللخر و يحل في سروالو ناوي على لي في مخو. .. تربثت و زادت في صياحها لي ماخلطش للباب تاع البيرو بحكم المعمل كبير على تلفيتة تتلامح لوحة كيما مودال جديد لوح للمابل ماتعرفش كيفاش وقت قربلها خطفتها و عطاتو بيها على راسو بحرارة دمها تضرب و تعاود فيه لين دمو يفيع و تشوف فيه دايخ اما مازال يحكي و يمهمه في كلام موش مفهوم .... طيشت اللوحة و بدأت تموج في البيرو كالمجنونة تلوج على تلفونها و هو مزال يستوعب في حالتو. ..
- والله تو ..تتشوف يا ق........ يا.....
- تففوووووه عليك واحد مريض حيوان والله ياما اندمك يا واطي والله نسيت الي انا بنت حومة عربي !! بنت اسيادك و بالف راجل يا خامج ريحتك بالخمج تفووه ... هزت تلفونها و ليخت كالطشاشة مسكينة موش مصدقة منعت و منعت شرفها من اكبر مصيبة تنجم اطيح على رأسها ..وصلت للكياس الرئيسي كالبهلولة تجري و تتلفت وراها مازال في مخها كالكابوس لي يلاحق فيه
<><>
<><>
#انتي_سبابي #كرونيك #كرونيكات
الحلقة 40
تجري تلم في بقايا الشلقتين لي مازالت ساترة بيهم روحها بعد ماضرباتو ضربة عوقاتو بيها ... ماتشوف في شي تجري برك تجري هاربة منه مصدومة و ماتفيق كان على تزميرة من كرهبة شعرة لا دخلت فيها و نفضتها..
ايمااان ؟؟ هبط علي يجري مسكين ترهوج ماعرف مايعمل يشوف فيها في الحالة هذيكا لا فهم يقدم و لا يظهر و هي شبه عريانة منفوق
-(كانت ترعش) ع...علي ...علي عيش خويا هزني هزني بعدني من هوني
-ب..باهي.. انت شبيك..وين كنت.. اطلع اطلع ... زاد دخل بعضو و هو يشوف فيها تتلفت كاينها هاربة من حاجة و اكيد هاربة مادامها في المنظر هذا و تقريبا فهم كل شي
-علي امان الله يستر على وخياتك هزني (كانت بين كل حرف و حرف ترد النفس..لافة على جنابها لكن هيهات دبشها كان مقطع ) علي امان راني منعت بالسيف...راني منعت مالهاوية و ربي بعثك ليا ...امان امشي لا يخلط علينا امشي
- في الكرهبة يسوق موش عارف يركز عالكياس ولا عليها في الريترو وهي تبكي حاجة يدها على فمها. ...عيش اختي شبيك شكون لي عمل فيك هكا شكون لي ضرك شكون .. اصلا انت وين كنت !! موش طريق المعمل هذا !!! وينو خطيبك شبيك وحدك .... ووووووه يا ربي انا سايي معاش حامل انطق يهديك...
-(تحكي بالشهقة) حب يضرني و الحمد لله ربي نقذني منو (تمسح في دموعها بيديها الي ترعش) هو ...هو الي نبهتوني م...منو و انا ركبت راسي ...بدات تضرب في روحها) انا ديما وحدي ديييما وحدي ..كان ما جيتش وحدي ما يوصلش كمال الكلب يخمم يعمل فيا هكا ..رجعت تضرب في روحها ...انا وحدي خاطر حتى الي كان سندي و ظهري و حاميني بعدتو بيدي ....ااااه يا علي يا خويا راني باش نموت
- يعني كمال ....!!!ضرب عالفولون ...علاش علاش يا ايمان رانا نبهناك رانا عيينا و نحن نقوللك اخطاك منو والله انا نستنى فيه يعمل غلطة باش نشنع عليه اما ماتوقعتهاش تجي فيك الله لا تربحو الساقط
-(دموعها ما كفتش) موش ذنبك و موش ذنب حد...هذا ذنبي انا الي بعت الي شاريني و والفت الي جا نهار و غدر بيا...راني منعت بالسيف يا علي راني ريت جهنم بعيني...(تشهق) علي امان نجمش نروح لبابا هكا ...ما نجمش نخزر في عينين بابا و انا هكا...
- باهي امان عيش اختي اهدي. .هدي روحك. . نهزك للستوديو و غادي نشوفو حل للمصيبة هذي.. و خط واحد بسرعة تفجع كانو قدام الستوديو. ..
-عيش خوا يا علي و الله مزيتك لا ننساها...(كانت مهدودة)
- خوذ هالفرش حطو على كتافك. .. هاني جيتك لحظة... خرج يزرب لقى سطل الزبلة في صدافتو ضرب نطرو من قهرتو عليها و على صاحبو وعشيرو كي باش يسمع لخبر
هز تلفونو و طلبو يرعش. ..
-اه سلعة شبيك؟؟
-وليد انت وين ؟؟كان صوتو مكبوس
-شبيك ترعش؟ اش من عملة المرة هذي هههه...في الدار يا صاحبي توا روحت
- ايجاني للستوديو ....هو يعرف الي للستوديو مايمشولو كان اكيد فما مصيبة صايرة...ماتبطاش عيش خويا
-ههههه و الله عرفتك؟ تقليش تقويت عليها قتلتها هههههه راك ما دام في الستوديو عارفك راني....نجيب معايا المحامي ؟؟
- اش خص يا صاحبي اش خص كان لي صاير وحدة من عمايلنا اما .. تي الزح حرك ترمتك و ايجا عاد... علي ماعاد عارف مايقول
نصيف ساعة و وصل هبط استغرب كي لقا الباب مردود متاع الستوديو موش مسكر...مزال باش يدخل و علي عرض
-صاحبي شفما (بدا يظهر عليه التوتر)
- وليد.... علي عاض على بونيتو و وجهو مغصور قدملو جبدو حملو بالقوي. .. وليد ايمان....
-(قلبو رعش) شبيها ايمان ...(علي مزال ساكت و هو شدو ) تي تكلم تقطر عليا بالحرف ..عيش خويا شبيها ايمان فجعتني ..
- ادخل... دز الباب يبدو و دخلو ليها وين كانت لامة ساقيها و حاشية راسها بيناتهم و تغرد
-(ملي دخل عينيه ترشقت فيها ..ما فهم شي..مهمه) اي..ايمان؟؟
- هزت راسها ...وليييد...جراتلو بفرشها تجري دفنت راسها في صدرو و طوقاتو بيديها و قوات في البكية. ..وليد ..وليد..انا..شوف ..اش عمللي شوف.. طيحت الفرش من عليها وبدأت توري فيه. ..علي خرج و خلاهم تخنق...
-(الدم جمد في عروقو..موش عارف يحاوطها بيديه ولا يفهم الحكاية ولا يحاول يستوعب الكلام الي قاعدة تقول فيه...على طول ماهي تحكي و هو باهت جامد واقف يخزرلها و يسمع و قلبو دم....كملت حكاتلو و زادت قوات في البكية يديها محاوطة ظهرو...لكن يديه ما تحركتش ما طاوعتش قلبو المرة هذي...يديه المرة هذي تمردت و عقلو قال لاااا.....بعدها عليه و رغم انو حس بالبرد لفحلو بدنو و رغم انو كان يرعش عليها اما بعدها
- مازالت مافهمتش علاش بعدها كملت تحكيلو .. انت للمرة الالف تحكي كلام و يطلع صحيح ..انت ديما صحيح وانا..انا الغالطة انا البهيمة اليوم من باهمتي شعرة لا مشيت فيها. .بدات تضرب في بدنها لين طاحت عالقاعة حطت يدها على وجها لي ينزف من الكف لي كلاتو من كمال فلقلها بيه شفتها و خشمها. .
-(هدوءو كان يخوف يرعب...عض على شفتو ..كان يلقا يهد الدنيا في اللحظة هذيكة..كان يلقا يضربو بالنار الكلب الساقط ..غمض عينيه للحظة وعد روحو باش ينتقملها منو..حل عينيه و هو يسمع في بكاه
و يرا في دموعها دموعها اكبر عدو ليه...للحظة قلبو رف اما تمالك روحو و خرج صوتو ناشف عكس الحرب الي في داخلو...نهار الخطبة سألتك فرحانة قتلي اي...و تو (عينيه كانت ترمش مالزلزال الي في قلبو) تو فرحانة؟
- تبكي ماسمعاتوش و ممكن سمعاتو اما اش باش تجاوب اصلا معاش عندها عين تشوفلو في عينيه. .
-مشا قعد على الكانابي..هرب بعد على حضورها الطاغي..كان يزيد يقعد قريبلها شوية تو يضعف و هو لازمو يتقوى...هي صفحة و تطوات..صحيح باش ياخولها حقها صحيح مزال يتنفس كان بيها اما ما لازمش يضعف..سكت شوية و جاها صوتو ضعيف..ريت عنادك وين وصلك؟ ريت كسوحية راسك اش جابتلك؟ كارهتني و ماقتتني و متعدية و عافستني لين عميت لين وليت تعمل في اي حاجة باش تنتقم مني...(قوات في البكا) يزي مالبكا...اقسم بالله ما نخرج من تونس الا ما نفتفتو الطحان بين يديا...دور وجهو باش ما يراش خزرة عينيها...عمل روحو ما راهاش كي خرجت قبيلة وقت ساقها دخلت الفارماسي...و انت اش هزك ليه في هالليل؟؟ اش مهزك لسماه تكلم؟ (قام و بدا يصيح..سيا يلزمو يخرج البركان الي فيه) علاش زعما هلكت روحك؟ علاه عملت فينا هكا؟ ماشي فيبالي باش نسافر مرتاح...فيبالي قلت هي اختارت و بالك انا الغالط ياخي شوية لا رميت روحك في هاوية؟ هذا تقول عمركم ما خليتوني حرة؟ عمركم ما قدرتوني؟ هانا حررناك للا شنية عملت؟ (من داخل كان محروق من دموعها محروق على روحو على ضو عينيه على روحو) تكلمممممم
- لا والله لا...قامت مشاتلو وين واقف تكركر في روحها....ورحمة امي مامشيتلو كان بقضية صدقني وليد ..كنت ...ماحبتش تقلو راني حبيت تقصها اليوم خاطر حبك ركن فيا و مرضني مسحت دموعها و خزرتلو... انا كيما خليتني ايمان لي تعرفها مايبدلني شي (حبت تفهمو الي هي ماعطاتو شي كمال حتى جرد بوسة ماضفرش بيها )غر بيا هو لعب لعبتو و انا بهيمة مافقت بشي ما لفتت لحتى شي اما الظاهر كان يطمن فيا مرة و ثنين و ثلاثة باش مانحس بشي اما المرة هذي شوف... تخزر لحالتها كيف امرمدة بالغبرة و مريولها لي مقطع نسات روحها قدامو ...
-كبس على سنيه ...عروقو بانت و ه يرا فيها كي الورقة الي هازها الريح...ريح تهز و ريح تجيب...للحظة ندم خاطر خلا الامور تمشي بطبيعتها..كان لازم بالسيف يفهمها كان لازم ما يخليش الامور توصل لهوني..تكلم بوجيعة...اما هي ايمان الي نعرفها؟؟ (تبسم مقهور) ايمان الي تكرهني و وعمرها ما تمني حتى على كاس ماء؟ ايمان الي حرقتلي قلبي و عفستني و مشات لغيري و انا ياما قتلها و فهمتها؟ ايمان الي قلتلها راهو كمال ساقط قتلي انت اخر حد يحكي على السقوطية؟ نبهتك فهمتك قتلك...كان جا يستاهلك و عارفو باش يفرحك عمري لا كنت نتعرضلك اما انا جيتك و قتلك رااااهو كلب راهو ما يصفاش...(تنهد) الكلام هذا الكلو زايد توا...الحمد لله يا بنت الناس كي ربي نقذك منو...هو حسابو معايا اقسم برب العزة ما نوريه الي يقرب لاخت الرجال اش يصيرلو (كلمة اخت وجعتو قبل ما توجعها اما هذاكة اللازم) تو الي صار صار نشاله تكون استوعبت الدرس و فهمت...منيش مسامحك خاطرك فرطت في روحك لواحد ما يسواش اما اللوم بعد القضا بدعة...انا ما نسافر الا ما ناخولك حقك منو...و كي مزال يتعرضلك قول عليا منيش راجل كيما قلتها عليا وقت الي هد علينا الحاكم...(تلفت و تكلم بحسرة) حتى انا منيش موجود...علي احسبو خوك و حد ما عاد يتعرضلك ولا يوجعك و ان شاء الله ربي ينورلك طريقك كيما نورلك بصيرتك..
- وليد...بلعت ريقها.. علاش ماشي !! حطت قصتها ورا وذنها و تنهدت... عندك الحق تعمل لي تحب عليه تسافر تبعد و تشوف حياتك حد مايوقف حياتو على حد و انت باش تشوف حياتك طبعا... خزرتلو تترجى فيه كاينها مازلتلها كان هالورقة الرابحة بهالكلمتين... نعرف الي موش من حقي نطلب اي حاجة منك و لا من اي حد آخر اما انت وعدتني تو و نحبك توفي بوعدك ليا. . معاش نحبو يتبعلي جرة الكلب كمال قالي الي مزال باش نشوف اش باش يعمل فيا و يحلف و يتكتف ... بدات ترعش خايفة من الكلام لي تقول فيه.... امان وليد ... زادت قربت منو... ماتخليهش يضرني ماتخليهش يقلقني بعد اليوم حتى كانك باش تمشي نحبك تعمل حاجة تخليه يبعدني و معاش يدور بيا .. انا.. انا وحدانية وهو شافني بلاش سند بعد بابا حب...حب. . دموعها سبقوها اما فيسع مسحتهم و تكلمت بمرارة ... مادامك حسبتني اختك خوذلي حقي منو بردلي ناري ع لي عملو قبل و لي كان ناوي يعملو مازال .. مدامني اختك ماتمشي كان ما تتأكد انو بعدني نحاني من مخو. .مريض انسان مريض ...كيفاش ما شفتوش كيفاش تعميت لهالدرجة ...ريت قداش دغفة انا قداش بهيمة و نطيح إلى راسي قداش سكرت وذنيها عليك و على كل من جاء و قالي اخطاك منو اما هزني واد الشماتة و قلت مدامو جاك من بالباب يا طفلة ماعندك علاش ترفض ... انا مانحط اللوم على حد نلوم كان روحي خاطرني مشيتلو بساقيا و شعرة لا ضعت بسبتو و وطيت راس بابا... ااااه بابا كيفاش باش نقابلو كيفاش باش نحكيلو ...يا ربي ارحمني .
<><>
انتي سبابي
من انجح الكرونيكات التونسية
#انتي_سبابي #كرونيك #كرونيكات
الحلقة 41
قرارات ان شاء مايكونش استعجل فيها و الا ندم لي خذاها نهار مالنهارات اما ....لفت وجهو ناحيتها جاء وجهو في وجها و النفس تخلط ...اشتنشق ريحتها و بقى يخزرلها و مخو في الشي لي صارلها زعما اش عمللها علاش كان ناوي و علاه هذا الكل. .. مليون سؤال هاربين بيه لبعيد مارجعو كان صوتها و هي تنين و تمهمه ...قام مفجوع و هو يشوف فيها تعرق و تنش..تتغصور و ملامحها متشنجة.. "سسيبني...امان ..سيب..خليني خليني.. سيبنييي.. برحمة امي ..لا لا لااااا ولييييد وليييد" صاحت باسمو و قامت مفجوعة جات بين يديه..
- اشش هاني لهوني هاني معاك ...ارتاح...كان مخبيها في حضنو و بين ضلوعو ...ايمان يزي مالبكاء كل شي وفى كل شي مشى و تعد
- اشش هاني لهوني هاني معاك ...ارتاح...كان مخبيها في حضنو و بين ضلوعو ...ايمان يزي مالبكاء كل شي وفى كل شي مشى و تعدى
- زادت كبشت فيه و قوات في البكية لي حرقتلو قلبو بيها... ياخي كان انا مكتوب لي الشقاء و الظلم بين الناس ! لاني مالأم لي تنصح و لاني مالخو لي يضرب عليا ... راو شي عمري لا تصورتو يصير معايا و الا نعيش أصغر تفصيل من تفاصيلو.. جحيم راو انك تصيح و حد ماهو سامعك مخيبها كي يجيك كف في لحظة يفقك على روحك ..مسحت دموعها بزربة و وخرت خرجت من حضنو الدافي... وليد تعرف الي نهار الخربة هو كان وراها !!!! كان يعس علينا كان جاي ينتقم منك ..
- ......................
- تحكي بصوت تاعب. ..مانعرش قال الي حبو وصلو كيف خطبني و يحكي بالتلفون قال ماك مسافر تو نوريه الرجال اش تعمل ... سكتت و هزت فيه عينيها. . وليد ياخي ضاربو انت قبل ؟؟
- حكاية قديمة. ..اما هو منساهاش الكلب
- شنية !!! انا وراها ؟؟
- لا حكاية اقدم منك اما جيت انت في صدافتو و حب يضربني بيك خاطر....خاطر يعرفني ن..نحبك... شعل سيقارو و عطاها بظهرو... تعرفها لمياء البكوشة بنت عمك صالح العساس! !
- أي لي ماتت في اكسيدون ثلاثة سنين لتالي
- حسب رايك وين صار هذا الكل !!
- حسب مانتفكر في طريق المعمل..و نهارتها كان... لحظة اش معناها !! ماتقليش الي.. ؟؟؟؟
- بالضبط كانت ضحية من ضحايا الطحان كمال تعدى عليها و مرث مابيها خاطرها بكوشة و اهلها ناس زواولة ماتت بسرها نهارها السر لي نعرفو كان انا و كمال و علي خاطر صاحبي في السبيطار قالي راهي متعديين عليها... الحاصيلو انا و بيديا هاذم وكللتو اكبر طريحة تنجم تعطيها لعبد خليتو جمعتين في الكلينيك و شهرين تراتمون باش رجع يحكي و يمشي كالخلق و من وقتها ظهرلو باش يحطني في مخو و لقاك قدامو و الظاهر مش من عدم تقربو ليك واضحة لحكاية كان حاس بنفورلك ليا وقت في انا نهد جبال بكلمة منك... اااااه ريت الدنيا يا ايمان ...
- صحيح نغلطو و ارتكبت حماقات منها لي يغتفر و منها لي مستحيل تتصلح و تنسى اما في طنبك الحاجات هذي الكل نتعلمو درس مالدنيا لي عملت فينا هذا الكل شوف انا ركبت راسي و عاندت و شوي و وصلتني لقطع رقبتي وصلتني باش ناثق في واحد حب يوطي راس بابا بيا. .. الوقت يعلم
- الوقت يداوي لجروح زادة يا ايمان ...
- وليد... خزرتلو خزرة كلها ترجي و مناجات ... بابا !!!
- ماتخافش خممت فيها حكاية بوك انا معاك و باش نروح بيك و تحكيلو اش صار
- نحكيلو !!! لا والله نخاف والله يقتلني
- انت مااااك مابيك شي !!! علاء يقتل فيك ...صاح عليها مايحبش يحط فرضية انها تكون متعدي عليها بالحق و اغتصبها...
- بربي اش باش يقول كي يشوفني اش باش يمشي في بالو تعرف الوحيد لي بقالي باش نبررلو مواقفي في هالدنيا ...و خزرتلو خزرة مافهمهاش اما اداركها. ..
- انت اخترت يكون الوحيد.. فتح الباب ...هيا وقيت معاش بكري خلينا نروحو قبل لا تكثر الحركة في الحومة و يشوفونا. ..
يعطيها بوها كف يطرشها بيه...صدمتها كبيييرة خاطر اول مرة يمد عليها يدو .. وليد ماحملهاش فيها يقدم و يقلو يا حاج صلي عالنبي و احمد ربي لي شي ماجرالها..
-لااا خليني نربيها خاطرني ياسر ازينتلها و تحلت في العريض .. وقت لي جاتني الرجال تطلب فيها (يقصد بو وليد ) قلتلهم بنتي اختارت حياتها مكتوب .. اما مكتوب لي شعرة لا رزاها في شبابها و وطالي راسي في التراااب ...
-غاضو الكلام على روح قلبو و غاضو هالراجل الي الشيب غزا شعرو شرف و تجربة و قوة و صيت ذايع بين الناس..غاضو كيفاه عاطي للذل كارو و هو الي كان يعطي لصاحب القدر مقدارو...طبس راسو و عاود هزو...يا حاج الرجال جاتك تطلب فيها منك ..يا حاج انا نعرف باب شكون دقيت و نعرف اني ريحة ريحتك تشرف و تعرف حبيت بنتك ايمان الي بغيتها مالبارح موش مالليوم..و كي الناس قالت فيها كلام ...كان نصدقوه بالحق معادش النمامة و الحسودي ينلام...بنتك غلطت صحيح و انت من واجبك تقسى عليها اما رد بالك تشك نهار في عرق تربيتك ليها يا حاج...نعرف واجعتك روحك و انا منيش واقف لنا و طالبها باش نضمدلك جراحك لااا انا شاريها من قبل و تو اكثر باش ...طبس راسو..باش نضمد جراحي...اقرا الخير في الي صار يا حاج و احمد ربي بنتك فلتت منو و بالك ربي بعدو علينا باقل الاضرار و الحمد لله...و انا خاطب راغب فيها موش خاطر باش نكمم الافام اما و الله نحبها يا حا
- يا وليدي يا غالي يا ولد الغالي.. انا هذا الكل نعرفو و رحمة المرحومة نعرفو و شايفو بعينيا اما..اما شي ما بقى على حالو ... بدا يصفق بيديه شي شي ..الحمد لله يا ربي الحمد لله ... موش ساهلة راهي يا كبدي انت تو مازلت حامي و دمك فاير و غاررك قلبك لمشوم. .. اما ماتنساش وراك دار و امك و بوك و حومة و لسانات ماترحمش يا بابا ماتظلمش روحك معانا
-يا حاج كلمتي سيف على على رقبتي...و كلام الناس انا منيش مصدقو و مستحيل نصدقو..مدام ايمان قتلي ما فما شي يعني ما فما شي...دارنا و عايلتي يعرفوني نحبها و يعرفوها بنت اصل ...و كان على اللسنات و الله ما نقص لسان الي مزال ينطق كلمة عليها...كان انت موافق نحبك تسألها و تاخو برايها
-عينيه دمعت و حملو...الله يرحم والدين الرجال الي جابو كان الرجال...ربي يخليك ولدي جبد روحو منو و ربط على كتفو...الطفلة زازتك تحبو تهزوها مالليوم و بدبشها الي فوقها و ما تجيبو شي...و تقلي نشاورها تنهد...اما نشاور و اما ناخو رايها مزلت باش نسالها ...غلطت مرة و معتدش نعاودها..يا ريتني نهار الي جاني الحاج وافقت يا ريتني ما تعديتكم يا وليدي...راني فتت الناس الملاح و تبعت راي فقصة ما تعرفش وين تحط ساقها...و الله لو كان داركم يوافقو غدوة تاخوها...وليدي ربي يعليك على من يعاديك و ربي يخليك لبوك وامك...مسكين موش مصدق...فيبالي معادش باش نرا حتى نهار يصلح ياخي هاك فرحتني يا وليدي...تفاهم مع العايلة و تفضلو في كل وقت و المرة هذي الكلام و الشورة شورة رجال ...و قحر لباب الدار...حمد لله تعدات و هاو ربي بعد اضيق جاب الفرج
- علي تصدم من كلام وليد خلاه لين بعد عالحاج عمار لي دخل لبنتو و جبدو من مرفقو هزو لباب الدار... شبيك هبلت !!! لا لا مانصدقش ياخي باش تاخوها بالرسمي !!!!!
-لفت وجهو ..باش ناخوها و ما ناخوها كان هي...غير محبتي ليها هيا توا محتاحتني يا علي..الحب موش كلام ورد راهو الحب هو الي مطير النوم من عيني مدام ايمان موش فرحانة...لازمني نكون معاها. ما نجمش نتخلى عليها افهمني
-شوف اش يحكي ياخي تحكي من كل عقلك وليد !!.... نفخ شويا و كمل يحكي معاه... صاحبي خويا و عشيري راو والله لا يجي لي تعمل فيه برجولية ..تي شبيك الطفلة. ... الطفلة ريتها في اناهي حالة لقيناها !!!! فك عليك صاحبي اش ما مازالك شي هوني مللخر وليد الطفلة موش ليك و ماتناسبكش الزح و راك غالط على طول الخط.. تي ..تي وحدة كيفها ماتشرفكش لا انت لا دار الحاج علي الصيد ..قص عليه وليد بكف طرشو بيه. .
-شدو من خناقو يتكلم و عروقو ظاهرة...و الله كان ما جيتش صاحبي و لامنا ماء و ملح و حق ربي ما ندفنك لهنا...انت تحكي على ايمان يا علي؟؟؟ اخرتها وليت تحكيلي على المرا الي انت اكثر واحد تعرف قداه قلبي باغيها...زاد علا في صوتو تجي تحكيلي على عرضي؟؟؟ نقتلك و الله نقتلك و ندفن كل واحد يخمم ينطق كلمة على ايمان...بالك تحسابها كيما الهمل إلي تبع فيهم صباح و عشية...عينيه خرجت مالغش...ايمان درس في طبايع الشرف و التربية ..طول عمرها انظف مالنطافة يلعن بو هالدنيا الكلبة الي حطتها في موقف الي يخلي اهل هالحومة الكلبة يحكيو عليها...اخزرلي ثبت فيا ملييييح...انت ليوم غدرتني يا علي و غدرت صحبتنا و عشرتنا
- اماااان وليد! !! انا لي تضربتي !! انا لي تسمعني لكلام جرت وحدة باعاتك نهار من النهارات ؟؟؟ نسيت وقت سباتك و باصاتك في الحبس وقتها مالقيتني كان انا يا ولد علي يا عشيري ههههههه تبسم بقهرة يا لي حسبتو عشيري يا خويا ماليوم برا فوتني معاش نلزمو بعضنا لقدر طاح... يساوي في مريولو لي تشرك... اما خسارتك والله
-تكلم و عينيه خارجة...باعتني و انا ما نبيعهاش..حطتني في الحبس و غلطت معايا اما انا ما نخليهاش...تعرفني نحبها تعرفها شرفي و عرضي...كان جيت خوك ما تحكيش على مرت خوك هكا..راك فهمتني عذرتني راك قدرتني و ما وطيتش حيط طفلة يتيمة اولا بنت حومة ثانيا و الاهم تابعة صاحبك الي هو خوك...كان جيت تقول بالعشرة راك احترمتني موش تقطع في سمعة الطفلة الي هي سمعتي...هز صبعو يحذر فيه....معادش نلزمو بعضنا و القدر الي مرمدتو في التراب...و ايمان الي تحل في جلغتك عليها ...انت اكثر واحد تعرف و ريتها في الليلة هذيكة و كان جيت شاكك واحد بالمية الي الكلب هذاكة وصل للي حب عليه راك انت قتلتو قبلي و راك ما روحتش بيها للستوديو متاعك..اما احنا جماعة الحومة هكاكة الي يطيح تكثر سكاكنو...و جايني بمنطق سيب عليك و تحكم عالمظاهر...المظاهر و الاحكام الي سيادتك خلاتك تزيد و تنقص في الكلام انا امس في الايام كي الحاج قلي لا و معروف عليه انو كلوشار و سيرتو خايبة قتلو لا يا بابا الناس ما تعرفش علي بالحق...زيد كي ما نعطوشو فرصة كيفاه باش يعرف الصحيح مالغالط ...حاميت عليك يا صاحبي و ما خليتش كلام الناس يأثر على بابا..و انت نهار الي طاحت الدنيا بايمان نسمع منك هك
#انتي_سبابي #كرونيك #كرونيكات
الحلقة 42
- تي برا ....... تو تخرالي فيه ...معاش توريني خليقتك يا وليد فهمتني و انا منيش راجل انا طحان كان مزال ندور بيك و هذي ريتها... يمسح على لحيتو... هذي حشها كان يجي فمي على فمك
-تلقا الخير يا قليل العشرة.....
دخل عليها و هي تبكي دمعة من الحالة لي فيها و دمعة مالكف لي كلاتو...وقف في الباب و عينيه تقدح نار يحكي بصبعو ينبه فيها...سبقاتو بالحديث...
- بابا امان صدقني شي ماعملي والله والله بنتك صافية حليب يا بابا ...تبكي تترجى فيه باش يرحمها من خزرتو القاتلة ليها..
-قلبو دم عليها اما لازم يقسى عليها...خلاتك ميمتك لحمة حمرة فنيت عمري عليك انت و اختك..حتى باش نعاود حياتي لاااااا وهبتلكم روحي و صحتي ودنيتي الكل ...نعامل فيك بثقة و حاسبك سبعة رجال موش طفلة ..متهني من ناحيتك..نقول ايمان مرا بألف و ما تغيس الا ماتقيس...ايمان حربية تعرف شتعمل و تعرف تتصرف...عطيتك الضو الاخضر في كلشي..ما نتبعك في شي و ما نراجعك في شي...اختك جاها مكتوبها و للي عرست عمري نهار ما سمعت عليها ربع كلمة ولا جاتني من جرتها مشكلة...مشات بعزها و دلالها و مشيت انا بين الرجال رافع راسي ببنتي و نسيبي..عطيتهالو و تشرطت...انت بقيتلي نرا في ضو ربي و فيك ...نستنالك في الراجل الي يستحقك...عمري لا غصبت عليك حتى شربةالما...نقول ايمان هذيكة كتفي الي ياما تكيت عليه...نحب نتهنى عليك و في نفس الوقت نبدا نحسب في الدموع كي نتفكر انك عمارة دار الغير...نهار الي قتلي يحب عليا شكون قلت للرجال بنتي اخطارت و قلت هناك هو المهم..تجي توطيلي راسي بين الي يسوى و الي ما يسواش...بدا يصيح...ليوم الخبر محصور في العايلة غدوة يولي قعدات قهاوي و حلالم نسا الحومة اسسسمعني اكان فيبالك كي فلتي منو يعني انت صافية راك غالطة...الشرف في الكلمة و العرض و العهد يا للا..و انت جبتلي توطية الراس...كلمتين اختك خرجتها بعزازتها و اتدللت و هزيت راسي..انت موش منجم حتى نحط عيني في عين الي جاك راغب..الي رفضتيه و دخلتي الغريق و غرقتني معاك...وليد الي رفضتو و رجعتو هو ليوم ما خيبنيش...مشا شوية حضر روحك صداقك على ولد علي في طرف ايامات و موش نشاور فيك نعلم فيك باش تبدي تلمي في دبشك...دموعو في عينيه و صدمها...اول مرة نندم على جيباني في البنات...يا ريتني ما جبتك يا ريتك متي راني بكيت عليك و سكتت...
- تسمع فيه و تبكي ماهيش حاملة كلمة أخرى منو نفسها ضاق عليها و صدرها تحكم فوارة ماكنتها من ساسها لراسها تهز فيها و تجيب. ماهيش مستوعبة كلام بوها و نظرة الذل في عينيه و الندم الباين فيهم تزيد تتصدم بالخبر لي بعدو ... ششمعناها!!! انت وافقت ؟؟؟ شكون قالك مازلت نحب عالرجال والا العرس !!! انت مستعار مني و موطي راسك خاطرني بنتك علاش تعطي فيا لراجل باش نزيد نوطيلو راسو علاش خليني هوني يا بابا امان خليني معاك معاش نحب حد معاش ناثق في حد غير ماتعطينيش برك يهديك يا بابا.. ماني بنتك ماني امونة قريد العش. .. باباااا...زادت في بكاها ...حرام عليك لوحتني هكاك لا سمعتني لا رحمتني تخمم كان في كلام الناس و عار الناس حرام عليك ... خرج و خلاها تنعي حظها...خرج وين لقاه وجهو مغصور من كلام علي..ادخل عيش ولدي احكي معاها و فهمها ماكانش نباصي عليها
-دخل شاد روحو بالسيف باش ما يصيحش...مهموم على خاطرها و حابب ياخوها في حضنو اما الموقف موش متاع حب و تمعشيق ..هي عملتو بيديها...قربلها قعد قدامها عالكرسي...قلك بوك....كان مهبط راسو و شفايفو ترعش...نحبش نخليك وحدك و نخليها بيك...نعرش اما هذا الحل الي ظهرلي توا انت شرايك
- انا شرايي ؟؟ بقات سااااكتة تخزر سارحة بعينيها لمظببة بالدموع... علاه وليد تعمل معايا هكا !! ياخي الحب كبير لهالدرجة و هو بالقوية و الجرأة هذي الكل ؟؟ اش مازال باش تعملي قلي و انا لي ماخليت باش وصلتك اخرها حطيتك في الحبس و ضربت ربطية في جرتي و الكلو من بهامتي كالعادة خاطرني ماصدقتكش ... امان يزي وليد نحيني من مخك يرحم والديك و المرة هذي موش كرها فيك اما ابعد خير مانغير ماتعملي حاجات مضطر انك تعملهم على خاطري مانستاهلش لي تعمل فيه على خاطري عتبة طول عمري نبقى عتبة...
-كبس يديه في بعضهم و قام كيف الي ضربو الضو...منيش جاي نحاسب ولا نعرض في حسناتي ولا نوري في روحي و نسترجى في امتنانك...برا اخرج و شوف بوك حالتو كيفاه تو تحشم باش تزيد تناقش ولا تتحاور في الموضوع...انا ما كنتش مخطط و ما نحبش مخك الي شادلي قارد يخمم اني ستغليت الفرصة..اما منظر بوك و الحالة الي وصلها خلاتني نتخلى على الي قررتو و نعفس عهودي بساقي و نختار اني نبردلو نارو حتى شوي (يكذب بامتياز ههه) الي ينجم يصير لبوك كان غدوة لحكاية تفوح في الحومة ما ينجمش يتصورو عقلك فهمتني...اخطاك من غلطتك و من موقفي و خمم في هاك الراجل الي لبرا (قلبو دم عليه و على مرضو مسكين) نقص مالانانية و خمم مرة اني العباد موش هازتلك سيف باش تدغرك ..نااااس تحب مصلحتك افففهم و بوك قهرتو الكلها عليك.
سكت شوية و رجع يتكلم بالشوية...انا قتلو شاورها قلي زازتك تو نبعثلك لطيفة تتفاهمو في التفاصيل
- مسحت دموعها كانت قاعدة على فرشها ظامة ساقيها شعرها لي هابط بسواد الليل .. تنهدت و خزرتلو.. و انت ؟؟ ماعندك شي تحب تسألهولي ؟؟ كانت تقصد بالرسمي مصدقها كي قاتلو ماعملي شي ... و داركم نورمال !! انا..انا مانحبش ندخل بالمشاكل راني بابا نعرفو كي نفهمو الي موش لازم علينا نحطو بلانا عليكم و نقلبولكم حياتهم تو يتفهم مني و الناس كل يوم تمضغ في علكة حد جديد اليوم انا و غدوة غيري كان لزم تو انقلو مالحومة المهم مانحبش نعمل المشاكل في داركم. ..
-نزل بسنيه...موش مستوعب نظرة الضعف الي يرا فيها في عينيها...موقف لا يحسد عليه تمالك اعصابو...منيش صغير و كلمتي وثيقة انا راهو..و دارنا موش باش يعكسوني في حاجة عندي برشا حاجتي بيها (مهمه كي شلق على روحو) يعن...يعني ..نقصد انا خطبتك قبل يعني الحال موش جديد و ما انزاد شي باش يرفضو و كان على الحكاية و المشاكل..لا امي لا بابا متاع مشاكل..انا نعرف كيفاه نفهمهم..و يزيني من نقلو مالحومة و درا شنية...ياخي ماكش رايفة بحالة بوك؟؟ بعد عمر كامل تحب تزيد تخرجو من حومتو من وكرو و زيد بحكاية كيما هكا؟؟ تنهد..يزي من دور الضحية الي تستحق الشفقة..بوك اكثر واحد تظلم راهو..و انا و انت نعرفو انك كنت معمية على عينيك و غلطت و الله غالب حطلك ربي واحد ساقط و انت (تبسم بقهرة) كسحت راسك لين وصلنا لهالمواصل..انت غالطة و الناس الكل عليك توا الناس الكل تكبس لازم فما شكون يرخف...نجموش نجيو الكل عليك..الواحد يراعي الي فنا عمروو في هالحومة الناس تهاتري بقدرو...
