أحببت ابن عمي
الحلقة 1:
صباح الخير بابوتي
-صباح النور يا احلى بنوتة في دنيا
-ههه باهي انا لازم نمشي نقرى معاش بكري
-باهي رد بالك على روحك و اهوكا الشوفار تو يهزك و يروح بيك انا و بيرم عندنا اجتماع ليوم
-باهي بابا تهنى
جات خارجة لين ترى فيه هابط من الدروج ريحة البرفان سابقتو و وهرتو تخليك تحبس في بلاصتك لابس شوميز في نوار مضهرتلو بدنو المخدوم و سروال نوار و لحية محصورة
-اهلا اسيل وين ماشيا
بقات مبهة شوي و بعد فاقت على روحها
-اا ماشيا نقرى
-ماشيا تقرى هكا
بقا يهز فيها و يحط وبعد تلفت لاحمد بوها
-شفت بنتك طن طن تقول عليها بنت العساس مش بنت اكبر رجل اعمال في تونس فضحتنا اللطف
تبسمت و خرجت حاسرة دمعتهافي عينيها ووجيعة في قلبها هذي بطلتنا اسيل تبرك الله عليها زين و عين عينيها خضر و شفرها طويل ستيل يفتق و شفايف روز و اما ماهياش لاهيا بروحها ديما شعرها كعكة و كسكات و سلوبات مهملة مضهرها فقدت امها في عمر صغير و ماتمتعتش بيها وقعدت عقدة في حياتها هي عايشة مع بوها وولد عمها بيرم الي عكسها تماما عندو مضهرو هو الكل شطر بنات تونس مصاحبهم يحب الجو و تفرهيد و مصروف بيرم عايلتو ماتت في اكسيدون و هو صغير ياخي تبناه عمو احمد و رباه و خلاه لاهي بشريكاتو و خدمتو … خرجت من القصر و ركبت في كرهبة حطت الكيت و بقات تسمع في الموسيقى و تتفرج من الشباك ووين تتفكر بيرم تتنهد لامتاش باش تبقى مخبيا حبو في قلبها ملي جاء سكن حذاهم و هي تحبو اما هو يحسبها كي اختو كانت تموت الف موتة كيف تراه مع صاحبتو يضحكو ولا كيف يجيبها للدار و هي تبقى تبكي كانت تتمنى تكون في بلاصتها … وصلت لليسي تلقى صحبتها نور
-اهلا اسيل وينك سافا
-منيش سافا يانور فديت كل يوم نراه مع طفلة و قلبي يتحرق راني نتمننى الارض تتشق و تبلعني
-وسع بالك عيش اختي علاش ما تعترفلوش بكل شيء و ترتاح
-حتى انا قلت يزيني ما صبرت و خزنت في قلبي يزي ما بكيت لازم نقلو والي يصير خلي يصير
الحلقة 2 :
كملت قرات و بعد روحت للدار على ساقيها تتفرج في الماشي و الجاي العباد لكل يغزرو لمضهرها و لبستها و هي ولا على بالها الفرحة معبيا قلبها متشوقة كيفاه باش تعترفلو بحبها تمشي و تتبسم لين ترى زوز كوبل قاعدين مع بعضهم فرحانين و ياكلو في ڨلاس بقات تتخيل في روحها مع بيرم في بلاصتهم تنهدت و كملت طريقها .. وصلت للقصر تلقى العساس عم التهامي يغني كيف العادة مشات سلمت عليه و بعد دخلت للقصر تلقى دادا قمر تستنى فيها
-وينك لتو يا حلوفة و شبيك ما جيتش مع شوفار
-حبيت نجي على ساقيا و نعمل دورة فيها حاجة
-باهي نحطلك تفطر
-لا لا ماعينيش قلي بيرم هنا
-اي اهوكا في بيتو
مشات تجري لبيتها عملت شويا بارفان و مشات لبيتو هدت عليه الباب تلقاه فوق فرشو
-اووو اكاكا تدخل متعرفش دق تو كان جيت عريان و لا مع صحبتي
-تي محسوب انتي شطر بنات تونس لكل شافوك عريان و كانك على صاحبتك طز فاها
-ههه باهي قلي شنو تحب
-انا نحب …
-متقليش وليت تحب طفل هيا مبروك اول مرة نسمعك وليت تحب
-تي لا انا نحبك انتي و ليا برشا مخبيا في قلبي و جاء الوقت الي باش نعترفلك بيه
-ههههههه ياخي واعيا بشنوة قاعدة تحكي يا بنتي فيق على روحك راك كيف اختي و زيد انا ماعمري ما غزرتلك شوف روحك في المرايا شوف حالتك ههههه ملا حالة راك مزلت فرخة
بقات جامدة في بلاصتها دموعها غلبوها و هبطو على خدودها هو حس روحو ندم قرب منها و هزلها راسها
-سامحني اسيل لازمك تنسى و الحكاية تموت لهنا انا نحبك كيف اختى كهو
بعد علاها و هي مزالت مصدومة تحب تكذب الي سمعاتو تمنات تموت و لا تسمع الي سمعاتو تمنات ما قلتلوش و تبقى الحكاية مخبيا في قلبها .. خرجت من بيتو تتدهشر ساقيها معاش هزينها لين تتقابل مع صاحبتو امل طالعة في دروج بقات تثبت فيها كانت لابسة روبة في روج. قصيرة و شعرها في اصفر محلول على ضهرها و مكياج غامق وطالون نوار و هي تتبختر
-اهلا اسيل سافا
خلاتها و دخلت لبيتها منغير ما تجاوبها
بيرم كان قاعد في فرشو و شاد راسو بين يديه محبش يصير هذا و مكانش متصورو باش يصير لين دخلت امل
-اهلا بيرم شبيك
-شيء شبيك جيت انتي
-توحشتك حبي جيت نطل عليك
-باهي اقعد
قعدت حذاها وهي تتمسكن بكلها و تتفينس …
الحلقة 3 :
اسيل دخلت لبيتها دموعها على خدها قعدت قدام المرايا مش مصدقة الي صار تحب تستوعب الي صار بدات تحكي مع روحها ‹‹علاه هي شنوة فيها خير مني علاه هي معاه وانا لا ››بقات تغزر لروحها الي مهملتها و عايشة كي راجل نحات الكسكات من على راسها و حلت شعرها و كانت هذي اول مرة تحل فيها شعرها حتى حد ميعرف طولو ولا زينو بدات تتبسم و دموعها على خدها ‹‹اتو تشوف يا بيرم باش تشوف وحدة اخرى اسيل القديمة ماتت و جات اسيل وحدة اخرى›› رجعت شعرها كعكة و لبست الكسكات و تبسمت بكل ثقة سمعت بوها جاء مشات غسلت وجها و رسمت تبسيمة على فمها و هبطت في دوج تجري لبوها الي اكثر انسان وقف معاها و ضحى على خاطرها و محبش يعرس باش مجيبش لبنتو مرت بو مشات ترمات في حضنو
-بابوتي توحشتك برشا شبيك بطيت
-كهو عاد خدمة و انتي احكيلي شنوة عملت ليوم
حست بغصة في قلبها و بعد تبسمت
-شيء قريت كي العادة و روحت
-هيا باهي .. قمر الفطور حاضر
-اي سي احمد حاضر باهي عيط لبيرم مدام انا جيت
-سي احمد بيرم معاه مدام وزال امل في البيت
تبسم -باهي خليه يغرم في زمانو مالا
اسيل عينيها قدحت من الغيرة و مشات قعدت في طاولة و هي ترعش بكلها .. جاء بوها و قعدو يفطرو لين هبط بيرم مع صحبتو باش يفطرو
–(امل )عسلامة عم احمد لاباس
(احمد)الحمدالله بنتي تفضلو اقعدو
قعدو في طاولة و بيرم قعد مقابل اسيل
(امل )اسيل شنوة حوالك شبيك ساكة ووجهك احمر
غزرت لابيرم بكل حقد و بعد جاوبتها و هي تتبسم
-شيء عزيزتي تاعبة و برا (تحكي و نازلة على سنيها )
كملو كلاو و بعد اسيل مشات لبيت بوها باش تطلب منو الفلوس
-بابوتي نحب نطلب منك حاجة
-اطلب اش تحب
-نحب تعطيني 3 ملاين باش نعمل شوبينغ
-هيا الحمدالله عليك كيف قررت باش تشري حوايج غير هلي لبستهم
-هههه باهي عاد با اعطيني خليني نمشي
-باهي تحب تمشي وحدك و لا نبعث معاك بيرم
-لا با نمشي وحدي خير
-باهي تفضل
جات ماشيا و بعد بوها ناداها
-ماكش باش تبوس بوك
-هههه امواه يا احلى بو في دنيا
خرجت فرحانة باش تتبدل حياتها من اول و جديد باش تجي اسيل وحدة اخرى غير اسيل هذي ..
