عندما يعشق الشيطان الجزء الاول

من الحلقة 11 إلى 44

<<الحلقات السابقة ( من 1 إلى 10 )

(حطوااا جااام قبل ما تقراااو)

الحلقة 11:

رشق مرافقو الزوز على الطاولة و كبس كفوف ايدو في بعضهم

-شوف كلمتين انا مستحيل نولي منكم و فيكم و كان قعدت معاكم مش محبة فيك ولا على سواد عينيهم على العباد نوليشي علكة في لسانهم و يقولو قطع اهلو على خاطر الفلوس.. ولا سامحني انتوما تحبوني هكاكا مالحيط ؟ مانيش سيدي تاتا راني فهمت؟ و راكم باللي سمعتو ب عمايلي ما تتخيلش مصايبي ماترانيش ساكت تي شخلاكم تقدسولي كان مش فلوسي سيب عليك يا حاج

-سكر فمك والله لا تحشم ولا تقدر زايد شباش يجي منك

-ههههههههه ضحكتني يا شيخ (تقلب و نبرة صوتو تبدلت هز صبعو في وجه جدو) رد بالك مرة اخرى تتجرأ تتهددني ولا حتى تعلي صوتك ،،صارت مرة وريت النتيجة كحرقتلك الفيلا و الشركة المرة هذي نحرقلك قلبك..

ضرب عالطاولة خلاه و مشى قعد جدو يتبع فيه العمر يجري و الموت حق النهار السعيد ليحن فيه قلب جاد و يرجعلو يفرح بيه و يشوف اولادو قبل منامة عينو اما ههه وقتاه و هالجبل شباش يهدو و يححنن قلبو علينا..

الجماعة قاعدين

-احمد: بابا انا قايم مروح جيب انت امي و الجماعة

-هانا مروحين الكل كلمهم يخرجو

-مجد: ايا على خير ،الاولاد نشالله في قعيدة اخرى اما جماعة الثلاثين فما فوق بلاش بيهم خير يا خويا ممرقهم فسدوها القعدة بخنارهم(يفدلك على خالو يتمعنى عليه)

محمود كوم كوا تغشش

-لا محسوب شوف اك القعدة برا وليد اختي روح لا نستبلا فيك😅

-غسان :اوكا من توا افهمو رواحكم يا صاحبي نفسونا شوية و وسعو بالكم و حلو مشاكلكم اما بعيد علينا ما ادخلوناش في مصايبكم خلونا رايضين و زيد جوكم مش جونا😉

-عادل يضحك : قوم قوم خويا العزيز معرفتش نربيك يا فرخ و جاااااك عطاه قفدة😂

-محمود: يراكم بايرين نشاالله لا باش عرستو و لا عمرتو ديار ههههه قولو امييين

-الاولاد :لالا مش باهي الدعا يهديك استغفر مولاك الا المستقبل صحوبة هني علينا 😂😂

-فيصل:ههههه والله و عطيت هالهم لا تقرا لا تكتب يا خويا لعبتلهم عالوتر الحساس ههه..ايا على خير

من غدوة:

روح مالفوتينغ عمل دوش هبط فطر قعد في الصالة نشر دوسيات عالطاولة قدامو حل البيساي و غطس فالخدمة يشوف في اوظاع الشركات، ثاني نهار ليه في تونس يزي لازم يرجع يخدم..جاتو اسيل تنفخ😤

-مللي جيت مارق فيا يا البرا يا في سويتك لاهي اعطي كلمة و خوذ كلمة يا ديني

-مش مارق فيك اما انت تحكي برشا و كلامك ما يهمنيش و انا ما عنديش مخ و وساع بال لهداريك الفارغة

صحيح اسيل ربتو اما عمرو ما حسبها امو ولا حتى كيفها ديما اكثريت حواراتهم يا كلمة و قص والا هكا بالنبز.. دخلت ايثار

-السلام عليكم

هز راسو شافها و رجع لكوم الاوراق لقدامو اما مش يرا في شي تركيزو ضاع مع دخولها تفكر حالتها البارح كيفاه و تصنعها للقوة قدامو رغم الضعف و الانكسار لشافو في عينيها..

-اسيل:يااااا شرفت للا كنت نستنى فيك تقوم باش نجي نخدم حظرة جنابك (ولت تصيح)في بالك قداه الوقت للا توا؟

-سامحني مدام اما مانيش موخرة في خدمتي جيت بكري نظمت فيلا كاملة تبقات بيتك انت و البنات خاطر ما تقوموش بكري رجعت بقضية للدار و هاني جيت

-سكر عليا لا حلو مازالت كان فرخة كيفك تجي تؤمرني شكونك اصلا راك جرد خديمة عندي.. اعتبرو انذار هذا .. تحرك من قدامي الهم هذي😡😠

-ايثار :حاظر مدام

مشات ايثار بكل هدوئ مش عاملة حساب لكلام اسيل

كان عامل روحو مركز في خدمتو اما هو عاطي وذنو ليهم يغلي دخلاني

-هالمخلوقة حرت فيها بعد كل التمزبيل و البخس هذا الكل و الصياح ما تحركتلها حتى شعرة لا وجها حمار لا بكات لا حتى ضهر عليها انها تقلقت من كلام اسيل و زيد كملت خدمتها ولا على بالها بالطقس كان انا و حق ربي يحكي معايا حد هكا بالازمة نكون دافنو من غير صلاة،، قاطعتلو اسيل تفكيرو

-جاد تو انت رجعت لتونس و عندك الخير ليخليك تشري الدنيا باللي فيها اما ناقصتك حاجة

-و الي هيا؟

-المرا ووه

يقلب في الاوراق كأنو الكلام مش موجه ليه هو

-ما تكملنيش و ما تهمنيش

-الناس تحكي عليك و يتمنو يشاركوك حتى في وحدة من الشركات انت الوريث الوحيد لاملاك الياس و الوحيد لعندك فيهم الحق املاك امك متاعك وحدك عمامك مش باش يطالبوك فيها و حتى كان طالبو ما عندهم ما ياخذو و زيد مش ناقصين لا اسم ولا شركات و لا فلوس..نقول كان تتقرب منهم شوية تزيد تكبر قوتك و يعلا اسمك اكثر،،،و العباد ما يقولوش جاد وحدو و ما وراه حد بالعكس وقتها يعملو الف حساب ليك و لاعمامك و بالذات جدك باسمو و معروف الناس الكل تحترمو و تقدرو

-اسيل فلقتلي راسي هات شتحب مالخر

-ارخف شوية و تقرب من جدك اكثر صدقني وقتها حد ما يقلك لا لتطلب تاخو و هكا تضمن بايك في شركاتهم زادا

-وبعدو؟؟

-عرس

قام من بلاصتو و وقف قدامها

اسمعني مليح كلامي ما يتعاودش،،صحيح انت لربيتني و عشت معايا في الغربة و تحرمت من بناتك في جرتي هذا الكل على عيني و راسي مش ناكر جميلك اما انك تعطيني اوامر و تسيرني على كيغك و على زي مخك هكا نتغشش وانت اكثر وحدة تعرف غشي وين يوصل😉

غمزها و طلع في الدروج ماشي ل سويتو..

(حطواااا جاااام قبل ما تقرااااو)

حلقة 12:

دخل لبيتو يحس في روحو فارغ من داخل متجرد مالمشاعر انسان بارد ما يحس بشي هز التليفون و كلم ايهم😶

-اا شعمتلي فللي قتلك عليه؟؟

-و عليكم السلام انا حمدلله سافا صحتي لباس😂😂

-تعرفني نكره المقدمات😐

-اي نعرف و نعرف الطبيعتك الزفتة يا زفت،،اماالله غالب😆هاني خالط صحوبة ايامات و نكون في خليقتك

-لحظة لحظة،،جاي؟؟معناها طلقتها سياي؟؟

-ههه اي مسكينة مصدومة كل بعد نهارين تجي للشركة تمزبل الخدامة و تروح شايحة تحب تقابلك😁

تمد عالفرش

-قلهم يخطفوها يهزوها لبلاصة بعيدة خلا و قفار خوفوها اما حد ما يقربلها مالاولاد باللي يكون عشرة ما تهونش 😏..

كمل كلامو و ديراكت علق عليه رمى التليفون بجنبو هو غمض عينو قد قد و الباب دق..قام مستغرب

-شهالهمجية الزززح ياخي ما يعرفوش لباب يتحل بالكارت؟ و زيد نبهت عليهم الف مرة لا هم يقرب امها الشيرة هذي😡😡

حل الباب لقاها هازة مواد التنظيف،شهقت و تفجعت

-ياخي ةين نتحرك نلقاك في خليقتي انت الصير يا ربي

ركز يدو عالباب و هز حاجبو

-انت لسانك طويل حبل ماشالله يعمل كوردة و ما تتربى كان كيف نقص هولك..

- الكوردة لتحكي عليها باش نشنقك بيها ممسطك حصيلو😒😞 اسمعني نقلك حاجة.. لا نعرفك و لا يهمني امرك من اصلو مللي جيت هنا حكيت معاك مرتين و لا 3 و قدهم ريتك و بالصدفة، و انا جاية نخدم في خدمتي مهمتي انظف و نمشي على روحي و توا كان تسمح اخرج من فضلك و اعطيني الكارت خللي نسترزق على روحي😌

طلعو الدم قريب يتطرشق

-شنوا هالوقاحة لفيك انت ملا فرخة..(قربلها)اما انا نربيك

شدها من يديها و جبدها لداخل بالقوي و سكر الباب و من قوة الجبدة جات طايحة في القاعة

-فاش تعمل شتحساب روحك ياخي حل الباب نحب نخرج

بدا يقربلها ناوي الشر

-اشششش مذابيك لسانك تبلعو و تقعد ساكتة

خافت ايثار ظاهر مش باش تتعدى على خير هالحكاية

-حل الباب لا نقلب عليك الدنيا بالصياح

-صيح عيط كسر قد ما تحب الباب عازل للصوت و زيد على هذا البيت في طرف الفيلا ما يسمعك حد

بدات تبكي و تصيح كل ما يقدملها تجبد روحا التالي.هزت صبحها في تنبه فيه

-ابعدني يا واطي ماكش را....

قص عليها كجبدها من ايديها قيمها جات في حضنو لاصقة فيه كمل جبدها من وسطها لصقها فيه الوجه في الوجه

-رد بالك تهددني و الصبع لتهز توا في وجهي نقص هولك كان تتعاود ندمرلك حياتك

-دزتو :ابعدني خاف ربي

دزها عالسرير و جبدلها حجابها نحاه في لحظة عينو تعمات و خرج الشيطان لغيه

-علاه الزين هذا الكل مدفون لازم نحيروه شوية اه؟؟

ايثار دخلت في حالة هستيريا و بزربة تحاول تلم روحها اول مرة تتعرض للموقف هذا و تتحط فيه

-ساقط مكش راجل نقتلق كان تقدم خطوة اخرى

-بهيمة كنت تنجم تقرق بيا و تطلب السماح و ممكن نسيبك وقتها اما انت طولت لسانك معايا و باش تتكلفلك غاليه صغرونة بكلامك زيد لعبت مع الشيطان..

قامت من شيرة الفرش لخرى تتصيح و تتحدا فيه

-تحلم كان نقرق بيك نجوم السما اقربلك ،،تذبحني ولا نذل روحي لواحد كيفك عععععع

جاد جهل لا عاد متحكم في اعصابو ضبابة على عينو ما يرا في شي هد عليه جبدها ليه بقوة قطعلها جلبابها بوحشية فاق على وضعو مصدوم كشاف بدنها الابيض شفق على حالو ركز معاها وهي بين ايده كانت تحاول تغطي بدنا لبان شطرو عقد حواجبو و رماها عالفرش متقزز يحاول يسيطر على مشاعرو لتهزت كيف شافها

-مكش نوعي المفضل اما نربيك بطريق اخرى

لتو مغمضة عينها تلم في روحها متحبش ترا تعابير وجهو وهو يخزرلها ،خرج مالبيت و سكر عليها الباب هكا يكون من روحو من انو يرجع يكمل لبداه.. وصل ل الشركة شد بيروه خدم شوية ما نجمش يكمل،،ما نجمش يمنع روحو اكثر من هكا و ما يخممش فيها رمى ضهرو على الكرسي و دار بيه لناحية البلار لوراه و بقى يتأمل مش فاهم شي

-اول مرة في حياتي نضعف قدام حد حسيت روحي عاجز كليا كا نجمتش نضرها نحس روحي عبد بمشاعرو قدامها ضعفها يهدني كنت نجم نحطملها مستقبلها و حياتها و نمحيها...حاجة فيها مش عادية منعتني احساس قوي سيطر عليا،كبريائها يوترني قوتها ز مبادئها هدوني ضعفها كنحاول نحطمها تحطمني هيا قبل بخزرتها البريئة تخليني نكره روحي مليون مرة،تخليني نتسائل هي بشر ولا ملاك؟؟ انسانة ما فيها شي من خبث العباد..هههه معجزة تتكتب في التاريخ الشيطان يعجز قدام المسلم و ينسحب😈اووووف فاش قاعد نخلوض انا جاد بن الياس آل راشد تهزني خديمة!!يلا في الحالتين ناوي نرجع امخر الليلة للفيلا خللي عيلتها ينتقمولي منها ما نتعبش روحي انا ههههيا جاد فاش تهتري استعرف بعجزك قدامها وقت تتربط و ما تنجم تعملها شي و لا تضرها 😔

(حطواااا جاااام قبل ما تقرااااو)

الحلقة 13:

*في دار عيشة :

كانت الدنيا رايضة الصباح اما في لحظة تقلبت بالصياح

-اسااامة!!😍ولدي وقتاه روحت يا روحي علاه ما قتليش

عنق امو يبوس في يدها

- توحشتك يا غالية ياعنبو ريحتك ما بنها يخليك لينا 😘😘😘 جيت البارح لقيتك راقدة حبيتش نقيمك ..الحس باهت اك المفرخ راقدين؟؟

-اي ارتاح نمشي نقيمهم

جبد تاليفونو

-الوو..اا شبيه صوتك هكا زادا؟ و شنوا الحس بحذاك؟

-هاني وخيك لتو لا رقدت مالبارح في الشركة نكلت😓

-برا عاااد سي جاد تي سيب عليك يا زفت ما تفدش ياخي يخلهملك شتخدم اببببب برا روح مرقد شوية و ارتاح العشية نتعدالك

-ااا سلعة صار انتي في تونس وقتاه روحت ولا كندا معاش تعجب😂

-اي روحت بابا سمعت بولاد العم قايمين عليك حرب جيت نضرب معاك😆😅 عيب نخليك وحدك

-هههه خارج منها بيك ولا بلاش الحرب و رابح زادا..اي هاني مروح نشالله تظهر تكركر فيها عليا و ما جيتش عادي نجيك غادي نهرسك😈😠😂 .. و علق عليه

-هالحيوان صنعتو لا يبطلها غير نشدك يا كلب😝😆

على دخلت مجد لكان يمشي و راقد عين مسكرة و عين محلولة

- شرفت ااا هامل وانا نقول شبيها عيشوشة مقيمتني الفجاري،،حتى الويكاند محرمة علينا الصبر😤😪

قام يعنق في خوه خنقو و بدا يفارع فيه

-عاد شبيه ويكاند سي الشباب نورمالمون تفيق بكري ناشط

-اي قد قد اما كي سبتك انت مش وقتك هذا ومش من عوايدك تسيب كندا و ترجع لتونس على بكري؟

-جاي نضرب مع ولد الخال😄

-انا حاجة وحدة ما دخلتش مخي كيفاه انت و ياه وليتو صحاب ااازحي يقوا عليك ربي تي شيطان على حالو هاكا

-اي تلم سيبلي صاحبي ههه هو صحيح شراني و كيما قلت انت شيطان و انتقامي اما صدقني لا فما ابيض من قلبو يعني ابعدني نبعدك اما انتوما مكبرينها الحكاية

-نقص ايدي و نلحق ساقي كان مكش معاه في كارثة من الكوارث...😂😂

جاء يرجع عليه نقزت عليه لجين تعنق و تبوس😋😘😄

-اساااامة يااا جيت عسولي

مجد جود في صوتو يقلد فيها

-اسااامة 😝😜 تقعد وهفف😂 والله لا نلومو ابو جهل كي كان يردم فيكم 😞الغولة هذي😛😛..

شاف الوقت لقاها 7:18 رجع يكمل في خدمتو بعد قام يجري كالمجنون تفكر حاجة😨

-اووه اك الفرخة نسيتها جملة

خرج من الشركة عجاجة طلع في الكرهبة و طار للفيلا خايف لا تكون صارتلها حاجة،،يحكي وحدو و يصيح بغش و يضرب بايدو عالفولون

-جاد جاد تنفس ريض روحك لباس ما جرالها شي.. شبيني وليت هكا اوووف يعمبو النهار لرجعت فيه لتونس و يلعن اللحظة لريتها فيها انا جاد ل العباد الكل ترعش مني يصير فيا هكا؟ شنوا قاعد يصيرلي شبيني خايف نرعش رعيش عليها نحس في روحي تبدلت وليت عبد اااخ شعملت فيا يا ايثار ؟؟لا لا،، اما تستاهل لقاعد يصيرلها ما قلها حد تحداني.. يلعن جد بويا الكلب و بوك معايا يا ايثار وين هزيت جاد ووين ناوية توصلو جاد الي ما يزلزلو موت حد ولا فراق حد..

وصل هبط ديراكت خلا باب الكرهبة محلول و دخل يجري في الفيلا طاير الدروج يصف فيه صفان حل باب البيت و رجع النفس..لقاها ملفوفة على روحها في الكوان وجها احمر مالبكا،،تنهد يهدي في روحو متجاهل قلبو ليحس فيه باش يسكت من منضرها شرع الباب و صاح عليها

-اخرج عليا ولا عاد توريني منظرك والله نمحيك😤😤

قامت بزربة خارجة

-موتي اليوم باش تكون في رقبتك الله لا يسامحك في جرتك دارنا باش يذبحوني😡😢 قداه كنت غالطة فيك،،

قعد عالفرش يحاول يسيطر على روحو حتى النفس يتنفس بالسيف طاح لتالي رخف الكرفات و غطى وجهو بايدو

-اااه هدتني الضعف لفي عينها كسرني نحسها حاجة من املاكي و حاجة مني مستحيل نخلي حد غيري يغلط معاها..

عاود ستوعب شنو باش ايصيرلها في دارهم قام يجري للاستوديو متاعهم خالط عليها..

*في الاستوديو،،

كان هدوئ ما قبل العاصفة محمد يمشي و يجي في البيت كشاكشو خارجة في يدو مسدس و بوه قاعد عينيه حمر مالعصب..تحل الباب و دخلت ايثار كارهة روحها و عايلتها و حياتها الشبه معدومة احساسك انك للحظة كنت على ابواب اغتصاب بحد ذاتو موت ..اتكت على الباب بتعب راخية راسها،،محمد دوب شافها هد عليها شدها من شعرها😬😠

-وين مشيت يا ملهط ؟؟مع شكون كنت يا هاملة والله ما نربيك😈😈

حجابها من اصلو طايح شوية زيد شدها من شعرها لواه على ايدو و بعصب يلطخلها في راسها على الحيط و هي ساكتة كلمة لا

-لازمك تموت انت حرام فيك العيشة مللي جيت لدنيا وانا نكرهك نستنى في موتك

ساكتة دموعها سبالة على خدها مش من وجيعة ضرب خوها لا ،، من خزرة الاحتقار و الذل لشافتهم في عين بوها،الخزرة لتمنات الموت و ما ترهاش ..

فيقها من سرحتها محمد

-تحرمنا من امنا في جرتك هي ماتت باش سيادتك انت تجي ل الدنيا ضحات بروحها على خاطرك من لحظتها نكرهك و في اللخر توطيلنا راس..

ما كملش كلمتو يلقى روحو في القاعة جاد فوقو يضرب فيه عينو تقدح بالشر مش ناوي يخليه عايش

-قاتلك قاتلك اليوم

صالح تصدم من جاد لما يعرش منين طلع و كيفاه جاء كل شي صار فيسع،حار في امرو شنو دخلو و شنو علاقتو بالحكاية و شبيه يضرب في محمد؟

-سيدي عيشك سيبو الطفل باش يموت عيشك....

(حطواااا جاااام قبل ما تقرااااو)

الحلقة 14:

كانت هذي آخر حاجة شافتها ايثار و طاحت داخت من الضرب لكلاتو

قام بعد ما صب شرو الكل في محمد خلاه مدمدم ما باين من تفاصيل وجهو شي نفض ايديه في بعضهم و دار لصالح

-ما تتصدمش في حالة بنتك خاطر انا هو مولى العملة😐 انا السبب في حالتها هذي

طاح لاخر في القاعة بعد ما سمع هالكلمتين لهبطو على راسو كالصاعقة يخمم في عرضو لتنهش،حس بروحو خرجت منو و انو مش قد حمل هالمشاكل و ما ينجمهاش،كمل جاد كلامو..

-كمال ادخل هز هالكلب بعيد على داري خاطر كان نعاود نراه هنا نقتلو.. وانت كانك على بنتك انا نصلح غلطتي و نعرس بيها😍😍

هز راسو مصدوم مش مصدق الي سمعو،،-نعم؟؟؟؟

-اما في السر!!تتقيد مرتي عالاوراق كهو و يا ويلك يسمع حد لا اسيل و لا بناتها و لا حتى عموماتي و جدي و انتم تكملو تعيشو هنا على عيني و لا كأنو صارت حاجة،،طبس حمل ايثار حطها على البنك و كمل..

-يتعدا عام و بعد نشوف نطلقها والا لا و توفى الحكاية..

قلبو تقبض و بكاء على بنتو و شبابها،لا يزي باش تعرس صغيرة و زيد كان عالورق لا هي تفرح كندادها ولا هوما يفرحو بيها..

-غدوة تمشي تحلل تو نبعث كمال معاكم و ماتتعطلوش و يطلع التحليل فيسع و بعد غدوة يجي العدول و نعقد عليها.. نزيد نوصيك رد بالك يسمع حد راني والله نبعثكم ورا الشمس... و خرج

قعد يخزر لصغارو بنتو الدايخة من الضرب و ولدو لمزال مطيش في القاعة مايعرش عليه حي و لاميت..

*في دار فيصل:

-دانا: فديييت روحي طلعت نحب نخرج نشوف وجه ربي و عبادو نحب نحوس😢😔

-سامر:نخرج وخيتي عندي منك زوز😚اما مش تحوس،من عقلك😡

طبس يبوس في راس امو

-اهلا امي لباس؟؟

-اهلا بولدي حمدالله هاني.. اقعد افطر معايا اليوم ماني اميمتك معاش خالطة نراك كالعباد😯

-الله غالب ياا هاني مقطع الصباح في الفاك وسط النهار في الشركة العشية نروح نرقد انت تخرج و كيف ترجع نبدا انا مع الاولاد

-الله المستعان يفتحها عليك عزيزي و يرزقكم بنات الحلال و الذرية الصالحة انت و خوك

-خللي يعرس ولدك الساعة شكلو مزال مطول و بعد ادعيلي انا ليل و نهار😂😆... دخل احمد

-ديما تغلي ما تسكتش؟ وانا من قبيلة نعض في لساني طلعت انت تقطع و تريش فيا😁 باس امو..

يسترك وليدي 😙😙

-حقا امي ما تقليش ناويتلنا على بنات العم؟؟😕

-شبيهم بنات العم بابا ما يقضيوش؟؟اس اس يطيح سعدك يضربو بيهم المثل بنات آل راشد الناس الكل تشكر و تمجد فيهم الزين و العقل و الثقل😌😌

-احمد:اي امي عالبنات صحيحة وانا معاك و الحمد الله اما نبشرك الناس شتحكي على ولاد آل راشد؟؟ اقل حاجة نقولها انهم يستعوذو من الشيطان كيتجبد اسمنا،اامالا في جرت سي السيد ،، ارنب تجر على حلوف😒

عرفتو باش يبدا يغلي كيفما كل مرة يتجبد فيهاجاد غي حديث .. بدلت الموضوع و سئلت على دانا و جاوبها سامر

-باز مشات تقفف لجدي يسخفش عليها و يخرجها😂

*في بيت لجين،،

-مجد:لجين روح خوها هيا تحب نخرجو نحوسو؟ولا شاهية حاجة نجيب هالك؟؟😆😍

لجين متربعة على فرشها تريقل في شعرها

-مجد ما تكسرليش راسي من غير مقدمات هات شعنك؟😒😒

-ههه راك خرا تفهمها طايرة..باهي صحبتك هاكي لدخلت عليكم نهارتها بالغالط..

-اس من غير ما تكمل و رد بالك،،ياخي ما تفدش مالبنات خاف ربي وخي مزالت عندي كعيبة باش تزيد ترزيني فيها؟ وانت بنات الفاك الكل درت عليهم ضربة ثنين جايتني وحدة "انا صحبت خوك"

-صحبتك حبيتها الززح علاه هكا تحرم😔😒

- حبيتها؟؟هكا!ريتها مرة حبيتها؟ مجد قوم تجبد من قدامي لا نباصي عليك. ضربتو بالمخدة،رجعها عليها

-سكر عليا كشختك مخيب فوقيرتك كانت كصحباتك الكلكم تقطعو الرزق😂😛😛

جات هنيدة الدق في الباب قريب تهدو

-ايوااش ختمت هاي جات المطفوشة لخرى سبحان الله الكلكم كوبيي كولاي على بعضكم ههه

-امان لجين تسمع فيه و ساكتتلو؟ بداو يتعاركو..

-بجاه محمد مرة في حياتكم تقابلو من عرك و نتوما لابديتو تهبطو السما و ما تقيموهاش.. اسكتو بلعو ولا نقلكم؟ اخرجو عليا الزوز البرا مش ناقصة حسكم

قام مجد خارج طبع يدو على وجه هنيدة و دز بيها الباب لكانت متكية عليه😂😂جات مادة الاربعة ..مات عليها بالضحك..نحات صباتها و قامت في جرتو

-ههه والله مهبلة هو يفرك فيهم عليها و هي فيسع تشعل ملا بهلولة..

خرج مالاستوديو مش منجم يستوعب لعملو اول مرة في حياتو يقدم على حاجة بلا تخمام من غير ما يقرالها الف حساب طلع في الكرهبة وديراكت لفيلات آل راشد،بيناتهم شارع و الكلهم يسكنو على نفس الارض يجمعهم صور واحد اما كل حد و الفيلا متاعو.. راكا الكرهبة اما ما دخلش تكا راسو يخمم بصوت..

-امبوسيبل والله شنو عملت انا توا؟ مخي وين كان وقتها و منين طلعت بيها حكاية العرس لا و يعطيك ربي تبارك الله و ماشاالله لساني ما قصرش فيسع لقى حل و لقى الكلمات و خطط و باش ينفذ و وقتاه؟ هههه بعد غدوة😣😒 ايا نشاالله خير نشوفو آخرتها معاك يا للا ايثار.."ايثار"!!😣ااااه

( حطواااا جاااام قبل ما تقرااااو)

الحلقة 15:

تنرفز و فد،، جات على بالو وقت كانت دايخة الاحساس لحسو كهزها بين ايديه و رقدها عالبنك وقت طبس و حطها كتخلطو انفاسهم،حتى وهي دايخة مزالت ملاك،مزالت بريئة و انوثتها طاغية،شعرها لقريب يعثر فيه و هو طايح وراها كيف حملها ريحتها لكيف ريحت الصغار وقت ستنشقها و عبا بيها صدرو ريحتها لتغلغلت في ضلوعو و جرات الدم في عروقو..

-حاير كيفاه تسرعت صحيح من داخل مش نادم ومن داخل اكثر مرتاح و راضي علي عملتو خاطر هاكا الصحيح اما مش فاهم علاه داخل بعضي هكا..ههه لاول مرة ننصف عبد و نصلح غلطتي معاه و ناخولو حقو من روحي..

نفخ و هبط نوقز و هو متردد حلتلو الخديمة الباب مع جيت مرت عمو لدوب شافتو هبطت تزرب من الدروج تعنق و تعاود

-جاد هالخطى السعيد اهلا بولدي اهلا بريحة الغالي نورت الدار

تصدم من ترحيبها الغير متوقع تبسم 😊

-منور بأهلو و ناسو عيشك"حشم"سامحني جيتكم على غفلة..اسامة موجود؟؟

-الدار دارك يا بابا تجي وقت ما يضهرلك مرحبا بيك في كل وقت😊😊اي زوز زوز نمشي الناديلو

قعد في الصالة يتبسم غاضتو روحو

-والله و نحسدك في هذي يا اسامة😔عندك الام لتحرمت منها في صغري تمنيت يكون عندي كيفها توا😢😢 اما توقعتها باش تخاف من جياني ولا تحكي معايا برسمية اكثر طلعت غالط فيها حسستني اني عبد كالعباد الكل... جا اسامة بالحملة😆😂

-اهلا بالمعلم نورتنا مش قتلك تو نجيك ل الدرجة توحشتني ما صبرتش؟😝

-اووووف تي ابعد تقول طفلة عيفتني في روحي هك انت لظاهر متوحشني مش انا ههه

-زايد😒😒 هاني سيبتك هالمرة اما شعملت من كارثة ما صبرتش و جيتني للدار؟!!

