انتى سبابي من 1 الى 60

صدى الجنون 

بقلم : سمر غالي 

الحلقة 1

"" تركح في دبشها فالدار مازالت كيف نقلت من أمريكا .. يزيها من مرارة الغربة ...فدت... روحها طلعت غادي .. عدات عينيها عالبيت .. تفكرت أمها و بوها اللي ماتوا و هي عمرها 15 سنة .. من وقتها نقلت تعيش بحذا خالها في أمريكا .. بقات غادي 12 سنة ...تعبت .. ملت .. من عيشة الخارج ..تحب ترتاح شوية .. مدامها كملت قرايتها الكل ... خرجها من سرحانها خوها أنيس ...

- اوووف ملااا دااار ... يا أميمة بربي أعلاه هكا عيش أختي روح معايا للفيلا متاعي ! أعلاه التمرميد

- منجمش نخلي دارنا وحدها ...يزيها مابقات فارغة ...نسيت اللي هي دار الجدود ؟ تسخايلني كيفك بش نسلم فاها ... مدامني في تونس بش تبقى محلولة

- على كيفك ! أما لازمها برشا خدمة راهو

- نورمال مستعدة نصرف أعلاها و نردها أحلى دار

- أما البلاصة تعيف .. مصب زبلة بحذاك .. جيران حالتهم حليلة .. و شوف بجنبك مصحة عقلية ... ان شاء الله ما ضبعش !

- والله كيف حد عندو خوو كيفك أكيد بش يهبل ... كانك على مصب الزبلة مانيش نشم فالريحة ...

- مو من ريحة الندى مش تو تشمها

- اوووف و الجيران عادي .. نعرف كيفاه نتعامل مع العباد مش كيفك -_- و المصحة العقلية اكاك تهنى كلنا مهبل أما مش مستعرفين و تو أخرج أعليا بش نسيق الدار

- آخر قرار ؟؟؟

- تي أخرج مكثر حسك ...




أنيس روح و هي شمرت على ذراعها ... و بدات تخمل فالدار و تشمشر ... تاعبة....برشا ا أمور تخمم فيهم مع بعضهم ... كيفاه بش تكون حياتها تو ؟؟؟ طلت من الشباك ... الدنيا موحشة هوني ... بدى كلام خوها يدور في مخها .. استعوذت من الشيطان .. و كملت شور الداار لحظتها سمعت صوت قوي البرا .... صيااااح .... و الدنيا داخلة في حيط ....

خرجت قدام باب الدار تلقى جارتها تصيح ...

- سامحني شنية فما ؟

- قالو مهبول هرب من السبيطار اللي بجنبا

- واااه ... شنية الإستهتار هذا

دخلت أميمة لدار و سكرت على روحها بالباهي .. ماهيش مستانسة بالحكايات هاذي و بدى كلام خوها يدور في مخها .

ملا بلاصة بش تعيش فيها .. ! دخلت للكوجينة تلقا شباكها محلول ..حارت في أمرها شكون حالو هذا ؟؟؟؟مشات سكرتو و دارت

- اععععععع ...

شدت فمها مصدومة فاللي قدامها راجل ..طول و عرض ... زين وعين لابس مريول أبيض و سروال دجين ... تمصمرت في بلاصتها .... حالل الفريجيدار و يشرب فالماء ...

- هاااااااااااااي شكون انتي ؟

غرلها هزها و حطها ... بقااا يقحرلها .. نظرتو ليها تخوف .. تحسو شراني و صعيب و مش ناوي عالخير .. سكر الفريجيدار و بدى يقربلها ..كل خطوة قلبها يزيد يطيح من الفجعة .. حط يدو على فمها ...

- اشششش ( غزر يمين و يسار ) تاااا يسمعوك و يجيو يهزوني

- اممم

- هااا شبيك ؟

ملصت روحها منو و دزتو ...

- شكونك انتي ؟ كيفاه دخلت لهوني ؟ شبيك هبلت

- لا لااااااا مانيش مهبوووول والله والله ... أنا مانيش مهبول صدقني

- ماتقوليش انتي ؟؟؟؟؟ المهبوول اللي هرب من المصحة العقلية ؟

- يمكن أنا هو ...

- اعععععععععععععععع

هي تجري و هو يجري ... وراها .. رمات أعليه المصلحة ... و الجبادة .. السطل .. المخادد اللي يجي قدامها تضربو بيه ..

- مانيش مهبول صدقني يا بنتي لحظة ماتقول لحد

اتجهت للباب هو خلط أعلاها و جبدها دورها ليه شعرا لا جات معنقتو ...

- شبيك يخي ؟ تو أنا وجه مهبول ؟ هوما يحبو يهبلوني بالسيف صدقني ... اووووف

بهتت في زينو ... كان طويل ... و حرجو فالأكحل .. عينيه كحل فيهم حزن غريب .. و لحيتو الخفيفة . هو يحكي و هي ذايبة فيه ... و تسأل في روحها الزين هذا الكل يطلع مختل عقلي ؟؟؟؟




الحلقة 2 "" - أسمعني ... خبيني عندك

- وين عندي ؟؟؟ واااه

- تي نقصد في دارك ... ماتقلهمش بربي .. اششش

- أمان أخرج خير ما نكلم البوليسية

- أسمع أنا جيتك بالسياسة ماتخلينيش نكرز ... و نبقى بالسيف هوني ...

هوما اكاك و الباب دق ..! غزرت للباب ... و غزرتلو تربثت ملقات ما تعمل .. شدتو من يدو و كركرتو للبيت و سكرت أعليه ... متعرش أعلاه عملت أكاك ؟ اتنجم تقول صدقتو أما خايفة شوية .. مشات تجري حلت الباب تلقى جارتها ..

- يا وخيتي رد بالك سكر الشبابك مليح .. يدور فالسطوحات الحومة

- شكونو ؟؟

- المهبول .. اوووه تي نسيت

- آه ا ياي مسكرة الشبابك بالباهي ماتخافش ..




دخلت للبيت تلقاه فالفرش .. قاعد و متكي راسو للحيط و مغمض عينيه .. قربتلو بالشوية ... ترعش .. حست بربثة ... و خوف كبير ... طبست أعليه يخي هو حل عينيه .. تنطرت من الفجعة ... عدات يدها على شعرها .. خايفة مربوثة .. حطها في موقف صعيب ..

- شبيك خايفة ؟

- شنية حكايتك بربي ؟ اوووف ملا مصيبة جبتهالي حومة كاملة يلوجو أعليك ... بش تباصيني !




ندمت اللي هي رجعت لتونس ملا مصيبة طاحت فوق راسها .. شبش يحلها هالمشكلة هاذي ..بينها و بين روحها حايرة ... مرة تقول خليني نسمع حكايتو و مرة تقول تكلم البوليسة و ترتاح ... قام .. و بقى مقابلها ... حط يديه في جيابو و تنهد ..

- شوف أنا حكايتي طويلة مستعدة تسمعني ؟

- باهي نسمعك .. ايجا نخرجو للصالة .. نطيبلك قهوة ...

جاتها شجاعة كبيرة .. بش تبقى معاه في نفس البلاصة .. بقات تسمع فيه و مصدومة لدرجة هاذي فما ناس هكا فالدنيا ؟؟ عرفت منو اللي هو رجل أعمال كبير .. مرت بوه لعبتلو اللعبة و دخلتو لمصحة العقلية .. تشرب فيه في حرابش هلوسة .. من غير ما يشعر يولي يتصرف في تصروفات غير واعية

- بصراحة حكايتك توقف المخ .. لازم تلقا حل .. لوقتاه بش تبقى تهرب .. لازمك تواجه الواقع متاعك

- ههه واقع مر .. ؟ قلي لوقتاه بش نبقى محبوس في مصحة عقلية .. قريب نقتنع إلي أنا بالحق مهبول ..

- حكايتك تأسف .. مرة بوك لازم تتحاسب على عملتها

- كل شي في صفها تو .. الظروف ضدي ..

قااام يمشي و يجي .. متوتر و على أعصابو ... غزرلها و ضرب على راسو

- اففف ساعة نحكي معاك و ماقتلكش على اسمي ...

مدلها يدو .. هي سلمت اعليه ...كيف مستو حست الكورون ضربها .. حاجة حستها فيه ... شعور جديد ... ماعطاتوش أهمية و تبسمتلو

- أنا اسمي غيث ال**و انتي ؟

- أنا أميمة

- اممم أنا من ولاية المنستير و انتي ؟

- تونسية .. معناها تولدت في تونس العاصمة ... أما عشت برشا في أمريكا .. حكايتي طويلة شوية

- نتشرفو للا .. و سامحني عالفوضى اللي ركبتهالك ..

- السماااح يااا غيث .. المهم انتي تكون لاباس تو .. فما بيت نمشي نركحهالك ... مايجيش نخليك تبات فالصالة

- لا لا عادي .. مانيش مطول ديجا

- شمعناها ؟؟؟ وين بش تمشي ؟؟؟

- تا نتصرف .. !




هوما أكاك و الباب يتهد أعليهم بالدقان ...

- شكون يدق هكاااااا ؟؟

- منعرش صدقني .. تي أنا نقلت جديدة .. أمان ادخل تخبااااا عيشك ... و سكر الباب بالمفتاح ...




الحلقة 3 "" حلت الباب تلقى بوليسي مقابلها دخلت في حيط و تربثت ..

- عسلامة مدموازاال




- عسلامة

- ظاهر فيك سمعت بلي صااار

- شنية اللي صار ؟؟؟

- المصحة اللي بجنبكم هرب منها مريض .. و ينجم يكون خطر عالحومة و على سكانها .. قالولي اللي شافوه يهوم في سطح بلاصكم

- أي و شنية المطلوب مني ؟

- نفتش الدار

- أما كان جا حد أكيد بش نعلمك

- شنية بش تخسر كان قمت بتفتيش الدار

- عندك رخصة تفتيش ؟

- لا !

- إمالا كيف تجيبها اتنجم تفتشها الدار ايا بالسلامة سيد المحقق




سكرت الباب و اتكات أعليه تنهدت تنهيدة توصف حالتها وقتها خوف كبير من اللي جاي .. هي تقوم بحاجة مخالفة للقانون .. و بش تتحاسب على عملتها .. طبطبت على غيث

حللها .. و ملامح وجهو ما تعبر على شي بارد .. ما عمل حتى ردة فعل ...




- لازمني نمشي أنا

- وين ؟؟؟

- اي بلاصة أخرى تو نتصرف ...

- لا بش يشدوك شدين العسة البرا .. قلي الي تحب تا نجيبو ..

- بربي انتي شنية ذنبك في مشاكلي ...




لحظتها عقد حواجبو .. و طاااح فالقاعة شادد راسو ... و يتوجع ...

- غيث سااافا ؟؟؟

- اشششششششش صوتك ... يزنزن الراااااس ...( غزرلها نظرتو كلها حقد و كراهية )

قربلها و شدها من مرفقها بالقووي هي ماتت بالرعب ... شبيه هذا يتحول ...

- غيث ؟؟ لابااااس شبيك ؟؟؟

- كلامكم ... أصواتكم .... يقززو ..

- شكون أحنا ؟؟؟

- اششش ما تحكيش ...

قام وو شدها من أكتافها بدا يلز فاها لين لصقها للحيط و صاااح في وجها .. دورت وجها ... و غمضت عينها تحس في قلبها بش ياقف من الفجعة ...

- ههههههههه ....

غزرتلو كيفاش ميييت من الضحك .. شبيه هذا ؟؟؟ ظاهر فيه بالحق مهبول ... بالرغم يظهر لاباس أعليه ... شنية حكايتو زعمة ... بينها و بين روحها تمانتو يطلع مش مهبول .. أما كل المؤشرات حاليا ... تأكد الي هو مختل عقلي ... !




الحلقة 4 "" - شبيك تضحك ؟؟؟

- صدقت الي أنا مهبول تي شبيك ؟؟؟ حبيت نخرجك من جو الكبي ...

- لا انتي باز فيك حكاية مش عادية ...

- أنا أموري ستة زيت ... شبيك أميمة ... نفدلك أعليك ...

حبت تصدقو وقتها ... حسستو الي هي سايى صدقتو أما مخها يدور في ألف حكاية و رواية .. لازم تعرف شنية حكايتو ... غيث أصر اللي هو يرقد فالصالة ... و من الخوف حنين سكرت البيت بالمفتاح .. وقفت قدام المراية ... غمضت عينيها بالقوي ... نفس المشهد يتكرر في مخها ... شدت راسهاااا ... و طاحت فالقاعة ... تفكرت بوها و ضحكتو و أمها ... و .... لحظتها دق الباب مشات تجري حلتو ...

- شبييك مسكرة على روحك بالمفتاح ؟ متخافش منعملك شي .. -_-

- بابا ... !

- شنية ؟؟؟




دزتو و بدات تغزر لباب .. و تتبسم ... و في لحظتها إبتسامتها تنحات .. دارت لغيث مصدومة ... من روحها .. أعلاه تتخيل في بوها في كل تركينة من الدار هاذي .. أي هي متوحشة بوها برشا ... قعدت عالكرسي دخلت في منوحة و بكاء ..

- شبيك أميمة شصااار ؟؟؟

- نرى فيه في كل تركينة من الدار .. ديما نتفكر صغري معااااه ...

- شكون؟؟؟

- بااااابااا .... توحشتو برشا ...هربت لكندا بش ما نتفكروش أما زدت تخنقت غادي من بعدو ... مش بالساهل نعيش بلااااا بووو ...

- هو وين ؟؟؟

- توفى ... !

- الله يرحمو

- تعيش و ترحم ...




هزت روحها بالسيف تحس في بدنها مش مطاوعها عايشة في داومة و صعيب تخرج منها ... كانت شاردة لحظتها متعرش شنية تعمل وين تمشي هي وين ؟؟؟ متعرف شي ... يمكن تعرف أما سارحة بأفكارها ... قص أعلاه غيث ...

- و أمك ؟؟؟




كيف سمعتو دارتلو و العصب ماكنهااااا ... تفكرت كل شي لحظتها ... سيناريو تعاود في مخها .... شريط النهار أذاكا تعرض قدام عينيها ...

- ما عنديش أم ... يمكن عندي.... أما بالنسبة ليا ... لاااااا ....

جات بش تمشي شدها من يدها .. الإنسان هذا يفكرها ببوها ... نفس النظرة الواثقة ... و اللمسة الحنينة ... غزرتلو و في قلبها وجيعة ...

- أميمة ... شبيك أحكيلي ؟؟ شنية حكايتك ؟؟؟




ما تحبش تضعف قدام حد ... هي أكاك أميمة ..ندمت الي هي بكات ... متحبش تبكي ... تكره المشاعر برشا ... ديما تتمنى تعيش من غير قلب يدق ... و بلا إحساس ... تحب تعيش آلة تتحرك .... و أكهو ... لا تضحك لا تبكي ... لا تحزن ... لا تحب و لا تكره .... اما من وقتاه هي هكاااا ؟؟؟ شنية صارلها بش ولات فالحالة هاذي ؟؟ هي بيدها حايرة مش فاهمة روحها ... ملصت يدها و دخلت لبيتها ... مدت تصويرة ... عنقتها ... تصويرة أختها ... توفات في نفس النهار المشؤوم ... قداااه تتمنى يرجع زمن بالتوالي ... و تصلح برشا حاجات .... نادمة اميمة قتلها الندم ... أما على شنية ندمت ؟؟؟ هي بيدها متعرفش ... !




الحلقة 5 "" قامت الصباح ..تسمع في حثلة فالدار ... تنطرت من الفرش.. مفجوعة ... حلت الباب تلقا غيث يغني و يشطح ... ( اففف ناقصة هبل هي ... ) بقات مصدومة فيه... بينها و بين روحها تأكدت اللي الهم هذا مهبول ... كيف لاحظ وجودها ... عوج راسو و تبسم ...

- غيث لابااااس ؟ شقام أعليك

- محلاها الدنيا ...

- لااا انتي ماكش نورمال بالحق

أميمة وقتها بدات تخاف ... الإنسان اللي قدامها قابل للتغير ... لتحول في كل لحظة ..يفاجئك بضحكتو ... بتصرفاتو الغريبة ..الداخلة في حيط ... اما في نفس الوقت هو جذاب يسحر اي مرااا .. ... عندو نظرة تسحر .. ذوبك ... ! الشخص هذا مسيطرة اعليه شخصيتو القوية ... قربلها و مازلت الضحكة مافارقتوش كل خطوة يخطوها قلبها يوجعها ... أول مرة تخاف ... فسعت ... هو يجري و هي تجري ...

- تي شبيك خااايفة ؟؟

- أسسمع ابعدني خيرلك ... شصايرلك يخي .. كلل مرة تطلعلي بطلعة ... بالحق مختل عقلي راك ...

- لاااااااا ....

لحظتها العصب طلعلو ... قربلها ... و شدها من وجها بالقوي ... بقا مركز في عينيها... و هي تفارع فيه بكل قوتها .. تضرب فيه على صدرو ... و هو واقف ماتزعزتلو حتى حركة ... كيما عادتو اما هو ميعرفش طايح بشكون ... بأميمة ... القوية الصامدة ... تعدات بألف مشكلة ملي هي صغيرة .. تنجم تقول حلت عينيها عالمشاكل ... صحيح ما عاشتش ..طفولتها كيما البنات الأخرين أما أسست شخصية واثقة .. و مسؤولة ... بقاو اكاك مدة ... لين تهد منقوتها الطاغية .. كانت ادافع على روحها بكل شراسة ... هي من يومها أكاك .. يجرب سعدو اللي يمسها و لا يحاول يئذيها .. لا تخليلو لا تبقيلو .. حتى في أمريكا .. نفس الأسلوب ... نحى يدو و تبسم على جنب .. و هي تلهث من قوة الإنفعال ...

- شبيك تتبسم ؟؟

حط يد عالحيط و يد في جيبو ...

- عينيك .... فيهم عمق غريب ... يمكن حزن ... نظرة عينيك ثاقبة ...




تصدمت من كلامو ... كاينو عايش معاها و يعرفها ...

- كلنا عنا حزن في حياتنا ... مفماش حد ما حزنش ... و لا ما دمرش ... و تو وين تحب توصل بكلامك ...؟؟؟

- أما ساعات تلقا ناس ... يركبوا الحزن لرواحهم ... أكاك مالحيط

عدات يدها على شعرها بالقوي ... تحس فالنفس تقطع أعلاها ... و الدنيا إدور باها ... كلامو يرن في وذنها .. و مش تستوعب فيه ... كاينها طايحة في بير ... كاينها في بحر غارق و تصارع فالأمواج العالية .... وجها تقلب ... قربلها و وشوشلها ...

- ساااعات الناس تعيش في أحلام يقظة ... و تعيش في حزن ... و هو مافماش حزن من أصلو ...

تحس في بدنها ترخف ... مخنوقة ... تحب تصيح .. أي تو تحب تبكي ... تتمنى تضعف ... اما أعلاه اميمة حاسة هذا الكل ؟ خاترو حاسس باها ؟؟ و لا كلامو ما عجبهاش ....