اما زعمة تنجم تعمل هذا زعمة تنجم تفسخ 18 سنة من حياتها و تبدى من جديد كانت تمشي و فما خوف في قلبها ملي جاي اما في مخها لازمها تندم بيرم على عملتو وتخليه يجري وراها ..
الحلقة 4 :
مشات تدور في بوتيكات و تتفرج في الفترينات حوايج انواع و اشكال يهبلو دخلت و بقات مبهمة شي بعيد برشا على لبستها شرات برشا سراول محزوقة و روب قصار و زيد هي ستيلها يفتق الي تقيسو يجي علاه يهبل مشات لكوافير و عملت سبغة لشعرها في مارون و ملوطا جون و جبدتو و و عملت مانيكير في مات بعد شرات ماي كاب و روحت كانت تمشي و تضحك على روحها كيفاه باش تلبس هاضم الكل حاسة روحها باش تبدل رايها وصلت للقصر تنهدت و بعد طلعت للدروج تعدات من قدام بيت ادم لين تسمع فيه يضحك مع صحبتو ›افف مزالت هنا هالعزا هذي ياخي شبيه طول معاها زعمة حبها بالمنجد ياربي شنوة باش نعمل اففف ‹‹جات باش تمشي لين تسمع فيهم يحكيو عليها
-حبي قلي شبيها بنت عمك متغشة و فطور كامل و هي تقهرلي
-تي ماو طلعت تحبني الفرخة
-هههه تحبك هكا اش مازال قالو تحبك قال ياخي متراش في روحها في مرايا عفشة بكلها و هاكي لبسة تلبسها تقولش علاها مش بنت اكبر رجل اعمال في بلاد فضحتكم اصل تي انا نلبس خير منها ههه اسمع معاش نحبك تدور بيها فهمت
-هههه تي يزي حبي عاد راهي مزالت فرخة ههه
-ههه اي قلت الحق فرحة و عفشة
حست روحها معاش تنجم تاقف على ساقيها مشات لبيتها تجري رمات سيكانها و ترمات على الفرش تبكي بكل قهرة و غل في قلبها لين سونى تليفونها تلقاها نور صحبتها محبتش تهز علاها و هي في الحالة هاكي قامت مسحت دموعها و غزرت لروحها في المرايا و بدات تصيح ‹›يزيك من البكاء يزي ما بكيت حياتك الكل على خاطرو يزي ما خلاك تبات ليالي و انتي تبكي كل شيء باش يوفى تو باش تجي اسيل وحدة اخرى تو نوريكم شكون الفرخة ‹‹
مشات حلت خزانتها و خرجت حوايجها القدم و قطعتهم و هي تضحك و بعد نضمت حوايجها الجدد لشراتهم .. وبعد كلمت نور صحبتها
-اهلا وينك يا هم من قبيلة نطلب فيك
-هاني في دار
-باهي اسمع اسمع فما حفلة اللليلة في دار مها و جماعة الليسي الكل جايين اسمع انا نعرف الي انتي ماكش ماشيا اما …
-باهي
-ااا عاود اش قلت
-قتلك امتا الحفلة
-مع تسعة تع ليل
-باهي تعادالي تو تلقاني حاضرة
نور قعدت مبهمة مش مصدقة هذي اسيل صحبتها و لا تحلم …
الحلقة 5:
قامت فرحانة ليلة اول ضهور لاسيل الجديدة .. حلت خزانتها و بقات تخمم و بعد هزت روب في الباج و قصيرة و بالكمام و ضهرها الكل عريان و طالون في نوار .. عملت دوش بارد و بعد بدلت حوايجها و عملت مكياج غامق في عينيها و مات في فمها حلت شعرها الطويل على ضهرها و لبست الطالون المرة لولا منجمتش تمشي بيه بحكم الي هي متعودة بسبادري اما بعد تعودت هزت الساك متاعها ووقفت قدام مراية معقلتش روحها تبدلت كمبلاتمن ***واو محلاني ههه تو تشوف يا بيرم شكون الفرخة و العفشة **كلمت نور باش تجيها
-تي وينك ياسخطة من قبيلا نستنى فيك
-اللطف كنت تو باش نكلم هيا اهبط هاني لوطة نستنى فيك
هبطت تتبختر في دروج بوها كان قاعد وقف مش مصدق الي هذي بنتو طول عمرها كانت مخبيا زينها ملي ماتت امها كرهت كل شيء قعد يغزرلها و عينيه دمعت
-واوو تبركالله على بنتي الحمدالله عشت و شفتك لابسة و عايشة كيف اندادك كنت خايف عليك اما تو الحمدالله
-عيشك بابوتي انا لازم نمشي تو نور تستنى
-ههه قريب نصدق الي انتي ماكش اسيل ههه
-ههه امواه يا احلى بو في دنيا
-رد بالك على روحك و ما تبطاش
-تهنى با
خرجت و هي تتبسم مشات لنور و بدات تتبهنس
-هيا خلينا نمشيو
-وين نمشيو عيش اختي انا نستى في صاحبتي و انتي شكونك يالا
-امان نور ياخي ماعقلتنيش لاهدرجة تبدلت
-اسيل امبو هذي انتي ههه مش مصدقة اقرصني بالك نحلم
-هيا يزي من البلادة و خلينا نمشيو
-هيا
ركبو في كرهبة و مشاو للحفلة .. وصلو لدار مها و اسيل ولا قلبها في 100 كيفاه باش تنجم تواجه العالم الناس الكل يعرفوها باسيل القديمة زعمة تنجم تبدل روحها و لا هي تمثل على بيرم كهو …
-اسيل شبيك مبهمة هيا نهبطو
-هيا
دخلو للحفلة و العينين لكل ترشقو فاها الاولاد الكل يبزنسو فاها و البنات غايرين منها مشاو قعدو في طاولة مع اولاد صحابهم
وسام -نور عرفنا على المزة الي معاك
نور -ههه هذيكا يا سيدي اسيل الشريف بنت سي احمد الشريف
خولة-لا امبو اسيل اذيكا الي ديما تلبس كي اولاد
احمد -واو مكنتش نحسيبك هكا تقتل
-مرسي
وسام -هيا تفضل اشرب كاس معانا خلينا نفرحو بيك
-لا انا ما نشربش
-كيفاه عاد لازمك تشرب
تبسمت و هزت منو و كاس شربت شوي حست روحها تقلقت منهم لكل يغزرولها كيف كانت تلبس كيف اولاد كانت مرتاحة و ميقلقها حد اما تو لكل يحبو يصاحبوها و لا يشطحو معاها ..