- تشوف فيه قدامها يحكي و يفسر و الباين انو مضغوط و يحب يطمنها هي تعرف الي حبو ليها مزال ساكن فيه و مزال معشش فيه اما يكابر. . قلبها يرفرف فارحة بيه و برجوليتو و كلمتو و حبو لي أخيرا فاقت على وضعها و حست بيه .. اما خايفة مالدنيا و خايفة من الباب البرة وش يمكن يصير امس في ليام مخطوبة لفلان و اليوم لوليد لي شهدتلو الحومة بحبو تي شردها الحومة في جرتو ... خزرتلو بعينين تاعبة... وليد امان خليني نرتاح شويا نحب نبقى مديدة باش نريح راسي امان نعرف الي ممكن تكون مستعجل و الناس و كذا اما ... شادة راسها بيدها و تتحسس في سخانتها..انا انا مخنوقة نحب نرتاح شويا قلبي مازال ينزف و جروحي مابراتش من لي صار. .. بكاها و دموع عينيها مالقاو حتى ملجأ غير حظنو..ترمات عليه عنقاتو و دفنت روحها في صدرو و تخبات غادي هاربة من كل شي حتى من روحها...
-تكهرب داخ ريقو شاح..حس روحو حاطط الدنيا بين يديه..حس روحو ملك العالم في لحظة..حاسس انو على خاطر هاك العينين ينجم يهد الدنيا...تي هو ما صدق بوها وافق كان خايف يفلتها مرة اخرى..حس انو القدر عطاه فرصة ثانية...و تحبو يسيبها بعد ما هربت ليه و يتخلى عليها...بلع ريقو و دور يديه عليها بعدها...يزي مالبكا ايمان..توا لازمك قوية و لازمك تكون قد المسؤولية..الي غلط يخلص و انت احمد ربي لاقية ناس تحبك باش تخلص معاك..الوقت الي طلبتو انا نجمش نوعدك تاخذو خاطر لا بوك لا انا مزلنا موسعين بالنا..و بالنسبة للي صار غدوة تنسى ..بعدها و تبسم بوجيعة..العقاب نعرف انو جا قاااسي برشا اما الله غالب الحل انك توافق و تقبل بيا..
- كي اطيح تكثر سكاكينك هذي هي ... كل واحد يجبد ليه و كان جاتك فرصتك اغرف و انت غرفت... خزرتلو بعين ثاقبة تخبي في حبها الكبير و ليعتها منو ... عمري ماتمنيت توصل علاقتنا لهنا عمري ماتوقعت انو نكونو مجبورين لبعضنا كيما صاير توا. . تنهدت .. اوكي امالا خلينا كل واحد يستغل الثاني انت وصلت للي تحب عليه و هاني مرتك و انا نخبي في فضيحتي تحت رحمتك. . ضحكت بسخرية تبعتها دمعة... والله كان جاني شكون و قالي راه بيصير فيك هكا و رحمة امي مانصدق اما نحمد ربي والله الحمد لله...
-اش مزال باش يقول و هي تامتو بالاستغلال و تعترف قدامو الي هي زادة باش تاخذو مصلحة ....لهالدرجة هو في نظرها ساقط ...توجع من كلامها اما موش مستغرب منو...تلفتلها بعينين ثاقبة...انا و انت مصلحتنا من هالعرس موش وحدة..انا نعرف مليييح علاه ماخذك و انت تبسم بوجيعة ...و الحمد لله هاك طلعت تعرف المهم موش وقت كلام زايد الحديث تو...ستنا مني تليفون
-سألتو بلهفة..وقتاه تكلمني
-مزال موجوع منها...غمزها ..مدام الحكاية فيها مصلحتي يعني ما تخافش ما نبطاش عليك...خرج يجر في اذيال الوجيعة و الحرقة الي في قلبو
كانت مصدومة مالكلام لي حكاهولها سيبت كل شي من يدها و قعدت عالكرسي مركزة مع كلامو اما دوبة وصل الكلام للصاندي ناضت معاه شااعلة ...
- باش تاخوهااااا !!!!!!
- اي
- شبيك ياخي من عينك العورة و الا عيبة فيك تاخو وحدة الله اعلم اش......
- لااا يامي يهديك موش منك لكلام هذا يهديك
- لا الاه الا الله. .. انت معاش منك فائدة أمس في ايام مسافر و فيزا و فلوس رخيناها في جرت هالسفرة وتوا جايني و تحب تاخوهالي هذيك لي ماتتسماش لي صغرات
لي صغراتك بين الرجال و اختارت غيرك !!!
- ماك كنت ديما تقلي شاهية نشوفك عريس و كنت ياااسر تعجبك ايمان علاه توا معارضتني
- صحيييييت كنت يعني توا معاش نحبها ليك كاهاو طويتها صفحتها و كانك عالعرس ألف من تتمناك و انا عطيت كلمتي في بنية تشرفك و تعرفك و ماتردش الرجال بنت اصل...بنية تربية و زين و دلال.. انا لطيفة و موش انت في باش تكسرلي كلمني بعد ما عطيتها فيها
#انتي_سبابي #كرونيك #كرونيكات
الحلقة 43
لي صغراتك بين الرجال و اختارت غيرك !!!
- ماك كنت ديما تقلي شاهية نشوفك عريس و كنت ياااسر تعجبك ايمان علاه توا معارضتني
- صحيييييت كنت يعني توا معاش نحبها ليك كاهاو طويتها صفحتها و كانك عالعرس ألف من تتمناك و انا عطيت كلمتي في بنية تشرفك و تعرفك و ماتردش الرجال بنت اصل. ..
- كبس على سنيه. .. امي ريت الألف لي تحكي عليهم مايجوش في شعرتها ايمان و انا نشوف فيها الشرف و الأصل. .. و انت الساعة منك ليك هكاك تحكي و تعربن علاه نرضع في صبعي و الا طحااااان ... صوتو بالصياح طالع للبرة وين كان بوه في عتبة التيراس...
- ايييييه اش بيكم شاعلين علاه هذا الكل ؟؟؟
- بابا ياخي نورمال لي تعمل فيه امي !!! ماشية تخطبلي في لبنات و انا مافي علميش
- بوه هز حاجبو تلفتلها ..لطيفة ؟؟؟
- رد بالك تخزرلي هكاك يا علي اسمع الساعة السيد ولدك المحترم اش جاي و جايب أخبار معاه. ..تلفتتلو ... احكي عاد ماك كنت تلعلط توا احكيلو و قلو راك حاب على بنت عمار
- بنت عمار !! ياخي موش وفى موضوعها ايمان بنت عمار يا وليدي !!! الطفلة باش.....
- لا بابا معاش هي و خطيبها قصتها و انا نحب عليها مللخر .. طبس راسو....
- اي كمل كمل و قلو وين لقيتها الطفلة و علاش قص....
- يا مرا يهديييك اسكت ياخي ماتعياش مالكلامات! ! وليد بابا توا انت مثبت مالكلام لي تقول فيه !! باهي فهمني اش صار و حكيت معاها الطفلة حابة عليك هي !!! راك على باب سفر يا وليدي موش ساهل راهو !!
- نعرف و راسك يا حاج نعرف و نعرف زادة الي لكلام لي باش نقولو ممكن مايتعدالكش بالساهل اما ... اما انا شفت الي لازم بتعمل و عملتو و عطيت كلمتي لعمار و رغم فسادي لول و طيشي الا انو كلمتي وحدة لا نعاودها لا نرجع فيها. .. الطفلة....تنهد. .. صارتلها حكاية هي و الراجل طلع فاسد و اخمج منو مافماش شافها طفلة وحدانية و زوالية ماشي في بالو مطيشة و ساهل يزلبحها و يضحك عليها. .. خزرلو في عينيه ... بابا اكيد فهمتني اش نقصد .. الطفلة جاتني و شكتلي و قاتلي خوذلي حقي منو نقوم نتنكرلها توا !!!!! من نهاري مانرضاش العيبة فيها باش نجي توا و نخلي لي يسوى و لي مايسواش يحكي فيها و في ربايتها! !! ناخوها و لي هاكا يسكر جلغتو و امي تحكيلي على سفر و طفلة خطبتهالي و بوزقليف يامي اما سفر و اما مرا اخرى انا بعدها تحرم عليا النساء حطها في بالك...بابا كان كلامي ناقص و موش في بلاصتو قلي دلني و وريني الصحيح مالغالط ...
- استغفر الله العظيم من كل ذنب عظيم .. والله يا وليدي حيرتني معاك..اي و الطفلة اش قالت !! موافقة ..رد بالك تكون مجبورة و الا حاجة راهو عيييب كبير
- لا لا و الله كل شي لباس انت ارضى عليا برك. ..امي !!
- ماتكلمنيش انا ماني جارتكم عاد .سيبني ..
- الله يهديك الله يهديك ... خلاها و طلع يجري لبيتو موش فاهم اش يحس غير انو يحب يكلمها و يسمع صوتها يااااسر توحشها .. اول ما كومبوزي النومرو تبسم.. ياما طلبها و علقت عليه ياما طلبها و سمعاتو كلام يوجع ياما طلبها للمرة الألف و بعد يأيس و يعلق وحدو... كان سارح لين جاه صوتها كالحلمة المزيانة ..
- وليد
- اهلا .. كح باش رجع صوتو... وينك
- هاني ..انت اش عملت حكيت مع خالتي لطيفة !!
- اي... بابا ما عندو حتى مشكل حاسو فرح من داخل و...
- و امك قالت لا !!! امان ماتخبيش عليا
- يا بنتي تو تبرد ماك تعرفها قلبها ابيض و تفهم في لخر تو تلين و ترومها لحكاية
- عندها الحق ..هي راهي تلوج في مصلحتك ماذابيها ماخير و ما أ ......
- اسسسس كلمة معاش نحب نسمعها منك في الموضوع هذا و ماتلوم كان روحك ..
- باهي
- غدوة الحي الرجال يتقابلو و ان شاء الله مانعطلوش جمعة كان طارت
- جمعة !!! علاش الزربة هذي الكل !!
- شنوااا تووو !!! ياخي باش نبقى نعلك في لحكاية عام كاااامل ... صاح عليها يحس في دمو فاير شوي من امو و شوي من التعاطيل لي تعمل فيهم هي... الف مرة نقولك أخرج منها حكايات الرجال انا كانك عليا تو نجيبك و حد ما يحكم في جد امي باهيييي.. شنيا زربة ما زربة ياخي عاجباتك حالتك !! تحب لعباد تحل فمها عليك و نجيب بلايا على واحد فيهم !!! تكلم حل فمك ااه !!!!
-هي مالقات بيها وين كان للبكاء مسكينة اعصابها متوترة و زاد عليها صياحو و كلامو لي وجعها. ..
- براس امك لا عاد تبكي راك نفختلي راسي ببكاك. . ياخي ماعندكش صنعة !!! لا الاه الا الله ... برا علق خليني رايض... علق عليها خلاها في دموعها... اول مرة تبكي و يكون هو سبب وجيعتها يكون هو لي مسها بكلامو الجارح و الا صياحو عليها ما كانت تعرف على وليد كان حبو و لهوتو بيها و تربيجو ليها و كلامو و تركيحو اما يبكيها نهار هذي ماحملتهاش خلاص و ما امرها كي جربتها ياااسر مستها و ياسر توجعت من نبرة صوتو لخشينة و صياحو ... اما تسكت خاطر ما عندها ما تقول خاطر عندو الحق و هي ماعندها حتى حجة اصلا تحمد ربي لي رضا بيها و باش يمنعها من كلامات الناس ... سكتت مغلوبة على أمرها
هما هكاك و تدخل هدى تجري و تلهث ..
- انتوما هوني !! ماسمعتوش !!
- ماسمعناش بشنوا !! احكي حل فمك هدى
- ووووه لحظة نرد النفس .. والله عركة للسماء في آخر النهج بين لطيفة و سلمى مرت الحجام
- ايمان تصدمت. . خالتي لطيفة تعمل في عركة !! اش جابها لسلمى زادة !!
- كل على خاطرك يا للا... اي مالا تحل في فمها هاكي سلمى لي منتفة و حاطة كارها من كار لطيفة مالا مشحتفة. ..
- معناها سمعو الناس بالحكاية !! اكيد باش يعرفو مسكينة خالتي لطيفة زعما اش تحملت كلامات منها هاكي القعرة سلمى. .
- لا لا حد ماسمع اما سلمى تحكي كيفاش ولدك تخولو وحدة كانت مخطوبة و رفضتكم قبل
- اي ماو صحيح كلامها .. الله اعلم اش صايرلها طا الكلو مني .. ريت يا نعيمة كلامي الكل في بلاصتو قبيلة.. لازمني نفضها اليوم ..
- ترصص سكر فمك ياخي هبلت يا كازي .. هدى امان قلها حاجة راهي بهيمة زايد. . قالك باش تمشي تقصها مع وليد اريح للناس الكل و شنيا قالك ماتحبش لمضرة للناس لي حبوها و قدروها.. ياخي قول حاجة هدى !!!
- انا ولله لا توقعتو يكون رجولي وليد للدرجة هذي و يحبك بالرسمي .. و نقولك راك بهيمة كان تفرط فيه بعد لي صار لكل. .. انا نعرف انو موش ساهل عالراجل يتقبل مرا بحكاية كيما حكايتك كان اذا حبك بالحق والله اسمع منا و انسى كل شي و ازدم عيش حياتك عيش الفرحة معاه
- لا مانجمش مانجمش عمري مانكون عالة على حد بالسيف عليه ... خاصة خالتي لطيفة عمري ماودتني كان بالباهي نجي انا نحرمها فرحتها بيه هذي ماتتسماش انانية ؟؟؟؟
- الطفلة هبلت سايي. .. نعيمة فدت عليها ... يلا فاش تستنى برااا و قوللها سامحني خاطر حبيت ولدك قلها تمنيتو و عييت وانا نبكي و نسهر الليالي على خاطر قلبي مارضاش كان بيه... بففففف بربي راك دغفة ياسر يا ايمان ياسر نية راك ياااسر ..
- ماكمش باش تفهموني والله زايد لي تحكيو فيه... دخلت جابت باكو صغير في يدها و خرجت تزرب. ..
كانت قاعدة تقد في طرف شربة مفورة للحاج وقت دق الباب... اول ماراتها تصدمت باارشا احاسيس هبطت عليها موش عارفة تلين من ناحيتها والا تزيد في جفاها ليها... مش بعيدة عليها كانت ايمان واقفة بكل انكسار عندها رغبة كبيرة انها تحملها و تتخبا عندها و تفرغلها قلبها و تحكيلها اش صار فيها و قداشها ضعيفة و مستحقة حضنها كالعادة اما نظرتنا الباردة خلاتها تكتفي بمجرد كلام ...
- طا لطيفة ...شحوالك..بقات واقفة في الباب...
- لباس يسأل عليك الخير. .. انت ..انت لباس !!
- الحمد لله... انا حابة نحكي معاك
- تفضل ادخل...بقات تعول في شربتها ماهيش حابة تحكي كاينها تقلها علاش جيت يا ايمان شنوا لي مزال يتقال توا. .
- انا...حابة نحكي معاك في موضوع وليد ..نحبك تسمعني
- اش مازال فيه مانسمع عاد ..الطفل و طايح على راسو موش عارف وين يحط ساقيه مالا غلبة ... تحكي و عاطيتها بالظهر ماتحبش تواجها بكلامها الجارح... لازمها تقسى عليها لازمها توصللها الي راهي صحيح تحبها اما مكتوبها موش مع وليد ...
- و انا هذا اش جيت على خاطرو... لطيفة بقات باهتة و تلفتتلها
- اش معناها !! يعني باش تقصوها حكيتو و تفاهمتو باش كل واحد على روحو !!!
- لا... انا لي قلت و انا لي باش نفعل... لكلام لي باش نقولهولك انا.. وليد ما عندو فيه حتى دراية. .حبيتك تسمعيه مني خير مايجيبهولك حد آخر ... انا...انا نحبو ولدك كيفاش و علاش مانعرفش اما انا نموت عليه ..موش كلام و الا حاجة اما ريت كي تحس بالدنيا تاقف في بعدو راهي تاقف ... مانجمش بلاش بيه مانجمش نبعد بعد لي عملو معايا الكل و مانجمش نسامح روحي على لي عملتو معاه اما زادة مانجمش نرد الباهي بالمضرة مانجمش ندخل عليه عروس و ندخل عليكم كنة و انا جايبة معايا مضرة ليكم و ليه ... باش تقلي الكلمة و الرجال لي تفاهمو نقولك راني على عينين بابا قبلت اما كي سمعت بيك... سمعت انك ماتحبش قلت هذا لي لازم يتعمل ملول ...
- انا قلت تو تفيق الي لحكاية ماتقابلش بعضها اما ماجاني حتى خبر الي انت فقت.. مسحت يدها و جات قعدت بحذاها شدتلها يدها و كملت كلامها.... شوف سلم بنتي لازمك تحط في بالك الي لكلام لي قلتو و لي باش نقولو موش كره فيك والا بغض لا بالعكس تعرفني قداه نحبك و معزتك غالية في قلبي ..اما لكحاية كبيرة لحكاية مافيهاش كان انت و هو لا كبيرة لدرجة فيها انا و عمك الحاج و بوك و الحومة و كلاماتها يعني ترضاه تكون على حسابنا نحن الكل !!! انا اليوم عملت عركة مع وحدة ماكانتش تنجم تهز فيا عينها قد ما كنا جيران خاطر تعرف قدرها اما تجيني و تبدى تجيب و تحط و تقول فيه عاطل هذي مانرضاهاش و مانجمش نسكت عليها..اليوم هكا غدوة وحدة اخرى و عمالها و تكبر لحكاية و ممكن تسمع بالفضيحة مالاساس... الله يستر... عيش بنتي راني لمصلحتك نحكي هكا راك باش تعاني و باش يتعب هو زادة ياخي ماخممتش فيه !!
- هاني قتلك خالتي موش لازم تبقى ندور و نلف بيك انا خذيت قراري و الحمد لله فهمنا بعضنا في لخر و تفضت من غير مشاكل
#انتي_سبابي #كرونيك #كرونيكات
الحلقة 44
جبدت الباكو لي كان محطوط على جنب... شد خوذو
-شنوا هذا يا بنتي.. حلاتو و تصدمت كي شافت لي فيه...
-هذيكا السلسلة لي جبتهالي في الخطبة و هذاك الخلخال لي رجعهولي وليد مالصايغي متاع امي الله يرحمها..تنهدت .. ماليوم معاش متسميين عليا.. تتفكر كي لبستهالي قتلي تمنيت نلبسهالك و انتي كنتي !! انا تو نقلك مافاتك شي يا طا تنجم تلبسها لمرتو. . لكنتك لي باش تختاريهالو انت و تكون هكاك في بلاصتها و الخلخال موش مكتوبلي نخرج بيه عروسة حتى لو كان متاع امي قبل اما تو معاش عنا الحق فيه. .. مسحت دمعتها ... تعرف نحس في روحي خير بباارشا ان شاء الله نكون بريت ذمتي و ان شاء الله تكوني راضية توا !!
- الله يهدي سرك الله يهديك و يسهل مكتوبك يا بنيتي و يستر عليك ان شاء الله تلقى لي يفرحك و يحطك في عينيه ..لطيفة حتى كان قسات عليها دخلاني مشوية عليها و موش حاملة تشوف دموعها...
- ايا نخليك توا لازمني نروح. ..
- "" تررررص في بلاصتك. ."""
هزت راسها مفجوعة بصوتو لي اقتحمها على غفلة و حصلها بالكمشة كيفاش سلمت فيه و باش تبعد للمرة الألف عليه...
- و..وليييد ... تلفتت لخالتها لطيفة لي كانت كيف الليمة مستصفرة. .
- أي وليد يا للا ...وليد يا امي... سمعونا عاد اش باش تعملو اش تفاهمتوااا ... بقاو سكتات الزوز... تكلمممممو شبيكم بكشتووو ... صياحو عمالو و يعلى..يشد يطيش صحن لي قدامو.... ياخي ناويين تهبلوني انتوما الزوز !! أعز زوز نساء في حياتي بحبو يدمروني !! ياخي مانيش باش نرتاح نهار في حياتي !! الفرحة موش مكتوبتلي وين نقول تحلت تسكروها !!!تخيطو و تفصلو وحدكم...حتى وحدة لا خممت فيا انا شنية نحس و شنية نحب...تشاورو في بعضكم و تاخذو بخاطر بعضكم في حكاية تخصني انا بدرجة اولى...ياخي لهالدرجة ما نسواش عندكم الزوز...
- عيش ولدي اسمع.........
- لااا امي انت اسكت اسسسسسكت ... انت يطلع منك هذا الكككلل
- وليد ماتصيحش على امك هكاك .!
- انت شششش تسكر...... فمك وااضح شششش كلمة لا حسابك بعدين... مسح على وجهو بيديه و عداهم على شعرو .. مالا تفاهمتو سايي !!! امي ان شاء الله تكون راضية توا !!أفرح عاد وصلت الي تحب عليه اقنعتها ماهو لعبتلها بمخها و قلتلها راك ماتنجمش تاخذيه ولدي !! قلتلها راك باش تجيبلو المشاكل على خاطر لحكاية لي صارت !!! احكي اش قلتلها زادة احكيييي
- ولييد يزي امك راهي... هي.. هي ماعندها حتى دخل انا..انا لي قررت و انا لي ...
- قررت عزاك و خلاك.. تقرر فوق كلمة الرجال !!! مازال عندك كلمة اصلا معايا والا مع بوك و الحاج !!! ياخي ناوية تخرجني من عقلي والا كيفاه !!! يا ناس راني باش نهبل ..
- كلام امك صحيح و اليوم صارت حكاية و مشكل تخليني نبعد ..اليوم الناس تحكي عليا كيفاش كنت مخطوبة و رفضتك و تو جاي تخطب فيا و غدوة ينجمو يحكو ما اكبر ينجمو. ..
- يا بنتي اش ينجمو شكون يسترجي اصلا !! لحكاية في العيلة و الله لا طلعت البرا خلاص و لا سمع بيها حد ... طحان نولي كان نخليهم يقولو فيه كلمة
- علاه نوصلو لهذا الكل و احنا انجمو نحلوها من توا و من غير....
- ياخي شتبقي تنفخلي راسي بنفس الموال. .. دار لامو... عمري لا توقعتها منك يامي عمري لا عطيتها فيك و قلت امي تطعني في ظهري امي راك امي .. فما أم ماتحبش تفرح بولدها !! فما شكون تبربش كيفاش تحرمو من فرحتو. .. باش تقلي هي لي جات و كانت فكرتها نقولك تنجم تردعها و تقلها لا مادام ولدي حاب انا ماناقفلوش عرضة في وجهو هكا تنجم اطمنها الطفلة و تقلها وراك رجال ماتخافش و تو كل شي يتعدى ام انت يامي قررتي وحدك و فضيتيها زعما زعما... تلامح السلسلة في يدها خطفها منها... هذي تشرات باسمها و ماتلبسها كان هي.. خطفها قربها ليه هي كانت ترعش غشو خوفها بارشا هذا هو الوجه لي ماكانتش موالفاتو في وليد ...كانت تتنفس بقوة بين يديه و هو يلبسلها في السلسلة في رقبتها وين كان نفسو سخون ياسر كان قريب ليها رهوجها و زادت ماتت بالحشمة و امو تشوف فيهم كيفاه محسوب معنقها...
- هذي والله ثم والله ثم والله مازال تنحيها من رقبتك حسابك تشوفو كيفاش باش يكون..هزلها وجها من دقنونتها بقوة... تسمع فيااااا. ..
- هي دخلت بعضها خوف و رعشة و حتى لكلام هرب عليها خلاها تهز براسها اكاهاو. ..
- أمي ... توا الظاهر. .تنهد... معاش عنا كلام يتقال في خصوص الموضوع هذا انا خترت و انت خترت اما موالنا موش كيف كيف .. انا كنت حاسب حساب النهار هذا هذاك علاش مانحبش نقلقك اكثر من هكا حبيت نقولك إلى حتى السكنة مانيش ساكن هوني ارتاح داري خذيتها في غير بلاصة و و غير حومة و غير جيران..
- يا وليدي علاه... بدات تبكي..ايمان عيش بنتي احكي معاه ..وليد ماتعملش فيا هكا ماني ميمتك
- يامي هكا خير ليا و للناس الكل خلينا بعاد عالمشاكل و انت نحبك كيما احترمت انا موقفك تحترم انت رغبتي شفتها هذي مرتي من اليوم قبل غدوة حتى كان ماكش باش تحسبها ماذابيا ماتوصليها بشي و هي باش تكون بعيد كل البعد عالانتوراج هذا..
ايمان واقفة تسمع فيه و موش مصدقة لكلام لي قالو... موش مستوعبة فكرة تبعد على دارهم و على بوها و الحومة الكل و باش يسكنها في بلاصة بعيدة على حياتها لي كانت عايشتها و ناسها و أهلها لي تحبهم .. ياخي قاعد يعاقب فيها ولا شنيا !! اش مزال باش يعمل و ماعملوش لتوا !!! موش فاهمتو لوين يحب يوصل مزال... منغير سابق انذار قعدت قدامو على ركايبها وين كان حاط فخار ربي عالكرسي ..
- اش معناها !! ماناش باش نسكنو هوني اش تقصد بيها !!
- شبيك مصدومة كلامي واضح سكنة في الحومة مافماش مضمض معناها.. و راك تقول قرار و خذيتو تو راني.. معناها لا نقاش..
- و انا ماخممتش فيا !
- علاه انت خممت فيا كي حليت فمك و قررت تبعد عليا و تبطل العرس !! ...سكت شويا. ..و في اخر المطاف لمصلحتك و مصلحة العايلة لازمنا نسكنو بعيد هاوكا كل واحد على روحو باش لا توصلني لا نوصلك... غزر لامو... امي نتمنى تكون اخر مرة نجبدو فيها الموضوع هذا.. افرح خاطر ولدك باش يعرس و أفرح أكثر خاطر ايمان لي طول عمرك تقول نشوف فيها في مقام بنتي قبل كنتي باش تكون بالحق كنتك. .. ماتقسيش قلبك عليها و احسبها كي بنتك بالرسمي. .لي ماترضاهش لبنتك ماترضاهش ليها ... خلينا نطويو هالصفحة راني فديت منو هالموال...راني بنتجلط
- ايمان دمعت عينيها من كلامو ياسر عاز بيها كيفاش جايب ما عندو و يقنع في امو بيها.. اما معاها مخشن اللعب و قاسي و جارح في كلامو... مشات وين واقفة لطيفة شدتلها يدها..
- انا تولدت وحتى امي مانعرفهاش كي الناس.. عشت حياة اليتم و النقص محرومة حتى من شوفة بابا لي يروح مالليل لليل باش يجيبلنا الخبزة ..كبرنا و كبرتنا الدنيا و تعرف مصعبها عيشة ليتيم خاصة يتيم الأم..و احنا زوز بنات العينين الكل علينا يستناونا نغلطوش غلطة و نمشو بين اللسانات كالعلك ..اما الحمد لله بفضل ربي و بابا تربينا العين شبعانة و اليد مليانة برزق لحلال و نحمد ربي زادة لي كبرنا في وسطكم و على شوفة عينيكم انت و خالتي... انا قلتهالك مرة و نعاودها راني رباية يدك و عمرها العين ماتعلى عالحاجب كلمتك تمشيها عليا كيما تحب و كان تحبني نخرج مالباب هذاك.. شاورت الباب بصبعها و كلها ثيقة و ثبات في الكلام لي قاعدة تخرج فيه... نخرج بطلب منك اما حط في بالك رانا باش نبقاو كيما قبل لمحبة عنوانا و عمري لا نشد بغض ليك في قلبي... قلت لا و انت بنتي قبل ماتكون كنتي تكون فرحتي وقتها مانعطيها لحد و عمري ماننسالك معروفك لي سترت عليا و خذيت بخاطر يتيمة. .نعرف حبيت و الا كرهت مالي الا ممنونة ليكم أولهم وليد خاطر سترتوني و ماخليتش الناس تحكي فيا بالرغم انا ماخليت ما عملت.. ياسر غلطت في حقكم الكل سامحوني بربي سامحني يا خالتي... غلبتها العبرة بدموعها لي خانوها. ..ماتحس كان بيد حاوطتها واطبطب على ظهرها...
- و رحمة الغالية و حق السنين و العشرة لي بيناتنا و هاكي ليمين لي حلفتو نهار لأمك باش نحطك في عينيا. . ماتخرج من داري توا و في هاللحظة كان ببوسة على جبينك ..تمسحلها في دمعاتها لي ماحبوش يكفو. .. اسسس انت لي لازمك تسامح خالتك لازمك وسامحني خاطرني نسيت الي راك تربيت على يديا و كبرت قدام عينيا. ..مانعرش كيفاش جاء لبالي نجرحك بالكلام و نلومك على حاجة انت برية منها.. ماتبكيش سلم بنتي ماتبكيش ..يزينا مالدموع يزينا خلينا نفرحو و ننساو الحزن و التخمام و خليني نفرح في بلاصة الفرحة زوز وحدة للغالي ولدي و لخرة لاحلى عروسة و احلى كنة... و عنقتها و بدات تزغرط.. ايمان مسكينة تحس في لحمها شوك بزازة الزغاريط لي عمالها و تزيد و تعلى في وذنها...
- عيشك عيشك خالتي ربي يخليك لينا الكل ... لحظات الفرحة مخلطة بالدموع تعدات عليهم الزوز و ثالثهم وليد لي بانت عليه كيفاه عينيه حمر و باش يدمعو يااسر سخوفي و قلبو رهيف تقول موش وليد المغشاش لي كي يتغشش يكسر الدنيا...
- ايجا عيش ولدي ايجا خليني نفرح بيك وريريريريريريريرييييي.. الحمد لله يا ربي الحمد لله لي عشت و شفت هالنهار المبروك..وريريريريريريريريرييي..
- الله لا ينحيك يا غالية.. الله لا يحرمني منك و كان مزال نعلي صوتي عليك مانيش راجل وقتها..سامحني عيشك يامي سامحني.. عنقها فرحان بيها و فرحان بمرتو لي واقفة مسحورة بيه مأخوذة بطيبتو و حنيتو لي عمرها لا شداتو في موقف كيما هكا..
- ايا سلم ولدي برا وصل هالمزيانة لدارهم و قول للحاج رانا باش نطلو بعدين كان كتب ..ايا عاد عيش بنتي يزيني مالبكاء عينيك تنفخو راو مخيبهم راني نجي بعدين و نلقاهم منفخين نبطل خاطرك8 عفشة باش تكون هههههههههه.. اي اي اضحك يا للا يا غالية يا مرت الغالي. ان شاء نعيش نهار لي نشوف ولادكم ماليين عليا هالدار يا ربي هههههه.....تلفتو الزوز لبعضهم فرد وقت عينيهم تحكي و تتسائل مفجوعين من كلام لطيفة عالصغار يعني عرس بالفم و الملا يعني باش توصل تكون مرتو و تعطيه شرفها و تجيبلو صغيرو لول! ! ...أفكار كانت في راسو يتخيل فيهم ترجمتهم ضحكتو الساحرة لي ترسمت على شفايف
#انتي_سبابي #كرونيك #كرونيكات
الحلقة 45
في الوقت لي كانت هي متلبكة و داخلى في حيط شي مالحشمة شي من خزرتو المفضوخة لي باش تنقبلها بدنها.. قريب تصيح و تقلو هز عينيك راك فضحتنا..اما بيناتنا كانت مستحليتها هاكي الخزرة و هاك اللمعة في عينيه كانت طايرة بالفرحة مفتونة بالحب لي ماليلها جواجيها... حبو لي عمالو و يكبر حبو لي سكنها و خلاها تعاني الليالي ببكاهم و سهرهم. .. قداش تحبو و تموت فيه قداش متمنية ترتمى في حضنو و تسكن بين ضلوعو.. شاهية تعنقو و يبوسها شاهية تجرب معاه حاجات ما عندها عليهم حتى فكرة حاجات تسمع فيهم سمع من عند لبنات اما قالولها راهم حلوين هههه ايي شاهية تكون معاه تعيش الحب و تجربو بحلاوتو و وجيعتو بكل شي فيه المهم معاه..
- ايمان ... يا ايمان ياخي متحبش تروح يا طفلة ولا شبي عزاك !!! قص على أحلامها المنحرفة نداه و هو يقلها عالمرواح. .
- انا..!! سمعتني اش كنت نقول !!! دخلت بعضها مسكينة
- يا بنتي يهديك اش عندي نسمع زادة !! اصلا انت قلت حاجة باش نسمعك !! لا الاه الا الله. . روح هيا نوصلك يا ربي تصبرني بديناها بالسبهة من تو
كانت لابدة بجنبو تخزرلو من تحت لتحت و تعشق فيه هابلة بحبو و بهاكي اللحية الهايجة.. بشيميزو الكحلة لي حاللها القفلتين ااااه يا عنبو عمري و هاكي السروال الدجين المحكوك... غلللب عليها راهو..
- ايمان.. انا هاني باش نعديهالك المرة هذي و موش باش نحكي على عملتك من ورايا و جيانك لامي.. اما على خاطر امي لانت و هداها ربي باش نسكت اما والله و تعرفني باش حلفت يا ايمان كان مزال تعمل حاجة من ورايا تخصني انا بدرجة اولى ولا تخصك انت و تفوتني بيها اقسم بالله تشوف مني لي عمرك ماشفتو ... رد بالك و خافي شري يا بنت الناس. ..
- باهي. ..سامحني
- موش حكاية سماح اما حطها حلقة في وذنك
- وليد انا فرحانة... نحس قلبي يدق يدق باش يخرج من بلاصتو.. مانيش مصدقة الي لحكاية تعدات سلكات و الناس الكل فرحانة ههه
- انت فرحانة بالرسمي ايمان !!! فرحانة خاطر باش تاخوني !! فرحانة باش تكون مرتي و تاخذ اسمي !! نتمنى نسمعها منك نتمنى نقدم القدام في قراري لي خذيتو و تكون انت الدعم لول في حياتي... صحيح لازمنا نفرحو خاطر المشاكل باش تقل و الناس الكل راضية اما والله فرحتي كانت تكون اكبر كان تحسسني انك فرحانة لنفس الحاجة لي في خاطري ..اااااااه يا بنت عمار تعبتني و انا نجري في حظوظك و باش اتعبني و انت ليا ..كلمة "ليا" خرجت من فمو بتبسيمة تلخص الحب الدفين. ..
- وليد انا نح .....
- انت وصلتي يا للا ههه هيا اهبط.. اسمع.. دار يحكي معاها مالبلار... يجيك نهار و اطيح في شباكي و تغرق في حبي ههههههه وقتها ياما نشمت فيك..
- ايا عزيزتي قوم الجامعة وصلو...تهاني بدات تبكي تعرف والله رغم متوترة اما حاسة بفرحتك عزيزتي مانعرش كيفاش ماشفتش اللمعة في عينيك وقت خطبك هاك الساقط.. انا ياااسر كنت بعيدة عليك و ماحاولتش نكون الأخت لكبيرة ليك لي تحسك و تدعمك كنت انانية حتى في قراراتك سامحني...
-معاش يهم توا...المهم الي انا فرحانة عالاخر فرحانة و مطمانة و عارفة روحي ربي دلني و كتبلي كان الي يسرني و يفرحني..اما فرحتي كانت تنجم تكون اكبر كان ما جاش بابا متغشش عليا..فرحتي كانت تتعدا السما لو...بلعت ريقها..لو كان وليد ما خطبنيش بنية السترة. ..