- شبيك ساكتة ؟؟؟

- شنية حكايتك انتي ؟؟

كانت تخرج فالحروف بالرووح ... كلامو مزال مأثر فاها ... تحس فالسخانة من الموقف و لا من قربو ليها ..حطت يدها على صدرو بش تبعدو ... شدها و كبس أعلاها ...

- شكونك انتي ؟؟؟ اسمك غيث بالحق ولا تكذب ؟؟ ...

- أعلاه بش نكذب ؟ كل كذبة لازم يكون ليها سبب ... مانحبش نعيش روحي في وهم ... يضرني ... اعلاه نعيش في خيال .. يأثر في حياتي الواقعية و كيف نفيق نتصدم من واقع مر...

دزتو بكل جهدها ... حل عينيه مصدوم من ردة فعلها هو كان عارف بش تنفعل من كلامو أما مش بالطريقة هاذي ..

قامت تصيح و تعيط ..

- شكووونك انتي انطق ؟؟؟؟؟

دمعة غافلتها و هبطت ... من الدمعة ولاو دموع .. هربت من أمريكا بش ترتاح طلعتلها مصيبة ... كان يقول في كلام يحكي أعلاها ...كل حرف نطق بيه كان يحكي على طبيعتها و تفاصيل حياتها .. كان يحكي على ماضي بعيد .. و لا حاضر و يمكن مستقبل ... كان يحكي أعلاها هي ... و مستحيل يكون كلامو مجرد وصف عام... أكيد هي المعنية بالامر مش حد أخر و أذايا اللي زاد دخل فاها غولة ...

عقد حواجبو مستغرب ... لا يمكن يحب يوصللها اللي هو تصدم من ردة فعلها اللي فالحقيقة هو متوقعها ...

- شبيك دخلت في حيط ؟ شقلت أنا

- انتي مريض و مهبول ... أخررررررج ..

- تحبني نخرج ؟؟؟؟

- ا ياي و معادش نحب نرى وجهك ...

هزها و حطها و خرج طربق الباب وراه بكل قوتو ...لحظتها حست بفراغ ... هي كانت تحس بيه ... أما تو زاد ... الفراغ اللي عاشت حياتها كل تتمنى تعبيه ... طاحت فالقاعة و لمت ساقيها بيديها ... أعلاه ماتنجمس تتعامل مع الناس ؟؟ هي أكاك و الباب ... يدق ... تكذب كان قالت مافرحتش ... قامت و فيسع حلت الباب ... تلقى نفس البوليسي ....

- عسلامة -_-

- هاني جبت رخصة تفتيش انجم ندخل ؟؟

- تفضل ... !




هي مش طايقة روحها وقتها خلي بش اطيق الناس ... بقا يلوج ... و هي فالصالة حاطة يدها على خدها ... الحاجة الباهية اللي الظروف مساعدتها ... تصور كان لقا غيث في دارها ...؟؟ شنية بش يكون مصيرها




الحلقة 6 "" يمكن بش تدخل للحبس و بش تعيش ابشع تجربة في حياتها ... تو تخلصت من البوليسي نهائيا ما تتصورش بش يرجع ... او شاف الدار و اعرف الي هي مافاها حد ...

- مدموزال أميمة ما نوصيكش كان سمعت حاجة تخبرنا ... هاذي تصويرة المريض

خذاتها و من غير ما تشوفها أعلاه ترى فاها و الشخص نفسو كان معاها في نفس الدار ... ؟

- ان شاء الله نعلمك كان سمعت حاجة

كيف خرج حست براحة كبيرة ... و أخيرا هالحكاية .. تخلصت منها ... ملي جات من أمريكا مارتحتش .. ترمات عالكنابي ... و غمضت عينيها .. بدنها يوجع ... تحب ترقد أما مخها يخدم ... مش ناوي يتهد و يرتاح ... تخمم ؟؟ لا هي ما تخممش صدقوني هي مخها يخدم فالفارغ في حتى شي ... ! زايد تو ... خرجت من الدار ... يمكن هذا يكون الحل الوحيد بش تنسى شويا مشاكلها .. و المصايب اللي هابطة فوق راسها ... بقات تمشي أما وين بش توصل ؟ اللانهاية .... تمشي و برا بلا هدف .. و كان تتعب ؟ ماترتاحش تكمل تمشي ... قص أعلاها الثنية طفل صغير ...

- عسلامة تاتا

- ههه عسلامة يا صغرون ... شتعمل هوني وحدك

مدلها ورقة ... استغربت ...

- شنية هاذي ...؟؟؟

- كنت شنجي لدارك أما هاك خرجت انتي ....

حلتها ... تلقا مكتوب فاها " سامحني كان وجعتك بكلمة ... متغشة مني ؟ " تبسمت وحدها ... كاينها حست اللي هو غيث .. تلفتت لطفل ما شافتوش ... بقات تلوج بعينيها ... و ادور في بلاصتها ... حتى الورقة اللي في يدها طارت وين مشات ؟؟ تغزر ليديها ... و مصدومة مش كانت لورقة في يدها تو ؟؟ عدات يدها على شعرها ... بكل قوتها ... شدت راسها وجيعة غريبة تحس فاها ... كملت المشي ... و سارحة بأفكارها بكري شنية صارلها ؟؟ زعمة مجرد هذيان ؟؟؟ زعمة مجرد خيال ... ؟؟؟ شنية الحقيقة اللي في حياتها زعمة ... ؟ قصت أعلاها مرا ... لابسة بالأكحل بكلها ... تفجعت منها وخرت خطوة لتالي ... من غير ما حكات حتى حرف مدتلها ورقة ... المرة هاذي ما حبتش تاخوها ..

- خوذها ماتخافش

مدت يدها ترعش ... اي هي خايفة تو ... خايفة لا تكون تحلم ... لا تتفجع .. ! حلت الورقة .. تلقا مكتوب فاها " زيد إمشي شوية تو تلقاني "

كالعادة كيف هزت راسها ماتلقا حد ... المرة هاذي ماخافتش بالعكس تشجعت بش تزيد تمشي .... ولات تجري .. شافتو من بعيد هي تقرب و تزيد التصويرة توضاح ..وقفت قدامو ... مصدومة

- بابا ؟؟؟ بااااااااااباااااا

تحاول تمس فيه أما مش منجمة بالرغم قريب لاها فالمسافة ... حست بالعجز وقتها ... خرج صوتو ...

- بنتي ماتلوم حد ...! لوم روحك ..... روحك روحك

حلت عينيها مفجوعة ... مخنوقة ... دورت عينيهاهي فالصالة تفكرت !... اففف تي او طلع كابوس ... زعمة شنية يقصد بوها فالمنام ؟؟ نفس الحلمة تتعاود نفس التفاصيل اما المشاعر تتبدل ... المرة هاذي كانت تخمم في غيث ... زعمة شنية حكايتو معاها ؟؟ هي أكاك و يدق الباب ... اففف ان شاء الله مش مصيبة أخرى ... مشات تترنح حلت الباب تلقا راجل قدامها ... تقول عيد الهالوين ..

- ههههههه شعامل في روحك ؟؟؟؟ تو هذا منظر

دزها و دخل ...

- ماو كلو منك مطردتني ..

- كنت بش نخرج نلوج أعليك

- كذابة

- غييييييييث ؟؟؟

- امممم

- سامحني ....مانقصدش

- عااااادي ... مصار شي ...تو يعجبك حالتي هاذي

غيث كان لابس ... مريول أحمر و سروال اصفر ... و كسكات حمرة ...

w lunette

منظرو يضحك تكركيرة ... فرحت برجعتو ... و خافت في نفس الوقت من مشاعرها ... اللي ما تنجمش تتحكم فيهم ...

- فيبالك البوليسي رجع ...

- تفدلك ؟؟؟؟؟

- اي و اعطاني تصويرتك ....

- تصويرتي ؟؟؟؟؟

- ا ي منعرش وين حطيتها ....

- شفتها ؟؟؟

- لاااا أو بش نشوفها تو ..خليني نشيخ اعليك شوية ههههه

- لاااا لاا أخطااااك باز منضري لا علاقة ...

بقات تلوج اعلاها ... و هو دخل في حيط ..... يحاول يمنعها ...

- أخطانا من التصاااور تو فيبالك اللي أنا جيعان ...

- ههههه براا كول أهيكي الكوجينة قدامك و أنا نلوج عالتصويرة ...تي وينهي السخطة كانت قدامي ...

شدها من مرفقها و دورها ليه ...

- شبيك مفرعسة ...

- أنا مفرعسة ؟؟؟ و لا أنتي و بمنضرك هذا ههههه تقول قوس قزح

- هاهاهاها زيد اتمقعر زيييد ....

- بااهي امشي كووول ...زعمة وينهي التصويرة ...

- افففف منها هااا التصويرة المحنونة ...

- شبيك انتي ماتحبنيش نرى وجهك ؟؟ نعرفك راهو ...

- لا ماااك تعرف المصورين كيفاه يشوهو المنظر ...

- اممم بااهي سيبني ...

هي تقلو سيبني و هو يزيد يكبش فاااهاااا ... استغربت لدرجة هاذي شااادد صحيح ... الشك دخللها لمخها ... الفضول زاد خلاها تحب تعرف شنية حكاية التصويرة ؟؟؟

- شنية حكايتك غيث ...

غزرت للقاعة و تبسمت ... و أخيرا بش تعرف شنية حكاية التصويرة ... ملصت روحها منو ... و هبطت بش تجبدها كان أسبق منها و فكها ... تصدمت من حركتو ..

- نورماااال انتي شنية حكااايتك ؟؟

- شي ... شبيني ؟؟؟

- أعلااااه ماتحبنيش نشوفهااااا ؟؟؟؟ باااز فما حكاية مخبيهاااا راك بش دخلني في




الحلقة 7 ""

- شتعمل هوني ؟؟ ماكش نورمال هكاك تعيط و تصيح

- توحثتك ...

- توحثتني ؟؟؟ يااا روح قلبي ... بوك وين ؟؟

- بابا كان هوني مثى قلي ثيح تو تذيك ميومة

- يااا قلب ميومة ... يا روح ميمومة فيبالك الي انا توحشت ولدي ...

- ماما انتي نحبك ...

- كان ترى أنااا قداش نموت أعليك هياااا نطلعو للدار ...




أكيد مش فاهمين شي ... أي أميمة كانت معرسة في كندا ... صاروا برشا مشاكل هي و راجلها السابق ... عمرها لا حبتو و لا خممت الي هي تحبو ... جابت منو أمين ...

- غيييييث وينك ؟

بقات تلوج فالبيت مفماش ... فالكوجينة ... دقت على باب الدوش مفماش ريحتو ..دخلت في حيط .... دخلت فاها غولة ... حست بالفراغ إحتواها ..قلبها وجعها ... عدات يدها على شعرها بالقوي ... تفبري بالستراس ...

رجعت للصالة بقات مصدومة مل ترى فيه غيث في حظنو أمين و يضحكو .. تنفزت ... العصب مكنها ... تو هي حارقة اعصابها أعليه و هو يضحك و شايخة مشاتلو تعجل و تغزززل ...

- وين كنت إنتي ؟؟؟؟

استغرب من حالتها ....

- شبيك أميمة ؟؟ كنت فوق السطح

- و شتعمل فوق السطح كان راك حد ؟؟ نورمال في مخك ...؟؟؟

- لا مانيش نورمال مهبول ... أسمع ما تعاملنيش بالطريقة هاذي ... كان على المزية اللي عاملتهالي ... إنجم نمشي عادي ما يقلقنيش ...

- بربي يزيك أنا مفجوعة أعليك و انتي ...

- شنية حكايتك انتي ؟؟؟

- شبيني ؟؟؟ لاباس اعليا

- تتحول ..

- مانيش نتحول ... كيفك كيف خويا ... نفس المنطق و الذات ... مطيحين فيا ذبانة ....

- شبيك منفعلة ؟؟؟؟

هي في حد ذاتها متعرش أعلاه منفعلة لدرجة هاذي ؟؟؟؟

- شبيني منفعلة ؟؟؟؟ هاااا منعرش منعررررش ... هات الصفاااا

- شكون ؟؟

- ولدي ..

- هذا ؟؟؟ ولدك ؟؟؟؟ هذا ولد فتحية جارتكم

هنا تكمن الصاعقة ... أميمة ولات تفبري بكلها ترعش ... تحس فالنفس تقطع أعلاها أول مرة د يكشف كذبتها ... هي تحب تكذب و تبني أحلام يقظة ... تحب تعيش المغامرات و السيناريوهات اللي تكتبهم و اطبقهم فالدنيا ... تختار الممثلين على ذوقها ... زعمة أميمة إنسانة عادية ؟؟؟ ... بقا غيث يغزرلها امبهم فاها ....

- شبييييك اميمة ؟؟؟ أعلاه قلت ولدك ؟؟؟

- قتلك هاااات الصفااااااا

جبدت امين منو و الطفل مسكين يغز ر بعينيه و مش فاهم شي كالأطرش فالزفة ....

- ماهوش ولدك

- لا ولدي ... بااز مشبه بيه .... هذا ولدي و حد ما يفكو مني ... حتى حد و الي ياخذو مني نقتلوووو ...

كانت تحكي و معنقة أمين بكل قوتها زعمة كذبت الكذبة و صدقتها ؟؟ هزت أمين و وكلتو و تضحك معاااه اما مخها فالراجل اللي معاها في نفس الدار اللي خذالها عقلها من اول ما شافتو ... و زيد طلع يعرف سرها ... كيفاه بش تحط عينها في عينو تو ... كيفاش بش تتصرف ..

- امينو .. تقعد هوني هاني جاية ...!

- بااهي ماتبطاش عيثك

- ياا عسل يا انتي بوحبك




مشات تجري تلوج فالتصاور اللي معاها أمين .. هزتهم و مشات لغيث تحب تثبتلو اللي هي صحيحة أما هي تعرف اللي هي تكذب .. زعمة تبرر في كذبتها ..؟؟ مناش مخلوقة الطفلة هاذي ؟؟؟

- شد شووووف ؟؟ هاذم يثبتولك اللي أمين ولدي أنااااا

- شوف ما يهمنيش فالتصاور تو ... خاتر مش هوما اللي يثبتوا الحقيقة ... المضمون ... يثبت ... التحليل الجيني يثبت

- انا اعلاه نبررلك في موقفي ؟؟؟ مايهمنيش فيك

- قول لروحك أعلاه تبرر في موقفك ؟؟؟

إستفزها برشا ... نرفزها ... أثر فاها طريقة كلامو ... ملامح وجهو نبرة صوتو ... تعقيدة حواجبو .. تفاصيلو الصغيرة ... جات بش تمشي ...شدها من يدها و دورها ليه ... تصدمت في صدرو ... عرضت بيدها ...

-سيبني شبيك ؟؟ هبلت ؟؟؟

- ههه مازلت مصرة الي أنا مهبول ؟؟

- تي سيبني واااه ولدي وحدو

- مازلت مصرة الي هو ولدك ؟؟؟

كلامو يرن في وذنها ... يتعاود بينها و بين روحها ... تحاول تقنع نفسها بكلامو .. اي هو الصحيح ...مش هي ... أعلاه مش مصدقة حتى كذبتها ؟؟؟ أعلاه تكذب زادة و تقول اللي هي ماتحس شي كيف تمسو ...

- تنجم تبعد اعليا شويا ؟

- أعلاااااه ؟؟؟

- شبيك تسأل فيا أعلاه ؟؟سيبني و اكهو

- هاك انتي راخفة روحك تنجم تقاوم راهو

صحيح هي تنجم تقاوم أما تحس في بدنها مرخوف ... و مش منجمة تتحرك و لا تعمل ردة فعل ... قلبها يدق ... سحروها عينيه العسلية ... ذابلين ... قداه حلمت بإنسان كيفو يدخل حياتها و ينساها فاللي تعدا و يطمنها من اللي جاي ... قداه تمنات تخرج من جو الكذب اللي عايشة فيه ... زعمة يطلع غيث هو الحقيقة الوحيدة في حياتها




الحلقة 8 : ""

- بش تحكيلي كل شي تو _نخاف غيث .... :-(

- مناش تخاف ...؟؟؟؟ انا معااااك .. _ حد ماهو معايا ..و تو سيبني قتلك سيييييبني ياااا هم ماتفهمش يخي ... ؟؟؟؟ ملصت روحها منو بالروووح .. دارت تلقا امين واقف يتغبن مشاتلو تجري ... - شبي صغروني؟؟؟

- مث قتلي ..كيف تقلي ماما نعطيك ثكلاطة ؟؟ وينهي؟؟ حلت عينيها مصدومة ... من كلامو ... غزرت لغيث مكتاف يديه و يتبسم على جنب تو كشف امرها .. اللعبة وفات .. اي وفات .. ماعندها وين تهرب من الحقيقة المرة .. حستو جاي ليهم حملت امين .. كاينهي خايفة لا يهرب منها .. لا يضيع حست غيث بش يفكلها حاجة متاعها ... اعلاه تبني في شخصيات وهمية .؟ هي تعرف في قرارة نفسها اللي امين مش ولدها .. =-O تي حتى حد ما مسها ... اعلاه تشوه نفسها بنفسها؟ القصة هاذي في خيالها بناتها و طبقتها فالواقع .. تبسمت على روحها تبسيمة موجوعة ... هي اكاك تحب تعيش فيلم من تأليفها و إخراجها ..هذا امين ولد جارتها مرى فقيرة اغراتها بالفلوس مقابل تجيبلها امين اربعة مرات فالجمعة .. يمكن هي اكاك اميمة تحب تعيش قصص خيالية مبنية بالواقع .. زعمة تكذب عالناس و لا على روحها. .. تحب تحس بالامان الي عمرها ما حست بيه اما اعلاه تحب تحس بالامان هكا؟ حتى هي حايرة من روحها و تسأل الف سؤال .. شباها هكا؟ كل ما يقرب غيث قلبها يطيح و تكبش في امين .. تستنجد بيه .. هو فرحتها اما فرحة مخلطة بغصة بوجيعة على روحها و الوضع اللي هي فيه .. مانتصورش انسان بعقلو يوصل يعمل هكا ... حط يدو على كتفها كورون سرا في بدنها الكل .. احساس قوي ..كالعادة هي ضد الاحاسيس ..ضد العشق .. ضد اي شعور .. هي تتصنع حتى المشاعر دارتلو و وجها خالي من التعابير حتى ردة فعل .. حتى تعبير يوصف حالتها هي حالة من الغموض .. هاجس .. هذيان .انفصام تخلط في انسانة وحدة .. هي مخلطة .. و هذا اللي مدخلها في حيط .. غزرلها بكل تحدي يخب يظهرها على حقيقتها ماهوش خايف منها .. خاترو يعرفها عز المعرفة .. هو قاريها قراية .. من ساسها لراسها .. يعرف مصايبها و خببالها .. طفولتها و عذابها .. يعرف كل شي .. - امينو هاذي ماما؟ -تاع الثكلاطة ماما ... اميمة وقتها ساكتة اما نار حامية في قلبها ... تكوي فاها تحرق .. تفتل فاها نهار بعد نهار .. - و شكوني امك؟ - تحية - فتحية - لا ثبيك تحية اثمها - هههه باهي باهي قربلو و اعطاه بوسة .. كانت محملتو ..اذاكا اعلاه غيث ولا قريب برشا ا لاها ... حسها تفبري ترعش .. باز خايفة منو تو .. من ردة فعلو .. قرب فمو تحت وذنيها لحظتها حست بدنها ترخف لدرجة اللي هي سيبت امين من حظنها ..وشوشلها - ريت كيف نقلك اللي هو ماهوش ولدك هو ماكملش جملتو .. و غمضت عينيها بالقوي و كبشت فيه .. غرست ظوافرها في كتفو ..و دموعها هبطو ... - اشششش انا معاااااك - لا ماكش معايا تكذب اعليا -انتي اللي تكذب ديما ... - ماكش بش تفهمني حد فالدنيا هاذي فهمني ولا يحس بيا انا ديما المشومة و الساقطة و الكذابة ... -انتي تحس بالناس ؟ - كيف يحسو بيا تو نحس بيهم ... ! _ اعلاه تكذب اميمة ؟؟؟ _ و انتي كيفاه اعرفتو ولد فتحية..؟ - ماتبرولنيش و قلي لواه تكذب اميمة لوااااااااااه ؟ - ما تصيحكش اعليا ... انا نحب نعيش حياتي كيما نحبها انا ... نمشي بقوانيني ... - ما تأمنش بالقضاء و القدر ؟ - اكيد نأمن اما انا نعشق الخيال و نحب نطبقو بالواقع. - ماتحسش روحك غير عادية ؟