-سمحوني نحب نمشي لتولات
-تفضل عزييزتي
الحلقة 6:
جات ماشيا لين ترى في بيرم داخل و معاه صاحبتو امل يضحكو عاملين جو و شايخين دخلت لتوالات تغلي بكلها و الغيرة كلاتها جات باش تبكي ام قوت روحها غسلت وجها و غزرت لروحها في المرايا و بدات تتبسم عاودت مكياجها و هزت شعرها لفوق و خرجت تتبختر بطالون الاولاد لكل مركزين معاها و هي ولا على بالها قعدت في طاولة و بدات تشرب
وسام -ياخي مش قلت منحبش نشرب
-لا نحب ههه
بيرم كان يضحك مع امل لين شافها
-املل شوف مش الطفلة هاكي كينها تشبه لاسيل
-ههه اسيل امبو تي اش جاب هذا الهذا يا ولدي اسيل راهي تو راقدة في بيتها هههه و زيد عفشة و هذي مزة
بيرم عمل روحو صدقها اما مزال شاك فيها … اسيل كانت تشرب و تعاود و هي تڨحر لامل و بيرم
نور -اسيل يزي ما شربت قوم نروحو
-لا مزال بكري هههه و زيد مزلت مشطحتش
وسام لقاها فرصة باش تشطح معاه و يصاحبها و زيد هو ملي شافها طاح لوف
-اسيل تقبل تشطح معايا
-اي اكيد
قامت تشطح و تنڨز في صالة و تتطايح بكلها عملت الفضح .. بيرم كان مركز معاها لين يرى في تاتو متع بابيون على ضهرها عرفها الي هي اسيل حس الدم جمد في عروقو و زيد يرى فيها تشطح مع طفل حس روحو تخنق .. دز الطاولة الي قدامو و مشالها جبدها من مرفقها
-تحرك روح قدامي و اتو نتفاهمو في دار
امل -بيرم شمدخلك في طفلة و منين تعرفها
-انتي سكر فمك اسيل تحرك قدامي
اسيل كانت فرحانة و مش مصدقة الي قاعد يصير و عاملة روحها ما علا بلهاش
وسام -سيب الطفلة شمدخلك
-ابعد من قدامي خير هالليلة
-علاه شنوة باش تعملي
ضربو ببونيا على خشمو و بدا يكركر في اسيل وراه و هو بكلو يغلي بالغش .. اسيل كانت فرحانة و خايفة اول مرة ترى بيرم في الحالة هذي و الغش هذا الكل .. وصلو للكرهبة حللها الباب و دخلها و بعد مشا ركب و بدا يسوق
- شنوة تحب علاه تعمل في عرك و تحب تروح بيا بانا حق
-بالله انتي تشطح و زيد شاربة و تقلي بانا حق بحق .. (سكت شويا و اسيل كانت تستنى فيه شنوة باش يقول )بحق الي انتي كيف اختي وانا ولد عمك و مسؤول عليك
حست روحها تنبزت و باش تبكي بدات تصيح باش يهبطها
-ميهمكش فيا هبطني قتلك هبطني
وقف الكرهبة بقوة و غزرلها بڨهرة
-تحب تهبط اهبط انتي حرة
حست روحها خافت مكانتش تتصور يخليها تهبط .. هزت ساكها و طالونها و هبطت و هو مشا …
الحلقة 7:
بدات تسمع في شكون يمشي وراها زادت قوات في خطوتها و قلبها قريب يخرج من بلاصتو لين ترى في زوز رجال قدامها ريحتهم تعطعط بالشراب
-واو قطوس مروح وحدك في ليل متحبش شكون يوصلك
جات باش تهرب لين ترى فيهم دايرين باها يضحكو
-وين هاربة يا زين
-ابعد عيا مخيب منضرك تفيه و الله الا ما تندمو علي تعملو فيه ابعدو من قدامي
بداو يضحكو و هي زادت خافت ندمت على لحضة الي هبطت فيها من كرهبة
-هههه خوفتنا الحق ههههه
جاء باش يشدها من ايدها اما هي ضربتو بكف .. شدها من شعرها و بدا يصيح -تضرب فيا يا ق***اتو تشوف الرجال اش تعملك
جاء باش يضربها و هي غمضت عينيها و دموعها جراو على خدها حست روحها سايي باش تخسر حياتها و تمشي لامها .. بدات تسمع في صوت ضرب حلت عينيها و مش مصدقة الي ترى فيه بيرم قدامها يضرب فيهم بكل غل و هوما ولاو كي ضباع تحتو
-تحل في فمك علاها يا ط*** اههه اتو نواريكم في زوز تكلم تو عاد و لا و ليتو كي ضبع تتقوى كان على البنات يا هامل
حست روحها باش تضحك على منضرهم و هما يترجو فيه باش يسيبهم بقات تغزر لملامحو و عروقو الباينة و شعرو الي هابط على جبينو على لحضة نسات كل شيء و بقات مركزة معاه لين ترى في واحد باش يضربو بسكينة شهقت فرد شهقة و محست بروحها كان معرضة ببدنها باش تحميه .. حست كانها حاجة تغرست فيها مزالت مش مستوعبة الي صار .. بيرم كان لاهي يضرب فيهم لين يرى فيها طايحة لوطا و دم ينزف منها حس روحو ضايع و مشالها يجري
-اسيل امان فيق اسيل متخلنيش اسييييل قووم اماااان
-بييرم نحب.. ك
قالت اكاكا و داخت و هو بدا يصيح باسمها حس الدنيا ضلامت قدامو ركبها في حضنو و بدا يجري باها و ركبها في كرهبة و هو كي المهبول
-تحمل اسيل امان هنا قريب نوصلو متخلنييش وحدي منجمش نعيش بلا بيك
وصلو للسبيتار ركبها و هو يجري باها
-وينو اسعاف عندي مريضة فيسع امان
دخلوها لبيت عمليات و هو بقا يدادي و يسب في روحو هو السبب في هذا الكل مكاروش خلاها تهبط في عقاب الليل وحدها بدا يضرب في راسو ويلعن في روحو
-ياربي نشالله تفيق كان تصيرلها حاجة منجمش نعيش ..
الحلقة 8:
بقات حكاية نص ساعة و هي في بيت العمليات لين خرج الطبيب بيرم دوب ما شافو مشا يجري و هو ملهوف يستنى في خبر مزيان يستنى فيه باش يقلو لاباس
-دكتور امان قلي شنو صارلها لاباس ماو فاقت
الطبيب هبط راسو و هو متاسف
-بصراحة منخبيش عليك اما الضربة جاتها قوية و ضرتلها على رحم متاعها و فما امكانيا معاش تنجم تجيب صغار
دوب ما سمع كلام الطبيب طاح على ركايبو من الصدمة مش منجم يصدق الي صاير هذي اكثر حاجة متنجمش تتقبلها المرا انها متعيشش فترة امومة و الحبالة حس روحو هو السبب في كل شيء بدا يصيح و يضرب في راسو بكل غل
-سي بيرم وسع بالك لازم فما حل تنجم تعمل عملية و نشالله الباقي على ربي خلي عندك ايمان كبير
-انا سبب كيفاه باش نسامح روحي كيفاه باش تنجم تعيش بالخبر هذا في حياتها ياريتنا انا الي تضربت علاه عملت يا اسيل علاه حميتنى و ضريت روحك علاه
-متقولش هكا سي بيرم كل شيء ليه حل
-باهي نجم نشوفها دكتور
-لا تو هي في العناية المركزة اما تنجم تشوفها كان من البلار
-باهي يعيشك
مشا للبلار وين كانت اسيل راقدة قعد يشوف فيها كيف الملايكة راقدة و ماكينات على بدنها الكل حس بحرقة و قلبو وجعو كان يتخيل لو كان صارتلها حاجة شنوة كان يصير فيه كان يحس في حاجة داخلو مش فاهمها .. مشا باش يكلم عمو احمد باش يقلو
-اهلا بيرم لاباس
حس روحو مخنوق كيفاه باش يقلو الي بنتو الوحيدة بين حياة و موت جرايرو
-بصراحة عمي اسيل تضربت و هي تو في سبيطار اما متفجعش لاباس راهي
-كيفاه اسيل تضربت وقتاه ووين انتوما تو
-في سبيطار ***
-باهي هاني جاي تو ياربي اشفيها و رجعهالي ياربي متحرمنيش منها
حملتها و بقات تهدي فاها لين رتاحت …
الحلقة9:
جا أحمد للسبيطار و عرف بلي صار لبنتو و الي هي معاش تنجم تجيب صغار كان يحلم الي هو باش يربيلها صغارها و باش يعيطولو بابي اما تو حلمو طاح في ماء بقى يشوف في بنتو كيفاه راقدة تقول ملايكة بعد دار لبيرم و سألو
-شكون لي عمل في بنتي هكا
-لي ضربوها هربو عمي
-و انت في الوقت هذاكا شكنت تعمل ااه بقيت تغزرلهم كهو
-لا اماا
-لا أما لا شي بيرم بنتي تضربت جرتك و زيد فوق من هذا باش تتحرم من كلمة ماما
-عندك الحق عم أحمد
-أخرج بيرم بربي أخرج
-لا بربي عمي نحب نشوف أسيل كي تفيق نحب أنا لي نقوللها الخبر
-لا قتلك اخرج
-امان عمي اعطيني الفرصة هذي
-باهي تو كي تفيق تنجم تدخللها
.. احمد حس روحو ندم على الي قالو لبيرم كان خايف و متغشش على بنتو و مش عارف شنو باش يقول .. خرج يلقاه قاعد في جنينة و حاط ايديه على راسو يخمم فلي صاير و مصيبة الي وقعت على راسو وهو السبب فاها.. قرب منو و حط ايدو على كتفو
-بيرم ولدي سامحني اما كلام في حالة غش باش تسامح بوك و لا
-اكيد عمي تو هذا كلام انا متغششتش منك جملة و زيد عندك الحق و انا قررت باش نصلح غلطي
-اذاكي الي كاتبو ربي و انتي ماعندك ما تصلح عيش ولدي مش ذنبك انتي تحب اسيل كي اختك و مستحيل تمنالها حاجة كيف من هكا
سكت و قعد يخمم لازمو يرجع الضحكة على وجها و ميخليهاش تعاني بسببو هو .. قعدو ساكتين و يغزرو للمستقبل المجهول الي قدامهم واحد بنتو بين حياة و موت و واحد خذا قرار باش يحطم بيه حياتو …
جاء الصباح و كل واحد فيهم يستنى في اسيل تفيق لين خرج الطبيب يضحك
-الحمدالله سي احمد بنتك تعدت مرحلة الخطر و فاقت كان تحبو تنجمو تشوفوها
احمد مصدقش الي سمعو و دخل يجري للبنتو نوات عينو اما بيرم قعد يخمم كيفاه حياتو باش تتحطم و تتقلب
اسيل نوارت بوك الحمدالله على سلامتك
-بابا ياروحي توحشتك قلي شنوة صارلي انا لاباس
الحلقة 10:
هبط راسو مش منجم يصارحها و يقلها الحقيقة .. دموعو خانوه و هبطو على خدودو حاول يتمسك نفسو كان يتمنى يموت و لا يقلها خبر كيف ما هكا غمض عينيه مش منجم يغزرلها لين يسمع في بيرم يتكلم و انقضو من الوضع الي هو فيه
-عمي انا اتو نقلها
-فهموني يا خي شنوة الي صارلي تكلمو
قرب منها و شدلها ايدها و هي في اللحضة هاكي نسات كل شيء
-اسيل انتي معاش تنجم تجيب صغار على خاتر الضربة اثرت على الرحم متاعك
اسيل في وقتها جبدت ايدها مش مصدقة الي تسمع فيه
-كي.. فاه انتي قاعد تسمع في الي تقول فيه
من غير ما يجاوبها حضنها حس روحو باش يودع حياتو بعد القرار الي خذاه اما اسيل كانت فرحانة بلي صاير بدات تبكي باش تفرغ قلبها و في نفس الوقت تحس بحضن بيرم
-اسيل منغير ما تبكي انا باش نتقبل بلي صار حضر روحك الشهر الجاي عرسنا ..