-ما عندي ما عملت ساعة التالي عرست في السر كهو و هاني جيتك😆

-لا والله خليت الكازي..لحظة لحظة شقلت؟😲 عرست؟ معناها عملت حاجة ل الطفلة هكا علاه خذيتها في السر و لا انا غالط؟ يا فرحتي بيك..

جاء يتكلم دخل مجد

-السلام عليكم.. قام جاد سلم عليه برسمية و قعد،

مجد عندو القبول من الناس الكل جويستي و كلمتو يقولها

-كي سبتك جاد شعندك جيتنا هذا الكل على خاطر وجه اللوح هذا قبل ما يجي كنا نشوفوك بالرونديفو وخي..

-وجه اللوح اذاكا لتحكي عليه غلاوتو وحدها😋

يسلمك ولد خالي تعيش احم..😍😘

-يكب سعدك انت وياه نشاالله اقعدو فيها نتطلع نتكب نرقد خير ما نقعد نسمعكم تنفخو في بعضكم وانا تقول فاز ورد شايح بيناتكم..😌😏

جاد ضحك ضحكة طويلة على كلامو حسو بايع الدنيا و استغرب في تفدليكو معاه رغم الاف الحواجز لحطهم بينو و بين آل راشد الكل.. اسامة يخزرلو

-تعرف!سنين و احنا مع بعضنا ولا نهار سمعتك ضحكت هكا براس امك لا عاد تتبسم اصلا،،ضحكتك تخوف😱

- والله نسيتوني همي

-جاد واعي بكلامك؟ ياما عملت مصايب و ياما عرست غي السر و ياما لعبت بالعباد ولا مرة فيهم كان عندك هم،ديما تقول نعيش كل نهار لنهارو كأني باش نموت غدوة من غير لا رحمة ولا تأنيب ضمير..

-هالطفلة دخلتني غي حيط يا اسامة قسما بالله حاير في روحي كيفاه وليت راني نولي ضعيف قدامها..اي نعم انا جاد نضعف قدام فرخة،كيف تتقوا نحب نهدها و كان هديتها نتهد انا معاها كيف نشوف حد حتى يحكي معاها ولا قربلها نجن و يصيبني العمى تلقاني شاد روحي بالقدرة ما نقتلوش شمعناها يدورلي باملاكي اه.. تعرف شمعناها املاك جاد ولا؟؟؟

عروق جبينو ضهرو مالعصب و صوتو علا،اسامة تكبس

-شكون الطفلة؟؟

-بنت العساس صالح ليخدم عندي في الفيلا و هي تجي تنظف البيوت😟

-ياعمبوك هبلت ياخي؟؟ من قلة البنات قداه عمرها؟؟

-17،18 ما نعرش

-يعني بناتكم 10،11 سنة لا جاد والله حرام تي صغيرة الززح

-اسمع الحكاية الكل راني لا مسيتها ولا قربتلها من اصلو انت تعرفني مستحيل نمس طفلة في الحرام مهما كنت مجرم و متحيل و بجماعتي وووو الا الحاجة هذي حاط عليها مليون خط

-باهي شصار بالضبط

-حكالو كل شي من عركتهم قدام باب الفيلا اول ما جا ل حكاية العرس هو كمل و اسامة سكت شوية و ضحك

-ههههه ما فيباليش بيك وليت بهيم صاحبي،كي انت ما عملتلها شي علاه ما حكيتش الحقيقة لعيلتها و كان كذبوك فما طب و تحاليل يثبتو و يوفى الموضوع

-اي نعرف و هنا المشكلة كيف دخلت و ريت خوها يضرب فيها طار عقلي و جهلت و صار الي صار..

جاد نصيحة من عند خوك ابعد على الطفلة و رد بالك تحبها و كان سايي حببتها ابعد عليها زادا راك باش تضرها ناسي اعدائك ل في كل بلاصة يستنو في اقل واي حاجة تحبها باش ينتقمو بيها منك هذي1 و 2 كيفاش خديمة تعرس ب امير تي حتى في الافلام معادش ماشية الحكاية 3 ناسي اسيل لتلمحلك على وحدة من بناتها و انت مضطر توافق؟؟؟ فيييق و عاود حسباتك

-انا مروح مخي ما عاد يستوعب شي تعدالي مبعد.

ما عندك وين ماشي بحالتك هذي ما تناقشنيش ايا نفطرو ما دام قلتلهم يحضرولك بيت اعمل دوش و ارقد خليها على الله لباس..

( حطواااا جااام قبل ما تقرااااو)

الحلقة 16:

اثير قاعدة على راس ايثار لبدات تحل في عينها بالشوية

-انا وين شنو صار😢

-ماصار كان الخير عزيزتي،شتحس في روحك توا؟

هزت طولها شوية شدت راسها كأنها فاقدة الذاكرة شافت دموع اختها تفجعت

-شبيك..بابا لباس؟😮😦

-لباس اما ما يحبش يشوفك😔

للحظة ستوعبت لصار و تعدالها السيناريو كامل قدام عينيها غمضتهم كأنها تحب تمحي هالصورة من مخها، ولات تبكي..

-والله يا اثير لا عملت شي حتى اك الواطي لا مسني😢😢😔قامت خارجة البرا تمشي بالقدرة تلوج على بوها دارلها يصيح 😡

-ادخل لداخل و ما تورينيش خليقتك يا خسارت تربيتي فيك يا خسارت سنين تعبي

ترمات على ساقو

-والله مظلومة يا بابا انت ربيتني تعرفني مستحيل نوطيلك راسك والا نخون ثيقتك فيا

من داخل مصدقها يعرف بنتو يمكن يتوقعها غلطة من اثير و اكيد من محمد اما ايثار مستحيل،دور عليها وجهو و وخر التالي ما يحبش يشوف دموع بنتو الغالية حاسس انو بالحق ظالمها بنتو الي ملي تخلقت و جات لدنيا لا عاشت نهار رايض و لا ذاقت الفرحة في هالدار..-قوم تحرك حضر روحك ماشين ل السبيطار

-بابا فاش تقول!سبيطار شنو؟لباس عليا يا بابا والله العظيم لا قربني صدقني شرفي ما تمسش😢

-قتلك ادخل ماكش ماشيتلو عالحكاية هاكي السبيطار ،اعمل تحاليل عرسك و روح😒

مش فاهمة شي تخزرلو مصدومة مبهمة رجعت تبكي و تنوح على سعدها الراقد😦😟

-عرس شنو بابا يهديك؟؟

-جاد باش ياخذك في السر و يستر فضيحتك

ديراكت ركعت تحت ساقو مرة اخري

لا عيشك بابا راني بنتك انا ايثار بابا،،نموت و ما ناخذوش هالواطي..نبوس ساقك لا تخليها بيا خليني بيناتكم نعدي عمري بايرة و لا نعرس بيه😢😢😭

بعد عليها و هو يصيح

-قوم تحرك البس جلبابك استر روحك اختك و كمال يستنو فيك.. الله لا يردك

خلاها مطيشة في القاعة تغرد و تعاود على سعدها ملي تولدت لا شافت نهار خير من خوه..قامت ريقلت امورها سلمت امرها الربي و مشات.

*في دار راشد:

-دانا: امان جدي والله روحي طلعت و انا نقرق بيك شيحتلي ريقي ايا يهديك نخرجو سرح سقيك و شم طرف هوا و ما تندمش😆

-زيد قرق😂 الفرخة هذي تجي كان على مصلحتك يا لفعة تخدم عليا مخك تهترني معاك وتمشي..

-امااان😟 عيشك بارك الله فيك ما تصورتكش ترفضلي طلب 😦 هاني مروحة شوف شكون يقعد معاك و يضحكك و شكوون يصبلك الصبة😒😏

-هههه بنت ولدي الي يقدك في التسكبين يجي يحاسبني،،قوم قوم جيب اك التاليفون حل فايسبوكي ادخل ل قروب اعمامك دور عليهم لكل حط في بالهم ل احنا بعد غدوة ماشين للمزرعة و لوج على

رقم جاد ابعثلو ميساج و اكد عليه مدامو رجع لازمنا لمة باهية و قلهم نشاالله و يحبكم ربي نلقى حد ناقص ما نحب حتى عذر

-جدي!!علاه جاد مش معاكم في القروب ؟؟

-الله غالب الشيطان عمرو لا يحب الملايكة..

*نهارت الصداق،،

-العدول :شنو شروط الطفلة؟؟

-صالح:حتى شي

تكلمت ايثار من ورا الباب ببرود عكس العاصفة لتحس فيها

-لا عندي

هز جاد حاجبو ما توقعهاش تشرط

-تفضل للا ايثار اشرط😕

-خويا محمد يرجع للدار

بوها تصدم ما تصورش بعد لعملو فيها محمد الكل تعاود ترجعو!! هز راسو للعدول لقاه مش فاهم شي دار ل لجاد لضحك على جنب باستهزاء مستغرب من طلبها😏😕

-مريقل للا تؤمر، كمال جيب محمد للدار.

اسامة كان بيناتهم مبهم حال فمو في هالماخذة و شنو آخرتها.. دار بعينو في الدار يحاول يشوف الطفلة لقلبت حياة ولد عمو الوحيدة لهزتلو كيانو و زلزلتلو حضورو لخذات عقل جاد و خلتو ما يخمم كان فيها،اما ما شاف شي،،ما يعرش شبيه يحس في حاجة غريبة فضول كبير متملكو و مسيطر عليه مللي سمع بالحكاية اما تجاهلو ورجع ركز مع الجماعة هز راسو خزر لجاد للحظة حسو سرح في حاجة و فيسع فاق ،وهو فهم علاه كيف دخلت طفلة تقول ملايكة هابطة مالسما راسها المرخي و يديها لكانت مشابكتهم في بعضهم ماللاستراس لماكنها قلبو دق و كالعادة طفى الضو و ما عطاش لروحو فرصة يركز مع احاسيسو

قعدت بجنب بوها صححت فيسع و عاودت دخلت للبيت...كملو خرج هو و اسامة و كمال خلاهم واقفين و دخل للفيلا تعدا مالصالة يلقى اسيل و بناتها قاعدين ضحك من لبستهم المعري اكثر مالمغطي كأنو بالحق خوهم😏😏كذبو كذبة و صدقوها😑 حاول يتحكم في اعصابو كيف شافها جايتو تحب تحكي معاه،،

-اسمع راني مش فاضي لحتى مخلوق كان ناقصك فلوس تعدا ل الشركة

-نون عزيزي عندي فلوس و مش ناقصة شي حبيت نحكي معاك عندي برشا هش خالطة نراك كيما العباد ولدي

-ما تفهمش؟؟ جااااد لاهي..لا،ه،ي اااا ززحي

طلع و خلاها ترحي دخلاني..

-نجد: أالمعفن هذا قداه شايف روحو كان على طرف الشبوبية لفيه تو يجيه نهار و يزول😤

-جود: عندو حق وخيتي شوف اك الوهرة و الزين و الاسم و المنصب و الفلوس كان انا بالازمة لا نكلم حد اصلا مش لعب😍😍

اسيل: ازرب روحك اعمل حاجة و ولي في بلاصتو

-اوووه يامي هك فشلتني تي باالهي منين باش نتعدالو هذا هاك تشوف مش معبرنا جملة كيفاه نزرب روحي بربي😠

-ما تخافش مدامكم تحت سقف واحد و في نفس للدار و هو عازب كل شي ساهل خليه عليا تو نكمبصلو...😈

( حطواااا جاااام قبل ما تقراااو)

الحلقة 17:

كانت ساكتة دخل بوها..

-من غدوة ترجع تخدم في الفيلا و يا ويلك حد يعرف و الا يشك في الحكاية

-باهي

-و خليني نشوفك البرا من بيتك والا الفيلا نقصلك ساقك و ردبالك محمد جاي و متحلف فيك كان تحب تموت وريه وجهك

-باهي

-بابا سيبها يزي قتلتوها الطفلة كل حد ينهش فيها من شيرة،،اس عيش اختي و راسك غدوة خير نشاالله😣

تكات راسها في حضن اثير ملامحها باردة كأنها معاش تحب تتذكر لصار ولا تفسر حاجة

-الضربة لتهدك تقويك اما المرة هذي كانت قاضية يا اثير،،نسيت حتى كيفاه نمثل ل انا لباس نسيت كيفاه نتصنع اك الضحكة الصفرا لنرسمها على شفايفي كل

ما فيا يصيح دخلاني والي هدني لا اك الساقط و ولا محمد خوك بابا هو لهدني يا اثير دفني بالحياة..

*في بيت جاد،،

طلق طولو على الكرسي،،المسدس في ايدو مرة يدورو في صبعو و مرة يعمل ضربة في الحيط ضبابة عماتلو عينو ما يرا في شي مالغش لماكنو،نوقز تاليفونو لقاه ايهم هز عليه

-سلام

-وينك يا شيطان فقدناك و توحشنا مصايبك..

-نشاالله يلبسك الشيطان قول امين..

-ههه اللطف يا ربي ملا دعا عندك 😠😟

-اي هات شعندك سيبني

-لقينا ماكس

-اعملو معاه الازم😈

-اوكي،،انا نكمل المهمة هذي و راجع لتونس..

*في فيلة جاد.. و نهار جديد..😍

دخلت للفيلا هادية عكس العاصفة لداخلها ماشية ناحية الدروج عرضتها جود تخرنن جايبة ما عندها

-انت يا بقرة😠

-تفضل

هدت عليه خنقتها

-يا سارقة خاتمي يطلع توا ولا والله اليوم نبيتك في قلبو

-سيبني لباس هادة عليا هبلت؟؟ اما خاتم متاعك عندي نهارين ما جيتش

-انت سرقتو تجيبو😠😈

شنوا الصياح،جود عزيزتي شبيك؟؟

-ايجا امي هالملهط سرقتلي الخاتم لهديت هولي انت

-نعم نعم!! زايد قليلة اصل الخاتم تخلقو اليوم فهمت؟؟

ايثار معادش فيها مالعصب كارهة روحها

-ما هزيت حتى خاتم ما عندي ما نعمل بيه لباسة فيهم؟

-اسمع يا بنت العساس الخاتم ما يظهرش اليوم نباصيك انت و كمشت الهمال لمعاك

-ورحمت امي يا مدام لا هزيتو ولا نعرف حتى شكلو كيفاه😢😢

هبط جاد كشاكشو خارجة يصيح

-صبحو ا الصباح الواحد ما يقعدش رايض في هالخربة..

-جاد كلم الحاكم هالزبالة ما نحبهم يزيدو حتى ثانية في داري

ايثار مهبطة راسها باش ما يراش الدموع المتحجرة في عينها كارهة روحها هانوها و ذلوها كيما حبو الوضعية لهي فيها ما تسمحلهاش باش ترد اعتبارها و تهينهم كيما هانوها،جود تبكي و تتمعجن زعمة زعمة تتدرش تحاول تسخف جاد

-جاد راهي سرقتلي خاتمي نهارين التالي كان في بيتي و بعد ما لقيتوش و هيا وقتها ما جاتش تخدم تنسي في الحكاية زعمة زعمة،الخاتم غالي ياجاد كان جاء خاتم آخر حلال عليها خلي تاخذو السماح فيه😡

-ما سرقت شي و مش صنعتي هذي و كانكم عالحاكم كلموه يجي اوكا الدار قدامهم يفركتوها ما عندي مناش نخاف على ما فما شي

-قداه سومو الخاتم؟؟

-3ملاين

خرج كرني شيكات من جيب الفاست و بدا يقيد

-جاد نورمال تخلي الحكاية تتعدا هكك ؟ما نحبش سراق في داري اليوم تسرق خاتم غدوة حاجة اخرى😬

-من فضلك مانيش سارقة و عمري لا هزيت حاجة لا منكم ولا من غيركم ما تربيتش هكا فهمت ولا؟

-اسكتو عليا كلمة لا انت وياها

حط الشيك بين صوابعو الزوز و طيشو على جود باحتقار

-شتموتو عالفرنك برا اوكا اشري منو عشرة و بلع فمك،

-وكان عاودت سرقت حاجة اخرى؟؟

-شوف!!مازلت موسع بالي معاكم..انا انسان نقتل اي حد وعادي جوست باش نعدل مزاجي و نريح مخي لذا ما تلزونيش لتصروفات متع طيش و ننسى القرابة لبيناتناو نبدا بيكم،واضح؟؟ وانت ايثار ما تهزش حاجة العباد و تغيب بالنهارين 😉

"غمزها" باش ادخلها بعضها و ما يعرش علاه عمل اكاكا

فهمت قصدو..

- وانت سي جاد وين كنت لاهي هالنهارين؟؟؟

سؤال بطريقة غير مباشرة حاجة ما توقعهاش منها ولا تخيلها تنطق بكلام هكا ما فيبالوش لهيي تملحت من كل شي ولات انسانة باردة كيفو..قربلها بعصب يحاول ما يظهر شي لاسيل نزل على سنيه و تكلم من تحتهم😬-لاهي في جهنم الحمرا اي تجي؟!

زادت قدمت اكثر منو و خزرتلو بتحدي عروق عينها حمر نضرة قوة وحقد و كره سحرتو بيها ضاع في غابتو الخضرا و سرح فيها وفيقتو من سرحتو

-اسكنها وحدك تواتيك يا شيطان...

مشات تبعها بعينو لين هبطت للاتاج اللوطاني قدم ناحيت جود شدها من مرفقها قريب يكسرها😠

-ولدها على ظهرها وهي تلوج

جود عينيها وساعو مالصدمة والخوف كيف جاد هزلها صبعها يوريلها في الخاتم الابستو

-مش هذا لنلوج عليه😨

-عديها على غافل مش عليا

دار ل اسيل بزربة وغش ينبه فيها

-اسمعني مليح انت و بناتك الخدامة الكل لعندي حد ما يتجرأمنكم و يقربهم و يا ويلكم نلقى وحدة تعارك فيهم ولا تتبلا عليهم والله و ربي لخلقكم يا اسيل لا نرحم فيكم وحدة و نتفاهم معاكم بطريقة اخرى ما تقولوش ساكت معروفين لكيفكم من وجوهكم، باهي!؟! و مش خاطرك ربيتني و تغربت معايا ،،تحط روحك في بلاسط امي انا باش نحن عليك،،،ايدي لتخوني و تسلم على عدويا صدقني نقصها😈😡😤

طلع لبيتو يحضر في روحو اما صدى صوتو بقى لوطا يتعاود خلاهم مرعوبين من تهديدو..

( حطوااااا جااااام قبل ما تقرااااااو)

الحلقة 18:

مصدومين و خايفين خلاهم واققفين في بلايصهم كالتماثل و طلع يحضر في روحو..

-جود عيش بنتي شوفلو اي حكاية هالمجنون خلي يتضرب فيك و ياخذك عندو عادي يرمينا في الشارع و ما يسألش علينا😲

-يا الميمتي منين جبتو هذا اقسم بالله لا ريت كيفو الزين و القوة و الوهرة زيد عليهم الفلوس و الذكاء و اك الرجولية لتقطر منو تقطير يححح كان يتضرب فيا و ياخوني وقتها نملك الدنيا و لا ينجم حد يتجرأ حتى و يخمم يفرعسلي مخي ولا يطيرلي كيفي😍😍 اما ههه يا ذنوبي كان يتلفتلي بشطر عين تي منين باش نبداه هالسخطة..

-ما تحلمش برشا هاكا بلاش قلب عديم الاحساس يا جبل ما يهزك ريح من سابع المستحيلات كان تحركلو مرا شعرة من راسو مش لعب اما اعمل اي حاجة حرام حلال بالتحيل والا القوة المهم يعرس بيك ..اي برا برا قول للخديم يحط الفاليزات في الكراهب و شوف كان نسينا حاجة..

*في المزرعة،،

الجماعة الكل وصلو كان عايلة جاد.. مجد زاهيتلو حب يركح على جدو لشدو بالكمشة..

-رشودة يا كبيرنا هك حصلت في يدي اي ستعرف ل انت تو كنت تبلحق في عينك عالبنيات لي الفايسبوك😝

-والله لا تحشم يا كلب..اي كنت نكحل على هالكافرات سافا عرضلي اه الله يلاهينا في حوايجنا😤😒

-غسان: تي بالك مسلمين يا جدي اي تنرفزش روحك قلي اماهي لتضربت فيها وانا نجيب هالك..

قام مجد يعيط لبقية الاولاد لكانو قاعدين البرا

-يا جماعة الحاضر يعلم الغايب جدكم كان يكحل في التاليفون يحب على وحدة ترنكوشة😂😂

-سكر هدة في فمك يا فرخ فضحتني الله يفضحك

دخل سامر كمل معاهم في الخط

-الله الله استغفر مولاك يا شيخ راك حاج قد شعر راسي هكا تو يا ناري و انا لعاقد فيك النوارة اي نعيط لولادك و نساهم يراو خنارك؟!😆😅😝

-يكب سعدك بوك و عموماتك لا واحد يتجرأ يهز فيا عينو اما يا خسارة جيبانهم فيكم كلاب تفوه عليكم😠

-هدي روحك رشودة مش باهيلك الغش يطلعك الدم و انت مازلت شباب ماشاالله ههه

-يا فيصل اجريلي المفرخ متاعك و ولاد خواتك باش يجلطوني ااااه قلبي قلبي باش نموت 😱

-لعنة الله عليكم قومو هكا جدكم والله لا تخلو حد في عقلو😬😡

-هههه هيا الاولاد نخرجو هالشياب مخاخهم مريطة مسكرة من عصر ابو جهل

هز جدو كاس ماء شرب منو و رماه عليه جا على ضهرو الاولاد الكل عيطو

-قوووووووووول وليييياااي

خرجو شايخين عليه وقفو في الفيراندا

-احمد:ههه ستر ربي بابا دخل في الدقيقة 90 ولا رانا نحضرو في جنازة واحد منا😂😜

اسامة على مجد

-برا هبط الفاليزات مالكرهبة

-علاه نخدم عند السيد الوالد عندك مكاسير اسرح وحدك،،و الا نقلك؟ زيد زيد قرق بيا شوية بالك تسخفني

-سامر: رد بالك يا اسامة والله يعملك تكركيرة و يقعد يذل فيك بيها عمرك الكل ههه هات تو نمشي انا

رمالو المفتاح هو جا ماشي و كرهبة جاد دخلت في جرتها زوز اخرين

-احمد: الشيطان جاء و بطبيعة ما يتحرك كان والجنون متاعو في جرتو

-اسامة:احمد عيش ولد عمي جايين نتفرهدو و عدنا برشا على لمة هكا لذا من غير مشاكل

-باللاهي كيفاه تحبني نقعد رايض و هو واحلي كالشوكة في حلقي😬

-ماتنجمش تنحي خشمك من وجهك في اللخر يبقى ولد عمنا كيفو كيفنا اخطاوه علاه هكا فيسع حكمتو عليه راكم غالطين فيه يزي ما حسستوه لهو غريب علينا و منبوذ

-من ناحية منبوذ منبوذ

-احمد احترم روحك مدامني مازلت مقدرك

زياد :احمد يزي عيش خويا والله عيب جاد منا و فينا دم آل راشد يجري في عروقنا الكل..

قاعدة عالارض تحاول تنحي القزازة لدخلت في ساقها مع جيت سامر شافهة معرفهاش مااول كان كيف قدم شوية ركز مع حالتها حجابها طايح شوية شعرها باين فيه تحللها، روبتها مطلعتها شعرة باش تلقى كيفاه تفارع ساقها كانت هادية لا دمعة لا حزن عادي و كأنو الجرح مش جرحها و الدم مش دمها

-هند شتعمل ساقك لباس تحب نعاونك في حاجة والا نعيطلك على وحدة مالبنات...😦😟

-لا ما تزيد حتى خطوة القدام خليك بعيد حجابي مش مريقل و شطر راسي عريان

-شوف حالتك كيفاه و دمك شرتلله و انت عادي مش هنا😡

-تو ندبر راسي امشي على روحك انت لا يجي حد و يشوفنا هنا

حمصتو و قهرتو ب برودية دمها طفاها و قربلها طبس عليها يحاول قد ما يقدر ما يخزرش لوجها خاطر شكلها مش لابسة جلبابها و حجابها مش مريقل كيما قتلو..

-نقص مالعناد شوف حالتك شموصلها ليك هذي ياخي تمشي حافية؟ ملا جادورة😒

-نحي ايدك فاش تعمل مايهمكش فيا

ما تحكمش في روحو و ديراكت هز راسو جات العين في العين قلبو تنفض ندرا جا شباش يقول لسانو تعقد ياخي سكت.. و هي فيسع طبست راسها

-عيشك سامر اقصد ربي وين كنت ماشي و سيبني تو نتصرف وحدي

-راني نحب نعاونك و ولد عمك مانيش براني ولا تحبني نرا الدم هذا الكل وناقف نتفرج عليك حتى الدوخ؟،،باش نحاول نخرجها ما تتحركش و تحمل باش توجعك شوية،،

بقى داهش في قوتها و قدرتها على تحمل الوجيعة رغم كبر القزازة يشوف في وجها عادي ملامحها باردة سرح معاها يحكي مع روحو دخلاني...

( حطوااااا جااااام قبل. ما تقراااااااو)

الحلقة 19:

-تباركالله هذه هند! وقتاه كبرت زيانت برشا و هي من قبل مش ناقصة مللي لبسو البنات الحجاب لا عاد تقابلنا و كان تلمينا راهو مع العايلة يا حسرة قبل كيف كنا ملمومين الكلنا ولاد و بنات و بالاخص هي كانت ديما في جرتي خاطر كانت تخاف من احمد ههه شو توا كيفاه ولات محلاها الحمد الله والله بناتنا تربو بالقدا ماللي وصلت حذاها و هي خايفة و حاشمة راخية راسها.. شدلها ساقها و غدرها خرجلها القزازة من ساقها هز راسو متوقع باش يلقاها تبكي ولا تتوجع عاود تصدم كيف لقاها ساكتة عادية تي حتى عينها مش مغمضة.. خرج برشا دم نحى بوند كان رابطها في ايدو و لفها على الجرح😕

-هند ياخي ما حسيت بشي؟ قزازة كانت في ساقك راهو و كبيرة زادا و انت لا بكيت لا توجعت

-اي هاني بكيت و صحت و بعد؟؟ امشي سامر عيشك عاونتني اما خليني تو نكمل وحدي

جبد تاليفونو و كلم دانا

-ااا دانا جيب جلباب و ايجا للباركينغ رد بالك يشوفك حد و فيسع ما تبطاش

درج اكاكا و جات دانا تجري تفجعت كيف شافت هند عاالقاعة و طرف روبتها مالوطة بالدم،،سامر كان واقف بعيد علاها شوية حس حاجة غريبة قلبو وجعو عليها مش فاهم شبيه .

دارت لخوها لقاتو سارح في هند مكتف ايديه مركز معاها

سامر امشي وخي لا يشوفك حد تو يفهمكم بالغلط

-ادخل فيسع داويها و سكر عليا فمك😑

هبط جاد مالكرهبة سلم على الجماعة بدم بارد

-زياد:هك جايب معاك ضياف

-آهم راجعين للفيلا اما جبت معايا صالح و عايلتو جدك شاف خدمتو في الجنينة عجبتو اكد عليا نجيبو..

دخلت اسيل تغلي من جاد كيفاه يجيب معاه صالح و بناتو سلمت على سلفاتها و قعدت معاهم..

ايثار و اثير مازالو واقفين بحذا الباب

-اثير: يااا ربي والله حاشمة يا ايثار😳

-وخيتي علاه حاشمة شكون الخديمة انا و الا انت

-اك اللفعة اكيد الداخل هي و بناتها تو يطيرولنا كيفنا😡

-كيفك انت مش كيفي انا، خاطرني مش طايقة منظرهم و زيد اك الخرا لاخر 😠نشالله ما نشوفوش..

-ايثار شوف المزرعة متاعهم تباركاالله ربي يزيدهم نشالله تقول علينا مش في تونس...

ايثار مش معاها جملى تغلي عالفازة لعملها جاد كيفاه جابهم معاه اكيد ناوي يذلها و يهينها..

هنيدة و لجين متعدين شفوهم

-سامحونا يا بنات شكونكم؟؟؟؟😊

-احنا بنات صالح عساس فيلة جاد

اهلا و مرحبا بيكم 😊😚 تفضلو علاه واقفين هنا!!