انا انسانة عادية هههه تسخايلني كيفك خارج من سبيطار المهبلة .... _ بالحق مريضة انتي ! - انتي المريض و ترى فالناس الكل مرضة كيفك . فيق على وضعك و ارجع منين جيت ... برااافو هاك شلقت بكذبتي و بحياتي وريني شبش تعمل .. - تحب تشوف شنية بش نعمل ؟؟؟ - وريني تراه .... جبدها من شعرها و غرس وجهو في رقبتها .. تصدمت من حركتو حاولت تبعدو كبس على ضهرها و لزها ليه ... باسهاااا بوسة طويلة ... وجعتها... تقطع اعلاها نفس اول مرة حد يتجرأ و يبوسها من رقبتها اما ما تصورتهاش تكون بالوحشية هاكي ... - اه ابعدني ياااااا هم توجع اه تي سييييييب ... دزتو بكل قوتها و بقات تتلفت يمين و يسار خايفة لا يكون امين شافها ... مشات تلوج اعليه تلقاه فالكوجينة ... خلط اعلاها غيث ... بقات تڨحرلو و شادة رقبتها بلاصة البوسة تحرق فاها .. - نكررررهك انا نكرهك ..... اكاك تعملي ...؟؟ كيفاه تتجرأ وو ( هزت يدها بش تضربو شدها و لوهالها ) - رد بالك تعملها ... عندي الحق نعمل فيك اللي نحب ... كان واثق و هو يحكي ... كيفاه عندو الحق ؟؟؟ حارت اميمة فيه و في ثيقتو الزايدة بروحو




الحلقة 9 ""

كركرها لصالة ... - تي شكونك انتي غيث؟ -انا المهبول اللي هرب من سبيطار المهبلة ... نسيتني؟ - ضامر برشا هههه ... نحكي بالرسمي مانيش نفدلك .. معناها في ليلة و نهار دخلت لحياتي ؟ و من بين قداه من دار خترت كان دار هاذي؟ مهرية حالتها حليلة ... اميمة خممت في برشا حاجات وقتها .. زعمة شنية حكايتو هاالراجل؟؟ لدرجة هاذي مكبش فاها .. تفكرت حكاية التصويرة .. طفاتو و مشات تلوج اعلاها .. قلبت الصالة بكلها ... اه تفكرت اللي هي عندو شباها تنسى فيسع ولات .. مخها مش مطاوعها ... ناقصة نوم ... تاعبة ... مشاتلو تهرول ... - هاتهااااا؟؟؟ - شنية هي؟ - زيد تبهنس زيد اكيد التصويرة اللي مخبيها اعليا .... - حرقتهااااااا ( تبسملها ابتسامة حقيرة هكا تسميها ابتسامة استفزتها برشا ) - اعلااااااااه؟؟؟؟ نورمال انتي .. - انا حر نحرقها نقطعها ...

- انتي مخبي اعليا حكاية ... و فاها إن التصويرة االي ماتحبش توريهالي ... يا وقت صوروك طلعلك حب شباب يااااا ماكش انتي اللي فالتصويرة ... و الاحتمال الثاني وارد برشااااا ... - انتي تحب تهرب من اكاذبيك. - انتي شيهممممك فيا نكذب ولا لا؟؟ شمدخلك فيااا من اصلو ؟؟؟ انا هوايتي الكذب .. و نشري العباد بالفلوس زادة بش يكذبوا معايااااااا ... هههه ريت انا كذابة طلعت ... - اما هذا مرض ... قصت اعليه بكل انفعال تحب تبرر فعايلها .. اميمة وصلت. عاشت مشاكل مجرد انها تخيلتهم طبقتهم فالواقع و تعمل المستحيل اللي هي تعيشهم فالحقيقة ... - حبيت انتي مرة في حياتك ...؟ لا مانتصورش ... انسانة كيفك عمرها لا توصل تحب .. كان يغزرلها غزرة الحزين ولا الشافق .. ولا متقزز منها ؟ مالا هي زعمة كيفاه تغزر لروحها ؟ مرض اميمة الكذب ! اي مافيوش دواء ..اما مش كيما اي كذب عادي ... هاذي تكذب و تعيش الكذبة تقتنع باها و تصدقها .. حتى الحب تكذب و تشري عباد بالفلوس بش تعيش معاهم قصة حب :-) :-) هذا هو الواقع ... ! هاذي حياة اميمة ! - لا ماحبيتش خليتلكم الحب ليكم ... و انتوما شنية ربحتو منو ؟ اعطيني انسان كان فرحان في علاقة حب؟ كان الغدرة و الخيانة ... - اكيد ماكش بش تفهم معنى الحب خاتر ماعشتوش .. انتي بلا قلب .. ! انتي نكرة ...! اذاكا اعلاه تحب تثبت وجودك بالكذب ... ! لازمك تخمم اداوي روحك ... - انا فرحانة هكا. ... حتى في هاذي اميمة كانت تكذب هي اتعس انسانة فالدنيا .. اما ماتحبش تبين .. لازمها تكون القوية ... ! اما قوة مصطنعة هي هشة من داخل و ضعيفة ... ! :( - نبصملك بالعشرة الي انتي فادة و مخنوقة من الوضع اللي انتي فيه ... يا أميمة انا نحب نعاونك مانيش ضدك بالعكس انا معاك ... انا في صفك ... - انا ماخترتكش بش تدخل لحياتي ... دخلتلها من غير اذني ... خالفت القوانين اللي عايشة بيهم ... لازمك تخرج من حياتي ....... كانت تحكي و مخنوقة هي متأكدة الي الانسان هذا محتاجتلو ..اعلاه تقص اليد اللي تمدتلها بش تعاونها و تخرجها من الوضع المشؤوم اللي معيشة روحها فيه سنين ؟ - متأكدة تحبني نمشي؟ اعلاه ماتحبنيش نخرجك من الكذبة اللي عايشة فاها ..... - شنية بش تستفيد انتي؟ :-). - برشا حاجات .. انا من طبيعتي نحب نعاون العباد .. - اعلاه ماتعونش روحك بربي ..! اخرج من حياتي غيث. .. هاك ترى انا مهبولة مش ناقصة مهبل في حياتي اخرج و ماترجعش ... قربلها و شدلها يدها .. كان يحس اتجاها شعور مختلف ... كان عارف اللي هي تحس كيفو نفس الشعور ... كل ما يمسها يحسها تفبري - انا ماشي .. اما نحب نقلك اللي انا بالحق حبيت نعاونك .. احسبني خو صديق ... مجرد خيال .. حلمة ... كذبة ميسالش المهم اقبلني في حياتك .. شقولك تألف حكاية بيني و بينك ؟ من خيالك الواسع .. اكتب النهاية اللي تحبها .. ! حزينة .. كوميدية ... رعب ! المهم نكون معاك و نساعدك ... اعلاه تبكي تو؟ هاك ظهرت حساسة ا طفلة .... مسحلها دمعة هبطت منها ... من غير ما تشعر .. خنقتها العبرة .. كلامو أثر فاها ... مش منجمة تزيد تستحمل ... سيبلها يدها و هي مبهمة فيه بعد اللي حكاه مازال بش يمشي ؟ دور وجهو للباب .. كان يستنى فاها بش تنطق .. احكي اميمة قلو اقف .. قلو محتاجة ليك .. صيح و خرج اللي في قلبك انتي مريضة و لازمك تتداوى ... اخرج من اللي انتي فيه لوقتاه بش تبقى هكا 12 سنة معيشة روحك في كذبة ... على خاتر غلطة مش غلطتك؟ اي مش غلطتها .. ! مش هي السبب في مرضها .. كلام بوها غالط فالمنام ... مسكين مات و ميعرفش حقيقة مرتو ... ! مات على كذبة




الحلقة 10 "" وقف قدام الباب ... تبسم سمع صوتها المبحاح .. - غيث ! دارلها و عاقد حواجبو ... - امم عيطلي ... ! - ماتمشيش .. ابقى .. - على شرط .... كتفت يديها و تبسمت .. - وليت تتشرط زادة - اي .. امين رجعو لأمو .... - لا ستانست بيه .. - عود طل اعليه و نحي من مخك الي انتي امو ..

-باهي و انا زادة عندي شرط مش كان انتي ... _شنية؟ -شنية حكاية التصويرة ؟ - هذا اللي بيك يا للا ( خرج من جيبو التصويرة و مدهالها) - هاك انتي ! - تهنيت تو ؟؟؟ هاك اعرفت اللي هرب من السبيطار انا ... هيا تو نخرجو! - وين ماشين ؟؟؟؟ - نهزو امين لأمو و بعد نمشيو نعملو شوبينغ ..... - مشاااات معاك ..... حست بالراحة كيف شافت وجهو فالتصويرو اما اللي ماتعرفوش ... اللي هو بدلها التصويرة .. ! بكل خباثة .. لعبلها بمخها .. كان عارف بش يرجع البوليسي و بش يمدلها تصويرة المريض اللي هرب و بش تتكشف اللعبة .. اما هو حمد ربي الي هي ماشفتهاش ... ! تو لعبتو بش تكمل .. بالرغم احساسو اتجاها قوي .. اما مجبور يعمل اكاك ...




هزو امين .. و مشاو يدوروا ... اميمة حست بروحها طايرة في دنيا اخرى حاجة جديدة تعيش فاها ... كانت تضحك من قلبها .. وقفو قدام بوتيك تاع رجال ... شدها من يدها و بعدها ... - شبيك ؟ تحفون البوتيك .. ينجمو يعانوك بش تتخلص من منضرك هذا هههههه ... تعرف ماشية معاك و حاشمة ... - شرف ليك تمشي مع بوڨوس كيفي ... طول و عرض ..... - طول بلا غلة .... - تا يرجعلك يا اميمة اما مش تو .. - بربي لا تعمل عملة الصباح ...؟ قربلها و غمزها - عملة شنية ؟ كان عارف على شنية تحكي ..البوسة ؟ هو لتو مش فاهم روحو اعلاه اعمل اكاك .... دخلو لقهوة ... بقاو يحكيو .. ! غيث حاول يحسسها بالأمان و هي معاه بش يخليها تحكي و تفرغ قلبها ... ! - ماكش ناوية تحكيلي حكايتك؟ - اي بش نحكيلك ... ! نمشي الفستيار و نجي فيسع .. قامت تترنح .. كالعادة راسها يوجع فاها ... وجيعة غريبة .. عرضتها طفلة .... - سامحني اتنجم تعاوني؟ أمااان فيسع - شفماااااا؟؟؟؟ - صاحبتي شدها الحس فالفستيار ... -بش تولد ؟؟؟؟




دخلت تجري للفستيار .. لحظتها تسكر الباب اعلاها ... ؟؟ تلفتت تلقا الباب مسكر و الطفلة مفماش .. ركبها الرعب حاولت تحل الباب مانجمتش ... بقات ادق بكل قوتها مرعوبة من فكرة اللي هي وحدها مع مرا بش تولد ... شنية المصايب هاذم اللي هابطين اعلاها .. -ياااا مدموازال حلي الباب مايجيش هكاااا ... امان حل الباب .. حست بيد تحطت على كتفها تلفتت تلقا مرا بيضة .. لدرجة تجهر العينين .. وجها صافي .. و بريء ... أما ترعب تفاصيل وجها يخوفوا تبسمتلها . و قلتلها - اميمةاستغربت كيفاه تعرف اسمها هاذي .... - تعرفني ؟؟ - "هو" وصلك الرسالة هاذي... و قلك حبل الكذب قصير و الدنيا ادور .. و البيبي اللي حلمت بيه حياتك الكل في كرشي انا




الحلقة 11 ""

- بيبي شنية ؟؟؟ فاش تحكي؟؟ امان حل الباب .. خير ما نقول فاها اوووه .... تي حل ... ! تحللها الباب و اميمة ولات تجري وصلت عند غيث تلهث مش مصدقة اللي صارلها تو .. بيبي ؟؟؟ حبل الكذب قصير؟ شكون هذا اللي بعثلها الرسالة ؟ مانجمتش تستفسر منها خاتر الوضع اللي تحطت فيه مرعب هي و مرا غريبة ملامح موجها تخوف .. و كلامها يرعب اكثر في فستيار مسكرة .. هذا في حد ذاتو يخلاها تهرب ..اكيد تابعة عملة من عمايلها ... اما هي نادمة تو ! زعمة شكون اللي يخمم ينتقم منها؟ قام غيث و استغرب من حالة الذعر اللي يرى فيه من عينيها .. مسها تفجعت ... - اميمة لاباس ؟ شبيك مفجوعة؟؟؟ -امان خلينا نمشيو .. بش نموت بالرعب ... !




- شفمااا أميمة شصارلك ؟؟؟

- قتلك هيا .. ملا عملة شخرجني أنا من الدار أصلااا ...




حس فما حكاية .. صارتلها ... فد عاللخر مش هذا اللي حب أعليه ... يحاول يقنع روحو اللي هو مش سبب فاللي صايرلها ... هو عبد مأمور .. ! طبس راسو و خلط اعلاها ... و هي ترعش ... مازالت ... حاول يريحها بكلمتين اما شي .. مازالت خايفة ... و مستغرب زعمة شصارلها ؟؟؟ من داخل يلعن في روحو .. ! أعلاه يخرج فاها من اصلو ... ريتوه غيث عندو شخصيتين ... الخبيث ... اللي يحاول يعديها أعلاها ... و الحنين و اللي يحاول يبعدها من المشاكل ... شكونو هو ؟؟ زعمة الصديق اللي بش يخرجها من المصايب ؟؟ و بش يخرجها من مرضها ... ؟ و لا العدو اللي بش يزيدها مرض على مرض ؟؟ وصلو للدار ... و أميمة مازالت على أعصابها .. مخها يخدم فالمرا اللي شافتها ... حست روحها عايشة في فيلم فيلم أبيض و أكحل ... بلاش ألوان .. سماء مغيمة و ناس مسقطة فالأكحل و ناس فالأبيض ... حالة من الجنون... الهذيان ...! فيقها من ذهولها غيث ...

- شصارلك فالفستيار ؟؟ شبيك جيت ترعش و مرعوبة ؟؟؟

- مش فاهمة شي غيث ... بالحق مخي بش يتحرق ..

تمشي و تجي في وسط الصالة تفرك في صوابع يديها بالتوتر ... حالة من الصراع تعيش فاها ... !

- اتنجم تهدى و تحكيلي بالتفاصيل شنية صار .

- مرا جاتني ... تفجع ... قتلي ... بيبي ...

جا مقابلها و شدها من أكتافها ...

- شبيك داخلة في حيط ؟؟

- أحكيلي شصار و ريض أعصابك ؟؟

حكاتلو اللي صار الكل ... وجهو تقلب .. !

- يخي عندك مشاكل ؟؟

- في تونس ماعنديش فييالي مشاكلي الكل خليتهم ورايا في امريكا ... أنا خايبة برشا كنت ... يمكن مازلت ... خايفة لا حد يحب ينتقم مني .. ! عندي احساس كبير ... حد يحب يعمل فيا اللي عملتو فيه ... !

- ركز و قلي كيما شكون ؟؟

- مانعرش غيث صدقني تو مخي حابس ... حاسة روحي بالحق هبلت ...! لازمني طبيب غيث أمان عاااااوني ...

طاحت فالقاعة شدها كريز متاع بكاء ... مخها تحس فيه بش يفنى ... حاسة روحها عايشة باللاوعي متاعها ... مش منجمة تسيطر على الكم الهائل من أحاسيسها ... من وقتاه ولات حساسة لدرجة هاذي ؟؟ من وقتاه تتأثر على حكايات كيما هكا ؟؟؟ طبس أعلاها غيث ... و دور يدو ورا ضهرها و لزها ليه ... حطلها راسها على صدرو هي زادت كبشت فيه كانت محتاجة لحد يحتواها و يطبطب أعلها ... و يقلها انا معاك ... لأول مرة تحس روحها مش وحدها .. ! اما في قلبها خوف ... خايفة لا تقوم الصباح و تلقى روحها وحيدة مرة أخرى ... خايفة من فكرة الوحدة بصفة عامة .... غطست في صدرو و زادت في فوعة البكاء .. كانت تبكي بالشهقة ... حاسة بالغصة ... بالخنقة ...

- اششش أعلاه هذا الكل ؟؟؟

- ما..زلت تسأل ... ف..يا أعلاه ؟؟ من صغري نعاني ... تعرف حتى حد ما فهمني و لا حس بيا و لا قدر مشاعري اذاكا أعلاه انا نكره المشاعر ... مانحبش نبكي .... ( كانت تمسح في دموعها بكل غل و قهرة ... شدلها يدها ... )

- شبيك ؟؟؟ الدموع هاكي ترتحك ... اششش وسع بالك ... هدي اعصابك ...

- كيفاه بش نوسع بالي ... تعرف انتي أعلاه صايرلي هكا ؟؟

- أعلاه ؟؟

- من جرة امي ... نحشم نقول أعلاها أمي ... ! المرا هاذي حرمتني من أغلى حاجة في حياتي اللي هي أختي ... ! و حرمتني من بابا ... و ردت خويا مجرم ... مجرم ..




الحلقة 12 "" - مجرم ؟؟؟؟ كيفاااه ؟؟؟

- اي ردتو مجرم ... أختي فاقت بأمي تخون في بابا ... شافتها فالفرش مع راجل اخر ... ماطاقتش ... هددتها بش تحكي كل شي لبابا... يخي ...أمي ....

شدتها الغصة وقتها ... قامت تجري ... للبيت .. مدت تصويرة اختها و بدات تبكي ... و تعنق فاها ... خلط أعلاها غيث .. مسكين بش يهبل في جرتها و انفعالها المفاجئ ..