الكلو يتعدى و رأس اختي و وليد لي حبك عمرو ماينساك و كان ماجاش عينو منك والله لا يعمل عملتو هذي و يرجع بعد ما قرر يبعد .. الوقت يداوي يا روحي و بابا اش يحبلك كان هناك ايامات و تو يبرد هاو اش مزال عالعرس و قول قالتها تهاني كان مابكاش و كبش فيك هههه .. هيا قوم هيا عطلنا ياسر
-كبشت فيها كيف الصغير...تهاني عيش اختي موش منجمة نقوم...خايفة
-.ههه اش مخوفك.. و كانك على بوك هههه هاني معاك ماتخافش ... ايا عاد يزي مالدلول و قوم عيش اختي
قامت بخطوات ثقيلة..تقول مزالت تتعلم في تبديل الخطوة...مشات في الكولوار شوية و تنهدت و تكلمت بالشوية...ما جاش...تهاني ديراكت خزرتلها و سألتها بعينيها كايني تقلها الزح كيفاه عرفت...وقفت و خزرتلها و هي تتبسم...نحس بيه كي يبدا موجود هههههه
- يطلع منك والله ابهرتيني... ايا يزي مالضحك و ارزن قبيلة كنت باش تزقلي عضمة يا شومي. . دخلت بيها وين كانت الجماعة تتحاكى و تضحك..
مشات سلمت على خلاها الحاج علي... اقعد بنتي ماتحشمش ههه... تلفت للطيفة.. و الله و طلع كلامك صحيح يا مرا...
-لطيفة تبسمت باش تنقصلها من توترها عارفتها مغصورة مسكينة..تبسمتلها...الي يقلك راهي كنتي الغالية بنت الغالية...كان موش عيب و الله ما نخرج للحومة توا في هالليل و نقلبها بالزغاريد
بوها وجهو مايتفسرش مسكين حاشم و موش عارف اش يقول.. الجماعة زادو حشموه على روحو كيفاه طايحين عليها... تبوس يدها وجه و قفى لي كتبلها باش تعيش تحت سقفكم..
-و الله حاشم يا خويا يا علي و انت يا اختي يا لطيفة مانيش عارف منين نبدالك... الطفلة رباية يديكم قبل يديا اما الله غالب الدنيا غدارة. . و ولاد لحرام يااسرة
-قص عليه الحاج و هو يربطلو على كتفو...رباية يدينا و نص و هذي بنتي قبل لا باش تكون مرت ولدي...اسمعني سي عمار احنا ليوم جينا راغبين و طالبين القرب و صدقني الولد ربي يحبو و رب ضارة نافعة..بالك ربي صنعلهم سبب باش يتوالفو و يكونو لبعضهم...احنا جيناك قبل و وقتها انت ما رفضتش انت وقتها ملزوم بناس اخرين توا تبدلت الظروف..و احنا جايين و حابين هالقرب و احنا قراب من امس موش ماليوم..خلينا ننساو الي صار ..
-انا ماعندي حتى كلمة فوق كلمتك و شورك.. الطفلة احسبها وصلتكم و كان تحب من تو هزوها ماطالب شي و ردو بالكم تكدرو رواحكم و الا تشقو رواحكم في حاجة .. هاني قدامكم هزوها بدبشها لي على ظهرها..
-كلام بوها خلا عينيها تتعبى بالدموع و الدم يجمد في عروقها..مسكينة حست روحها كي التفشة..حست روحها قداه غلطت و قداه بوها مشوي منها..بوها الي كان ما يحط خيط في ابرة الا ما يشاورها..بوها الي كان مدللها تقول بيبي..بوها الي شربة الما يعديها كان ما تبدا ايمان بجنبو...لطيفة حست بيها و غاضتها...سي عمار ايمان باش تخرج معززة مكرمة عروسة و عرسها حومة كاملة باش تحكي بيه...ماهو باش ينقصها شي...باش نكدر روحي و نزيد موش على خاطر وليد برك لاا خاطر ايمان تستاهل...يهديك يا حاج وسع بالك و العن الشيطان الكلهم يغلطو..حتى ولدي ياما غلط اما رجع..ايمان طول عمرها مسطرة بالمسطرة ما فيها باس كي تغلط نعديولها....خزرتلها تطمن فيها بعينيها...ايا ايمان قوم كب على بوك و قلو سامحني ..نعرفو راك عين من عينيه -مزالت باش تقوم و هو هز يديه يعني اقعد ترص...تنهد و خزر لسي علي...تفضل سي علي الي تقولوه هذاكة هو بالنسبة ليا ..و للي قدامك ما عنا حتى شرط...عندك حق يالة لطيفة تفرح بوليدك و انتوما على عيني و راسي و متشرف بيكم لكن هذي ..و شاورلها بيديه...معادش ناخو رايها في شي ..زازتكم و نشاله ما تخيبلكمش ظنكم عالقليلة انتوما
ماحملتهاش من بوها ليلة خطبتها و خاصة الليلة لي ستناتها... قامت تجري لبيتها حطت راسها بالبكاء تبكي بالشهقة.. كانو يسمعو فيها متأثرين بدموعها... على دخلتو هو تبدلت ملامحو طول..
-السلام عليكم... قدم سلم على نسيبو و قعد بجنبها .. وشوش لامو. .. ويني ايمان !!!
- عملتلو بعينيها اطمن فيه. . تو تجي... غمزت للحاج باش يلطف الجو...و قامتلها هي و تهاني..اما غلبو فيها و مانجموش يسكتوها..
-علاه يعمل معيا هكا !! فما بو يعمل في بنتو هكا !! شفتو ماهوش فارحلي كيما لبات الكل تمسح في دموعها... باش يرتاح مني حتى هو ..تعرف يا خالتي الي هو ماكلمنيش ليه جمعة كاملة عايشين فرد دار تقول مو
-تربط ليها على شعرها...عيش بنتي هدي روحك ..كان انت موجوعة قرام هو راهو موجوع الف...انت غلطتي..انا عديتلك و اختك بررتلك و وليد رجلة..اما بوك لازمو وقت باش يبرد..ايا عاد عيش بنيتي الي يقلك خطيبك و راجلك يستنا وليدي و الله في حالة...شبشبت ليها شعرها حبت تهديها شوية...منيش عارفة كيفاه نجمت نصفر عليك وجهي يا طفلة المرة الي فاتت حضنتها...راهو قلبي يرف عليك تقول بنتي و الله كيفك كيف وليد و وائل
-تبسمت و الدموع تجبد ..لا عاد طاطا كان تزيد شوية تردني اختو بالرضاعة و تضيع عليا وليد بعد ما صدقت لقيتو هههه
- هههههه شوف لوحيدة.. قرصتها.. ايا احشم مني راني حماتك يا طفلة..ريت ريت يا تهاني مالا جيل..ايا ركح امورك و اخلط علينا... تهاني فاهمة كل شي و مجربة حبت تفرحها شوية... خالتي خليها على راحتها تو كان مازال حديث يحكوه حتى واحدهم ههه
-رجعو لبيت القعاد و اكا تهاني تحربط تحب تخليهم يحكيو وحدهم..هو زادة عينيه باش تطلع مركز مع الباب..وقت الي جاه صوت تهاني...وليد ايا العروسة حاشمة شوية...كان تحب ايجا معايا نخرجو للتراس و ناديلك لايمان احكيو و تفاهمو و خلي الكبار يتفاهمو في الي تابعهم...ما خلاهاش تكمل تلفت للحاج عمار يلقاه قلو براسو و عطاه الموافقة..كان موش عيب راهو قام يجري...تهاني تبع فيه كي وصلو لاخر الكولوار ضحكت و قتلو
-ايا قولو تهاني خايبة..هز حاجبو و هي طرشقت بالضحك...بجدك فيبالك باش نخرجهالك للتراس و نشدلكم الشمعة..برا برا يا ولد لطيفة ادخل لخطيبتك...
كانت تمسح في الماسكارا لي تلبزت بدموعها...هزت راسها على طرق الباب شافاتو واقف في المرايا..هبطت راسها ماحبتش توريه عينيها لي منفخين. .هو حاس بيها و عارف الي باارشا كلام صار و وجعها من بوها حب يبادر فماش ما تتفرهد.
- هههه من لي عرفتك و انت تسبحي فيهم ارحمي عينيك يا طفلة ..هاني انبه عليك راني مانحملش دموع نتقلق منهم هه
- تلفتتلو و قدمت خطوتين.. تعبت وليد تنهدت...بابا مايوفرش فرصة كان ماينبزني بيها..تخيل لكلام لي قالهولي قدام داركم والله حسيت روحي باش نموت..شدت راسها بين يديها تحب تعاود تركز مليح ..ولييد..قدمتلو اكثر وين كان متكي على حافة البيرو...خلينا نعرسو فيسع نحب نخرج من هوني معاش حاملة غزرة بابا لي تقتلني كل ما تجي عينو عليا.. بالرغم طلبت السماح منو و منك و مالناس الكل اما ...اما شي ماحنش ماحاولش يفهم راني مظلومة.. امان وليد خلينا نعرسو فيسع انا ماحاجتي بشي كيما قال هو ماعيني لا في عرس لا في جوحمة نحب نرتاح نحب تتنحى الغزرة الخايبة لي في عينيه...امان وليد قلي الي هو باش يسامحني و باش يحن عليا
-غاضتو و قلبو تفتفت عليها كيفاش وصلت تخمم كيفاه ممروجة و هو اكثر حد يعرف بوها قداه يعنيلها...علاقتهم تتجاوز حدود علاقة بو و بنتو...غاضتو كيفاه فنات عمرها تخدم و تجري و نهار الي غلطت بوها غضب عليها...حاول يتمالك احساسو باش ما يرميهاش في حضنو و ينسى معاها الدنيا...تكلم بصوت واطي كان لازم يقسى عليها هو زادة شوية باش يغلب مشاعرو...ايمان بوك من وجهة نظرو ثقة فيك اهتزت و معادش كيما قبل...مهمه و كمل...انت غلطت بقصد ولا منغير قصد اما انت سمعتش النصيحة...توا زايد نقعدو نبلو و نعاودو المهم الي ريناه في صالحك عملناه...الكلنا موجوعين منك و متغشين اما لازم واحد يكبس و واحد يرخف...العرس باش نعرسو اذا موش الجمعة هذي الجمعة الاخرة ان شاء الله و التحضيرات موش باش نقصو شي باش نعملو كيما الناس و خير مالناس...تنهد...حط في بالك الي هذي دار بوك و هذاك لي تحكي عليه بوك لي جابك و كبرك و رباك احسن تربية موش اليوم باش تجي تحل فمك و تقول نحب نخرج.. انت غلطت يا ايمان و بوك واخذ موقف كيما انا زادة مازال مابردتش اما الوقت يداوي كل شي بوك مجروح و يحس كرامتو تمست ممكن حتى بالطلب متاعي و جية اهلي. .. لازمك تخلص غلتطك... انا مايهمني في شي غير تكمل هالحكاية على خير و بوك يتهنى عليك اكثر من هكا مانجم نعملك شي... حب بكلامو يزيد يفيقها ..نعرف الي صاير انت ملزومة عليه اما نحب نفرح بروحي شوية و زيد ...زيد قدام الناس لازم نبانو عاديين ...الكلنا على اعصابنا و حد ماهو فرحان بلي صار اما خلينا نحاولو نكونو طبيعيين...و ما تخمم
<><>
#انتي_سبابي #كرونيك #كرونيكات
الحلقة 46
..كذب على روحو كذبة و مصدقها..كذبة تخليه بوجهين وجه قاسي في حضورها و أضعف والضعف في غيابها... كلامو زاد ازمها كلامو وين و كلام لبنات وين كي يحكيولها على الحب و التضحية موش كيما وليد لي كانت متوقعة تلقاه.. خشمها الواقف ديما سيد الموقف... مبروكة عليك ان شاء الله تربح فيا...سلعة وليت..بابا مستخسر فيها زازة العرس و لي محسوب راجلي يقلي في جال بوك خذيتك اش مزال متخبيلي انتم فصلو و انا نلبس... اصلا جبتها لروحي...
جاء قعد بحذاها. .شدلها صوابعها بيده يلعب بيهم موش عارف هالحركة لي جات منو شنية محلها مالكلام القاسي لي قالو قبيلة توا لقى روحو ينقادلها...حط حاجة وحدة في مخك إلى معايا مايوصلك حد مايتعدى حدودو معاك حد حتى بوك ما عندو كيف يوصلك و انت على ذمتي و زيد حاجة أخرى و هي الأهم معايا باش تعيش معززة مكرمة محترمة مايوصلك شي مني ان شاء الله.. نعوضلك كل شي في خاطر بلاصتك لي كانت في قلبي..
- مازالت في قلبك ولا ؟؟؟ ميلتلو راسها تسال فيه بملامح تترجى فيه يقولها "أي مزالت ماتخافش "
- تنهد..سبيلها صوابعها و قام.. ممكن مع الوقت ترجع و ترجع خير من لي كانت عليه.. تبسم.. انت و شطارتك عاد يا بنت خديجة كان تحب تحافظ على دارك عاود املك قلبي من جديد و لو اني نعرف آخر همك حبي ليك و الا اش نحس انا.. مجبورة تاخوني يا بنت الناس...
- انا......قص عليها سكتها ..
- ششش. .. لكلام ما عندو مايزيد توا كاهاو اقلب الصفحة و ديما لقدام... غدوة حضر روحك كمل قضياتك باهي..و انا خلينا نخرج و الجماعة باش يقراو الفاتحة..
خرجو مع بعضهم هي سابقاتو و هو مبهور بقدها. .اااه يا قلبي لين امتا مزال بتكذب لين امتا مزال تخبي و توهم فيها بنسيانها.. شوف..شوف محلاها لابسة لمطرز و حاطة بارفانتها لي تعشقها انت... ربي صبرني على لي جاي. ..كان يتمتم في سرو فيقو صوت الزغاريط تاع تهاني و امو و منيرة لي شايختلها و فرحانة بيهم ..
- اييييييه و جاء هالنهار يا ولد علي ان شاء الله مبروك عليك ..
- يتبسم و كان يلقى يضحك و يكشخ اكثر من هكاك. .عيشك منيرة ربي يفضلك...
- ايا عاد ايجا اقعد بجنب خطيبتك و لبسها هالصياغة لي تهز لعقل...تلفتت لايمان.. والله حماتك تحبك ياطفلة شوف شوف النعمة لي طيحك ربي بيها صحيح الدنيا موش كان فلوس و ذهب و فيس اما الناس لي تقدرك باهية حتى هي.. و انت حموك قدروك و جابولك حاجة من قدرك بري ربي يزين سعدك و يعطيك الوقت الطيب... زادت باستها
- ايا منيرة يزيك اش تموت من التحنيك حتى انت هههه اش عملنا احنا والله لا يغلى عليها شي كنتي...ايا يا طفل ايجا لبس مرتك لي كتب من ربي و ناكلو طرف هالحلو هههه....هزت عينيها فيه قاتلتها الحشمة تشبك في صوابعها..فرحة رعشة و دقات قلب متسارعة عاشتها و هي تشوف في حبها لول و راجلها يلبس فيها في الخاتم.. مع صوت الزغاريط هبطت دمعتها و شقا طريقها على خدها.. دمعة تحرق تمنات بيها بااارشا حاجات تمنات امها تحضر تبوسها بين عينيها و تتمنالها الهناء و الستر. .تمنات بوها يكون واقف يخزرلها و عينيه بالدموع على صغرونتو لي باش تفارقو .. تمنات وليد مايكونش بالبرود هذا و لتو ماهي فاهماتو مد و جزر. اما على حنية يديه و قتلانهم لهذيك الدمعة لي حرقتها جاها صوتو مطمن
- ششش مافماش علاش هذا الكل كان يحكي و يهمسلها في وذنها كابسلها على يدها يحب يحسسها بقربو. ..
- مخيبها بلاصة امي وليييد.. نفخت تحب تتنفس و زادت كبشت فيه...
- الله يرحمها ممكن راهي فرحانتلك تو و هي تشوف فيك. .. الله غالب..انا زادة بلاصة وائل قد صبري في الدنيا كان يقلي والله كان توصل تخطب ايمان نهار نبطلها قرايتي و انت تعرف حبو لقرايتو كيفاش ههههه
- مسكين باش ترصيلو على برة تو ههههه
- شوي اا سيدي مرتي طلعت ظامرة زادة ههههه .. في وجودها كل شي يتمحى كل الحواجز تتكسر كل الكذب يطيح في الماء و اطيح معاها الاقنعة... معاها يكون وليد العاشق وليد لي ملهوف لشوفة ترميشة عينيها.
من غدويكا براقرامو انهم يخرجو و يقضيو
حلت الباب و خرجت اول ما خزرلها عينيه طاحت على قطرة الماء الي تمردت و طاحت من شعرها و خذات طريقها لجبينها...شعرها الاسود ليل مبلول راقد على كتافها...بلع ريقو بالسيف..كان هايم بين خصلاتو لين فيقو صوتها
-السلام
-ما نجم يجاوب كان بهزان راسو...
دارت باش تركب و هو تمصمر يرجع في النفس...ركبت بجنبو و تاليفونها صونا تهاني اختها...يسمع فيها تقلها هاني بجنبو ...وي جاني علقت و خزرتلو...و هو تبسم
-صحا ليه شعرك ديما شاد جنبك ههه
- تبسمت... مازالت ثيقتها كبيرة انو يكذب عليها كي قالها موال الحب ولى خزعبلات و كلام فارغ خاطر في كلمتين مزال هابل في شعرها لي يعشقو. ..حبت تعيش الحب معاه حبت تدلل عليه الدلال لي مانجمتش تجربو مع كمال.. هي مع الراجل لي تحبو و الي متأكدة رغم صدانو ليها الا انو مستحيل يرفضلها طلب هذاك علاش باش تشيخ فيه دلول...
- انا راني بلاش فطور..اكيد ماكش باش تخليني للشر !!!
-عرفها و كشفها و عرفها تدلل و على قلبو كيما العسل حاسس روحو طاير باش يجنح ...فرحتو ظاهرة من خزرة عينيه من يديه الي تظرب عالفولون يدربك..خزرلها بتبسيمة...نمشيو نفطرو و بعد نبداو في القضيات...تبسيمة خبث ترسمت على شفايفو...ههه سقام العرايس جا ليا انا ظاهرلي انت بعيد عليك
-عوجتلو فمها ..انا كي نبدا فرحانة نجوع..حبت تقلو راني فرحانة بيك راني رغم الي صار الكل انا توا مع الراجل الي حبيتو و عشقت حبو ليا..
-ساق الكرهبة و تلفتلها...اول مرة نراك فرحانة و انت معايا هههه
-غاضتها الكلمة جات باش تجاوبو لولا اني مقطع الغناية "اتحملك لاني بحبك اتحملك ..و مهما تقسى انا قلبي بيحنلك..." خزرتلو بصحة عين...ما نجاوبكش اوكا صابر الرباعي جاوبك في عوضي
-تبسم و هو شايخ على معشوقتو الي تتمقعر و جايبة ما عندها..احساسو ما يتوصفش و فرحتو موش عاطيها لحد...مدلها باكو حلتو تلقا فيه برشا فلفول ..مزلت باهتة و هو قلها جبتلك فلفول الي تحبو ..هي كانت تحبو بالحق اما شاخت كي تفكر و جابلها...باش ينحي الحشمة و ما تشلقش بيه تكلم بتمقصيص...شبيك اجبد كول شبيك تثبت في الباكو...نعرف نعرف شلقت الي تارازان يشبهلك ههههه ما تستغربش يخلق مالشبه اربعين
-حطت صبغها موجهاتو ليها...انا تارازان و انت دينصور...
-منغير ما يشعر جبدلها يديها و حطها عندو...اي الدينصور خاطفك و هارب بيك توا ههههه
- هههههههههههههههههه .... ضحكت كيما عمرها ما ضحكت قبل عجبتها الفازة لي عملها اما هو شيطانو ديما حاضر ظهرلو في لحظتها باش يخربقها كيما كل مرة...
- يا ندرا قداه شاف هالضحكة من مرة هاك الطحان... وجهو تقلب و دكن و ملامحو تشنجت... هي بلعتها و جبدت يدها منو.. حبت تبعد على جو التكهريب لي ديما يهس عليه ياسر ولى يتحسس من حكايتها مع كمال و سيرة كمال ..
- بنينة الفلفول ... يضهرلي باش نشد بيها روحي هايكة شبعتني..تاخو منها هههه.. مدتلو يدها الصغرونة معبية بالفلفول...
-شي بلي يحاول يقسى عليها و بلي الافكار تغزولو مخو قدام خزرة عينيها يستسلم ما ينجم يعمل شي..بقا عين على الطريق و عين عليها...حس بيها كي تربثت و عرف رووحو كثرلها...تكلم بصوت ثابت...انا نسوق و نركز في الطريق و ناكل الفلفول و نحكي معاك برشا عليا..عاوني راني راجلك ههه
-بقات تخزرلو و تكلمت و هي تتبسم..اي انا نعرفش نسوق راني ههه و ما نعرفش نسكت زادة ... -غمزها و الفرحة تلمع من عينيه...اي تنجمش توكلني عالاقل
- نعطيك تذوق اكاهاو.. بربي وليد تي هوما كعبتين و كعبة و لاحقني فيهم !! ايا حل فمك هايكا في شكل دبوزة كوكة هههههه. ..
موش عاطي فرحتو لحد... يشوف فيها تلقائية معاه لابعد مايكون و فرحتها باينة من لمعة عينيها و موش فاهم علاش كل الاحتمالات دارت في مخو غير انها تطلع تحبو و ذايبة فيه...
-سكت شوية و خزرلها بخبث ...ايمان موش انت تخاف مالسياقة اامجنونة
-بلعت ريقها و خزرتلو...لااااا براس امك الا سياقتك راني نعرفها ..امان وليد اش ناوي تعمل ؟؟ امان و رخات شفايفها...تقليش باش تغمني و تشريلي خاتم فالصو و تهددني بحكاية السياقة ههههه
-خزرلها و عمللها بصبعو .لا لا يا للا...حاجة ساااهلة نحبك تعملها سينون نزيد في الفيتاس و لفي بينا يا دنيا..
-امان لااااا وليد امان عيش حب.... كانت باش تنطقها كانت باش تقولها الشي الي خلاه يتلفتلها بربثة و هي تبسمت بالسيف و دخلت بعضها...كانو واقفين في الضو الاحمر ...باش تهرب من عينيه قتلو بالشوية...شنية تحبني نعمل
-كح باش يرجع صوتو...نحبك تغنيلي سينون الضو يشعل قد قد و انا نخرج بأقوى فيتاس و غير شدلي روحك برك
-شاخت بالضحك...بانو سنونها البيض الصغار...و شعرها الي يتمايل..حطت صبعها على فمها كيف الضغار تخمم و بعد قتلو اااه لقيتها...مزال مسحور بعفويتها و هيجتها و هي بدات تصفق...و تغني '''في مرة مالمرات كليت كعبة فلفول و حلمت بدينصور...قالتها و خزرتلو و هي تشاورلو بصبعها.. فلفول هربولي بولدي.
#انتي_سبابي #كرونيك #كرونيكات
الحلقة 47
..شقيت برور و بحور و غلبت الدينصور''' على طول ماهي تغني و تفركح فوق الكرسي و هو واقف نسا الضو و نسا الكراهب الي تزمر...مذابيه الدنيا تاقف و الوقت يتجمد...
-هي كملت و بدات تصفق و الدنيا تحربت بالتزمير خرج بالكرهبة و تكلم بصوت مبحاح وصل لاقصى درجات الفرحة...بعينين تلمع تكلم...غلبتو الدينصور غلبتو يا ايمان يا بنت عمار..
- هههه يستاهل الدينصور راهو مغلب عليا... اممممم ياخي مازلنا باطيين والله جعت بالرسمي تو..يتبع في كل حركة تعملها شي مايفوتو و لا يغيب على ناضرو. .شافها كيف طبست تبربش في صاكها قتلو الفضول اش عندها تلوج عليه اما صدمتو كانتلو غلبة كي رآها شادة شكالها و باش تلم بيه شعرها سواد الليل... من غير مايخمم اصلا معاش فيها تخمام بخفة منو يخطفو منها و يطيشو بالبلار الكرهبة.. هو بيدو مصدوم من عملتو تفضح سايي.. ماتلفتلهاش جملة عامل فيها مركز في الكياس... هي عينيها قلوب و قلبها يفرفط ياااسر ياسر عليها هالحب و الدلول فرد نهار.. كانت تسأل في روحها بعد تنهدت من حرارة الحب...
- اسم الله عليك ...الله لا ينهدك و لا يبيتك وحدك.. يتمقسس عليها... ايا للا هانا وصلنا اهبط كول و راك تفضحنا قدام الناس ...
-كانو هابطين شايخين عاملين جو....الفرحة الي كابتينها في كلامهم عينيهم موش منجمة تخبيها...مزال يسكر في الباب و الصوت جاه مايع مكروه متاع وحدة تتجعون
-ولودة؟؟ اي و الله لاني غالطة هههه... مزال يستوعب في الي باش يصير و الطفلة ترمات تبوس بالاربعة تسلم عليه..هذا الكل تحت انظار ايمان الي تشعل
- هو بالرسمي ماعقلهاش الله غالب عندو مديدة هارب عالدومان و الهملة...سمحني والله ماعرفتك مادمازال!!! ضحكت بتمعجين..
-هههه عندك الحق اصلك كنت غايب يا جمييل و عاودت طبست عليه باش تبوسو مرة اخرى ياخي عرضلها بيدو. ..
- ووو يا معلم شد روحك... انا نقلك خليني نتذكرك شكونك الساعة و انت واخذتني بالاحضان... زلعها الهاملة فماش ماتطفى نار ايمان لي شاعلة تغزل من بعيد و لو عارفها موش عينين الغيرة اما يعرفها مرا و تحسها...زيد القطوس لابس ميكرو و حمامر تي قول مرمة فاتحتها في وجها. ..
اش زاد هببل ايمان لي من سذاجتها ماعرفت باش تغزلو كان بسلتة في رقبتها نحاتها و شدت بيها شعرها و دخلت و خلاتو معاها..
- وليد امانك تو هذا كلام ميساء راني ياخي نسيتني و نسيت ايامات سوسة و الحمامات هههههههه
- اما ميساء يهديك تي بري روحي...تربث و عينيه معلقة في الي تعفس في طاجين تقعرو...عرفها لمت شعرها يعني اعلنت الحرب ههه حركة تعملها المرا كي تتشوشط برشا...خزر لاخرة و بنبرة باردة...ما نتفكرش و ما عندي علاه نتفكر..د...ام الزهر ما لقيت تجي كان توا !! بالك بيناتنا حرثة ولا ورثة..برا طير من قدامي اخطاني
- محسوب... عوجتلو فمها و غبرت تلوج على شكون اخر تحط عليه بلاها... هو موش عارف منين يبدى و منين يرقع... حاس بالذنب رغم ما عندو حتى يد فيها لحكاية قديمة و مشات مع الماضي لمسود لي طواه وليد من هاك الليلة... اما مجبور حاس روحو مجبور يفسرلها و يبرر موقفو قدامها لازمو يعاود يشوف ضحكتها بالرغم يعرفها صبورة كحلة كي تشنع في مخها الصغير و تركب فرس لعناد. ..
جبد الكرسي و قعد حب يلطف الجو و منها يجس نبضها ... اش طلبت !! انا نشرب قهوة من غير حليب راو !! ماتقليش طلبتهالي بالحليب !! ترصيلي نشربها بالسيف عليا مالا نخليهم يغموني في فلوسي ههه ... يتكلم وحدو و يتصنع في الضمار فماش ما تتحلحز اما شي قول هاك الحيط تكلمش ولا هزت حتى شعرة منها...
-مزال يتكلم و السارفار جابلها بتي داج حطو و خزرلو...تفضل مسيو نجيبلك حاجة...غلبتو الضحكة عرفها ما طلبتش ليه من اصلو يعني مشوشطة منو و غير قابلة للنقاش..لازم ياخوها بالسياسة...تبسملو جيبلي كي مرتي بالضبط...حتى الكلمة هذي ما حركتلهاش ساكن....تاكل و موش معبرتو اما الرعشة باينة في يديها..مزال باش يبدا يلطف في الاجواء جاه صوتها ثابت
-صاحبتك القديمة ولا الجديدة هذيكة
- هههههههه شرق بالقهوة.... صاحبتي! !! يا بنتي تعرفي توا انا متاع الشي هذا !!!!معرفة قديمة مشات على روحها موش لازم نعملولها طاولة و كراسي و هي ماتستاهلش
-تتكلم بثبات تقول تحكي على حاجة تافهة و هي بركان هايج منداخل...اي عندك حق الطفلة ترمات تبوس و تعنق و تقلي ما تستاهلش...مالة كان جات معرفة جديدة شتعمل تخليني و تمشي معاها؟؟ تحكي و شفايفها ترعش ..الشي الي خلاه يتنرفز
- اسمعني ماتكثرش مالهدرة الفارغة متاعك شنيا نخليك و نمشي هذي !! هاك تشوف على عينك الطفلة ترمات ....
#انتي_سبابي #كرونيك #كرونيكات
الحلقة 48
-الكلمة غاضتها...خلاتها تطيح طابع السكر من يديها ..هزت فيه عينيها المبحرة بالدموع...تكلمت بصوت واطي...عندك حق معنديش علاش نحاسبك...بربي كل ما انا نتمادى فكرني هكاكة...و فيقني على وضعي..اما حاجة وحدة نحبك تحطها بين عينيك...كان جيت عالم بحالي راك عمرك ما قلت كلام هكا...دورت وجها...سامحني سي وليد يظهرلي انا هي الي نرمي في روحي موش هي..ما يجينيش عجب هي عندها حق فيك اكثر مني
- لا الاه الا الله !!!! عض على لسانو... براس امك خليه يتعادى رايض هالصباح ماتزيدش عليا.. و كانك باش تحكيلي في انا و انت و هي نقلك عندي مالكلام ما ينفخلك راسك..
-تنهدت و تبسمت بوجيعة...نعرف ماكش باش تسامحني و عمرك ماك باش ترجع وليد الي نعرفو قبل..و موش بعيد تكون كرهتني اما بربي لا تبقى كل دقيقة تفكر فيا الي انا غلطت و الي انا نستاهل امان ...دموعها سيا بداو باش يهبطو...في الكرهبة جبدتلي على كمال و توا بديت ترمي في المعنى...نعرف وليد نعرف الي انت حبيتني و ستنيتني و و انا مشيت ربطت روحي بواحد ساقط و خسرت و زعمة لا ودرت روحي و نعرف الي انت نسيتني و توا خذيتني على خاطر بابا ولا الله اعلم..تبسمت بمرارة...تهنى نعرف روحي قاعدة نتحاسب على كلشي..اصلا لازمني نستكثر خيرك الي مكبر بيا و جايبني لهوني..جا باش يتكلم قصت عليه...اول مرة نحس بمرارة اليتم..امي خلاتني مانفهم شي تهاني عرست و تلهات في دارها بابا توا كايني ميتة بالنسبة ليه و انت ما تفوتش فرصة الا و تفكرني في وجيعتي...فقيرة حظ نعرف روحي
- لا فقيرة حظ لا والو انت راسك كاسح و هذاك هو... بربي يزيني من الوجايع و إلي فات و من كمال و طحينو. .و ماذابيا حكاية المنظر لي قبيلة معاش تجبدهالي خاطر انت اكثر وحدة كنت تعرفني كيفاه كنت.. و لعلمك راك نابزتني اكثر من سبعالاف مرة بفسادي و هملتي .. نسيت ولا نذكرك!!! يعني نورمالمون ماتستغربشي يكون عندي شكون يعرفني كيما الشلايك هاذم.. اتكى على الكرسى لتالي و تكلم بكل ثيقة يحب يحط حد للمهزلة لي تفتحت واحدها و يسكتها ضربة وحدة توا و مستقبلا... هاذكم ماضي يعني مشى على روحو بححح... انا يهمني في لي جاي و يهمني في روحي كيفاش وليت و نحمد في ربي على الهداية و ماذابيا تصدق لحكاية هذي اوكي !! هزلها براسو يسأل فيها...
-كي عرفتو وصل للتوب تراجعت شوية...ذبلت عويناتها شوية ...تعرف مليح انو ما يقاومش حزنها...رخات شفايفها...مصدقة و معادش تخزرلي هكاكة خزرتك تخوفني
- آخر مرة ايمان...ا.خ.ر..م .ر.ة... على اساس تعرفو الخوف انت ...حب يهرب منها من عينيها و من تذبيلتها لي تفرعسلو كلامو الكل ..هرب بعينيه بعيد و تكلم..
- ايا كملتش هالفطور المحنون و انت تقول من فطورك امس... انا قلقت برجولية هيا...
هي قامت و هو تكلم... نحي عليا هالشليقة لي عاملتها على شعرك ماخيب دين امها...
قامت تتبسم بينها و بين روحها.. نحات الي في شعرها خلاتو يتسرسب على كتافها..و سبقاتو للكرهبة
- ياخي ناوية تهبلني هالفرخة ولا شنيا حكايتها .. طلع وراها و قبل مايخطف تلفتلها ... ايمان عيش مرتي.. زرفت من فمو الكلمة و ماشلقش بروحو... خليه يتعدا هالنهار من غير عرك و نبز جاييينو العرك بعد العرس علاش مزروبة ههه مزال نهارنا طويييل و مشاورنا ماتوفاش..خلينا فرحانين لا ندور نروح بيك.. عمل بوجهو يخوف فيها.. اي اي اضحك يا للا اضحك و خليها تبان ضرسة لقعل..انت عالقليلة بضروسك انا ماطلعتلي حتى وحدة الله غالب غاب لعقل حضرت ايمان هههه....
يشوف فيها شايخة بالضحك على مساطتو اما عاطية جهدها تقهقه...
- مابنك... قالهالها و هي سكتت ديراكت صوتها غاب جملة... بلعت ريقها تحس في بدنها تكهرب..الحب يتغزل بيها و اخيرا نطقها و قال كلمة بردت على قلبها
-حركة العادة كي تتوتر حطت خصلة شعرها وذنيها و خزرتلو بقات كان العينين تتعانق...للحظة تمنت تتحشى عندو تتخبى في حضنو...باش تهرب من افكارها سألاتو...ياخي باش ناخذو من وين!!
- منين تحب انت ناخذوها... موش حاب يفهم روحو و يتحلحز... اش شاهية يا للا!! عندك مودال ولا صايغي في مخك !! يطلعش في اخر الدنيا نجيبوها صياغة العرس لي تحب عليها ايمان وليد الصيد .. غمزها و ضحك على جنب من وجها لي حمار و مشى ألوان.. حب يعطيها شحنة تاع مورال و يوصللها راك الكل في الكل و عندك عليا حق و لي تطلبو أوامر ادلل برك راني فايق بيك..
هو مسكين هكا حدو معاها موش مقصر اما مايعلمش بقلبها مايعلمش انها مريضة بيه كيما مرض هو و يدعي النسيان قدامها... ماكانش فايق بالنار لي يشعلها فيها كل مايتغزل والا يحط يدو عليها...
داروه السوق و قلبوه قلبان مرة بضحك مرة بغش اما الدلال سيد الموقف ديما.. هو مسكين موش فاهمها هذا الكلو شنوا !! علاه فرحانة
علاه فرحانة و الضحكة مالية عينيها !! علاه ماهيش تتصنع و تلقائيتها واضحة في الوقت لي كان لازم تكون حسب لي يعرفو حزينة و ماعينها في خروج و جهاز خاطر في كلمتين "ماتحبوش و مجبورة "...