دخلو ل الصالة وين النسا الكل ملمومين

-يا جماعة هاذم بنات العم صالح

اسيل تتشوحر شايفة روحها عليهم😌

-اوكا الكوجينة من غادي اقعدو فيها

وقفت عيشة تسلم عليهم 😘😘

-علاه اللطف و هو يصير ضيافنا على راسنا من فوق😆

-هنيدة :اي مشينا حذا البنات خير اي

-لجين اكيد تخنقتو اهي البيت هذي كان تحبو نحو حيجاباتكم تفرهدو شوية مدامنا بنات صافي و الكلنا منحين..قالولها باهي و نحو

لجين و هنيدة باهتين فيهم😲😍

-تباركالله و ماشاالله سبحانو ربي شيخلق محلاكم البنات

-هنيدة على ايثار:فكرتني ب ممثلة تركية اما انت ازين سبحان الله زينكم طاغي ما وقعش 😍

-لجين :قسما بالله كان يشوفكم مجد خويا هو عندو طرف عقل يكملو يطيرو لا عاد يخزر لغيركم

-هههه خللي عاد من اذاكا تكونلو التوبة على ايديهم😂 حقا شنو اسمكم؟؟

-انا ايثار و اختي اثير

-اساميكم تهبل اما غريبة😅😆انا هنيدة تشرفت بيكم

-و انا لجين😝البنات قاعدين في الجنينة التيلانية ايا تعرفو عليهم والله تحبوهم

- ااا لجين بلاهي وين كنتو هاملين؟هنيدة وخيتي طلعو شكون ريت..شفت جاد بكري تصدقوني كان نقلكم تتعبو و تفشلو من زينو يفتق قنبلة موقوتة مش لعب😍

-هند:اي قومو زعمة زعمة نسلمو على جدي و اكيد هو قاعد معاهم شوقتوني من كثر حديثكم عليه

دانا كلبت سايي طلعت على الكرسي

-يا بنات رو هكا هكا طوييل تقول عرصة و خلي عاد من بدنو المخدوم و عينيه القري و ملامحو الصعيبة يشبه لعم الياس يرحمو والله نسخة منو

هنيدة: يكب سعودكم نشالله اكثر ماهي مكبوبة فضحتونا قدام البنات هههه لا تربحكم

دانا تعرفهم شوية قامت متحمسة سلمت عليهم😙

-ياااااا اثر و اثير؟؟!!

ايثار تضحك عليها

-ايثار مش اثر يا دانا.. حصيلو قامو الكل سلمو عليهم،،

*عند الرجال..

الجو رايض الكلهم منسجمين مع بعضهم كالعادة كان جاد في وسطهم سارح مش معبر حد يحرق في الدخان على بعضو القارو في جرت خوه..جدو تغشش منو

- جاد يزي بركا قتلتنا بريحة هالسم😡

-بالك نتكيف بفمك انت 😒

محمود:جاد يزي عيب قدر لاكبر منك

قعد بالباهي و هز حاجبو

-هذا قانونكم طبقوه وحدكم انا في قانوني ما نقدر حد

-اسامة: جاد قوم نخرجو البرا

-ايا والله حتى انا تخنقت في وسطكم

-احمد: احسن ملا راحة😏

سمعو جاد رجعلو جبدو بالسياسة وقفو

-لوح عليك مني كان نحطك في راسي صدقني اندمك😏

-خوفتني،،وريني عرض كتافك تره😑 وكيما كل مرة قبل ما يضرب حد دور خاتمو بصبعو هز ايدو نفض بيهم على اكتاف احمد😏😡 و جاااك يجبد عليه بكف طيحو لوطا 😂😅

-و على خاطرك ولد العم ما نحبش نضرك لذا ابعدني خير،

( حطواااااا جاااااام قبل ما تقراااااو)

الحلقة 20: (شوية تركيز احداث جديدة و منحنى اخر😍)

قامو الكل تلمو بيهم و يقومو في احمد

-فيصل:بابا شد علينا ولد ولدك ولا تو نتصرفو وحدنا

-كان عندك ريح ذري عشرة لا انت ولا ولادك و لا عشرة منك تعملولي حاجة😬

-اسكتو لعنة الله عليكم لا مقدرين كبير ولا صغير

-احمد: موتك على ايدي يا جاد

-ههه رووح..و انت موتك وحدها ما تكفينيش

-جاد،احمد😠😠 كان ما تسكتوش لا عاد نوريكم وجهي..اسامة خرج جاد و انت احمد ريض..

خرجو مش طايقين رواحهم ...

-اش بعزاك،،تحكم في اعصابك اااا زحي و انت كالحريقة..مهما كانو فاللخر ماهم الا عمك و ولدو

-وحق محمد كان نحرقهم الكل لا يهمني حد ولا نستعرف بحد غيرك

-فاهمك يا جاد اما انت ساعات تتسرع و ما تتحكمش في غشك

-اي بالضبط😞يا فاهمني انت😒

-اكيد مسدسك🔫 تحتك برا يا خويا هزو و اسرح فرغ غشك بعيد اخطانا من شرك

-فكرتني فالمسدس اي شقولك نرجعلو اك الوبش حياتو مرهونة في رصاصة ديراكت بين عينو 😈😠😆 ما نرتاح و نطمان كان كيف يسيل الدم😏

-شبيك وليت مجودر ااا خرا ريض قلو ترجعلو

-باهي نحطو خطار؟كل واحد يمشي في شيرة واللي يصيد اكثر يطلب اي حاجة من صاحبو😉

-مشات معاك..اي حاجة متأكد؟نعرفك بكلمتك يا ولد الياس رد بالك ترجع فيها

-مريقل.. و اطلب لتحب كلمة رجال ....😮😲؟؟

هدات الامور عند الجماعة و احمد سكت اما مازال يغلي دخلاني مش ناوي على الخير

-عادل: لتو تغلي انت ؟ محقكش يا احمد ،،انت غالط كيف استفزيتو

-مانيش معديهالو الحكاية والله ما نكلفهالو غالية..

-ههه شعندك تعمل بربي..تقتلو مثلا؟ تتوقع السفارة الامريكية تسيبك؟ بالازمة تحشيك في قلبو تتعفن تعدي عمرك سلاطة..هو فار حبوسات و انت مكش قدو

-تو نشوفو قدو ولا.. مهما كان جبروت العبد و قوتو اكيد عندو نقطة ضعف وانا لازم نلقاها هو صحيح وجعلي خدي بالكف انا ياش نوجعلو قلبو بانسان يحبو

-قداكش زوالي خويا راااهو شيطان افهم معناها لا احساس ولا ضمير ولا قلب تي حتى المرا لربتو و تغربت معاه و دفنت شبابها على خاطرو كيفها طيف الحيط بالنسبة ليه لذا حكاية توجعلو قلبو هذي نحيها من مخك زايد شوفلك حاجة اخرى

-لا.. الا ما تكون يكون عندو ماضي و لا حاضر مانيش مأيس و بيناتنا الايام..😲😨..

كملو صيدو و رجعو للمزرعة اما ما دخلوش دخلو يطلو عالحصنة يبرمجو في خرجة و بعدها خرجو اتكا عالحيط هبط معاه و شعل قارو قعد بجنبو اسامة ساكتين

-جاد بجاه محمد نحي علبا هالدخان نفختلي روارية و خنقتني 😤😥

-اسامة؟!!!

-هاااااا اشكي

-انا هو لتخنقت نحب نرجع لامريكا😟

-نعرف ل انت مستحيل تتأقلم مع العيشة في تونس اما حتى غادي مضمض حياتك دمار في دمار تي شخليت ما عملتش يا جاد والله خايف لا يدور عليك الزمان و تلعب القدرة دورها و يتقلب السحر على الساحر..

-انت اكثر واحد تعرفني ناقم على الدنيا و كاره دين امها هالعيشة بللي فيها نمشي للموت بساقي و ما نخافش خاطر نمشي بمقولت نعيش كل نها لنهارو كأنو لخر و كان دار الزمان لا نندم ولا نسامح،،ادعي ربك ما تجيش انت غي عراضي برك 😉😐

جاء وقت العشا تلمو الناس الكل على طاولة وحدة اسامة وجاد آخر عباد ربي كالعادة بحكم دخلو دوشو ..قعد على راس الطاولة مالشيرة الاخرى مقابل جدو صحيح تنفس شوية كيف حكى مع اسامة اما باقي يحس روحو مقلق ناقصتو حاجة😞

-وين غبرت هالفرخة مالي جينا ماريتش خليقتها زعمو ويني عااه وين نستحقها نحب نشوفها و نتنفس كالعباد يجري الدم في عروقي و تهدا دقات قلبي لكل نضرة كيفاه مش منضمة من اصلو.. بلاهي كان انا داخل في حيط نلوم على قلبي لواه مالا؟!

مازال يسأل في روحو يستنى في اجابة هز راسو شافهة داخلة هيا و اثير و دانا عينو وساعت مالفرحة رجعتلو روحو .. قداه توحشها حتى في وسط المشاكل هذي لكل يخمم فيها ما غابتش من بالو لحضة..

اسيل شافتهم ديراكت تكلمت

-هاني الكوجينة غادي كولو فيها😒

قحرلها جاد قحرة متع موت..

-كلامي ما يتعاودش مرتين يا اسيل

بلعت ريقها و سكتت ..قامت مهى تسلم عليهم و تعاود عجبتها اثير تخزر ليهم الزوز و تصللي عالنبي

الاولاد كيف كيف يتهامسو بين بعضهم جاد شلق بيهم فد و ندم عالدقية لجابهم فيها معاه و ما نجم يقلهم شي بالزهر جات مقابلتو سامر شاف هند سألها بعينو لباس ولا مرقت فيه دانا و جود كل وحدة من شيرة مركزة مع جاد و هو كل مرة من تحت لتحت يخطف خزرة من ايثار يصبر بيها قلبو.. تاليفونو نوقز و ايهم يطلب فيه علق عليه عاود طلبو هز عليه خاطر متفاهمين كان علق عليه مرة ىاهو لاهي وكان هو شد الصحيح و عاود كلمو راهي صارت كارثة😢😓..

-اشكي فيسع مش فاضي

-ضيعنا بلاصت ماكس شلق بينا في جرتو .حصلنا

شاد كاس ماء مالعصب عصرو بين ايدو تكسر تجرح دموماتو تقطر و هو مش هنا لا حاس بشي، حسبتو المرة هذي طلعت غالطة.. الكلهم تفجعو اما لا حد تجرأ قاملو والا كلمو...

(حطوااااا جااااام قبل ما تقرااااو)

الحلقة 21 :

مازال مسيطر على روحو لين معادش فيه هز روحو و خرج للبلكون يحكي وجهو تكبس و عروقو ضهرت طلعو الدم ولا يعيط و كشاكشو تتناطر

-كمشة بهايم نخدم فيهم غلطة شكون هذي اكيد مش انت يا ايهم؟اسمع انت صحيح صاحبي و خويا على عيني وراسي اما تعرفني في الخدمة شنو و كيفاه لوجلي عليه الخاين لبيناتكم و اقتلو خير ما نضطر نجي انا بيدي و نشعلهم الكل على بعضهم..وانت ما فماش رجوع لتونس كان ماتشوف حل للحكاية،ايهم انت اكثر واحد تعرف كان قعد ماكس عايش شنو ينجم يصير لازم يموت تفهم ولا و ماذبيا معادش نشوف نمروك في تاليفوني كان كيف تجيب خبير يصلح 😠😈😡

كمل كلامو و علق عليه في لحضة ملامحو رجعت باردة كأنو مش هو تو لكان قالب الدنيا هدا كيف رجع حذاهم و شافها خايفة مفجوعة من صياحو، لعن روحو الف لعنة ما كان يرا في حد على الطاولة بخلافها،تخزرلو في عينو نظرة خوف مع لوم شاف فيهم برشا اسألة مطالب انو يلقالهم اجابة نظرتها كانت كيف المهدأ ليه وفي وسط هاكا الكل وقف و تبسملها تبسيمة دخلتها بعضها فيقتها على روحها حاجة داخلها تقلها مش من حقك..

قعد يتعشا بعد ما غسل ايدو ولف الجرح اكاكا من غير ما دواه..ياكل و هوما مركزين معاه،كيفاه انسان بعد هاكا الكل و بعد الشوهة لعملها و الصياح قادر انو يرجع هادي كأنو ما صار شي..خزرلهم معناها شبيكم؟؟

رجعو ياكلو كان هي بقات حايرة فيه و في تصروفاتو

-هالمخلوق مناش مصنوع يااربي يا نهار يجلطني قداه متناقض كل مرة في حالة كالطقس متقلب ما يفهمو حد و ماينجم حد يتنبأ بالجنن متاعو.. شلق بيها هايمة فيه ضحك عليها بالصوت و غمزها معناها شبيك؟؟ 😉😍 حشمت هبطت راسها و وجها حمار زاد شاخ عليها اما ضحكتو ما طولتش برشا ستغرب في روحو،،سحرتو بعينها و براءتها حار كيفاه دوب شافها نارو بردت.

-هالفرخة شعملت فيا يا ربي و شمازالت باش تعمل،،مللي عرفتها و هي تاكل في المسبط من عند خوها و الا في البخص من عند اسيل هههه😂 لا نهار ريتها تضحك ديماتبكي و تخرنن لا مرة تبسمت تبسيمة كيف العباد تي هو انا و ساعات نشيخ ضحك يا من بهامت العباد والا من هك الهامل اسامة..اما محلاها في حلاتها الكل عسل اصل😘😍 هي ساكتة و تسحرت بيها مالا كان يجي نهار و نشوف حتى تبسيمة منها نموت وقتها؟😂😱

ضحك على روحو و على الهبلة ليسيب فيها كيبدا يحكي وحدو،،اما قمة التناقض لفيه خلتو يرجع يتنرفز تفكر مشكلتو ،كيفا باش يعمل ضيع فرصة ما يعرش قداه باش يستنى حتى تجي مرة اخرى

-ماكس لازم يموت بأي طريقة،،😈

لطخ السكينة و الفرشيطة لكان ياكل بيهم على الطاولة بعصب فزعهم الكل و قام خرج ..

*في الوقت هذا هبطت طيارتو في مطار تونس خارج معنق امو لكانت تمشي بجنبو طلعو في الكرهبة بعد ما ريقلو امورهم .

-ايييه يا امي قداه عندي تو ما عفستش هالبلاد اخر مرة جيت فيها كان عمري 17 سنة ههه و بالحبابة و الكبابة باش خليتني نجي مع جدي حتى 3 ايام ما كملتهمش و كليتني بالتاليفونات روح روح😂اما بربي كيفاه جات على بالك هالجية والله تصدمت كيف كلمتني و قتلي خوذ كونجي و روح تو طالعين لتونس فجعتني و اول حاجة جات البالي واحد من عزيزي ولا مماتي توفى، قبل كيف كنت نقلك ايا نعملو عليهم طلا تولي ترعش عليا و تهز خشمك،شنو تبدل تو ههه ولا ناوية تعاود بالراجل الثاني

-ههه داء على لونك يا واطي تفرك فيهم عليا تو؟!😂ماك تقنقن عليا توحشت عزيزي و مماتي و ندرا شكون..هاني خذيت بخاطرك اسكت عليا ما تندمنيش عزيزك و مماتك كبرو ما تعرش على عزرائيل وقتاه يحضر وزيد بعد ما توفى بوك تقطعنا عليهم.. شهيرين من زمان و نرجعو لدويرتنا😁اصلا انت ماتنجمش اتطول برشا خدمتك تستنى فيك😝

-اووه يا سيلين يا غالية هك فسدتها كيف جبدت الخدمة و بعد تلومني انا وتبدا تسب و تلعن فيا و فيها،عنقها و باس جبينها تقلق برشا رغم اللي هيا فرحانة اما ديما يشوف نظرة حزن في عينها المرض وفاها

-نشاالله الهوى هنا و الجو يفيدوك و تبرا حتى شوية و ترجعلي امي المقربعة لنعرفها😂

-والله ساقط حتى في لحضات الحزن تفدلك😘نشالله وليدي والله هاكا ما نتمني بقدرة ربي ما نخليكش وحدك و ما نرجعو ل نيويرك كان و مريتك معاك.

-😂😂بو زينك سلونتي باااز تفدلك انا وين غاطس وانت فاش تخمم تي كان نلقى اك الكلب يتسمى مش عرست برك😂😡

-اووه يا وليدي هك فسدتها حتى انت😜 اي حديث لازم باش ادخل فيه هالواطي لتلوج عليه عندك سنين و سنين تو.. كانتلك اول مهمة مللي ختاروك في الخدمة 😦لا تعدا عليك نهار رايض في جرتو،تعرفو تحروكات بعضكم الكل و الزوز لاحبيتو تتنازلو لا انت عرفت نتضرو هالبوس و شفتو ولا هو نجم يحصلك،ربي يقويك وليدي و يسترك

-اي يامي والله تعبت و فديت 7 سنين في هالخدمة والمهمة هذي بالذات خذاتلي وقتي الكل ليل مع نهار رغملي المهمات لخرين الكل بصعبهم و خطرهم كانولي ساهلين اما هذا عارف يحسبها مليح مش ساهل، كل شي عندي اوراق،فيديووات بصمات برشا حاجات و شدينا منهم برشا و في التحقيق لا واحد قر و وصلنا ل الراس الكبير و زيد الادلة لعندي الكل ما يوصلونيش ليه ، بخلاف تهديداتو لتوصلني بالصوت منعرف عليه شي و اسافوار الصوت صوتو ولا ..لازم نشدو بالكمشة...

(حطوااااا جااام قبل ما تقراااااو)

الحلقة 22: (ركزو مليح)

#جوزيف(ماكس) توأم جاد 29 سنة عميل في P.A.C الامريكية من ام امريكية متعلق بيها برشا و بو تونسي، ختاروه يكون عميل غي عمر 22سنة تبعوه لقاو فيه الذكاء و الفطنة دقة الملاحضة و القوة،هزوه و علموه كل شي، بخدمتو و تفوقو بشوية لين ولى احسن عميل ترقى برشا مرات ياخو في اصعب المهمات و ينجح فيهم رغم هذا الكل عجز في مهمة وحدة،عصابة مافيا "diable" هكا اسمهم 7 سنين و هو في جرتهم مللي بدا المهمة و هو عايش باسم مستعار(ماكس)تلز يعيش دومانهم و يخالط منهم برشا و هكاكا عرف عليهم كل شي عطللهم برشا عمليات و تهريبات و جرائم امنيتو الوحيدة انو ينتقم لموت صاحبو لتربا معاه من الصغرة هو دخل قبلو للخدمة وهو لكان مترأس المهمة هذي و تقتل في عملية على ايدين زعيمهم الي لحد الان ما يعرف عليه شي..بعد موتو تولى هو المهمة،شد برشا من رجالها و في كل تحقيق ما يوصل معاهم لشي يختارو الموت والحبس على انهم يبيعو بوسهم و الي هو جاد،رغم الادلة لعندو اوراق و فيديووات و تسجيلات و برشا حاجات اخرين الا انو هذا الكل ما عطاشو راس خيط يهزو ليه وهو ذكي برشا حاسب حساباتو صح مش ساهل و عمرو لا خلى حتى شبه دليل يدينو..جوزيف عكس جاد تقول مش توامة اما اكيد بيناتهم شبه،نفس عين امهم و نفس سمورية بوهم حرجو مستصفر شوية لحية خفيفة اقل ما يقال عليه قنبلة موقوتة😍💣زينو غربي اكثر من جاد..توامة اما عكس بعضهم في كل شي جوزيف مقربع صاحب جو نبار من اعلى تيراز بزناس اما في الخدمة صعيب جدي اللعب لا ،الحاجة الوحيدة لتجمعهم الشامة الي في كتفهم اليمين من قدام

#سيلين:مرا قوية طيبة و حنينة،ام جوزيف او بالاحرى خالتو تعشقو عشق اعمى رغم الي هو مش ولدها من صلبها خاطر ما تجيبش صغار راجلها تونسي و عاشت في تونس بعد العرس في جربة و تعرف تحكي تونسي بالهي،،كانت متعلقة برشا بأختها كارمن (ام جاد و جوزيف) علاقتهم كانت قوية و متينة يموتو على بعضهم لدرجة خلت كارمن تحس بمعانات اختها و تعطيها قطعة من روحها مللي عرفت الي هي حبلة و عندها توامة ولاد خذات قرار تعطيها واحد منهم،،و ليلة الولادة كانت نقطة تحول في حياة جاد و جوزيف لمزالو كحطو ساقيهم في الدنيا..

●فلاش باك..

29 سنة لتالي و بالتحديد 14 فيفري 1988..

كانت ليلة ما تنبحش فيها الكلاب كيما يقولو مطر،رعد و ريح قوية،،راقدة في بيت من كلينيكات نيويورك تستنى في الطبيبة تجي،و يدخلوها لبيت العمليلت تولد الياس راجلها مش معاها ضطر انو يسافر بخدمة هو وصاحبو اوس (راجل سيلين) قراو مع بعضهم من الصغرة و سافرو لامريكا و غادي تعرفو على الخوات الزوز سيلين و كارمن و عرسو بيهم...

متكية حاطة يدها على كرشها تخمم في مصير ولادها احساسها يقلها انو الدنيا باش تفرقهم بطريقة او بغيرها دق الباب و تحل دخلت سيلين قعدت بجنبها..

-كارمن عزيزتي سافا شتحس في روحك؟

-حمد لباس مقلقة شوية نشالله تتعدا العملية على خير

-لباس نشالله😔اكيد ذادا خايفة مللي جاي..كارمن صارحة خايفة انك تتراجع في كلامك و تجبد بيا 4سنين توا معرسة و ربي ما رزقناش عيش اختي ما تعملهاش بينا تعبت معاك في كل شي و تلهيت بيك انا و اوس كنا معاك لحضة بلحظة اكثر حتى من الياس ل لاهي كان في خدمتو راجلي يستنا فيك وقتاه بركا تولد اكثر من راجلك خاطر نعرفو قيمة انك تتحرم من هالنعمة انت وحدك وحدك جيتنا قتلنا نعطيكم واحد من اولادي من غير ما يعرف الياس،انت لعطيتنا امل و عيشتنا عليه...بدات تبكي😢

-اس عيش اختي يزي والله لاني ناقصة.فيبالك كنت انجم نعطي هملك الزوز لولاد اما ما نجمتش نحرم الياس و نحرم روحي حتى من انو نخلي واحد منهم عندي😢

-كارمن شبيك علاه كنت تنجم تعطيهملنا الزوز ولادك لحمك و دمك تعبت عليهم و مازلت باش تتعب،انا بيدي حايرة صحيح احنا نموتو على خاطر بعضنا اما ما فما حتى ام تعطي كبدتها حتى لاختها و وين نسألك تبرولني بكلمتين و تلعبلي عالوتر الحساس و تقلي تو تعرف كل شي في وقتو اما مش عليا انا يا كارمن اختك راني و حاسة فما حلقة ناقصة..شنو مخبية علينا؟؟

-اي يضهرلي جاء الوقت باش تعرف حتى انا الحمل حملتو وحدي و ثقل عليا و معادش انجم اكثر الكلام لباش تسمعو توعدني يتدفن في البيت هذي و يتدفن معايا و معاك..

-اي نوعدك احكي يا كارمن راك قتلتني😢

-سيلين انا مريضة عندي كونسار 😦 (اللهم عافينا) المرض لخذا منا امنا و باش ياخذني انا توا😔ما نعرش قداه مازالي في هالدنيا ممكن نموت تحت العملية و ممكن بعد،نشالله ربي يكتبلي نعيش حتى شوية نربيهم و نشوفهم و هوما يكبرو و يسامحني خاطر باش نفرقهم و الله اعلم بمصيري و مصيرهم المجهول..تفاهمت مع الطبة بعد ما نولد يقولو ل الياس انو العملية كانت صعيبة وقعلي فيها نزيف و فقدنا واحد من التوامة،وقتها انت اخلق اي سبة هزو و امشي سافر ابعد بعيد و اقطعنا كان لزم و انا تو نتواصل معاكم بأي طريقة و نزورك..كان تحب تخليه عندك لازم الياس ما يعرف بشي كان يسمع يقيم القيامة و يفكهولك..

(حطواااا جاااام قبل ما تقراااو)

الحلقة 23:

سكتت شوية..غصة في حلقها منعتها مالكلام عينها تشوف بيهم فلوو بالدموع لا نجمت تسكت لا نجمت تكمل الوقت داهمها مللي بداولها علامات المرض مكنها الشك عملت التحاليل الازمة و شكها كان في محلو ايست ما حكات لحد خبات عليهم خاطر فاقت بيه روتارد برشا و العلامات ما ضهروش في وقتهم و قررت انها تعيش لمازلها من حياتها مع راجلها..فاقت من سرحتها و كملت كلامها بالسيف تحاول تتقوا على روحها

-الطبيب قلي ممكن تعيش من عام ل3 سنين بالمرض و فما احتمال ما اتطولش و تموت😢حولتلك شطر املاكي باسمك امانة عليك تكتبهم باسم جوزيف و الشطر لاخر خليتو لجاد،هكا نحب نسميهم سيلين في صورة ما مت تحت العملية😍مانيش باش نوصيك على ولدي خاطر من الليلة باش يولي ولدك😢😢

سيلين تسمع في كلام اختها مصدومة شدها البكا و لسانها تعقد،من صغرهم مع بعضهم ما تفارقوش تيتمو على صغر سنهم في جرت هالمرض مماتت امهم بعدها بوهم ما تحملش فراقها دخل في ديبريسيون قوية و مات في حادث عاشو مع جدهم و بعد مات وقتها هي عمرها 19سنة و كارمن 17 كملو حياتهم لين تعرفو على الياس و اوس و عرسو..فاقت على صوت الفرملية لقتلها حضر المريضة باش نبداو العملية.. بعد 6 سوايع جاو للدنيا جاد و جوزيف الزوز على صدرها تبكي ما تعرش من الفرحة والا من خوفها انها تموت وما تملاش عينها منهم والا من على الدنيا شنو مخبيتلهم..

~~نرجعو ..2017 تونس:

*في المزرعة:

خرج البرا العصب يهز فيه و ينفض يحرق في الدخان على بعضو وقف قدام البيسين يد في مكتوبو و لخرا يتكيف بيها يخمم في شنو باش يعمل ما حطش نسبة حتى 1% الخطة متاعو تفشل و لاول مرة،كان يعرفو هالخاين لبيناتهم شكون الا ما يشرب من دمو مصيرو و حياتو الكل ممكن انها تتدمر في اي لحظة حياتو الكل ريسك في ريسك،عمرو لا ندم ثانية على مشيانو في طريق كيما هكا صحيح مالاول غلط اما هو يشوف انو صلح روحو مبعد و الي قاعد يعمل فيه توا صحيح نوعا ما،طريق ختارو بكل ارادتو حياتو تقلبت حتى شخصيتو هو في حد ذاتو تبدلت و خذات منحنا آخر عمرو لا كان يتوقع يجي نهار و تولي شخصيتو بالبرود هذا و بانعدام الضمير كسوحية قلبو و كلمتو الي مهما صار عمرو لا يتراجع فيها..صحيح كانو من اغنى العايلات و اكبرها اما الانتوراج لعاش فيه و صحاب السوء لكانو ديما في جرتو بالسيف عليه وصل ل الطريق هذا،حكايتو مع المافيا بدات وقت خرج مع اصحابو يسهرو في بواتا دوب دخلو و مالباب لاحظ انو فما برشا عينين عليه منهم راجل جلبلو انتباهو كان قاعد في وسط شبعة بنات مبزع عالفوتاي طالق ايديه الزوز على طولهم في فمو سيغارو و على الطاولة دبابز شراب الوان اشكال مركوزين قدامو شطر وجهو مافماش من تراس الشلاط لمعبيه،عينو ما هبطهاش يتبعلو في كل تحروكاتو و كيف تجي العين في العين يطيشلو تبسيمة و يهز الكاس يعمل رشفة..في الاخر خلى البنات و قام قعد وحدو و زاد ركز معاه اكثر،جاد معطاشو اهمية كبيرة اما استغرب و شك بالك يعرفو والا يعرف بوه خاطر اعداؤو و منافسيه برشا بالك واحد منهم..آخر السهرية جاو كمشة ولاد يتلكشو على جاد و ظاهر انهم مبعوثين ليه بالذات من كلمة لكلمة لحمة و كلات بعضها اما خرج منهم الكل بسهولة ما تحركش برشا يضرب وهو واقف في بلاصتو هادي و ملامحو باردة انسان رغم صغر سنو لكان في 16سنة وقتها اما يضهر اكبر شوية بحكم جهامتو و بدنو المخدوم يعرف شيعمل،يعرف نيقاط ضعف خصمو و وين يضرب بالضبط..الحاجات هاذم الكل لاحظهم الراجل في جاد و هو يفشخ في الولاد،بعد ما تفضت العركة خرج مع صحابو و هو طالع في كرهبتو سمع اسمو و استغرب كيف لقاه نفس الشخص لقعدة كاملة و هو يتبع فيه بعينو😮😞

-تفضل تعرفني؟

-ما عنديش برشا ملي نعرفك اما عندي ما نحكي معاك كان تسمح ممكن يهمك الموضوع

-انا ما نعرفكش و ماعندي علاه نحكي معاك،ايا الاولاد

-لحظة..نأكدلك ما تندمش

-اوكي اما فيسع ما عنديش برشا وقت

كان يحكي معاه ببرود مام با خزرلو والا عبرو انسان متملح مادنيا ماعلا بالو بشي و كأنو غريزة الفضول لعندو منعدمة و هذا ليحب عليه

-باهي مالا كيف انت مزروب نخليلك الكارت متاعي نتمنى تكلمني غدوة اكيد.