- شصارلك زادة اخر ؟

- امي مشات كذبت على خويا و قتلو اللي أختي باعت شرفها ... ! مشا وكل أختي طريحة ... دزها ... من غير ما يشعر جا راسها ....




شدت فمها من قوة المشاعر اللي حستها ...

- ماتت أختي ... ! اذاكا أعلاه انا ماحبيتش نمشي نعيش معاه ... نكرهو مانحبش نرى وجهو حتى كيف جاني تصنعت الضحكة

- خوك مادخلش للحبس ؟؟

- دخل و خرج ... و أمي انتحرت ...! تصدمت .. تستاهل الموت ... ! نكرها ...

- أعلاه تقول هكا المرا ميتة ... !

- هي كذبت على بابا و على خويا و من جرت كذبتها أختي ماتت

- و بوك ؟؟

- بابا من صدمة جاتو سكتة قلبية .. و هو مريض بالقلب ..من قبل ..! بنتو و مرتو يموتو في نفس الشهر ... كانك اعليا دخلت في غيبوبة بقيت فاها 7 شهور

- شنية المصايب اللي هبطوا أعليكم فرد مرة ؟؟؟

نحات التصويرة من يدها ... و تبسمت ... تقلبت 360 درجة ... وقفت قدامو ... و مازالت البسمة على وجها ...

- أذاكا أعلاه انا وليت نعشق الكذب..نكذب عالناس الكل ...!

- شكون قال اللي انتي ما تكذبش أعليا تو ؟

- اي أنا مانكذبش غيث ...! اول مرة نكون صادقة مع حد ..!

دور وجهو و نفخ بالقوووي ... يحب يصدقها .. كان ماتكذبش ...و تطلع صادقة في كلامها يتسما ظلمها عمرو لا تصورها تطلع واكلة صدمة و لتو مأثرة على حياتها ... ! قرر من وقتها بالحق يعاونها و ياقف ضد اي انسان يحاول يضرها ... ! قرر يكون مسؤول أعلاها .. و يعاونها بش تتخطى مشاكلها و انفعالها ... و اي حاجة تقلقها ... عدى يديه على وجها ... لمسة يدو ... ! صوتو ... صدرو الدافي ... كل شي ياثر فاها ... و يخليها تعيش في حياة وردية ... شنية اللي تحس فيه إتجاهو ؟؟ زعمة مجرد إعجاب ..؟ هههه معجم الحب كان غايب من حياتها حتى كيف تدخل في علاقة تكون عابرة .. معندهاش حتى قيمة ... و تكون باردة فاها ... ! غيث حب يخرجها من جو التوتر اللي عايشة فيه

- شقولك نتفرجو في فيلم ؟

- رعب ..... ! جوووو

- بربي رعب ؟؟؟ افففف شي انتي ...

- شبيه الرعب ... ! اساعة نعيشو جو من الصراع النفسي

- هههههه .. باهي يا للا هيا نمشيو نتفرجو في فيلم رعب ....

- وين ؟؟ لا مانحبش نخرج نخاف ...!

- لا لا تو نمشي نشري cd و نجي

كبشت في يدو ... حست بالخوف .. اللي هي شتبقى وحدها ...

- أمان ماتمشيش ابقى معايا ...

- شبيك ماتخافش أبقى فالبيت تا نجي

مشات دخلت لبيتها و سكرت على روحها تمشي و تجي فالبيت خايفة ... مرعوبة تش شباها تحس هكا استغربت من روحها ... تفكرت الحلمة ... و المرا متاع بكري .. تسمع في حثلة فالدار ... و باب الدار تحل ... حلت باب بيتها فيسع ... ماتلقى حد ... !قدمت خطوة ... تصدمت من اللي ترى فيه مكتوب فالحيط ...

" كذابة ....كذابة .... مصيرك الموت ... !" شهقت فرد شهقة .... من اللي ترى فيه .... " الموت " الكلمة اللي عاشت 12 سنة ترقد باها تصبح باها ... شكون هطا اللي بش يقرر شنية مصيرها ؟؟؟ شكون اللي يتجرأ يدخل لدارها ... و يكتب هكا ؟؟؟ شكت فيه ... "غيث " شكون غيرو عندو مفتاح الدار .... مشات تجري للكوجينة تلوج على حاجة ادافع باها على روحها ... سمعت الباب تحل .... شدت فمها مفجوعة ... سمعت صوتو ... و حسو بدى يقرب .... ! قلبها بش يطيح من الخوف ..

- أميمة شبيك ؟؟ شنية الكتيبة اللي فالحيط ؟؟؟

ملامح وجهو توحي اللي هو مصدوم ... أما هي خايفة لا يطلع غيث يكذب اعلاها ... لا يطلع هو اللي يحب ينتقم منها ... شكونو هذا ؟؟؟ زعمة شكون اللي قدامها




الحلقة 13 " كشف سر من الأسرار " - تسأل فيا شنية مكتوب ؟؟؟؟ انتي هو ... يا غيث ... شعمتلك أنا تحب تقتلني ...

قربلها مصدوم ... من كلامها فاش تحكي هاذي ...!

- انااا ؟؟؟ شبيك أميمة تعرفني نعمل هكااا

- أنا مانعرفكش دخلت لحياتي بطريقة غريبة ... هذا اللي خلاني نشك فيك ...

زاد قربلها ... قلبها تحس فيه بش يطيح من بلاصتو .. تتنفس بالروح ... فكرة اللي هو ممكن يكون يحب يقتلها ترعبها ... هو يقرب و هي تبعد لصقت فالحيط...

- خايفة مني ؟؟؟

- لاااا ... شتحب مني ؟؟ تحب تقتلني اقتتتتل ... أصلا أنا مانيش عايشة ..! ترى فيااااا عايشة أناااا تووووو .... أقتل فاش تستنى

متعرفش كيفاه جاتها الشجاعة بش تشدلو يدو و تحطها في رقبتها ...

- إنزل ... لين يتقطع أعليا النفس ... شبيك عاقد حواجبك شبيك مستغرب ؟؟

نحى يدو ... و أعطاها بظهرو ... مشى ... ! بقات تغزر للفراغ.. لخيالو ... فرخت خاتر مش هو اللي يحب يقتلها ..كان جا هو راهو اقتنص الفرصة ... دخلت للدوش ... غسلت وجها .. و بقات تغزر لروحها فالمراية ... قداه ملامح وجها تبدل ... تحويقة تحت عينيها بانت ...

- شبيك أميمة شنية صايرلك ؟؟؟ خايفة من الموت .. ! ولا من العشق ؟؟ خايفة لا تتهد و تخسر ؟

شباها ولات تحكي وحدها كاينها بدات تقتنع بهبالها ... !




غيث :

ملي خرج من عند أميمة ... بقا فالدروج يخمم ... وقتاه بش توفى هالمسرحية و تتكشف الأوراق و يبان المتخبي ...؟؟ إلى متى بش يبقى متعذب و معذبها معاه ... قرر يمشي يفهم كل شي ...

دخل للمصحة من تالي خايف لا تراه اميمة .... عرضو راجل ....

- عمي عمي

- تي أما عمك تي انتي عمي بربي مش ناقص مهبل في حياتي برا يا حاج ادخل ارقد ....

كبش فيه المهبول ..و هو يحاول يملص في روحو ...

- عمي نحب شكلاطة عمي

- لا حول و لا قوة الا بالله ...

ولا يحمل فيه و يبوس حتى لين جاتو الممرضة ... و هزت المهبول معاها .... دز الباب و دخل أعليه ... يلقاه قاعد و حاطط ساقيه عالبيرو .. و يتكيف ... مشى مقابل و ضرب البيرو بيديه ...

- ماتفهمناش هكااا أحناااا ... قتلي ساقطة .. و كذابة .. و خاينة .. يخي طلعت مريضة ... !

تبسملو و نحى السيــڨــــارو

طفاااه ... و بقا يهز فيه و يحط ....

- أنا عطيتك مهمة طبقها و فمك ساكتة ...

- لا تغلط يا سي هيثم ... !

- راني خوووك ... لازمك تجي معايا ... و تاقف في صفي

- مهما يكون اللي عملتو فيك راهي مريضة ... لازم تعاونها مش تزيد أعلاها .. !

- جرحتني برشا ...

- الإنتقام عمالك عينيك ... ماكش ترى قداكش حقير وليت ...

قربلو و شدو من خناقو ... و دزو عالحيط ...

- أعطيتك مال قارون بش اطيحها و تعذبهااا ... ! ماعملت شي ...

- اذاكا أعلاه تصرفت من راسك .. تي سيب ...

دزو شعرااا لا طيحو غيث أقوى من هيثم .. و أطول منو ... من قبل مايتفاهموش ... ملي هوما صغار يتعاركوا على أقل حكاية أما يتفاهمو في حاجة برك هي الفلوس .. أما هيثم الفلوس عماتوا ...

- نورمال انتي تعادي خوك خاتر *** ؟؟

- سكر *** فمك ... هاكي أنظف منك .. ياا كلب ... نتبرى منك ...صدقني خاتر 10 صوردي ... تهدد الطفلة بالموت شنية عملتلك جرحتك ؟؟؟

- طيحتلي رجوليتي فالماء ...

- مريضضضضضضضضضة ماتفهمش مخك ملحم .... !

- بش نعذبهاااا ... و بش نكرها في حياتها ... بش نخلاها تركع قدامي .. و تترجاني نسامحها

- برى داوي روحك يا دكتور ...




الحلقة 14 "" - أسمع عندك حلين يا بش تكمل اللي بديتو .. يا ابعد جملة وحدة .. ! و كان ماتبعدش أنا نعرف شنعمل معاها مولاة الحسن و الجمال متاعك ...

- ماكش عادي بالحق انتي ضبعت ... خرجت من عقلك

- أعمل اللي نقلك أعليه خير ما ترى حاجة تندم اعلاهاااا ...

- بربي انتي تجي طبيب ؟؟ تي انتي معاق في مخك ... مريض ... باااهي هيثم هاني بش نبعد ...

خرج من عندو خلايقو دايرة ... ضرب الحيط بيدو .. اعلاه يدافع على أميمة هكا ؟؟ يطلعشي حبها.. ولا مسخفتو؟؟ شنية ذنبو هو كيف عندو خو كيما هيثم ... تفكر وقت جاه و قلو على حكاية أميمة و اللي هي فسعت أعليه ليلة عرسهم ... اي أما هي مريضة ..تعمل في حاجات من غير ارادتها ... هو تو قال ا لخوه اللي هو بش يبعد أما مستحيل ينجم يخلاها في ظروف كيما هاذي .. مشالها للدار يلقاها راقدة فالصالة ...قربلها بالشوية ... محلاها ... اميمة ملامحها بريئة ..تو هاذي حد ينجم ينتقم منها ... طبس أعلاها ... بعدلها خصلة من شعرها هابطة على وجها ... ! محلاه الإحساس كيف تلقى حد ينسيك فاللي فات ... و يحاول يطمنك اللي جاي خير ..يرجعلك الضحكة ... كان يتبسم على روحو .. غيث يوصل يحس هكا ؟؟

أميمة حلت عينيها كيف شافتو تفجعت .. تنطرت ... !

- شتعمل هوني ؟؟؟

- مازلت خايفة مني ؟؟

من غير ما تشعر عدات يدها على لحيتو ... ضحك على جنب ..قلبها بهز .. أميمة قلبها رجع يدق ..بعد ما عفست اعليه ... تحس في نبضات قلبها تتسارع ... كل ما تمسو و لا تشوفو .. هبطت راسها اللوطة ... ماعادش تحب تغزرلو في عينيه ... تي مش بكري تصيح أعليه و تتهم فيه اللي هو بش يقتلها شباها ؟؟؟ غيث في مخو ألف سؤال ....

- أميمة شنية حكايتك ؟؟

- سامحني ... أنا شكيت فيك ... بكري كنت تنجم تقتلني بسهولة ..




- بربي كيفاه انجم نقتلك ؟؟ فسرلي ؟؟

- منعرش ... مخي دار .. برشا ... شكيت فيك ... خايفة غيث من برشا حاجات ..من المستقبل .. من الماضي اللي مش عارفة كيفاه عديتو ...!

- معملتش مشكلة قبل بقيت تتفكرها ؟؟

غيث بين ناريين ... بين خوه اللي من لحمو و دمو و بين الطفلة اللي دخلت لحياتو و لا بالأحرى هو هجم على حياتها و قلب الموازيين الكل ... هو فالوسط الواجب اتجاه العايلة يجبد فيه و العشق .. الأحساس يجبد فيه من شيرة الأخرى ...صراع كبير بين عقلو و قلبو ... طايحين ريش في بعضهم و هو يتفرج أما نار في أعماقو تشعل ... كل ما يغزرلها يزيد يحير .. كل ما يزيد معاها دقيقة ثانية ..لمحة يزيد يتعلق باها و يتعلق مع كل تفصيلة من تفاصيلها ... بقى مركز في حركاتها كان وجها أحمر .. حاشمة ؟؟ حس بدقات قلبها ... بالدمعة الحابسة في طرف عينها ... بالكلام اللي مش منجمة تخرجوا .. جبدها و عنقها من غير ما يشعر حاجة اقوى منو ... كان محتاج لحضنها .. هي تفاعلت معاه و غرست وجها في صدرو ... بقاو يتبسموا الزوز ... اتكى .. تكاها بجنبو ..بقا يلعبلها بشعرها لين هزهم النوم ... أول مرة كيف تغمض عينيها و تحلم بالنوار ... و ترى النور ... في منامها ... حتى الكابوس المعتاد ليلتها ماجاهاش ... و هو أول مرة يرقد مرتاح .. ماصارحوش بعضهم بمشاعرهم أما تصرفاتهم تكفي وحدها بش توصف عمق المشاعر اللي جمعتهم ...

حلت عينيها الصباح تبسمت ... أما حست بفراغ بجنبها الدفاء متاع البارح تنحى .. دارت ماتلقاهوش ... تسمع في حس قوي .. البرة .. مشات تجري حلت الباب ..عرضتها جارتها

- شفماااااا ؟؟؟؟

- شدو المهبول يااا بنيتي ... طلع ساكن فالسطح متاعنا ...

شدت شعرها بالقوي ... نفس الوجيعة تجاها كيف تتصدم .. قلبها يدق ..بش يطيح ..من قوة الصدمة ... " المهبول شدوه " .." شدوه " ... الجملة ترن في وذنها و تتعاود تزيد تتعاود ... تحفضها ... تغمض في عينيها بالقوي .. تتمنى تكون منامة بش تفيق منها أما كيف حلت عينيها ... كان واقع ... ! جا النهار اللي حكات أعليه بينها و بين روحها رجعت وحدها مرة اخرى .




الحلقة15.

رجعت للدار تهز في ساقيها بالرووح شنية بش تعمل تو ؟؟ لازم تشوف غيث بعد مالقاتو .. يضيع منها .. لازم تتحكم في اعصابها و تعرف كيفاه تتصرف .. بش توصل تشوفوا و ترجعو ليها .. مشات للمصحة و متشجعة بش تدخل ... وقفت قدام ممرضة .. - سامحني اختي عندكم مريض هوني .. ! قصت اعلاها - مش وقت زيارة .. ! - عيشك لازمني نشوفو ضروري ......! - قتلك مش وقت زيارة ماتفهمش ؟؟ خرجت اميمة و. بقات تڨحر للممرضة .. ديما الناس يتصرفوا عكس ما تحب هي..! ..رجعت للدار تمشي و تجي بالغزول .. ! على اعصابها شنية بش تعمل تو .. ؟غمضت عينيها .. بدات تتمورض عاد تو .. و تألف في قصص من خيالها .. حلت عينيها و ضحكت ... - هههههههه يا قوى اعليك ربي يا اميمة ... بش تبدا الخطة اللي تخيلتها و بش اطبقها فالواقع .. ! مشات حلت البااااب .. و رجعت للكوجينة حلت السبابل الكل .. و مشات للدوش حلتو و حلت سبالة اللافابو .. وقواات فالماء تبسمت و مشات للصالة و تكات .. من التعب رقدت .. ! و هذا المطلوب .. بش ترقد و بش تشوف شنية شيصير . تسمع في حس جيران .. خايضين ..حلت عينيها تلقى جيرانها فوق راسها .. و الدار معبية ماء بيسين ولات .. ! - شبيك يا بنيتي هبلت تحل فالماء ناقصة هي العمارة خايخة و زيد. - ادبر فيا نحب نعمل غطسة .. ! سخننننت فغمت .. - لا عاد هذا هبال .. ولا تتهوبل - اووووف شدخلكم لداري اخرجو ... و شمدخلكم فيااااا بدات ادز فيهم و تخرج ..بكل وحشية و عنف .. حالة من الجنون الهستيري مثلتها قدامهم .. و

طربقت الباب مشات تجري سكرت الماء .. و شدها كريز متاع ضحك ..تتفكر في منضر جيرانها ... باز تو دخلتلهم الشك الي هي مهبولة و مازالت اللعبة .. ! لازم يقتنعوا اللي مختلة عقلية عايشة معاهم. . ! ˋ▽ˊψˋ▽ˊψ استغربت من روحها قبل تستعمل الواقع بش تعيش خيالها تو بالعكس .. غيث هو الواقع اللي تتمناه يرجع .. ! وقفت قدام المراية و فرتت شعرها .. ! هيجتو .. عملت برشا كحل و مسحتو و روج و مسحتو. ... - هههههه شوف منضرك كيفاه يا أميمة تتهوبل وليت على خاتر راجل؟؟ على جال حب؟ تو استوعبت هي فاش تخمم .. كلمة حب اللي نطقتها حستها لأول مرة .. ! حطت يدها على قلبها .. يدق بالقوي تفكرت ليلة البارح .. ! بكل تفاصيلها ... تفكرت أحاسيسها خلات الدار اكاك و خرجت... اطبطب عالجيران و تفسع كالصغار .. ! اسمع اللي ماتسمعش الطفلة اللي جات من امريكا دخلت فالحلة ..و ضبعت .. كرهتهم في حياتهم الجيران .. ! جاتها مرا كبيرة تسكن في نفس العمارة .... - يا بنتي شصارلك مش كنت لاباس اعليك ؟ - هههههه بقات دازة عالضحك و برة .. اما ماتعرش اللي هي تعمل في هذا الكل فالفارغ .. هي هدفها تدخل للمصحة .. و تعيش معاه غادي .. ! عادي عندها منها تتداو و منو تراه مل نهار مسكينة كانت تفكر بكل براءة .. متعرش شنية مخبيتلها الدنيا متعرش اللي غيث بعد اعلاها و معادش راجع يمكن خايف اعلاه من خوه الوحش .. اما شنية مصيرها كان بالحق تدخل للمصحة ؟؟؟.. رجعت لدار و بقات تصيح زنزنتها العمارة بصوتها .. ! و هي تقول بينها و بين روحها وقتاه يفدوا و يهزوها للمصحة ! ؟




الحلقة 16 ""