يشوفلها..عين مرة عليها و مرة عالكياس ..منظرها و هي تثرث للدبش و الصبابط لي شراتهم يضحك و مرة مرة تقلو ماكارنيش تبعتك ياسر غالييين و هو يضحك و يقلها تي البس عقابها موت يا بنتي... الحاصيلو لمعة عينيها مافارقتهاش الحاجة لي مفرحاتو وقتها و مخوفاتو بعدين... هي عمرها ماتوقعت هالنهار .ماكانش يخطر لبالها تكون بجنبو و تقضي في جهازها معاه فارح بيها لي تطلبو تلقاه حاطها بين رموش العينين و يلحلح بيها و لي تقلو غالي ياسر عليك يشريلها منو زوز ..الدنيا موش سايعتها و كل مرة يثبتلها انو يفلم عليها و انو نسيانها و ماخذتو فيها في خاطرها و خاطر بوها كلو فيلم يلعب فيه قدامها اما راهي فاضحتو و كاشفتو ... وصلها للدار و تعدى القهوة .. اول مادخلت عرضتها الجماهير الوفيرة لتصيح و تسال
- اععععععععع شريتي هذا الكل يا ساقطة يااااااي. .. نعيمة باش اطير بالفرحة و تقبل و تشقلب في السيكان.. هدى كالعادة مايملى عينيها كان الثقيل الغالي. ..
- ورينا عاد الصياغة ماتقليش ارزن من متاع الخطبة !!
- والله مانعرف يا هدى..مالا سخانة... الكوفر هزو وليد اما تفرج هاني صورتو في التلفون... و على هاكي الكلمة تتنطر تبربش في التلفون عينيها باش تخرج..
- ياااااا محلاها محلاها تظهر ياسر غالية يا سخطة تركتيه الراجل
- و رحمة امي لا ..هو عاند و قالي نشروه كان هو تعرفني انا ماتحايرنيش الحاجات هذي و حتى صياغة الخطبة تكفي اما اش نعملو و زيد خالتي لطيفة ركبت راسها تطلب فيه و تعاود توصي فيه ..
- صحة ليييك هذا اخر ماطلع من عند شكون !!
- بففف اخطاني هدى تي وين نعرفو انا قالي خال امو ولا درا شنيا الحاصيلو طلع معرفة الراجل و مكلمينو خالي و خالتي لطيفة
- امممممم شوف اا سيدي الناس بالاكتاف ان شاء الله لي رشك يبخنا ههههههه
- أن شاء الله عزيزتي ..والله هذا الكل موش محايرني غير كي فقت على روحي و تبعت قلبي و لقيت وليد في اخر لحظة هذا اكبر مكسب ليا. ..
- انا لومور لا حب لا فصصاص عطيني راجل عياش تشبع في ولديه و في فلوسو هذا لي يفرهدني .. هههه اش قولك تلحمني مع وائل والله صفقة العمر
- ههههههههههه يعطيك حتى وائل موش سلام منك !!
- ماتدري عالمكتوب ...
- باهي لبنات باش تبقو تتعشاو لهنا امان! !! و زيد باش تعاونوني في القضيان خلي كل مرة نحرروا نقدو حاجة. . ان شاء الله برك تكفينا هالجمعة ..والحجامة !!! الحجامة لتو لا عربنت يا حلييلي ..
- لبنات اطرشقو بالضحك عليها كيفاش مربوثة و مفجوعة. .. مونتي عزيزتي ريلاكس ياخي تحيير و نحنا هوني !! ماتحط شي في بالك ههههه جاب ربي ماكنتش تحبو وليد افاندي
- ههههههههه يزي نعيمة امااان. .. هذاك وليد حبيبي هههه
- ووووووواجبد على حبيبي هههههه كانك عليا لا حبيب لا طبيب بايرة و الحمد لله
- ما اصح رقعتك والت تحكي عالعرس و الله تحلم كان تعرس قبلي
- باهي باهي بفففف الواحد حتى الفدلكة معاش يفدلم معاك خييت هالقردة ..اختي يا ايمان حسودية راهي اختي و نعرفها اصلا حتى صحباتي يقولولي شبيها اختك هدى تقول موش منكم. .. عوجتلها و خرجت.. ايمان تضحك عليهم كيفاش خوات و يتناقرو ..مشاو خلطو على تهاني لي وحلوها في لعشاء بالرغم تتوحم و حالتها تكرب ماشي في بالها كارهة دارها و باش ترتاح في دار بوها ايامات قبل العرس ياخي طاحت بين يديهم و حارثين عليها. ..
كان يلوح بعينيه في القهوة يعس عالداخل و الخارج فماش ما يتلامحو ... الراجل لي يعطي للحب كارو و يقدر العلاقات مستحيل ينسى صحابو و وليد مانساش علي اصلا ديما بالو عندو و مشغول منو الخدمة و بطلها من هاك النهار لي تعاركو فيه ..معاش يبان كيما قبل اصلا حتى لولاد في الحومة و القهوة فاقدينو.. وليد أكثر واحد حاس بغيابو و توحشو هالكازي بالرغم جرحو بالكلام اما يبقى عشيرو لي وصل تقاسم معاه الحلو و المر و بيناتهم ماء و ملح. .وليد كان ديما يقلو والله كان ماجيتش عزيز على قلبي و مقامك من وائل لا تدخلها داري و لا تقابلني على ميدة. .. يحبو بالرسمي و ياسر يسخفو خاطر قليل و زوالي اما ياسر ماحبهاش منو كيف حكى على ايمان الخط لحمر ... غاظاتو كيف ماحضرشي الخطبة و ماملاش بلاصة وائل ... تنهد بعد ماكان شارد بافكارو ..ترشف قهوتو و جاء خارج و كالعادة كان مايسأل مصطفى عليه...
- صطوفة
- اهلا بالعريس يا ولدي مبروك
- الله يبارك فيك خويا الغالي .
- كانك باش تسألني على علي حتى اليوم نقلك راو كان هوني و خرج قبلك
- امم باهي عيشك خويا الغالي
- مريقل حبيبنا...
صلى لعشاء و روح بعد ماجاب للطيفة كدس قضيات مالمغازة حربتها الدنيا بالقضيات و الوصايات
- ايا يا للا هاو قضياتك و معاش تعاود صنعتك ..يا لطيف تخليني وين نخرج و تمكنيني بالتلفونات !
- انت اش ريت ..مزال الدفوع و المصروف في الثنية.. والا تستخايبو العرس ساهل
- موش ساهل يامي موش ساهل. ..اش خلاني سمعت رايك و شريت هذا الكل...جبدلها الكوفر تاع الصياغة. .
- الله واحد تبارك الله وريريريريريريري محلاهم تلبسهم بالهناء ان شاء الله مبروكين عليك
- مبروكين على اماليهم
- وريريريريريريريريري سمحات و مولاتهم سمحة ورييرييريي
- اب اب اب اش تموتي عالفضايح
- هههه وين تشوف فيها لفضايح خليني فرحانة بيك يا غالي.. تكات تبوس في العينين مسكينة...
- هههههه ربي يخليك و يطولي في عمرك لطوفتي ... ايا اش باش تعشيني. ..
- قلت عريس خليني ندللو شويا مسكين قلبو مقطوع في القضيان
- اي ورحمة عزيزي نسخف
- عملت لولدي لوبيا محرحرة بالممالح و طاجين الملسوقة...
- و الستروناد !!!
- ههههههه مستحيل ننساه ...ايا شوف بوك كلمو قلو يزيك مالتحليق في القهاوي و ايجا خل نتعشو قداه لينا ماتلميناش على طاولة كالخلق
- باهي .
- تي سيب عاد كملتهم مورسوات الطجين يا مززغوم.
السهرية كانو قاعدين يختارو في الروبة لي باش تلبسها في احلى نهار تستنى فيه اي طفلة..صحيح حومة شعبي و معروفين باللبسة العربي اما زادة السوري يعطوه كارو...
- امونتي شو هذي تفوق .. نعيمة تحكي و عينيها قلوب مالمودالات
- لا عزيزتي ياسر مهدعة ماك تعرفو وليد
- اممممم لباشا حزار عامل فيها ..تقليش ادين جملة..
- مامسطك هدى ..الساعة وليد من قبل هذا هو ماتبدل فيه شي .. ديما يعلقلي على لبستي
- باهي سكر فمك اش عندي قلت... تهاني اش باش تلبس ..فاروق مسكين بقى يعاني من حجامة لحجامة و من كراية لكراية. ..
- ههههههه خليه اش يطبو... نوصيك الرجال ديما غيص فيهم و ديما هات ديما نحب ناخو ديما ناقصتني هاك الحاجة...
- ههههههههههههههه اسمعو يا بكات انتوما انت يا ايمان و انت يا نعيمة شفتو اش قالتلكم تهاني .. يعني ريق حبيبي نموت عليك و نتمنى نفديك بروحي !نفخوه و اشربو ماه ... هاو الصحيح عليك و على جيبو
- رفع عنكم القلم بالنسبة ليكم انتوما الزوز. ..امونتي ماتاخذيش عليهم رد بالك اتبعهم
- ههههههه مازلت بعقلي ... ييييه تفكرت ماشربتش دوايا خليني نقوم نشوف ...
- هيا الليل راح وقيت نوم زادة .. قامت يقدو في فروشاتهم وقت كانت تقلب في ساكها على حربوشتها. ..
- مالقيتوش الباكو وين هج يا ربي؟ ؟
- و على..........الليلة كلبة نعرفها بري وخيتي لوجي على دواك تتخنقليش الليلة نقعد ليلتي كلبة زادة !!
- زعما تطلعش نسيتها في الكرهبة! !
- اي كلمو اسالو يا بقرة
- موخر يااسر لا لا هدى اخطاني
- كب سعدي نا دبر راسك..وغمت على رأسها و رقدت
- كلمو عيش اختي اكيد مازال فايق يجيبهولك ...
كيف خرج مالدوش و تلفونو ضرب...
- مدام وليد الصيد
- اهلا وليد سافا... قداش توحش صوتو ديما تحب تطلبو اما ماتلقى حتى سبلة تعود تبطل لين يطلب هو..
- تقليش شتعدي برومو !!!
- هههههههههه حتى في وقتها ماعملتهاش باش نعملها تو ..أمم..بنقولك نسيت دوايا في الكرهبة امان تلوجلي عليه! !
- كاهاو !!
- و توصلهولي كانك فاضي ..
- فاضي يا للا فاضي و كاني مانيش فاضي نفضي روحي على خاطرك. .. لحظات و يكون عندك
- باهي نستناك. ....لحظات و كان في الباب
- ايا اخرج وينك
- لحظة ... تهاني..تهانيي ..تتكلم بالشوية ... وليد هاو جاء جابلي الحرابش مانبطاش...
- رد بالك بوك يفيقش ماك تعرف الليلة تولي على سطاش ....خرجت تتسرسب على طراطف صوابعها. .اول ماجات عينيها عليه تشلت طول ياخي ناوي يهبلني هذا !! كان بمريول خلعة هذا لي يبان اما مافيبالهاش الي لابس شورط معاه
- هاك مابطيتش. .. تحاول ماتسرحش معاه بارشا
- هذا دواك !! شد هاني خذيتلك واحد جديد هذا قريب يكمل.. ياخي باش تبقى واقفة اطلع !!
- لا لا مانجمش !! كانت هاربة منو ماتحبش تزيد تغرق في قربو ليها
- شنيا ؟؟؟ علاه ماتنجمش !!
- ليل وليد و بابا نخاف يفيق و ماك تعرفو
- اركب اركب و نقص حسك ياخي اش عدنا نعملو نحنا .. ركبت مسكينة شوي منو لي حبت تاخو بخاطرو و شوي منها لي كانت حابة تركب و تتسلطن عليه..مانجمتش تشد روحها انها تخزرلو ..مالمريول للشورط للشعر لي كاسي صدرو و سواعدو و ساقيه حاجات تزيد من رجولتو بالنسبة ليها..حست برعشة في بدنها و هي تتخايل في روحها بين يديه هاذم و هي مرتو..
- هههه جبتلك مورسو طجين
- هههههههههههههههههههه منين هاذا !!
- من عشانا ..نحبو برشا راني هذا
- صحة و فرحة يظهر بنين
- اي ياسر بنين. .يخزرلها بخبث .. وتفاصيل وجها
- تربثت ايا خليني نهبط...
- ستنى الساعة تعرف أطيب ولا !
#انتي_سبابي #كرونيك #كرونيكات
الحلقة 49
تي طيب الي يبيع في البلاستيك هههههه بجدي نحكي...بدا يوطي في صوتو...تعرف طيب طاجين بنين كيما لطيفة؟؟
- اي نعرف مالا ماخذة راجل نلعب هههه... تشوف فيه كيف يعض في شفايفو و يضحك لين عينيه معاش تبان.. بدات تعد بصوابعها.. نعرف الطاجين و الملوخية و الكسكسي و الكفتاجي و البريك و يجيني بنين على فكرة... هههه معناها ممكن نطلع اشطر من لطوف
-و هي تحكي وتفذلك و تتدلل بعفوية كان شايخ قلبو يفرفت بالقوي...تبسم على جنب مسح قطرة ما هبطت من شعرو المبلول و خزرلها... خير من لطيفة هذي بعيدة شوي اما متأكد كلشي منك بنين...حقا ما تفاهمناش في حاجة هههه انا راني نسهر اما انت حسب ما نعرف هاك الضو يطفى مالتسعة متاع الليل ههههه
-هههه انا راني كدجاج المعمل ننغم مالمغرب ههه اما قابلة للإصلاح يعني ...علاه انت تعس عليا !! تفكرت كي يقلها "كنت نبات تحت هالشباك مانروح كان مايطفى ضو بيتك"" ....ياخي بالرسمي كنت تبات تحت شباكي وليد !! خزرتلو بتذبيلة فيها بارشا وجيعة...
-حب يتلفها اش مجبدها في القديم و هاكي ليام ... ههههههههههههه عيشو قابلة للاصلاح... خزر لبيجامتها و ضحك...شسمها الارنوبة؟؟ و شبيها تبكي مسيكنة...مد يديه جبد وذنين الارنب الي هابط من مريول البيجاما صغرونة برشا طلعت يا طفلة...
-لا مانيش صغرونة..قالتها و عوجت فمها..و سيبلو وذنيه ارنوبي مايحملش راو
-ااه ايا باهي كي انت تحامي عليه ...خلينا نشوفوه هو يحامي عليك ولا...حب يتستي ردة فعلها و يفهم منها لوين تحب توصل و اش قاعد يصير في مخها يحس في روحو داخل في حيط من تصرفاتها لي توحي بحاجة وحد انها..... لالالا فييق وليد ...بخفة مد يديه شدلها حناكها بين يديه و هي ولات تضحك...كان في عالم اخر و هو يفذلك معاها و يلعب مع معشوقتو الدلولة..كان يخزرلها يعني في عينيها يحب يقلها علاه تعمل علاه ماكش تصد فيا كي قبل علاه متبدلة علاه تضحك علاه تفرح بفففففف باش تهبلني راك. ..
- يااااي سيبهم والله يوجعو من ربي امااان وليد ...ايست منو ماهوش باش يسيبها ياخي مالقات بيها وين كان ادغدغو من كرشو و هو قال فيها واااااك مايحملش في كرشو...
- ضحك من قلبو و هي تتفارع معاه...اه صار انتي فيبالك هكا غلبتني ستنا لحظة برك..
-خرجت لسانها و مزالت تدغدغ فيه...هههههه حاول تسكتني ولا تخليني نعف عليك هههه اعترف اعترف الي انا جيتك لنقطة ضعفك ههههههه
-يضحك و يتبربص في بلاصتو...يا بنتي ريض لا نريضك بمعرفتي...يا بنتي ما نحملش ريض
-حاول تستطيع...ريضني بمعرفتك يا سي وليد
-في لحظة شدلها يديها و حكمهم ورا ظهرها و قربها ليه كان الوجه في الوجه و العين في العين و النفس تخلط ...ايا تحرك توا...تحرك توا ماك كنت قالبة الدنيا اش قولك لو نعمل فيك لي نحب ااه !! حصلت ولا !! اش تحب نعمل فيك اممممم من منين نبدى !! عينيه من لي كانت تصول و تجول ترشقت في شفايفها.. نحب..نحبهم صوتو محسوب ضاع.. ماحس روحو كيف في ثانية قرب لشفايفها يحس بنفسها سخون و شفايفها يرعشو هو بيدو ماكانش خير منها كان في حالة مسكين..خزرلها بعنين ذابلة يشوف فيها مغمضة عينيها بالقوي كاينها تترجى فيه مايبوسهاش اما هو ديجا وصل لشفايفها عدى عليهم شفايفو بشوي..لكن..
- وليييد لااا اماااان ... ملصت روحها منو وحطت يدها على وجها.. نتخنق كي يقربلي حد هكاك..
- !!!!! هو بكل استنكار قاعد يسمع فيها شبيها بوجهين شبيها مزاجية للدرجة هذي شبي تصرفاتها مباغتة الكل... كانت تضحك لي يشوفها يقول ميتة بالحب فيه اما....
- انا مانحملش ..نحس باش يصيرلي كيما هاك الليلة.. مانحبش تعاود نفس الكابوس ..نحب ننساه وليد... نحب نخرجو من مخي.. لعنة هبطت عليا موش مخليتني نقدم موش مخلياتك تقربني و هذا حقك..تحكي بربثة تحب توضحلو و مايفهمهاش بالغالط...
- اششش.. انا ماعندي عليك حتى حق و انت ماتحبش حطها في مخك انا لي نضعف ساعات بالرغم قاعد نربي في روحي على بعدك مالكوتي هذي .. اما نضعف الله غالب ..
- نوعدك وليد نبرا نوعدك نبداو صفحة جديدة فيها كان انت و ان......
- ماتوعدني بشي ايمان .تو تجي بطبيعتها يزينا و نحن نحسبولها..اسكت و معاش تععب مخك عيش امونتي... عنقاتو كاينها تستمد في القوة منو.. كان حاطت دقنونتو على راسها و مرة يغرس خشمو في شعرها. ..هي لابدة و خانسة الظاهر مستحلية التعنيقة..الحاجة لي مستغربها هو و بالرغم تعاودت برشا فازات بيناتهم..الا انها مابعدتوش ما خافتش منو كيما كل مرة...عاود يسال في روحو ...زعما تطلعش بالرسمي ...؟؟، لا لا تي الطفلة مستقوية فيه لا اكثر و لا اقل .هواجس كان يعاني فيهم مسكين..يلقى كان صوتها لي قص عليه...
- احم. ..خ..خندخل..بابا نخاف يفيق..ملصت روحها منو بالسيف على قلبو لي كان شاهي قربها و الشفايف لي يتراعشو عليها...حالف كان مايذوقهم و يملأ حرمان السنين منها ..
-كح بالشوية و خبا يديه و الرعشة الي فاضحتو..تبسملها كانت عينيه تتلمع...برا و رد بالك على روحك...جات هابطة و هو وقفها...و الارنوب رضيه تخليههش يبكي.
تبسمت جات دايرة و هو عيطلها...امسحلو دموعو عاد تنساش...كتفت يديها و قتلو...
-كهو ولا مزالت فما تمقصيصة اخرى..تبسم بخبث...
-معادش تدخل في حرب انت موش قدها.. -هههههه يحرزلك جيت قدام الدار و خايفة لا بابا يخرج ..تحكي و حاطة يديها في جنابها و تتحلف.. -شنوة كي هبطتت وليت جايبة ما عندك .ههههه -ضحكتلو دوختو..تكلمت بصوت واطي..ايا تصبح على خير -مات بالضحك و شاورلها بيديه..و الساشي متاع الدوا ولا تدخل للبنات بعد ساعة لاك جايبة خالتك لاك معيدة عندها كيما يقولو ناس قبل -ماتت بالضحك و رجعتلو طبست مالبلار و خذات الساشي من يديه -مزالت باش تدخل و هو عيطلها تلفتت...عملتلو بيديها شنوة...توا شنوة توا...تتكلم بالشوية...شنية نسيت اخر؟؟؟ -اي كنت نبات كابي تحت هاك الشباك الليل و طولو..هذا قبل اما لحاجة الاهم هي انحيلك هاك الخامج و الخمج متاعو من مخك ...خلا عينيها لا تعرف تدمع لا تفرح من كلامو لي لكلو رجولي و وعود تاع راجل ماينجم يكون كان الأمان بالنسبة ليها ...
روح راكا كرهبتو و قعد فيها عمل سيقارو "" يا طحان كان اطيح بين يديا و الله و حبي لايمان مانيش وليد كان مانعاودلكش طهور من اول و جديد.. يجيك نهار و تحصل يا ولد الهاملة... لازمني انحيك من مخ مرتي لازمها تنساك و تنسى لي عملتو فيها بيديك لممسوخين يا كلب..."" زاد فد عالسيقارو لي كمل جاء هابط ياخي تفكر حاجة جبد تلفونو بقى يخزر للنومرو متردد و بعد طلب
- اهلا بالدقلة
- وليد الصيد !! ههههههه يا ولدي بهيم شكون باش يموت لي طلبتني
- هههههه يا ولدي ماسقطك.. الساعة انا باش نعرس قلت نكلم هاك المغبون
- شكون باش يعرس !!! انت؟ ؟ هههههههههه ما مغبونة كان مرتك شوم ايامها
- باهي سكر فمك هذا فاش فالح..و بعدين الله يهدي و يثبت و الحمد لله
- لا الحمد لله اش قلنا نحن. . سكت شوي اما مانجمش يشد روحو بالضحك... هههههههههه نتخيل فيك عريس و الله صاحبي موش حابة تركبلي في مخي
- تو نفورماتيه مخك بمعرفتي تو تركبلك وقتها و بالقدا زادة...
- ااااااه و الله فارحلك يا وليد تستاهل رجلة راك و تعرف صاحبي رقبتي سدادة ..كان خويا ملزوم في قضية انا حاضر..تي احسبني وائل و رأس خويا
- عيشو دقلة. ..مهمه شويا... و الله قاصدك في قضية بالرسمي اما ...
- اما شنوا !! ياخي بيناتنا قضايا وليد نسيت لي عملتو معايا في عرسي! ! والله لا نرجعلك خيرك و كان نعطيك عينيا
- اش تكذب اش تترهدن و اش تقدو. .. اش عندي عملت
- خليني ساكت مللخر خيرك سابق و هالساعة السعيدة لي قصدتني فيها باش نرجعلك شويا يا صاحبي
- تي موش انا ...نقصد موش قضية قضية.. تي مرتي..
- مرتك حاجتها بيا في قضية ؟؟ اش مجيبني لمرتك !!
- زايد بهيييم ..مانيش عارف كيفاش وليت كونطابلي في البنك القطري..
-ههههههههههههه ..بالرسمي شبيها المدام !!
- المدام متاعي لازمها تقابل المدام متاعك.. اما نحب نمهدلها للحكاية موش نصدمها بيها.. اما زادة الوقت يجري تي جمعة الزح مازالت
- لباس ماهو ؟؟؟
- أن شاء الله لباس..
- باهي اش قولك تعمل طلة تفطر بحذنا و منها تحكي لمنى على الحالة و هي بطبيعة خدمتها تفهمها...
- الفطور صعيب... خلي بالك نطلش عليك غدوة في الليل..
- باهي هاك نومروها يا خويا مانغير ماتكسرلي راسي احكيلها و فهمها و ان شاء الله لباس
- ههههه المشكل موش غادي. .المشكل في اللبة لي عندي راهي كان قامت ماتخليش ربي يستر
- الله المستعان انت طاح فيك ربي و جابلك لي يغلبك
- ههههه والله مغلوب يا صاحبي
- مالا تفاهمنا غدوة الحي اكيييد
- اي اكيد و انت علاه شاد الصحيح
- ههههههه ماني باش مانقضيش و نتورط في قضية نحط فيها شطر شهريتي و بعد تجبد بيا
-ههههههههههه يخليهوملك زايد الجيعان جيعان برا يعطيك فلسة على قريب
- عيشو بيكش
- بيكش ولى بلاش ههههههههههههه
من غدوة قامت الصباح بكري على صوت بوها لي يدندن كيما العادة فيقت الجماهير لي تشخر و بداو يكملو في القضيات متاع الدار ... هو رقد مع الفجر ماحبش تغمضلو عين يخمم في مرت صاحبو و كيفاش باش تشوف الحكاية متاع ايمان ... هو ماغايضو شي كان حبيبتو و صحتها... صحيح مرتاحة معاه اما موش كيما يحب ..يتمنى ماتعاودش تشوف فيه كمال يتمنى ينسيها في لي عاشاتو الكل و قلها هنا الامان لي تلوج عليه.
لكن خايف..خايف تفهم و بالغالط و تتسرع كيما كل مرة.. هادية و طيوبة اما طبيعتها مزاجية ساعات و تبدأ تجرح بالكلام و تقوم ماتقعد... لازم يلقى حل مايوجعهاش بالحكاية خاصة انها حساسة ... يتخبط في فرشو كيما عدى ليلو كامل يتقلب مايحس كان بساقو تحطت على حاجة غريبة.. طفى الضو و عاود غم على راسو اما الهم يتحرك طلع تحت ساقو..هز راسو يلقاه مبطوح بجنبو في شورط ازرق عاطيهولو مرة في البحر...
- حومة هههه
- و الله عرفت فما حكاية من ريحة الشراب لي عبت الدار يا هامل
- توحشت د....امك و الله ....و برك عليه ... ههههه هات خمسين دينار خوك فالس
- هههههه ياخي ماتحشمش في عوض انت تمدلي نحيلة..تنسل فيا !!! و ابعد الساعة شنيا هالريحة لمزفرة لي فيك ماتسمعش بالدوش يا اخي بفففففف
- علي مهمه شوي و بعد رجع عليه. ... هاو باش يذلنا عاد على طرف الجراية لي رقدنا عليها و الدوش لي باش نعملوه
- باهي....استوى في قعدتو و توسد الحيط وراه. . وينك !! وين غبرت !! لا تقول وليد وحدو لا شي حتى تلفون استكثرتو في خوك ؟؟؟
- انت زادة ماسالتش عليا لا ميت لا حي
- و الله مسكين يا علي والله.. تي سقيا حفات و انا نلوج عليك عملت العار في القهاوي ننشد...و ستنى الساعة تو هذي عملة رجال تبدل نومرو التلفون !! كاهاو مالا سكر عليا ماتقليش ماطلبتكش اما انت موش راجل مايثمرش فيك
- انت عاد زعيم في التجريح ..ياخي نسيت اش قتلي ؟؟
- لا مانسيتش. ... قام بلبس في مريولو ... مانسيتش تعرف علاه !! و خزرلو بحدة. .. باش نتذكر لكلام لي قلتهولي لي وصلتني بيه في مرتي و عرضي و انت اولى الناس و اكثرهم دراية بالموضوع
- اش تشد في قلبك يا خرا سامحنا باهي
- سماح صاحبي ..يصير عالرجال
- باهي هات خمسين دينار
- ههههههههههه ذيل الكلب تسمع بيه !!!
- نسمع بيه كان هو ههههههههههه... و برك عليه عنقو
- والله كان ماجيتش ....
- نعرف و حقك عليا سامحني غالط على طووول..و حتى ايمان لازمني نطلب منها السماح
- لا خلي تو تواتي. ..توا نحبها تبعد على التوتر مالحكاية هذي
- باهي ... انا شاهي حمام برجولية
- ههههههههه مزال عاد تو تحظر في حمام العرس
- بفففففف والله ريحة الشراب خايبة بالرسمي
- مثبت شراب كاهاو راني نعرفو مليح
- تي سيب روحك و انت كبشت ...ايا ايا خلينا نفطرو راني باش نموت بالشر
- هو جاء خارج و وليد شدو من كتفو. ..علي رد بالك على روحك
- هههههه باهي ماما
- مابلدك...شحطو بكف على اذنو
لطيفة مسكينة من لي رات علي حربتها بالبكاء تفكرت وائل و تمناتو يحضر لعرس خوه...زيد ماعندهاش بنات.. الحاصيلو ماسكتت كان ماكلمهولها وليد و شافاتو بالكام باش بردت و طبعا سي وائل فاح في خوه كالعادة على فازتو كيف جبد بيه في اخر لحظة و هاك الفيزا لي حرقها و الخدمة و الكونترا لي سهر ليالى يركحلو فيه اما في لخر مكتوب ..يا سيدي ما سكتو كان ماقلو بالكشي نعمل طلب عليك مديدة أخرى هذا كان ماروحتش
صبحية تعدات بين قضية و تسييق و تخييش بالنسبة للبنات و سوق و شريان مابل و أثاث اخر بالنسبة للولاد ..
- اي اي اي تعبت برجولية يزي يزي غدوة نكملو
- لا لا غدوة مانيش فاضي عندي طبعان للاستدعاوات يا خرا اكبس روحك شبيك عامل هكا
- يا والله نهار مغبر. .انا طبت راني. . ياخي لبنات مايطيبوش مالهومان و الدوران نهار كامل !! كان يحكي و يفارع في السيكان لي معبيين بحوايج الديكور
- تي فكنا يا علي تو وقت دقان حنك! !! تشوفش في امي مخنوق بالقضية و زيد السخانة عملت بالعاني ليوم
- ههههههههه ماك تحب تعرس والا !! تحمل امالا .. اش لازك على لخرم هذي الكل
- باهي باهي زيد تشمت انت يوريني فيك نهار يا هامل. .. عداوها ثنية كاملة كالفار و القطوس..وليد خلوقو في خشمو شوي مالستراس و شوي مالقضيان لي ماحبش يكمل و الوقت لي ضبطو و اكثر حاجة كانت موهقاتو هي كيفاش باش يعرض حالة ايمان للبسي الحاجة لي خرجاتو من عقلو و خلاتو يربخها معركة مع الخدامة لي في الدار و طردهم الكل ... علي باهت فيه يعرفو معصاب اما موش في صالحو لي يعمل فيه زيد جاب ربي الدار جديدة جوست ريتوش تاع دهن و ثريات جدد مودارن....
ايا سيدي ماوصلت آخر العشوية كان ما البنات بيلو مالتعب مساكن لي عند الحجامة تعربن و الي في الخياطة تفصل و الي في الدار تنسق و ترصف و نجيو لعروستنا لي لاعبتها عروسة عربي و حاربتها بالماسكات و الحجبة هاو نشا على خميرة عربي على ماسك ياغرط طبيعي الحاصيلو جو فيها.. كانت طايرة بالفرحة و هي في خطواتها لولى في حبو... حبت تكون احلى من قبل احلى لدرجة كي يشوفها يحبس قلبو و مخو.. تتخايل في روحها بالروبة و الماكياج السينيي و التسريحة لي ختارتها هي و لبنات و قصانها في شعرها لي دوبة قصت فيه اما خايفة لا يعمللها عرعور... و الحنة لي تحبها من قبل و زادت حبتها خاطر باش تتعمل على اسمو... حاجات خلاتها تبعد شويا على جو الحزن و الخزرة القاسية من بوها.. تبعد و تعيش اللحظة و تفرح بروحها كعروسة و تزيد تفرح خاطر وليد عريسها
#انتي_سبابي #كرونيك #كرونيكات
الحلقة 50
بعد أذان المغرب تفاهم الحاج علي باش يزور الحاج عمار في الدار باش يعطيه الشرط.. حبوها الدنيا الكل تمشي حسب لوصول و العادة و خير مالعادة... اما ديما الحاج عمار كان مايعوق فيها و ماخلاهمش يدفعو فرنك ..
- لا عااااد يا عمار مايجيش راهو هذا حقها و هديتنا و حتى الشرع يقول هكا
- نعرف و الله نعرف انا قلتها و نعاودها ماطالب شي راو خيركم سابق و يرحم ولديكم من فوق
- شوف يا عمار توا بيناتنا هالكلام راو لي يضيمك يضيمنا و رانا عيلة وحدة تو كان بالرابط هذا و لا قبلو... بعدين رانا ناس عربي نفهمولها و نقدوها خوذ شد هدية بنتك ماك تعرف كان نروح بيها ترصيلي نبحث مع اختك لطيفة
- هههههههههههه يا رسول الله.. هات على يمينك هاهم في يدي... يا تهاني... بنتي ايجي. .. جات سلمت على الحاج علي و قلها توصلهم لايمان هذام شرطها و تفهمها تنجم تأخذ بيهم اش ناقصها كيما تنجم تخبيهم هي حرة... خلاتهم يكملو في سهرتهم و هدت عالبنات في البيت وين كانو كالعبابث بماسك الطفل لخضر...
- هههههههههه شوف اش عندي
- منين ليك يا هم هذا الكل !! امان عشرة لاف عربون الروبة اماااان
- برا هانو بوك يا هدى اش تموت عالتنسيل اب اب اب.. هاذم لايمان... ايمان صاحت طووول
- ليا انا !!!! منين جوني !!
- هاذم شرطك يا بهيمة المهر كيما يقولو يعني من حقك
- قداه قداه. .. نعيمة تحكي و يديها في الصحفة مازالت تفارع في وجها..
- 800د. ..تخيل الحاج علي كان باش يزيد يدفع غير بوك حلف اصلا ماكانش حاب يهز من اصلو
- وووووه شنيا موش حاب هذي !!! يا ميييمتي بوك هذا مصعبو
- لا موش هكاك نعرف بابا متغشش مني هذاك علاه كل حاجة يعملوها هوما و الا انتم يستكثرها فيا.. و دزت عالبكاء. .
- يزي عاد عيش اختي ..تو باهي تبكي و انت في جمعة عرسك !!
- ايي موش باهي امي تقول عواشير ماتبكيش يزيك
- استغفر الله... حتى هو خالي علي موش لازم يجيب هذا الكل
- قامت هدى تبهذل فيها... يا بهيمة افهم راهو حقك و بعدين ناقصاتك مليون قضية لجهازك ياخي تحبي دارهم يضحكو عليك و يقولو ماجابت شي !!!
- لا مايعملوهاش علاه يضحكو
- لا يعملوها و مانيش نحكي على لطيفة اما لطيفة عندها خواتها و لوزاتها و نساء خوتها و لسان النساوين اش يسكتو ..حتى ولو راجلك عاملك كارك و مقدرك اما ماتخرج كان بحاجة تسترك قدام الناس. . اعرف الي في بلادهم هوما اكبر عايلة غادي يااسر معروفين يعني تخيل ناسهم لي باش تجي كيفاش زعما !! خدم مخك يا بهيمة. .والله كلام هدى ساعات يطلع فيه ثمرة
- خييييت مسقطك تهاني
- ههههه باهي على خاطركم برك باش نهزهم... ههههه هاتولي فلوسي ههههههههه
- يااااااا محلاكم ربي يخلينا لبعضنا. .والله نعرش كيفاش بنفارقكم و نمشي نقرا...
- نرتاحو منك يا بطبوطة...
- مخيبك هدى سيب اختك. ..تو تعرسو و تبداو متوحشين بعضكم ..هاني نشوف روحي كيفاش على ايمان المدة لولة لين مرضت من بعدها. ... طبست عنقتها و باستها... الأخت مايعوضها شي والله ..
مع التسعة كان وليد عند صاحبو سليم... فرحو بيه هو و مرتو عاللخر قداش ليهم ما شافوهش من عرسهم لي ليه 6 سنين...على الميدة تفكرو ايامات الفاك و جو القعدات و المغامرات و ايام العزوبية و لحظات الفلسة و الميزيرية... من ضحكة لضحكة نساو همومهم ..وليد نسى شغلتو بحكاية ايمان و سليم و منى ضحكو و بعدو على مشكلتهم تاع قلة جيبانهم للصغار ...
- ااااه والله قداه ليا على هالقعدة.. نهار كامل وجهي في وجه مرتي فديت
- يا حسرة عليك .. وليد خويا ماتصدقوش راو ياسر يفلم.. وانت سي الشباب ستنى يروح وليد تو نتفاهمو
- ههههههههههههه يا جماعة وسعو بالكم نجيش نحل مشكلتي ترصيلي نحل في مشاكلكم! !
- سكتت منى بعد ما كانت شايخة بالضحك... مشاكلنا اش يحلها باللاهي..و تنهدت ..