من غدوة تقابلو و الراجل كان صريح و جاه ماللخر هو رئيس مافية دروغ و يحب على شكون ثيقة يولي حارسو الشخصي و ايدو اليمين في كل شي جاد رفض ماللول اما لاخر بقا في جرتو خمم مليح لقا روحو موافق انسان متملح كيفو ما عندو ما يخسر امو و ماتت و بوه ولا حاسبو همو الوحيد خدمتو و افارياتو مش سائل عليه علاقتو بيه بعيدة على انها تكون علاقة بو بولدو قليل وين يتقابلو،كيف كيف اعمامو و جدو و ولاد عمامو لعلاقتهم كانت متوترة زادا مع ولدهم و معاه هو،الوحيد ليتفاهم معاه اسامة ولد عمتو و تبقت خالتو الوحيدة هي زادا الي ما يعرف عليها شي و لا عمرو شافها حتى في التصاور و من غادي مشى جاد في طريق الاجرام و احترف فيه بعد اعوام قليلة مات الراجل و كمل جاد طريقو خاطرو كان معروف في الوسط الاجرامي و عند بعض الناس انو ولد رئيس العصابة..كل ما يزيد يكبر كل ما يفيق على وضعو و يستوعب قداه هالسم ليصنع فيه و يروجو للعباد قاتل في جرتو كبار وصغار ماتو و تضرو،عايلات تفرقت و ديار تخربت..صحيح كان منعدم الضمير و الاحساس اما مش ل الدرجة هاكي وقتها..

(حطواااا جااام قبل ما تقراااااو)

الحلقة 24 :

كل ما يزيد يكبر كل ما يفيق على وضعو و يستوعب قداه هالسم ليصنع فيه و يروجو للعباد قاتل في جرتو كبار وصغار ماتو و تضرو،عايلات تفرقت و ديار تخربت..صحيح كان منعدم الضمير و الاحساس اما مش ل الدرجة هاكي وقتها..

قرر انو يبعد على الطريق اذاكا اما بعد و ما بعدش!!😞 انجمو نقولو كمل فيه بطريقة اخرى،اتطور برشا و ولى جنب لجنب مع العدالة و منافسهم في نفس الوقت..صحيح كان يقتل يخطف و يحرق يشوه عباد و يتحيل على شريكات و ناس قد شعر الراس اما الكلهم كانو يستاهلو،كان يقتل عباد هوما نفسهم قتلو عباد اخرين،يخطف عباد تستاهل انها تتخطف،يتحيل على شركات و عباد يفكلهم لي فوقم والي تحتهم خاطر هوما بيدهم خذاو هكا الكل بالحيلة من عباد اخرين و يرجع كل شي للمالكين الاصليين باختصار مجرم يعاقب في المجرمين،هو نفسو كان مشكوك فيه مالعدالة الامريكية خاطر يخدم في خدمة مالمفروض تكون خدمتهم اما ما عندهم عليه حتى دليل قاطع يدينو ..هو ديما سابقهم بخطوة في كل شي ياخذ بثأر العباد من عباد اخرين الي مالمفروض يعاقبهم القانون،الوحيد لمات على ايدو هو رئيس شرطة مكافحة المخدرات(صاحب جوزيف) كانت عملية كبيرة صارت فيها اشتباكات بين المافيا لهو فيها و اعوان من نفس الشرطة و غادي خرجت منو رصاصة طايشة جات في رئيس الفرقة و مات..

خرجت ل الجردة فادة خلوقها في خشمها وصبت ورا الفيلا تأكدت انو ما فما حتى حد نحات حجابها و قعدت على الكرسي..تسمع في حس وراها قامت فيسع مفجوعة تغطي في شعرها لتحل😂😮

-والله لا تحيا ولا تحشم نورمال هاد عليا هكاكا عاللقل عيط كحكح اعمل اي حاجة 😡😠تحب مالا شكون يتكشف على اختك و هي من غير حجاب؟

احمد دخل بعضو خرج يتمشا ما فيبالوش فما شكون غادي

-سامحني مانيش قاصد مافيباليش فما شكون هنا😍

خلتو و مشات و هي تحكي

-اي سي البغل و تذاكا علاه قتلك اعمل اي حاجة باش تعرف ملا حناط متع وذني😒 والله لاك متربي😑

يتبع فيها بعينيه لين دارت الدورة للفيلا من قدام نسى روحو و اصلو و تربيتو ونسى دينو لحرم عليه يتكشف على بنات الناس شافها نسى حتى كرها الاعمى لجاد😂😂

-سبحان من صورها😍سبحان لخلقها و خلاها كاملة و الكمال لله وحدو،زعمة شكون هذي لاهي وحدة من بنات العم و لا تشبهنا في شي😕اوووه تتبيلك على راسك يا احمد كان تتطلع وحدة من بنات اسيل.😲

فاق من تخمامو لرجعو سنين لتالي كيف شافها متعدية من قدامو يفرق بيناتهم البيسبن كانت تمشي شاردة هايمة ما نتبهتش حتى لوجودو من اصلو،قدم خطوة على اساس ماشيلها اما وقفتو ايدين عنقتو من تالي بقوة وراس اتكى على ضهرو من صوتها عرفها جود

-جاد نحبك نموت عليك عشقتك اول ما ريتك حس بيا امان ديما في بالي لبستلك القصير عريت غطيت نكلمك تمرق فيا مكش ترا فيا و مكش معبرني جملا😢😭

شداها يدها على اساس باش يبعدها على تلفيتت ايثار و جات العين في العين حبس ما عمل شي ستناها حتى تتعدا كوم كوا يبينلها لهوا ما علابالوش بيها و مش في مخو و كيفها كيف غيرها و انو عايش حياتو و كل نهار مع وحدة شكل حب يحرقها كيما قاعدة تحرق فيه كل لحظة. تبسم و كبس على ايد جود لين توجعت و صاحت صيحة دلال و تزعبين كيما العاهرات باش يضهر الي هو يتمعشق و يغرم في زمانو،خزرتلهم و كملت طريقها للبيسين لاخر ،،وقتها جاد دور جود ليه شدها خنقها😡

-ايدك تتكسر كان مازالت تتحط عليا والا انك تخمم فيها الحكاية مجرد تخمام فهمت ولا؟😠و الاشكال الي كيفك تعري تغطي راك عمرك ما تحيرلي شعرة من راسي

يعمل هكا يدزها في البيسين خلاها و دخل للفيلا طلع لبيتو😂حس راسو باش يتطرشق بالوجيعة لازمو يعمل كاس حل باب البيت و دخل و كالعادة ديراكت للمخزن الصغير الي في يقرا في الاسامي لوج بعينو شي ما لقاش حتى دبوزة من "ماسندرا شيري"فد خرج وقف على المرايا قابلتو دبوزة ويسكي فوق الطاولة نوع قوي في مطعمو و تأثيرو على العبد،نحى الفاست طيشها على الفرش و حل مقافل الشوميز الفوقانين صب كاس طيش فيه كعبات لقلاسون و خرج للبلكون شعل سيقارو عمل جبدة و رشفة مالكاس ديراكت غمض عينو اول مرة يجربو قوي برشا عاود بالرشفة الثانية،دور عينو في الجردة الدايرة بالبيسين شافها متكية على الكرسي طالقة روحهت مش هنا تبسم و عمل الرشفة الثالثة

-يا فرخة متكية شايخة ااه؟!و انا ناكل في روحي ماكلة شنوا عملت فيا،علاه كيف ريتك تصرفت بالطريقة اذيكا رغم كرهي لجود😞ممكن حبيت نحسسك بالغيرة لشاعلة فيا زعمة غرت؟والا ممكن حبيت نقهرك و نكرهك فيا!ممكن زادا كلام اسامة نهارتها صحيح لازمني نبعد عليك و نكذب مشاعري و ندغنها و نغطي عين ااشمس بالغربال و نكذب على روحي و نحاول نقنعها انك نزوة و نفحة هكا؟ حياتي الكل رافض اني نحب و نتحب ديما وحدي براسي اعدائي برشا و الكلها تستنالي فيها الناس الكل تلوجلي على نقطة ضعف يهدوني بيها،طول عمري ماخذ احتياطي اصلا حد الان ماجاتش حتى انثى هزتلي كياني و زلزلتلي توازني قد هالفرخة هذي😙 اااه يا ملاكي شعملت في شيطانك ؟؟..😍 مخو يهز و يجيب بدا يترهوج شوية اما مازال صاحي نوعا ما كمل لقعد في الكاس فرد ضربة عمل جبدة مالسيقارو و هبط ..

(حطواااا جاااام قبل ما تقراااااو)

الحلقة 25 :

مخو يهز و يجيب بدا يترهوج شوية اما مازال صاحي نوعا ما تذكر كلام اسامة و الخطار لبيناتهم كيف يربح واحد منهم ..كان شاك في حاجة اما حب يتأكد و اذاكا علاه خلاه يربح هو.. مللي رجعو للدار و قعدو تحت الحيط كلامو لتو يزن في وذنو

-اي سي جاد هاني ربحتك تتفكر كلامك ساعتين التالي ولا؟ نعرف ولد عمي كل شي الا انو يرجع في كلامو😂

-ههه اي نتفكر مليح ما نسيتش و قتلك زادا اي حاجة مهما كانت،، اي هات شعندك؟

اسامة كان يضحك تقلب فرد قلبة ولا جدي اكثر و خزر لجاد ..اسامة في قناعت نفسو هو زادا متأكد من النتيجة و الاجابة لباش يلقاهم اما يحب يعطي فرصة لروحو و يثبت انو غالط حتى بنسبة صغيرة.. الزوز يختبرو في بعضهم على نفس الحاجة و الزوز ماليهم نفس الشك

-قتلي اطلب تاخو و انا نحبك تعطيني ايثار😲😒

جاد كان متوقع الشي هذا خاطر نهارت الصداق دوب شافها تضرب فيها شاف لمعة عينو كيف يحكيلو عليها بالعاني ساعات و كيفاه وقت صارحو ب بداية حبو ليها وقتها قلو ابعد عليها مش متاعك اعدائك برشا ووو.. سكت نهارتها ما عطاشو صرف من عدل قلو مرتي و مشا و خلاه بعدها خلط عليه اسامة ل الدوش و قلو راني نفدلك عليك و حبيت نتأكد من حبك ليها جابها بضحكة اما مش جاد لتتعدا عليه.. مش عارف شيعمل اما مش مسلم فيها،كمل لقعد في الكاس فرد ضربة عمل جبدة مالسيقارو و هبط ..

ما تشعفش عاودت نحات حجابها تمدت عالكرسي شعرها طايح على جنب مكدس في القاعة طالقة ساقيها و حاطة وحدة فوق الاخرى تشابك في صوابعها و تغلي ملي شافت هاك اللفعة معنقتو و هو شادلها يدها و نار الغيرة شاعلة فيها لين عينها دمعت،كالعادة على برة تخمم بالصوت صنعة فيها ملي هيا صغيرة لا حبت تنحيها تحكي وحدها😂

-علاه كل ما نراه نحس حاجة غريبة ندخل بعضي كرشي عبارة فراشات يطيرو في وسطها احساس مش جديد هو نفسو لحسيتو اول مرة ريتو فيها كيف تقابلنا حذا الباب و تعاركنا😂يااا ربي شيتسمى هذا زعمة حب؟!لا لا ما لازمنيش نحبو مش متاعي و مش من حقي رغم الي اسمي مربوط بإسمو.. اما علاه نهارتها عمل اك العملة منين طلع بيها حكاية العرس و احنا الزوز نعرفو الي هو ما مسنيش😞اووف هاني رجعت نهلوس تو و نكسر في راسي بأسألة ما يجاوبني عليهم كان هو..سعدي يا راقد اندرا وقتاه ناوي تفيقلي من غيبوبتك امان مش وقتها😭انا من قبل محطمة طايحة من سلوم زاد كمل عليا هالحيوان😠زعمة يجي نهار و نلبس روبت احلامي😔 تكون كبيرة بذيل طوييييل من تالي و ندخل ل الصالة ايدي في ايدو و حبيبتي ماجدة الرومي تضرب من غادي(بدات تغني) طلي بالابيض طلي يا زهرة نيسان..طلي يا حلوي و هلي بهالوش الريان..و اميرك ماسك ايديكي و قلوب الكل حواليكي و الحب يشتي عليكي ورد و بيلسان🎶🎵😍😘 تتعدالنا ليلة عالمية اصل و بعد في وسط العباد الكل يهبطني و نشطحو سلو و ترجع مجودتي تضرب 😂😆(رجعت تغني) يسمعني حين يراقصني كلمات ليست كالكلمات يأخذني من تحت ذراعي يزرعني في احدى الغيمات🎵🎶🎻🎤🎹...قص عليها ضحك جاي من تالي ترعبت قامت خطفت حجابها لفتو على راسها الكل مالخوف😂😄 لقاتو هو ماتت بالحشمة ما في بالهاش لهو بالعو خيط كان كيف ثبتت فيه

-اا بنتي شبيك تفجعت و نحي عليا هالحجاب راجلك راني😛ارجع ارجع اتكى و بربي كمل غني هو عندك صويت محلاه يا فرختي من بكري وانا واقف نتسلطن معاك اطربني اي بو زينك😍😘😘 غمزها😉و قعدها هو عالكرسي وتكاها عليه و قعد مقابلها عالكرسي لاخر بيناتهم اسباس ضيقة جوست وين يحطو ساقيهم،تتطلق عالكرسي و اتكى على جنبو راكز مرفقو عليه و حاط يدو على خدو يخزرلها هايم في زينها و حشمتها وجها لمشى الوان و جا الوان.. كلمة مصدومة قليلة في حقها و ما تعبرش على 1%من حالتها

-يا ربي هالمصيبة قتلني يا ربي زعمة نحلم؟ من ضحكتو لتسحر لكلمة راجلك لخرجت كالعسل من شفايفو ل هاو عندك صويت ل فرختي و بو زينك و الغمزة ل لمسة ايدو الي مالحنية و الرطابة لفيها قريب باش نرقد لقربو ليا لانفاسو لتخلطت بانفاسي لريحت بارفانو المخلطة بريحة الويسكي و الدخان لرقدتو تو على جنبو و هو يخزرلي😍😍يا قلبي بالسياسة عليا انت و هو ياسر والله 😢 لحظات تاريخية لازمهم فيدييو ههه يااا والله فكرة و زيد هو دايخ مش في وعيو نصورو نخليها عندي الله و اعلم وقتاه باش تتعاود هالضاهرة الفلكية😂😅ايواااش هكا التليفون مريقل 😘بو زيني مذكاني.. في هذي ما كذبش راني ناا وحدي في الابداع😘😘

تفكرت كلامها و خيالها عينيها وساعت و حطت يدها على فمها شهقت شهقة وحدة🙈🙊

-من وقتاه وانت هنا؟؟😡😲😲

-ههههه ااا من سعدك الراقد لمحبش يفيقلك في غيبوبة للحيوان و شعلينا فيه شكون😨 لروبة احلامك البيضة الي ب الذيل ولا شنو لدخولك ل الصالة انت والسيد متاعك ل طلي بالاييض و اميرك و قلوب وشوك وضلف و ندرا شنو معاهم لشطحت السلو المحنونة و يسمعني حين يراقصني كلمات..اما فسدتها في اللخر الزح😢 حضرتني على عرس كامل جيت في مرواحك و دخلتك انت و سي راجلك و جبدت بيا،الجحشة هذي😒

-😨😲😳وووه على سعدك يا ايثار تي هو حظر على عرس كامل هذا الحمد الله جا بالعو عاللقل كيف يفيق غدوة ما يتفكر شي..ايييهه 😥

قام قعد بالقاعدة قربلها شدلها ايدها الزوز و باس كفوفهم سرح في عينها اول مرة يشوف ملامحها بالقرب هذا الكل بعدلها شعرها من قدام عينها وباسها من خدها 😘😘

-ديما محلاك هاكا انت؟؟😍😍

(حطوااااا جااااام قبل ما تقراااااو)

الحلقة 26:

حشمت هبطت راسها تشكلت لا نجمت تقوم ولا نجمت ترجع عليه،هزلها راسها بصوت حنين دافي كان يقولولها هذا صوت جاد تكذبهم

-ايثار.!!علاه ملي عرفتك لا نهار ريتك حتى تبسمت مع اني متأكد انها تبسيها حلوة تسحر كل من حصلو الشرف و شافها..عينيك حتى و انت مكش تبكي فيهم برشا حزن ياخي للمستوى هذا حياتك خايبة و ل الدرجة هذي عيشتك هنا جحيم، معاك بوك يحبك برشا و اختك تموت عليك و خوك اك الزفت كان تصرحلي اتو نمحيه اما سيادك حليت فمك و شرطت عليا نرجعو للدار (جود صوتو يقلد فيها😅)

-عندي شرط،محمد خويا يرجع للدار😒

-خوا ليك وليه نشالله مرجعتو باش كل نهار يبدا يهز فيك و ينفض هاو من تو نشوفو قلك اي كلمة راني نفسدلو خليقتو و نسفرلو بروحو و تكلمني نخلطك عليه

ضحكها كيف سمعت صوتو نسات روحها نسات الجماعة لمازالو يسهرو الداخل كان يخرج منهم حد و يشوفهم، نساتو هو شكون و تصرفت بتلقائية على طبيعتها

-ههههه ساعة انا ما نحكيش هكاكا و صوتي مش جويد للدرجة اذيكا و انت تقول عليك دجاجة مخنوقة و خويا ما تمسوش هاو النبه عليك حتى كان قتلني عندو حق كنت سبب في موتت امي كان مش انا راهي ممكن تكون عايشة بيناتهم😢 تحرمت انا و حرمتهم هوما منها و حرمتها هي منا..

عينيها تعباو بالدموع و لونهم فتاح زاد هبل نفخ بعصب و عدا ايدو علي شعرو

-يا عمبو عمري الاحرف هالخرنانة لطيحني بيها ربي ياخي تعشق البكا؟؟ ما تفدش منو ؟؟

جاوبتو بكل براءة وهي تحرك في راسها معناها لا حركة شعلتو و حرقتو من داخل غمض عينو يتمالك في روحو حلهم و جبدها ليه عنقها،الزوز في اضعف حلاتهم تفكرو اماتهم الزوز رغم الي ما عاشوش معاهم اما عمرك ما تنجم تنسى و الا تمحي من بالك الشخص الوحيد الي منو هو جيت للدنيا قعدو هكاكا نساو رواحهم و نساو هوما وين غرست راسها في صدرو تبكي بالساكتة

-شششتت عيش صغرونتي البكا لا ما عندكش علاه تلوم روحك على حاجة مش بيدك و لا بيد غيرك ،حاجة ماعندك فيها حتى ذنب اكهو ربي حبها و هزها عندو😍😘

باس جبينها و حول قعد معاها في نفس الكرسي اتكا عليه و تكاها على صدرو و عدا ايدو حضنها بيها كأنها باش تهرب والا يكون لقاعد يصير هذا الكل حلمة و خايف يفيق منها و يتصدم بالحقيقة و الواقع المرير لعايشين فيه تسمع فيه يدندن في غناية ركزت في معاه لقاتها غناية ناصيف زيتون "بربك" 😮

-لا امبو حتى نسمع بوذني ما نصدقش مش كان يقولولي راهو جاد بن الياس آل راشد يغني و في ناصيف زيتون عطاك ربي😂😲والله وحق محمد ياسر عليا الاحداث و الكلام هذا الكل فرد ليلة وعلى بعضو حتى صوتو يهبل السخطة كامل و الكمال لله ياربي عدي هالليلة على خير

كان معنقها بالقوي ضربة ثنين يبوسلها راسها حط دقنونتو على شعرها يخزر للقمرة كأنو يخاطب فيها و يغني 🎶🎵🎼

-يا قمر نزال على هالارض كرمال تسأل لحالك سؤال مين هي الاجمل منك بأكدلك محلك رح تعطيها و بدك تاخذ ريضايي تاتلاقيها هلا شوف حدي هيا و مخبيا راسا فيا ليكا مستحيا..بي ربك حادا قدي "بحبك"😲😍 وصل للكلمة هذي كلي فاق على وضعو شوية.. مش في وعيو صحيح اما يحس في حاجة مش عادية و كأنو نطق كلمة غريبة عليه و مش موجودة في قاموسو..حاطة راسها على صدرو مش مصدقة لقاعد يصير و من سابع المستحيلات يكون الراجل هذا هو نفسو جاد بن الياس آل راشد بشحمو و لحمو

-شبيه هذا لباس؟😕 كذب كذبة على روحو و صدقها يمشيش في بالو مرتو بالحق؟😨شهالحصلة لحصلتها يا ايثار اما محلاه الززح😍كنت غالطة فيه بالحق في داخلو انسان عكس الشيطان لنعرفوه الناس الكل،انسان حنين و دافي حتى من نبرة صوتو تتبدل،ديما يتظاهر بالقوة اما داخلو انسان ضعيف،،طفل صغير محتاج شكون معاه ديما،محتاج لحد يشكيلو هم الدنيا و يفرغلو قلبو😯..

هذه فرصتها هي باش تعطيه هو فرصة انو يحكي و يعبر خاطر كيف يبدا صاحي مستحيل انو يتنازل حتى و ياقف يحكي معاها طول عمرو اكاكا كبرياؤو كرامتو خط احمر و فوق الناس الكل،هزت راسها تخزرلو تبسمت و عدت يدها على لحيتو هبط راسو شوية باسهالها😍😘

-و اخيرا حصلي الشرف و كنت اول واحد يشوف احلى تبسيمة على وجه الارض العاقبة لضحكة مالوذن للوذن😂

حشمت و ما تعرش كيفاه نطقت اسمو من غير رسميات و من غير حتى حواجز..تبسم و قرب وجها مقابل وجهو

-في بالك بروحك اول مرة تنطق اسمي و اول مرة انا نسمعو منك كل حاجة منك عسل صغرونتي 😘(باسها من خشمها❤👄)

-سامحني قلتو من غير رسميات والله لا شلقت بروحي

حط صبعو على شفايفها باش تسكت و جاوبها بكلمة وحدة "انت مرتي"❤👰💏

اجابة ما توقعتهاش منو خلتها نرجع تحكي بعدها و تستجمع افكارها بالسيف😓😳

-في بالك ل انت احن و اطيب و اقسى انسان ريتو في حياتي ههههه قمة في التناقض صحيح اما في داخلك انسان آخر عكس الانسان لفارض وجودو عليك توا..

قص عليها

شوف..ما فما حتى حد ولا حتى انا في حد ذاتي فارض روحو عليا ولا يتجرأ.. انا خترت نكون الانسان هذا يا ايثار مكش باش تفهمني توا.. اما تو يجي نهار وتفهمو كل شي و الموضوع هذا سكرو والا ناقشو بينك و بين روحك كان تحب اما ميسالش رغم انك ما تعرش التفاصيل بالباهي توقع كل شي و حط روحك في بلاصتي مانيش نبرر في موقفي اما انا مقتنع بلي عملتو و نشوفو صحيح مهما كان غالط في عين الناس..

-و انا ما قلتش عكس هذا مانيش مضطرة نحط روحي في بلاصتك خاطرني على يقين انك عندك اسبابك وقتها..

(حطوااااااا جااااام قبل ما تقراااااو)

الحلقة 27:

عينو ذابلة و حمرا الكلام ينطق فيه بالسيف كاس الويسكي كان قوي عليه مش من عوايدو يشرب و يصير فيه هكا،،دخل بعضو مش فاهم شبيه احاسيسو تخلطت عليه قام و خلاها مبهمة مستغربة فيه فاتها شوية رجع باسها من رقبتها و لهوثلها حجابها على راسها😂😂 و عاود مشا😕 هالراجل ما فهماتوش..بقات تبع فيه بعينها لين دخل و ستر ربي ما تقابلش هو و دانا لكانت جاية تعيط لايثار بطلب من راشد انو يلم الموجودين الكل عندو ما يحكي..

في شيرة اخرى مالفيلا كان قاعد سامي وحدو هايم هد عليه مجد ضربو على كتفو و قعد بجنبو

-مجد:وواا صحوبة شبيك اكيد تخمم فيا اه😆

-سامي:اي بالضبط

-تي بلاهي اخطاك منها و عيش حياتك علاه تخمم في وحدة ما تعرش شكون هي اصلا😒

-نعرف كان اسمها الوهمي

-ههههه خليك عايش في الوهم مالا.. الطفلة و مشات على روحها ربي معاها و الله يسترها علاه تخمم فيها و انت ما تعرفهاش شكون، علاه ديما مخك معاها، قاعد نشوف فيك تحاول تنعزل على الناس الكل باش تقعد تخمم فيها هي

-تعرف؟!!تصدقني كان نقلك ما نعرف عليها شي😢

- و انت كيفاه تحب وحدة ما تعرفهاش

-ريت ريت والله خوك طايح من سلوم😣شكون كان يصدق الي انا سامي من طفلة لطفلة يجي نهار و نعشق.. نعشق سراب💔

-صدقني في هالبلاد الكلبة لا فما حاجة اسمها حب و البنات الكل كبعضهم دونك حكاية بيدونة

-لا لا الا هيا يا مجد والله غيرهم الكل,,مختلفة لدرجة مشلت و خلاتني،مشات من غير سبب و بدون استأذان،يا مجد ما نحب شي كان اني نطمان عليها حية والا ميتة،فرحانةولا،عرست والا مازالت،زعمة تستنا فيا؟كان نعرف لهيا عايشة متهنية و فرحانة صدقني نرتاح و نتمنالها الخير😟

-هههه يا قيسها انت😛ما تحط شي في بالك نشالله تكون بخير و اكيد عندها اسبابها،مصير الحي يتلاقى..اي قوم قوم اك الشايب يناديلنا لم الجماعة الكل اندرا شمن كارثة باش تهبط ماك تعرفو كيف يعمللنا قعيدة هكا الله يستر منو😂😄

العايلة الكل ملمومة في الصالة الكبيرة برجالهم و نساهم دخلو البنات

-اثير:يا بنات انا و ايثار هانا البرا ادخلو انتوما ضاهر حاجة عائلية عاللخر كملو و اخلطو علينا

-هنيدة:فماش خروج كيما دخلو بنات اسيل تدخلو انتم

الجو رايض الكريزمة و قوة الحضور لعاملهم جدهم راشد لروحو خلتهم الكل يحترموه و يقدروه

-والله و كبرتو يا فروخ ولازم نعرسلكم

الكلهم سكتو من الصدمة يستنوه يكمل كلامو باش يعرفو شكون ضحيتو المرة هذه و على شكون جا الدور،كيما في كل مرة يقرر وحدو و يتصرف وحدو اوامرو تتنفذ ولا شكون يعارضو

-جاد: اي ادخل في الموضوع سيبنا ما عنديش كان انت في مخي ولا خلي نقوم اخباركم ما تعنينيش

-فيصل:جاد عاونا بسكاتك و اسكت خلي يكمل كلامو

-وين ناوي توصل معايا انت يضهرلي ما حكيتش معاك😡 ننصحك ما اتطولش معايا الهدرة برشا مش ناقصك.

كان قاعد معاهم فوق من قلبو مللي دخل و هو يضحك و شايخ لين بهتو فيه اول مرة يشوفوه يضحك اما دوب شافها دخلت بلع لسانو تبسيمة لا و زيد جات و قعدت مقابلتو بالضبط

-اوووف شي من كاس الويسكي الاحرف لشربتو و شي منها هي بكري و هي قابلتني تو ناقص انا😍

قص عليه جدو و فيقو من تأمولاتو

- بعد جمعة من تو خطبة غسان و هند

غسان من الصدمة لسانو تعقد مانجمش ينطق بحرف

حالة هند ما كانتش بعيدة عليه برشا.. كيفاه باش تنجم تاخو نفس الطفل لتعشقو بنت عمتها من الصغرة،كيفاه تاخو نفس الشخص لكان يجي لامها يقلها قول ل لجين راني نحبها و نشالله تستناني.كيفاه تعرس بيه وهي لكانت مرسال غرام بيناتهم..

لجين هزت راسها تغزرلهم مبهمة مش فاهمة شي مش مصدقة الكلام لسمعتو توا الشي اقوى من انو يتصدق حب الصغرى و المراهقة قاعد يضيع منها لاقرب وحدة ليها و منها.قامت خارجة تكر في ساقها تغزر لغسان لكان ساكت كلمة ما قالهاش

-غسان:اما جد..

قص عليه و هو قايم لبيتو

-كلمة لا..انا قلت لعندي و بالطبيعة لازمو يتنفذ😡

الكلهم ساكتين قرار غريب كيما هذا و في نفس الوقت صاعقة لا كانت لا عالبال و لا عالخاطر هبطت على الناس الكل..قامو البنات خلطو على لجين لكانت قاعدة البرا

- مبروك عليك يا صاحبتي يا بنت العمة😏

-والله يا لجين لا عندي علم بحتى شي توا سمعت كيفي كيفكم..

-كذابة وثقت فيك امنتك على اسرارنا كنت مرسالنا راك،علاه خنتني و خنت ثيقتي فيك يا رسول الله من قلتهم هوما مالقيت كان غسان تحبو

-هنيدة:لجين عيش اختي اهدا شوية هند كيفها كيفنا عرفت كان توا معانا..

و هزتها دخلتها الداخل و بقات ايثار تواسي في هند...