أميمة عملت المستحيل بش جيرانها يضنو الي هي مهبولة ...! عملت عمايل اللي تبعو وين ماشي و تتهوبل اعليه .. الي تشريلوا عركة .. مرة خرجت الأثاث متاع الدار الكل قدام الحومة و بنكت .. عملت الفضايح ..! اما هي ماتحس شي خاتر السيناريو جا في مخها و لازمها اطبقو بأي طريقة ... خلات دارها سقف و قاعة ... تبات مصبحة تغزر من الشباك للمصحة ... يغافلوها دموعها و يهبطوا .. مش مصدقة الحالة اللي وصلتلها .. جاها خوها و هي مش طايقتوا .. زادة هو تحب توصلوا الي هي مهبولة .. ! اي نعم معتبرة خوها كيما اي انسان عادي في حياتها ... تكرهو من العملة اللي عملها يمكن تعتبروا غريب لها بالرغم هو الوحيد اللي بقالها من عايلتها. - نورمال في مخك عاملة في روحك هكا؟ -شيهمك فيا؟ نعمل اللي نحب .. - اعمتلي العار ..! - محسوب انتي معمتليش العار ... جا مقابلها و عينيه تڨدح نار .. كان عارف هي فاش تخمم و شنية تقصد اما فيبالو نسات الماضي و اللي ما يعرفوش انيس اللي اختو ممثلة بارعة و تنجم تخفي مشاعرها سنين ! اما الكبت اللي عاشتو بش تخرجو تو .... صياح و ضرب و بكاء ... خرجت همها فيه .. تضرب فيه على صدرو و هو مصدوم فاها شدلها يدها .. - شبيك هبلت ؟؟؟؟ مااااااكش عادية ... - انتي اللي ماكش عادي من جرتك خسرت اختي ..يااا ظالم .. انتي و امك كيف كيف.. فاش تخرف .. حكاية عندها سنين شبيك تو متفكرتها - و انا نسيتها من أصلو؟؟؟؟ من جرتك بقيت يتيمة بلاش بو من جرتك خسرت اختي اللي هي كانت تفهمني اكثر من روحي ..امك مرضتني و خلاتني نصير كيفها نكذب عالناس .. و إنتي خليتني نصير نكره الشعور بالأخوة .. و نقرف من دمي يا انيس .. الحبس شويا فيك - خرج اللي في قلبك ما تسكتش .. زيد احكي .. و انا فيبالي قلبك صفا اتجاهي .. كانت مجرد حادثة! تسخايلني مانيش حاسس؟ مانيش حزين .. انا نموت فالنهار الف موتة .. كلاني الندم .. و فراق اختي شواني .. كالا روحو بالحيط و دموعو هبطو بش تقولو اميمة قلبها بش يحن ؟ بش تصدقوا .. بدات ادز فيه بش يخرج و تصيح ... -اخرررررج معادش نحب نراك .. اخرج يا قاااتل ياااا ظالم .. كرهي ليك أعمى و مستحيل تقنعني بدموع التماسيح اخرررج ... - انتي مهبولة ! و والله ما ندخلك سبيطار المهبلة كان انا يا اميمة. - وريني شطارتك .. و كيفاه بش ادخلني للسبيطار المهبلة ... و توو اخررررج ... خرجتو و طاحت فالقاعة .. حطت راسها عالباب .. خانوها دموعها .. هبطو حياار .. كانت متأكدة اللي هي بش تبكي كيف تفرغ قلبها .. حست بالراحة كيف خبرتو بشعورها الحقيقي اتجاهو .. بدات تبان حقيقة حياتها و مشاعرها كانت عايشة في مجرد كذبة .. غمتها و سيطرت على احساسها .. كانت أسيرة لأكاذيبها .. تو بدات تتخلص من بقايا الخوف اللي في قلبها .. بقات تستنى في خوها وقتاه يجي و يجيب الطبة و يهزوها .. ! تعرفو كيف يقول كلمة يعملها ... بقات تستنى بش تشوف غيث و تترمى في حضنو .. و تحس بروحها عايشة .. ! اما زعمة شنية بش يكون احساسها كان ماتلقاهوش ؟ بش تكون صدمتها قوية




الحلقة 17 "" متعرش قداه بقات فالحالة هاكي ... ساعة ..ساعتين.. أربعة ! فاقت كان على صوت .. حس خطوات ... بدى يقرب الصوت وقفت ... بدات توخر ... صحيح تحب تمشي للمصحة و تشوف الي سلبلها تفكيرها ..أما اللحظة هاذي خافت منها ..! دق الباب بالقوي ... حطت يدها على قلبها ...مفجوعة ... مشات خطوة .. ! خطوتين .. ترعش .. ! زعمة تهرب ؟؟ أما أعلاه تخمم هكا مش هي تحب تشوفو ؟؟ شباها فقدت شجاعتها تو ... ندمت .. ! اي هي ندمت .. ماتحبش تتحبس و يتهموها بالجنون ... و تخرج بعد سنين من العذاب .. صحيح تعرف روحها مريضة أما مش لدرجة تدخل لسبيطار لمهبلة ... هي تنجم تعاون روحها .. ! الحاجة الوحيدة اللي مبخلتها بش تحاول تبرى ... انها كانت تستحلى في حياتها و هي مريضة .. ! زاااد الدق ... مشات تجري حلت الباب و وخرت لتالي ... تفجعت من اللي قدامها ... ! نفس المرا .. اللي جاتها فالفستيار ... ! أما وجها عادي مش كالمرة اللي فاتت .. أميمة تبلمت .. ملقات ماتقول ...

- اميمة .. نحب نحكي معاك !

- م.نين تعرفني انتي ؟؟ شنية تحب مني ؟؟؟

- أنا نعرف هيثم ...!




أميمة تصدمت لاهية تستوعب فالإسم .. تعرفوا مليح ..

- أدخل تفضل ...

المرا دخلت و اميمة لتو مبهمة .. زعمة هيثم هو مولا المصايب هاذي الكل ... ؟؟؟

- انتي تعرف هيثم عز المعرفة ...

- انتي شنية تقربلو ؟

- مرتو !

- أذاكا أعلاه جيتني فالفستيار ... و قتلي الكلام هكا ؟؟ بيبي شنية ؟؟

- انتي كذبت على راجلي و جرحتو ... و لتو يهتري بيك ... كيف تحب تخلي راجل ما ينسلكش اجرحو و انتي عملت أكاك ...

- لا صدقني أما صحيح غلط معاه هيثم اما بقيت نلوج أعليه بش نطلب منو السسماح مالقيتوش في أمريكا ... صدقني

- انتي خليتو ليلة عرسكم ... طيحتلو كرامتو بين اصحابو ... و زيد هو عشقك ... يشوف فيا انتي .. حتى فاللحظات الحميمية اللي بيناتنا يتخيلني انتي ... كنت بيناتنا حتى في بيت النوم

أميمة من العصب وقفت ... بدات تمشي و تجي ... و صوتها بدا يعلااا

- أنا شنية مدخلني فيه ما ضربتوش على يدو و قتلو حبني بالصيف اعليك ...

- انتي لعبتلو بمشاعرو ...

- أنا مريضة..عندي مرض نفسي صدقني نادمة اللي أنا كذبت اعليه و مثلت اعليه دور العاشقة الولهانة

- يزي من الكذب متاعك ... قهرتو الراجل ... بديت تبنيلو في أحلام وهمية ... نتمنى نجيبك منك صغار ... نحبك ... نموت اعليك فاللخر يلقاك مع غيرو و تقلو في نفس الكلام أما تهنى الكلام اللي وعدتو بيه ... أنا وفيتهولو مش انتي ...

- باااهي اتنجم تخرج تو ..ماعنديش أعلاه نبررلك موقفي ... !

مرت هيثم وقفت و قربتلها ... – صدقني الا مانشفعك عالنهار اللي تولدت فيه .... و على كل لحظة خمم فاها هيثم فيك و انا معاه ...

- اعمل اللي تراه صالح ...

- بااهي باااااااهي تا نشوفو ...




مشات و أميمة بقات في حالة ذعر ... الناس الكل ضدها ... هزت ساكها و جات خارجة عرضها انيس و معاه زوز طبة ... !




الحلقة 18 "" وخرت لتالي شدها واحد فيهم ...قامت تصيح ...!

- اععع تي سيبني ... زااايد كلب يا انيس ... اعرفتك بش تعملها

- مش قتلكم مهبولة هزوها ... توو معادش بش تراني ... بش تموت غادي ...

خرجو الجيران ... و بقاو يوشوشوا ... و أميمة تفارع فالطبة اللي شدينها .. و تغزل على انيس اللي وافق قدامها و يضحك ... عندها حق تكرهو ... هو قتل اختها .. خلي بش يرفق باها و ما يدخلهاش لسبيطار المهبلة ؟؟ حست كاينها عايشة في وسط فيلم متعرش شنية النهاية ..؟ متعرش حتى شنية بش يصير غدوة ؟؟

تكلمت جارتها ...

- ا ي يا دكتور هزوها مهبولة ... كان ترا شعملت فينااا

- اسككككت انتي يا عزوزة الستووووت ...

كان ما شدوهاش راهي هجمت أعلاها ... و كلاتها بسنيها ... غلبت اعلاها ... كركروها للمصحة ... و دموعها على خدها ... ! شباها تبكي تو ؟ مش هذا اللي حبت أعليه ؟ مش هذا اللي خططتلو .. ؟؟ أو نجح مخططها ... و توقعتها من خوها ... عادي .. أما الطريقة العنيفة اللي هزوها باها وجعتها .. فدت .. ! أميمة تعشق الحرية ... و تو مش مستوعبة اللي هي بش تتحصر .. بش تفقد حريتها ... دخلوها ... شدوها الممرضين ...

- مش انتي اللي ...

اي نفس الممرضة اميمة باقت تهز فاها و تحط من جرتها .. ! كان خلاتها تشوفو راهو ما صارش هذا الكل ...!

بقات تلوج بعينيها أعليه ... يكركرو فاها و هي اثبت فاللي ماشي و اللي جاي ... دخلوها لبيت ... كالزنزانة متاع حبس تخنقت ... قامت تصيح

- لاااااااااااا ... غيييييييييييييث ...

جااوها زوز ممرضات و تكاوها عالفرش و زرقولها ... فارعتهم لين خرجت من يدها الدم .... شدتها و ترشقت بالبكااااء ....




----




- نورمال في مخك انتي .... تووو ترجعها منين جبتها ... تووووو تخرجها من المصحة ... هيثم توووو

جاتو حالة هستيرية يضرب في يدو عالبيرو ...طير الأوراق و كسر التحف ...

- لدرررررجة هاذي سلبتلك مخك

- ا يي نحببببببببها و نموت فاها ...

- تكذب أعليك يا هم يا دغفة .. خلاها في سبيطار المهبلة اذيكا بلاصتها ....

- لااااا هي صادقة معايييااا ماتكذبش ...! و تووو خرجهااااا .... خير ما نرتكب جريمة قتل فيك

شدو من خناقو ...

- امشي خرجهااا تووو ...

دخلو اعليهم زوز.. رجال ..طول و عرض ...اوو الراس أعليهم .... شدو غيث و وكلوه طريحة ... دمدموووه ... ! و بعد طيشوه في بيت من البيوت ... ! جمعهم القدر في ظروف صعيبة برشا ... شكون الغالط من اللول ؟؟؟ أميمة اللي كذبت على هيثم لدرجة انو خلاتو يحب ينتقم منها ؟؟ و لا غيث اللي وافق بش يعاون خوه و غرتو الفلوس و تو نادم ... و لا هيثم الغالط اللي الانتقام عماه ... و ينجم يكون الحل في يدو ... ؟




الحلقة 19 "" حلت عينيها ... تلقا روحها فالظلمة ... تفجعت حاولت تقوم مش منجمة .. شدت ساقيها ... رزان ... شعملولها ولاد الحرام ... حست بإحساس مش عادي ..كاينها في صندوق مسكر تحاول تخرج منو مش منجمة .. تفارع ببدنها أما ساقيها مش مطاوعينها ... قاامت تصيييح بأعلى صوتها ...

- شبييييك ؟؟ لابااااس ؟؟

- شبيني مش منجمة نتحرك .... آه

- اذيكا التزريقة تعمل أكاك ساعتين اخرين و تولي لاباس ... أرقققد ...

- انتي السبب كلو منك ...

- اعلاه كلو مني ...؟

- قتلك نحب نراااااه ماخلتنيش ...

- اذيكا القوانين .. و أنا مش مسؤولة اعليك ...

هي جات ماشية شدتلها يدها ...

- أمان يا ممرضة ...منعرش شنية اسمك ... عاوني .. أنا مانيش مهبولة صدقني ...جيت هوني نلوج على غيث ****

الممرضة وجها تقلب ... و تصدمت ... حست باها أميمة أكيد عرفتو ...

- لا منعرفوش معناش حد بالإسم هذا ...

- كيفاااه ؟؟؟ مش مرة مهبول هرب من عندكم ...

- امان عيشك ماعنديش حق نحكي معاك ...

- أمان اسمعني .... بربي ...

مشات و خلاتها ..

- اففففففففف حد مايعاون حد فالدنيا هاذي ... ملاااا عملة .... غيييييييييييييييييييث ..

تضرب في راسها عالمخدة و تجبد فالملحفة بيدها ... مقهورة عملة عملتها بيديها ... جات لهوني بإرادتها ..اي هي اللي ردت روحها مهبولة ... كانت فاها نسبة ضئيلة من الجنون هي اللي بربشتها و ردتها نسبة كبيرة ... البيت اللي فاها غامة أعلاها خانقتها ..حاسة الحيوط تقرب .. و بش تغمها .... تحب ترتاح .. وقتاه اميمة ترتاح من الصراع اللي عايشتو ... ! صوتها بحاح من العياط سبيطار كامل سمع صوتها و اسم غيث اللي ما يفارقش كلامها ..و عياطها ...أعلاه الناس الكل سمعوها كان هو ؟ تصدمت من فكرة يكون مش هو المهبول تفكرت حكاية التصويرة زعما كذب اعلاها ؟؟؟ راسها بش يطرشق من الوجيعة ... ! زعمة تكون هاذي نهايتها ؟؟




من شيرة الاخرة غيث دايخ من كثر الضرب ... هز راسو بالروح ... يسمع في صدى صوت ..." صدى الجنون "يسميه ديما كيف يبدا فالسبيطار هذا ... أما الصوت المرة هاذي جذبوا ... صوت مش غريب اعليه يعرفوا تعمق فيه ... تفكر اللي اميمة هوني ..هز روحو ...و قااام ... حل الباب ... يمشي و شاد روحو لا يطيح ... الصوت بدا يقرب ... بدا يحل فالبيبان ... يلوج أعلاها ... خايف اعلاها .... لا تنهار ...صعيب في ليلة و نهار الإنسان يلقا روحو في سبيطار و محكوم اعليه بالجنون المفاجئ ... تعدا من بحذا باب آخر ... سمع صوتها قلبو بهز ... دز الباب ... تصدم من حالتها ... دموعها هابطة حيار شادة فالفرش بيدها ... قاشعة راسها و تعيط ...

- امي...مة ؟؟




الحلقة 20 " "

- هيثم ؟؟؟؟؟؟

قبل ما تغزرلو جبدو هيثم بش ما تشوفوش ... ضحكلها ضحكة صفراء و مشالها ... و هي مصدومة ... شباها سمعت صوت غيث ...شيعمل هذا هوني ؟؟؟؟ باز تحلم ...غمضت عينيها رجعت النفس... مشاعر تخلطت تفكرت اللي عملتو فيه الكل ... تأكدت اللي هو راجع ينتقم ... طبس اعلاها بعدت وجها ... زاد قرب وجهو ... النفس متاعو على رقبتها .... و غيث البرة مسكين يفارع في رجالو ... عصابة هيثم المسخة ...

- شبيييك خايفة اعزيزتي ...؟




تسمع في صوتو ... تحس بأنفاسو ..شوك في بدنها .. متقززة ... شبيه يحكي هكا مش معرس ؟؟ شمرجعو ان شاء الله اللي في مخها يطلع غالط ...

- أغزرلي / ؟؟ خايفة ؟ قبل ماكنتش تخاف مني ... كنت تبات في حظني ..

دارتلو و نظرة الحقد ... في عينها ..نظرة توصف مدى الكره متاعها تجاهو ...

- شتحب مني ؟؟؟

- نحبك انتي ... ( عدى يديه على وجها ...شفايفها ...رقبتها ... )

بدات تحرك في وجها ... كان شاددلها يديها بالقوي مش مخلاها تتحرك ... بدات تتخنق ... في بيت هي و هيثم وحدها .. مجرد فكرة تتعدى في خيالها كانت ترفضها خلي تو عايشتها ... و فالواقع ... جات تلوج على غيث ... تلوج عالحاضر عالمستقبل ..طلعلها الماضي ... !

- أمان هيثم لازم تفهمني ... لوجت اعليك راني .. كنت بش نطلب منك السماح مش مني ... راني مريضة

عدى يديه على شعرو بكل غزول ... ! بكل قهرة ... وقف جا مقابلها ...بدى يصفق ...

- براااافووو ... برااافو ... سيناريو خارق العادة ... مشهد روعة ..تمثيل اروع ...

زاد طبس اعلاها المرة هاذي كان اقرب ... وجها مقابل وجهو ...

- تكذب ... انتي ربي خلقك لحاجة اكهو هي الكذب ... !

- لااااا لااااا صدقني ... مش مني .. انتي تعرف حكايتي ..تعرف شصارلي في صغري .طفولتي عذابي ... حكيتلك كل شي

- و كلووو غاااالط ...

- اي خاترني مريضة بالكذب ...

- أعلاه تكذب أعليا و تقلي بوك مات ... أختي قتلها خوياا ... أمي انتحرت ... قتلت امك بالحيا و بوك زادة حتى أختك قتلها و مسختلها شرفها ...

كان يحكي بكل غزول ... بالوجيعة اللي حاسسها ... !

- انتي تحب تنتقم مني ؟؟

- نحبك تنطق و تقول الحقيقة ... شنية الحقيقة اللي في حياتك ؟؟؟ قووول ارحمني

- صحيح ... كلامك الكل صحيح بابا ماماتش ... أنا تخيلتو مات ... يخي قتلتو بيني و بين روحو ... و امي تخيلتها خانت بابا .... يخي وليت نحكي و نقول الي أمي عاهرة ... اي أنا اللي رديت خويا مجرم بكلامي لين ولا يساير فيا ... و دخلني لسبيطار المهبلة ... اي أنا الغالطة اللي قتلت اختي ... بيني و بين روحي في خيالي .. و هي عايشة في صفاقس تو و عندها الصغار ... ساعات نهرب من عالمي و نشوفها فالفايسبوك ... توحشتها اما فيا حاجة ترفض واقعي ... اناااا مريضة

- تتمورض ...مدامك مستعرفة بمرضك معناها تتمورض ...