باسها من خدها و خرج .. احمد طول خلط عليه
-بيرم ستنا
-نعم عمي لاباس
-عيش ولدي شنوة القرار الي خذيتو تو برى قدامي و الغي كل شيء منحبش نتحاسب قدام ربي و لا قدام امك و خويا انتي في كفالتي و منحبكش تعيش حزين
-لا عمي منغير متخمم اكاكا انا اسيل نحبها محبيتش نقلك هذا اما تو جاء الوقت الي لازم نصارحها فيه و نقلك ليك انتي و نتمنى تكون موافق
-هههه مدام هكا انا مسحيل نلقى خير منك نشالله الف مبروك و باش نعمللكم اعز و احلى عرس
-ههه عيشك عمي
حضنو و خرج .. ركب في الكرهبة و قعد يسوق و يضرب في الفولون و غش ماكنو عروق ايدو و جبينو ضهرو .. شد فران قوي و هبط و قعد يتمشى في البحر .. احساس الي قاعد يحس فيه منجم حد يوصفو اسيل بنسة ليه كيف اختو كيفاه باش يعرس باها و هو ميحبهاش و مينجمش يعيش معاها كان باش يعرس باها على خاتر حس روحو هو السبب في الي صارلها اما بالقرار الي خذاه ضلم روحو قعد يبكي حس روحو وحدو تمنى في اللحضة هاكي انو امو ولا بوه معاه عمو كان معوضلو اماتو حاس روحو وحدو ….
الحلقة 11 :
اما اسيل كانت عكس بيرم علخر دوب ما سمعت الخبر مش منجمة تصدق الي صار حتى مرضها مؤترش فاها بلعكس فرحت بيه طول عمرها تحلم ببيرم و تتمنى تكون معاه و ليوم حققت كل شيء .. كانت تضحك وحدها لين دخلت عليها نور صحبتها
-سمحني يا اسيل والله تو كي سمعت و بقدرت ربي تو كل شيء يتصلح متخافش
-ههههه بلعكس انا باش نموت بالفرحة
-ااا فرحانة لا انتي باز الضربة اثرت على عقلك ترا نشوف لا معندكش سخانة
-ههه انا تو طايرة في بحر من احاسيس و احلام و حب و برشا جو
-يا بنتي شبيك احكيلي
-هههه بيرم قلي الي هو يحبني و باش يعرس بيا الشهر الجاي
-هههه امبو مبروك عزيزتي الحمدالله وصلتي الي حبيتي عليه و حققتي حلمك ههه
-اي حتى انا تعبت و تعذبت اما وصلت الي حبيت عليه ….
بيرم كان قاعد و يخمم فلي يستنى فيه لين كلماتو امل حس روحو ضلمها الطفلة معاها غمض عينيه و بعد هز عليها
-اهلا حبي توحشتك
-ا……
-بيرم شبيك لاباس
-امل انا في ***ايجا اتو نحكو
-باهي هاني جايا تو
علق عليها و قعد يخمم لازمو يصارحها بكل شيء باش يرتح ضميرو .. بعد نص ساعة جات تضحك و فرحانة
-حبيبي هاني جيت امواه ههه
-امل لازم نحكيو في موضوع مهم
-ههه شنوة الموضوع المهم يا روحي
– بصراحة انا مجبور و باش نعرس
-ههه مزيانة الفدلكة هذي ههه
-امل منيش نفدلك نحكي بجدي نعرف الي انا باش نضلمك اما …
-مفماش اما بيرم كيفاه تعرس و الي صار بيناتنا و انا و حياتي شنوة باش نعمل فيهم و لا كنت مجرد شيخة عندك اهه قلي كنت نفرهدك وقت الي كنت مغشش قول تكلم انتي حسستني الي انا رخيصة منيش باش نسامحك واتو تندم علي باش تعملو في والله الا ما ندمك على كل دمعة هبطت مني
قالت اكاكا و مشات تبكي و بيرم بدا يصيح و يضرب في اي حاجة قدامو من شيرة اسيل و من شيرة امل كان قاعد في موقف مينجم حد يقعد فيه ..
الحلقة 12:
تعدات الايامات و العرس قرب اسيل كانت باش اطير بالفرحة مخلات ما شرات من حوايج و مكياجات مزالت مش مصدقة الي قاعد يصير .. اما بيرم كان حالتو حليلة كل يوم كان شرب و دخان مهمل حالتو قدام العباد فرحان اما وحدو حاجة اخرى ووين يقرب العرس يزيد يفد …
اليوم حمام العروسة .. اسيل قامت بكري فرحانة حضرت روحها و هبطت في الدروج تغني
-بابوتي صباح الخير
-ههه صباح الخير يا عروسة شبيك على بكري
-بابا ليوم الحمام راو و هاني نستنى في البنات
-ههه و الله مش مصدق بنتي كبرت فيسع و باش تعرس
-ههه اي قلي بابا بيرم وينو
-ااا اسمع عيش بنتي بيرم بعثتو باش يبقى في داركم مش معقول تراو بعضكم قبل العرس ههه
قعدو يضحكو لين دخلت قمر تزغرط
-وريييرييي على بنتي
-عيشك دادا قمر
-هكا تو بيناتنا اهنا راك بنتي .. هيا هام البنات جاو
-تي وينك يانور هذا الي نوصي فيك تجي بكري
-سيركيلاصيون و انتي شبيك تسري مزال بكري راو
-كهو هيا نمشيو هيا
خرجو و مشاو للحمام و عداوها نهار كامل ضحك و تفرهيد و بعد روحو اسيل طول مشات لبيتها باش ترتاح غدوة الفرحة الكبيرة .. دخلت لفرشها و بقات تتفكر في بيرم كيفاه باش يكون غدوة و كيفاه باش تكون اول ليلة مع بعضهم حست روحها فرحانة و متوحشاتو هزت تاليفونها و كلماتو اما ماجاوبهاش حست بغسرة في قلبها من نهار الي قلها على العرس في السيبتار ما حكاتش معاه بدات تهلوس و تبسمت بيرم اكيد يحبها و ميلعبش بمشاعرها ..
ليوم نهار جديد و نهار مهم بنسبة ليها قامت الصباح حست روحها خايفة انا فرحانة في نفس الوقت دخلت عليها قمر بالكانون البخور و هي تزغرط
-ههه شنوة هذا طاطا قمر
-هذا بخور من عادتنا نعملوه للعروسة نهار عرسها هيا قوم عاد البنات يستنو فيك باش تمشي للحجامة
-باهي طاطا نعمل دوش و نمشي
دخلت الدوش و بقات تلعب بالماء و تتخيل في روحها مع بيرم حب حياتها .. هبطت للصالة تلقى الدنيا تعبات بالعباد كل واحد يعمل في حاجة من التحضير للتزيين و للطياب باست بوها و مشات للحجامة
بيرم كان في بيتو يتكيف البيت بكلها و لات ضباب لحيتو مسيبة و شعرو مشبشب لين جاه صاحبو ابراهيم
-واو عروس شبيك لتو لا قمت
-ا…..
-بيرم صاحبي شبيك هيا قوم ليوم فرحتك
-مش فرحتي ليوم جنازتي منحبهاش و منحبش نعرس بيها
-مالا علاه تعمل في هذا الكل
-منعرفش للحضة ضلامت قدامي الدنيا و خذيت القرار هذا اما ندمت و منجمش نرجع عل قراري انا اسيل نحبها كي اختي كهو و عمري ما حسبتها حاجة اخرى و لا باش نحسبها
-يزي عيش خويا عدي هالنهار على خير بالك فيها خير و ربي مقدرلك هذا هيا قوم عاد
نفخ بكل غل و قام دوش و مشا للحجام حجم لحيتو و لبس الكستيم متاعو طلع عليه يهبل هو مشاالله عليه بقلاوة و زيد الكستيم زاد فيه الشطر ..