- صغرونتي ربي كبير راهو.. الحمد لله على كل حال
- أن شاء الله ربي يطعمكم و لا يحرم حد.. و العلم تقدم و باارشا حلول و عمليات قاعدة تصير ناس كانت مأيسة من مالحكاية و بعد جابو. .انتوما مازلتو صغار و العمر قدامكم ..اسعو ماتأيسوش
- منى مسحت دمعتها. .. انا يا وليد يا خويا تخنقت من العباد و من دارنا و دار حمويا الكل حافظين كان كلمتين "" فماش حويجة "" تعرف تعقدت لدرجة معاش نحب نخرج للعباد وصلت باريود كرهت خدمتي نحس المرضى لي يجوني كي لي ساخفين عليا بالرغم مايعرفونيش و مانعرفوش حياتي الخاصة
- هذاك شيطان الله يلعنو انت مرا ناضجة تصلي و تخاف ربي و مؤمنة انو الباهي و الخايب من عندو سبحانو.. احمد ربي لي لمكم لبعضكم و خلاكم تعرفو قيمة بعضهم و تحسو ببعضكم...
- الحمد لله على كل حال .. ايه منى يزي و انت فتحتيلنا مناحة .. تو الراجل قاصدك في حكاية باش تعاونيه تقوم تفرغلو قلبك باش يزيد يتازم ..ايا عاد لا يقول مرتي موش كوبيطونت و يشكك في قدراتك
- والله يا منى لاني فاهم اش مصبرك على هالازرقة القذرة تي طلق الكازي و ريح مخك
- برا قود سيبلي مرتي و انت تحرض فيها .. تبسم لمنى.. هذيكا ممو عينيا و ربي يشه
-هههههههه ربي يخليكم لبعض اش يقول الواحد ...
- لحظات نلم الميدة و نجيب في يدي حويجة نشربوها و نخلط عليكم ....
كانت مركزة معاه تسمع فيه يحكيلها في تفاصيل حكاية ممكن تكون سامعتها للمرة الألف من بارشا ناس كبار و صغار نساء و رجال.. نفس المشكل لكن كل واحد و الحالة متاعو... خدمتها تتطلب منها تكشف شخصيتو هو زادة و كيفاش يتعامل مع الموضوع و الحاجة هذي مهمة خاصة في تأثيرها على المريض.
سكتت شويا بعد استوات في عقدتها و حكات..
- تو حسب ما حكيتلي انو مافماش اغتصاب
- اي هكاك
- باهي افهمني مليح يا وليد الحالة متاع ايمان موش بالصعوبة هاكي اما زادة لازمنا مانستهنوش بيها.. هاو شنقلك علاه خاطر مرتك تعرضت لحالة مانجموش نسميوها تحرش و مانجموش زاد نسميوها اغتصاب يعني بيناتهم مثلا انجمو نسميوه اعتداء جسدي و لفظي. .
- منى عيش اختي خوذيني على قد عقلي راني مافهمت شي
- انا هاني باش نحكيلك و انت حاول تفهم مرتك خاطر كي باش تجيبهالي باش ندخل معاها طول في العلاج أحسن ليها مادام التأثيرات أقل حدة معاها... التحرش في اللغة هو كل فعل عنيف او لفظ بذيئ فيه نوع مالتتمييز و الحقرة و يكون مشين صادر من شخص عندو اكثر من سبب باش يعمل السلوكات هذي.. الأسباب متعددة..تنجم يكون بدرجة اولى مرض نفسي ناتج عن ما يسمى بالفصام او إدمان الكحول و المخدرات و اضطرابات شخصية أخرى ..باهي هذا الكل مايعنيناش خاطر لي حكيتهولك مايشملش ايمان خاطرها الضحية..
- عطيني لي يشملها و اش لازم نعمل
- صحييت خاطر جزء كبير باش يكون على عاتقك انت قبلي انا و قبل لونتوراج متاعكم...اهم حاجة لازمك تراعيها و تتحملها.. هي تعرضت لانتهاكات نفسية أكثر منها جسدية لحاجة لي تخليها تحس انو كرامتها تهانت و يصير عندها هاك الحس بالعار و العبئ
- اي ديما تقلي انت مجبور بيا و بابا باش يرتاح مني
- و هذا الكلام باش يصدر منها ديما لين تتعافى.. حاجات أخرى زادة تنجم تعيش حالات مالشرود و الذهول ساعات زادة تفقد القدرة انها تحكي كليمتين على بعضهم مرتبين تدخل بعضها يعني... في الحالات المتداولة تعيش نوبات مزدوجة تنجم تغضب و تهدى بعدها..نوبات لبكاء المفرط بسبب و الا بلاش...
- و لله كلامك صحيح يا منى... و الله معاش حامل فيها كيفاش ولات صحيح انا قسيت عليها أول ماصارت الحادثة اما موش بيدي وقتها كنت خارج من صدمة انا بيدي ..لمتها و حملتها المسؤولية الكاملة و هي خذات بكلامي و ولات ديما تانب في روحها و تلوم خاطر صارلها هذا الكل
- حاجة طبيعية يا وليد انها تحس و تحكي و تلوم .. خاطرها حاسة بالذنب ..ذنبها لي يمكن يصورلها انها ماقاومتش بالقدر الكافي انها تواجدت في بلاصة مايلزمهاش تكون فيها و حاجة أخرى إحساس العبد انو لي صارلو الكل عقاب من ربي على حاجات عملتهم و نادمة عليهم كيما حكايتك و كيفاش رفضاتك في الوقت لي انت نصحتها و كذا...
- منى انا هذا الكل مايهمنيش والله نسيتو و مستعد نبدى معاها من اول و جديد و متفاءل خاطر نحسها تميلي ساعات اما تجيها لحظات تصدني فيهم تي أكثر من اني نحضنها و الا نبوسها ادخلها في حيط و يزي و ابعد. ..
- اصبر معاها شوي انت زادة و حاول تتحكم في روحك هههههه
- والله لا يا منى موش قصدي لي فهمتيه انا حبي ليها اكبر من مجرد بوسة و تعنيقة انا موش حامل فكرة نفورها مني ساعات و زيد جمعة و تولي مرتي يعني دار وحدة بيت وحدة و فرش واحد راهي تدخل فيها بااارشا حكايات..
- نعرف نعرف هذا لي باش نخدم عليه انا و لو انو الحالة موش مستعصية خاطرها البنية مزالت بين مد و جزر خايفة تقدم معاك لكن كابوس الماضي ملاحقها و انا نلوم دارها و نلومك انت بدرجة أولى خاطر تقاعستو في عرضانها على طبيب. .
- وقتها انا ماهمتي في شي كان ننقذها من كلامات الناس لي ماترحمش و نرجع لبوها هيبتو خاطر متعلق بيها
- اممم... باهي انت في أقرب فرصة جيبهالي لازمنا نبداو. .و اهم حاجة إنها تقتنع بلي قاعدة تعمل فيه و حاول ماتذكرش بحذاها سيرتو خلاص
- ان شاء أما خايف تفهمني بالغالط خايف تعاود تشكك في حبي ليها و يتصورلها حاجات أخرى
- نقولو ان شاء الله لا اما كردة فعل منها راهي طبيعية.. ديما حط في مخك كلامي قبيلة
- باهي نجيبهالك غدوة !!
- باهي كلمني نومرويا عندك و ان شاء الله لباس
- ان شاء الله ...
- اما انت حكايتك حكاية يا صاحبي .. اييييه يصير عالرجال والله... لمرا لي يعمل على خاطرها راجل هذا الكل عمرها ماتطلب حاجة و لا تتذمر من حاجة..
- يا ولدي عينيا نعطيهوملها غير ترخف شوي و تحبني كيما انا هابل عليها
- و الله المؤشرات توحي بالايجابية
- بفففففف مامسطك و انت تحكي بلغة البنوك و الميزيرية
- حقه ماكش ناوي تعمل مطلب في بانكة و الا حكاية
- ههههههههههه فك عليا هاني خدام على روحي و المصوار موجود. . زيد هاني مستثمر في البانكة
- وين !!
- التجاري بنك. .
- بقداه !!
- ب 140 مليون و حكاية
- ههههههههه يا اخي ايجا عندي علاه خيرنا ماشي لغيرنا
- هههههههههههههه
<><>
<><>
انتي سبابي
من انجح الكرونيكات التونسية الشعبية
 |
الحلقة 51
من غدويكة مع العشرة و بعد ماروح وليد مالدار وين شاف الخدامة وين وصلت و ما مايتهنى عليهم كان بحظور علي لي رغم موش عاجبو هالمدة اما ميسالش تو يتلهى بيه خاطرو موش حاب يسيب اولاد لحرام لي يتبع فيهم. .. كلمها بالتلفون و قلها حظر روحك عنا وين ماشيين. .هي ماعليها كان عملت كيما قلها و قعدت تستنى فيه هذا الكل و هي تقيد في ورقة الحاجات لي ناقصين هاوكا فرد مرة كي يخرجو ماينساوهمش... نص ساعة و كان عندها خطفها و خرج عجاجة... من لي ركبت لقاتو لاهي فالتلفون ..غمزها و كمل يحكي..
- اي هانا خرجنا
-...........
- لا لا مسافة الطريق انت جوست حاول ماتعطلناش ههههه
- .......
- باهي باهي ربي يعينك الى اللقاء.. هلق و تلفتلها...
- صباح الخيييير .. يحكي و يتبسم
- صباح النور .. هاك شايخ هههه اش فما
- هههه والله نحب نفرح هكا خترلي اليوم. . اه انت سافا كملت قضياتك !!
- لا مزال. .ماك قتلي ماتخرجش مالدار كان معايا..و جبدت الورقة ترددت شوي و بعد مدتهالو.. انا قيدت اش مازال ناقصني هوني خاطر طا لطيفة قاتلي قيد لي تحب عليه و تعطيه لوليد تو يجيبو ..
- هات جاي طبعا ماو وليد وزارة المالية عاااد. .. ااا حليلي يا ربي من نهارت لي قلت باش نعرس و انا ندفع
- هههههه باهيلك الدفوع.. نقصد طا لطيفة قاتلي هكا قوليلو كي يبدى متكدر بالدفوع
- اي اي اي اي من توا عملتو حلف انتوما !! باهيي يا سيدي ناخذو لي تطلبيه يا للا غير أرضي علينا اما موش اليوم.. الورقة هاي في جيبي و تو نجيبهم باهيشي هكا
- باهي ..ربي يفضلك
- اممممم ربي يفضلك هذي ماتوكلش الخبز راهي
- هذاك الموجود هههه... باهي مالا وين ماشين؟ ؟
- اصبر تو تشوف بعينيك علاه الفضول توا
- عوجت فمها مستغربة... و سكتت ...
- وصلو قدام عمارة كبيرة و مضخمة كلها بلار و الكراهب لي واقفين الكلهم ماممو ظاهرة حاجة مضخمة .. و هوما طالعين كل مرة تعرضها لافتة " الدكتور...... " .. " الدكتورة. .." " مركز الشفاء ب........." لين وقفو قدام باب مكتوب على يمينو " الدكتورة منى التومي أخصائية نفسية " مازالت موش فاهمة شي اتبع فيه و ساكتة الف حكاية و حكاية دارت في مخها ..مابطاوش درجين و عيطلهم السكريتار
- مدام ايمان الصيد. . ايا تفضل
- غزرت لوليد ديراكت.. وليد اش نعملو هوني ؟؟
- ايا تو لداخل تعرف ايا عااد طاوعني...
- بكل توتر شدت شعرها تقد فيه كيما كل مرة... انا مافاهمة شي راني.. كانت تهمسلو بشوي لين قص عليها صوت الطبيبة..
- اهلا بوليد سافا ليوم !! اهلا مدام .. مدت يدها لايمان
- مادمازال .. مادمازال ايمان.. قالتها بتوتر واضح من الموقف لي تحطت فيه...
- ههههههه وي كيف كيف ايامات و تولي مادام وليد الصيد... ايا تفضلو يا باسم الله. .. اه وليد نتصور من غير ماندخل في المقدمات اكيد شرحتلها الحالة متاعها.. قصت عليها ايمان مستغربة ..
- اما حالة !! لا حكالي لا شرحلي اصلا مانيش فاهمة لتوا اش نعملو هوني !!
- وليد !!! ياخي اش تفاهمنا احنا ؟؟... شوف ايمان حكالي وليد على الحالة لي تعرضتلها من مدة و انا هوني باش نعاونك يعني تحكيلي و نحكيليك لين تتفرهد
- ايمان بقات ساكتة و بانت عليها علامات الاحراج ماكانش في حساباتها انو يجي نهار و وليد يحكي لي صار معاها للناس ..
- ايمان عيش اختي مانغير ماتتحرج راني كي اختك و مانيش كي الناس انا مرا بدرجة اولى و نحسك و طبيبة بدرجة ثانية باش نفهمك و نعالجك ... انت كأي مرا تعرضتي لحالة مضايقة من انسان تعدى في حياتك و نقول مليح تعدى في حياتك خاطر مادامو تعدى و صفحة تطويتها لازم مانخلوش ليه حتى اثر حتى ذكرى خايبة من شأنها تعكرلك حياتك في المستقبل... وليد ساكت يسمع فيهم أو بالأحرى يسمع في منى كيف تتشحت في الكلام تشحييت من عند ايمان لي استلبست جملة... غمزتلو منى في غفلة منها باش يخرج و يخليلها المجال بالكشي تحكيش كلمة. ..
- ايمان..ايمان اخزرلي .. تحب تحكيلي !! فرغلي قلبك
- لا ماعندي مانحكي
- انجمو نوليو صحاب راهو. .. انا حبيتك و انت تشبه باارشا لاختي. .. جات قعدت مقابلتها شدتلها يدها... باهي كي تشوفني اش تقول عليا ؟؟
- مافمتكش !!
- يعني انا قدامك اش تقول عليا كمرا كيفاه زعما حياتي مثلا
- نعرش تبان إنسانة بشوشة فرحانة مستقلة قوية و اكيد دارك و راجلك فارحانين بيك
- المرا البشوشة و القوية و لي يحبها راجلها و ناجحة في خدمتها معرسة من ستة سنين و ماعندهاش صغار لتوا
- بالحق !! يااا سامحني
- ههههه علاه تطلب في السماح هذا قضاء و قدر و كان كاتبلي تو يجوني الصغار. ..
- ربي يعطيك على قد قلبك
- اما انت عاطيك يا ايمان و عاطيك انسان يحبك و تهمو مصلحتك قبل كل شي. ..
- حكايتي طويلة و معقدة ماتغركش المظاهر دكتورة
- لا عاد يزيني من دكتورة عيطلي منى
-راسي وجعني امان مانحبش نحكي
- راسك يوجع فيك في العادة !!
- لا.. نعرش.. ممكن
- باهي على راحتك... دخل وليد حب يجس نبضها معاها و اش صار.
- كاهاو كملنا دكتورة !! ... كانت موش حاملة روحها كي تحطت في الموقف هذا الف سؤال و سؤال لكن الجواب مافماش. .موش فاهمة علاه عمل فيها هكا و لوين يحب يوصل بالخطوة هذي... خلاتو لين خرج و دارتلها ... مدام منى.. انا ..انا معاش نحب نجي تخنقت هوني ديزولي اصلا مافيباليش بالجية هذي الكل و هو ماقليش.. بدات داخلة بعضها و منى حاسة عليها خاطر أغلبية المرضى ينفرو مالرونديفو لول و يندمو
-باهي ايمان هاو نومرويا..منيش باش نضغط عليك ..اما كي تحس روحك مستحقة حد تحكيلو كلمني...انا ما تعاملتش معاك على اساس باسيونت ...احسبني اختك الي تفضفضلها...تبسمتلها باش تهدي الجو....و يمكن ياسر انا زادة نولي نحكيلك و نوليو صحاب...ربي يفرحكم و يهنيكم
-ما جاوبتهاش دوبة مدت يديها و خرجت تجري
- ركبت بجنبو و طربقت الباب بقوة.. الحاجة لي خلاتو يتلفتلها كان باش يصيح عليها اما كي را دموعها ضعف كي عادتو ... هي تخنقت و تحس في روحها قداه استصغرها بفازتو هذي..غلبوها دموعها كيما كل مرة و دارتلو .... علاه ؟؟ علاه تجيب فيا لطبيب !! مريضة تشوف فيا !! معقدة و الا هبلت و الا انتش في شعري يا وليييد ..!! طبيب نفسي هذي اخرتها... كانت تعملو بصبعها ... مرة برك تمنيتك تفهمني مرة ..
-غمض عينيه يحاول يهدي روحو نزل على سنيه...هبط صبعك ايمان و نقص مالصياح ما تخرجنيش من سينتي...بعد ما حط السبتة حلها و دارلها...عدا يديه على شعرو...افففهم انت قبل علاش عملت هكا...نقص في صوتو و خزرلها في عينيها...هذا الكل على خاطرك ايمان و الله
- على خاطري اه قتلي على خاطري ؟؟؟ لا يا سيدي لا معاش تستهبلني يزيك... نفخت بعصب تمسح في دموعها.. قداكش واحد اناني والله و انتهازي زادة.. تتخم في مصلحتك و في روحك و.. و في غريزتك.. ايا مدامها الطفلة ساكتة و مجبورة تأخذني خليني نعمل لي نحب هكا صورلك مخك !!! حطيتني قدام لمرى مافهمت شي انا و هي تحكي لي في حالتك ساهلة في انجمو نتقدمو فيسع في الجلسات الجاية و تو تبرى و تو تتقبل العلاقة الجسدية مع راجلك... ياخي مريضة و مافيباليش ؟؟؟؟
-كلامها وجعو...بدا يعلي في صوتو شوية...عيشك ايمان خاطر قاعدة تغلط فيا للمرة الالف...تنهد و كمل...انا هذا الكل نجري و نجررري خاطر نحبك تتخلص من خوفك موش كان في العلاقة الجنسية الي هي اخر اهتماماتي..تفهم فيا ولا...و الله و غلاوة لطيفة انا حبيت نخليك تحكي خاطر حاسس بيك قلبك معبي و الي صار متعبلك نفسيتك...حبيت نخليك تتخلص من لعنةهاك الساقط...صوتو موجوع...منيش نخمم كان في ..بلع ريقو...في الفرش خاطر نفكرك يا للا قتلك ما طالب منك شي و ما نجبرك على شي...نيتي كانت انك ترتاح و تتجاوز هاك المرحلة...و يظهرلي منى حكات معاك في كلشي موش كان في الجانب الجسدي...منيش ساقط لهاك الدرجة...منيش باش نقلك شنية معناها تحب عبد...نحبك يعني العلاقة الجسدية اخر اهتمامي...تعرف اني كي ترفضني و كي نتحرم منك حياتي الكل ما نحسش بالاهانة صدقني ما نحسش و نعيش معاك و نحترم رغبتك..اما انو مرتي و ..و ..و روحي تبدا عندها عقدة من شخص دنيء هكاكة و انا نخزر و ما نتحركش يعني وقتها نحس بقلة رجوليتي...فهمت ...فهمت يلي ديما مستوطية حيطي و تظن فيا كان الخايب...حبيت نخلصك من احساسك بالذنب تجاهنا الكل خاصة بوك...حبيت نخليك تنسى و تعيش عادي و حتى كان انت رافضة اي علاقة بيا عالاقل نفسيا تكوني مرتاحة و شي ما يعكرلك نومك ولا يحسسك انك مطاردة من اي كابوس...حط يديه على جبينو و ضحك بالاستهزاء ...نتبع في غريزتي ...هههه ...هذي نحطها زادة في الليستة مع كلمة نكرهك و كلمة نعيفك...انا عمري ما خزرتلك هكا...بالنسبة ليا انت ماكش مرا شاهيها ولا زين يعجبني...انت بالنسبة ليا حاجة نعيش بيها...لقشة مالجنة...حب ما كيفو حب...انت...جا باش يكمل و قص..زايد الكلام
-اي لكلام زايد معايا خاطرني معندي حتى كلمة معاك.. هذا لي انت عليه قبل و زدت تمردت بيه عليا كي تكسر جناحي ..ماشي في بالك باش تلويلي يدي هكا !! ماشي في بالك تنجم تأخذ عليا القرار و تتحكم في حياتي خاطر غلطت! ! انت ممكن تتظاهر انو موش مقلقاتك حكايتي اما الحقيقة تقول انك موش حاملها اما موش فيا لاااا فيك انت خاطرك راجل بطبعو الشرقي الذكوري المتعصب لي يحب يثبت رجوليتو و و و يطبقها على الفرش مع مرا في قاموسو هو لازمها ترضخ ليه. .. و رد بالك تقلي شبيك تحكي هكا !! خاطر نقلك لي بعملتك هذي تحب توصل لحاجات معايا مانجمتش توصللهم قبل...كليمتين حطهم في مخك يا سي وليد موش وافقت عليك و سترت عليا يعني راكم عفستو عليا لاااااا انا مابيا شي و ماعندي حتى مرض لا من روحي و لا من هاك الساقط و حكاية الطبيب و الجلسات متاع وذني انساها خاطرني و رحمة امي ماني ماشية..اما انتوما الرجال تطلعو تهبطو تهملو والا يهديكم ربي تبقو ديما تلوجو على الحاجة هاكي على مرا تحللكم ساقيها و تثبتو رجوليتكم فيها...
-الكلام الكل كان كوم و اخر كلمة كانت كوم اخر....عينيه ولات ترف مالغش..
#انتي_سبابي #كرونيك #كرونيكات
الحلقة 52
- وجهو تغصر و الدم غلا في بدنو...يهز يديه للسما و يقلبلها منظرها بكف خلا شفتها تطرشق بالدم بالوقت...و الي زاد صدمها انو خطفها من كتافها و نزل عليها و بدا يصيح...شبيييك ااوووه شبيك وليت تحكي معايا هكا...شنية صحة الرقعة هذي...شنية كلام الشوارع الي تحكي فيه...كان عاطي ربي ما تهزش فيا عينيك...موش ملي عملتو معاك..لاا ملي عملتو انت فيا و مزلت تعمل...مزالت ترعش و يزيد يخطفها من كتفها لاخر و بدا يخض فيها...وليت تحكي معايا بلغة الشوارع ايمان وليت تتقبح...خاطر خايف نرعش عليك وليت طحان و استغلالي و همي كان في الفرش...كان جيت ديني فرش و حلان ساقين راني ما بعدتش عليه ..موش انت الي باش تعرفني و لا تعايرني ولا تمنعني...ما يحاسبني كان الي خلقني هو الي يعلم بقلبي..اسمعني يا بنت الناس ربي هو العالم انا شنية السبب الي خلاني نهزك للطبيبة...قلبي الي يستاهل الكي...تحرقو و يرجع يناجي في خيالك..تذلو و يرجع يخمم عليك...انا كان جيت كيما تحكي ما نهزكش لطبيبة و نحاول نحيلك الكابوس من مخك...ما نجريش و نعمل الحكمة باش ثقتك في روحك و في حسن نيتك ترجعلك...حبيتك...صنتك تمنيتك...بعدتي من قلبي الخير تمنيتلك..صدقتك عاديت امي على خاطرك...بدا يهبط في صوتو...عملت كلشي و كنت مستعد نقوم و نرقد على وجهك و يا ربي مكرمك..المهم نكون معاك و تكون فرحانة...كنت خايف من حاجة وحدة لا ما نجمش نعوضك و نفرحك...اما توا وليت متأكد اني لو شعلتلك صوابعي شمع دين امي نبقى في نظرك هكا...نحا يديه و تكلم بتوعد...عمريش قتلك حاجة و رجعت فيها؟ عمريش عطيتك وعدت و ما وفيتش؟
-سكتت..ياخي صاح عليها جااوبني..عينيها خرجت من قوة الفجعة...عاود تلفتلها...انا وليد ولد لطيفة و علي منيش راجل كان نهار قربتك يا ايمان يا بنت عمار و منيش راجل كان نهار طلبتك للفرش...و طحان ..انا اكبر طحان يا بنت الناس كان نهار حطيت يدي عليك ولا طلبت قربك...عاود خزرلها عينيه تقدح...كلامي هذا كان رجعت فيه...قول عليا ما نسواش صوردي...و غلاوة وائل الي في قلبي يا ايمان لين نموت...لين يدفنوني تحت التراب لاني باش ننسالك كلامك ليوم...مزالت مصدومة و هو زاد صدمها...باش نقلك كلمة و تو تخمم و تجاوبني...انا نجمش ناخو قرار هكا خاطر نخاف عل...عل...عليك...ماني طحان مزلت خايف عليك...انا نجمش نزيد نتسببلك في مشكلة اخرى و لبوك في مصيبة اخرى ...خزرلها بعينين حادة اما باش نسالك يا بنت الناس...تحب نبطلو العرس؟؟؟ حست قوايمها بردت و هو كمل...ايمان تحب تمشي على روحك؟؟
- ماتعرفش اشبيه جاب سيرة هالكلام توا شبيه يحكيلها على التبطيل و برا على روحك ..ياخي ساهل عليه يحكي هكا !! يعني معاش تحايرو سواءا مشات و الا قعدت يعني وصل عرسو والا لا معاش تحايرو جملة ؟؟ .. وليد ..اشش.جااب كلامنا للحكايات هذي شنوا نبطلو و شنيا نمشي على روحي !! ياخي ساهل تحكي هكا !! انت لي تقول تحبني و تموت في قربي توا تقلي برا على روحك! ! و انا لشكون باش تخليني ااه !! لمن باعثني. ..انا..و فحمت بالبكاء لين غم على قلبها و بدأت تتنفس بالقوي و تلهث. ..عرفت روحها باش تتعاودلها الحالة تاع ضيق النفس ولات تفرفط و تشاورلو يحل الشباك و الا يمدلها الماء اما ماخلط عليها كان ذبلت بين يديه دايخة وجها عمالو و يصفار ...
-للحظة قلبو رعش...ذاب تفجع عليها...وهي بين يديه مسبولة ...اول مرة غشو منها يكون اكبر من فجعتو عليها...اول مرة وجيعتو منها تطغى على رعشتو عليها...هزلها راسها بدا يفيق فيها بالشوية...حتى يديه المرة هذي ما طاوعتوش...خايف عليها اما الكلام الي قالتو خلاه ينادي بصوت واطي...حبتش تفيق ضرب يديه عالفولون..بدا يصيح لين فاقت وجها اصفر و عينيها ترعش...ستنات منو يحضنها تبان لهفتو لكن هو تكاها عالكرسي و دخل يديه للساك...مدلها الدوا ساكت..عينيها ما هبطتش من عليه...خلاها و هبط...حاول يتنفس...فادد موش طايق الارض الي تحتو...وقف ضربتو النسمة ...كل عضلة في وجهو زادت تكبست...جبد تكيف سيقارو و طل عليها مالشباك...ببرود كبير...كايني ما كانتش مريضة...نروحو؟؟؟؟
- عملتو برأسها "اي " و شدت راسها بين يديها تحس بوجيعة باش تقتلها.. من ربثتها بالعرس و القضيان حتى دواها تهاونت فيه هي بطبيعتها صحتها هشة كي تتعصب و تتغشش. .. هو عارف الشي هذا اما كلامها ديما يستزفو و يخرجو من سينتو و يخليه يصيح عليها ... يسوق و الغش باين عليه من ساقيه لي يرقلو... و كبسانو عالفولون و الدخان لي خنقها بيه .. وصلها للباب دارها و خطف الدورة كلمة مازادهاش معاها و عمل تلفون لمنى. ..
-من صوتو كان ظاهر فادد للسما...اي شنعمل انا توا..شبيها تقبلت الحكاية هكا...شبي وليت انا على باطل..انت تعرف و حكينا و فسرتلك كللل شي...قتلك و الله يا منى جيست نحبها ترجع لاباس و تتفرهد ...
- سامحني اما الغلط منك بالرسمي خاطرك صدمتها بيها و ماجبتلهاش سيرة الحكاية كان كي واجهتني بيها... المهم راو ردة فعلها طبيعية راهي خاطر يتصورلها انها أدافع على روحها ..
- ولو هي غالطة و كلامها ماسط اما ماشي في بالها ترجع في الفازة و تحبك تتوجع كيما موجوعة هي .. هذي حاجات انا نفهمها يا وليد ... خليها على راحتها و حاول تتجاهلها النهرين هاذم خليها تحس بيك بعيد و تخاف و كي تخاف تو تتفكرك و تتفكر كلامك و تتفكر الرونديفو لي عملناه و ان شاء الله كلامي معاها تو يجيب نتيجة انا متفائلة الحق و الحالة متعدية عليا و مشخصتها و دارسة الخطوات الكل ..هي تو في حالة تمرد اما تو ترضخ و تجيني ... انت وسع بالك و خليها على راحتها باهي
-جهل معادش فيه...انا نيتي اني ما نحرجهاش و ما نخليهاش تخمم لنهار الرونديفو...هذاكة علاه جبتها منغير ما نقلها..انا معاد يهمني في شي لا دراسات لا سما لا وطا ...معااااد يهمني في شي...هزيت نعاون فيها زدت غلغلتلها الحكاية في مخها و زدت بعدتها تنهد...سامحني منى اما نجم نعلق توا...
- باهي ... مانوصيكش مالا و ان شاء الله ربي يهديكم الزوز وخي
-دوبة ما علق ..يديه بقات ترعش رما التليفون بجنبو فوق الكرسي...قعد شوية...عينيه حمارت...تكلم بصوت هادي عكس الي يحس فيه...الجسر الي بيني و بينك قطعتيه يا ايمان...حكمتي عليا بالجفا و حكمتي عليا بالبعد لاخر نفس في عمري...لا مشيتي نهار خطبتك و لا مشيتي نهار الي جيت باش نسافر...تنهد ...ليوم...ليوم انت مشيتي و بعدتي مرة أخرى يا بنت الناس
نهيرين تعداو وهو لا حس لا خبر.. طاش من هاك النهار ريحتو مافماش ماراتوش و ماسمعتش صوتو... تتمحطر موش عارفة شبي عزاه كل وين تقول امورنا واضحة ترجع تتكركب...
فدت مالحكاية و تيقرت. .كل وين تتفكر كلامو و صدمتو ليها بحكاية التبطيلة تلعب عليها الدوخة. . كلام منى كان زادة يتعاود في وذنها. .كل كلمة قالتها كل تبسيمة تبسمتهالها فيها أمل... زعما !!! زعما علاه مانجربش زعما بالحق تطلع عندي عقدة من كمال !! أي بيا حاجة ريت روحي كيفاه نتصرف كي يقربني وليد... بقات مديدة تخمم و بعد هزت التلفون...
بعد نهيرين وصلتها التكسي و قفت بعد تردد كبير سمت باسم الله و دخلت تلقاها الصال معبية بالمرضى تلفتت شيرة السكريتار. ..
- عسلامة اختي
-عسلامة...تفضل اختي
-مهمهت شوية و وطات في صوتها...مدام منى ...نجم نقابلها
-عندك رونديفو ماهو..
-حطت قصتها ورا وذنيها...لا اما ..اما كلمتها و...
-اه انت مدوموازال ايمان؟؟اي الدكتورة قتلي عليك...تفضل ارتاح مدوموازال لين يجي دورك...
- عيشك... تبسمتلها و باين عليها التوتر مشات شدت كرسي و تكمشت في بلاصتها كان عينيها تلعب من وحدة لوحدة يا لندرا شنيا حكايتهم زعما كيفي زعما اخيب مني !! اااااه.... قصت عليها وحدة..
- أن شاء الله لباس اختي... تبسمتلها
- عيشك ماعليك بأس.. سكتت موش حابة تأخذ و تعطي معاها مرا ماتعرفهاش و هي بطبيعتها ماتحبش كثرة حديث.. اما المرا كبشت ماسيبت...
-صحا ليك جيت توا...انا فيبالي جيت نجمش نقدم في الرونديفو ياخي قالولي نجمش...هاني وخيتك نستنا..
- اممم... عندك الحق.. عاودت سكان تتفادى فيها اما هي زادت كبشت...
-ظاهر فيك اول مرة ههه ملي دخلت عرفتك...حاشمة و تتكلم بالسيف...اول مرة منيش غالطة ماهو؟؟
- اي.. اول ..مرة.. تنهدت برعشة في صوتها...علاه انت ليك برشا !! قتلها الفضول حبت تعرف ..
-تبسمت بوجيعة...تنهدت...انا ..انا عندي اشهرة لهوني..حكايتي مالصيف اما ما اقتنعت بانو لازمني طبيبة نفسية كان شهرين لتالي...حمد لله كنت في الظلمة و وعيت كان توا..بديت نحس في روحي نتحسن...خنقتها عبرة البكاء
- سسماحني.. تفضل امسح دموعك امان... مدتلها كعبة موشوار... ان شاء الله لباس.. الواحد يشوف مصاب خوه يحمد ربي والله ..سامحني ععلاه تعالج.. يعني كان تحب تحكي !!كانت تستنى فيها تقولش كلمة تبردلها على قلبها
-انا ...تبسيمة تعكس الوجيعة و القوة...انا تبحيرة تكلفتلي غالية...تبحيرة مع العايلة في الليل شديت الصحيح نعمل دورة على الشط...رومنسية و كذا ههه بدات ترعش و صوتها يضيع...شدني و و براكاني و ...عمل عملتو...حياتي دخل فيها تران ..تعبت خممت حتى نمشي من هالدنيا...لكن كي تشد حسيت حقي بدا يرجعلي...حمد لله عايلتي وقفت معايا...جروح بدني تنحات اما جروح نفسيتي هاني نداوي فيها ..تبسمت بقوة ممزوجة بحزن...الي صار عليا عمري لا تصورت نهار نقوم منو...اما حمد لله..مسحت دموعها...و انت ...و انت شنية سبتك لهوني؟؟
- يعني..يعني..تخنقت و الخوف بان في كلماتها... يعني ضرك !!! ياااا ميمتيي..ربي معاك ربي يشفيك.. سكتت .. انا انا كيفك كنت باش يصيرلي ما أعظم لولى ستر ربي و رضاية الوالدين... حكاتلها رؤوس اقلام ماحبتش تتحل بالحديث.. في لخر مرا ماتعرفهاش ...
قبل لا تتكلم...السكرتارة جات لايمان...مدوموازال...كي جيت المرة الي فاتت انت و المسيو راهو ما حطيتش الكوردوني متاعك...نعطيك فيشة فارغة و تو تعمرها انت و الدكتورة باهي...عملتلها براسها اوكي...
-خزرتلها المرا...لطف عليك...كي ترا همي اختي لازم تحمد ربي علي مصابك...نعرف ما تحبش تحكي و من حقك اما نقلك حاجة..
من وجهك ظاهرة مزلت صغيرة و الحمد لله ما صارش عليك كيفي...لطف عليك...سكتت شوية...سمعت السكرتارة قتلك جا معاك المسيو...تكلمت و عينيها بالدموع...انا كنت...ك..كنت مخطوبة لولد خالي...بعد الحكاية بنهار ولا خطيبي سابقا ههه ضحكة قهرة...و ولد خالي سابقا زادة...صحا ليك خطيبك معاك و محاوطك..انا لقيت كان دارنا هزو معايا الحمل...حتى عمومتي و خوالي وليت ليهم وسمة عار...فيبالك بالرغم ماللول قلنا الي ما ضرنيش...خطيبي خلاني و هو فيبالو اني ما تضريتش ...ههه تخيل مالة كان يسمعو الحقيقة ...
-نزلت دمعتها... اي حكاية المرا سخفتها.. و خلاتها تبحر بافكارها لهاك الليلة.. لملام بوها و كلام وليد للكلو من اولو لاخرو صحيح...انا عرسي بعد أربعة ايام و الحق خطيبي هو لي جابني انا عندت مللول اما حسيت اني نعمل في الصحيح كي جيت و زيد منى .. نقصد الدكتورة منى شجعتني.. انا برك عندي لعناد عاندت قبل و خسرت و زدت عاندت تو و خفت نخسر هذاك علاه جيت .. خاطرني نحب..نحبو. .على خاطرو والله..