- مش منجمة هيثم ... مش منجمة نبرى حاااولت ... انا حبيت ... من جديد قلبي دق هذا اللي خلاني نجي لهوني ... اما ما لقيتوش ... هو الحقيقة الوحيدة في حياتي ...غييييييييث




غيث يملص روحو و بكل همجية يدخل ... و العصب ماكنو الدجاج الأكحل داير بيه .. شبيه صدقها ؟؟؟؟ شباها هكاااا ؟؟؟ اما هو حصل و حبها ... هي كذبت اعليه بخصوص موتة بوها و امها و أختها ... شوهت صورة خوها ..هاذي إنسانة مهبولة .... غيث حب مختلة عقلية ... مجنونة .. تصارع في هبالها ... كذب خوه و ضربو ... غزرتلو و عينها منفوخين بالبكاء ... تصارع في مشاعرها المتناقضة ... هي حية زعمة ؟؟ ولا تصارع فالموت ... أكيد ما تكون كان روح بلا جسد .. بقاو الثلاثة يغزرو لبعضهم ... و حايرين ... كل حد سارح بأفكارو ... زعمة شكون بش يبدا الخطوة الأولى ؟؟؟

الحلقة 21

بقات مصدومة في غيث ...

- غيث ... وينك ؟؟؟

- سكر فمك انتي ... يااااا كذابة ...

- مش قتلك تكذب انتي ما صدقتنيش

- و انتي صدقت الي هي مريضة ؟؟؟

- غيث لحظة نفسرلك امااان

- قتلك سكر فممممك ... !

كان منرفز و كشاكشو طالعة .. أول مرة تراه فالحالة هاكي عندو حق ... في ليلة و نراه يطلع كل شي كذب ... جا خارج ...

- امان غيث اقف احكي معايااااااا ما تمشيش ...

كانت تحكي و تبكي ... خانقتها العبرة .... تغزر لهيثم كيفاه مكتف يديه ... و ملامح وجهو جامدة ... الكل ضدها تو يمكن حتى هي ضد روحها خرج و طربق الباب وراه ... شدت فمها ..متحبش تخرج صوت شهقتها ...

- ريت كذبك وين وصلك ...

في لحظة رجعلها شاهد العقل ...

- انتي كيفاه تعرف غيث ؟؟؟

- غيث خويا يا للا ..

- كذب علياااا

- هو أول كذبة كذبها في حياتو أما انتي الله اعلم قداه ؟؟ 100 200 ... قداه قلي ؟؟؟

- شتحبوووو مني تووو ؟؟؟

- ابقى ستناااا ... أبقى هوني لين نجيك

- لااااااا قلي تو والله نمووووت ... ماكش انتي و لا غيرك يتجرأ يحددلي مصيري ...

طفاها و خرج ... و هي مازالت تصيح ... مشى لخوه اللي يلقاه في حالة ... شادد راسو ... حط يدو على كتفو

- غيث ؟؟؟

- قداشني نية ... كيفاش صدقتها

- انتي زادة كذبت اعلاها

- اي على خاترك .. حبيت نعاونك ...

- و انا تو بش نعاونك ...

- شمعناها ؟؟؟

- مستحيل نخليك هكا انتي تحبها ... و لازمك تعاونها

- وانتي ؟؟

- أنا معرس غيث ... و مرتي حبلة .. ! رجوليتي ماتسمحليش نخليها ... بنت اصل وقفت معايا ... ! صحيح حبيت ننتقم منها أميمة أما هي مريضة بالحق طلعت ... صدقني تبرا مدامها مستعرفة بمرضها ...

جاا من غادي أنيس يجري ... و يلهث

- شصااار لأختي هيثم أنطق

- لابااااس ماتخافش ... أنا بش نعاونها ... لازمننكونوا يد وحدة

- نحب نشوفهااااا ...

- لاااا مش تو .. ! العلاج متاعها بدى من تو ... حتى حد ما يدخللها ..! أنيس امشي مانحبهاش تسمع صوتك و غيث عيشك ما تحاولش تقربلها ... بش اتنجم تتحسن فيسع ...

مشى هيثم و خلاهم ... دخل لبيروه ... يلقى " سمر " غادي هاذي مرتو اللي طلعت لأميمة مرتين ...

- شصااار ؟؟

- سمر تو اتنجم تخرج منها اللعبة ... خاتر وفات

- شمعناها وفاااات ؟؟؟ معناها سايى انتقمت

- أميمة مريضة طلعت ... لازم نعاونها

- لا إنتي هبلت ... نسيت شعملت فيك ؟؟ نسيت الوجيعة اللي حسيتها ... و الدمار اللي عشت فيه

- سمر ما تزيدش على ما بيا ... تي مريضة الطفلة و زيد خويا يحبها

- خوك و لا إنتي ؟؟؟

قربلها و شدها من وجها بيد برك ...

- سكر فمممممك سمر ما تخلينيش نتهور

دزتو بكل قوتها

- اي تهور و اضربني .. و طيح ولدك ... أقتلو ..كيما لاهي تقتل فيا فالنهار 100 مرة ... اقتلو ترااااااه

شدتلو يدو و بدات تضرب فاها في كرشها و تبكي .... لزها ليه و عنقها بالقوي بقات تفرفط في حضنو ... و هو كابس أعلاها ... صحيح هو يكن المشاعر لأميمة ..أما الإنسانة هاذي عشيرتو ... وقفت معاه فالسراء و الضراء ... يحترمها برشا و يعزها و قلبو يوجعو كيف يراها تبكي و لا خايفة و لا متقلقة أما ما يعرش اللي هو سبب حزنها و دمارها




الحلقة 22

سيبني هيثم .. تخنقت منك راني .. تعبت يزي لهوني. بعدها من حضنو شوية ..

- شتقصد سمر ؟؟؟ كان يثبت في عينيها .. خدودها حمر .. شفايفها الروز .. طبس راسو جا بش يبوسها دورت وجها خافت لا تضعف خاترها قررت تبعد .. تعبت منو... تو قداه من عام معاه .. يظلم فاها ضربها مزبلها و هي صامدة .. صابرة .. تهدت - سمر ما تهبلنيش .. شصايرلك ؟؟؟

- نحب نطلق .. تصدم من كلامها اول مرة تجبد عالطلاق ملي عرسو مستانس هو يهددها و تعمل المستحيل بش ترجعو ... لا باز صايرتلك حاجة ..

- لا انتي ستانست بيا سمر اللي تحبك .. اللي ضحي... تعفس على قلبها على خاترك كنت معاك صديقة و اخت و انا مرتك يا هيثم جبت منك بيبي .. و قلت اعليه غلطة . او بش نعفيك منها الغلطة ... انا وصلت لتوب معادش نقدر نستحمل هبالك و دلالك .. مشيت معاك في لعبة مسخة خليتني نخرج لطفلة في هيئة عبيثة ... حياتي الكل بابا رافع راسو بيا و بعقوليتي رديتني فاللخر نخوف فالناااااس شنية اخر فاللخر تجي تقلي معادش بش ننتقم .. خاترك تحبها .. بربي قلي كان جيت في بلاصتي شتعمل ؟؟؟ حط روحك في بلاصتي .. كيفاش تتصرف الانسان اللي تحبو يعترفلك بحبو لغيرك . ترضى؟؟؟؟ طيحتلي كرامتي فالماء .. كل حرف تنطق بيه يكون سكينة في قلبو قربلها و باسها من جبينها.

- ماتبعدش اعليا سمر .. ماتحرمنيش منكم .. سامحني بربي .. سااامحني ..

- فات الفوت تو ..

مشات و خلاتو في حالة من الذهول .. كلامها أثر فيه .. تعدات لأميمة .. كيف شافتها .. فالحالة هاكي لعنت روحها الف لعنة

- اميمة.

- جاية تكرهني في حياتي ؟؟؟؟ عادي ... مستعدة.

- لاااا جاية نقلك سامحني .. تصدمت اميمة من كلامها رات في عينيها دمعة .. و حزن غريب .. حزن تعرفوا و عاشتو ... رجعت لهستيريا متاع البكاء.

- نحب على غييييييث ...جيبوووولي غيث :'(:'(:'( تنوح و تبكي كيف الصغار لحظتها توحشت اختها امها و بوها .. ختى انيس قلبها وجعها اعليه كرهت روحها .. لدرجة هاذي شريرة ؟ الممرضة جابتلها الماكلة طيشتها الكل ...

- اعلاااااه نعمة ربي مش حرام اعليك ..

- ما ناكل الا ماتجيبلي غيث .. نشوفو من بعيد امااااان بش نموت.. قلبيي يوجع ... حاطط راسو عالباب و دمعة غافلتو ... على مرتين بش يدخللها اما تفكر كلام خوه .. مشى هرب بش ما يتهورش و يدخل .




الحلقة 23

بقات نهار اخر اميمة لا ماكلة لا شراب ..عينيها حوقت .. بدنها يوجع فاها .. ! حالتها حليلة .. دخلت اعلاها الممرضة كيف راتها فالحالة هاكي تفجعت مشات تجري لهيثم ...

- دكتور ... :O:O.

- نعم شفما ؟؟؟؟

- اميمة حالتها صعيبة عندها نهارين ما كلات شي ..

- ركبلها سيروم و هاني بش نجي ... دخل غيث ..

- شفماااا؟؟؟

- اميمة ..:-(

- شباها ؟؟؟ :O لحظتها خاف اعلاها مهما تعمل يحسها نقطة ضعفو !

- ماتخافش .. هي مش لاهيا تاكل .. - تحب اعليا هيثم.. بش ندخللها ... غيث جا بش يمشي خلط اعليه هيثم وقفو ..

- شبيك غيث؟ نحب نخليها تحس بتأنيب الضمير بش معادش تكذب .. نحب نحسسها بالوحدة الي تكرها .. هي تحبك و ظاهر هذا .. اذاكا اعلاه نحبها تحس الي هي خسرتك .. - حتى لوقتااااه؟؟؟ الطفلة بش تموت .. كل مانسمع صوتها قلبي يتقطع اعلاها .. - اذاكا هو العلاج و نوعدك في اقرب وقت تدخللها و تو خليني نمشيلها ... زادة غيث يحب يشوفها توحشها .. كان رافض فكرة العلاج بالطريقة هاكي .. دخل هيثم اعلاها تفجع من حالتها .. شعرها مفترش..! وجها اصفر .. عينيها محوقة... تغزر للفراغ .. كانت سارحة .. ! تفكر .. قربلها .. مستانسة تتفجع تصيح .. تعيط .. شي تو حسها بكماء .. ! - اميمة ؟؟؟ تلفتتلو .. ورجعت تغزر للفراغ .. كاينهي ماراتوش معملتش حتى ردة فعل .. حتى حركة ! نعرف الي انتي تحب على غيث .. اما هو سافر ..! الخبر أثر فاها من داخل اما ما حبتش اظهر شي :-( كانت تسمع فيه و قلبها واجعها لدرجة معملتش حتى حركة .. هيثم دخل في حيط لازم تتجاوب معاه. . لازمها خبر يأثر فاها و تحس بتأنيب الضمير اما اللي ما يعرفوش اللي اميمة مجروحة و نادمة :( برشااا .. قام و بدى يمشي و يجي قدامها ..

- قتلك غيث سافر و مش راجع يكرهك ..

- انتي تكذب ..! استغرب كيفاه شلقت بيه .. لدرجة هاذي ولات خبيرة فالكذب ..

- نسيت هيثم الي انا كملت قرايتي في طب النفس و الامراض العقلية ! زعمة بش نحير انتي تكذب ولا لا؟ اي هيثم بنى حلمو هو و اميمة و قرروا كيف يرجعوا لتونس يبنيوا مصحة عقلية ! اما للأسف اميمة دخلتلها مريضة في بلاصة ما تدخلها طبيبة




الحلقة 24

بالنسبة لأميمة كانت واثقة انو غيث ما يكرهاش اما سافر ولا لا ؟ مش متأكدة .. ! هيثم خرج مشى يشوف حل مع سمر .. عاينتو مشى هبطت من الفرش رجعت تمشي اما موجوعة تترنح في ماشيتها ..حلت الشباك .. طلت كانت البيت فالطابق الرابع .. ترعبت من العلو اما اذاكا اللي بش تعملو .. ! هذا هو الحل فدت .. من صمتها .. و قلة الحيلة متاعها .. لازم تتصرف بالكشي الفكرة هاذي ترجعلها غيث ً... زعمة كيف يشوفها ولا يسمع باها بش تنتحر يرجع؟ يجاها؟ مخها قاللها الي محاولة الانتحار ممكن تخليه يحن .. ! ممكن تخليه ينحي الي في يديه الكل و يجاها يجري .. ممكن يخاف .. ! هي طلعت .. و الباب اتحل ... الممرضة نفسها .. جحيم حياتها ديما تطلعلها فالمواقف الصعبة ... ! - واااااه اهببببببط..! مشات تجري و تصيح - يااااا دكتووووور ... يااااااا دكتووووور... - من غير ما تعيط لحد .. من غير خوف و رعب .. انا قررت ... لحظتها غيث دخل معادش ينجم يصبر .. اعلاها كيف شافها فالحالة هاكي ترعب .. من افكارها .. أميمة الشيطان شايخ اعلاها .. ! مشكلتها ايمانها ضعيف لازم تتعلم تحمد ربي .. تتعلم انو حياتها .. فانية مش بش ادوم .. لازم تتعلم تصبر .. ! لازم تعرف انو الآخرة هي اللي بش ادوم .. و ربي كيف يبتلاها اذاكا امتحان بش يراها تصبر ولا لا ... لازمها تكون على يقين الي هي خير من برشا فالدنيا .. بقات ترعش ..كيف شافتو كانت بش تهبط اما شافت نظرة الحقد في عينيه. نظرة توصف مشاعرو وقتها .. جب مخلط بكره .. مشاعرو متضاربة .. - اميمة اهبط ! خيرلك .. - انتي ما سافرتش اعرفتو يكذب هيثم .. - اهببببببط قتلك ... - تكرهني؟؟؟ ههه اكيد بش تكرهني كذبت اعليك و جرحت خوك. . حد ما يحبني فالدنيا حد ماهو معايا انا وحدي .. اميمة ديما تحس الي هي وحدها .. و هذا الي مأثر اعلاها اكثرية .! هذا الي مخلاها متعذبة - ماكش وحدك قتلك اهبببببط ! ماتخرجنيش من عقلي ... قدم خطوة لاها .. هي جات بش تنڨز .. - لااااااا اميمة لااا ماتخلينيش وحدي .. اقتنع الي هي ممكن تعملها و تنڨز .. بش يتقهر منها بش يموت بعدها و بش تبقالو وشمة في قلبو .. توجعو .. بش تبقالو حرقة تكويه كل ما تفكرها ! - امشي غيث عيش حياتك .. هاذي الدنيا مش دنيتي .. - فاش تخرف فاش تهذي ؟؟ ربي اعطاك روح لازم تستحفظ اعلاها .. ! استغفر مولاك .. راهو مصيرك الجحيم ..! غزرت لسماء كان الطقس مغيم يوصف حالتها .. عينيها زغللت ... و دمعت .. - سامحني يا ربي .. سااااامحني يااا ربي .. تعبت راني .. ان شاء الله تغفر لي .. صحيح غيث بجنبي توو اما هو يكرهني .. كيفاش انجم نعيش و هو يكرهني ..

- ما نكرهكش والله نحبببببببك والله ارحمني و اهبط .. نحببببك اميمة :-(:-( غزرتلو و مش مصدقة ... هبطت و هو قربلها لفها بكف .. قووووي خرج فيه همو الكل .. كف يوصف قهرتو منها .. شدت خدها و ضحكت

- تحبني غيث؟؟؟ مش مصدقة .. ! كانت تستاهلو الكف .. اذاكا اعلاه ماحستش بوجيعتو مخها و تفكيرها الكل في حب غيث لها




الحلقة 25

"' ترمات اعليه .. شعرا لا طيحتو ..كانت مكبشة فيه بكل قوتها .. ! تحبو اي هاذي الحقيقة الوحيدة اللي في حياتها ... تتنفس بيه .. ! مش منجمة تتخيلو يبعد اعلاها .. ! مش قابلة فكرة كرهو لاها .. عنقتو و و زادت كبست ..كانت تحب وقتها تحس بيه .. تشم ريحتو توحشتو برشا .. عدى يديه على شعرها ركحهولها .. بعدها شوية .. شدلها وجها يثبت فاها خايف كان صارتلها حاجة .. خرجت صوتها بالروح - توحشتك غيث ... ! حبيت نقلك برشا كلام .. مخبيتو في قلبي .. - اششش فاهمك .. ! اما اعلاه اعملت هكا ؟ اعلاه خليتني نضربك .. قربلها و باسها من خدها بوسة حنينة .. ذابت معاها غمضت عينيها .. ! تستحلى فالمشاعر الجديدة .. اللي تحس فيهم .. - منعرش شبيني غيث ملي مشيت و انا نلوج اعليك .. غيث مانيش مهبولة صدقني .. نحب نخرج من هوني .. كان جيت مجنونة راني مانوصلش نحبك - بالحق تحبني اميمة ؟ متأكدة ؟ ماكش مصدقني؟؟؟؟ غيث انتي الحقيقة الوحيدة في حياتي .. قلبي رجع يدق من جديد .. شدتلو يدو و حطتها على قلبها .. اللي نبضاتو متسارعة ..

- حاسس بيه ؟ غيث بقى ساكت .. كان يلقى يعنقها و يخبيها بين ضلوعو .. اما حاجة مقلقتو .. محيرتو .. هو خايف من مرضها من اكاذيبها .. مرعوب من فكرة اللي هي تطلع تكذب و ما تحبوش .. سيبتلو يدو و دورت وجها ..

- مش مصدقني معناها ؟؟؟ اعلاه كيف نقول الحقيقة ما يصدقونيش؟ اعلااااه ياااااااا ربي .. شدت راسها من قوة الوجيعة .. ريقها ناشف .. ! بدنها مدڨدڨ .. جاتها الدوخة شعرا لا طاحت شدها غيث. -لابااااااس؟ نطرتلو يدو ..

- لاباس من غير ما تهتم .. ماكش ملزوم ..! رجعت تكر في ساقيها للفرش .. تكات و غمضت عينيها .




الحلقة 26 ""

قلبو وجعو اعلاها .. نحى الفازت .. و تكى بجنبها .. دور يدو على كرشها و لزها ليه .. مش مصدقة الي هو بجنبها حاسة بيه .. ترعش بين يديه دورها ليه .. و هي مازالت مغمضة عينيها .. ! باسها من جبينها .. هبط لعينيها .. ! خدها.. بجنب شفايفها .. من قوة المشاعر دورت يدهااا على رقبتو .. حلت عينيها كلهم دموع ..

- اعلاه تتصرف هكا غيث؟ - منعرش اميمة .. امان حاول ابرى .. !

- منكذبش راني صدقني نحب.. ( سكتها بطريقتو .. غرسلها وجها في رقبتو .. تستنشق في ريحتو .. بارفان مع ريحة الدخان .. دوختها .. ) بقاو اكاك لين هزها النوم .. غطاها و خرج .. ! رحى الدروج بالجري .. مشى هرب .. كان وقتها منفعل .. ! طريقتو بش يتخلص من توتر متاعو .. ركب فالكرهبة و بقى يهوم فالشوارع .. ! تعدى على دار خوه حب يهبطلو... هو السبب في هذا الكل .. استعوذ من الشيطان و مشى ... هيثم كان في صراع بينو و بين سمر اللي تلم في دبشها هي تحط و هو يخرج .. البيت في حالة فوضى

- ياااا مهبول ... انتي هبلت !