(حطواااا جاااام قبل ما تقرااااو)

الحلقة 28:

ايثار وهي تهدي في هند الي كانت حالتها منهارة جابتلها كاس ماء شربتها وقعدت بجنبها

-والله والله يا ايثار لا فيبالي بشي و ما عندي حتى دخل ولا عمري قتلو خوذني والا تقربت منو ولا خممت فيها من اصلو😢😢ياربي عديها على خير يا رب😭

عنقتها تهدي فيها قداه الدنيا مخيبها تفرق بسهولة و تجمع بصعوبة حالهم الزوز كيف كيف عالاقل هند تنجم تبكي و تناقش و تحكي بينما هي لا,محرم عليها انها تنطق بحرف والا تشارك همها مع شكون

-هند يزي مالبكا عاد والله حممتولي قلبي الزوز انا مصدقتك،حتى لجين ما عليهاش لوم من حقها تتصدم و تعيط و تعاركك زادا حاجة عادية الخبر صدمنا الكل فما بالك هيا حب حياتها..خلي الامر يستراح و هي تهدا و انت زادا و بعد احكي معاها فهمها انتوما صحاب من الصغرة ما تخسروش بعضكم، كل شي مع الوقت ليه حل نشالله

و كان غسان حاجتو بيها تو يعمل المستحيل باش تبطل خطبتك منو و ياخذها هي

-مش باش يتجراأ و يتكلم قدام جدي والله يذبحنا ولا يسأل علينا حتى😢

-كل شي و ليه حل بقدرة ربي

خرجو النسا الكل و قعدو رجال صافي غسان الصالة خيطها و هو ماشي جاي مش عارف شيعمل جبد بوه على جنب يحكي معاه

-بابا الخطبة هذه ماليزمهاش تكمل والله لاني حاضر

-اسكت لا يسمعك عمك الحكاية فيها قطع ارقاب،ترفض بنت عمك يا واطي

-اسمعني بابا 😡هند فيها الخير و البركة اما انا نشوفها كان اختي

قاطعهم جاد يتمسخر عليه😂😂

-مبروك ولد العم تستاهل كل خير اما ملا عادة برجولية هههه اول مرة نشوفها،آآمعلم تسمع بخطبتك في نهارها و من عند جدك لهو بيدو ناوي يسيرلك حياتك😅

-😡😠كلب والله ما نوريك كيفاه تسكر فمك و تتربى فيق من سكرتك الساعة و بعد ايجا حاسبني انا و غيري

-ههه انت في الاول تعلم كيفاه تسير حياتك وحدك و بعد ايجا علمني ميسالش😝😝

-اسامة:جاد يزي سيبو

-ههه يا والله حيال عايلة غريبة عجيبة داخلة في حيط😆

قام بكل برود يمشي يدو في مكتوبو خرج و خلاهم ماكلين بعضهم..عمل دورة بالفيلا يمشي هايم من غير حتى هدف و بالصدفة شافها قاعدة مع البنات تواسي في هند معنقتها تحكي معاها تمسح على شعرها و كل شوية تبوسها،تبسم على جنب كتف يدو و اتكا على شجرة مقابلهم من غير ما يشوفوه،يعشق فيها و في ملامحها الطفولية براءتها لخلت هند في قمة بكاها تتبسم طيبتها لحبوها بيها الناس الكل وقلبها الحنين لماعطهاش تخلي هند هكاكا من غير ما تواسيها و تصبرها..عدا يدو على شعرو 😍

-محلاها سبحان لخلقها ريت و ماريتش كيفها هالفرخة، مرتي بإسمي و ملكي عندي عليها حق و انا هنا مربط لا انجم نقرب ولا نبعد،كبريائي و خشمي لديما في السما يا نهار يهزوني للهاوية في جرتهم نعجز حتى باش ناقف نحكي معاها كلمتين و انا صاحي و في عقلي ما فالح كان نهنتلها و نعيط عليها يا عمبو عمري😧طول عمري نعرف نتعامل مع النسا رغملي ما عنديش معاهم برشا،هي غيرهم و حاجة اخرى،الوحيدة لهزت كياني و حركت مشاعري و الوحيدة لدقلها قلبي💓ما نجمش نكون معاها بقيت معلق،قلبي عاشقها و مخي رافضها،رافض فكرة انو تكون انثى في حياتي هذي قواعد اللعبة لحطيتهم في مسيرتي"بلاش نسا و منغير حب" و توا جات لكسرت كل القواعد و تجاوزت كل الحواجز بقيت بين نارين😣من شيرة اخرى لازم نبقى معاها و نحميها من اشباه اسامة و احمد و محمد خوها يجي نهار و يعرفو نقطة ضعفي و يستعملوها ضدي هاذم ساهلين اما منافسيني و اعدائي ليستناولي فيها في اي لحظة منين باش نحدها من اقرب الناس ليا لحمي و دمي ولا من عباد ما عندها بيهم حتى علاقة ذنبها الوحيد انو حبها شيطان و "ماكس" لنسيتو جملة و تفصيل ما نستغربش كان يوصللها والا يوصلي عدوي الاول لازم نوصلو و نلقالو حل😤يرا في دانا قايمة تعنق في ايثار و تبوس فيها تفكر بوساتو ليها اول الليل و كيفاه كانو منسجمين كأنهم كوبل معرسين💏 لتو مش مصدق لهو تنازل على كل شي و تجاوز الحدود الي في العادة يقرالهم الف حساب،تجرأ اخيرا و باسها و عنقها و رقدها في حضنو زادا❤💋تبسم تبسيمتو لتسحر و عدا يدو على شعرو يهدي في روحو و كأنو بالحركة اذيكا يحاول يخرج الافكار الشيطانية لركبتلو راسو وقتها

-على مرتين باش نقوم نحملها و نطلع بيها للبيت والي باش يصير خلي يصير،مانعرش كيفاه شديت عليها روحي هالفرخة عارفها باش تجيب آخرتي😂..

احمد كان متعدي من غادي يلوج على دانا يرا في جاد متكي على الشجرة يدو في مكتوبو يتبسم ستغرب😕زاد ركز معاه اكثر لوين يخزر و تصدم كيف لقاه مركز مع البنات طلعو العصب و كان ماشيلو و في آخر لحظة تفكر العهد لقطعو على روحو انو يدمرو بحاجة والا بانسان يحبو،هكاكا الضربة تجيه اقوى تبسم بخباثة من فكرتو،حاول يعرف شكون مالبنات لقاعدين لتنجم تكون راس الخيط ليبدا بيه ما عرفش..خاف لا تكون اختو لباش يبدا بيها انتقامو اما الحاجة هذي مش باش تمنعو انو يكمل الخطة كرهو لجاد عمالو عينو😈😯..

الوقت امخر برشا طلع كل حد لبيتو يرتاح استغلت الفرصة و مشات قعدت في الصالة تخمم هرب عليها النوم،في كل ترميشة من عينها يجي بين عينيها و يتعدا من قدامها السيناريو الكل كيف كانت معاه..حارت في روحها كيفا سلمت و ما قاومتوش،فاش قام عليها تسايرو،كيفاه خلتو يقربها و يعنقها..كل شي صار فيسع بدون سابق انذار ماكانش عندها الوقت الكافي تخمم في تصروفاتها معاه كل شي جا على غفلة..حتى حبها ليه...😲

(حطواااا جااااام قبل ما تقراااااو)

الحلقة 29:

شوفتو لكانت ليها كيما جرعت الاكسجين اسمر و اغنج حرج اكحل و عين قري😍ههه قمة في التناقض كوكتال بين الشرق و الغرب.. تفكرت تاليفونها جبدتو ديراكت تلوج على الفيديو و تدعي نشالله يكون تصب مريقل طيحت في الصوت عاللخر التصويرة واضحة والصوت صافي اما بحكم انو حول قعد معاها على نفس الكرسي التاليفون تحرك و طاح و بقا ظاهر كان الصوت..

-هههه مش مشكل فما برتي موجود فيها صوت و صورة و حتى كان نسمع كلامو هذا وحدو ميسالش فيه الف بركا😂😍😘

جات تعمل في مودباس للتصاور للامان و اثير عيطتلها باش ترقد معادش بكري..

من غدوة وهي في سابع نومة تسمع في اختها تفيق فيها باش تقوم😓😭

-اثير بجاه ربي اخطاني تي مزال فجر الزح والله نزيد ربع ساعة كهو و نقوم 😢

-يا بنتي قوم بوك يستنا فينا مروحين و الجماعة ممكن يخلطو غدوة

-باهي هاني قمت😓😭صبرك يا ربي

في الكرهبة مروحين تسمع في بوها يحمي و ظاهر الكلام موجه ليها هيا بالذات

-محمد رجع و يا ويلك يا ايثار توريه وجهك

-ايثار ببرود:باهي😌

-بابا علاه ما خليتناش نكنلو معاهم اليوم والله عملنا جو

-اثير افهم يا بنتي هوما عايلة و احنا نخدمو عندهم مش معناها حبوك يعني سايي وليت منهم و كيفهم(نوقز تاليفونو) الو!!تفضل خويا..😲باهي هاني جاي😞

يراو فيه وجهو تقلب و صفار

-بابا شبيه محمد شصارلو

-انت تسكر فمك كلمة لا😡كل شي من تحت راسك يا ليتك مت ولا جيتها للدنيا

تصدمت من كلام بوها لكان كيف السكاكن في قلبها،كأنو حد جا عطاها كف قوي لدرجة خلتها تنسى الاحساس لقاعدة تحس فيه توا الموت اهونلها منو،احساسك وانت تسمع كلمتين هكا من عند بوك لحمك و دمك اقرب الناس ليك و اغلى ما في حياتك في حد ذاتو يقتل و يدفن بالحياة..هبطو مالكرهبة دخلت تهز في روحها هزان كلام بوها يتهاود في وذنها و نفس السكاكن مازاىو داخلين خارجين في قلبها،نفس المشاعر و الاحاسيس لكل مرة ماشية و تزيد تقوى عليها و تقتلها عرق بعرق.

*في المركز

-شبيه ولدي شعمل

-والله هذا لصار لقينا في كرهبت ولدك مخدرات

-صحيح ولدي طايش و هامل اما نعرفو ما يوصلش يعمل حاجة هكا و زيد ما عندوش كرهبة

-الله غالب صبر روحك يا حاج مواصلين البحث و هو مازال على ذمت التحقيق نشالله ربي يهديه و يكون متعاون معانا و يستعرف خلي ينقصلو الحكم سي نون ما يفكوش ربي من 10 سنين حبس..

دوب دخلت للاستوديو اتيشط عالبنك لمت ساقيها في بعضهم و فحمت بالبكا 😭😭

-اثير قلي شنو ذنبي،انت اختي اكبر مني كان غلطت في حاجة حد الان قلي باش نصلحها

-عيش اختي يزي اسكت،طول عمرك قوية صغرونة صحيح اما انا قوتي ناخوها منك انت يا روحي علاه وليت ضعيفة هكا مش منجمة تواجه حتى روحك مش الدنيا..ضعفك هذا مش باش يوصلك لشي

-كلام بابا هدني يا اثير كسرلي ضهري كان انت قوتك تاخوها مني انا كل شي منو هو..قوتي و تبسيمتي و حتى الهوا هو روحي نشوفو يتبسم كهو نحس روحي ملكت الدنيا الكل ننسى همي و نقول الدنيا بضحكتو مازالت بخير..ما نلومش لا على محمد و لا على جاد ولا يهموني من اصلو و مش هوما لباش نضعف انا على خاطرهم،آخر همي هوما الزوز!!نلوم على بابا لسيباي يدي غي قلب الزحمة في وسط العباد هاذم الكل في نص طريق ما نعرش لا وين يهز ولا وين آخرتو..مانعرف شي و ما تعلمت شي،ضايعة راني مش كيفك انت يا اثير لخرجت و شفت و قريت و تعرفت على عباد قد شعر الراس،اما انا😢،راسي لما يتهزش مالخيشة و السطل

لا عمري خرجت كالعباد ولا ريت حد ولا قابلت حد ،عمرو لاسيبلي يدي و قلي برا با بنتي اخرج شوف اغلط باش تتعلم من اغلاطك،قابل الناس و خالطهم،افهم الدنيا و افهم روحك بقيت محصورة ضايعة بين لربع حيوط و مش عارفة طريقي لوين و فين بعدهم،😏و هذا بطبيعة كان تحررت منهم،بوك سيبلي ايدي في اكثر وقت محتاجتو فيه،في وقت كان لازم يسيرني و يوجهني للطريق الصحيح،والله لا تعلمت نمشي خطوة من غيرو يا اثير..

-ايثار نحبك تعرف ل انت بإيدك قادرة انك تصلح كل شي و قادرة انك تكسب كل شي نحي عليك هالطيبة و الحنية حتى شوية تو ترا كيفاه تولي،خدم مخك،جاد راجلك كان تكسبو هو لصفك تكسب كل شي

-هههه عندك حق تحكي هكا ما تعرفوش هاكا كيف تشوفو ليزمك تستعوذ ديراكت خاطرو شيطان

-😮عشت و شفتك يا وخيتي تسب و تلعن في العباد

-خليه يكون عبد قبل😏

الكلام خرج من فمها من غير ما تشعر اما في قرارة نفسها على يقين انو مش من قلبها

*في المزرعة:

قام راسو باش يتكسر مالوجيعة هز روحو بالسيف غسل وجهو و لبس دبشو و هبط الدجاج الاكحل داير بيه،من قوة الوجيعة كأنو فاقد الذاكرة مش متفكر شي هابط في الدروج مكشبر شاد راسو،لقاهم يفطرو الكل تعدا من حذاهم ولا كأنهم موجودين من اصلو،خرج قعد وحدو البرا ماعينو في شي و هوما لا واحد ركز معاه خاطر بداو يستانسو بطبيعتو الزفتة😂 ملمومين على الطاولة

-اسيل:شبيك مكش تفطر عزيزتي

-نجد:نون ماكلتهم ما تعجبنيش كلها زيوت

-هنيدة:لهلهله و شكون لدخلت عليها البارح عقاب الليل في الكوجينة و نلقاها غاطسة في كسكروت بالهريسة و التن و الزيت يقطر واصل لمرفقها وبعدو ختمتها بالكسكسي لفضل مالعشا وتخمدت رقدت..

قصات عليها هديل تسكرلها في فمها بيديها

-اسكت هالحريقة هذي شدخلك فيها

-وهي التبلعيط متاعها تنحيه لاعبتها تتفينس علينا لا رهجت نشالله كان السم الهاري ماكلتنا ولات ما تعجبش توا 😠😡...

(حطواااا جاااام قبل ما تقرااااو)

الحلقة 30:

نجد تتشوحر لهنيدة مش عاجبتها الفرشة لعملتهالها😂

الكلهم تهزو و تحطو مالعياط و الصياح لسمعوه جاي مالصالة قامو يتجراو،وتصدمو من جاد لكان بارك على احمد وفي يدو سكينة😲

-تراه عاود شقلت توا والله وراس لخلقك و خلقني لسانك يكون بجنبك😈😠

-اسيل:جااااد😒عيش ولدي قوم سيبو

-حتى حد ما يتدخل ولي يخمم يقرب نلحقو عليه

كان يغلي عينو حمرا و ظاهر شيطانو حضر😈 هو من عند ربي ماكنو العصب مالصباح زاد كمل عليه احمد لكان يتغصور تحتو بللي حاول ما نجمش يقوم جاد كان اقوى منو،شادو من خناقو بيدو ليسار و اليد لخرى شاد بيها السكينة و كل مرة يعديهالو في بلاصة من وجهو لين و وقف على شفتو اللوطانية طبس عليه يهمسلو في وذنو

-هذي باش تعرف على شكون ترمي المعنى و باش المرة الجاية تعرف شكون تقصد بكلامك،فاهمك اما مكش باش توصللها الي في مخك😉اوكيتو؟

احمد عينو وساعت من كلامو، الزوز فاهمين بعضهم مليح اما احمد الرؤية مازالت منعدمة عندو هو بيدو مش عارف جاد مركز مع شكون وقتها اما بكلامو ضهرلو لهو يعرف و جاد مش مصدقو يعرفو يستفز فيه و برا😮الكلهم مش فاهمين شي،خايفين يقربو حد ما تجرأ حتى من اسامة ما عمل شي باش يقومو من فوق احمد خاطر يعرف غشو خايب كيف يتسكر ماعاد يفهم شي دونك زايد،قعد يتفرج كيما الناس الكل،اسيل زادا واقفة كيفو ملامح وجها باردة عادية خاطر مستانسة بجاد و بعصبيتو و حكايات هكا كانت تشوف فيها كل يوم قدامها لين تعودت عليهم،جاد رغم العصب لطالعو و الغش لعمالو عينو والعاصفة لحاسها هايجة داخلو والي قادرة انها اتدمر كل شي في لحظة ملامحو كانت باردة ما توحي بحتى شي و كأنو شايخ بنظرة الخوف ليرا فيها في عين احمد،تبسم على جنب😏و حلو شفتو في ثنين بالشوية و بكل هدوئ وبعد مسحلو السكينة على خدو وعاود طبس عليه

-المرة هذي في شفتك المرة الجاية في رقبتك ولد العم

نفخ عليه😥غمزو😉عاود تبسم😄😍😍قام من فوقو جبدو اسامة قلو اخرج روح ارتاح اوكا الفيلا فارغة..

خرج للجردة و خلى احمد في دمو و امو تحسب عليه في ربي و هو مش هنا و ماعلابالو بحد ديراكت جبد تاليفونو نشالله تهز عليه هيا اما مش متأكد انهم روحو،كان جات هي موجودة ممكن الي صار توا راهو مصارش خاطرها المهدئ متاعو مستحيل يعمل هكا في حضورها مللي قام ما شافش وجها و برائتو ما شردش في عينها في غابتو الي يضيع في وسطها،اما خير كي مشات وماشافتش هالحرب..نار شاعلة فيه ولازم شكون يطفيها وجات هي فالعراض..

كانت قاعدة تحكي مع اختها لين نوقزالفيكس

-الو!سمعت صوتو لي فيه بحة تعشق صوتو لمستحيل تنساه بعد ليلة البارح

-وينكم؟وين هجيتو😈عرصة كردونة انا تخرج ما تقولش😠😬

-انا تعبت شوية قتلهم نروحو و زيد الفيلا داخلة بعضها

-ااا ليلا عاملتلي فيها الطفلة لتغطي على اغلاط بوها؟

-شدخل بابا في الحكاية؟شتحب انت تو مالاخر لواه طالبني😠

-بلع فمك هدة فيه اعرف شتحكي و مع شكون مش خاطر خذيتك يطوال لسانك و تكلمني بالاسلوب هذا نكسرلك راسك من غير رحمة رد بالك تتعاود فهمت والا لا يا خديمة هذا هو مصيرك انك تاخوني و تعيش في جهنم،يحكي معاها و واعي بالكلام لقاعد يقول فيه و عارف انو قاعد يجرح فيها اما هذا هو جاد و هذا هو الشيطان لازم يفرغ قلبو مش بالكلام كهو و بالفعل زادا..

تسمع فيه مش عارفة تصدق جاد متع البارح لبالعو خيط والا الشيطان ليحكي معاها توا سبحانو مغير الاحوال جاوبتو ببرود عكس لكانت تحس فيه

-باهي،تحب حاجة اخرى قبل ما نعلق

-في ايدك ساعة و تكون حذايا سي نون اعتبرو رواحكم في الشارع،ما خلطتش تجاوبو خاطر علق عليها

-هذا عبد هذا😠؟! والله حرام فيه يعيش،حسبي الله فيه

شد كلم بوك قولو سي الزفت يحبني نرجع للمزرعة

اثير تاخو في التاليفون من عندها و بوهم دخل وجهو اصفر مهموم مقهور تعزيه يقبل العزاء صوتو مبحاح بالسيف خارج من فمو مالخنقة لفيه و الغصة لواحلتلو في قراجمو

-والله ذبحتوني،ما ربيتكمش باش توطولي راسي هكا والله يعلم كان قصرت معاكم في حاجة(مد يدو)شوفو يدي تقطعت باش خدمت عليكم و عيشتكم كيف العباد،وجهي مدخن اصفر من همكم شوفو الشيب الي في راسي فنيت عمري باش نربيكم(قام)هذا كفويا معاكم آه؟آخرتها كسرتولي ضهري و على كبر سني هديتوني الله يسامحكم😔

خلاهم و دخل للبيت و سكر على روحو الباب،ولات تبكي

-سامحني يا بابا كان انجم نعطيك ايدي و قلبي و روحي وعمري الكلو و شبابي و ماكنت ترددت لحظة😭

-ربي يستر اول مرة نشوف بابا حالتو هكا،حقا كيفاه باش نرجعو للمزرعة بوك حالتو ما تسمحش لا يسوق ولا يقوم من اصلو

-هات التاليفون انا نحلها

قاعد في بيتو يخمم في حياتو و مستقبلو قص عليه صوت التاليفون

-شبيك شتحب

هدت روحها و جاوبتو بصوت حنين

-كان تسمح اسمعني شوية

-ماعنديش وقت نسمع تفليمك و اعذارك باش ما تجيش

-لا والله لاني نفلم عليك

-10 دقايق ما تكملش كلامك نعلق عليك

-باهي😲بابا روح تو مالمركز و ضاهرلي صارت مشكلة كبيرة و هو تاعب توا رقد

-تعداو 5 دقايق😑

- باهي،و على اذاكا ما نجمش نرجع و معادش وقت انتم راجعين غدوة باش نقعدو انضمو الفيلا

-وفى الوقت

-وانا كملت كلامي

-و المطلوب

-تخلينا نباتو هنا الليلة

-هكا؟!تحبني نوافق من غير حتى مقابل,لعلمك انا كل حاجة تصير لازم يكون ليا فيها مصلحة سي نون ما تصيرش

-الي هو؟

-مستعدة تمشي على الجمر؟؟

(حطوااااا جاااام قبل ما تقرااااو)

حلقة 31:

من نبرت صوتو عرفت لهو مش يفدلك

-على الجمر؟

-عندي برشا ما ريتش حد يتوجع قدامي و انا محتاج للحاجة هذي تو تجي فيك انت ولا نحرق الدنيا الكل،مش خير؟موافقة؟

-موافقة..

علق عليها مستغرب من هدوئها ديراكت وافقت من غير ما تتردد،شرب كاس ويسكي هز تاليفونو كلم شكون

-حكاية محمد؟

-مريقل👍سايي في قلبو

-اوكي كملي احمد ولد العم نحبو يتعفن اما بضخامة باللي يكون من لحمي و دمي ما يهونش😏

كمل عطا تعليماتو و علق عليه هز مفاتحو و رجع للفيلا.

*في المزرعة.

راشد مطيش عالفوتاي يقيسولو في الدم لطلعلو مالحرب لكانت قايمة

-فيصل:بابا ياخي باش تسكت عليه هالمجرم كلملو الحاكم والا ناوي تخليه حتى يطيح منا روح؟

-اسامة:ههه الله اكبر،جاد و الحاكم؟😂قداكش زوالي في مخك آ الخال

-انت تسكر ماك الكلب متاعو ديما في جرتو

-راشد:والله لا تحشمو ولا فيكم دوا.احمد قوم اخرج عليا لا نكمل لبداه جاد

-احمد:هاني خارج و تو نشوف آخرتها

-فيصل:علاه اتطرد فيه ديما واقف في صف جاد و عمرك لا ريت اغلاطو

-شكون الراجل في دار آل راشد يجي لولد عمو في وسط الرجال و يتكلم في امو و اصلو و فصلو(يعيط)وينهي الرجولية اه و هذا بخلاف حكاية اخرى ما فهمتهاش بيناتهم خلت جاد يخرج من سينتو

سكتو الكل و الوحيد لكان فاهم الحكاية هو اسامة..

وصل للفيلا طلع لسويتو دخل ديراكت يدوش كمل لف منشفة على نصو و قعد يخزر لروحو في المرايا مزال مدهشر شوية مالكاس لشربو يسمع في حس غنا تبسم

-هههه هالغناية تحكي عليا بالضبط و كأنها تكتبت على خاطري(ناصيف زيتون-مش عم تزبط معي)

تفكر الي الدار مافيها حد ستغرب حل الباب وخرج شافها جاية..جاية تمشي بالرنة حلت الغنا و تعدت لسويت جاد على اساس الفيلا فارغة ومافيها حد لابسة روبة فلوري بيضة و زرقة شعرها عريان هابط حرير على طول ضهرها،عاملة روز دوب ظاهر على شفايفها ماخذة راحتها..

رغم الي صار والي تعدا بيها و رغم الوجيعة الي في قلبها فرحانة و ما تعرش علاه زاهيتلها،تلعب بخصلة من شعرها تستنى في الغناية تبدا

دوب ما حلت فمها "بأعرف بأنك ساكني" خطفها من يدها دورها لصقها عالحيط و لصق فيها سحرتو و خذاتلو عقلو ملي عرفها و لبستها الكل غامقة تجيب الحزن شعرها لكان يتطاير وراها قداه وتاتها الروبة..تفجعت تصدمت بكشت ما نجمت تنطق بحرف و داخت من قربو ليها بدنو للاصق في بدنها صدرو العريان اكتافو العراض كرشو لتقول عليها طبلة شكلاطة خصلات شعرو لكانو يقطرو بالماء شوافرو شفايفو الروز لكانو يرعشو عليها عينو الذابلة لزاد فتاحت و رهوجتها لكانو مركزين مرة مع شفايفها و مرة في عينها ريحتو لمخلطة بين الويسكي و الدخان و جال دوش و برفان😍معادش فيها سايي انفاسها تحبسو و كرشها دارت دايخة مش فاهمة شي و مش منجمة تستوعب لقاعد يصير حط يدو في وسطها و جبدها ليه كمل يغني في بلاسطها"عايش بروحي مجنني و جواا حبك آسرني و عم كاابر"يد شيعلها بيها يدها الفوق واليد الاخرى يعدي فيها على خدها و شعرها،كان قريب منها لدرجة انو انفاسهم ولات نفس واحد صعيب يتفرق،خشمو على خشمها و جبينو على جبينها عينو غي عينها كلاها بيهم "رغم القسوة الي بقلبك و التعب الي مرافق دربك و البعد الي عشتو بقربك انا صاابر" قرب خدو على خدها هزلها يدها باسهالها وحط شفايفو على وذنها"مش عم تزبط معي اعشق غيرك لا والله مش عم تزبط معي اشكي لغيرك قوول الاااه"يدو على خدودها الزوز و عينو في عينها كأنو يقلها افهمني و حس بيا"حبك عاملي ادمان،ماشي بدم الشريان(عدا صوابعو بحنية على طول ايديها)ساكن خلايا عقلي منسيني حتى النسيان(حط صبعو على راسها ضربها بدلال و غمزها) حقيقة لمستا بايديا و شفتا بقلبي و عينيا يمكن جن و يمكن موت اما انسا ما فيا"😍 دخلها بعضها ساعة التالي كان يصيح عليها و يتعهد و يتوعد وحدو يحب يمشيها على الجمر😕😡بعد عليها شوية و تكى ايدو عالحيط فوق راسها وقف قدامها على جنب سارح في عينها حط يدو على قلبها لباش يخرج من بلاصتو "بأعرف بأنك ساكني عايش بروحي مجنني و جواا حبك آسرني و عم كااابر" فد،ضرب بونيتو في الحيط كاره روحو،كاره عجزو،ناقم على كرامتو لمانعتو انو يعبر على عشقو ليها،ناقم على الوقت لجاء روتار باش تعرف عليها و على الضروف و الاسباب لواقفة حاجز بيناتهم و مانعتو يكون معاها هي، مرتو حلالو..

تفجعت من الضربة لشقق بيها الحيط و خلتلو يدو كلها دم خافت عليه و ديراكت دارتلو شدتهالو،اتكى عالحيط و هبط معاه عالقاعة ركز مرفقو على ركبتو و دخل صوابعو في شعرها بحنية للحظة ضعفو سيطر عليه و غلبو عينو فيها اجبال حزن لاول مرة بعد الجبروت و القوة والغرور و التعجرف و الثيقة بالنفس تشوفو بالحالة هذي،قرات في عينو كلام ما نطق بحتى حرف منو فهمتو باحساسها بقلبها لكان معاه في كل لحظة كان يقلها راني عاجز فهمتو من نظرة عينو لكانت فاضحتو،نظرة عينو لحكات كل شي بسكات،كبستلو على ايدو بحنية وتبسمت وياليتها ما تبسمت ضهرت حفرة الزين ل في خدها؟لكانت مدفونة تحت انقاض حزنها.تبسم مع تبسيمتها من غير ما يشعر رغم الي كان في قمة حزنو

-قتلتني يا ايثار و جبت آخرتي و عندك غمازة زادا😍اااه يعمبوك يا فرخة ايجا عندي ايجا

جبدها في حضنو و باسها على حافة فمها وين الغمازة(يا بنات هذا الكل و المنشفة ما طاحتش😂السترة باهية😝) كمل يغني"حرمت طول الايام اني اغفى اني نام خايف لو قفلت عيني ارجع شوفك بالاحلام"

(حطوءااا جاااام قبل ما تقرااااو)

الحلقة 32:

كانت متكية على صدرو،احساس بالامان اول مرة تحسو،كان حد حكالها انو باش يصيرولها لحظات هكا و مع جاد مستحيل انها تصدق و حتى توا و هي معاه و في حضنو و بين يديه عايشة اللحظة و مش مصدقة،و ما تحبش تصدق خاطر واعية انها حلمة و باش تقوم منها،قامت من عندو جابتلو الدوا قعدت مقابلتو،وهي في حضنو حس براحة بفرحة مش عادية و كأنو ملك الدنيا اللكل بين يديه،ريحتها لتغلغلت في روحو،قربها منو للدرجة هاكي دخلو بعضو مش فاهم روحو حاسس انو طاير في سابع سما و باش تجيه حاجة تهبطو لسابع ارض،بقا مركز معاها،مع حلاوتها و حنيتها الزايدة ملامح وجها الي الكلها خوف و قلق عليه،تبسم و هز يدو باسلها كف يدها -ايثار😍-نعم!!