-حطت يديها على كتافها بحنية...احسن ما عملت...تو ترا كيفاه تتحسن و ترتاح...تي انا و بديت نشفى...ربي ديما يعطينا فرص اخرى احنا برك تجينا لحظات ضعف فينا الي يتغلب عليها كيفي و كيفك...و فينا الي يضعف و يخسر فرصتو...انا ما نقلكش نسيت ولا باش ننسى...اما حمد لله خذيت حقي ملي ضرني...و لقيت عايلتي امي و بابا و خويا...بابا ماللول قاطعني اما خاطرو عارف اني قليلة حيلة...رجاحة عقلو غلبت و الحمد لله...ريت ايامات ما يعلم بيهم كان ربي...العباد ما ترحمش و ما تغفرش...ربي يعلم بالنوايا اما العباد حطو فيا انا الغلط و خرجوني الجانية و انا الضحية...وصلنا نقلنا مالحومة...خسرت عايلتي الكبيرة...خسرت خطيبي ....اما بعد فهمت حاجة اني ما خسرتهمش لااا بالعكس الموقف هذا باش يبينهم على حقيقتهم جا باش يغربلهم و يصفيهم و الحمد لله هههه قعدلي كان الغربال ههه
-ترددت و بعد سألتها...خ...خطيبك ما صدقكش زادة
-ما سمعنيش اصلا...موش ما صدقنيش...بالرغم كاتبين الصداق...انا نحمد ربي انو جات حاجة هكا باش بينتلي معدن الناس...يعني ..يعني كان جينا معرسين و بصغارنا و صار عليا هكا ولا مرضت لطف كان يخليها بيا...حمد لله يا ربي ...ربي و حكمتو..
- الحمد لله ... ما ادوملو كان عايلتو الواحد..كذب عليك لي يقلك و يقلك خاطر الدنيا مواقف..و انا وقفت عليها الجملة هاذي..نحمد ربي لي رجعلي عقلي و هداني بيه و زاد قربني مالانسان لي ضحى بكل شي اي كي نقلك كل شي دارهم امو خوه خدمتو على خاطري على خاطر ماتتقالش فيا كلمة عاطلة و انا مظلومة... باش تكمل تحكي وحدة دخلت ياخي قصت عليها المرا و قالتلتها شفتها هذيك....هذيكة مسيكنة عندها مشكلة تنجم تنفعك...نادتلها جات قعدت بجنبهم...لطيفة اختي لاباس...لطيفة كان تسمح تنجم تنصحها...هي قادمة على عرس و عملت عين العقل كي جات
-قعدت طفلة تعمل 25 سنة...لطف عليها...خزرت لايمان...تمنيت راني تشجعت كيفك اختي...انا صارتلي مشكلة و انا صغيرة حمد لله موش مضرة كبيرة اما..اما تحرش لفظي و جسدي خفيف..كتمت و خبيت...تنهدت اختك انا توا عروسة عام...ما تهنيت و هنيت روحي كان بعد عرسي باشهرة...حمد لله راجلي تفهمني و وقف معايا و جابني للدكتورة...و حتى كي ربي رحمني كملت العلاج...الدكتورة قتلي كان جيت قبل العرس كان يكون احسن..انا كي عرست و تصدمت بلي حسيتو و صارلي زادت تعقدت مشكلتي اما حمد لله...انا اختك مالجنوب...راجلي بعد بيا على الولاية متاعنا اكثر ما يمكن...انا نحمد ربي انو وقف معايا...رجعلي ثقتي لروحي...ريتك المرة الي فاتت جيت انت و راجل...تبسمتلها ...اكيد خطيبك...صحا ليك بيه...فيبالك كي قعدت انت شوية مع الدكتورة لداخل هو لهوني تقول عالجمر...احسن ما عملتو اختي...صدقني موش حكاية علاقات و الي يمشي في مخاخ برشا ناس...اما صدقني تحس روحك خفيفة ثقتك في روحك تكمل و زيد علاقتك بشريكك تقوى و تأكد صدقني موش الرجال الكل تتفهم و الله...غمزتها انا و انت محظوظين...خزرة للمرا لخرة...و انت يجي نهار و تلقا الي يستاهل...انا و راجلي عرسنا تقليدي اما صدقني ملي صارت المشكلة زدنا تمسكنا ببعضنا و قربنا و ولينا عايشين حب قوي ...ربي يعرف اش يعمل...
- تكلمت بلوم كبير في عينيها... انا ديما نتسرع ديما نضلمو هو و نحط اللوم عليه بالرغم كان و مازال ديما راجل معايا... كنت نستخايبو على جالو و على جال العلاقة ليلة العرس و بعدو مشى في بالي يلوج عليا كبدن..كنت بهيمة..ياما حاول يفهمني و يرجعني كان يقلي راو لمصلحتك باش ماتكبرش معاك العقدة و تبقى تعاني... اي صحيح ماسمعتوش اما انا نعاني من العقدة لي خنقتني و لي خلاها فيا واحد ساقط شاذ خلاني نتحاشى تعنيقة من خطيبي. ..كانت بتكمل اما السكريتار ناداتها باش تدخل...
-برا اختي ادخل و ارمي حملك عللى ربي و احكي للطبيبة كل شي و تو تتحسن...احمد ربي نقذت روحك من توا ما خليتش الشي يكبر معاك كيفي ...تبسمتلها و مشات
#انتي_سبابي #كرونيك #كرونيكات
الحلقة 53
- صباح الخير... شحوالك...مدت يدها لمنى لي جات قربتلها و باستها... صحيح معرفة و تعزها خاطرها من طرف وليد اما تعاملها ديما فيه حنية و قرب مالمرضى متاعها...
-يا مرحبا يا مرحبا بعروستنا...شنية احوالك عزيزتي لقاتها متوترة و حاشمة...اقعد اقعد عزيزتي
- عيشك... محلاه الورد.. انا نحب الورد لصفر يعجبني...قالتها و عينيها في الفاز.. الحاجة هذي موش صدفة خاطر منى تعمدت تحطت ورد خاطر شلقت لي ايمان تلبس فلوري...حبت تجذب انتباهها و تخليها تبادر بالكلام. ..
-ايا باهي...اعتبرهم متاعك...تخرج من هوني تهز معاك البوكي...غمزتها...ما تخافش موش منيش باش نغمك في كادو العرس ههه الورد وحدو و الكادو وحدو ههه...
- هههههههههههههه... ضحكت اما فيسع ما ختفات ضحكتها... انا.. تناقشت مع وليد. .. و..و..و قالي... تنهدت..
-دارتلها منى سيبت بيروها و جات قعدت مقابلتها...احكيلي الي تحب...كمل احكي ما تاقفش..
-نعرش المرة هذي كيفاش فلت مني لحديث و جرحتو كيما كل مرة...تحكي و ترص على صوابعها... جرحتو انا وقتها كنت مغششة منو و من فازتو. .ماحملتش كيفاه جايبني و ما في علميش..انا غالطة نستعرف و اليوم حسيت بيروحي كثرتلها.. اما..اما اش جاب هذا لين يقلي نبطلو العرس !!! هزت عينيها لمدمعة فيها كاينها تقلها امان اش نعمل...
-اول حاجة وليد الي جاني و ساعتين و هو يحكيلي على عشقو ليك و على ايمان شنية تعنيلو و على روحو الي ما تتنفس كان بيك مستحيل يقرر يخليك...و يظهرلي ما خلاكش وقت الي انت طلبت منو هذا و كنت لغيرو خليا تو...بالنسبة ليك ايمان جيانك الهوني بداية حل و صدقني المشكلة بسيطة و تو ترا منفعتها على نفسيتك و حياتك و تعاملك و نظرتك حتى لروحك...ايمان في حياة الوحدة تنجم تحب و تتحب و تعرس اما قليييل شكون تلقا الراجل الاستثنائي الي يمثل نصفها الثاني ...الحب درجات و الي كيف وليد واصل اقوى درجة مالحب ...موش حب كهو لا خوف و احتواء و معزة و محبة...انا قبل لا نعرف حالتك قتلو وليد ما نظمنلكش حالتها ترتاح قبل لا تعرسو ولا حتلى بعد لا تعرسو بجمعة ولا جمعتين...قلي منى نحب مرتي ثقتها ترجعلها..نحبها تربح الوقت و تبرى ما يهمنيش منيش مربوط لا بعرس و لا بوقت انا الي يهمني مرتي تبرا و ترجع لاباس...يعني صدقني وليد عمرو لا كان جايبك لهوني لغاية في نفسو...المهم توا باش نبداو و كيما قتلك احسن حاجة انك جيت لهوني و تو كلشي يتصلح و لاباس
-بدأت تبكي... و البكية ولات شهقة. .. منى ماسكتتهاش خلاتها على راحتها... نحبو وليد..نحبو نعشقو نموت فيه.. نسمع بالحب اما عرفتو معاه و تعلمتو على يديه... نحبو يفهمني نحبو يحس بيا اما موقفي ضعيف و صعيب يصدقني زيد...زيد كمال وصل فرقنا و لعب لعبتو .. يبان هاكي نيتو وليد الحب باين في عينيه اما إحساسي انو مجبور مني قاتلني ذابحني...لي زاد على مصابي قربو ليا... تنهدت.. هو يقرب و انا نبعد ..صحيح عرس جاء بعد ظروف اما الحاجة هذي جيينها ولو بعد مدة.. خاطر حقو كراجل يتهنى بمرتو. . انا انا مانيش نعطيه في شي مانيش متحملة فكرة يقربني حد ..صحيح نرتاح معاه اما في لحظة نتقلب...
-باهي ايمان...كل واحد فينا كي يتعرض لمشكلة ولا موقف خايب...يكون فيه الموقف هذاكة حاجتين احساس بالذنب انو كان موجود في المكان و الزمان الغالطين...و يكون عندو طاقة سلبية تخليه يخاف من اعادة نفس السيناريو...بعد الحصص نشاله باش نتخلصو مالحاجتين هضوما....فرحني برشا الحب الي بيناتكم خاطر باش يكون سلاحي باش تمتثل للشفاء و فيسع زادة...فكرة انو مجبور منك سامحني هذي غالطة خاطر طول عمرو يتمنى قربك و يحبك...علاه ديما نخزرو للامور بسلبية علاه ما تقولش هاو ربي رجعو ليا و رجعني للطريق الي باش يفرحني و يعيشني كيما نستاهل...زيد تقلي وليد مجبور...سامحني فما واحد يتجبر على حاجة عاش حياتو كاملة متمنيها...صحيح الظروف قربتكم كيما قلت اما ورا هذا الكل فما حب راجلك ليك ايمان و خوفو عليك هو الي خلاه ليوم معاك و موش اي حد اخر...
- تنهدت... نتصور حكالك على حياتي و كيفاش رفضتو وقتها اما..اما نحبو تو و مانجمش بلاش بيه.. مانتصورش يخرج من حياتي و يبعد والله نقتل روحي والله..غزرت في عينيها كي الحاشمة من حاجة..انا حاولت..نق..نقتل .روحي وقتها...و تسيبت بالبكاء....
- منى هزت حاجبها مستغربة للحكاية لي ماكنتش حاسبتلها حساب اصلا وليد ماحكالهاش عليها خاطرو بكل بساطة موش سامع بيها حاولت تنتحر..اسسس وشرب شويا ماء عزيزتي... ايمان..ايمان..اخزرلي.. علاه خبيت عليه !! علاه ماقتلوش وليد على الشي هذا !!
- ما..ن..جمتش. .والله وقتها ضاقت بيا الدنيا.. حياتي لي محسوب ضاعت موقف بابا مني لليوم ماسمحني و زيد..زيد وقفة وليد معايا و خطبتو ليا كانت بالنسبة ليا اكبر احساس بالذنب اكبر عقاب وقتها.. مع اني حبيتو قبل هذا حبيتو و الحب هذا خلاني نمشيلو هاك الساقط و نقصها معاه.
-ايا الحمد لله معناها مزال عنا لقاءات أخرى !!
- اي اي باش نجي و معاش مهملة روحي و صحتي ..اما المدة هذي عرسي
- موش مشكل نعرف ايامات العرس ماتنجمش .. خليك توا ارتاح و تو نبداو بعد العرس باهي !!
- باهي... اسمعني باش تجي راو موش ليلة الصالة برك نحبك تجيني لدارنا و تحضر حتى في النهار
- ههههههههه عيشك ان شاء الله نحاول مانوعدمش اما نحاول هاك تشوف فيا و الخدمة لفوق راسي اما راجلي لمصعصع اكيد باش يمد وجهو في الحومة نعرفو مايراطيش حكاية فيها وليد ماغباك عرس وليد..
- ههه.. اما تعرف كي سمعت لبنات البرة و حكاياتهم قلت انا وين و هوما وين و الله نحمد ربي
- ريييت كي قتلك راك تنجم تنقزها فيسع. .هاوكا على وذنيك اش صاير في الناس و ما أعظم منك. .الواحد يقول الحمد لله.. انا كي نراهم قلبي يتقطع تقول للدرجة هذي مزال الهمجية مزال منطق الاغتصاب طاغي. . مزال بنات تضطهد و ماتاخوش حقها !!
- الحمد لله الحمد لله... خليني نروح توا خاطر خرجت و ماقلت لحد زيد كان يسمع وليد خرجت بروحي يزيد على مابيا
- ههههههه السيد حزار !!
- نعرش على عزاه اما خانقني هههههه
تعداو نهارين اخرين و العرس عمالو ويقرب اما العريس عمالو و يبعد ... لا كلام لا سلام لا جرد تلفون.. مسكر اللعب عللخر و مكسح قلبو... هي تتمحطر و زادت فدت من بعدو لي كانت هي سبب فيه.. ساعات ترجع تهدى بعد تلفون من منى و ساعات تحلبها الدنيا بالبكاء اما الحوسة و جو التحضيرات كان منسيها شوي كل مرة..وقاضياتها لي كتبتهملو في ورقة نهارها وصلوها مع نعيمة..
جاتها الحناية مع جو الدربوكة و الغناء و البخور ليعجعج.. لخيال هوني و لعقل عند ولد علي و القلب باش يذوب مالوحش.. تي حتى ماخلالهاش تطلب السماح منو و تأخذ بخاطرو و تقلو راني مشيت لمنى. ..
تشوف في نغيمة تسرسبت و خرجت على صوت تلفونها..
- ايجاني هاني وين التيراس..مشاتلو تجري. .
-نعيمة البطبوطة..حاجتي بيك في قضية ...و كان تحب ايمان و هاك الكلب وليد تو تعطيني وذنيك و تسمعني
- نعرف عمايلك راني يا علي اما ميسالش باش انطاوعك في خاطر هاك لبهبلة راهو غلبو عليا.. هات اش عندك فيسع
-بدا يتكلم تقول في مفاوضات تحرير فلسطين...فيبالك الي العرس ينجم ما يتمش...حلت عينيها و شهقت...زاد دقق فيها عينيه و هو يعمللها براسو اي نعم...و فيبالك الي ايمان و وليد تعاركو و وليد قلها "روحي تلقي الخير ا للا...و فيبالك الي هوما توا قاصينها و موش مشلقين للعباد و حتى كان تم العرس راهو و هوما متنابزين يرضبك زوز عرايس متنابزين...و فيبالك الي وليد جيت نبربش فيه قلي ايمان بعيدة عليا و باش تبقى بعيدة...فيبالك...
-قصت عليه وترلها اعصابها...يز ي يزي امان شفما اش صار يا ربي علاه كانو كي عصيفرات الحب ماشاء الله
-ماك تعرف وليد في الحكايات الي تخص ايمان ما يضويش اما الي نجم نقولهولك الوضع خايب و لازم نتدخلو انت من جهتك و انا من جيهتي ..اش قلت
- كب سعدها بنت خالتي راهي بقرة. .. تو وقتو الدلال و التزعبين متاعها !!! بففف اش مزال بنعانو يا ربي... هاذم ينفع فيهم كان حاجة برك .. خزرتلو و ضحكت بخبث .. هو فهمها صاحو فرد وقت..
- كذببة هههه
- وينك يا طفلة ..وين غبرتي .. كانت تجري و تصيح مرعوبة و داهشة... وقت حناني هو توا !!! قووم
"يا للا مدي ايدك للحنة و مدي ايدكا..للحنة بنية صغيرة فرحانة مدي ايدكا" الدنيا كانت مقلوبة بالغنا و الشطيح و عروستنا مادة يديها و هايمة متوحشة اما الي مصبرها اني مصيرها معاه و ليه...كي سمعت نعيمة تصيح مالبرة قلبها تخلع...شفما نعيمة وخيتي بابا بيه حاجة؟؟ وليد لاباس؟؟ جبدتها على شيرة و بعدت بيها عالجموع. ..
- بلعت ريقها لاعبتها دراما... خالي لباس اما ... اما وليد مسكين.. راك تتفجع راهو لباس جوست تكسر عليه بلار الكرهة القدامى طاحلو على يديه و وجهو طريف... تمثللها كيفاش يديه بالدم. .. منا و منا كلمني علي قالي عملولو غرز و روحو بيه .. تخيل كان مابنجوه باش نجمو يخيطولو مسكين. .. عرفت روحها كثرتلها في دوزة الفجعة. .. تخافش لباس راجل شي مايترالو
-كلام نعيمة هبط كيف الرصاص..طاشت تجري
-ايمان ستنا مزالت باش تكمل يديك.. الحناية تناديلها
-صاحت عليها و دارت تلوج في فولارة رماتها فوق اكتافها و تلفتت لنعيمة...نعيمة هزني ليه ...دموع هابطة و شفايف ترعش...نعيمة وخيتي نحب نشوفو...شدت راسها...فيا و لا فيه فيا و لا فيه يا ربي
-نعيمة من كثر ما سخفتها قريب تقلها رانا نكذبو..ايمان و الله لاباس
-اما لاباس اما لاباس...لبست شلاكتها و خرجت تجري و نعيمة خزرت للحنانة و البنات..ما تتفجعوش فيلم عاملينو باش نشوفو خوفها على رويجلها..البنات الي طرشقت بالضحك.و الي غاضتها ايمان و الي ادعي بنعيمة...
كانت تجري خرجت من دارهم موش عارفة كيفاه وصلت...عباد تهبط في الكراسي و عباد تركب في البروجكتارات و هي دخلت تجري الي يراها يبهت...
-مزال كي دوش...لبس سروالو...حفيان يفرت في الدبش على مريول...حس بريحتها موجودة و طيفه
#انتي_سبابي #كرونيك #كرونيكات
الحلقة 54
حس بريحتها موجودة و طيفها قريب و بعد تبسم على هبالو...مزال يتبسم و الباب تحل تقول فرقة مكافحة الاجرام...كانت هي بزينها بعينها...بريحتها بجبتها البيضة..بحنتها...هي ايمان..كانت تلهث وجها مغصور...بلع ريقو و مزال باش يسألها و هي ترمات جات
بحذاه و عينيها تتفحص فيه
- انت لباس !!! مالا فينهم لغرز !! الدم...الدم وينو وريهولي ؟؟ ..تتحسسلو في وجهو هابطة ليديه و صدرو العريان...كذبة معناها ؟؟؟ الحمد لله يا ربي الحم..الحمد لله..و تفجرت بالبكاء.. مسكينة سخفاتو كيفاه صاير فيها الفولار لي عالقاعة و شعرها لي دوبة مشدود بالشكال و الحنة لي مازال ماشاحتش خضراء...
-الدم سخن في عروقو الكل...يديه ولات ترعش و صوتو ضاع..و هي قدامو بكامل انوثتها ...مفجوعة تايهة خايفة عليه...للحظة حب يحضنها حب يتمرد عالظروف الي موش مخليتو يرتاح...اما كي تفكر كلامها و زيد خاف لا يضعف و هو هابل عليها..وخر شوية و بلع ريقو...شبيك ايمان ترعش...اما دم و اما غرز...شفما؟؟تفكر كلمة علي ""الا ما نكسرلكم شوكتكم الزوز" فهم كلشي...تنهد و خزرلها..شقالولك ؟؟ اش كذبو عليك
- ياخي ماعملتش اكسيدون ليوم الصباح!! يعني حكاية لغرز كذبة... والله وليد ماقعدش فيا عظم صحيح فجعوني عليك ارتعبت.. شوف جيتك بحنتي نجري و موش هاممني شي غير شوفتك لباس... عينيها زادت بحرت. ..معاش انجم نتحمل صدمات اخرين والله نموت والله...
-تبسم بوجيعة...لاباس هاني قدامك...تنهد و تكا عالقارد روب...ملا علي و نعيمة فيبالهم يفجعو فيك عليا يحبوك تحس بيا...فيبالهمش الي حتى و كان نموت حد ما يحس بيا و أولهم انت يا ايمان
- خزرتلو و عقدت حواجبها و عملتلو براسها "لا" ... لا وليد ماتقولش هالكلام امان.. ان شاء الله بطول لعمر..انا كان تطرالك حاجة نمو... مانجمش نتخيلك موش في حياتي.. حست بفراغ كبييير من كلامو تخنقت معاش منجمة تقول كلمة زايدة معاه اصلا كان مزال كلمة راهي " نموت فيك نحبك" تشوف فيه قدامها يرمق فيها بنظرات باش ياكلها بيهم رغم البرود لي يدعي فيه.. هيتو و هو شبه عاري قدامها بصدرو لعريض لي كاسيه الشعر سخنتها و رهوجتها عللخر .. تشوف فيه راجل باتم معنى للكلم قدامها.. راجلها لي توحشاتو ليها 5 ايام لا راتو لا سمعت صوتو.. بحركة منها تقدم تحط راسها بشعرها بريحتها بما عطى ربي على صدرو و تزيد تحوطو بيديها و تلصق فم تتعنكش فيه... سامحني ...
-حركة حتى كي يبدا يحلم و يهندس من مخو و يتصور عمرو لا تصورها تعملها و عمرو لا تخيل تأثيرها يكون جارف هكا...فقد توازنو ...موش منها هي كانت قد الطرف حاضنتو عاطيتو احلى احساس ينجم يحس بيه راجل خليا راجل عاشق للنخاع...ريقو نشف...حب يدور يديه و يرجعلها التعنيقة اما تردد...تمتع بقربها لثواني و بعد تبع عقلو الي فكرو في كلامها المرزي...جبدها من حضنو و هو يتصنع في البرود ...محاولة فاشلة منو خاطر عينيه كذبوه و رجفة يديه قالت العكس...عدا يديه على شعرو و خزرلها...هاني لاباس ..ما فما حتى شي...خلينا بعاد هكا خير لا نستغلك و تقعد تعاير فيا مبعد...دور وجهو هارب....هيا نروح بيك...يلبس في مريولو..هيا الدار معبية بجمايعنا مالبلاد هيا نخرجك...
- مانحبش نروح...و توا نحب نفهم لتو لا نسيت انت !! لتو لا تجاوزتو الموضوع.. شوف هاني نسيتو بالرغم مجروحة منك زادة اما خذيت برايك و عملت الجلسات متاعي و هاني نداوي و باش نبرا هكا قاتلي منى و نعرف روحي باش نبرا اكيييد... وليد غدوة عرسنا راو ياخي باش تبقى ماتكلمنيش لوقتها !! ماخيبك.. و عوجت فمها و ذبلت عينيها و هو هلك صايي ...
-خزرلها خزرة تخوف...هد عليها كان باش يشدها من كتفها و بعد دورها دزها عالقارد روب و بدا يحكي بصوت منرفز اما واطي...شنية حكايتك ياخي ...شبيك كل مرة بنص معايا...تقربني وقت ما تحب تبعدني وقت ما تحب...تطيرني للسما و بعد تهبطني تحت سابع ارض...اش تحب مني...ماك تهمتني هاني باعدك..اي باش نعرسو غدوة..بلع ريقو و زاد قربلها صوتو بدا يضيع و يهدا...باش نعرسو و باش تفرح و تخرج من داركم معززة..بالنسبة للعلاج باش تبرا لروحك و نفرحلك...خاطر انا كي هزيتك نيتي كانت انك تبرا لروحك و ترجع ثقتك و ترجع تحب روحك...عض شفايفو و تكلم ببحة تقتل...كلامك و ظنك فيا مهمش كتيبة عالرمل باش كي تحب تمحيها تمحيها..لاااا عمللها براسو...لا...حط يديه على الحيط بجنبها..اش تحب مني...مد و جزر تهز فيا و تجيب...ما فهمتكش...توا ماعاد تطلب مني شي و كان نهار قلقتك ولا قربتك يا للا وقتها اقف و حاسبني..اما باش تحاسبني على حاجة اخرى لا...مزال يتكلم و قطعة دبش طاحت من فوق الخزانة جات عليها...هزها و قرب حطها من وراها في الخزانة...كانت لحظة في لمح البصر اما عطاتو فرصة انو يشم شعرها ..استنشق ريحتو غمض عينيه و فيسع حلها...و وخر و بقا يخزرلها.. الزوز ساكتين
- حبت تخرجو من جو التنرفيز لي يحكي بيه..تعرفو صعيب غشو اما باش تراهن انها تلهيه شوي. .
انت ماك ماتحبش الحنة !! اما انا عملتها و كثرت زادة ههههههه زيد قول شماتة فيا ترا ... شوف ههه حلوة !! شووف عاد... كان يلبس في مريولو و يتهرب منها و من مشاغبتها فيه. .هاي دارت منا هاي جاتو من غادي... اوووف اركح عاد و شوفها ..مدتلو يديها و بدأت توريلو في حرف اسمو. .. شوف هذا كتبتهولي نعيمة ماسقطها هههههه.. و عملولي حتى فراشة صغيرة في كت... سكتت حشمت جات باش تقلو في كتفي و بطلت ... انا عجبتني الحق
-غلبتو تبسم و فيسع عاود كشبر..هالطفلة تأثيرها عليه مهوش عادي...خزر حب يوترلها اعصابها...تكلم بخباثة و هو يلبس في صباتو..غريبة يقول اي عروس يهبط عليها السر و تزيان ايامات عرسها...هز حواجبو و غزرلها .. يمكن موش العرايس الكل
- رجعتلو فازتو طول..من هذاك ولاد عموماتك و ولاد خالاتك كانو باش ياكلوني بعينيهم كي دخلت.. اممم اكيد قالو شبي موش هابط عليها السر ...
-قحرلها قحرة موت و قام جبدها من كتافها....فرحانة انت...و كي زاد ثبت في زينها و تخيل للحظة انهم شافوها بالرسمي هكا زاد شعل...و انت لاباس في مخك جاية هكة ...ماكش فايقة بروحك دين سماك تضوي بكلك..ماقالولكش لعروسة ماتخرجش !!!
- ماني من فجعتي عليك جيت و دوب تفكرت محرمة شعري طيشتها فوق اكتافي و جيت... تحكي و تسخف فيه بتذبيلتها... عاد يعرفوني لعروسة يعني مرتك مافماش علاه تتنرفز .. من غير مايشلق كانت تقرب كل مرة طريف موش بقصد اما الحب يعمل و زاد على مابيها الوحش لي متوحشتهولو تي مستغربة كيفاش ولات هههه... ما وقفها شي كان نفسو السخون و هو في وجها... قلي توا كيفاش باش تخرجني كيفاش باش تخبيني من عينيهم تصرف ..
-قريبة هكا....يتفس بالسيف...سيطر على روحو...ماخذ عهد انو يتوبها علي عملتو..الي محيرو حركاتها هي...تصرفاتها متاع وحدة عاشقة و اكثر حد يعرف العاشق اش يعاني و الحب شنية يخلي الواحد يعمل حيرتو هالكعبورة و هبلتو...مزال موجوع منها اما موش منجم يبعدها...تكلم بصوت واطي منغير لا يبعدها و لا يقربها زادة...حط الفولارة على شعرك و ستنا نادي لوحدة مالبنات تعطيك سفساري و نخرجك...هو يتكلم و هي تخزرلو مركزة تقول ترسم فيه...سمعتني شنية قتلك؟؟؟
- امم. .. ميلتلو براسها و عينيها بالحب
بعد عليها....تنهد و قلها اقعد لحظة و حل الباب يلقا الكعبورة الاء بنت بنت عمو في الكولوار...
-الاء ايجا نقلك...اجري جيبلي هاك السفساري الي فوق الكرسي هذاكة
-خزرتلو...متاع ميمة هزاكة ما اعتيسو زملة...
-و كي نعطيك حاجة
-خممت شوي. باهي لحزة
-بقا ستناها جابتو و جات...منغير ما يفيق زرفت دخلت و شافت ايمان ...ايمان شافتها تبسمت...ايجا نبوسك ايجا...حملتها و بدات تبوس فيها
-انتي العروثة
-اي يا مزيانة انا العروسة
-باستها و خزرت لوليد.. هاذي الحاذة لي باث تعطيعالي ؟؟
-قعد يضحك هههه لا اذيك خاطياتك انا تو نعطيك حاجة أخرى ما احلى... يتمقصص
-تغسست عليك انا معادس كلمني...
مزالت في حملتها و هو حب يرضيها قدم باش يبوسها و هي كيما الصغار الكل دورت وجها مغشة...لقا شفايفو على خدود ايمان ...نسا روحو....هي زادة ستحلات لدرجة ايديها تربثت قريب تطيح الطفلة..في لحظة سمعوها تصيح..
-باث تطيحوني ثبيكم خنكتوني... الفرخة قالبتها بالصياح و هوما قرااااب و العينين تتمعشق في بعضها..و ايمان دايخة عللخر
مازالت في حملتها تلعبلها بشعرها.. طاطا انت عندك بيبي نونو كيما لي عند ماما !!
- هههههههه.. خزرت لوليد. .. لا ماعنديش علاه باش تعطيني خوك الصغير ناخذو انا ؟؟
- لا مث اكاكا اما ماما عندها هاذم كيفك ... حطت يدها على صدر ايمان.. نثوف فيه يرزع منو خويا..
مالحشمة جاها كريز تاع كحة تغصرت عللخر... هاربة من عينيه و هو شايخ بالضحك عليها كيف تتحيشم... انا..انا باش نروح توا ايا اهبط يا مزيانة..تحط في فولارتها و تحكي .. ايا بطيت خلينا نخرجو...
الطفلة تسرسبت خرجت و هو خزرلها...ايا استعنا عالشقا بالله ...كيفاش باش نخرجك توا...
-تتبسم...تو نقز مالشباك و نروح...خير ما نجمش نعاود نتعدى مالحوش ..
-باهي لا يعطينا ما يغلبنا...لبسها السفساري و يثبت في خدودها لحمر من بوستو...بدا يتمقعر..عمري ما ريت مرا غدوة عرسها ملمس خدودها كيف البيبي بالعمل غلط بينك و بين الاء...
- عملت روحها ماسمعاتوش اما خممت تعملو فازة تخليه محموص منها و ريقو ناشف ..مانيش عارفة هالانحراف منين تجيب فيه اكيد الكلو من نعيمة لي تقلها اسمع مني يجيك نهار و تستحق لتعليماتي .. ايييه و الله و استحقيناك يا بطبوطة... سبقها هو نقز مالشباك خاطرو عالي شويا و دارلها و مدلها يديه الزوز باش يلقفها و هي تلف في روحها تعمدت تهز طرف مالسفساري و معاه الجبة باش بانو ساقيها.. و مانحكيوش على ساقيها .. صدقت لطيفة كي قاتلو راهي زين عربي تضوي من داخل.. هو مصدوم لا عارف يبقى شارد في لي شافو لا عارف يلقفها و هي طايحة عليه تحبو يحملها و يهبطها..
- وليييييد باش نهبط راك اطيحني .. ولييييد شدني امان..
-هو من ربي دايخ و هي ترمات جات عندو
الوضع الطبيعي انو يشدها و يهبطها عالارض تكمل تمشي تروح على روحها اما هو لااا نجمش...الدنيا ظلامت شوية...تسمع كان تحضيرات السهرية...جاب ربي البورجيكتارات مزالو ما شعلوش...هو خذاها في حضنو و كبس عليها...حتى ساقيها تدلدل في الهوى هي زادة ما كانتش مالعاكسين حضنتو لين قريب تدخل في ظلوعو... يتنفس في رقبتها...تكلم بالشوية...تنجم تهبط سايس روحك...فاق على روحو...هبطها ...وجها كان احمر اما الغريب اني تتبسم في تبسيمة تقتل...قعدت تخزرلو...تبسم و قلها...مبروك مسبقا ...عض على شفايفو...
-تبسمت مبروك علينا الزوز...غدوة نراك هههه...خلاتو عالق في ضحكتها و مشات تجري فرحانة تنقز كيف الصغار. ..
الليلة سهرية الحنة.. و بحكم حومة عربي السهريات لي قبل الصالة تكون موش ميكست اما كل مرة لبنات يفصعو و يشنعوها مع لولاد في البطحة وين الشطيح و الرديح... كانت الفرقة تردح تغني و يرشقو في الفلوس الناس الكل فارحة.. على صوت التزفير لي علا من فوق السطح وين كانت لفلامات تتشاعل و غناء على الترجي تقول دخلة برئاسة نعيمة لمغبرة. .. كانت تصيح. ..
- يا تخلونا نسهرو معاكم يا الليلة نشنعها بالفلام للصباح و نحرمها عليكم
- كلمها وليد يتحلف فيها تحت الحيط. .. توا موش عيب عليك تبلبزلي في عريس يا للا !!! و بعدين انتي مكشخة يعني غير مرحب بيك ايا طير يا دندوكة
- ههههههههه وريني عاد اش باش تعمل مع مرتك الدندوكة لكبيرة ولا ما زعيم كان فيا انا !!!
- ههههههههههههه لا هذيكا تو نعمللها فورماتاج من اول و جديد... و تلفت للولاد... وينهم ولاد الجمعية الصحاح.. و يبداو يغني و و يتصايحو...
((كل عام نعيشوهاااا date نستنيوهااا
لفريقي نحبوها يا حياتي يا عمري
يعيشو ناس و يموتووو لونك مايعلى فوقو
اسمك gout كي نذوقو جامي تبعد عليه
- عاصمياااااااا كاريزما بلاش حدود
عاشية فياااااا لفريقي عليها نموت
- هذي هدياااا هذي وصاية جدود
نور عينياااااا بعد ربي المعبود.)))
كان الجو هباال زيد هبطت لبنات الكل هدت علولاد و كل ام تنادي على بنتها و تتحلف فيها كي تروح تمرسها تلممو تقول دربي ههههههههههه لولاد يكركرو
- هاو بدا الماتش ماليوم ..
.-علي يتبولد على وليد بالشوي...ليوم نكورو معاك غدوة تكور فينال وحدك....تبسم ماحبش يخوض معاه اكثر عارفو كلامو يحشم...
البطحة تملات اولاد و بنات كان ايمان قالولها النساء لا مايجيش تخرج...المهم هو يلوج مايراهاش خارجة مع لبنات...كان ضاربلها شورت دجين و شوميز حمراء فتوق ..جاتو نعيمة تكركر عليه..
-خسارة الوهرة اما راهي الليلة ممنوعة مالخروج ههه
كانت تشوفلهم من شباك بيتها.. حنتها مخضبة في يديها تخزرلو من بعيد كيفاه فارح كيفاه يصيح مع لولاد يشطح و يعني زاهيتلو ...مرة تتبسم و مرة بالوقت تتفكر.. تتفكر بااارشا حاجات و منهم هو و كيفاش كان قاتل روحو عليها...تتفكر اش كان ينجم يعمل فيها كمال لولى ستر ربي..نزلت دمعتها و مسحتها فيسع...طبعا شافها حد كان هو طبعا خاطرو ماهزش عينيه من عليها قلبو عصر عليه و كلمها بالتلفون..
- شبيك !!.. يكلمها و عينيه مرشوقين فيها مالشباك
- شي مابيا. .. علاه اش صار عليك تسأل !!صحة ليكم عاملين جو انا هاني مربطة بالحنة...
-وطا في صوتو...تبداش اتلف فيا....شنية الدموع الي ريتها في عينيك...تقليش دموع الفرحة
- نعرش يقولو لبنية تبكي في عرسها ياخي هاني بكيت حتى انا... سكتت شويا. . وليد !