- لا والله انتي اللي هبلت فيبالك بش نخليك تمشي .. ! لا مازلت بعقلي .. ! كانت بش تحط السوتيان فالفليز جبدو تنطر جا على وجهو .. شدوووو - تي شنوة هذااااا؟ .. بقات تغزرلو وشادة ضحكتها ..

- اضححححك عاااد لا تمووت .. ههههههههه .. ! هااااتو هكااا المفضل عندي ..

- هههههه ( جبدها من حزامها و لزها ليه ) تصدمت من حركتو كانت هي اللي تجبدو هي اللي تبوس و تعنق .. هي اللي تبدا بالخطوة اللولة .. حتى نظرتو تبدلت .. ولات نظرة دابلة .. زعمة يرغي فاها بش تبقى ؟ زعمة خايف لا يخسر ولدو ؟؟ و هي معندها حتى اهمية في حياتو .. كانت قريبة ليه .. ! اول مرة تحس باحساس جديد معاه .. هيثم تبدل و هذا اللي مدخلها في حيط




الحلقة 27

بقات عالفرش و حطت يديها الزوز على وجها .. حايرة .. من شيرة كرامتها .. و من شيرة اخرى حب حياتها اللي قدامها .. جا بقا على ركايبو مقابلها ...

- قلي شنعملك بش ماتمشيش ? تحب كرهبة اللي حبيت اعلاها؟ نمشيو لباريس؟ تفرهد .. بقات تڨحرلو .. هي ماتحبش فلوس هي تحب عشق .. احساس .. زعمة المشاعر تتشرى بالفلوس؟ هي حاشتها بحبو .. قامت... بقات تغزر للبيت المفرتة.. عدات يدها على شعرها .. منين بش تبدى ؟ بقات تلم فالدبش ... طفاتو جملة .. كاينهي ماسمعتش كلامو .. ! - سمر نحكي معاك ؟ باقية فالقاعة .. ملامح ماتوحي بشي .. الهدوء ما قبل العاصفة ! شدها من مرفقها بالقوي .. و قومها بالصيف اعلاها ! - كيف نحكي معاك تنحي الي في يدك و تركز معايا مانيش كلب قدامممممك دزتوو بالقوي .. - شبيك يااا هم .. انا الي لازمني نتنرفز من كلامك .. ماحشتيش بفلوسك .. و بكراهبك و بههههمك .. ماحشتي بشي منننننك .. انا محتاجة حنيتك و عطفك اعليااا .. محتاجة كلمة حلوة منك .. ! حبببببك زعما تنجم تشريلي قلبك؟؟؟؟؟ حاشتي بقلبك هيثم .. حس بيا امان .. لمرة وحدة في حياتك حس .. ! تووو ابعد من قدامي .. خليني نمشي ! مشى شيرة الباب خلطت اعليه سكرو بالمفتاح ! دارلها يتبسم .. - وراس ولدي الي في كرشك ..تحلم كان نسيبك




الحلقة 28 :

- باااهي هانااا قاعدين ... خليني نشوفك لوقتاش بش تصبر ...

مشات قعدت عالفرش .. و هو تكا عالباب ... حط يديه ورا ظهرو و بقى يغزرلها ... يتمعن في تفاصيلها شبيه ما يراش يخي ؟ عندو مرا زين و عين .. و هو مازال واحل فالماضي ؟ ... سمر مازالت سارحة بأفكارها ... زعمة تسامحو ؟ هي بش تسامحو ... أما لازم تربيه ..لازمو يتعذب كيما تعذبت هي ... قربلها ... هي قامت تجري بش تحل الباب خلط أعلاها و دور يدو بالقوي على كرشها و جبدها ...

- آه ه ..ياااا هم ... وجعتني ...

بقات ادز فيه .... و تقاوم ...

– ابعععد خيرلك ... بش تجلطني ... ياسر شادد صحيح شصااارلك ... ؟؟؟

ملصت روحها منو ... و فسعت ... هو يخلط أعلاها و هي تهرب ...

- سمممر أركح ...

- مانيش راكحة و تو امان يزي ما لعبنا ... بالحق نحكي خليني نمشي ...

- مستحييييل نخليك تمشي ...

- اناني و تحب روحك إنتي ...

هو يقربلها و هي تبعد .. تفكرت أيامات قبل .. كيف كان يضربها .. بكل غل و وحشية .. و هي تصبر .. صبرت لدرجة فاقت الخيال ..معادش اتنجم للصبر حدود .. ملت ... !

- أسمع هيثم ابعدني .. كان بش تضرب حتى أنا بش نضرب ... و ندافع على روحي ..




في قلبها تقول وقتاه يوفى هالصراع .. ؟؟ وقتاه توفى الحرب اللي بيناتهم .. عملت كل شي بش ترضيه .. تصوروا هي الي طلبت الزواج منو تخيلوها ؟؟ جريئة في حبها .. ! أما تو الجرأة تنحات ... معادش منجمة تسيطر عالعلاقة ... تعبت ... من الإحساس اللي هي تعطي و ماتخذش .. تهنم و ما يهتمش باها ... بالنسبة ليه سمر مجرد زوجة ... عندها وجبات زوجية ... و لزمها تشبعوا جنسيا ... للأسف برشا كيما هيثم .. معرسين و في قلبهم حب آخر .. و الضحية شكون ؟ هي المرا فاللخر .. أما اللي ماتعرفوش سمر اللي نظرتو تبدلت ليها وقت حس اللي هو بش يخسرها ..منعرش شنية اللي بدلو .. أما هو ولا يحس إحساس آخر اتجاها ...

جبدها من يدها ... حط جبينو على جبينها ... غمضت عينيها ماتحبش تغزرلو في عينيه ... اللي يسحروها ... عسليين .. ذابلين ينسيوها في همها الكل ... ما تحبش تضعف ... حطت يدها على صدرو و بعدتو .. هي تبعد فيه و هو يزيد يكبس ..

- فاااش تخرف يا مهبولة انا معادش نحط يدي أعلييك

حلت عينيها ... و هبطتهم اللوطة ... تغزر يمين يسار المهم ماتغزرلوش ... !

- خاترني حبلة خايف على ولدك ... تي ابعدني عاااد ... تعبتني معاك ...

هبط على شفايفها كلاهم ماكلة .. و هي تفارع فيه و تضرب فيه عللى صدرو ... ! ركحها ... اي هيثم ينجم يسيطر أعلاها ... شوية القوة اللي عندها تهدت ... عدات يدها على ظهرو ... كل إحساس تفاعل معاه ... كلامها الكل طاح فالماء ... ! أما لازمها تسترجع قوتها ... ولات تلهث بقوة المشاعر .. أول بوسة تحسها من عندو ... كانت بوسة طويلة ...! تقطع أعلاها النفس دزتو ... و عدات يدها على شفايفها ... بقاو يغزرو لبعضهم ... ! هزت الفاليز ...

- ما تختبرش صبري .. أمان هيثم ابعد ...

راسها كاسح ... هو يعاند هي تعاند أكثر منو ... حللها الباب ... كركرت الفاليز متاعها و خرجت ... أكيد هو خلط أعلاها بقا يتبع فاها بالسرقة مش بش يسلم فاها ... مستحيل .. !




فاللحظة هاكي كانت أميمة تصارع في وجيعتها ... كل ما تزيد نهار في ها السبيطار كل ما تزيد تتخنق أكثر .. ! كلات شوية ... و مشات إدوش .. دخلت بدبشها ... حلت الماء البارد .. بالكشي يطفي النار اللي في قلبها




الحلقة 29 : ""

خرجت كالفلوسة من الدوش ... دبشها مبلول ... ترڨــل

بالبرد.... دخلتها أعلاها الممرضة مشاتلها تجري ...

- يا وخيتي أعلاه عاملة في روحك هكااا ...

بقات تغزرلها و مسوهمة فاها ... و طرشقت بالضحك ...

- أميمة شبيك تضحك ؟؟؟ أميييييييمة فيييييق ...

دموعها هابطة و تضحك ... لدرجة متناقضة ؟ تبكي و تضحك في نفس الوقت ؟؟

- انتي الممرضة متاعي ... هههه انتي اتنجم تكذب .. و أنا زادة نكذب أعليك و على روحي ... و نقول اللي انتي ماكش اختي هاجر... أما حاجة فيا تقول يزي يا أميمة ... فيييق ...

!

هاجر مشات قعدت عالكرسي تحس في روحها بش اطيح .. تعبت من جرت أختها ... اللي قعدت سنين ..تلوج أعلاها ... و بعد تتصدم من مرض أختها ... و اللي صدمها أكثراللي هي طلعت ميتة في نظر أختها و حتى كيف شافتها عملت روحها ماتعرفهاش ...




أميمة طاحت قدامها شدتلها يدها ... و هاجر في دنيا أخرى ... دموعها هابطة ... و أكهو ...

- صدقني راني مريضة و انتي تعرف ... ساااااااامحني هاجر بربي ساااامحني .. راني نبكي كل ليلة كارهة روحي ... عايفتهااااا ... حاشمة منك و من بابااا و بالأخص امي ...

- أممممك لااااا ظاهر أممممك... هاكي مراا مناضلة ضحات على جالك .. و انتي شعملللللللللت .... ؟؟؟ بشنية كافيتهااا ؟؟؟ رديتها عاهرة .. ماتصلحش ... انتي شوهت سمعة عايلتك .. اللي وقفت معااااااك

- نحب نمممممموت هااجر ... معادش حاسة بالدنيا ... نحب نممممممممموت و نرتاااااااااااااح ... و نرتحكم من همي ... شنعملك بش تسامحني ؟؟؟؟

- فيبالي كيف تشوفني ... ضميرك يأنبك ... أما انتي .. ترمة ميتة .. ! حججججججر ... مناش مخلوقة يا طفلة ؟؟؟ منااااااااش ... حييط راااك باردة ... و زيد كيف تشوفني تعمل روحك ماتعرفنيش ...

- توووحشتك هااااجر ...

جات بش تعنقها دزتها ... أميمة طاحت ... بقات تغزر لهاجر ... و تبكي .. أما شنية يفيد البكاء تو ؟؟؟ شنية يرجع ؟؟ لا يرجع الماضي .. لايصلح اللي تكسر ... شنية تفيد الدموع ؟؟؟ ما تفيد شي .. يمكن ترتح ... أما كان تبقى حياتها تبكي أميمة ماترتاحش .. شنية تفيد كلمة سامحني ؟؟ ... صدقوني ما تفيد شي .. يمكن تحرك المشاعر أما ما تصلح شي ...




خرجت هاجر .. من عندها مخنوقة ... مشات تلم في دبشها يزي ما تمرمدت من جرتها ... كلمت هيثم

- ألووو دكتور

- شفما هاجر ؟؟

- اميمة اعترفتلي اللي أنا أختها

- مؤشر بااهي هذا ... بدات تبرى

- اي ..مهمتي وفات مش هكا ؟؟

- أبقى هاجر غدوة نتفاهمو ...

علقت أعليه ..فادة ...لوقتاه بش تتمرمد ...؟؟ ..وقت اللي كانت هاجر حايرة شنية بش تعمل ... هيثم مازال يتبع في سمر .. اللي هبطت من تاكسي و دخلت لفيلا .. عمرو لا شافها في حياتو زعمة متاع شكون ؟؟ الغيرة عماتو وقت شاف خرجلها راجل ... دخل في حيط .. و قرر يدخل ..! قلبو مقبوض ... دق الباب ... حل ... راجل ... لابس لينات نظر .. تحسو بقيمتو و بقدرو ..!




سامحني شكونك انتي ...؟

جات من داخل سمر تصدمت كيف شافت هيثم ..

- شتعمل هوووني هيثم ؟؟؟

- نفس السؤال موجه ليك للا شتعمل هوني ؟؟؟؟

حست نبرة صوتو تبدلت ... بدا يتنرفز ... شدها من مرفقها و خرجها ... عصااام ماتنرفزشي روحك هذا راجلي

- خاااايفة أعليه لاااااا يتنرفز امشي قدامي .... حسا بك مش هوني

مخلالهاش .. فرصة بش تتكلم و لا تعبر ... هو أكاك هيثم يحب يفرض روحو ... مفماش حاجة اسمها مواساة ... نقاش ... طبيعتو صعيبة يحب السيطرة ... يعني رجل شرقي مستبد .. ! الرخ لا ! كركرها للكرهبة و طلعها بكل غل .. و هي دازة عالبكاء ... الحبالة ردتها حساسة .. و رقيقة و فيسع ما تبكي و تنفعل و اي كل كلمة تأثر فاها ... قبل كانت الصبورة .. الصامدة تتمزبل تاكل على راسها ... تبقى ساكتة و ما تهبط حتى دمعة ... !

- شبييييك يخي هبلت ...

- سكر فمممممك ما تزيدني حتى كلمة ... طحااان أنا قداااااااااامك ماشية لدار راجل ... شكونو هاكااااا ؟؟؟؟

- خليني نفسرلك

- ما تفسرلي شي ... قتلك ... !

- لاااااا بش نفسرلك و بش تسمعني ... يزي ما سكتلك ... شنية تسخايلك روحك ... الدنيا ادور أعلييييييييك ؟؟؟ الدنيا تاقف أعلييييييك ... شكونك انتي ؟؟؟؟ ...

- أنااا راجلك و من حقي ...

قصت أعليه ... تصيح

- من حققققققققققك ؟؟؟ و أنا حقوقي وييييييين ؟؟؟ عمركشي حكيت أعليييييييا ... أنا وين في حياتتتتك ... ! حتى شي أنا ... اثاث فالدار كيفي كيف التلفزة و الفريجيدار ... أنااااااا مانسوى عندك .. .. مرمدتني ... هكا اللي ريتني معاه خويا ... يا هم ... خويا ... من لحمي و دمي ..

- مانعرفوش

- أكيد ماكش بش تعرفو ... خاترك ماتعرف اعليا شي .. أعلاه معرس بيا ... ؟؟؟

- انتي اللي طلبت العرس ..

- خاترني نحبببببك يااا هم ... أما انتي ماكنتش مضطر توااافق ....

- حتى أنا نحبك ... سمر !

- هههههه مريض بالكذب باز انتي ... تحبني نصدقك ... ؟؟؟

- اي بش تصدقني ...خاتر بالحق تحبني

- في ليلة من نهار هبط أعليك وحي الحب ... و وليت تحبني ؟؟؟ ههههههه نكتة هاذي ...

كانت تضحك ..حتى دمعت عينها و هو مصدوم فاها لدرجة هاذي مش مصدقتو لدرجة هاذي تستهزئ بحبو ... أما هو نسى ..اللي هو استهزئ بحبها ليه ... و في عوض ما يبادرها بالإهتمام و أقل حاجة الإهتمام ؟ عفس فاها و مرمدها ... حطمها ...

- لدرجة هاذي كلمة نحبك تضحك ..؟؟

- اي منك انتي يا هيثم تقتل بالضحك ...

جات بش تحل باب الكرهبة .. شدل ها شعرها و دورها ليه ...

- مازلت ماكملتش كلامي ؟؟؟

- سيببببببني يا هم ... وجعتني ... ريت كيف نقلك تكذب ... كلامك و أفعالك متناقضين ... سيبني ....

بقاو يتعاركو ... لين تعبت تهدت .. تكات على كتفو ... من التعب ... هي أكاك ك ما يتعاركو تحمي روحها منو فيه ... تشكيلو همها ...منو ... تفرغ قلبها ليه ... تلتجئلو وقت حزنها و هو سبب حزنها ... حتى دموعها يمسحملها وقت هي بكات بسببو ... !

- ارجع معايا .. سمر ..

حطت يدها على فمو .. باسها حست بكورون سرا في بدنها ...وجيعة في قلبها ...

- اششش نحب نرتاح خليني .. نرقد ...

- باهي نرقدوا في بيتنا ...؟؟

- لاااا هوني ... بش تهرب مني بش تمشي للسبيطار و تخليني كالكلبة ...

- لااا لاا نبقى معاك صدقني ...

- بش تبهدلني مرة أخرى ... خليني نرجع لخويا ... بربي .. أرحمني ...

- انتي الي طلبت العرس ... تححمل مسؤوليتك

- بربي سي هيثم ؟؟؟

- هههه ...

ضحكتو سحرتها أول مرة تحسها من القلب ..




- شبييييييك هبلت ..؟؟؟ شكونك يا سييييد




الحلقة 30




- نمشي نجيب الفاليز و نجيك

مصدقش كيف ركحتلو .. أما هي مش على روحها ماتحبش ولدها يعيش بلا بو .. تحبو يتربى بين امو و بوه .. حست هيثم من نظرة عينيه الي هو تبدل .. و بش تشوفو تو يحبها بالحق ولا لا .. و هي تعرف شنية بش تعمل ... في قرارة نفسها عارفة شنية الحل خاطرت ... بش تحمي حبها و مستقبلها و ولدها ... بش تحمي اي حد ينجم يفسدلها حياتها .. تو بش تشوفو يحبها بالحق ولا مجرد كلام نطق بيه ... رجعت لدارها و بدات فالخطة .. !

- حبي أنا تا نجي ..نمشي لجارتي فيسع و نجي

- اوكي .. هاني هوني أنااا ماطبتاش




هزت ساكها و مشات لسبيطاااار ... و تخمم كيفاه بش تجبدلها الموضوع ...




لظتها كانت أميمة عايشة في حالة من الهستيريا ... كسرت اللي يعرشها فالبيت .. المراية .. الشبابك ... حالة من الجنون النفسي تملكها سيطر أعلاها بكل النواحي .. هي لاهيا تتبدل تتصلح .. هي لاهيا تبرى أما أعلاه الكل يطفيو فاها ؟؟ أعلاه مش مصدقينها .. مشات نحات الفرش ة=و طيحتو فالقاعة ...

- اععع حلولي الباااااااااب ...

مشات لباب تضرب فيه بيديها و ساقيها ... عايشة في فوضى عارمة .. يا للهول ... ! مش منجمة تسيطرت على روحها ... لحظتها غيث رجع للبيطار معادش ينجم ... مش مسيطر على مشاعرو ... كيف راها فالحالة هاكي .. يمكن حن .. سخفتو... قلبو وجعو أعلاها... عرضتو سمر ..

- وين ماشي

- ابعد من قدامي ... ! بش ندخللها و نخرجها

- شبيك هبلت .. تخالف فالقانون انتي ..!

- انتي شتعمل هوني من أصلو ؟؟ مصرة تعذبها ؟؟

- لااا أمان ماتفسدليش الخطة

- خطة متاع شنية

- أنا انجم نعاونها بش تبرى ...

من جرة مرض أميمة الشعب الكل ولا يكذب .. غيث الدغفة فيهم.. ! الكل تكذب ..و مسكين يصدق ..خلاها تدخل خاترو يحب أميمة تبرى...




دخلتلها ..كيف شافتها أميمة مشاتلها تجري

- أسمع سممممر هاني قتلك .. أنا معادش انجم نزيد نمثل راهو ... تعبت .. عيشتوني في ستراس حسيت روحي مريضة بالحق ..

- أمااااان أصبر .. معانا

- لاااااااا بش نهبل .. أنا لاباس أعليا ..مرضني .. ماحشتيش بالفلوس .. أنا حبيتو غيث

- لازمو يبرى .. غدوة تكمل الخطة أمااان ..أعمل اللي نقلك...