-براس ميمتك الغالية عاود تبسم❤

ضحكت بكل عفوية من تبهليلو

-جاد لباس؟اولشبيك تتبهلل هكا😂ياخي عمرك ما ريت انسان يضحك؟

-ريت اما عباد مش ملايكة😍

جبدها جات فوقو عدا يدو على ضهرها

-محلاه اسمي من هك الشفايف العسل💋يا ربي نوب عليا يجي نهار و نذوقهم يااا ربي..قول امين اا فرخة😒😜

-سيبني مبلدك

-قتلك تبسم كهو انا،انت ضحكتلي ضربة وحدة اكهو جبتها لروحك.والله يا ايثار و يحبك ربي نلقاك نهار تتبسم حتى تبسيمة صفرا لغير...قصت عليه كلامو😂

-باهي اس بركا نعرف انك قادر تمحيني

و اتطرشقو الزوز بالضحك،شوية و سكتو كملتلو ايدو بالسيف شادة دموعها قدامو مش عارفة شبيها تقلبت تو بركا كانت طايرة مالفرحة،مش فاهمة شبيهة فادة غصة وحلتلها في قلبها.هي تعرف روحها كل ما تضحك الدنيا تحسدها و لازم تبكيها😢هزلها راسها شاف عينها مدمعة قلبو تقبض

-شبي صغروني😔

بعدتلو يدو و قامت تجري لدارهم،دوب قامت طاح تاليفونها من جيبها،هزو و دخل للبيت لبس دبشو و ريقل شعرو، على اساس خالط عليها باش يعطيها تاليفونها بعد بطل عندو فضول كبير باش يعرف شفيه،فلاه فليان ما لقى عندها شي بخلاف رقم بوها و اختها و خوها و بنات عمو لولات اصحاب معاهم،الميساجات كيف كيف قداه كبرت في عينو و طمان خاطر متأكد من روحو كان طاح بحاجة هكا والا هكايكون قاتلها،يا تكون ليه يا ماتكون لحد اصلا هي متاعو ملكو وحدو.. تبسم و بعد تفكر تصاورها اكيد موجودين دخل يشوف فيهم كوخر قريب يهبل لعبت عليه الدوخة طلعو الدم خاطر مش عاملة مود باس للتاليفون كان يطيح في يد حد آخر و يشوفهم ما يجبدلو عينو😂غيرتو عليها عاميتو كان يلقى يحطها في بيتو و يسكر عليها و كان لزم ما تراش النور،لعن روحو و الضروف الف لعنة عجزو ل مالقالوش حل،الدنيا لجمعتهم في ضروف كيها هكا و خلاتو يشوف بعينو و يموت بقلبو حلالو ما ينجم كان يتفرج عليها من بعيد اضعف الايمان انو عاجز حتى يعبرلها على حبو ليها😔قلبو وجعو من تصاورها لرهوجوه خرج منهم بعد ما صبهم الكل في تاليفونو و عمللها مودباس باسمو😅 قعد عالفوتاي يخمم يدور في التاليفون ندرا كيفاه يعمل هكا و يدخل للفيديدوات يسمع في صوتو،ستغرب😕يشوف في روحو قاعد عالكرسي و ندرا مع شكون يحكي،قريب يتجلط وقف ديراكت و حط يدو على جبينو و لخرى شد بها التاليفون من الكلام ليحكي فيه عرفها هي مالصدمة قعد يحكي وحدو😂

-تي هاني انا😲وقتاه هذي😲في المزرعة؟!😤يكب كبوبي كلو من دين ام الويسكي لشربتو لااا و هك الكلام يااا معلم مخليت ما قلتلها و يدها قريب ناكلها بوس الله الله الله يكب سعدك يا جاد اكثر ماهو مكبوب😲لا عاد هذي قتلهم اسكتو زيد اعطف ووه على بااابااا😂حولت قعدت معاها على نفس الكرسي؟اهه شكلو التاليفون طاح والا شبعزاه التصويرة تنحات😡تي شخليت اكثر من هكا😠لاااعااد هو مزال،و غنيتلها ذادا؟و غناية شرقي ههه؟لامعادش فيها تو ادفن روحك يا جاااد وينو شيطانك؟طاح قدري و وليت رومنسي بعد صعوبيتي و صوتي ل يولعج تجي هي تقصلي لساني😣 شنوا الحنية هذي الكل منين هبطت عليا،يا عمبو الوقت،ياعمبوك يا ايثار شعملت فيا انا عزرائيل قباظ الارواح نولي هكا؟(بدا يتنرفز) حبيتها و عشقتها صحيح اما عمري لا باش نزيد نطيح من قيمتي اكثر هنا و يزيي،فيق يا جاد مش متاعك و لا انت متاعها مرتك اما عالاوراق ممنوع عليك تحب و تتحب و تعرس و تعمل عيلة،ممنوع تفرح و الفرحة خط احمر😔هذا قانوني،القانون الي بفضلو وصلت للمرحلة هذي من حياتي،فيق يا جاد راك تخالف فالقواعد لحطيتهم انت بيدك و قاعد توا تتجاوز فيهم على خاطر الحب الحاجة لحرمتها على روحك عنك سنين،و ما حرمتها كان وانت على يقين انو باش يجي نهار و يدمرلك حياتك على اذاكا لازمها تكرهني،نشالله ما تكونش حبتني خاطر مستحيل ملاك تعشق شيطان مستحيل..

العصب يهز فيه و ينفض في لحظة تقلب تفكر كيفاه جبدها وقت كمل دوش،تفكر كلامو و فزاتو و غناه ليها فد كره روحو هو تو قاعد يعطي فيها في امل و كأنو باللي يعمل فيه يقلها حبني،طيش التاليفون عالفرش و قلب الغوتاي بساقو مالغش خرج من سينتو سايي و ولي عبد آخر،جاد الجديد لازمو يتدفن بالحياة ويرجع جاد القديم يشد المشعل و يسير كل شي..هز الفاست متاعو و خرج للشركة يخدم غطس و نسا روحو 5 متع العشية قام روح وصل لفيلا عمل دوش و لبس شوميز بيضة و دجين فاتح شعرو مفرعس عينو ذابلة😍 تاعب من كل شي و ما عينو في شي،حتى دوش و مزال مخنوق حل مقافل الشوميز شوية وتمد عالفرش على اساس باش يرقد حط يدو على جبينو و غمض عينو جات قدامو 😍 في لحظة تفكر حاجة قام يجري..

(حطواااا جاااام قبل ما تقرااااو)

الحلقة 33:

خرجت تجري دموعها على خدها،علاه ممنوع عليها تحب و تعشق،عشقتو و ماتت فيه رغم كل شي رغم شرو و عمايلو رغم انو مجرم،القلب وقت يحب ماعادش يفرق الصحيح مالغلط،مش يقولو كل شي مسموح في الحب و الحرب! مش عارفة تنسى او تحاول تتناسا..دخلت لبيتها ترمات عالفرش ما تعرش قداه بكات و نوحت على سعدها الراقد اما ساعات بالنسبة ليها دهور،نهارت لتتبسم الدنيا تحسدها و تعطيها كف تفيقها بيه عالحقيقة،لازم تجي حاجة تنغصلها فرحتها بكات لين عينيها تنفخو تعرف روحها باش تتعذب و على اذاكا لازمها تنسى و تكابر رغم الي راجلها و اسمها مربوط باسمو اما هذا ما يعطيهاش الحق انها تحبو ماصاب تقابلو في ضروف اخرى كان ممكن وقتها حكايتهم يكون عندها معنى،مستحيل تعاود تضعف قدامو و تنسى روحها في كل مرة،ومش على كلمتين قالهملها و هو مش في وعيو اتطيح على راسها

-فيق يا ايثار ماتبنيش احلامك على رمال متحركة في صحراء قاحلة يجي نهار و تتحرك الرملة و تتهد احلامك الكل لازمك تتقوى على روحك و تبينلو لانت مش ميتة فانية عليه.حتى بينها و بين روحها لازم تلغيها فكرة انك تحبو،بقات تخمم لين هزها النوم.. دخل لبيتها حل الباب بقوة ماكنو العصب و تمسمر في بلاصتو كيف شاف ملاكو راقدة في لحظة فد و لان،قلبو ضرب في صدرو تبسم و قربلها كانت ملاك بأتم معنى الكلمة راقدة على كرشها و شعرها طايح وراها كالطفلة الصغيرة محلاها و مبنها براءتها ديما مسيطرة عليها باللي تحاول تتصنع القوة تبقى ديما كائن ضعيف،نفخ بعصب و عدا ايدو على شعرو😍

-ايثار قوم..ايثار!😡

كانت راقدة في سابع نومة حست بشكون يضرب فيها على كتفها

-ممم اثير امان سيبني مانيش قايمة

-قووم عزرائيل😡

عينها وساعت قامت فيسع جات واقفة مفجوعة هي باش تعيط و هو سكرلها فمها بيدو حملها و خرج بيها و هي تتبربص بين يديه ما هبطها كان كيف دخل بيها للفيلا و طلعها لسويت طيشها عالقاعة و مسح يدو متقزز منها

-الهم هذه مستحيل تكون طغلة قداه توزن اااا زحي

(قامت تصيح عليه)

-شتحب عندي ابعدني ياخي على كيفك هو،يااا ربي نشالله تكون حلمة يا ربي

قعد عالفوتاي مقابلها يتمسخر عليها

-لدرجة هذي ساكنلك مخك وليت تحلم بيا

-شتحب عندي مو لباس جايبني هنا و بالغصب زادا(ثبتت في روحها تلقى شعرها هابط على كتفها قامت فيسع) حجابي وين وووه و جلبابي؟😮

جاوبها بتبهليل

-يااااا نسيتو ما جبتوش😛

-شنو طينتك انت ياخي ما تخافش ربي

-البهيمة هذي ياخي قداه من مرة باش نقلك اللي انا راجلك و انت مرتي حلالي،بقرة😑

كل مرة يفكرها بالحاجة هذي رغم الي هي مش ناسية اما تحاول تتناسا

-باهي شتحب عندي انت تو خليني نرجع نرقد

-نسيت الي انت قتلي مستعدة تمشي عالجمر؟!!

تصدمت و توا تأكدت خاطر كان عندها امل انو يكون يفدلك جاوبتو ببرود عكس النار لشاعلة في كنينها

-وينو الجمر

قام من بلاصتو يحل في مقافل الشوميز و يقدملها،هو يقدم و هي توخر مصدومة و عينها محلولة😲

-جاد😨شبيك فاش تعمل تفاهمنا على جمر مش..

سكتت كشافت الشوميز في القاعة و تصدمت اكثر كيف عطاها بالقفى و شافت ضهرو و اكتافو لكلهم اجراح و تراس قدم و جدد و خياطة و تراس حروق ظاهر متعدي على راسو مصايب و توجع برشا في حياتو كل جرح بحكايتو و اسبابو،دارلها كان لابس دجين تاي با عاللخر شد انتباهها تراس متع موس كانو 7 خطوط على بعضهم في كرشو ماللوطة و جنابو ستغربت في روحها كيفاه ما ركزتش معاه الصباح و ما راتهمش،ممكن خاطر لاف المنشفة و مطلعها برشا ما بان شي،ممكن ماللي صار ما لقاتش حتى الوقت باش تتنفس،رجعت تثبت في بدنو كانو اجراح انواع اشكال العريض،الجويد،الطويل و القصير فيهم القديم و الجديد شي عندو سنين و شي عندو عام اما الاجراح السبعة جدد متع شهيرين ثلاثة شنو،،حكايتهم زعمة؟

جاد يخزرلها كيفاه داهشة في بدنو العبارة على رموز و جروح و حاجات غريبة مش مفهومة،تمد على طولو في القاعة

-ايا امشي على الجمر توا تحرك😲

امرو ليها صدمها ولات ترعش

-مستحيل

-تحرك امشي من اول ساقي لرقبتي وكان طحت و الا خرجت على مسارك صدقني تلوم كان روحك وقتها

-علاه هكا بربي والله حرام شوف بدنك كلو اجراح كيفاه تحبني نمشي عليهم مستحيل،نمشي على الجمر ولا نمشي على اوجاعك

ولى يصيح عليها

-قتلك امشي،تحرك😠انا لخربتلك حياتك وانا لجرحتلك انوثتك،انا لكنت باش نغتصبك انا لخذيتك بالغصب و التهديد،خوك انا لحشيتو في الحبس انا السبب في الحالة لوصللها بوك،مازلت تقولي حرام؟

ولات تعيط كيفو و تبكي😢

-اي حرام في حرام..حرام نولي كيفك،حرام نبيع قلبي و ضميري

تربع في القاعة يخزرلها نفخ و مسح وجهو بيديه الزوز

-ايثار..ايثار

-من غير ما تخزرلي هكا جاد انسى كان باش نسمع كلامك و نطبقو نضر روحي ولا نضر حد آخر،خليتك بينك وبين مولاك هو لياخذلي حقي من كل ظالم

قام يتبسم قداه كبرت في عينو محنها و ما اطيب قلبها

-تعرف!اول مرة نرا وحدة كيفك؟علاه سموك ايثار،اسمك غريب

-كيما اسمك الي كيف شخصيتك الزفتة،علاه سموك جاد؟؟

يقفل في الشوميز و يحكي معاها

-كيف تحب تتخلص من حد و يكون عندك امل انو يموت،كيف تحاول اتطيح صغيرك،كيف تحاول تتخلى على كبدتك خاطر انانيتك،كيف تفشل في كل محاولة،و في كل عملية تتسكر في وجهك البيبان الكل وقتها يمشي الامل و يجي الالياس(عكس الامل)و في قلب اليأس و مع هذا و اذاكا نجي انا لدنيا و يموتو برشا عباد😏..

(حطوااااا جااااام قبل ما تقراااو)

الحلقة 34:

حست بيه و بأجاعو،سخفها من برا يظهر انسان قوي ما يهزو شي،انسان بارد متحجر من غير مشاعر ولا احاسيس ما عندوش قلب اما الحقيقة انو انسان ضعيف محتاج شكون يواسيه و يكون معاه

-يعني حتى امك الي انت من صلبها،كبدتها جايبتك في الحلال حبت تتخللى عليك و تقتلك على اذاكا سمتك جاد

بقى يثبت في ملامحها الطفولية ل مع كل كلمة تقولها تزداد براءتها مركز مع كلامها بالحرف،كلامها لحس منو لهي ساخفة عليه و حاسة بيه خزرلها و هز حاجبو

-والله لاهو منك و اصلا مش عارف علاه موسع بالي و قاعد نحكي معاك 😒

-جاوبتو بتبهليل:😕كيفاه يعني؟

تمد على فرشو و حط يدو ورا راسو

-نظف البيت و اخرج في يدك نص ساعة😐

حارت فيه كيفاه في ثانية تقلب نرفزها بقات تعاودلو في كلامو تتمسخر عليه😂

-نضف البيت و اخرج في يدك نص ساعة😒استغفر الله،قسما بالله لاك عادي،عندك انفصام في الشخصية انت برا برا عدي خير

كان مغمض عينو كوم كوا راقد،تبسم من كلامها و جرأتها ضحكتو كيفاه قلدتو

-نقص مالتجلطيم متاعك لا نقوملك،بهيمة😒ما جاوبتنيش آخرا،علاه سموك ايثار؟اسم غريب و مش مزيان.ما عجبنيش😏

وقفت تقحرلو مش عاجبها

-يعجبك والا لا هاكي مشكلتك،و ما تخلقتش باش نعجب حضرة جنابك سي جاد،اوكي و حاجة اخرى كان انت امك حبت تضحي بيك باش تعيش هي حياتها طول و عرض انا امي ضحت بروحها و حياتها باش نجي انا للدنيا يعني يا سي البهيم آثرت(ضحت)على خاطري و اسمي ما عجبكش و مش باش يعجبك خاطرك عمرك ما جربت هك الاحساس متع انك تضحي بروحك على خاطر انسان تحبو..انت ما عندكش قلب يعني مشاعرك منعدمة و اذا مشاعرك منعدمة يعني عمرك لا باش تحب من اصلو،فهمت؟😒و وقت ليغلط قلبك و تحس بحاجة غريبة عليك و تجرب احاسيس عمرك ما جربتهم تو تفهم معنى اسمي و تحبو زادا.

خلتو و دخلت للدوش،راقد على ضهرو باقي مسكر عينو يديه تحت راسو

-والله مجنونة ديما ردها يقنعني و ديما عندها اجابة حاضرة لكل اسألتي،مش عارف علاه اناديلها كي نبدا محتاج حد نحكي معاه،نكون في حاجة لانسان يرجع عليا من غير ما يوزن كلامو،يعيط عليا و يتغشش مني و يبخصني و يسبني،انسان ما يخافش مني،انسان قوي انجم نتفاهم معاه كيفها هي.

*بعد ما رجعو العايلات الكل لديارهم

في دار مراد

-هند:الو

-غسان:هند سامحني عاللي صار والله لانجمت نعمل شي و ما عندي حتى دخل انت اكثر وحدة تعرف قداه نحب لجين و شاهدة على حبنا و كل حاجة صارت معانا الزوز،و تعرف زادا جدك كيف يحط حاجة في راسو مستحيل حد يبدلو قرارو

-امان غسان عيش خويا تصرف اعمل اي حاجة انا يدي مربطة ما انجم نعمل شي،ما انجمش نوافق على عرسي مالراجل لعشقتو بنت عمتي،ما نقدرش نخون اقرب شخص ليا(ولات تبكي)بالاهي اعمل حاجة قبل الملاك عيشك ما تخليش هالعرس يصير

-يا هند شكون قلك ما عملت شي بلاهي انا زادا يعلم بيا ربي الي عملتو لكل طاح في الماء،بابا من جيهة يقولي ما نخليكش تجرح بنة عمك و لجين من شيرة اخرى

-😢قول اي حاجة حرت ياخي،قولو هند ما تحبنيش،دافع انت على حبك و قلهم نحب لجين تكلم يزيك ما سكت،لجين حالتها اعظم مني و منك راهو،حس بيها ماك تعشقها

-سامحني لجين،الله غالب😔

علق عليها خلاها تغفص في دموعها

*في دار محمود

-زياد:والله راجل اكا جاد

-سحر:ههه وكاان يسمعك احمد يقتلك

-لا عاد سامحني المرة هذي انا مع جاد نورمال لاخر يرمي عليه في المعني ندرا على شكون و لا يزيد يجبدلو امو في قعدة وسط الرجال

-اي جاد ديما عندو حق😍(تبربش في تاليفونها)

-ياعمبوك و بو هالتاليفون باللاهي سيب امو كرهتني فيه لا نهار جيتك نحكي معاك و ما شديتوش حتى كان حكايات تصلح

خلاتو يحكي وحدو و وقفت خارجة

-برا زمر كان عجبك

-😡باهي انا فاد اي برا نخرجو لأي بلاصة

-اخرج وحدك ماعينيش

خرجت و خلت تاليفونها عالفرش هزو يبربش فيه

-ياعمبو الوقت آخرتها نوسع في بالي بتاليفون هالفرخة حتى هو الفدد يعمل😧 هو يبربش وصلها ميساج من طفلة كمل حكا معاها على اساس هند

خرجت ايثار مالدوش لقات باب البيت مسكر و هو خذاتو عينو رقد قربتلو

-جاد حل الباب امان نحب نروح(طلت عليه) وووه على امي راقد زادا تي وقتك تو😓

هي اكاكا و ندرا شكون دق الباب،حل عينو حمرا دم شعرو داخل بعضو😍خزرلها

-ووه يا ماما شنوا هذا قداش تخوف الهم

ما عبرهاش هز راسو جبد المسدس من تحت المخدة و قحرلها قحرة متع موت باش تسكت

-ششت ما تعرش تسكر فمك؟

تفجعت و عينيها وساعو😲

-😨جاد فاش تعمل و علاه المسدس

-اسكت لا نفرغو غي راسك

قام هو يقدم و هي توخر حط يدو على فمها سكرهولها دخلها لدراسينغ تعثر جاء لاصق فيها للحظة سرح فيها انفاسهم تخلطت قلوبهم اتحدت ما يعرش على روحو كيفاه هز يدو و و بعد بيها خصلة كانت هابطة على عينها قربلها يملي في صدرو من ريحتها لكيما الصغار ريحتها الناتورال الي كان يلقى يستخلص منها نوع بارفان،غرس يدو في شعرها قربها ليه و طبع بوسة على جبينها بوسة حنينة دافية خلتو يغمض عينو و يعيش اللحظة يحس باحساس الامان و الراحة الي ما يحسهم كان كيف يقربلها و يكون معاها بوسة ما يعرش قداه طول فيها اما نحات على قلبو غمة و دفا بيها قلبو البارد.

كانت جامدة في بلاصتها هي من غير شي تشوفو تذوب خللي عاد توا قريب منها و يبوس فيها ما نجمت تعمل شي كان انها تحط يدها على صدرو في اللحظة هاكي حست بلهفتو عليها رغم هدوؤو كان متمرد صوت دقتو مسموعة تمالكت روحا تفكرت وعدها مستحيل تضعف قدامو،دزتو شوية

-الباب

-خليه يدق،مش باش يكون اقوى من دقات قلبي😍

(حطواااال جاااام قبل ما تقرااااو)

الحلقة 35:

سكتت ما لقات ماترجع عليه،الباب باش يتقلع من بلاصتو و هوما هايمين في بعضهم،ما يرا كان فيها و ما يسمع كان في دقات قلبها وما حاسس كان بنفسها😍حط يدو على آخر ضهرها و جبدها ليه اكثر زاد لصق فيها غرس راسو في رقبتها حس ببدنها يرعش بين يديه عرفها خايفة هز راسو خزرلها،عينيها مغمضتهم صدرها يتهز و يتحط تتنفس بزربة،ركز مع فمها المحلول شوية شغايفها ليرعشو هبلوه و كأنهم مغناطيس يجذبو فيه ليهم قرب شفايفو و حط جبينو على جبينها مصمم انو يبوسها،مالصدمة و الخوف حلت عينها فيسع و عاودت غمضتهم بالقوي كبست بيدها في الشوميز متاعو كأنها تقلو لا،حركتها و يديها الصغار رهوجوه تبسم على جنب و تنهد حط شفايفو على شفايفها بدنو الكل تكهرب بعدهم ما نجمش يكمل حس روحو عاجز و مربط كأنو يفرض في روحو عليها بالسيف و بالغصب،مايحبش يبدا حكايتو معاها و تتطور بالطريقة هذي يحبها تكون مرتاحة راضية على كل خطوة يخطيها ليها و معاها يتكلم في وجهها انفاسو السخونة حرقتها و ريحة البارفان طيرتلها عقلها اما باقي محافظة على هدوئها

-حرقتني يا ايثار😣مرتي راك حلالي من حقي كل شي،علاه ما نجمش نقربك،علاه في حضورك نعجز على كل شي نتقلب نولي انسان آخر،ايثار انت روضت الشيطان الي في داخلي و على قريب باش يولي ملايكة..اما يقعد شيطان في وجه كل واحد يخمم يضرك،

مع كل كلمة يقولها تموت الف موتة هو خط احمر بالنسبة ليها مستحيل تتجاوزو والا حتى توصلو،تعشقو رغم كل شي رغم طبيعتو و الي فيها،تعشق جاد الي فداخلو، جاد الحنين،جاد الي في حضورها و قربها منو يولي طفل صغير يلوج عالمأوى و الحنان😔 اما هذا لكل زايد تفكرت كلامو ليها اول ما تقابلو وين الباب كيف قلها ابعد من طريقي خاطرو كلو شوك💔و كأنو عارف انهم باش يوصلو للنقطة هذي على اذاكا نبهها..

-امان جاد يزي فيق😢

دزتو شوية بعدتو،فازتها نرفزتو حس انها رفضتو بطريقة غير مباشرة،حس كرامتو تمست فد و رجع تقلب،خير كيف فيقتو على وضعو في كل مرة يعاهد روحو باش ما يضعفش قدامها و ما يعمل شي ما يقربهاش يحاول على قد ما يقدر يتجنب عينها،غابتو الخضرا ليضعف قدامها و يتوه و يضيع طريقو فيها و في كل مرة يخون عهدو لروحو،فاق من سرحتو على صوت الباب لمزال يدق

-اقعد هنا ما تتحركش و رد بالك تخرج

شدتو من اجنابو بيديها الصغار منا و منا خزرتلو بكل براءة

-امان هزني معاك 😕

تبسملها بكل حب،حب يبوسها حتى من خدها والا من جبينها اما كبرياؤو منعو ما نجمش بعد كلامها و رفضها يعمل حتى حاجة،دخل بعضو مش عارف كيفاه يتصرف معاها بكلمة تطيرو لسابع سماء و بكلمة اخرى تدفنو تحت سابع ارض😡رجع جاد البارد الي ما يزلزلو شي

-قتلك ترص هنا ما تجهلنيش خير😡

خلاها و خرج.حل الباب و حط المسدس على راس الي دخل😮كل شي كان على عينها ستغربت مالحركة متاعو كيفاه يتصرف مع الشخص اذاكا هكاكا،تخزرلهم من فتحة الباب حايرة في هالعايلة كيفاه عايشين

اسيل وهي تبعد في المسدس من على راسها بكل برود حركة عملتها تدل على استيناسها بالوضع😑

-نحب نحكي معاك كانك فاضي

-قتلكم سويتي خط احمر😡

دورت عينها في بيتو لقاتها نظيفة تلمع فهمت لهي تنظفت ما عندهاش برشا جاوبتو هازة حاجبها ترمي في المعنى كوم كوا هاني شاكة في حاجة

-ممم خط احمر!والخديمة؟😉

-يعني شاكة في كلامي؟😒

-ماعليناش توا مش هذا موضوعنا جيتك على ما اهم نحبك ترجعلي مزيتي عليك

قعد عالفوتاي و حط ساق على ساق و حل يديه الزوز على طولهم ضحك من كلامها باستهزاء

-ههه😏مزيتك؟قداه حفضتها هالكلمة،اماهي مزيتك؟

-يكفي اني حبيتك كيف ولدي و كنتلك ام هالحاجة برك في حد ذاتها تكفي انها تكون مزية

-للاسف ام افشل من فاشلة خسارة مش كل الامهات يكونو ميثاليين

-و شبابي؟

-هات مالخر شتحب عندي

-العباد يحكيو على بناتي عرس بجود باش يسكرو افامهم

-قتلكشي راك ام فاشلة؟ كان جيت ام مثالية ما تتجرأش و تقترح عليا اقتراح كيما هكا رغم انك تعرف انا شكون و شنو ورايا و كيفاه حياتي

قامت خارجة

-والله حسب معرفتي بيك ما تحبش تحكي برشا

-موافق😲اخرج😒

هذا لكل صار قدامها مع كل كلمة تتقال عينها توساع مالصدمة،مصدومة من اسلوبهم و طريقت كلامهم،كلمة موافق مزالت تزن في وذنها قلبها وجعها ضحكت على جنب ضحكت يأس..