اسيل كانت تغني و تسلفي مع صحباتها
…الحجامة عملتها مكياج خفيف و روز في فمهاو لبست روب بربي في البلون طلعت تفتق .. بدا التزمير متع الكراهب و اسيل قلبها و لا في 100
نور -هام جاو هيا قومو عاد
خرجت مع صحبتها و بقات هايمة في زين بيرم الي عقدها و الكستيم متاعو وبابيون اما هو كان مش عاطيها اهتمام يصنع في التبسيمة بسيف .. ركبو في الكرهبة و ديريكسيون للصالة ….
الحلقة 13:
وصلو للصالة والعينين الكل عليهم و هو تباركالله طالعين على بعضهم قعدو في طاولة الصداق و قعدو يستناو في العدول اسيل كانت فرحانة و تضحك و كل مرة تغزر لبيرم كانها مش مصدقة الي هيا باش تعرس بيه وباش يكونو مع بعضهم اما بيرم كان يصنع في تبسيمة صفرة قدام العباد جاء العدول و بدا يحكي
-نبداو على بركة الله مدام اسيل الشريف بنت احمد الشريف هل تقبلين الزواج من بيرم الشريف بن كمال الشريف
-اي نقبل
-باهي سي بيرم الشريف هل تقبل الزواج من اسيل الشريف على سنة الله و رسوله
حس روحو تخنق و الكلام مش منجم يخرج من فمو غمض عينيه و تنهد
-نق.. بل
-اذن اعلنكما زوج و زوجة
عطاهم دفتر العيلة اسيل بدات تضحك و بعد سلمت على بيرم و مشاو قعدو في التصديرة و كملو السهرية جا وقت المرواح سلمت على بوها و صحبتها نور الي ضحات معاها و وقفت معاها في اشد اوقاتها و مشا ركبت في الكرهبة ثنية كاملة و هما ساكتين وصلو لداهم اسيل بدات تتبسم
-بيرم مكنتش نتصور يجي نهار و نعرسو enfin ههه
-باهي هيا ندخلو واتو نحكيو الداخل
-اي لداخل خير
دخلو لدارهم و اسيل تتبسم
-بيرم انا باش نمشي ندوش و نستناك في البيت
-باهي
مشات دخلت لبيتها فرحانة عملت دوش خفيف و لبست نويزات في نوار و بقات تستنى فيه .. بيرم كان مخنوق مش منجم يعمل شيء كيفاه باش يتصرف مع الموقف مع كل درجة تقربو للبيت يزيد يتخنق وصل قدام البيت دخل يلقاها تستنى فيه و هي تتبسم و مهبطة راسها نفخ بكل غل و قرب منها
-اسيل سمحني انا الليلة تاعب نشالله نعوضوها مرة اخرى تصبح على خير
-باهي وين ماشي
-نحب نمشي نشم شويا هواء ارقد متستنانيش
خرج و خلاها وحدها في ليلة عرسهم مكانتش تتصور الي ليلة عرسها باش تتعدى هكا بقات تبكي على الفرش متاعها حاسة ببعد بيرم ليها .. بيرم ركب في كرهبتو و مشا وصل قدام البحر الدنيا باردة تنعوش و البحر هايج كي حالتو قعد على ركايبو حس روحو مضلوم و ضالم اسيل معاه و دنيا ضالمتهم الاثنين …
الحلقة 14:
قعد وحدو لين حس روحو ارتاح ركب في كرهبتو وروح وصل للدار و دخل لبيتو يلقاه راقدة في الفرش و شعرها على وجها الكل سايح على عينيها و دموعها طابعة في الفرش .. بعدلها شعرها و نحا الفاست متاعو و رقد
صباح جديد قامت اسيل بكري تلقاه راقد بجنبها .. باستو من خدو و قامت مشات للكوجينة حبت تعملو سيربريز و تطيبلو الفطور الصباح بايديها عملت شعرها الفوق و بدات تصنف و هي تغني فرحانة حبت تنسى ليلة البارح و تبدى من الجديد .. بيرم قام يلقاها فاقت مشا غسل وجهو و بدل حوايجو كان هابط في الدروج و يشم في ريحة الماكلة
-صباح النور حبيبي ايجا هاني طيبتلك الفطور
-لا منجمش عندي اجتماع افطر انتي هيا باي
-اجتماع ياخي باش ترجع تخدم من نهار لول متع عرسنا
-اي و تو نخليك صحا فطورك
هو خرج و هي كسرت الطاولة لكلها و كبت الماكلة على لوطا و بقات تبكي كل حاجة تعملها يعذبها علاه كرهت روحها و كرهت كل شيء .. بيرم خرج و مشا للقهوة حذا ابراهيم صاحبو
-اهلا بالعروس ياخي مخلي مرتك و جاي
-بالله فك عليا قالو مرتك يا ابراهيم راني قريب نموت الطفلة عمال و تزيد تقرب مني ماشي في بالها نحبها تي انا نحب نخلاها تكرهني و تبعد عليا منجمش نطلب طلاق انا لازم نخليها هي الي تطلبو اما بعد ما تبرى
-شنوة باش نقلك يا صاحبي العيشة الي عايشها صعيبة برشا ربي معاك
-شفت يا صاحبي اش نعاني من شيرة اسيل و من شيرة امل زادة حتى هيا متغششة كيفاه خليتها و مشيت
-الصبر و برا
اسيل قعدت تبكي و تفرغ في قلبها لين كلمتها صحبتها نور
مسحت دموعها و رسمت تبسيمة على فمها
-صباح الخير يا عروسة متقليش قلقتك عاد
-ههه لا ما قلقتنيش
-قلي عاد كيفاه عديت ليلة البارح
حست بغصة في حلقها و قلبها ينزف بلعت ريقها و تفكرت كيفاه مشا و خلاها و كيفاه كسر خاترها
-شبيك سكت
-شيء اما عدينا ليلة تفتق و بيرم طلع يحبني اكثر ملي نتصور و هو تو في الكوجينة يطيبلي في الفطور
-صحى ليك عزيزتي ربي يهنيك
علقت عليها و زادت قوات في البكاء سمعاتو جاء مسحت دموعها و جات قايمة لين دخل و قعد يشوف في الماكلة طايحة في قاعة و هي عينيها حمر و مهبطة راسها
-شبيك اسيل لاباس
-لاباس
جات طالعة لبيتها اما شدلها ايدها
-حضر روحك باش نمشيو لدار بوك باش نتعشاو عندو
-باهي
الحلقة 15:
طلعت لبيتها و بقات تلوج على روب باش تلبسها لبست روب نوار قصيرة و عملت مكياج خفيف في عينيها و روج في فمها لبست طالون في روج .. هزت شعرها الفوق .. هبطت في الدروج تتبختر ريحة البرفان سابقتها .. بيرم كان يبربش في تاليفونو لين هز راسو منغير ما يشعر و قعد سارح معاها و مع جمالها الي سحرو في اللحضة هاكي نسا كل شيء و قعد مركز معاه .. عينيهم كانت لي تحكي و قلوبهم تسمع كانو في اللحضة هاكي عقولهم ماتت و قلوبهم عاشت اللحضة .. فاق على روحو و بعد دور وجهو باش ميزيدش يضعف قدامها ..