- كرهت حيااااااااتي هوني نحب نخررررررررج من هوني تخنننننننننننقت

كان يسمع فاها تصيح .. دخل في حيط ...فد ..تخنق ..حل أعليهم الباب .. تفجعو الزوز ... شنية صاير ؟؟؟ راسو وجعو .. حس بغمة في قلبو ...

- أميمة شبيك

- لازممممك تعرف الحقيقة...

شدتها سمر ... مكبشة فاها ...

- سيبني سممممممر ..خليني نحكي تعبت ..بش نموت هوني ... راحة بالي قبل كل شي .. شوف غيث ...

قص أعلاها ...

- سامحني أميمة سااااااامحني ... من جرتي ردوك مريضة .. من جرتي أختك كرهتك و خوك زادة ..

- فيبالك ؟

- اي فيبالي أنا فقت على روحي .. سامحني ... عمري لا تصورت بمرضي نوصل نظلم بنية معايا ... بنية كيفك ..

سمر كبست على يد أميمة من الفرحة عينيها طفت من الدموع...

- أميمة خطتنا نجحت ...

أميمة طاحت فالقاعة .. و أخيرا الكابوس بش تفيق منو .. أما هي حبتو ...




الحلقة 31 ""




أميمة لحظتها تفكرت شصارلها أول نهار هبطت هي و أمها و بوها .. من المطار .. عايشين في أمريكا عرضلها أنيس و هاجر ..

- توحششششششتكم

تعنق و تبوس عتندها برشا ماراتش خواتها ... جبدتها هاجر على جنب

- وليت نخدم ممرضة

- مببروك لأختي

- طلع شكون مولا السبيطار ماكش بش تصدق ..؟؟

- شكون ؟؟؟؟

- هيثم

شدت راسها...

- أفففف راسي يوجع فيا تو مش وقتو ..

- فيبالو اللي انتي جاية برا امشيلو خير ما يجيك يكركرك ..

- أنيش فيبالو ؟؟؟

- اي تي فيبالو و يغزل أعليه ...

- السخطة في كل بلاصة نلقاه هذاااا ؟؟؟




أميمة ملصت روحها .. من عايلتها ... جابت ألف حجة ... و مشاتلو للمصحة ... آه و أخيرا بش تكون المواجهة قاسية و عنيفة .. خذات نفس و دخلت للبيرو متاعو ... كيف شافها ضحك على جنب ... نفس الضحكة المستفزة .. وقف و جا مقابلها .. و كتف يديه

- هههه اميمة جات بساقيها ..

- -_- ... هاجر قتلي حاشتك بيا

- ريت الصدفة .. أختك طلعت تخدم هوني

- اي ..نعرف ..

- مش كنت تحلم بيه السبيطار هذا ؟؟ تحلم الي انتي تبني كيفو

- اي و مازلت زادة .. انتي تعرف اللي أنا مكملة قرايتي في الطب النفسي ..

- شقولك تولي شريكتي ؟؟

- ههههه شريكتك؟؟؟ مستحييييييييل ...

- أعلاه ؟؟؟ بالرغم الي أعملتو فيا ..مازلت عاطيك فرصة .. و قتلك تولي شريكتي .. ننفكر شعملت فيا

- الله غالب مكتوب .. ! ملتفاهمناش ...

- أنا حبيتك أميمة.. أما أنا معرس تو

- شنية مشكلتي أنا ؟ هاذي حياتك الشخصية

- قلي؟؟ ياا تولي شريكتي يا طبيبة هوني

- شنية بش تستفيد انتي بوجودي أصلا ...

- خويا مريض !

- شنعملو أنااااا ؟؟؟ وااااه ربي يشفيه

- انتي بش تكون طبيبتو و تبريه ... أميمة أنا معمل أعليك .. خويا في حاجتي و أنا نعرفك بش تكون طبيبة ناجحة .. نخليو مشاكلنا على جنب و نتعاونو في مساعدة انسان مريض ... محتاجلنا

أميمة تأثرت بكلامو و وافقت .. و يااا ليتها ما وافقت دخلت في متاهة وصلتها للمنظر أذاكا للحالة هاكي ... فهمت من هيثم اللي غيث مريض بالكذب مش كا أي كذب عادي ... كذب يخليه يعيش كذبتو حقيقة ... يعيشها بتفاصيلها الصغيرة .. هيثم اقنعها بش تلبش الشخصية هاكي ..كان متأكد اللي خوه بش يحبها خاترها تتحب ... أميمة حاولت تفهم منو كيفاه بش تتقابل مع غيث ... فسرلها اللي هو بش يبعثو و يحكيلو حكايتها ... و اللي هي جرحتو و كذبت أعليه .. و أقنعو اللي هو يحب ينتقم ... حط أميمة في دار مقابلة الكلينيك .. بش تكون العملية ساهلة .. حتى من سمر شاركت فالكذبة .. أما الحقيقة الوحيدة اللي هيثم ما يحبش سمر .. وقتها .. التمثيلية هاذي ساعدت الأطراف الا اميمة ... اللي تخنقت و مازالت طايحة فالقاعة ... كيف شافها غيث فسع ...هرب مايحبش يحس بالذنب ... بقى يهوم فالشوارع ... هو السبب فاللي صايرلها الكل .. حتى هو مريض كان مقتنع اللي كل شي صايرلها هو عاشو أعلاه ماخممش للحظة ممكن تكون تمثيلية ؟؟؟ تفكر كل شي .. وقتها كلم خوه على أميمة




الحلقة 32

- يا غيث راهي تسكن مقابل الكلينيك .. كيف ريتها تفكرت مواجعي .. غدرتني خانتني ... شنعمل يااا خويااااا ؟؟؟ نحب ننتقم منها ...

- كيفاش تحبني نعاونك ؟؟؟




من وقتها بدا و أعمل روحو هارب من الكلينيك ... كل شي كذب ... حالة من الجنون عاشوها الشخصيات كل التفاصيل كانت تمثيل ... حتى من الجيران .. و البوليسي و التصويرة .. زادة مجرد كذبة بيضة ههه ... إحساس من الفوضى الداخلي عاشها غيث ... وقف قدام دار خوه و هبطلو بش يواجهو ...

حل الباب .. دزو

- ياا أخي كيف تحب تبريني ... تعمل فيا أكاك ؟؟ تخليني نحبها ؟؟؟

- حتى هي حبتك .. الزوز حبيتو بعضكم ...

- شمعناها ؟؟

- كلنا استفدنا من تمثيليتك و تمثيليتها

- و انتي المخرج سيادتك ؟

- أي اتنجم تقول أنا المخرج ... انتي و أميمة ازوز مثلتوا على بعضكم انتي بريت .. و فرحان اللي انتي استعرفت .. خويا الغالي و أخيرا بريييييييت

- لحظة ... دخلت في حيط راني .. حاسس مخي تحرق ... تعرف شمعناها مخي تحرق ... أميمة شكونهي ؟؟

- طبيبتك ...

- و عملت هاكا الكل خاتر طبيبة ؟؟ أكيد بش تعطيها فلوس على الدور الرائع

- حتى إنتي خذيت فلوس على الدور الرائع و العظيم اللي قمت بيه ...شوف غيث مانتبهنسوش على بعضنا ...أنا خسرت اعليك ملايين بش نبريك و كانت الخطة ناجحة ..امشي لأميمة و صفي قلبك و أشكرها كانت عندها انسانية كبيرة ... توصل انتي تشد فرش المريض المهبول .. و يزرقولك و تعمل إضراب جوع و تخمم الإنتحار في جرت مريض ؟؟؟ ترضى ؟؟




لحظتها رجعلو شاهد العقل .. بالرسمي .. هي ضحات ... عملت اضراب جوع .. تخنقت فدت .. أما حس بمشاعرها صادقة ...

- عندي سؤال هيثم ... ؟؟ انا اعلاه كنت مريض ؟؟

- نفس المرض اللي مرضت بيه أميمة ...

- لا أنا أكيد عايش في كابووووس ... كوشمااااار ... مستحيل نكون عايش ..أكيد في حلمة مطولة

- لا انتي عايش ...

- شبيني ما نتفكر شي ؟؟ مانتفكرش اللي أمي خانت بابا ... و اللي خويا قتل أختي ؟؟؟؟

كيف نطق الجملة هاكي وجهو تقلب ...

- شوف هيثم .. أميمة قالت اللي أمها خانت بوها ..معناها أمي خانت بابا

- اي

- و أختي شلقت باها

- اي

- يخي أختي حاولت تهدد أمي الي هي بش تحكي لبابا كل شي ؟؟؟

- صحيح

كان يحكي و يرعش ...

- يخي أمي مشات طلعت كذبة ... و قالت الي أختي ماتصلحش

- صحيح ..

- يخي خويا مشى قتل أختي




- صدقني كانت حادثة .. منعرش كيفاه دزيتها ..كيفاه طاحت من البلكون ...مجرد حااادث ...




غيث شد راسو و طاح فالقاعة وجيعة كبيرة حسها ..

- شبيني ناااااااااسي كل شي ؟؟

- جاتك صدمة ..

طبس أعليه هيثم يرعش كان عارف بش يوصل للمرحلة هاذي و تتقلب الطاولة و تتكشف الأسرار ... كان عارف بش يوصل يواجه خوه بالحقيقة المرة .. غيث مازال شادد راسو ... شريط حياتو تعدى بين عينيه .كيفاه كان ناسي .. تفكر أختو البريئة .. و خوه القاتل اللي قدامو ... شبيه كان ضعيف و ماسيطرش على روحو

- انتي قاتل ...

- صدقني حادثة .. مانحبش نخسرك كيما خسرتهاااا




الحلقة 33

وقف غيث ... و هز روحو و خرج و هيثم يجري وراه ...

- غيث استنى أمااان .. صدقني حادثة ماكنتش نتوقعها بش اطيح ...




غيث ركب فالكرهبة و فسع كان محتاجة يبقى وحدو يرد الصدمة اللي كلاها ..مازال ألف سؤال يدور في مخو ... الماضي رجع و دق بابو ... مش حتى دق ... خلع بيبان حياتو و هجم أعليه من الشيرات الكل .. ماضي معبي وجيعة و صدمات .. كيف شاف اللي يحبها فالحالة هاكي .. فاق على وضعو .. و أغرف كل شي ..حس باللي هو من جرت مرضتو ظلم برشا ناس معاه ..اي هو يعشقها .. طبيبتو ! خبات أعليه أما نقذتو من دوامة ... متاهة لا خروج منها ... مايحبهاش تتدخلها ... كيما نقذتو لازم ينقذها بدل وجهتو لكلينيك ... وقتها كانت أميمة تبكي و سمر تواسي فاها ..

- اشش عيش أختي أكهو كل شي وفااا

- مخنوقة .. نحب نرد شوية هواء .. كرهتها البيت هاذي .. سمر زعمة أنا هبلت ؟؟

- لا انتي أقوى أميمة انتي طبيبة ناجحة .. فيبالك بش يكرموك .. نجحت بش اداوي أخطر حالة فالكلينيك ...

- برى هو و أنا اللي مرضت .. تعرف شنية نحس وقت تسكرو أعليا الباب ..نحس روحي في قفص .. حتى الإنتحار اللي كان مجرد تمثيل أنا خممت ننتحر بالحق

- لا اللطف أعليك .. تو كل شي وفا و اللعبة وفات .. و انتي حققت نجاح في خدمتك ..

- نحبوووو ... نحبووو برشا سمر ... تعرف الإحساس بالوجيعة .. لازمني طبيب نفساني

- ههههه داوي روحك

- تتمقعر أعليا .. زيد أضحك عاد انتي ..

- عجبك دوري كيفاه طلعتلك

- تفجع اووووه ...و كيفاه طالعتلي كيلو فرينو في وجهك ..

- أمان عاوني أميمة

- برى عاااااااااد ت واش بش يسلكها ... حتى معاون روحي

سمر شدت أميمة من يدها .. كانت بالحق محتاجة ليها ..

- عاوني أميمة .. عيشك

أميمة حستها بالحق محتاجتلها ...

- ربي يثبت أجري ... ربي يصبببببرني من العايلة المجنونة اللي طجت باها ... تفضل للا كيفاه نعاونك .. يطلعشي راجلك هيثم هو المريض .. و لا انتي ؟؟؟ نعيشوا و نسمع ... الكل المرضة ؟؟؟

- تي أسكت خليني نفسرلك اوووه ... نحب نتأكد اللي هيثم يحبني ... و انتي اللي بش تخليني نتأكد

- أسمع كذب لا ... ماعادش نحب نكذب ...معادش نحب نمثل ياا ديني توحشت نكون انسانة عادية ...

- عيشك اخر تمثيلية يفرحك ..

وقتها دخل غيث .. أميمة من الفجعة وقفت ... قداش توحشتو ... قداااه تحبووو السخطة ... مش مصدقة اللي هو تحسن و برى ... اما اللي مش متأكدة منو حبو لها في قلبها تدعي يطلع يحبها ياا رب يطلع مشاعرو صادقة ... سمر خرجت و خلاتهم .. كان موقف صعيب بيناتهم أول مرة يتلاقو في حقيقة .. في موقف ما يعرفوش كيفاش يتصرفو شنية يحكيو




الحلقة 34




قربلها و حاسس روحو في قمة التوتر ..

- انتي لاباس ؟؟

مشاتلو تهرول ... شدتو من وجهو و تثبت فيه ...

- شصااارلك وين مشيت ؟؟؟

- نحب نقلك عيشك .. كنت طبيبة ناجحة و عاونتني ... أنقذتني من اللي أنا فيه

تصدمت من كلامو فيبالها بش يقلها على مشاعرو .. أكيد طلع يكذب ماحبهاش ..شنية تتوقع من إنسان مريض .. سيبتو و وخرت خطوة لتالي ..حست بدوخة ..شدت راسها .. هي بعدت و هو جبدها ...

- محلااااك ... منعرش منين نبدالك .. أما انتي مش مجرد طبيبة بالنسبة ليا ... انتي كل شي .. انتي مليت الفراغ اللي كنت حاسو .. تخليت عالغموض متاعي و أنا معاك ..كنت مانقرب لحتى أنثى .. خليتني نبات معنقك ...

ضحكت ضحكة تبين قداشها فرحاااانة من كلامو...

- أنا نحبك أميمة .. مش مجرد حب عابر ... انتي اللي رجعتلي الضحكة .. سامحني من الحالة اللي عشتها من جرتي

- ههههه

كانت تبكي و تضحك .. و أخيرا هاذي النهاية اللي حلمت باها ...مسحلها دموعها ... جبدها و غرسلها وجها في صدرو .. و هي مازلت تضحك .. هبط لرقبتها دزتو

- لاااااااا ...

- هههههه ماتخافش مانوجعكش

- يزي احشم ... اصبر على قسمك ..

- باهي شنية بش نعملو مع سمر و هيثم ؟؟

مش مصدقة اللي هو يخمم في خوه ..

- هيثم ؟؟

- اي خويا

- مازلت ماتعرفش هو شنية عمل ؟؟

- نعرف من قبل .. هو ما قتلش أختي كانت مجرد حادثة .. أما تو نرجعلو .. من بعد حبيت نهبلو

- لا انتي تكذب مرة أخرى ..خليتو فالحالة هاكي و جاي ... نورمال ؟؟ كان يعمل حاجة في روحو

- تي طبيب شنية بش يصيرلو بربي .. تو قلي كيفاش سمر بش تتأكد اللي هيثم يحبها ..

دخلت سمر وجها أصفر و حالتها حليلة ...

- شبيييييك سمر ؟؟؟

- هيثم مات .. ضربتو كرهبة ..

طاحت فالقاعة .... حالة عينيها من قوة الفجعة ... مشاتلها أميمة تجري ...

- سمممممر لااااا مستحييييل

غيث لحظتها ...ماصدقش مش عارف شيعمل ...خسر خوه ؟؟؟؟ مستحيييييييل ....

- كلو منك يااهم ...مخلي خوك أكاااك وجااااااايهااااااااك خسرتو ..

" خسرتو " الكلمة اللي بقاتلو في وذنو ... يجري و يقول

- ماخسرتوش لا




حلقة الأخيرة

يجري فالكلوار شاف خيال من بعيد ... تصدم ... يمشي و الخيال يقرب ... كان في هيئة خوه ... يجري و يعنقو

- أعرفت روحي ما خسرتكش ...أعلاااه شعمتتتتلك ؟؟؟

- بش تتعلم ماتكذبش أعلياا

- بااهي أنا كنت متفكر كل شي معادش نكذب ... صحيح انتي ماقتلت حد ..

- حتى التمثيلية اللي عملناها تثبت اللي أنا مش قاتل نسيت اللي أميمة ...قالت اللي هي كذبت حتى في حكاية موتت أمها و بوها و أختها

- باااهي وينهم تووو ؟؟ توحشتهم

- غيييث كان مازلت تكذب .. صدقني نحبسك فالكلينيك ... ماتخرج منو كان شايب ...

- بااااااهي ...معادش كذب ... معااادش ...

- امشي تحرك بوك و أمك و أختك توحشوووك ..

- أمي تسامحني زعمة ؟؟؟ انتي مسامحني ؟؟؟ هيثم تكلم

- كلنا مسامحينك .. انتي تعرضت لصدمة و انتي صغير .. مش ساهل انسان يتقتل قدام عينيك ... أعز اصحابك ...

- الله يرحمو .. كان عزيز أعليا

- عاذرينك ... أما تو الرخ لا صاحبي .. نسيت اللي خوك طبيب .. معناها هكا و لا هكا .. بيتك فالكلينك تستنى أنا متأكد اللي انتي بريت ... صاحبك مات ..هذا عمرو ..أعلاه بخيالك تقتل الناس الكل ...

- أكهو ماضي و تعدى ...

جات أميمة و سمر .. يضحكو ا

- تضحك للا سمر برافووو شاطرة فالتمثيل

- عاد انتي المعلم .. فالتمثيل

- ههههه

بقاو يحكيو هو سمر و قدموا .. أميمة جبدت هيثم

- نعم أميمة .. شفماا

- أنا نحبك

- هههههه أكيد عمايل سمر هاذم

- واااه كيفاش أعرفت ...؟؟

- نسيت اللي أنا طبيب .. نفهمها و هي طايرة و زيد انتي تمثيلك تاعب برشا مالا

- انتي تحبها ؟؟؟

- أكيد .. نعشقها ...

غزر لجيهة سمر و اضحك ...

- شبيك تضحك ؟؟

- تعرف .. يمكن يكون حبي لسمر مش واضح أما حبك لغيث واضح برشا ... معناها .. كيف تجي تقلي نحبك حسيتها بلاش روح ...

- و انتي صدقني حبك ليها واضح ... سامحني على الي صار فالماضي

- أنسى .. أنا سامحني خاتر مرمدك معايا .. نشكرك على مجهودك كا طبيبة ... عبقرية انتي .. أعرفت تنجح فالمهمة ..

- خرجت بحاجة فاللخر ... غيث ..

تبسموا .. و كل حد مشى في ثنية ... أميمة شدت يد غيث ... و هيثم شد يد سمر ... الرباعي المجنون ... ههههه