خرجت اسيل قعد عالفرش ناسي ايثار و ناسي كل شي خرج موس مالقجر حل الشوميز متاعو و زاد الشلطة الثامنة في كرشو ماللوطة😨

حلت شوية مالباب و طلعت راسها

-انجم نخرج؟

-اي اخرج،وجرب سعدك نسمع حرف ماللي تقال تعاود وقتها اعتبر روحك ميتة

خرجت تتبسم عكس النار لشاعلة في قلبها

-اي مبروك يا سسي جاد تشرقو على بعضكم ههه سبحان الله الخبيثون للخبيثات

-يااا بالحق خارجين على بعضنا؟😒

-والله للحظة حسيت انكم تنجمو تكونو عصابة ما صارتش😂 عيلة زفتة😒

-اتو نستفتحو بيك انت لولا مالا(ولى يصيح)اخرج😈

-توا زدت تأكدت انو عندك انفصام في الشخصية مريييض مريييض

بقا يتبع فيها بعينو لين خرجت

-اااه ايثار ايثار،ياربي قويني كيفاه انجم نسكتلها علاه ما انجمش نرجع عليها ديما نعديلها باللي تغلط و تقول فيا نعجز اني نعاقبها و الملايكة ما تتعاقبش😞

الشيطان يرحم الملاك ههه تيتر حتى في الخيال ما يصيرش

(حطواااا جاااام قبل ما تقرااااو)

الحلقة 36:

9:00 متع الصباح تمشي في الشارع هازة الخبز تشوشطت مالسخانة، تسمع في حس كرهبة وقفت بجنبها

-اختي تحب نوصلك

اثير خافت زربت في مشيتها

-لا عيشك

-ايا يهديك الدنيا سخونة و البلاصة شبه خالية و كلها مرماجية تخدم على رواحها ما يصيرش منو تمشي وحدك

-شمدخلك فيا برا عيش خويا فوتني

-يا بنتي يشهد عليا ربي نيتي صافية و مانيش نتبولد عليك والا نحب منك حاجة راهي بلاصة ما يتمشاش فيها شوف الرجال كيفاه تكحل عليك

-ابعدني لا نصيح و نلم عليك خلق ربي

-يا بنتي ما تخافش عليك امان الله راك غالطة فيا حتى انا عندي الولايا و نخاف ربي الي مانحبوش فيهم ما نرضاشو لبنات الناس،باهي كيف ما تحبش تطلع معايا خليني معاك لين تدخل لداركم

-امشي يهديك مانيش ناقصة فضايح

طفاها وبقا يتبع فيها بالكرهبة دخلت للفيلا و تصدمت كيف دخل جرتها و راكا الكرهبة

-ما صح رقعتك،خالط عليا هنا

-علاه دار شكون هذي سامحني

-دارنا

-هههه او في بالي،شكلك مالخوف نسيتها وين داركم(هبط مالكرهبة)

-اثير:😰يا ربي شنوا هذا سبحان الله في خلقو😍

الطول و العرض و الكوستيم كيفاه و اللحية و الشعر و اللونات و شفايفو الروز😭 يهبل اصل

-اخرج شمخلطك عليا هنا موقحك

تمشي و توخر خايفة لا يخرج حد و يشوفها لين طاحت فالبيسين تعوم و تغطس حجابها تنحى،الخبز تبل ولات تبكي😢

تفجع عليها مشالها يجري يحاول ما يخزرلهاش خاطر راسها عريان نحى الفاست متاعو و مدهالها،ماحبتش

-خوذ استر روحك و غطي شعرك(مدلها يدو خرجها) شبيك خايفة و مفجوعة مانيش غول راني نحب نعاونك كهو ما نقصد حتى شي آخر،انا اسامة ولد عمة جاد،ادخل لا تمرض

حطلها الفاست متاعو على ضهرها وهي مش حابة تتحلحز من بلاصتها تخزرلو كيفاه مدور وجهو عليها و يلبس فيها كيما جاء باش مايراهاش تبسمت 😍و رجعت تبكي😭قلبو وجعو عليها سخفتو

-شكونك انت،شبيني اول مرة نشوفك هنا

دازة كان عالبكا و ماجاوبتوش،باللي حاول يتجاهل ملامحها الطفوليه عجز،فضولو انو يشوفها كان اقوى منو هز راسو ذاب فيها وجها ابيض شمعة مغسول بالماء و الصابون كل شي فيها صغير عينها تسحر خذاتلو عقلو ركز معاها فلاها فليان قريب ياكلها بعينيه قلبو دق دقة مش عادية اول مرة يحس انها غريبة على الدقات لخرين

-ماشاالله بسم الله عليها سبحانك ياا ربي شتخلك و تصور نشوف في ملاك قدامي مزالو منهم البنات النوعية هذي لترخي عينها قدام حد و الي تحشم و تبلع لسانها كان وحدة اخرى راهي ما شيحتليش ريقي و طلعت معايا فيسع مالتزميرة لولا،زعمة شكون علاه اول مرة نشوفها نشالله ما تتطلعش وحدة من بنات اسيل والله تكور بيا😨اما لا نتصورش شقانس كيفهم يخرجو يقضيو😕

(خزرلها مازالت تبكي)يزي مالبكا عيشك و سامحني عاللي صار اما والله نيتي كانت صافية و ما حاولتش حتى نخدم مخي ادخل على روحك تو نمشي نعاود نشري الخبز في بلاصتك😊

طلع في الكرهبة هز تاليفونو كلم الكوجينة

-وي،اسمع فما طفلة البرا طاحت في البيسبن و كلها مبلولة عيشك امشيلها يضهرلي تخدم هوني ممكن بنت العساس بدللها لا تمرض

-حاضر سي اسامة،اما شكون منهم،اكيد لتبكي اه؟

-استغرب من سؤالها😕:اي علاه

-هاكي ما تتطلع كان اثير خاطر حساسة برشا و ديما تبكي،هاني ماشيتلها،عيشك😊

علق عليها و كمل يسوق حط يدو على فمو عض صبعو و تبسم

-😊اثير!!❤..لحظة لحظة تتطلعشي اخت ايثار؟😮 حتى اذيكا ما كتبتش و خطفها جاد مني و مضمضت عليها،مالا تو ناخو اختها مشكلة هي؟😁..

تعدات عليهم جمعة صارو فيها برشا حاجات..

•ملاك هند الي تحدد بعد غدوة و هي حارقة روحها تحب توصل ل لجين لكانت حابسة روحها و مقاطعة الناس لكل

•غسان الكالم الهادي حد ما يعرف شنو في مخو والا شنو ناوي يعمل

•جاد لحدد خطبتو رسميا من جود بعد شهر ويستنا وقتاه يتعدى باش يرتاح من مرجها هي و امها

•ايثار الي تحاول على قد ما تقدر ما تراش جاد حتى لو صدفة,كل ما تتفكر الكلام لسمعتو تموت بالحياة ايست اكثر ماهي مأيسة حكايتهم وفات قبل ماتتبدا،تحكم عليها بالموت قبل ما ترا النور.

•اسامة ليولى خرار مرار على الفيلا على امل يعاود يشوف اثير سكنتلو في بالو و قلبو يدعي نهار و ليل تكون حلالو💏

•اثير لعايشة حياتها ببرود من غير لا اهداف و لا مشاعر مخها محلول كان في قرايتها و شغفها بالطب.

•العم صالح لما خللى ما عمل باش يخرج محمد مالحبس باي طريقة من غير ما تسمع ايثار و اثير😢

•جود مش رافعتها الدنيا من فرحتها و قربها من تحقيق حلمها الوحيد بانها تاخو جاد،الخطبة قربت و مزال العرس

•اسيل عايشة فيها بالطول و العرض فارحة من قرار جاد كيف رضا بجود و املها في انو يولي يحبها كبير...

قاعدة هي و اثير في البيت كل وحدة سارحة في بر،كل وحدة و همها لين دخل بوهم حالتو حالة مرض على ولدو لعجز انو يخرجو مالحبس ضربة ثنين ولى يدوخ صحتو تعكرت و اعصابو تلفت و هو مخبي عليهم،دخل يمشي بالسيف قعد عالبنك لمقابلهم

-بابا شبيها حالتك هكا لباس؟ مريض؟شصار

-خوك يا ايثار😢خوكم في الحبس،تعبت و تهديت صحتي ماشية و تتدهور كثرت عليا الدويات و معاد فاهم شي😢

تخنق مالبكاء دموعو خانتو و هبطت قدامهم ضياق عليه الاستوديو قام خارج وصل وين الباب و طاح ما في عينو بلة...

(حطوااا جااام قبل ما تقرااااو)

الحلقة 37:

اتبع في بوها بعينها كيفاه يمشي بالسيف و اوب طاح تفجعو قلوبهم تخضت عليه قامو يتجراو حاولو يفيقوه والنافع الله،قامت اثير تجري حالتها حليلة خرجت البرا تلقاشي حد يعاونهم و يهزوه للسبيطار وجها احمر و دموعها على خدها،لقات الجهامة قدامها نقزت عليه تحسابو كمال الشوفور

-😢امان عيشك بابا داخ ندرا شبيه و ماحبش يفيق هزو معانا لسبيطار يفرحك

كان متكي عالعرصة يتكيف عندو برشا مارهاش،يدور في عينو عالفيلا على امل انو يشوف حتى خيالها،تهز و تحط،حاجة هبطت عليه كيف القضاء على دورتو تصدم كيف لقاها هي😮شبي حالتها هكا!دموعها سبالة وجها احمر ترعش بكلها كيقصبة الريح تي حتى حجابها مش مريقل وشعرها ظاهر شوية هي بالسيف تنطق فالكلام و هو يفهم فيها بالقدرة ما قلها شي جوست تبعها يجري دخل يلقى بوها ممدود لوطا هزو فيسع و حطو في الكرهبة طلعت هي معاه من قدام و ايثار معاه من تالي و طار بيهم لاقرب كلينيك،وصلو دخلوه ديراكت للاستعجالي..

لا وحدة فيهم خير من اختها الزوز حالتهم حالة خايفين على بوهم لا ما يقومش مع هو عندو القلب،واقف مقابلهم في الكلوار

-سبحان لخلقهم زوز ديامنتات حتى وهوما في حالتهم هذي يسحرو😍اسامة فييق فاش تخرف وقتو هو؟شوف حالتهم كيفاه مساكن قلبهم على بوهم تحرك احكي معاهم واسيهم شوفهم يستحقوشي حاجة الزح وينو لسانك😕

يدعيو في ربي يلطف بيه و بيهم و يقومو لاباس ما عندهم حد بعدو،خوهم و منغي في الحبس لا يعرفو لاعلاه ولاكيفاه،توا ما ليهم كان وجه ربي،لازمهم يكونو قويين و ياقفو لرواحهم اذاكا لقدرو ربي و هاكا حكمو وهوما راضين و حامدينو

-البنات سافا توا؟وسعو بالكم اهو شوية يخرج الطبيب و نعرفو شنو حالتو بالضبط و نشالله ما فما كان الخير بقدرة ربي☺

في وسط الفجعة و الجوجمة هذي الكل نساو حتى يشكروه كان مش هو الله اعلم شكان صار فيهم

-عيش خويا اسامة والله بلاش بيك شكان ممكن يصير فينا و في بابا،وليد حلال الله يفرح قلبك

-وخيان ايثار بيناتناش،غير يقوملنا لاباس برك

هزت راسها،تكلمت بصوت ضعيف بالسيف يتسمع

-عيشك اسامة باركالله فيك مزيتك ما تتنساش ربي يقدرني نشالله و نرجعها

-ما ترجع شي اثير يكفي انك تكون معايا😍

ستغربت من كلامو لجاء في وقت مش وقتو اما طفات الضو خاطر لا البلاصة لهوما فيها ولا الضروف يسمحو انها تفهمو و الا تستوعبو،اكتفات انها ترجع عليه بتبسيمة طيرتلو بيها قلبو،كانو واقفين الثلاثة بجنب بعضهم،حتى تعدا من قدامهم،راسو مرخي لابس سبور يدو في جيابو مهموم و هايم في عالم آخر،في لحظة جات العين في العين دقات القلب تزادت و رعشة قوية سرات في بدنهم هوما الزوز بالاخص،واحد من قوة الاعجاب و الاحساس لتملكو و لاخر من حكمة ربي ليخلق من الشبه اربعين،هو بيدو😮نسخة مطابقة للاصل نفس العين القري،نفس ملامح الغموض والقوة،نفس الطول،العرض والبدن،نفس الزين والوهرة فولة تقسمت في زوز حتى البارفان هي نفسها،اختلاف بسيط بيناتهم هاذا اغنج و لاخر اشقر شوية،تعدا من قدامهم العين في العين لحظة سحر بيناتهم لا واحد هبط راسو من لاخر كل ما يقرب كل ما هوما يتصدمو اكثر😨

كنت قاعد عالكرسي في صالداتوند متكي راسي عالحيط باش يتفلق مالتخمام و الاستراس لراكبني الف حاجة نخمم عليها مهمتي الي لتو لا وفات،حياتي لبقات شبه حابسة في امريكا،و امي لحالتها ماشية و تزيد تتدهور،شهر توا في تونس كل شي بارفاي جونا احلى جو محواس ولمة مع العايلة امورنا عال العال،حتى ليلة منهم روحت روتار شوية لدار على غير العادة نلقى امي مطيشة في بيتها دايخة هزيتها ديراكت للكلينيك قلبي ما قايلي خير،صحتها البيريود هذي مش عاجبتني وهي ديما متحملة وتحاول ما تضهرش،اخر مرة ما عندهاش برشا كحت الدم كيف تفجعت وشديت الصحيح في هزانها للطبيب تغشت و قتلي انتي خايف من غير حتى سبب و هذا دم من سنتي ما عندك علاه تتفجع،ما جدتش عليا الحكاية و خفت لا يكون مرضها اتطور،خليتها على راحتها خاطرها ولات ابرك شوية،اما كانتلي صدمة اليوم كيف قللي الطبيب انو مرضها تقدم برشا و في مراحلو الاخيرة معناها فات الفوت ولا عاد تنفع لا دوايات ولاشي خاطر الاشهر لمزالولها يتحسبو بصوابع اليد،من قبل ما نجاو لتونس وهي تكذب عليا استغلت غطساني في الخدمة باش تمشي لطبيبها وحدها و انا ما نشلق بشي كانت كل ما تمشي لكونترول والا حاجة تروح زعمة زعمة فرحانة باللي هيا بدات تبرا اما الحقيقة العكس عملت هكك باش ما تشغلنيش وما تحيرنيش عليها،كانت عارفة مصيرها و حاسة بنهايتها قربت😢جيتها لتونس على غفلة الي قررتها بين ليله و نهار ووحدها على غير العادة تشاورني في كل صغيرة و كبيرة هذي فيها ان و احساسي لا مرة خيبني في حاجة وديما صحيح،لازم نعرف سيلين فاش تكمبص. ياربي قومهالي لاباس راو ما عندي غيرها، رغم في ايامها الاخرة اما مازالت قوية و شادة روحها مش باين عليها المرض برشا، مستحيل تبين عجزها و ضعفها قدام اي بشر و حتى قدامي انا ولدها،هزيت راسي لثقل على اكتافي بالسيف،على اساس قايم نجيب قهوة ليلتين مارقدتش وزيدهم فجعت البارح. جات عيني عليها تمسمرت في بلاصتي و بقيت بين هوا وفضا ستهوتني بزينها خطفت النظر من عيني،حواسي الخمسة انعدمو، لاحاسس ولا شايف حد غيرها😍

الحلقة 38:

-كانت تجري مع الفراملة شادة الشريو و تبكي،حتى و دموعها على خدها محلاها سبحان لخلقها😍مش وحدها معاها طفلة تشبهلها ممكن اختها و طفل يظهر من هيأتو لا منهم ولا من نفس الطبقة الاجتماعية،الراجل المريض يشبهلهم و في الاغلب يكون بوهم مش كبير ممكن برشا يكون في اواخر الاربعنيات،زينها ماصارش،رهوجتني مستحيل هذا الكل يكون تونسي،عقلي طار عشت في برشا بلايص و خالطت بنات انواع اشكال خدمو معايا بنات قد شعر الراس و مستحيل وصلت حتى في منامي ريت وحدة في سحرها،تعدات من قدامي تجري اما انا فيسع سكانيتها😆حبستلي مخي الساعة بعينها لعجزت بعد ما خزرتلهم اني نركز في حاجة اخرى غيرهم عين خضرا حشيش رغم نظرة الضعف و الحزن لفيهم الا انها ممزوجة بنوع مالقوة و الجرأة مزيج متناقض بينهم وبين التحدي و الحشمة،شوافر طوال و حواجب مرسومين رسمان،بيضة شمعة كل شي فيها متناسق،خشمها صغير و خدودها موردة ملامحها ملامح طفولية،براءتها ملفتة يدقلها كل قلب يشوفها،فمها صغيرون وشفايفها و اااه منهم😍بيهم حركت فيا كل حواسي،طويلة شوية و تايها يدوخ رغم الي كانت لابسة روبة قري اما ضهرتلها شوية من مفاتنها فما بالك باللي تحتها😝معاها حجاب روز زايد فيها الشطر محليلها وجها كانت قمة في الفتنة رغم بساطتها،قلبي عمال دقاتو تزيد و نفسي يضياق،رعشة سراتلي في بدني وقفتلي لحمي شوك مش عارف شنو صار في لحظة احاسيس غريبة عمرها ما استهوتني ولا كنت عامللها حساب تملكتني،عمري ما هزتني وحدة بالطريقة هذي غيرها كاملة و الكمال لله، تمسمرت و جمدت في بلاصتي بقيت بين هوا و فضا لانجمت نقعد كيف العباد ولا نجمت نقوم تكونسيت بكلي،تعدات من قدامي ما تلفتتليش حتى بشطر عين همها و تركيزها الكل كانو مع الراجل لهزينو،برشا دموع و برشا وجيعة من الدنيا لباين فيها مذوقتها الويل،عينها كانو مليانين الغاز يحكيو في برشا كلام بالساكتة محتاجة شكون يفهمها كهو خزرتها ذوبتني و نساتني انا وين و علاه موجود هنا،نساتني حتى في سيلين،الطفلة لمعاها ممكن اختها حالها مش بعيد عليها حزينة صحيح اما ملامحها شبه عادية عكس الاخرى لظاهر عليها كل شي، الطفل عاشق جديد ظاهر فيها بداية حب في اولها عينو فاضحتو خوفو و اهتمامو الزايد على وحدة منهم حكا كل شي و اي حد يفهمو اما نتصورش هي فهمت خاطر تظهر باردة و صعيب انو حد يحركها بسهولة،اووف يزي جوزيف مكش باش تنحيها هالصنعة الكلبة،الخدمة و الانتوراج ل انا فيه خلوني كل ما يشد انتباهي حد نفليه فليان نحلل شخصيتو نفهم تعابير وجهو و على شنو ناوي و شنو وراه وكيف نشك في حاجة يوصل بيا الفضول ساعات اني نتبعو و نعرف تفاصيل حياتو بارديتاي😓عملو الدورة لبيت العماليات،مشات و هزت قلبي معاها، ترهوجت رجعت قعدت و رميت راسي لتالي و مع كل ترميشة والا غمظة عين تجي قدامي سكنتني و احتلت تفكيري❤

هزيت روحي و مشيت طليت على امي شوية وتعديت للطبيب حكينا على حالتها و ما طمنيش،عملو الي عليهم و الباقي على الله فات الفوت و معادش وقت،علمني باش نكون حاضر،في اي لحظة ما نعرش على ربي وقتاه يهز امانتو😔عطاوها مسكنات و دوا وقلي العشية روح بيها حاصيلو خرجت من عندو متأزم معناوياتي زيرو،ضايع مش فاهم شي لاوين نمشي لاشنو بيدي نعملو غير اني نرضا بحكم ربي و نحمدو على ما عطا و نتحلى بالصبر،تخنقت قلت نخرج نشم شوية هوا نمشي يدي في جيابي خلوقي دايرة مش حامل حتى روحي متعدي في الكلوار و ريتها مرة اخرى،عاطية راسها للحيط و مكتفة يديها عينها تنفخو مالبكا تاعبة و ضايعة اما لمحتني كيف وصلت حذاهم حسيتها كيف المصدومة تعابير وجها تبدلو و كساتهم الدهشة مش كان هي حتى لمعاها زادا قولش عليهم ندرا شكون شافو😕نشاالله ما يطلعوش يعرفوني والا يعرفو خدمتي وقتها وين تزيد الامور تتعقد وانا مش ناقص المدة هذي لفيا مكفيني و بزيادة😣..اسامة ستغرب و بهم ما فهم شي قدملو يسأل فيه

-جاد شتعمل هوني ياخي ريتنا كيف خرجنا و شبيها لبستك هكا؟

-سامحني خويا تعرفني؟غالط فيا مانيش جاد

-ههه و وليت تفدلك زادا؟ما نصدقش😅اما شبيك متبدل بالحق؟

-يا خويا مانيش جاد شكونو هذا و شكونك انت؟

-سامحني خويا اما والله نحسابك معرفة😮 راك نسخة مطابقة للاصل على جاد بن الياس آل راشد

سمع اللقب تكونسا وجمد الدم في عروقو😲هو نفسو الي سهرو ليالي و قتلو صاحبو نفس اللقب لضيعلو وقتو الكل،اللقب لسمعو مرة برك في مسيرتو المهنية و لا عمرو غاب على بالو ثانية والا نساه،كيفاه ينسى النهار لسمع فيه هك الكلمتين،خارج من بيروه و بالصدفة يسمع عرفو يحكي مع شكون و ذكر مهمتو و علاه معطلة هكا و هو عاجز انو يوصل للبوس متع العصابة رغم معرفتو لكل واحد موجود فيها الا هو صبورة كحلة بللي حاول ماوصلش ضهرو هوما ليعطلو فيه و يغطيو عليه،هذي فرصتو و هاذم طرف الخيط لباش يريح بالو و اخيرا ينجم ينتقم لبرشا مظلومين و ابرياء😏

-سبحانو ليخلق من الشبه اربعين☺اما لدرجة يشبهلي،ملامحكم الكل تبدلت سمالله العظيم قولش عليكم ندرا شريتو،لازم تعرفوني عليه شبيهي هذا شوقتوني باش نشوفو و ندهش كيفكم😀

-ههه اي والله بالحق هذي ما نفوتهاش لازم نعرفكم،سامحني ما تعارفناش انا اسامة و هاذم ايثار و اثير

-نتشرفو☺انا جوزيف

مد يدو سلم عليهم وقتها وين اسامة وايثار صدمتهم قوات كيف شافو نفس الوشام لعاملو جاد في نفس اليدين و نفس البلاصة..

الوشام في معصم اليدين اليمين على شكل حرف"J" الحرف الاول من اسمهم،تعمل فرد نهار ليهم الزوز عند نفس دقاق الوشام،في نفس اليدين و نفس البلاصة،الشبه لبيناتهم خلى الدقاق يستغرب و يمشي في بالو انو نفس الشخص رجعلو باش يعاود نفس الوشم في يدو الاخرى،النهار اذاكا كان اول نهار لجاد مع عصابة المافيا النهار لخذات فيه حياتو منحنى آخر،كيف كيف لجوزيف كانلو اول نهار في اكبر مهمة ليه،النهار لكان نقطة تحول في حياتهم الزوز،نقطة تحول وصلتهم المفترق الطرق،المفترق لزاد بعدهم على بعضهم و عقد حياتهم و صعبها،الطريق لبكلو شوك و حفر،مفترق الطرق هذا زعمة تجمعهم نهايتو؟..اسامة و ايثار خزرو لبعضهم بحيرة مش فاهمين شي اما ما شلقوش على رواحهم،مد يدو و سلم عليهم الكل

-اهلا بيك جوزيف نتشرفو☺

-عيشك اسامة،اما شتعملو هنا،عندكم مريض مالعايلة؟

-ايثار:بابا عندو القلب و تعب برشا اليوم جبناه هنا😢وانت لاباس،شعندك؟

هي تحكي و هو مركز مع كل كلمة تقولها،يتسلطن مع صوتها الهادي الرقيق كان يقعد يسمعها تحكي نهار وليل عمرو لايفد منها،ايثار،محلاه اسمها قداشو غريب و نادر وجودو كيفها هي😍❤

-ربي يلطف بيه نشالله و يقومهولكم لاباس،تستحقو اي حاجة انا موجود😊ولينا حبيبات عاد توا نتصور مش باش نتفارقو في الكلينيك

-اي اكيد لازمنا قعيدة ولازم تشرفنا بحضورك اليوم للدار،اما ما قلتلناش شكون عندك هنا؟

-الوالدة عندها كونسار(الله معافينا)تعبت برشا جبتها البارح،تقدم بيها المرض و خبات عليا الله يهديها😢

حست بيه،قداه سخفها قرات في عينو برشا وجيعة،هي اكثر وحدة تعرف شمعناها الدنيا بلاش الام وقداه مرة العيشة من غيرها حاولت تواسيه ممكن تخفف عليه شوية

-اللطف عليها نشالله تقوملك لاباس و ربي يخلي هالك

-عيشك ايثار،اما الله غالب هذي حكمت ربي و الحمدالله على كل حال😔صحيح الطب اتطور توا اما فات الفوت و ماعاد ما مازال، المرض اتطور و وصل لمرلحلتو الاخرة و هي اياماتها معدودة.

تعاطفت معاه و حستو قريب منها برشا

-انجم نشوفها كان مافماش قلق؟

ما تعرش علاه قالت هكك و طلبت الطلب اذاكا كانت حاجة اقوى منها و تكلمت بتلقائية رغم الي لا تعرفو لا تعرف امو اما رتاحتلو هالعبد و حبت تشاركو همو،

ستغرب من طلبها لكان مش متوقعو اما فرحو قداه كبرت في عينو قداش طيبة و حنينة هالطفلة😚

-عيشك ايثار ربي يفضلك الوالد و يقومو بخير و الله لا يحرمكم منو يا رب😊والله انك بنت اصل قداه فرحتني بالطلب متاعك هيا معايا كان تحب نهزك توا نورمالمون قامت خليتها راقدة..

كانت منهارة،حست روحها محتاجة لعبد كبير يفهم همها صعيب انها تحكي اما هي هكا محتاجة تشوف حد كبير و تحكي حتى بالساكتة و تستمد قوتها منو ممكن فقدانها لامها و هي صغيرة و المشاكل لصارت خلوها حساسة بزيادة،تبسمتلو و قتلو باهي

-بابا مازال تحت العملية و نشالله ربي يقدر الخير و كهو، نطل على امك و نجي فيسع

قالت لاختها ما نبطاش و مشات معاه

-نشالله نلقاوها فايقة باش تراها اليوم خاطر العشية باش نروح بيها☺احكي معاها تفهمك امي تحكي عربي راهي

-علاه مش عربية؟

-لا امريكية اما بابا الله يرحمو تونسي جينا ويكاند عدنا شهر

-ااا الله يرحمو..يعني انت مولود غادي

-اي اما بالاسم و برا امريكي ما جيتلهم في شي

تبسمت كيف وصلو و حللها باب البيت دخلت لقاوها فايقة كانت مرا محلاها شعر اصفر و عين قري بيضة مش كبيرة في العمر،ما توقعتهاش تكون هكا رغم مرضها الي في آخر مراحلو الا انها شادة روحها راسها مغطي اما باين شوية شكلو بدا يطيح حتى حواجبها و شوافرها زادا اما تبقى آية في الجمال،قربت منها و بكل عفوية ديراكت تبسط عليها باستها

قاعد وراها مكتف يديه يخزرلها كيفاه تتصرف،يشوف في ملامح امو كيفاه تبدلت و ملات وجها تبسيمة يعشقها فيها، التبسيمة لتخليه يرتاح و يطمان كل ما يشوفها و ترجع فيه الروح

-عسلامة تاتا شنحوالك سافا توا

-لاباس عيش بنتي محلاك شكونك انت؟

خزرتلو و حركت راسها معناها اقرب..

قرب منها طبع بوسة طويلة على جبينها و قعد بجنبها شدلها يدها الزوز و باس كفهم

-الله يهديك يامي ربي يسامحك علاه عملت فيا هكا علاه تصرفت و خذيت قرار وحدك علاه؟كان قتلي مالاول كنا بدلنا برشا نهايات مع بعضنا و حتى كان ربي كاتبلك حاجة عاللقل كنت نسيب الدنيا و مافيها و نشد جمبك،باش تحرمني منك،خترت انك تمشي وحدك و تخليني(عينو تملات بالدموع)

-يا وليدي نشالله تسامحني و ربي يغفرلي،الله غالب كنت حاسة تعرف مماتك و خالتك كيفاه ماتو دونك نهايتي باش تكون كيفهم هذا حكم ربي نعارضوه؟

جاء يتكلم سكتتو تبسمت و غمزتو

-ما عرفتنيش على هالملاك لجبتهالي،منين طحت بيها و كيفاه لقيت الوقت ياوحييد😉

-آآه منك يا سيلين ناوية تقتلني و تخلط عليا وقت هبلتك يامي تو؟نظف نظف مخك نعرفك راني،هذي ايثار تعرفت عليها توا و ما نعرف عليها شي كان اسمها و و اختها اثير و بوهم لتحت العملية تو و هي كيف قتلهم عليك حبت تطل عليك..