-هايا معاش بكري هاني نستنا في الكرهبة
اسيل تبسمت عجبتها الفازة و كيفاه للحضة شافت بيرم اخر اما بعد رجع بيرم الشرير .. خرجت و ركبت في الكرهبة و بدات تغمق في الروج .. بيرم كان يڨحرلها من تحت لتحت .. وصلو للقصر اسيل دخلت و مشات لبوها و ترمات في حضنو
-بابوتي الغالي توحشتك
-ههه اسيل عزيزتي هاك تبدلت بعد العرس
-اهلا عمي
-شنهي بيرم لاباس شنوة اوموركم بعد العرس
غزرو الزوز لبعضهم و بعد تكلمت اسيل
-اومورنا تهبل بابا شايخين مع بعضنا
-هيا باهي
قعدو يحكيو لين جات قمر
-هياو العشاء حضر
قعدو يتعشاو .. وبعد مشاو قعدو يسهرو وعداوها ضحك وفدلكة لين جاء وقت المرواح قام بيرم باش يروح
-هيا اسيل معاش بكري لازم نروحو
-هيا
جاو ماشين لين وقفهم احمد
-وين ماشين مفماش مرواح باش تباتو بحذايا ليلة
-اما عمي …
-لا اما و لا شيء باش تباتو يعني باش تباتو و زيد هاني حضرتلكم بيتكم
-باهي بابا جو
بيرم رسم تبسيمة على وجهو بسيف و ڨحر لاسيل ڨحرة موت يتحلف فيها اما هي ماعطتوش اهتمام و طلعت للبيت تلقاها بكلها ديكور يهبل فراش بلون ستان و شموع وورد قعدت تتبسم و بدات تتخيل في روحها مع بيرم قص على تفكيرها صوت الباب تحل بقوة
-فجعتني شبيك هاد
-شكون شورت باش تقبل على الباتان ولا لقيتها من الجنة و الناس اهه و زيد جو يلا جو اهه
-اشششش بشوي بابا تو يسمع
بحركة لا ارادية حطت صبعها على شفايفو باش تسكتو حست اكنو كورون سرا في بدنها لكل قعدو يغزرو لبعضهم و بيرم حس روحو ترهوج بدا يقرب منها لين حسرها مع الحيط و طبعلها بوسها على شفايفها طارو مع بعضهم لعالم اخر وفي لحضة بيرم فاق على روحها دزها و خرج قعد يدور في الجنينة مش فاهم كيفاه عمل هكا مكانش واعي على روحو شنوة يعمل عدى ايدو على شعرو مش فاهم شنو الاحساس الي قاعد يعيش فيه و شنوة تفسيرو للحضة يعيش في عالم اخر و ينسى كل شيء .. اما اسيل كانت فرحانة كل مرة تصير حاجة تقربهم من بعضهم اما مزالت مش فاهمة بيرم مرة يحبها و يبادلها نفس المشاعر و مرة يكون بارد معاها علخر …
الحلقة 16 :
تعدات الايامات نفس الروتين كل يوم عرك و بيرم كيف العادة مش عاطي اهمية لاسيل و لا لحتى شيء اما فما حاجة تجلبو لها و لتو مش فاهمها .. ليوم نهار سبيسيال بنسبة لاسيل ليوم عيد ميلاد بيرم و يلزمها تعملو سيربريز .. قامت الصباح بكري تلقاه قام تبسمت و مشات لمت الدار و نضمتها و بعد لبست سلوبات و خرجت باش تشريلو كادو بقات تدور في بوتيكات لين لقاتلو منڨالا في النوار تهبل و تمشي مع ستيلو و زادت خذات شموع و نوار و هي فرحانة و عاملة جو .. بيرم كان في بيروه مع سيكريتار متاعو
-بيرومتي شقولك نخرجو الليلة
-لا منجمش لازم نروح واعد اسيل باش نجي بكري
-أمان يا روحي و زيد شنوة يهمك فاها خلاها تو تتعب و ترقد
-لا يا سمر والله لا نجم انشاء الله مرة أخرى
-أماان يا روحي نهون عليك تخليني نسهر وحدي
-باهي كل شيء يهون إلا غشك ياا روحي
خرجو و مشاو للبار وقعدو يشربو و يشطحو و في الوقت اذاكا اسيل كانت تزين في الدار و حضرت كل شيء تبسمت و بعد مشات باش تبدل حوايجها عملت دوش و لبست روب روج قصيرة و بكلها عريانة و مكياج غامق و روج في فمها و مشات تستنى فيه و تتبسم ليوم لازم تخليه ينسى كل شيء و يعيشو معا بعضهم ليلتهم الاولى بقات تستنى فيه اما هو بطا … لين طلبتو بيرم كان قاعد يشطح لين جاه تليفون من عند اسيل جاء باش يجاوب اما سمر ناداتو باش يشطح .. اسيل قعدت الدور في دار و تستنى فيه هو وعدها باش يروح بكري و تو نص الليل و ما جاش … قعدت في صالة و قلق بدا يضرب فاها لين سمعت حلان الباب مشات تجري تلقاه جاء حالتو حليلة سكران يطايح بكلو
-بيرم يا روحي شبيك التو مش قلت ما نبطاش
-ابعد عليا .. شمدخلك
-امان بيرم شنوة عملت انا
-سكر عليا فمك عيفتني في روحي كرهتني في عيشتي افهم راني منحبكش و مستحيل نحبك اصلا شنوة فيك يتحب انتي اقلب عليا وجهك راني خذيتك في حالة ضعف غلطة انتي غلطة عمري نكرهك نكرهك
اسيل كانت تسمع فيه و دموعها على خدها حست روحها رخيصة تمنات في اللحضة الارض تتشق و تبلعها
-امان بيرم انا هكا انا غلطة عمرك علاه حطمتني هذا كفويا على خاترني حبيتك اهه هذا كفويا انتي هنتني و عفست على كرامتي مستحيل نجم نسامحك مستحيل
خلاتو و مشات لبيتها دموعها يجريو على خدها لبست كبوطها و هزت فاليز متاعها و خرجت .. وقفت قدامو و هي تغزرلو بكل حقد
-هاني باش نخرج من حياتك
خرجت و كلمت نور باش تهزها متنجمش تمشي لبوها و تحيرو معاها .. بيرم مكان فايق بشيء طول رقد … نور وصلت قدام الفيلا تلقاها تبكي هبطت و حملتها
-اسيل شبيك يا روحي احكيلي
-منحبش نحكي تو بعدني من هنا امان
-باهي ايجا معايا
ركبتها في كرهبة و هزت معاها و هي ثنية كاملة و هي تبكي كل ما تتفكر كلامو تزيد حرقتها تكبر و تزيد تعيف روحها
الحلقة 17:
قام الصباح يلقى روحو راقد في صالة حس راسو رزين و يوجع قعد يرى في صالة بكلها مزينة بالشموع و الورد و ڨاتو يلقى فيه اسمو و بجنبها كادو قعد يشوف فيها يلقاها منقالة و زوز كوارط سفر لباريس قعد يتبسم و بعد بدا ينادي في اسيل اما ماجوبو حد طلع لبيت النوم يلقاها كيف كيف مزينة و وفرش في الروج و ضوء خفيف قعد يلوج علاها ملقاهاش طلبها ما جوباتوش
-وين مشيت يا اسيل اففف
تلفت يلقى الخزانة فارغة و الفاليز مفماش بدا يتفكر شنوة صار لبارح ضرب راسو و بدا يصيح و يكسر في كل شيء قدامو
-يا ربي شنوة عملت وينك يا اسيل امان ارجع و متخلينيش
لبس حوايجو كيف ما جا و خرج يجري ركب في الكرهبة متاعو و مشا يلوج علاها كيف المهبول طلبها برشا مرات اما ما تجاوبش ..
اسيل عدات ليلة كاملة و هي تبكي لين جاتها نور في صباح
-اسيل عيش اختي يزي من البكا ما يستاهلش باش تبكي عليه خليه تو يعرف قيمتك و يجي يطلب منك سماح
-منجمش ننسى شنوة قالي كلامو قاعد يتعاود في وذني
-بالك في لحضة غش و زيد هو شارب مش عارف على روحو شنوة قاعد يقول
-اما الكلام اذاكا كان مخبي في قلبو و انا قلت بدا يحبني و باش نعديو شهر العسل مع بعضنا
حملتها باش تهديها شوي و تخفف علاها .. نور متحملتش كيفاه ترى صحبتها الوحيدة اكاكا ووقررت انها تتصرف في الموضوع
-اسيل شقولك تمشي للبحر و تعمل دورة و تشم شويا هواء
-زعمة
-اي اي و زيد هواء البحر يرتحك
-باهي
قامت بدلت حوايجها و خرجت ..
بيرم لوج علاها و ملقهاش رجع للدار دوب ما دخل حسها فرغت ملقاش شكون يفش فيه غلو ملقاش على شكون يعيط بقا يغزر في كل بلاصة فما تصويرتها و ريحتها ماليا الدار صوت ضحكتها مزال يسمع فيه قعد على ركايبو مكانش حاس بيها كيف كانت معاه اما تو حاس كلي احساس غريب بعد مامشات حس روحو متوحشها و حزين برشا على غيابها
-امان ارجع اسيل ارجع
كلماتو سمر مجاوبهاش معاش يحب شيء غير انو اسيل ترجع .. طلع لبيتو و تكا على فرش و قعد يخمم فيها مش عارف علاه تصويرتها مش مفارقاتو .. مفاقش على روحو كيفاه رقد و بدا يحلم باسيل ماشيا و مخلياتو ووحدو و هو يبكي و يترجا فيها باش ترجع .. فاق على صوت دقان قوي في الباب .. فرح يحسابها اسيل مشا يجري و حل الباب …..