-تنهد...مجرد اسمو من فمها يرهوجو...وي يا مرت وليد
- تهزني غدوة نزور .. نحب نزور امي تو..حش.تتهاا.... سكتت و بقات تخزرلو من بعيد عينيها مبحرة بالدموع كان تلقى تدفن روحها عندو.. ساكتة كان نفسها المزروب يتسمع في التلفون... صحيح كانو لولاد مشنعينها اما يحس عليها من نبرة صوتها...
-عينيه دمعت...كان حاسس بيها بوها غضبان عليها زيد امها..في نهار كيما هكا الصبية تستحق امها...تكلم بصوت مبحاح...نهزك وين تحب...امسح دموعك و استهدى بالله ...غدوة نهزك و نمشيو نزوروها...تسمع فيا...يسمع كان في النفس متاعها متسارع..ايمان ...تسمع فيا...
- اي ..معاك نسمع فيك... نفخت تتنفس بالقوي...
-ما نحبك تخمم في شي الليلة..ارتاح...ميمتك باش نهزك تراها...و بوك و الله راهو متغشش غش تو يجيه نهار و يغلبو قلبو الحنين...وليد راجلك و ظهرك يقلك راك امانتي مالبارح موش ماليوم...نشاله كلشي باش يتصلح ما تخمم في شي...حب يضحكها...ايا عاد يا دندوكة يزي مالبكا ميسالش تو تهزو البطولة السنا ههههه سمعها ضحكت نفخ بالقوي و عدا يديه على شعرو...بجدي نحكي ايمان يزي مالتخمام و الستراس نحبك تعمل جو مع البنات و تشرب دواك في وقتو..ايمان قاعدة مواضبة على دواك ماهو
- تعرف والله نسيتو حتى اليوم... تو ناخذو قبل مانرقد اصلا نحس في روحي نعست... ضحكت دوبة تبسمت ... ميسالش تقلهم ينقصو الحس خاطرني بنرقد..
-ما فماش هذي نسيتو...صوتو كان حنين...ايمان بربي صحتك تلهى بيها عالاقل جيست ليوم و غدوة و بعد يا للا تو انا نتلهى بيك..
#انتي_سبابي #كرونيك #كرونيكات
الحلقة 55
ههه بالنسبة للنوم مزال العرض يا بنتي..
-والله عللخر معاش فيا..
- باهي ارتاح يا روح...سكت خطرو باش يحصل مرة اخرى.. هي مشات مالشباك و هوما حطو غناية "دلولة حياتي" بعد شويا بالصدفة شاخ عليها و بدا يغني هو و لولاد و هي من لي سمعتها رجعت تجري ديراكت و تحط يدها على فمها كي شافاتو يغني و مقطع روحو..بقات تشوفلو و هو مافيبالوش و ماخذ راحتو بالشطيح..علي هلك و هو يشطح فيه...ما حب عليه كان بالحبابة و الكبابة...
- لا لا سيب يا ولدي اما شطيح
- سكر فمك كاهاو صليت ركعتين وليت الإمام سحنون !! تي راو عرسك يا مسطك اشطح ااااااشطح... غلب فيه علي اما جابو للسطر. .
نهار عليهم نهار عظيم بالنسبة ليه هو بالذات اااااه قداه ستناه قداه تمناه و قداه فراح بيه و زايط...
- تهاني .. خايفة
- مناش باش تخاف يا بنتي.. موش هذا النهار لي نفختيلنا ريوسنا بيه !! العرس و ليوم عليك.. الراجل و ضمنتيه اش تحبي ؟؟
- موش على حكاية اما.. اما وليد.. نعرش تحسو مزال مابردش من كمال... بففففف كل ما تجي لبالي لحكاية نتوتر و يلبني لعرق ...
- اخزرلي انت نظيفة كالحليب و ما عندو اش عملك هاك الطحان... راجلك تو يتفهمك و يتفهم الجروح لي في قلبك..ماتحط شي في بالك تو كي يدخل بيك و تتهنو تو كل شي يتمسح ..الرجال الكل اعطيهم الليلة لولة تتعدى سلامات و كل شي يمشي على روحو...
- هذاك مناش خايفة
- يا بنتي تو تزكمي فيا ولا شنوا ماسمعتش خالتك اش قلتلك و اش وصلتك طاوعيه راجلك تو يسايسك غصرة و تتعدى ماتخافش هو زادة اكيد يعرف يتصرف ..
ايمان مسكينة كان تلقى تصيح و تقلها لاااااا راني مانيش خايفة منو يلمسني مانيش خايفة يتقربلي مانيش خايفة يكبر عندي احساس الخوف تاع الصبية ليلة دخلتها.. انا راني خايفة منو و من حياتي بعد مايتسكر علينا باب واحد... الهدوء لي معيشهولي.. لكلو برود.. و تناسي لبرشا حكايات نخاف الليلة يعاود يجبدهم ...
- باهي هيا هاو راجلك جاك هيا قوم سايس روحك..
- ياخي موش توفيق باش يجينا وليد اش مجيبو !! تو يلقاني في دارنا ..
- لا لا شتخرجو للصالة..سكتت .. بوك هكا حابب. . و عاودت طبست راسها هاربة من عينيها لي تسال ...
- اش معناها !!!
- ايمان يهديك ..هدي روحك. . تو محسوب تعرفو بابا انت تو يبرد و ينسى
- لتو لا نسى لتو لا برد! ! ياخي شعملت انا باش يعمل فيا هذا الكل شعملت باش نتحرم مالخرجة كالبنات الكل... تخيلني و انا خارجة بلاش مانكون اليد في اليد مع بابا !! تخيلني ماتكوتش آخر يد نبوسها هي يدو !! علاء يا ربي علااه
- تهاني تبكي على دموع اختها الصغيرة لي موش مواتيها فلك المسكينة.. اسس يزي امان ميسالش هاو راجلك هوني و تو تخرج معاه
- لاا نحب بابا نحب نخرج من دارنا نحب نهز معايا ريحة امي نحب نخرج بالبخور و الزغاريط كيما خرجت انت و البنات الكل. ..علاش كان انا لا علاش !! تبكي فرعست مكياجها حتى اختها و الحجامة غلبو فيها مانجموش يسكتوها اش خلاهم عيطولو باش جاء يهدي فيها...
- اول ما راهو تشل اصل ..كانت واقفة عاطياتو بالقفى مخبية وجها بيديها و تبكي بالشهقة... ما نجمش يشد روحو مانجمش ياقف يتفرج ممروج و هي جايبة طاقتها في بكيتها ياااسر تعوق فيه دموعها مشالها بلاش رادة منو دورها ليه و حضنها. ..
- شبي عروستي شبي حبي انا علاش يبكي !! هي دزت عالبكاء أكثر و تعنكشت فيه تتغصور و تشهق..
- باب..بابا..قلي ماتروحليش.. تخيل وليد انا باش نخرج بلاشو بيه.. دارنا مانيش باش نخرج منها..وزادت في شهقتها...علاه ياخي انا خايبة للدرجة هذي !! عملتي تستاهل هذا الكل! !
- أسس يزيني والله ماني حاملها فيك و راس حبي حاس بيك و فاهمك اما. .الله غالب فات منو ايمين حلف صايي .. قالي مرتك و وصلاتك منين تحب برا هزها..
- يا ليتني مت و لا عشتو هالنها ....
- لا لا لا ... سكتها بصوابعو على شفايفها... رد بالك تعاودها .. انا لشكون مالا !! انا هوني على خاطرك و على خاطر عيونك نجي مالموت ..انت ..برك حاول تعيش على خاطري حاول تعطيني قلبك حاول تسكني لهنا. ..هبط بيدو على صدرها شيرة قلبها... علاه هذا فارغ علاه مزال متعباش بيا !! مازال مجافيني لتوا !
عيى فيها باش هدات و خرجو..كانت اختها تفارع فيها بروبتها... و هي دمعتها ماكفتش... وليد يخزر مسكين موش عارف اش يحكي غلب فيها و ماقالتش انشف دمعة... ركبت في الكرهبة و شدو طريق الصالة... على قد ماجرات بيهم و هي تنعي...
- امااان ولييد باش يجي بابا للصالة قلي الي هو ماهوش باش يسلم فيا حتى غادي.. باش يخليني وحدي حتى غادي !!!
-هو بيدو ماكانش متاكد باش يجي ولا اما حاول يهديها و يطمنها...ايمان بالله امسح دموعك ...تهنى ص..صدقني باش يجي...خليت عندو بطاقاتنا للصداق يعني اكيد باش يجي...حاول يشدلها يديها الي ترعش...اخزرلي..نحكي معاك اخزرلي...عمريش وعدتك بحاجة و خلفت...كلشي يجيه وقت و يتصلح ...هذي ليلة فرحتنا خليها تتعدى بفرحة و نحطو ساق في هالطريق الجديد و احنا متبسمين و قلوبنا صافية
- إن شاء الله..ان شاء الله.. مالا زهر عندي فما شكون ليلة عرسها تكون شبه مطردة مالدار !!' عمري ماتوقعتها والله.. شوف كيفاش بديناها بالدموع من توا نعرش اش مازال يستنى فيا... خزرتلو كاينها تقلو انت زادة مازلت باش تبكيني و باش ترفض تلمسني.. تنهدت.. الحمد لله ..
-احسن كلمة قلتها...احمد ربي ايمان و قول ربي يسهل في الي جاي...بوك اعطيه وقتو تو يبرد...تعلم افرح...وطا في صوتو...نحبك تفرح ايمان يزيك ما تعبت و جريت و عانيت..نحبك تشيخ الليلة من قلبك اعطي حق روحك في الفرحة...انت عروسة و للات العرايس و مزيانة ...ايا تحبش نقوم نشطحلك توا باش تنحي العبسة الي على وجهك لا يقولو موش حابة عالعرس و العياذ بالله
- عوجتلو فمها .. لا حابة عالعرس اما لعريس بلييييد شويا... اوووف انا كيفاش باش نقابل الناس انا حتى مكياجي فسد و الحجامة مالا جيعانة تي هزتهم الفلوس الكل... هو يضحك عليها فرحان كي خرجها شويا من المناحة لي فتحتها. ..
-غمزها...انت بيه ولا بلاش هالمكياج..هي تبسمت فيبالها باش يمدحها و هو عرفها حب يدكك...عادية بالعكس بينت ليك ديفواتك الكل مسقطها...شد الضحكة بالسيف
- نعم !!!! هزت حاجبها مستنكرة كلامو... اما ديفوات اه ؟؟؟ شنية الديفوات؟ ؟ وين تشوف فيهم انت الديفوات ؟؟ بعدين يا سي وليد انا لي نحليه الماكياج موش هو يحليني و كانك عليا مانحبوش و مانحطوش بطبيعتي لا كي كنت صبية و لا توا كي وليت مرت راجل... اخر كلمتين خلاو قلبو يفرفط... اما هاني الواحد عباد و صالة و اضواو يتشاعو الواحد يبان عالقليلة .. حلوة هذي ديفواتي.. جيبلي انت مالحومة شكون ابيض مني شكون اشب مني شكون عندها شعري !!!! حط في بالك الي راك خذيت نوارة الحومة و شبابتها ايوااااه
-شاااخ عليها كيفاه ماكلة روحها سلاطة...قلبو يغني كيفاه خلاها تنسى و تبدا تخبش كيف القطوسة..عندك برشا ديفوات...عمللها بعينيه اي نعم...مثلا عينيك الي يلمعو الي اول ما ريتك دخت ديفو هذا ولا موش ديفو ...بدات تتبسم....صوتو ولا مبحاح من رغبتو...باهي شعرك نرمال هكا اكحل كيف الليل و انا يا معلم نضيع راني نضيع في الضلمة...زيد قلي موش ديفو...وجهك ابيض برشا برشا...سيا هبل بزينها...ياسر تلمع....باهي و كيف تدخل على صالة كاملة و يراو الزين هذا الكل تحب البنات ثقتهم في رواحهم تطفى...قربلها يحكي تقول يوشوش..نزيدك قداه من ديفو؟؟؟
- ممم..مزاال فما اخخرين هما !! تربثت من قربو و حاولت تهرب منو و من اسألتو.. يااا هذي الصالة !! محلاها من برة.. بانت عليها الفرحة مسكينة طايرة بالحب..
-هذي الصالة و هذا العريس...تكلم منغير حتى حسابات...دقايق اخرين و تولي مرتي...
- قلبها دق بالقوي و يديها ترخات بالفجعة .. الفجعة لي تركب اي صبية وقت يقرب كتبان الصداق .. ماصعبها من لحظة.. من غير ماتشعر شدتلو يدو و تكلمت بزربة من قلبها.. خليك شادني ماتخلينيش امان نخاف و نحشم... كانت مكبشة فيه تقول بيهرب.
-كبس على يديها و عينيه عاشقة ولهانة...تكلم بمحبة العالم الكل..اليدين هذي الي شدتك عمرها ماهي باش تسيبك ولا تخليك مدام فما نفس في الدنيا...
- تبسمت تحاول تتمالك روحها.. تحس في معدتها تقلبت وجها صفار ... هبط يحللها في الباب يسايس فيها بروبتها لي زادت فيها الشطر. . تلمت بيهم لعايلة و هي كانت تلوج بعينيها مارتاحت كان ماشافاتو وين الباركينك جاي مع علي في كرهبتو.. عينيها زغللو...
- وليد بابا بابا جا شوف. ههههه
-اش قتلك انا ...ايا اضحك و خلي الدنيا تضحك
دخلو للصالة لي كانت في شكل خيمة بكلها بالنفافخ لحمر لفوق في السقف و لون الطابي روج عاكس على لون للصالة ابيض..كانت التصديرة في اخر الصالة محلاها تفتق.. بعد الباب كي دخلو كانت على يسارهم قعدة في شكل قفص وين كان العدل و معاه الجماعة حاضرين لكتبان الصداق..الموزيكا مازالت هادية. .تسمع كان في حس لعباد يغلي ماسكتهم كان صوت العدل و هو يعمل في الخطبة متاعو...
-حس برعشة يديها طبس وشوشلها في وذنها...شبيك !!!
- وليد !
-يا مرت وليد بعد ربع ساعة هههههههه
- نحب نمشي للتوالات...
-شنوة؟؟؟؟ ايمان ياخي تفدلك
- باش ندوخلك راني.. عيشك وليييد عيشك !
<><>
#انتي_سبابي #كرونيك #كرونيكات
الحلقة 56
-اااه اسمع شدلي روحك خربش في وريقة الصداق خليني نملكك و تملكني و بعد تو ندوخو احنا الزوز ميسالش هههههههههه
- اععععع حرام عليك.. باهي مدلي نشرب...
بدى العدل يسكت في الحضور باش تسمع الناس الكل. .."" الحمد لله و الصلاة و السلام على رسول الله ..........""
السيد وليد بن علي الصيد ولد لطيفة الناطر تقبل ب ايمان بنت عمار الطرابلسي بنت خديجة الحاج قاسم زوجتك على سنة الله و رسوله الأعظم ! ... خزرلها بحب الدنيا الكل بعذاب السنين لي فاتو بلهفتو عليها.. عينيه تلمع و قلبو يدق بالقوى... "اي نقبل و شدلها يدها ..نقبل و لو نرجع بالتوالي و يصير فيا لي يصير نقبل "
- بدأت الجماعة تصفق و لولاد حربوها بالتزفير و العيااط... "ايا يا عروسة.. شدلها بطاقتها العدل... عروستنا صغرونة ههه باهي الآنسة ايمان بنت عمار الطرابلسي بنت المرحومة خديجة الحاج قاسم... في لحظتها هزت عينيها لبوها لي كان غارق في دموعو... مانجمتش تشد روحها عالبكاء هي زادة..."تقبلي بوليد ولد علي الصيد و لطيفة الناطر زوجا لك ! "" بدأت الجموع يفركو فيهم على ولييد "" هههه لا لا لا رآهم غلطوك يا سي العدل هذاك الباندي وليد زيد ثبت مالبطاقة هههههههههه ""
كانت عينيها في بوها كاينها تقلو شو هاني وليت مرت راجل هيا لين و يزيك مامعذبني... نقبل ... و اطرشقت بالبكاء...
كانت تحمل في خالتها و لطيفة مكبشة فيهم حاسة ببلاصة امها في نهار كيما هذا... شدتلها لطيفة يدها و هزتها لبوها وين كان واقف هو و وليد و الحاج و راجل خالتها يهنيو فيه بعيد شويا على لولاد تو بعد يتفاضالهم...
بداو يقدمو بيها...بوها منغير ما يهز راسو حس بيها جاية ...وليد راها هي و خالتها و البطبوطة جايين ...خزر غمز بوه...تلفت سي عمار
-ايا يا حاج هاي عروستنا جات نورتنا بحضورها..ايا يهديك الرحمان الي شهد الليلة على عرسهم و نشاله بنت و ولد حلال...اعطيها رضاك خلي ربي يسهللها
-راجل خالتها تكلم...ايا سي عمار...يجعل منك هاك نفذت حلفانك و خليتهاش تخرج من دارك...وسع بالك هاي مرت راجل و سيد الرجال و هاي ولات عمارة الغير ...بالله قلها كليمة و الله الطفلة تفرفد عليك
وليد ما حبش يتدخل فيبالو اقتنع...هي وصلت ديراكت عينيها بالدموع...
خزرتلو...بابا ماكش باش تقلي مبروك..
قدمت باش تشدلو يدو و هو بحركة خفيفة بعد..منغير ما يخزرلها...ربت على كتف وليد
-ولدي ربي يهنيكم...
خلا الناس الكل باهتة تتحسر على دموع هاليتيمة..اختها حملتها و بدات تبعد فيها لا الناس يشلقو...وليد ما عرفش اش يعمل ...خلط في جرتو يجري...عمي عمار بربي لحظة بربي في خاطري
-تلفتلو راجل في عمرو يبكي و دموعو على خديه...برا ارجع لمرتك...انت عالاقل ما تخليهاش.. هاني انا ماتخافش مانيش مروح...
وليد قلبو وجعو..عرفو مكسح اللعب ..تنهد...تهنى ايمان عين من عينيا
-غلبتو عبرة البكا...قدملو...راهي دلولة و انا الي مدللها...بالله رد بالك عليها...امانتي ليك يا وليدي..ايمان امانة عندك ...
- رجعلها و من خزرتها فهم إلى هي فهمت كل شي.. قدملها.. حبيبي .. شدلها يدها ... هيا خلينا نمشيو. .. مشات معاه اتبع فيه بعينيها بقلبها بكل مافيها ..خاطرو في كلمتين مالليلة ولى هو سندها لول و الأخير هو الكتف لي باش تبكي عليه و هو اليد بي باش تمسح دمعتها... وصلو للتصديرة و بدأت الموزيكا تشنع و الجو يحلى. ..
ناس جات تهني فرحانة من اصحاب و احباب و العايلة لكبيرة ,,, كانت الصالة تملا و تفرغ بمالي لعروسة اما كان الحظور طاغي لمالي وليد لي اجتاحوا كثر من شطر الصالة ناس مضخمة ناس مالبلاد عايشة جوها تطشح و تغني ,,, ناس الحومة الجيران و لحباب كانت فرحانة اكثر من كل شي كانت حاظرة من غير تصنع من غير عيرة و من غير هزان خشم,,, منى و سليم زادة جاو بقاو يسلمو مع وليد و ايمان و يعملو في سلفيات
-عزيزتي محلااك
-عيشك منى ان شاء الله في فرحة عازب على قريب
-ههههه ان شاء الله ,,, يا معلم عبرنا حتى شويا كانت تنابش في وليد لي كان لاهي مع اصحابو,,, شفتهم ايمان هاذوكم الكل قاريين معانا فرد بروميسيون اما ديما و قد مافرقتنا الدنيا نبقو ملمومين في عروسات بعضنا
-هههه صحة ليكم اي ظاهرين قراب
- اما راجل شي كبييير مايتنساش هههههه تعرف اكثر واحد محبوب من قبل واكثر واحد مشاكلي و مضاربي
- معناها وليد الباندي تسمية قديمة
-ههههههه اي تنجم تقول
هبطو الجموع تشطح علي و حمزة و ولد ناجية و اولاد الحومة الكل معاهم معاهم منيرة انتاربول و صفية خالة ايمان و بناتها نعيمة و هدي لي كانت عينيها قريت تخرج من اصحاب وليد و الكوادر لي هبطولو مالخارج اصحابو و معارفو باش يفرحو بيه مسكينة ريقها سايل على اي واحد يكون بوقوس و لاباس بيه و لبرة ,,, امها كيفها ترمي فيها عليهم و تقلها اشطح وري روحك ,,,
-هههههه نعيمة صديقتي شبيها اختك مشركة روحها ياخي
- اخطاني يا علي فضحتنا راهي بفففف
- مالا سلعة والله بالسيف تحب ادبر راجل يا ديني
- هههههههه شفت امي زايدة عليها ااااا
- اما انت نجمة السهرة تعرف اكثر من واحد من اصحاب وليد سالوه عليك و الله
- هههههههههههه اسكت يا ولدي لا تسمعك امي و الله تروح بيا تقلك انا باش نمرق اختها السعة هههههههه
- و الله جو فيها خالتي صفية ,,,, خلاها تشطح و مشى باش يفركهم على هدي في الوقت لي صفية جات لنعيمة
- يا بنت الكلبة اش موقف فيك مع الهامل علي
- يامي عادي ماتشوفش في الناس الكل تحكي و تشطح
- اي نشوف اما مع ناس في المستوى راك باش تقرى طب و انت واقفتلي مع واحد كان الهملة و الميعة
- اففففف يامي اش تحسبلها الصبر
- ايا لمي روحك ماكانش ترص شد الطاولة بحذا بوك شوف اختك وين رامية روحها تعلم يا بهيمة
- انت اكيد هبلتي يامي
- طيح سعدك انت مايتعملش عليك شوف بنت خالتك وين طاحت عيلة الصيد و ماندراك تي الخير باش ادزو بساقيها دزاان هذيكا صحة ليها تقول خديجة اختي والدتها ليلة القدر
- مكتوبها يامي مكتووووبها و ناس طيبة ماتاخو كان الطيب
- شوف بربي عايلتهم شوف هاك الضخامة و هاك الفيس تي كراهبهم تشعل لبرة شعلان
- هههههه ياخي تعس عليهم انت
- مايتفلتوش و الله اممم كانك فالحة انت و اختك ماتروحولي كان بيه
- هانها بنتك برالها انا خرجوني منها الهداري هذي
كانت تشطح و ضربة ضربتين تمشي للتصديرة تحكي مع ايمان زعما زعما قريبتها راني ,,, وليد مشلق بيها عينيها تحوم يغمز لعلي يحبو يفشلها ,,,
-هدهد
-هدة في فمك شتحب
- شي قلت نشطح مع جارتي و بنت حومتي
- ابعدني و الله تقرب نتفاهم معاك برا هانهم بنات الحومة اكداس مالصقت كان فيا الزح
- الله غالب شيري ماني قلت نطير عليك العين
- الصبر منكم مالا اشكال
- مانضحوش نعرف اما فاهمك راو يا ثعلوبة
- اقلب منظرك فصالة هذا
- ههههههه ,,,
وليد و رغم كثرة اصحابو لي دايرين بيه و الناس لي تهني ماهبطش عينيه من عليها هي لي كانت قاعدة تتبسم يحاولو فيها لبنات باش تقوم تشطح و شي حاس بيها و حاش بقلبها المكسور من بوها اما ماعندو مايعمللها ,,,,
ايا عااااد امونة يزي مالدلال و قوم دور دورة تي عرسك راو
-هههههه شوف هدى بنت خالتك تقول هي لعروسة مقطعة روحها
- هههههههه هي و امها
- و الله راسي و زيد الحس القوي وجعني هاني راكشة اشطحو انتوما
-هههههههه عروستنا رزينة يا ايناس
- ههههههه لا لا هذاك سي الحزار شاد العسة ماتشوفش فيه عينيه مرشوقة لنا ,,,,, هزت ايمان عينيها فيه غمزها و تبسم مانجمتس تشد روحها انها ترجعلو تبسيمة كانت مستحقة انها توريهالو ,,,,
فيقها من سرحتها تصفيق الناس و تزفير لولاد على صوت لغناية لي ختارها المايسترو باش يشطحو عليها لعرايس
((عم اعشق انا عم اخلق من اول و جديد ع اسمك انا عم البس خاتم عمري بالايييد))
مشالها هبطها مالتصديرة بكل حينية كانت عينيها عليه باش تاكلو اما فردوقت قاتلتها الحشة مالناس لي يخزرولهم ,,, وصلو لوسط الصالة و الناس دايرة بيهم ,, قربلها و بكل حنية و حب لزها ليه من نصها,,, كانت محلاها بروبتها لي لكلها بالدونتال في يديها و رقبتها بالكول,,,شعرها كان مسيب امبوكل بكلو متصدرو تاج ابيض مرصع محلاه ..حبها تكون ناتيرال,,,كانت حشمتها واضحة من تكبيشة يديها في شيميزتو,,, كان في شوميز برك بطبيعتو يكره الرسميات اصلا من لي وصل طيشها في الكرهبة
الفاست تاع الكومبلي هههههه و الله موش خارج عليه العرس حتى طرف,,, شعرو كان بالجال محلاه و لحيتو لي غلبو فيه لولاد باش ينحيها ماحبش قالهم كان لحيتي ماتمسوهاش اما تو نخفف فيها هههههه ,,,, كانت تميل بين يديه ترعش شويا من خوفها و شويا من حشمتها و شويا منو لي قريب ياكلها حاضنها بين يديه مخبيها عندو تقول شيخطفوهالو الليلة,,, مارتاحت كان ماكثرت الحركة لي دايرة بيهم و لي كوبل الكل هبطو يشطحو وقتها وين حست روحها عادية هو حاس عليها من تنهيدتها و رعشتها و نفسها المتقطع اما سخوون رهوجو الزح اش يعديها هالليلة ...
سالها على غفلة
-شبيك؟؟
- ش..شي مابيا
-النفس متاعو يدغدغ في وذنيها...شبيك ايمان...حاشمة ولا شنية حكايتك...ش..شبيك ترعش
- ابعد شويا امان الناس تخزر.. ا..ممان.. كانت تتنهد...
-رعشتها زادت دخلتو في حيط...زاد كبس على جنابها و لزها ليه...ضحك بخباثة...هكا سافا؟؟؟
- وليييد... طبست راسها جا في صدرو طول... مالضغط لي معيشهولها شدتلو في قفل الشوميز نطرتهولو... هو من ربي حال القفلة لولة و صدرو باين شويا زادت رزاتو في لخرة واش يسلكها الليلة
-شهق و بعد ضحك .. علاه شوميز هكاكة؟؟ تي كوستيم مشيت على خاطرها للعاصمة...استعرف الي انت غرت و طيرتلي القفلة بالعاني...بعدها شوية و تقابلت العينين...عينيه مزغلة بالفرحة...قول عاد و انت على دينك
-نفخت و تبسمت و هي يديها مكبشة فيه...تكلمت بدلال...يا حسرة مناش عندي نغير...تي انا نقول للقمرة اهبط خلي نجي في بلاصتك...
-شايخ على معشوقتو الي بين يديه و تتدلل..قدم شفتو و عاود قربها ليه..بدا يحكي و هو يغنيلها بالشوية...لا نمثلك بالشمس و لا بالقمرة...انت عليهم غالية يا امونة
- ههههههه... ضحكت بالشويا ضحكة دلولة.. صوتك خاايب موش لازم يسمعو غيري هههه... هزت فيه عينيها... تنجم ترخف شويا راك حزامي باش اطرشقو بين يديك والله.. ذبلتلو عينيها تترجى فيه...
-بعد شوية...اما باقي قريبلها...و انت تذبيلة عينيك ..موش لازم يراها حتى واحد غيري...تنهد و شدلها يديها بحركة مفاجأة باسها...و رجع حضنها...تبسم و خزرلها ...فرحانة؟؟؟؟
- امم. .. ياسر فرحانة.. ياااسر ، فرحانة لدرجة خايفة تصير حاجة خاطر..خاطر زهري و نعرفو... ولييد.. كبست على سواعدو ... مانحبش نفيق كان هذي حلمة. . مانحبش يجي غدوة كان فرحتي الليلة برك... حاسة انها حاجة اكبر مني لدرجة مستكثرتها هالفرحة في روحي..
-كلامها فرحو و حسسو بالمسؤولية شيخو...هز يديه مسحلها يحنية على خدها...هذي حقيقة و ماهي الا بداية لفرحة دايمة...نوعدك نرتحك و نسيك الي عشتو...قدم باسها من خدها بحنية هو حس روحو طاير و هي خدها حستو تحرق...يديه تمادات لشعرها...هي كانت عينيها تايهة في عينيه...حملها وشوشلها في وذنيها ...هالبابيون الي في كتفك عجبتني...بعد شوية و غمزها...شفتها كان انا...
- هههههه.. من قبيلة نستنا فيك تشلقش بيها...مركزة معاه ماحبتش تبعد خزرتها من عليه... وليييد..انا.. نار الحب باينة في عينيها باش تنطقها لولا الحس و الموزيكا لي بدلوها ربوخ تونسي...
"بنت الحي يا وخاااني تكوي كي...
#انتي_سبابي #كرونيك #كرونيكات
الحلقة 57
ضحكلها وليد ضحكة دوختها..ضحكة تحولت بشوي لتصفيرة و تصفيقة و شطيح ... ايييييي وليد يشطح يشطح و شادلها يديها يميل فيها معاه فرحان بيها فرحان لدرجة نسى كل شي كل شي ينجم يعكرلوو فرحتو بيها...
- الله الله يا عباد الله.. نا عاشق و العشق من الله قولو سماالله قولو سمالله.... هههههههه مقطع روحو بالغناء و بالشطيح و لولاد يفركو فيهم عليه فرحانينلو الكل دايرين بيه و بيها محلاه تكون عندك ناس تحبك و تقدرك و الاهم تفرحلك لفرحتك...
هي كانت كالاميرة بروبتها بشعرها لي هبلو و ديما مهبلو.. تشطح معاه طايرة بين يديه محسودة فيه لبنات الغيرة باينة على ملامحهم من ضحكتهم الصفرة ... تضحكلو متفاعلة معاه لمعة في عينيها سحراتو شداتو ليها قرباتو منها لدرجة دمعت عينيه و هو يبوسلها في جبينها...
- ن .ح.ب .ك. .. نحبك..نحبك..كان يحكي و شفايفو على جبينها تتحسس فيهم ماتسمع فيه كان بوذنيها و قلبها و روحها...عينيه دمعت اي دمعت و جاء باش يبكي اما شد روحو هزت عينيها فيه .
- وليد ! تبكي !!!
- تعرف اش تنميتها هاللحظة اش عديت ليالي نحلم بيك بالروبة البيضة هذي.. نحلم بعرف الحنة لي مزينها الحرقوس باسمك و هو يتقرن باسمي قدام ربي و عبادو تعرف اش معناها نحلم تكون مرتي ..مرتي حلالي و عرضي لي حلفت ماتكونو كان انت. .. علاش مانبكيش علاش ماتنزلش دمعتي و انا اليوم ملكتك اليوم كلامي و وعودي نشوف فيهم حقيقة...مازلت نسمع في لولاد و هوما يقولولي فك عليك راهي عينها موش منك مازال كلام منيرة في وذني كي قتلي الطفلة ما تحبكش برا عرس على روحك تو تنساها مازال ...سكت .... اليوم نحبهم الكل يسمعو نحبهم الكل يراو انا وين وصلت معاك و وين حطيتك..
- ولييد يز. .....
- اشششش ماتحكي شي ماتقول شي... انت تسمع برك ماتعبش روحك..الملايكة ماتعمل شي.
كانو فرحانين الفرحة مالية عينيهم و تصرفاتهم.. خاصة خزرتو هو المفضوحة ليها.. كانو عاملين جوهم لين خلطو السرفارات بالقاطو كان محلاه الكلو ايطاجات و مزين بالقرابط.. و كانت احلى حاجة و اكثر حاجة خاصة فيه هي كعبات الفلفول لي مزنين بيهم هي مسكينة باهتة فيه و في عملتو لوقتاش باش يبطل يفاجئها هكا.. غزرتلو ياخي غمزها و قالها براسو شوف.. زادت تصدمت و حطت يدها على فمها وقت رات تصويرة عالخبزة خادمينها عليها.. خلاها في سرحتها و مشا جاب الميكروفون مالفرقة. ..
- عسلامة... للناس لي جاتني من بعيد و قريب للاحباب و لصحاب لي فرحت لفرحتي لناسي و اهلي و ماليا .. لمرتي ..خزرلها بكل حب .. مرتي لي تعاركت انا و الباتيسيار على خاطر يعملي حارة الفلفول هذي على خاطرها ... اما غلبتو و عملت رايي... الضحك عبى الصالة ..يعني حد مايقرب و الا يخمم يهز كعبة خاطرو الكلو ليها هههههههههه ...قص عليه علي
- أي و شنيا حكاية هالتصويرة !!
- هههههههه نحب نقول للناس الكل راي مرتي كانت كعبورة و دبدوبة من قبل اما مزيانة. ..اي كنت هازها بالقدرة في التصويرة مالرزن... التصويرة كانت ياااسر اوريجينال و ياسر معبرة و فيها فرحة الطفولة و ضحك البراءة... تصويرة قديمة جمعت بيناتهم كانت تبكي و هو هازها على كتافو يسكت فييها و يعمل بصبعو اخزر للمصور ..
- هههه يا وليد تي هاي تبكي اختي ايمان !! ماتقليش بسبتك كالعادة و غمزو
- هههههه و الله خاطيني. .. كان فما مصور جاء للحومة وقتها لقيتها تبكي قاتلي نحب نصور ياخي عاودت سرقت من بابا خمسةمية... تلفت لبوه. .بابا سامحني ان شاء يجي نهار و نرجعهالك .. بوه كان قاعد يضحك من بعيد في بلاصتو و يعملو يتحلف فيه هههه.. الحاصيلو مشيتلو قتلو صورها واحدها ياخي هي حربتها بالبكاء كي عادتها ماي صغرونة كانت بنت اربعة ينين
- ههههههههه و انت يعني الفارس المقدام المنقذ !!
- بالضبط ههههه مشيت نسكت فيها طلعتها على كتافي فماش ماتسكت ياخي خطفلنا التصويرة
- ههههههههههه ديما تعاني صاحبى
- الله غالب وجه شقاء صاحبك. .. ضحكت الجموع... ااااه كتافي لتوا يوجعو مارزنك يا طفلة و خرجلها لسانو و هي شاخت بالضحك بعد ماحربتها بالدموع و تخلط عليها دموع و ضحك...
- شبيك يزي بالبكاء عاااد! ! ياخي ديما هكا انت ههههه
- محلاهم وليد والله محلاهم... و تحشات عندو عنقاتو و ركشت فم.. نحب فلفول
- اي هز هاو قدامك و لكلو ليك
- لا نحشم ..هزتلو باكتافها
- ناااري على روحي مالدلال. .. قدم جابلها كعبة و وكلهالها ياخي كانت بالكرام خلاتلها تراس على شفتها الفوقانية الحركة لي شهاتو يبوسها يمسحهالها و يطفي نارو لي شعلتها فيه. .. هو يشهى و الضو يتبدل و يولي خااافت هو طبعا مافوتش الفرصة تقول سمع بيه الضو... قربلها خطفها ببوسة.. هي ماتحس بيه كان بشفايفو يمصلها في شفتها... ترهوجت.
- في وذنها... فلفول و كرام و عسل و شفايفك ياسر عليا راو ياااسر ... كانت مصدومة منو و خايفة تتلفت يمين و يسار
- تهنى حد ماشافني و اصلا مامحايرني حد جوست حاشم من بابا كاهاو هاكا علاش خطفتها و الضو خافت..غمزها و رجع بيها للتصديرة...
تعدى الوقتة خلاتو مشات هي و نعيمة للتوالات ..و على دخلتهم يشوفو في طفلة تبكي و تصب على روحها في الماء كاينها تحاول تبرد نار شاعلة فيها. .. قربتلها ايمان
- اختي لباس !!