الحلقة 18:
حل الباب يلقاها نور قدامو
-نور شتعمل هنا
-جيت باش نحاسبك ياخي تحساب روحك كان انتي تنجم تسب و لا تهين اهه قلي ياخي تحساب اسيل معندهاش مالي
-نور لحضة نفسرك ادخل اتو نحكيو
دخلت تلقا الدار داخلة بعضها قعدت في الصالة و بقات تڨحرلو
-امان قلي اسيل وين بلحق ماكنتش حاس بقيمتها تعرف بلحق عرفت الي انا نحبها
-اما انتي وجعتها برشا
-نعرف و انا مستعد باش نعوضلها كل شيء
اسيل كانت تدور في البحر شعرها يلعبلها بيه الريح كانت تتمنى تدور هي و بيرم مع بعضهم … حست بشكون حملها بدات تبكي حست بيه هو بعدتلو ايديه و جات باش تمشي
-اسيل ستنى امان سمحني
-بيرم ابعد عليا
جات ماشيا اما وقفها بكلمة خلاتها تذوب في بلاصتها و كانت تستنى فيها عمرها لكل
-اسييل نحببببببك
تلفتلو و بقات تبكي
-تعرف الكلمة هذي عندي 5 سنين نستنى فاها اما جات مخر يا بيرم
-معندك وين ماشيا من ليوم ساقي ساقك
ركبها و هزها على ضهرو وهي تتغبط و هو شايخ علاه و يضحك
-بيرم هبطي والله نصيح هبطي اعععع عاونوني راو خاطفني اعععع
-هههه منيش مهبطك باش ترجع لدارك و راجلك
ركبها في الكرهبة و هي باقي تصيح .. وصلو لدارهم
-هيا اهبط يا عروسة باش تدخل لدارك
-منحبش
-باهي ههه
ركبها و هي شايخة في حكاية اما متحبش تضهر .. دخلو من باب وهو فرحان و فرحتو ماتتصفش برجوع اسيل حس روحو بلحق يحبها كان اول مرة يجرب الحب البنات الي صاحبهم قبل كان باش يشيخ كهو اما اسيل بدلتلو حياتو و خلاتو يعيش الفرحة الي تحرم منها .. الدار كانت مزينة بكلها و تصاورهم ماليا الحيوط و ورد في روج و شموع و بالونات
-شكون عمل هذا لكل
-نور عاونتيني باش نرجعك و زيد زينت الدار و بيت باش نعيشو احلا لحضات مع بعضنا
-اما انا منحبش و مزلت متغشة
-ههه مش على كيفك يا روحي هيا اطلع للبيت و انا تو نخرج و بعد نرجع
باسها من خدها و غمزها و هي قعدت مصدومة و خايفة لا تكون في حلمة ووبعد تفيق منها قعدت تتبسم و تعدي في ايدها على خدها .. طلعت للبيت تلقى نور قعدا و تضحك و مغطيا وجها
-امان الضرب لا و الله حبيت نعاونك كهو
-ههههه بون صحيح انا متغشة عليك على خاتر مقتليش اما انتي كنت السبب باش نرجع انا و بيرم و نعيشو حبنا مع بعضنا تعرف منيش مصدقة الي صاير
-هههه لا لا صدق انتي صبرت برشا و جاء الوقت باش تعيش احلا ايامات حياتك هيا عاد خليني نمكيجلك و نروح قبل ما يجي بيرم
الحلقة 19 :
عملتلها مكياج خفيف و لبست نويزات في البلون
بكلها عريانة طلعت تفتق
-واو تبركالله عليك طلعت تفتق بيرم باش يدوخ الليلة ههه
-هههه اما النويزات عريانة برشة
-ههه مش مشكل عادي يا بنتي هيا معاش بكري عليا انا ربي يهنيك يا روحي باي
-باي و مرسي على كل شيء
مشات خرجت لين تتقابل مع بيرم في باب
-ههه واو ملا وهرة ههه
-ههه قلي اسيل حضرت
-اي حضرت و طلعت تفتق هيا خليني نمشي انا باي
تبسم و خذا نفس و طلع للبيت يلقاها قاعدة تستنى فيه و قلبها يدق في 100 قرب منها و هزلها راسها بين يديه بفيانة
-محلاك ياروحي انتي نورتلي حياتي و خليتها احسن حبك كان مخبي في قلبي ووقت الي مشيت حسيت بوجودو امان سامحني على كل شيء و انا نوعدك نعوضلك كل شيء و نعيشك في حلمة
-هههه انا نحبك برشا بيرم متخلينيش
قرب منها و رسم بوسة على شفايفها بكل حب و عشق و رغبة حس النفس تقطع علاهم بعد علاه و نفس متاعو كان ضارب في رقبتها و دقات قلوبهم كانت تتسمع حللها الروب متاعها و دخلو في عالم الاحلام مبعضهم عالم مزيان غير عالهم هوما و صار الي صار بيناتهم …
صباح جديد و صباح مزيان ببرم قام و قعد يغزرلها كيفاه راقدة بجنبو وشعرها على وجها بقا يبعدلها فيه حس روحو كان يلقا يخبيها في ضلوعو و تتربع على عرش قلبو باسها من جبينها لين فاقت تتبسم
-صباح الخير
-صباح النور يا احلا و ابن طفلة في عالم
-ههه هاك طلعت رومنسي
-اي مزلت ما شفت شيء
-هيا باهي حقا بيرم لازمني نمشي لسبيتار ليوم عندي كنترول مع طبيب
-ااا اوكي يا روحي اتو نمشي معاك
-باهي
-هايا قوم عاد
-لا نحشم قوم انتي قبل
-ههه تحشم مني
بدا يبوس فاها و هي تضحك و تبعد فيه .. قامت باش تحضر الفطور و هو جاء حملها و يبوس فاها من رقبتها و خدودها
-اففف بيرم والله جيعانة خليني نطيب الفطور
-ههه حتى انا جيعان و كان نلقى ناكلك
-ههه يزي عاد
كملت حضرت الفطور كان بسيف و قعدو يفطرو و اسيل يوكل فاها بيرم و هي تدلل كي البيبي الصغرون .. و بعد مشات بدلت حوايجها لبست روب في باج قصيرة و فاست في نوار و طالون في نوار هبطت من دروج وهو قعد يڨحرلها
-ها ليلا وين ماشيا اكاكا
-ماني قتلك عندي رونديفو مع طبيب
-بجاه ربي ناويا باش تخرج اكاكا نونو عزيزتي اللبسة هذي انساها و انا لازم نعملك كنترول على لبسة متاعك
-بديناها بالغيرة من تو
-اي اي انا راجل حزار راو
-باهي باهي
ماشات لبست سروال نوار و مريول في نوار واسع شوي على ذوق بيرم bien sur وبعد مشاو للطبيب و عطاها الدواء باش تبدى بيه و كان ما نفعش لازم العملية و بعد مشات مع بيرم للشركة ..
الحلقة 20:
دخلو للشريكة شادين بعضهم و هوما يتبسمو الي في الشركة لكل يغزرولهم و باهتين وصلو قدام السكريتار سمر حست روحها جمدت في بلاصتها مش مصدقة الي ترى فيه البارح كانو متعاركين و ليوم صبحو مع بعضهم
-سمر خدمتك وفات هنا هز حوايجك و خوذ فلوسك وروح
-اما يا سي بيرم ..