- خزرتلها في المرايا و عملتلها براسها "اي" و خرجت عجاجة
- مسكينة زعما شبيها
- هههه تلقاها شافت خطيبها قديم و الا صاحبها هههه و زلعها بحكاية.. تي هذي سماح بنت عم وليد مالبلاد
- اممم سلمت عليا قبيلة. .. حليلتها محلاها
-محلاها اما انت احلى يا روحي
-ههههه..رماتلها بوسة في الهوا و خرجو
تعدى الوقت محلاه بخزرة لغمزة لضحكة...وهي طايرة في السماء كل مرة تتلفت للبنات تلقاهم يشرقو فيها بالبوس من بعيد أولهم منى حبت تزيد اطمنها و تقلها عيش اللحظة... على تلفية مالقاتوش لوجت بعينيها تشوف شي ماراتوش بقات تتململ في بلاصتها كان عينيها يلعبو ويلوجو عليه ..لحظات و راتو هو و علي يتهامزو ضحكت و قالت في سرها " اش مازال باش تعمل مفاجئات في هالليلة يا عمري
- ريت الحظ يا علي ريت !!!
- هدي روحك صاحبي ..ماتحط شي في بالك احسب لومور تقدت و سافا
- اما تقدت و اما سافا يا ولدي قاتلو بيديا قتلك تفهم فيا !!!! و وينو مهدي شبيه لتوا !! وقتاه كلمك !!
- هاو جاي درجين كان طارت و تلقاه عند راسك
- الزح .. تلفت لايمان يلقاها تخزرلو من بعيد تستنى فيه يرجعلها... اش باش نعمل انا توا !!
- ماعندك ماتعمل يا راجل صلي عالنبي برا ارجع شد جنب مرتك لين يحلها الحللال. .. لحظات و تشوف في راجل ثالث معاهم يحكي و ظاهر عليه جايب خبر معاه ركزت معاهم اما الجوجمة و لبنات يلهيو فيها.. لين عاود رجع بجنبها وجهو مقلوب قاعد اما يرقل بكلو
- وليد.. حطت يدها على يدو لقاتها ترعش. . وليد لباس !! صايرة حاجة !!
- لباس لباس ضحكلها ضحكة صفرة يحاول يهدي بيها في اعصابو...
- شنوا صاير ياخي من لي واقف انت و علي ماكمش نورمال !!
- فدداتو باسالتها ... قتلك لباس ..و هيا حظر روحك باش نروحو... هاني مشى نخبر امي. .. خلاها باهتة تشوف فيه كيفاش جبد امو على شيرة يحكي معاها...
تشوف في علي نشر يزرب للفرقة و ماتسمع كان في غناية يحطوها كي تكمل السهرية. . تشوف في الناس قايمة. .لي يعاود يسلم و يهني لي خارج بمرتو يزرب و لي مازال محلق و يبارك... في سهوتها حست بيه يحطلها في الكاب على كتافها ... ياخي موش قتلك حظر روحك !!
- سكتت. .مالقات ماتقول... ردت عليه نعيمة. .. اه سلطان كاهاو باش تهرب بعروستك !! و غمزتها...
- كاهاو وقيت .. تبسم يحاول يبرولها... جاو لولاد دارو بيه يسلمو عليه و هي تلهات في روبتها دارين بيها لبنات و منى تبوس فيها و توشوشلها " عيش اللحظة عزيزتي ماتخمم في شي الكلو يتعدا خلي الفرحة بين عينيك و شوف الحب لي في عينيه وين باش يوصلك ربي يهنيك " هو عين عالجماعة و عين عليها شافها كيف مكبشة في منى..ضحك و فهم مخها اش مصورلها.
#انتي_سبابي #كرونيك #كرونيكات
الحلقة 58
خالتها كانت حابة تروح معاها لدارها ياخي لطيفة قالتلها لي وليد قال باش يروح بيها وحدو موش لازم يجي حد معاهم. ..هي كانت متوقعة جيت وحدة مالنساء معاها و خاصة خالتها اما كي سمعت حماتها سكتت قدامها... هز مرتو و طلع ديراكت بالكرهبة..
- الهدوء كان واضح قريب ينطق بيناتهم...جبت تكسر الصمت باي كلمة المهم يحكو حاجة من لي خرجو ماحكى معاها حتى كلمة ..شبيه تقلب اللطف و غزرتو بردت على قبيلة.... خالتي لطيفة قالت لي انت ماحبيتش تجي وحدة مالبنات معايا !! علاش ؟
-وجهو كان هادي عكس الي يحس فيه من داخل من حضورها و السر الي هبط عليها...و هي بجنبو و متزينة و هي مرتو و عرضو و مروحة لدارهم و باش يبداو مشوارهم..و هو قاعد يعيش في اللحظة الي سهر الليالي و هو يتمنى فيها ...كان يصارع باش يتحكم في روحو و ما يبينش.. فماش علاش؟ مستحقة شكون معاك انت؟؟
- لا اما..جرات العادة هكاك...لافتة وجها شيرة الشباك تتفرج فالكراهب ماعندها صنعة اما التوتر باين عليها و الحاجة هذي مافاتاتوش وليد... كانت تلعب بصوابعها و كل مرة تأخذ نفس و تنفخ ماتفهموش خوف رهبة حب... قداش كنت حابة نسكن مع خالتي لطيفة... مش احسن !! اش باش نعمل وحدي فيها الدار و زيد حومة جديدة و ناس مانعرفهمش..تحكي معاه على نيتها كالعادة ماتوقعتش ردو الجارف... تتليفو ليها زاد وترها تحس روحها تحكي وحدها... ولييد نكلم فيك !!
-كان عامل روحو متلفها اما من داخل قلبو يرفرف و دقاتو على نغم صوتها و كلامها معدلين...كان يستنشق في الهوا و معاه صوتها و نفسها...كان منتشي لاقصى حد و هو يرا في يدياتها الصغرونات بالحرقوس و الحنة ...كيفاه تشبك فيهم في بعضهم..كان متمني يملا الفراغات الي بين صوابعها بصوابعو...كان متمني ياخوها في حضنو و يعوض حرمان سنين و صبر اعوام من داخل كان فرحان بيها و هابل عليها...وقت الي تنفخ و يخرجو هاك الحناك الي من ربي كبار متمني يقرصهم..يحب يقلها راك دنيتي يحب يقلها راني توا وليت عايش يحب يقلها راني و انت جنبي انا توا موجود..كلام كان يقول فيه قبل بساعتين اما توا لسانو تلجم و الكلام ضاااع... في فمو كانت كلمة نعشقك و نحب نعيش معاك وحدنا ونبدا معاك كلشي في الجديد خاطر بيك وليت انسان جديد اما بالسيف عليه خرجت...اما حومة تحب تعيش فيها؟؟ الحومة الي ولاو الكل يحكيو عليك فيها؟ تحبني كليوم تلقاني قاتل واحد؟... هي تكونسات شبيه سخن هكا !! شبيه جبد لقديم برغم كانو كالعسل.. علاش يجرح فيها بالكلام ياخي اش عندها قالت !
كلامو وجعها خلاها تخزرلو بعينين حزان سخفوه... وليد... موش لازم كل مرة تفكرني في اكثر حاجة نحب ننساها..حطت يدها على رقبتها تبعد في الشركة لي خنقتها تحب تتنفس تحب تخرج كلامو لي عمالو و يزيد في راسها... وليد شبيك !! شبيك معايا ياخي كلامي اش فيه غلط والا خيابة باش تفوح فيا هكا !!! شبينا كنا لباس محلانا الناس حاسدتنا و تو .تو شنوا صار باش تتصرف معايا هكا باش تعاود توجعني بالكلام هذا بالوسخ لي عندي مدة نحاول انظفو من مخي .. عينيها دمعت... حرام عليك والله حرااام... عرسنا راو تقول ماكش وليد تاع قبيلة...ياخي شافق عليا والا شنيا حكايتك انت
مافاقت كان بالكرهبة حبست. .تشوف فيه يخزرلها الظاهر كان مركز معاها.. سكتت و خلاتلو الفرصة باش يقولش كلمة
-دقق عينيه فيها..كان موجوع على خاطرها اما لازم يتقوى منيش باش نجاوبك تعرش علاش؟؟ خاطر الشفقة ابعد احساس علي انا فيه...و كان على الراحة و انا بعيد عليك منيش مرتاح وانا معاك منيش مرتاح...تنهد و خزر لقدام...مانرتاح كان ماناخذ حقي.. مافهمت شي منو......بغض النظر على الحب و على هاك الحكايات انت امانة في رقبتي الى يوم يبعثون...مزالت باهتة فيه مسكينة راسها باش يتفجر من كلامو علاه هكا علاه !! حبت تصيح تقلو فهمني...شوف ايمان كلمتين باش نقول هملك...معايا ماكش باش تستحق شي و حد ما ينجم يضرك..انت في حمايتي و في ضمانتي...مرتي و عرضي و باش تعيش معززة مكرمة..انا نعرف تربيتك و نعرف عفتك و نظافتك و نعرف انك باش تصوني في غيابي و حظوري انا توا راجلك و ما ترا مني كان المعاملة بالمعروف ان شاء الله...هيا تفضل لدارك
- انا....سكتت كي شافاتو هبط و ماستناهاش حتى تجاوبو والا تقولو كلمة ... حبت تقلو باارشا حاجات حاستهم في حظورو و نفس الحاجات هذي تزيد تمرث ما بيها في غيابو اما كلامو يفجع كلامو زعزعها و ماخلاهاش تتوازن. .. قداش متبدل في ظرف ساعة تقلب..تحب تعرف شنوا صايرلو..هبطت اتبع فيه بعينيها و قلبها.. معاه للموت كان لزم المهم معاه حلالو و تحت جناحو ااه قداش حاسة بالراحة في حظورو
فتحلها الباب و شاورلها بيدو معناها ادخل عينيه الكل عليها ...زاد شعل و هو يشوف فيها هزت روبتها و بانو ساقيها ابيض سمت باسم الله و دخلت.. الحركة هذي قداش عجباتو منها... دورت وجها في الدار وبكل إعجاب قتلو.. محلاها الدار ياسر محلاها
-قدم تلفتلها للحظة حب يحملها يدخلها...حب يهبل و يهبلها كيما كان متمني...عمرو ماهو باش يسامحها خاطر ضيعت عليه و عليها احلى لحظات كانو ينجمو يعيشوها مع بعضهم...للحظة حط الحسابات على جنب و قلها منغير ما يشعر....كلام خرج من قلبو و ما خلاش فرصة لعقلو باش يتحكم فيه...محلاها بمولاتها...
- وليد..شدتو من يدو حبت تغيص فيه حبت تنحيلو هالقناع لي لابسو ياخي ناوي يهبلها ؟؟ قربتلو تحاول اطيحو... نحبك تحملني ..نحب تدخل بيت و انا في حملتك..كان يتنفس بزربة حاب يهرب و كان عاشق قربها فرد وقت ودلالها ..إحساس مخلط تعبو اكثر ماو تاعب يحس في جبل على كتافو... و على كتافو حس بلمستها لحنينة... هيا حملني ولييد... مغلوب على امرو منتشي بلحظات الحب خايف مالمجهول لي عكر عليه ليلتو ..حملها و لزها ليه بكل حب و خوف تقول باش تهرب هي مافهماتوش اما تحشات عندو تحب تطرد الافكار لي مخوفتها من كلامو و تصرفتو... وليد ماتخلينيش ..
-اشش خليك ساكتة خليك عندي خليك بين ضلو... التلفون قص على لحظتهم الرومنسية لحظتهم الأولى لي كانت باش تبدد التشنج لي عاشوه قبيلة في الكرهبة حطها عالكانابي و بعد عليها شويا من كلامو لي ملغز و وجهو لي تكبس ما فهمت شي تسمع فيه يقول "ابقو فم ماتتحركوش يبعد عليكم نقتلك انت و هو ومهدي تسمع فياااا !!!! تلفتلها بزربة... لحظات هاني راجع..وخرج و خلاها...
السعتين متاع الفجر كان قاعد في الكرهبة يستوعب في لي صار (((وينو !!! - معاه مهدي لداخل... دخل يجري مازال بالكوستيم متاعو... اول ماراه جرالو و طرحو ببونبية فلقلو خشمو..بدا يتقبح عليه الموش راجل
- انا تضربني يا وليد تضربني اما صحة ليك معاك صحابك متحامي بيهم
- شوفو الموش راجل...علي أخرج انت و مهدي و خليني راس راس معاه خليني نشوف الموش راجل هذا اش باش يعمل معايا...خرجو و خلوهم...
- ههههههه عريس جديد هاك يا سي وليد
- سيدك وليد يا زبلة... و زاد لحقلو البونية الثانية. .و برك فوقو... كمال الحوات قتلك من هاك العام ابعدني قتلك معاش ادور بسوايحي قتلك و نبهتك و وكلتك طريحة يا طحان و قتلك ثنيتك معاش تجيب ثنيتي اما انت اموت عالذل تبقى كي ذيل الكلب معوج..
- سيب. .. عامل فيها باندي ااه...عليا انا تتبورب ماريتش
ماريتش بنت عمار خطيبتي...و نزل عليه بدماغ فيضلو بيه راسو... مرتي هذيكا مررررتي خلك تجيبها على سيرة يا مسخ يا ساقط
- اااااه...يحكي موجوع مدمدم.. صارا عرستو مالا ماتقليش هذي جيتك من عرسك اااااوووو قصيت عليك الموال ههههه بربي ويني هاكي الطفلة
-دين..... شبيك سماك انت! !!! و طاح فيه بالكف لين دخل في حالة هستيريا ... معاش تجيبها على لسانك معاش تذكرو اسمها في فمك يا طحاان معاش تحكي سكر سكر فمك لم فمك. ...
- تعرف طلعت لبوة...مزال فيه حيل يحكي الساقط.. بعد الطريحة هذي الكل... والله منعت مني خسارة..اااه قداش شاهي...
-اااااااا سكر سكر تحكي في مرتي راك في عرضي يا م...... و الله والله حلفت ماندخل بيها كان مانتشفى فيك يا ساقط يا واطي يا مريض يا مجرم... حطمو و ماخلاش فيه
- تع...تعرف..تعرفف لتوا. ..يرد في النفس.. .لتوا بين عينيا هاكي لحكاية لي في صدرها. ..بدا يكح موجوع... هههه وحمة تشهيك باش تبوسها. .تخليك ....
-موش عارف روحو كيفاش في لحظة طبس على لوحة بجنبو مطيشة يعطيه بيها يدوخو..زادو بيها بين راقيه عوقو..هذي على خاطرها يا من....... الله عليك يا خامج راك أنس لا بنون صوردي يا مب ......باش يعاود يزيدو كان موش لولاد راهو عمل فيه جريمة الليلة... سيبوني والله مانشرب من دمو والله مانسلخو قدام لعباد و نمشيه عريان طحااان..تحب نطرهرك يا قليل الرجلة يا ديوث ؟؟؟ تي سيبو ز ..... انتم خليني ن. ....امو الق ......
-وليد يزيه سيبو
- تي برا ن.....يا مهدي ماسمعتوش اش يقول
- كذب و رأس خويا كذب صلي عالنبي و برا روح هانك على يمينك تشفيت فيه
- لا مزال حسابي معاه و الله مانكركرو بالكرهبة
- قلنالك عاد وليد تو نقصرو بيه الليل انا و علي برا روح على روحك برا عاااد مرتك تستنى....)))
ماحسش بدمعتو كي هبطت كانت تحرق نار كان قلبو دم على روحو و عليها و على لكلام لي سمعو من الطحان. .. كيفاش باش يواجها توا كيفاش باش يهز عينو فيها بعد لكلام لي قالهولو هذاك الساقط.. اما وحمة يحكي عليها بففففففف مخو تحرق. ..نزل هز الفاست في يدو و دور المفتاح و دخل... ..حل الباب و بدا يفركس عليها بعينيه و اول ما شافها كيفاه متكية عالكانابي بروبتها قلبو رعش وعينيه تعباو بالعبرة..دوبة خزرتلو تربث و و حط يديه في جيبو...السلام...مزلت فايقة لتوا
#انتي_سبابي #كرونيك #كرونيكات
الحلقة 59
بقات تخزرلو و ساكتة كابتة في سرها دموعها لي ما كفوش كي خلاها و خرج...وقفت تفارع في روبتها... والله هاك تشوف فيا يعني بروبتي بما جاب ربي بالسخط هذا الكل مازلت فايقة متحملة السخانة متحملة الخوف متحملة نكون في دار وحدي شطرها ظلمة و مازلت فايقة ... نستنى فيك. .نستنى في لي قبل ساعتين قالي انت في حمايتي و ضمانتي اما انت خليتنى مشيت و خليتني في اول ليلة مع بعضنا في بالك الي هذي ليلة عرسنا ولا !!! تعرف اش معناها !! مسحت على جبينها و نفخت..دموعها سبقتها فضحتها... ماتخلينيش وحدي ما تبينش نفورك مني و احنا مازلنا باسم الله في بداية حياتنا.... هزت روبتها لي ياما تمنات تلبسهالو و هو ينحيها كيما لبنات الكل.. .تبسيمة تاع حسرة ترسمت على شفايفها خلاتو و مشات.
-كلامها خلاه يسخف عليها عندها الحق قداشو بهيم يمشي و يخليها شكونو هو كمال مقارنة بثانية معاها اما هو تزكم و عمل عملة باش تبكيها منو..خزرة اللوم و النكسار لي في عينيهاخلات الكلام يموت على شفايفو..حب يقلها راني امنيتي توا نهزك و ندخل بيك كأي مرا...حب يقلها راني خرجت باش ناخولك حقك باش نمرمد الي خمم نهار يضرك...تمنى يقلها برشا كلام لكن صراع عقلو و قلبو ما خلاهش يتحرك من بلاصتو...بقا واقف جامد..يدور في الصالة و يمسح على راسو كيفاش باش يصلح لي صار كيفاش باش يبادر بالكلام و يجبدلها لازم يقلها باش يبررلها موقفو ولو ضعيف قدام موقفها و لومها..مصعبها عليه الزح.. بقى شارد و في لحظة محا كلشي معادش يهمو..مشا بخطوات ملهوفة و دق الباب و دخل بالشوية على تلفيتتها تكا عالحيط و بدا يحكي...عمري ما نخليك...لو كان نسلم في الدنيا الكل عمري ما نسلم في وعد وعدتو...انت كنت و باش تبقا مسؤوليتي و امانتي..انا خذيت عهد على روحي باش ما نخزر في وجهك و مانتهنى و نحس روحي راجل و بكلمتي الا ما نمشيلو..مهمه شوية و كمل...كان مسنود عالحيط و يحكي بمرارة نهار الي ريت دموعك ..نوم الليل ولا محرم عليا قبل ما نفديلك ثارك و ما بردت الا ما مرمدتو...هز فيها عينيه..احساسي ياما عديت سنين و انا نحكي عليه و نفهم فيك و نجري في حضوضك باش مرة هز صبعو مرررة تفهمني و تفهم حبي ليك...لكن انت عمرك ما سمعتني..انا اليوم خذيتلك طاقك منو هذاك الكلب..عينيها وساعو و بدأت ترعش و ترمش في عينيها بتوتر سيرتو برك دخلتها في حيط.....انت امنتي الي باش نصونها و نحميها ...و ما ترا مني كان المعروف ان شاء الله..كانت ترعش من نبرة صوتو..تخلط عليها كلشي مسكينة و هو فهم اني خايفة منو... ما تخافش...صوتو كان مهموم...ما حبيتكش حياتي الكل باش تجي تخاف مني...كلشي نقبلو الا خوفك مني ايمان.
- باين عليها داخلة في حيط.. فهمني عيشك شنوا لي صار اش جاك وين مشيت وين لقيتو هذاك ؟؟؟ علاش ماشيلو من اصلو ياخي باش يبقى ديما في جرتنا باش يبقى بيناتنا ديما ؟؟؟ قلت نسيناه و تعدينا الصعيب تجي انت توا تفكرتي بيه علااه بربي علاااه .!!!! هذاك علاه وليت تتهرب تخزرلي مرة و اتلفني عشرة !!! وشبيك تحكي على مسؤوليتك تجاهي ياخي في بالي معرسين وليد مرتك راني ياخي باش نشكك في رجوليتك معايا بعد هذا الكل و الا شنيا !! وين كنا وين صبحنا في ظرف سوايع رجعنا من جديد يا وليد رجعنا للصفر و انت لي رجعتنا ...مشيتلو سافا بردت توا !!! اشقالك !!! اكيد عبالك راسك عليا ااه !! و لأولاد اكيد قالولك علاش تاخوها و عامللها العرس الاسطوري هذا الكل و انت كرهتني بعدها و باش ترجع تشوفلي بالدوني ..بدات تبكي مالقهرة..مزال باش يكمل يحب يسكتها يحب يطمنها و يقلها اش تخرف انت حبي و عمري و امونتي اما هي من كثرة غلبتها و قفتها الموش متوازنة عثرت في الروبة جرالها شدها من خصرها ..و تقابلت العينين و لغة العيون ما تكذبش...ما تزيفش الي فما فما..و الي فما انو هو تاعب غارق يناجي و هي هالراجل هذا بالنسبة ليها كيما الموطن الي يكفي تحط راسها عندو و تنسى هم الدنيا...هز يديه بحركة اقوى منو و عداها على شعرها و تكلم بصوت قريب للهمس فيه بحة تأكد رغبتو الكبيرة و حبو الاكبر...
- يزي اماان مانحملش دموعك يحرقو راهو..
-نحس في روحي تاااعب يا ايمان
بلعت ريقها لي نشف و هي تخزر لشفايفو عينيها تمصمرت فما خلات شفايفها ترعش و هي تحكي... علاه محكوم علينا نذوقو عذاب الحب و مانطولوهشي. .علاه الراحة لي نبقو حياتنا نلوجو عليها عمالها تزيد تبعد ساعات تقرب و ساعات تبعد ممكن نحن مانحبوهاش ... كلامها متلبك موش مرتب يدل على تأثرها الواضح بحظورو كيفاه لا و هو دخلها في حيط بلمسة يدو و تغلغلها في شعرها... قربو ذوبها خلاها تكبس على عينيها باش تفيق من ريحة الهم لي حاطو هالسخطة ريحتو ملكت البيت خلاتها تتنفس بزربة ...قد ما هربت بعينيها بافكارها بكل شي مانجمتش مالقات ماتقول .... يا..ياخي شنباات في الروبة !! سؤالها و طريقة خزرانها في عينيه و اذيك التذبيلة التلقائية منها رهوجوه خلوه يعض شفتو اللوطنية شهوة فيها
خزرتو و عينيه الذابلين لي ماتحلى كان هي فيهم خلاها تحس بوجيعة في كرشها و دغدغة خلاتها تهز روحها و تبعد عليه شويا وهو كان موش الجاست متاعها و توخيرتها راو تمادى إلى ما اعظم كان كابتو في سرو..تفكر الفاليزات لي في الكرهبة و فهمها تحكي عالدبش لي نسى يهبطو حتى ...من فرحة لي حسها بالتلفون لي جاه خلاه ينسى حوايجها فالمان و يخليها بالروبة الوقت هذا
-شد في الكرسي الي قدامو باش ياخو توازنو الي فقدو من لمستها... هالطفلة بكلها تفاصيل قاتلة..بكلها تفاصيل تظهر للناس الكل عادية اما هو تذوبو ترهوجو..حفر الزين الي وحدة تظهر و وحدة تقعد متبية كأني ترأف بحالو ..خاطر كان يظهرو الزوز هههه يضيع هو في وسطهم...كي تتنرفز و تنفخ حركة عادية منها تخلي قلب يتوه و النفس يدخل بعضو معادش يفرق..
جابلها الفاليزات...دخل حطهم لقاها تتفارع مع الروبة ..هو كان باش يحط الدبش و يخرج اما صوتها كي توجعت و خرجت منها ''ااي'' خلاتو يقربلها بلهفة....لاباس؟؟ المساسك وجعوك؟؟
- جاوباتو موجوعة ...السلسلة شدتلي في شعري و يدي ماطالتهاش. ..بحركة منها من غير تخديم مخ تعطيه بالظهرر و تلف شعرها لقدام باش تخليلو كيفاش يسلكلها شعرها ويكمل لي بداتو...وليد ياخي شتبقى واقف حل امان شعري تقطع وجعني
-هو كان مسلطن بقربها و يستنشق في ريحتها الي دخلت لعروق قلبو...يديه كانت ترعش الشي الي زاد وترها...حط صوابعو في وسط شعرها و غرق معادش منجم يطلع...سلكلها شعرها و هي النفس قوا نفس الشي ليه هو الي دقات قلبو قواو و ولاو فاضحين...يديه تمادت و بدات تمشي و تجي على شعرها لكل...معادش منجم يسيطر على روحو بدا يمسحلها لى رقبتها مزالت كي نطقت كلمة ...و...وليد... و بصوت فيه بحة خلات الرعشة تسري في بدنها جاوبها بلهفة و بنفس ضياق مالرغبة....محلاك يا روح وليد..
مزالت باش تهرب باش تبعد...حتى هي ولات تغفق و ما تحس كان بيه دورها ليه و حط جبينو على جبينها و يديه الدافية على خدها...كان مسير من احساسو لا مخير ..يحبها و ما ينجم يعيش كان بقربها...حلالو مرتو روحو...حلمتو الي تمناها سنين..لمعة عينيه كانت تلخص كلشي...رجفتو و لسانو الي خانو كان اكبر دليل على رغبتو فيها...بعينين ذابلين خزر فيها و بدا يقرب لشفايفها و ما تحس بيهم كان خدروها..باسها بكل قوية...بلهفة السنين و شوق الليالي الي عداهم يتمنى فيها حلالو...بنقمة القدر الي شوية لا بعدها عليه..كان يطعم فيها و يستحلا في بدنها الي بين يديه...بوسة حب يروي بيها شوييية من ضمأ سنين...كانت ترعش بين يديه...منغير سابق انظار جبد روحو ...كان دايخ بمطعم شفايفها اما جبد روحو.....هي كي حست ببوستو تفاعلت معاه و سلمت..فازة من وراها حب كبييير و عفوية طفلة تتباس بالحنية هذي الكل..هو كان في دنيا ما فيها كان هوما الزوز لكن في لحظة انسحب...حسسها بالبرد بعد الدفا...و رغم رعشتو الي باينة فاضحة..رغم شفايفو الي يلزو فيه باش يعاود لكنو انسحب...كلام واحد طحان شاذ خلاه يبعد برغم لهفتو و حبو اما تدارك..و الحاجة لخرة كلامها لي سمعتهولو لي لتوا يوجع فيه..وزاد عليه كلام منى قبيلة كي قاتلو ماتضغطش عليها راي مزالت كيف تجاوبت معايا في الجلسات...مسكين فيبالو كان هو عندو مشاعر و كابتها...وخر لتالي و خزرلها في عينيها الي مزالت ذايبة من تأثير بوستو..لا لا لا.. ايمان سامحني انا لا مانجمش.. و انت ماتحبش..
- سامحني !!! تطلب في السماح على خاطر بوسة.. !! ماتخزرليش هكاك وليد نعرف الي انت راجل في النهاية و انا مرتك يعني...يعني مانجمش نقاومك..علاه توا! ! بدات تضرب فيه. .. علاه ماك بوستني بكري في الصالة شنوا تبدل توا !!! ماك كنت تقربلي و متسلطن علاه النفور هذا الكل علاه تتهرب و تبادر بالصد !!! شبيك بردت اش قالك فهمني اش عبالك راسك قلييي !!! شنوا مازال باش نسمع اناا اه !
#انتي_سبابي #كرونيك #كرونيكات
الحلقة 60
- وطي صوتك رد بالك تعليه في وجهي... و على خاطرك انسانة ما تعرفش تخمم خاطرك انسانة تخزر للامور بطريقة اخرى...عقلك هذا مصورلك اني انا حيوان الي ما ينجمش يشد روحو قدام مرتو و يمكن ياسر ما يخليلهاش الفرصة باش تقاومو.. شنية الفرق بيني و بين غيري كان نغصب عليك حاجة ما تحبهاش..هي عينيها وساعو..حساتو رجع لنفس الموال تاع قبل زعما باش ينتقم لروحو !!
-وليييد هاني نتعالج شكون قالك مانحب...قص عليها
-اششش انا طلبت السماح خاطر عارفك معندك حتى ذنب اما انا الغالط كيما كل مرة ...خاطر ما نحبش نستغلك كورقة رابحة و نلزك لحاجات يعيفوك كامل.. اما انا مانيش متاع استغلال ..انت ابرا الساعة و عنا كلام اخر تو يجي وقتو و..و.. انا..مهمه شويا يحب يخرجها هالفولة لي خنقتو يحب يسألها على الوحمة و موش منجم يحس في روحو قاعد يبلبز بالكلام معاها و باش يجرحها بفففف ... ما نحبش نكون فارض عليك حاجة باسم القانون... هي هبلت سايي مسكينة تسخف يدخلها مالباب يخرجها مالخوخة. ..
- اييييييييي شبيك كبشتلي في انا و انت..و استغلال و زمارة. .والله لعظيم كان موش نعرفك بطلتو نقول شارب !!! تعرف مانيش قاعدة نفهم فيك و لا في التكتيك لي عمالك اطبق فيه في علاقتنا. .. خلينا مالاحترام و راك باش تعيش معززة مكرمة مدامك مرت وليد و شي ما ينقصك و بلا بلا بلا ..لازمك تفهمني علاش !! علاش
انا عمري ما عشت عالة على غيري حتى بابا ماتعبتوش معايا من لي توفات امي و اشدت عودي بطلتها القراية و خرجت نخدم و نجيب في الفلوس بعرقي باش ما نحتاج نمد يدي لحد. ..اما لي مانحملوش انو تجي انت تو تلعبلي فيها دور البطل و توقف و تعارض الناس و الفضيحة لي صارتلي و تقلهم هذي مرتي و تبقى تعس عليا ليل و نهار انا مرتك لي ماشي في بالك باش تخرجها من الذل و تبعدها على كلام الناس اما بيدك قاعد تذل فيها كي خليتها مرتك ..علاه !! علاه تعمل معايا هكا وليد علاه تعمل في حاجات مانستاهلهمش منك خاصة.. تنجم تبعد راك و راك حتى سافرت اما انت قلبت لومور الكل و زدت على مصابي... جاوبني !! والا ماعندك ماتحكي !! اصلا اش باش تقلي ماو كالعادة انت مسؤوليتي و زايد لحديث. .اي وليد لحديث مع اناني كيفك زايد. .فرحان تو كسرتلي شوكتي و في لخير هاني مرتك تربط اسمي باسمك فرحااان سكتت ترد في النفس بصعوب
-بقا باهت...صوتو تلجم و هو يسمع فيها و يرا في توترها و انهيارها و هي تحكي...بالحق ما فهمش شنية يجاوب كان مغلف مشاعرو بكلمة انت في ضمانتي...و مخبي احساسو بشعور المسؤولية تجاهها اما توا شنية باش يقول... تكلم بصوت فيه بااارشا غل
- كان فما شكون عالة على صاحبو راهو انا...خذيتني محسوب على سواد عيني ولا محبتك فيا...انا الي كل ما تخزرلي نحس بالهم الثقيل الي تجبرت عليه..انا الي ..الي بلع ريقو كي قربتك بديت ترعش و تدز فيا..انا الي حاسس روحي عالة و احساسي عالة و وجودي قربك عالة و حاجة انت موش مستحملتها...انا نهار الي قررت باش ناخوك كانت عندي اسبابي ...اسبابي اني نحبك اني نحبك معايا اني خفت عليك من هم الدنيا خفت بوك يعطيك لغيري منغير رضايتك...خفت عليك و كنت اناني في حبي...و انا كان جيت نستغل في الفرص ما نبعدش و ندعيلك ربي يهنيك نهارت الي اخترت...خمم وحدك و افهم وحدك بطبيعتك عمرك ماباش تفهم ولا حكمت قلبك و عقلك كي تحكم عليا...كلمتين باش نقول هملك...لا انت تستحق الشفقة باش نشفق عليك..و لا استغلالي للفرص و خذيتك..انت مرتي و راسك لفوق و الي صارلك من جرة كسوحية راسك الي مخليتك توا تصيح و تعيط و تقلي في كلام هكا... مشا شوية ناحية الباب و دارلها ....و كان جيت نجم نبعد راني بعدت و كان جيت نجم ننسى راني نسيت...فما حاجات ما يتنساوش ..فما حاجات خلقو باش يبقاو ويعيشو معانا و يموتو معانا و مالحاجات هضوما ..انت.. و نزل على سنيه..و الطحان كمال الحوات.
تصدمت في ملامو في وجهو المتصلب في كسوحية قلبو و كلامو الماسط. .. يا لندرا هذا الوجه الحقيقي لوليد و الا كيف !!! وينو تاع الفلفول وين تاع البوسة لحنينة و الكلام لحو !! زاد على بابيها كلامو لي فيض بيه الكاس..
-و نحب نقلك حاجة..نهار الي الحكاية وصلت لمصلحتك و سمعتك بين الناس وقتها معادش نخمم في شي انا ..و رغبتك عندك الحق كان لازم نشاوروك هههه ياخي تتبهلل و الا تستهبل فيا !!! تقبل و كلمة ماتزيدهاش و جاب ربي والا راهي الامور خرجت من يدينا انا و بوك...منيش بطل و منيش قوي و منيش شهم..انا كلب و ينعن جد اصلي الكلب ..انا واحد يحب يوجع روحو الله غالب...ما لقاش حاجة توجع ياخي حبك انت
- حرام عليك والله حرام و عيب لي تعمل فيه معايا..بدات تبكي قاعدة على حافة السرير و تبكي... ايمان ..ايمان..ايمان تعبت ايمان راهي ...كان عاطيها بظهرو استفزها بالبرود متاعو ... يا اخي راو لي صار عليا مش ساهل راني من صدمة لصدمة...عينيها ماكفتش.. صدمتي بوفات امي عوقت فيا و كي قلت بريت عرست تهاني و خلاتني وحدي... و نقوم بعدها نلقى روحي نخدم. .اي بنت 18 سنة و نخدم و معملة على روحي و قايمة بدارنا.. ايامات تعداو مانحبش نتفكرهم بدموعهم و نكدهم و فقرهم.. و زيد حظي لمسود يطيحني بولد لحرام لي حب ياخو اغلى حاجة عندي الحاجة لي نقتل روحي و لا تتمس مني ... و انت وليد ...انت لتوا مانيش فاهمة دخولك في حياتي كيفاش ..عيشك ماتخلينيش نعيش المر لي تعدا عليا.. ما تزيدش عاليا انا وليد تاااعبة راني راسي باش يطرشق...فهمني قلي باش وصلتك ياخي موجوع مني !! قالك حاجة عليا هذاك ولد لحرام احكي ولييد احكي و ريحني اما ماتعملش فيا هكا ماتضربنيش في النار بعد ما كنت في الجنة قبيلة ... تمسح في دموعها و قاتلو...تتفكر كي قتلك كانها حلمة مانحبش نفيق !! ههههه والله و طلعت حلمة. .. قتلك راني حاسة بحاجة خاطر موش ليا الفرح موش من وجهي اما انت قتلي لا أفرح و راهي حقيقة و راك باش تعيش الدنيا ...ويني الدنيا وليد !! ويني الفرحة وينو الفعل و وينو وعدك ليا. . وينو وعدك لبابا !!! وينو الحب !!! انا ماريت شي الليلة ماريت شي كان الدموع كان اللامبالات و الكلام لي مامنو حتى ثمرة. .. برالو ارجعلو الساقط ولد الحوات و زيد اسألو بالك خاطرك في حاجة أخرى تعرفها و لا ممكن نساش حكاية برالو لي فضلتو عليا ليلة عرسي... برالو برا اخرجلو ... اخرج.. وقفت ادز فيه لين جاباتو مالباب لبرا..
كمنتار ببلوڨر
❤️
ردحذف