-نشالله معرفة طيبة تنجم تروح
اسيل كانت تتبسم فرحانة و متشمة فاها و بعد دخلو للبيرو
-حبيبي علاه طرتها
-ههه على خاتر نحب نراك كان انتي يا اميرتي الصغرونة
-ههه و شكون باش تحط تو سيكريتار
-منعرفش شقولك انتي
-فاش
-تشد بلاصتها و تولي كل يوم بحذايا
-لالا منجمش و قرايتي
– مش مشكل وقت تبدا فاضيا تجي يا روحي
جاء باش يبوسها لين دخل احمد بوها هي بعدت عليه و هبطت راسها حاشمة و احمد شاخ عليهم بضحك
-سمحوني دخلت منغير ما ندق اما مافيباليش بيك هنا يا اسيل
-ميسالش بابوتي
مشات حملاتو وهي وجها ولا كي طمطومة من الحشمة و بيرم شايخ علاها
-هاو ضاهر فيكم شايخين ههه
-اي عمي شايخين علخر
-هيا باهي
قعدو يحكيو و بعد روحو للدار
-بيرومتي انا باش نمشي ندوش
-ستنا حتى انا باش ندوش
-انا قبل و بعد ادخل
-لا انا نحب معاك
-لا لا ميجيش
خلاها تتكلم وحدها و دخلها للدوش و قعدو يدوشو وهي تلعب بالماء و ترسم في القلوب حست روحها الي حلمت بيه لكل وصلتلو .. كملو دوشو و خرجت بقات تشيح في شعرها و بعد مشات طيبت العشاء وقعدت تستنى فيه باش يجي .. تعشاو و قعدو يتفرجو في التلفزة و هي في حضنو
-بيرم حاسة روحي في حلمة اما خايفة نفيق منها خايفة لوكان الحلمة توفى خايفة لا نرجع نبكي كي عادة متخلينيش بيرم امان و الله نحبك
باسها من جبينها باش يهديها
-متخافش يا روحي الكوابيس وفات و انا نموت عليك و باش نحميك متخافش مدامك معايا معاش تخمم في شيء
امل كانت ترى فيهم من برا و عينيها يقدحو بالغل و الحقد
-تمتعو باللحضات الاخيرة مع بعضكم باش تجيكم عاصفة تحطمكم .. بيرم ليا انا و باش ناخوه بسيف من عليكم الكل …
الحلقة 21:
تعدات الايامات وهوما عايشين في صحفة العسل و غارقين في حب بعضهم .. جاء الصباح قامت اسيل تلقاه فاق و بجنبها وردة حمرة و معاها رسالة حلتها و بدات تقرى فاها ‹‹صباح النور يا روحي انا قمت قبلك على خاطر عندي خدمة و انتي اهوكا فطورك في طاولة نحبك ››تبسمت و مشات دوشت و لبست حوايجها و هبطت تلقا فطورها حاضر فطرت و قعدت تتفرج في تلفزة … حست روحها قلقت ياخي كلمت بيرم ماجاوبهاش حلت الفيس بوك و بقات تدور فيه فماش ما تنسى القلق متاعها .. جات العشية كلمت بيرم باش تشوف شبيه مش عوايدو ميكلمهاش
-اهلا بيرم تي وينك
-سمحني صغروني الليلة منجمش نجي عندي صفقة لازم نكملها
-وانا كيفاه باش نعمل وحدي و زيد توحشتك
-ههه الله غالب يا روحي تو ارقد تو غدوة الصباح تلقاني حذاك
جات باش تكلمو لين تسمع في صوت مرا و بعد تاليفون علق جات باش تعاود تطلبو وبعد بطلت هي عندها ثيقة في بيرم و مستحيل يخونها و الي سمعاتو بالك تخدم معاه .. طفات الموضوع و عدات ليلتها كيف ما جا وحدها و كيف ما وعدها بيرم كيف قامت تلقاه بجنبها
-صباح النور حبوبتي اهوكا كيف ما وعدتك هاني جيت
-والله توحشتك منجمتش نرقد كان بسيف البارح منغير ما نشم ريحتك
-هذاكا علاه انتي لابسة حوايجي
-ههه اي
قامو فطرو و بعد بيرم مشا باش يخدم كيف العادة
-ياخي شبيك وليت ديما في الخدمة
-الله غالب عندنا صفقة مع جماعة في اليابان و لازم نربحوها وانتي ماكش ماشيا تقرى
-لا باش نخرج مع نور نعملو دورة و نمشي لسبيطار
-باهي رد بالك على روحك و لبسة محزوقة لا
-ههه باهي
باسها من جبينها و خرج و هي جات طالعة باش تبدل حوايجها لين صونا الباب
-افف البهيمة نور جات من تو
حلت الباب لين تصدم بالي ترى فيه قدامها كانت واقفة بكل ثقة في النفس و تتبسم بكل وقاحة و عينيها تڨدح بكل غل و هي ناوية على مصيبة تهز الدنيا
الحلقة 22:
-امل شنوة تعمل هنا مزال عندك منضر جايا بيه لهنا افهم يا بنتي انا وبيرم معرسين و نحبو بعضنا و انتي تو اقلب منضرك
جات باش تسكر الباب اما هي شداتو بايدها
-ستنا عندي ما نحكي معاك و لازمك تسمعني
-شنوة الكذبة الي جايا باش تؤلفها لهنا
-ههه بون تحب تعتبرها كذبة انتي حرة اما مصخفني حالك بصراحة ياخي من كل عقلك مصدقة الي بيرم يحبك ههه يا بنتي يلعب بيك تي بيرم البارح برك معايا في دار و بايت معايا ههه مسكينة انتي
-تكذب بيرم مستحيل يخوني
-لا يخونك عزيزتي يخونك هذي سيدي فيها فيديو تنجم تشوفو امتا تحب و تو نقلك باي .. ااا لحضة سلملي على بيرم بلله
هي مشات و اسيل طاحت في القاعة تبكي مش مصدقة الي تسمع فيه معنتها ليلة البارح معاها هي و صوت المرا جابت البيسي و حلاتو و بقات تتفرج في الفيديو و تبكي بقات تعاود فيه برشا مرات لين لفت انتباها وحمة في ضهر الراجل الي في الفيديو مشات تجري لبست حوايجها و مشات لشريكة متع بيرم دخلت تلقا كوثر السكريتار
-طاطا كوثر بيرم البارح وين امان متكذبش عليا
-وراس بنتي ليلة كاملة لهنا في بيروه يخدم
-ومامعاه حد
-لا لا كان انا دخلتو و عطيتو قهوة كهو
-باهي
دخلت للبيرو و هدت عليه الباب
-سملا العضيم اسيل لاباس شفما
-نحي مريولك تو
-يا بنتي شبيك هبلت و لا تضربت على راسك
-قتلك نحي مريولك
-علاه..
مزال مكملش كلامو و نڨزت عليه قطعتهولو و شافت ضهرو تلقاه مفيه شي بقات تثبت بين الراجل الي في فيديو و بين بيرم
-اسيل لاباس شبيك
-سمحني يا روحي شكيت فيك اما امل جاتني صباح و قتلي الي انتي بت معاها و عطاتني لفيديو هاذا
-كيفاه تراه نشوف …. والله الا ما نواريك فاها اتو تشوف الكلبة
-امان يزي يا روحي خلينا انا نحاسبها كيف ما لعبت هي
بقا يتبسم و يقرب منها لين حسرها مع الحيط و هو بدنو عريان و مخدوم زاد هبلها
-بيرم يزي تو يشوفونا
-و يشوفو راك مرتي حلالي و عندي لحق نعمل فيك لي نحب
-يزي بيرم ههه
قعد يبوس فاها و يلعبلها بشعرها … قعدت مع بيرم شوية و بعد مشات لامل في دارها
-اسيل شنوة تعمل لهنا
-انا جيت عزيزتي باش نقلك عندك الحق بيرم طلع خاين خاني و خانك انتي و لازم ننتقمو منو مش هكا
-اي لازم ننتقمو منو هو خانك و لعب بيك لبارح كان يقولي نحبك و نكره اسيل
الحلقة 23 والاخيرة :
تعدات ايامات و اسيل بدات تتبدل ولات عايفة كل شيء و نهار لكل و هي ترد و مش طايقة حتى شيء .. كانت راقدة في صالة بعد ما تعاركت مع بيرم على ريحتو لين جاتها نور صحبتها
-اسيل شبيك لاباس
-منعرش حاسة روحي دايخة و خلوقي دايرة و نشم في دنيا لكل خايبة
-تطلعشي حبلة
-حتى انا شكيت اما انا منجمش نجيب صغار و زيد مزلت مكملتش العلاج متاعي
-انتي اش خاسرة اعمل تاست و ارتاح
-زعمة
-اي اي انا اتو نمشي نشريلك و نجي
مشات شراتلها تاست وجات ..
-هيا هاو التاست جربو و نشالله لاباس
دخلت جرباتو طلع بوزيتيف فرحت علخر و مش مصدقة الي صار مشات باش تقول لنور
-ااا اش عملت احكيلي
-ههه بوزيتيف يا نور معنتها انا حبلا اما انا خايفة من تاست على خاتر انا مزلت مكملتش العلاج متاعي
-باهي هيا نمشيو للطبيب و اتو نثبتو
لبست حوايجها … مشاو للطبيب باش تتاكد و تحكي معاه
-دكتور ياخي نجم نحبل و انا مزلت مكملتش العلاج متاعي
-اي تنجم الدواء مشا معاك و تفاعل مع بدنك و حبالة متاعك صحيحة نشالله مبروك مدام اسيل
-عيشك دكتور عيشك
حست الدنيا مش سايعتها من الفرحة الي حلمت بيه تحقق كلمت بوها باش تبشرو
-بابوتي باش نبشرك بحاحة
-نشالله خير
-انتي باش تولي بابي
-ههه شنوة قلت منيش مصدق نشالله مبروك الحمدالله تحقق حلمي و باش نشد اولادك بين يديا الليلة لازم نحتفلو
-بابوتي سامحني اما الليلة باش نحتفل انا و راجلي و نعملو سيربريز
-باهي بنتي خوذ راحتك
روحت لدار فرحانة حضرت العشا و لبست روب في الروز وعملت مكياج و بقات تستنى في بيرم لين جا يلقاها مزينة و مبدلة و تستنى فيه
-ههه شنو مناسبة يا روحي و علاه هاذا الكل و لا على خاتر تحب تراضيني بعد عركة الصباح
-ههه لا اما نحب نعطيك الكادو هاذا
مدتلو صندوق حلو يلقا فيه صباط متع بيبيات غزرلها مستغرب و هي تتبسم و بعد جبد ورقة يلقاه تحليل حبالة قعد يضحك مش مصدق باش يولي بو و تجي ثمرة حبو ركبها و قعد يدور باها و يضحك باعلا صوتو و بعد ركبها في حضنو و هزها للبيت
-خلينا نتعشاو قبل يا روحي
-ههه انا باش نتعشاك انتي الليلة يا ام اولادي
رماها على الفرش و جا فوقها و بدا يبوس فاها و بعد طار باها لعلم اخر و عاشو مع بعضهم احلى ليلة
كمنتار ببلوڨر
تعليقات