(حطوااا جاااام قبل ما تقرااااو)

الحلقة 39:

-اللطف عليه ربي يشفيه والله انك بنت اصل يا بنيتي

-عيشك تاتا و يشفيك انت زادت،هكا ربي حبلو الله غالب الحمدالله على كل حال هو بين يدين ربي و الطبة الي مقدر تو يصير ما بيدي شي كان اني ندعيلو والي خلق ما يضيع😔

تبسملها بلمعة في عينو كل كلمة تقولها تسحرو بيهاا قداش ايمانها بربي قوي

-يعطيك القوة يا بنتي قداكش مؤمنة بربي الله يصبرك😊اي و كيفاه تعارفتو فيسع هكا ما حكيتولي شي،احكي انت ايثار هكا راو فالح كان يبرولني بكلمتين و يسكت الكلام برشا و بالتفصيل الممل لنحبو انا هو ما عندوش ليه وساع بال😂

-ههه هاكا احنا واقفين و هو تعدا تصدمنا فيه كلنا من قوة الشبه نحسابوه واحد معرفة خلط علينا للكلينيك وفي اللخر طلع مش هو اما بالحق كان تحطهم بجنب بعضهم نأكدلك مستحيل تغرق بين جاد و جوزيف

-😲شسمو بنتي؟

-جاد

-اي والله هو ما سمعتش بالغالط،ياربي يكون هو،ياربي راو حملي ثقل عليا و ماعاد نقدر ياالله اجمعهم في الخير و بالخير،هذا الي جيت على خاطرو الحمد الله ربي سمع مني الف حمد و شكر توا كيف نموت نموت ضميري مرتاح،هالطفلة اشارة من عند ربي بعثهالي في وقتها

كانت تحكي بينها و بين روحها دموعها تجري مالفرحة والخوف في نفس الوقت و هوما مستغربين فيها توا كانت لاباس عليها جوزيف تفجع

-امي شبيك لاباس توجع فيك حاجة،يزي عيش سيلين الغالية تعرفني ما نحملش دموعك

-يا وليدي والله لاباس وراسك لا يوجع فيا شي اما محلاها هالطفلة لجبتهالي و مطيب قلبها تهبل،فهمتني تو علاه نبكي؟

-ششش معادش تحكي هكا فاهمك و بقدرت ربي تتداوا و تبرا و تعرسلي باللي تحب عليها انت و يتطول ربي في عمرك نشالله و تشوف ولادي زادا تقوى انت برك

-كان بمعجزة يا روحي

-وانا نمن بربي و عظمتو و معجزاتو،خلي ايمانك انت بيه قوي و لا تسلم لا تأيس عيش امي الغالية

ولات تبكي معاهم كان مشهد مؤثر عجزت انها تمنع دموعها يهبطو حيرولها مواجعها😭

-نخليكم انا توا نشالله لاباس تاتا محلاك والله حبيتك ربي يشفيك نشالله و يخليك لجوزيف

-عيش بنتي برا ربي يفرحك كيما فرحتني،اما خليك هك قاعدة كان ماتراش مانع زيد ونسني شوية ديجا جوزيف لازمو يجيبلي دبشي مالدار،بوك عامليتو مازالت و ربي يقومو بخير

-نقعد اما ادعيلو يقوملنا لاباس (طرشقت بالبكا)انا السبب ياربي سامحني و ما تعاقبنيش بيه راو نوارت عيني ياربي😢

جوزيف تصدم من بكاها و ستغرب من كلامها حب يقعد يسمعها شدو ليها فضول كبير اكيد وراها حكاية😕اما زربتو سيلين ما نجمش يقعد وخرج.

الدبش كان سبب ما اكثرش حبت تبعدو،هي العشية تخرج و ايثار فرصتها الوحيد ما تعرش كان تعاود تقابلها،قلبها تعبا و الكاس فاض،حاطة نسبة كبيرة في موتها لازمها تحكي و تخرج لفيها الكل السر لدفنتو في قلبها توا سنين و كان لازم يتدفن معاها اما مش باش توفي بوعدها و تحافظ على وصية اختها،سر معذبها و اكبر منها ضميرها انبها و هي مش قد هالحمل،جاء الوقت لباش تسلم فيه سرها لغيرها لازمو يتكشف و يشوف النور

-لطف عليك يزي مالبكا ما تحط شي في بالك وراس بنتي لاباس،امك ويني معاهم البرا؟

-لا متوفية😢

-حتى جوزيف كيفك😔

😲تصدمت و استغربت من كلامها الي ما ستوعبتوش

-علاه انت مكش امو؟😮

-اسمعني مليح بنتي الي باش نحكيه اكبر منا الزوز سر بقى مدفون قريب ثلاثين سنة توا و نشالله تسامحني،انا على ابواب موت عملت الشر كيما عملت الخير ضميري مأنبني نحب نطلع لربي نظيفة،باش نرمي عليك حمل ثقيل و رغم صغر سنك عارفة انك قدو خاطرك قوية و ايمانك بربي اقوى،رتحتلك و باش نحلك قلبي سر سنين باش نخرجو اليوم،يابنتي احفضو مليح و اجمع اصحابو في الخير هذي وصيتي ليك،ربي سبحانو يسخر لعبادو عباد اخرين يكونولهم كيف الدوا ليشفي جراحهم المخفية دوا من نوع اخر يحمل عليهم الوجيعة(بدات تحكيلها ملي تعرفت هي و كارمن على الياس و صاحبو لحكاية الولادة و تفريق التوامة،حكاتلها على جاد و حياتو لكانت متابعتها لحظة بلحظة و اخبارو لتقطعت عليها عندها شهور وبعد سمعت بموتت بوه و رجعتو لتونس اما سمعت روتار برشا،تأنيب ضميرها زاد،كان من الممكن انها عرفت جوزيف على بوه الحقاني اما مش كاتب و على اذاكا جات لتونس مصرة انها تلم شمل الاخوة بأي طريقة قبل منامت عينها،حكاتلها زادا على جوزيف و حياتو بالتفصيل على خدمتو و مهمتو ليفرضو عليه يرمي خوه في الحبس😢و ختمتها بحكاية الوحمة الي في كتفهم اليمين)ايثار تسمع فيها و تبكي معها قداش الدنيا مخيبها،حست قداش جاد مظلوم في هذا الكل،فهمت انو مهمتها صعيبة وباش توصل لهدفها لازمها تتنازل على برشا حاجات اخرين،عذرتو على كسوحيت قلبو و برودو فهمتو و حست بيه باللي يكون،عاش حياة صعيبة و الدنيا حرمتو حتى من خوه،سخفها جوزيف لعاش بعيد على امو و هو صغير و تحرم منها وهي ميتة حتى قبرها ما يعرفوش وين،لامت سيلين عللي عملتو ابسط حاجة كانت تنجم تعملها انها تحكيلو و توريه قبر امو اللي هي على حد علمو تكون خالتو😢شنو مصيرهم هاذم؟كل حد في شيرة واحد في طريق الحق ولاخر في طريق الباطل رماتو الدنيا و لزتو الضروف رغم اليي يعمل فيه مش شر ومش ناقص شي ولا محروم من شي هذا باش يوريك انو الفلوس معدومة او موجودة في الحالتين ما عندها حتى دخل في التربية و عمرها لا كانت حاجة يتحدد بيها مصير العبد

(حطوااا جاااام قبل ما تقراااااو)

الحلقة 40:

حملها ثقل تحس في اكتافها تهدو تخمم في جاد كيفاه باش تكون نهايتو،بعد لعرفتو عليه و بعد معرفتها بيه لحست فيها قداشو انسان حنين مرهون في حضن و نظرة صادقة و يخرج الطفل الضعيف لفيه،غير الوقت و الضروف خلوه يكون هكا،اهم الحاجات لتحرم منها و معاملت بوه ليه في صغرو كانو عامل اساسي لوصولو للطريق هذا،رغم قسوتو و جبروتو و قوتو و النظرة الخايبة لماخذينها عليه برشا عباد لهوما نفسهم اقرب الناس ليه ما حاولوش يتقربولو و يفهموه حكمو عليه و كرهوه في جرت كلام سمعوه عليه وما حاولوش يتأكدو آسك صحيح والا غالط،وحتى كان صحيح ما جاش لبالهم علاه عمل هكا؟شنو لوصلو لطريق هذا؟مهما يكون الي قاعد يعمل فيه لا شر ولا ظلم اما في نظر القانون ماهو الا مجرم ولازم يتحاسب و يتعاقب😢

برشا كلام دار في مخها و الف سؤال محتاج لاجابة،صحيح خايفة اما من داخل مصممة انها تكشف هالسر و تجمعهم مهما كان المقابل غالي،تحس في اكتافها رزنو كأنها هازة اجبال على ظهرها رغم صغر سنها،كل يوم ينزادلها هم على همها،كيفاه باش تتصرف و منين باش تبدا،تي هوما الزوز يلوجو على بعضهم و كل واحد ناقم على لاخر اكثر كيفاه تجي هذي باينة طريقها مسدود من اولو،خايفة لا تتعقد الامور و في عوظ تجي تكحلها تعميها

خايفة لا تصعب عليها الامور و تخون الثيقة و الامانة..

دخل هاز فاليز صغيرة لقاهم الزوز ينوحو و حالتهم حليلة بقى حال فمو😮

-اببب😕ربع ساعة مشيت فيها و جيت لقيتكم دورتوها نويح،هااا ايثار وخيتي فيسع قتلتها و قعدت تبكي عليها😂اي قوم قوم بوك عماليتو كملت و نجحت الحمد الله على سلامتو تعديت توا سألت عليه الجماعة

مالفرحة ما تعرش على روحها كيفاه طنطرت جات في حملتو،عنقتو بالقوي تصدم و ترهوج تشل بكلو و تكونسا في بلاصتو،فاقت على وضعها حشمت و خبت وجها بيديها الزوز(و كان شافها جاد البنات هههه)شاخو عليها ضحك هو وامو شدها من خدودها يمغط فيهم😂

-ههه و حشامة زادا عيش الصبية😝اي اخرج لا نعمل فيك حاجة نندم عليها و قدام سيلين زادا😉.

هو زادا مايعرش على روحو كيفاه نطق هالكلام تعنيقتها لجات على غفلة و ريحتها لرهوجتو و الفازة لعملتها كيف حشمت هبلوه خرجوه من سينتو كان مش قدرتو الكبيرة على انو يسيطر على روحو و يتحكم في مشاعرو و ملامحو راهو عاود عنقها هو و عمل ما اكثر.

باست سيلين و قتلها تو نكلمك،خارجة هي وياه و تسمع في تاليفونها ينوقز هزت عليه

-نعم

-عظم،وينك؟وين هجيت ريحتك ما فماش

-اي مو على اساس في سير الايام موجودة

-شيهمك اموري نعرف كيفاه نشوفك و وقت ما نحب

-تعس عليا يعني؟

-نقص من طولت لسانك و قولي وينك

-في الكلينيك

قلبو تقبض تفجع عليها خاف لا تكون صارتلها حاجة و زيد ماللي دخللها البارح للبيت باش يشوفها وهي راقدة خاطر توحشها ما عاودش شافها،عادتو الجديدة لولات فيه بعد ما حرمتو من شوفتها يعرف انها تغلي عليه اما تحاول تتقوى و تضهر عدم المبالات لفيها مللي سمعت الكلام لدار بينو هو واسيل وموافقتو انو يعرس بجود وهي تقلبت معادش تحب تقابلو حتى صدفة و هو عاذرها و مقدر ضروفها يعرف انو جرحها و دمرها اما مش مسيبها عندو امل انو يلقى حل اما مخللي الامر يستراح

-حل فمك شبيك تتقصد على دين بويا شصار😡(طيح في صوتو و تكلم بحنية و خوف حستهم من نبرتو)ايثار انت لاباس احكي عيشك شبيك😟؟

-😕والله مريض قداكش متناقض تو كنت تعيط و تبرح سبحانو مغير الاحوال،ساعات تولي بهيم زادا🐴حل مخك تو كان جات بيا حاجة باش نحكي معاك انا😒

-ايثار خيرلك راهو ما تختبرش صبري

-بابا تعب الصباح جبناه عملولو عملية

-جبتوه؟ انت وشكون

-انا واثير و اسامة يرحم والديه هو لجابنا ولد اصل و مازال معانا مخلاناش وحدنا

سمع الاسم و كان يعقل،مكنو العصب و جهل تحول و خرج الشيطان لفيه،كان جاء اسامة قدامو ممكن يقتلو وقتها،ما كانش يتوقع وجودو معاهم،خاطر يعرف نيتو و يعرف مليح شنو مشاعرو تجاهها نورمالمون ماللي في المزرعة و تجبد الموضوع بيناتهم و قلو مرتي يكون هو ميساجو وصل و لاخر فهم روحو😠فاح فيها

-علاه للا انا عرصت كردونة طرطور عندك والا ما نقضيش ااه باز قضية اسامة خير ااه تكلم حل فمك عاد

تصدمت من ردت فعلو و كلامو حست بغيرتو عليها قلبها دق حنتلو و توحشتو،في لحظة جا قدامها اك النهار و تفكرت جود و عرسهم لمازالو شهر، شعلت،قلبها لتو موجوع تجرحت برشا و جرحها ما براش،ولات تعيط كيفو

-اوووو فك عاد مازلت ساكتة راني،شنو مشكلتك انت و من وقتاه يهمك امري تلها في روحك و عاد شبيه كان عاونا ولد الناس باركالله فيه لقيناه وقت الشدة و و قت ما فما حد معانا،مو قريبك و خوك عاد،تقلبت؟

حس كلامها موجه ليه،عندها حق كان الدنيا دنيا رو هو واقف معاهم،يعرفها قداه متعلقة ببوها و اكيد قد تعلقها و حبها ليه هي موجوعة و محتاجة شكون معاها

-الشيطان لا عندو خوات ولا صحاب..كان الاعداء

-اي خاطرك شيطان وصلت لحالتك هذه😡جاد براس اميمتك اخطاني تو،فكني و اخرج من مخي لي فيا مكفيني و زيادة والله لاني ناقصة عصب ولاعيني في عرك و مشاكل، يعلم بيا كان لخلقني توا😔

صوتها كان تاعب و حيلها مهدود حس بيها قلبو تقبض عليها،نار الغيرة شاعلة في جواجيه اما ما حبش يزيد عليها و يناقشها..

(حطوااااا جاااام قبل ما تقراااااو)

الحلقة 41:

يسمع في صوت غريب عليه و اول مرة يسمعو في حياتو،الصوت كيف صوتو،حس حاجة غريبة اما ماعطهاش اهمية كبيرة،صوت يقلها

-ايثار ايجا اهو راقد في لبيت هذي

الصوت مش صوت اسامة،ستغرب و فد عاود شعل اما حكا معاها بالسياسة،بالسيف شاد روحو

-ايثار،هذا مش صوت اسامة لمعاك😡تكلم شكونو؟و ثابتة انت في الكلينيك؟

-اي مش هو،هاني ماشيتلهم،خرجو بابا توا مالعملية و خليت اسامة و اثير معاه

-😬اسمع راني باقي موسع بالي معاك،سألتك ما جاوبتنيش،انت وين و شكونو هذا لمعاك؟

-صديق تعرفنا عليه اليوم في الكلينيك

-تعرفتو؟ اي للا و وين كنت معاه

-اي انا و اسامة و اثير و ما عندي وين كنت معاه مشيت طليت على امو

-اا بون

-ااا وي

-شوو و مصح رقعتك مازلت تحكي؟ فيسع تعرفت على امو زادا؟ياخي على نيتك والا تستبله فيا؟اي تلم عاد و سكر رب فمك و ما تزيد مع دين امي حتى حرف هاني جايك تو نوريك،اليوم الكلينيك نهدو على راسك و راسو😠لحظة برك يا ايثار،ياخي هازة بوك مريض والا ماشية تتعرف و تتمعشق

جاوبتو بكل برود و هدوئ،بالحق تاعبة و ماعينها في شي امنيتها الوحيدة تسكر عينها و تحلهم تلقى مشاكلها الكل وفات و الي عاشتو الكل مجرد حلمة

-جاد والله لاهو وقتك بالكل انا وين و انت وين،لا باش نجاوبك ولا باش نبررلك شي خمم كيما تحب و فسر على كيفك اما جوست نحب نفكرك بحاجة وهي انك ماخذني غصب يعني بالسيف،بطريقة و على خاطر اسباب احنا الزوز نعرفوهم مليح مش لازم نقعد نعاودلك فيهم، حسستني انك كذبت كذبة وصدقتها،فيق عيشك،شكلك نسيت انك راجلي على الاورق و بس،لذا ما تلعبليش فيها دور الراجل الحزار،ما يشرقش عليك😧

كلامعا سكتو عقدلو لسانو،لاول مرة يحس روحو مجروح، اي نعم الشيطان تجرح،حس كلامها و قداش وجعو اما عجز انو يرجع الجرح بجرح اخر كيفو،تكلم وفي صوتو بحة وجيعة،وجيعة ولاتلو غصة في حلقو

-اسمك مربوط باسمي يا ايثار😔انت مرتي حتى لو كان عالورق كهو (علق عليها)

جوزيف كان يمشي قدامها و اول ما كلمها جاد و سمعها نطقت اسمو وقف شوية و رجع يمشي و مع وصولهم للبيت لراقد فيها بوها،ديراكت جات لبالو فكرة تكلم بصوت عالي بالعاني باش يسمعو جاد و قلها الكلاه اذاكا، الوقت يجري لازمو يبدا لعبتو،مهمتو لازم تكمل بأي طريقة كانت،قداه الدنيا صغيرة و محلاه الزمان كيف يدور،ما سمعش مكالمتهم للخر و ما عرفش شنو علاقتهم بالضبط اما بطريقة كلامها معاه و برودها رغم انو قتال ارواح و مجرم الا انو تجرأت طفلة و علت عليه صوتها و حكات هكاكا بكل استحقاق لامتو و تحدتو زادا و كسرت كلمتو،بهذا الكل ممكن تكون علاقتهم قوية و كل انسان عندو نقطة ضعف و اكيد ايثار هي نقطة ضعف جاد دونك بدايتو باش تكون منها هي لازم يكسبها و يتقرب منها،هي القنطرة لباش توصلو للهدف متاعو..

-ايثار لاباس،شبيك؟وطي صوتك في كلينيك راك فما مرضى هوني

-سامحني جوزيف مالعصب نسيت روحي هيا ندخلو

شدها من كتفها بالشوية،صحيح اول ما شافها حركت فيه برشا حاجات و دقلها قلبو،حبها من اول نظرة و زاد عشقها كيف حبت تشوف امو و تطمان عليها قابلتها و فرحتها،رغم هذا الكل هو مستحيل انو يدخل هذا في هذا عمرو لا خلط حياتو الشخصية بخدمتو،وعلى اذاكا لازمو يعفس على قلبو و يختار مهمتو لخذات اكثر من وقتها،من شيرة اخرى لازم يتلها بأمو لهوة خاصة و يرجعها لامريكا تداوا و تعمل العملية لرفضتها،حكى معاها بصدق وما خدمش مخو

-لحظة ايثار😊صحيح احنا عرفنا بعضنا تو تو اما ما تتصورش قداه رتحتلك و حسيتك قريبة مني،زدت كبرت في عيني كيف طلبت مني تشوف امي، مشيتلها و فرحتها والله مزيتك لا ننساها،تعرف عندي برشا ما ريتش ضحكتها؟ وانت اليوم رجعتهالها،بطريقة غريبة قويتني انا و عطيتنا امل جديد،قداكش طفلة طيبة و محلاك،ممكن نتقربو اكثر؟نكونو حتى اصحاب مقربين،اعتبرني خوك يا سيدي..ما تتصورش سيلين قداه حبتك و نأكدلك انها باش تمرجني عليك اذيكا توا،عس عليها باش تولي ضربة ثنين يا جيتك لداركم والا جايبتك حذاها للدار😂امي و نعرفها😛

-ههه حتى انا حبيتها و قداش محلاها و فيسع تتحب و تدخل للقلب،ربي يشفيها نشالله و يفضلها،والله ما تتصورش انا زادا قداه رتحتلكم الزوز و عادي مرحبا بيها تجيني وقت ما تحب لدارنا و انا على ما نقدر كان جياني لداركم يفرحها و يحسن حتى شوية من حالتها النفسية ميسالش ما فما حتى مشكل،وخيان عاد احنا توا مش هكا؟و انشالله تو تواتي بطبيعتها و تجي فرصة نزيدو نحكيو و نتعرفو بالباهي،اما هك تشوف توا لا البلاصة ولا الوضع لاحنا فيه يخوللنا حتى باش نطولو في الحديث

-باهي انجم ناخو رقمك كان ما تتقلقش؟

-اوكا عند تاتا سيلين تنجم تاخذو😊

-نكلمك في اي وقت ميسالش؟

-هههه باهي يا سيدي كلمني وقت ما تحب انا على ذمتك،وقت ما تحب تحكي انا نسمعك و تستحق حاجة انت والا تاتا قلي نعاونكم بالي نقدر

-هه باهي عيشو صغرون😜حتى انت ما تترددش،في اي لحظة تنجم تكلمني و وقت ما تحتاجني طيش ميساج نكون قدامك في رمشة عين

-باهي عيش خويا،هيا ندخلو اكيد بابا مازال راقد اما اوموان تنجم تشوفو كان تحب.

دخلو بقا معاهم شوية حكى مع اثير و اسامة و خرج روح بأمو وصلو للدار حملها دخلها لبيتها،بدللها و ما خلى ماجابلها و وكلها كمل، قعد معاها في فرشها حطها قدامو و بدا يمشطلها في شعرها،مكيجلها شوية و رقدها عندو..

-امي❤سافا توا شتحس في روحك..

(حطواااا جاااام قبل ما تقرااااو)

الحلقة 42

-يا وليدي وراسك لاباس،الحمدالله انك معايا ربي يفضلك(باس جبينها)

-جوزيف

-امممم

-محلاها ايثار تهبل،قداش حبيتها امان جيبها حذايا

-ههه والله قلتهولها هالكلام الساعة،وقتلي ما عندي حتى مشكل و قتلك انت زادا كان تحب تمشيلها لدارهم مرحبا بيك،اما خليها توا ترتاح و يقوم بوها لاباس و بعد ساهل، ومنو ترتاح انت شوية زادا،ما قتلكش وين تسكن؟

-اي خذيت نيمروها قتلي تسكن في....

-ياخي مش هذة البلاصة لتسكن فيها هك المرا لكانت صحبتك الي مانهضمهاش انا؟تي هاكي لديما تحكيلي عليها اسيل والا ندرا شكونهي كنتو مع بعضكم فرد جمعية و كان صدقني كانت تسكن في نيويوك

-يا وليدي ماشالله على ذاكرتك انا والله نسيتها هك فكرتني بيها ايييه قداه عندي عليها هك المرا رغم انها كلمتني و سألت عليا برشا مرات، بعد ما مات راجلها الاول رجعت لتونس و سمعت بيها عاودت عرست و رجعت لامريكا و بعد راجلها الثاني مات زادا وخلالها طفل في عمرك يضهرلي،مسكينة عاودت رجعت واستقرت هوني باش ولد راجلها يتلها باملاك بوه،انا ملي ضاعلي تاليفوني مشا عليا كل شي

-هذا لبيك للا العشية يكون عندك رقمها.

-باهي عيش ولدي،نرجعو لموضوعنا توا

-اما موضوع

-ايثار

-عيش سيلين يزي راني فاهمك مليح و عارفك فاش تكمبص،والله لاهو وقتو بالكل

-جوزيف ترا فيا كيفاه و تعرف مليح اني على ابواب موت،نحب نتهنا عليك قبل منامة عيني و هي محلاها و عجبتني،نحبها تكون كنتي 😨

-الله مصلي عالنبي هالعشية،لطف عليك تي شبيك الزح😕نعرفك انت كيف تكبش في ام حاجة تيبس عليها(تنرفز) فك عاد

-جوزيف الي عندي قلتو،كان تحبني نعمل العملية لازمك تاخوها ايثار سي نون مضمض

كانت تحكي بجدية،حاسة نهايتها قربت، عاللقل تحاول على خاطرو تعمل محاولة اخيرة و تكمل تناظل لاخر لحظة،قررت انها تعمل العملية لعلى و عسى ربي يكتبلها عمر جديد و تعيش،تلم شمل ولاد اختها و تفرح بيهم

-امي تحكي بالرسمي باش تعمل العملية والا تستبله فيا تعرفني حاجات هكا ما نلعبش بيهم

- وراسك لاني نفدلك موافقة نعملها بشرط تعرس بايثار

-عيش امي الغاليه نوعدك وعد رجال تطوال تقصار ايثار تولي "كنتك"😲 و بيناتنا حتى انا عجبتني😆

-ههه يا وحيد حتى انا فهمتك و حسيت بيك بالاخص كيف عنقتك مالفرحة،وقتها انت تصدمت و تشليت بكلك عينك ما كثر ما وساعت حسيتها باش تخرج😂

-ههه شنوا سيلين وليت تفرك فيهم عليا😦اي والله بالحق،سبحان لخلقها آية في الجمال هك الطفلة،تظهر صغيرة اما مخها كبير😊تي بالحرام تكونسيت في بلاصتي كيف قربتني ولا نجمتها نتحرك،وزيد حشامة و عاقلة تصروفاتها متع وحدة كبيرة ما عندهاش اك التفوريخ و التفرفيش متع برشا بنات،والكلمة لتقولها في بلاصتها

-خف روحك مالا هاني نستنا وانا معاك

-باهي ربي يسهل😘اي عيش سيلينتي نخليك توا ارقد و ارتاح شوية (باسها و خرج)

قاعدة بجنب بوها مكبشتلو في يدو،تحس فيه يحرك فيها هزت راسها لقاتو حال عينو قامت تجري تعيط لاثير لكانت قاعدة البرا تحكي هي و اسامة

-اثير ابركشي توا😔بالاهي يزي مالبكا قطعتلي قلبي ااا زحي من نهارت لعرفتك وانت تنوح لانهار ريت عينك شايحة😂ماتفدش ياخي؟😕

-هه والله كثر الهم يضحك،الله غالب هاكي طبيعتي

-😒طبيعة زبالة و زفتة😂حمدالله عليك للا كيف تواضعت و وريتنا هالضحكة

-اسامة

-امممم

-نسألك سؤال؟

-اسأل للا😧

-علاه الصباح قتلي الكلام هاكا،علاه عاونتنا و قعدت معانا كنت تنجم تروح،ما تفهمنيش بالغالط اما جوست اسألة جات لبالي،انت باركالله فيك وقفت معانا وقت ما لقينا حد و احنا زوز ولايا وحدنا عيشك والله مزيتك على راسنا

-هاني باش نجاوبك اثير،اما توعدني ما تقلي شي و تخمم في الحكاية بالحق بعدها اعطيني رايك،خوذ وقتك و ما تستعجلش

-باهي،نشالله خير

-نشالله بقدرة ربي مايصير كان الخير،اثير من اول لحظة ريتك فيها تمشي في الشارع قعدتلي في بالي،حسيت حاجة غريبة شعور قوي على غير العادة،ندرا كيفاه بالحق عاجز اني نوصفو بالكلام اما نشالله ربي يسهل و يقدرني نطبقو بالفعل،اثير نعرف مش وقتو و حتى البلاصة ما تسمحش كنت مأجلو الموضوع اما هي جات بطبيعتها و سألتني وحدك..نشالله يقوم بوك لاباس نحب نجي نخطبك كان تسمح😲

تصدمت حاجة لاكانتلها لاعالبال ولا عالخاطر جات باش تتكلم سكتها

-لا عيشك مش توا،ما تاخوش قرارك وانت في الحالة النفسية هذي خمم مليح تشاور مع اختك كان تحب و نوعدك ما تندمش و يصير كان الخير،اما بالله ما تاخوش قرار مبني على اني عاونتكم و وقفت معاكم هذا واجبي وأي حد حتى بأمور انسانية يعمل كيفي،ما تاخوش قرار تحت ما يسمى برد جميل،اعتبر هذا الكل ماصارش كأنا في ضروف عادية و خمم على هالاساس نحب نسمع رايك انت بلاش الي صار الكل.وانا راضي بيه و فاهمك في الحالات الكل سوى رفضتني والا قبلتني و حتى لو اجابتك باش تكون لا،نتمنى تنسى لقلتو و نقعدو صحاب، حاجة اخرى نحبك كيف تخمم تنفي حالتي انا الاجتماعية والماديات و العايلات الزوز و الضروف و كل شي،سمعني انت شتحس كهو،مريقل؟

هوما هكاكا و خرجت ايثار تجري تقلهم الي بوها قام، دخلو حذاه اسامة حب يخليهم على راحتهم و بعد يطمان عليه بقا بعيد شوية، هوما قعدو بجنبو كل وحدة من شيرة،قربتلو ايثار باست جبينو و عنقتو😢

-الحمد الله على سلامتك يا بابا والله خوفتنا عليك..

(حطوااا جااام قبل ما تقرااااو)

الحلقة 43:

-اللطف عليكم،الله يحفضكم يا بنتي سامحوني خوفتكم،الله غالب ربي حب😔شبت و شاب راسي و طحت تهديت

-اللطف عليك تاج راسنا،انا نقومك و نفديك شبابي

-مانيش عارف شعملت في دنيتي حتى يصيرلي هكا،الطفل في الحبس،اختك قلبها ميت،وانت معرسة في السر،صبرك ياا ربي

-شنو السبب علاه في الحبس شنو عمل رانا مافهمنا شي،فهمنا عيش بابا

-انا بيدي مش فاهم شي نجري و نجري ساقيا حفات وانا من واحد الواحد ما خليت لشكون مشيت ما فماش واحد ما ترجيتوش باش يخرجو و النافع الله،لقيت روحي عاجز و ما نجم نعمل شي،عجزت نغطيكم مالبرد يا بنتي،كبرت و ما قدرتش ندفيكم(يبكي بندم)سامحني يا بنتي راني ضعيف ما نجمتش نحميك و ندافع عليك ماللي صارلك مصدقك و مسامحك،ارضى بالمكتوب حتى كان عرسك في السر لعلى فيها خير،ديما قول الحمد الله😊

-لطف عليك يزي عيش بابا دموعك غالية راك تقتل فينا😔

شادة روحها قدام بوها بالسيف باش ما تبكيش ما تحبش تضعف و تزيد عليه الي فيه مكفيه

-شد حيلك بابا ربي ما ينساش عبادو والي خلق مايضيع كيف تطلب اطلب من رب الناس مش من عبادو،ايا يزيك ما حكيت ارقد شوية ارتاح،حقا اسامة عاونا و وقف معانا الله يرحم ولديه ولد اصل لقيناه وقت الشدة😊

-عيش ولدي الله يخليك و يرحم والديك راجل و ولد عايلة -عسلامة عم صالح الحمد الله على سلامتك،ماعندي حتى مزية عيب نخلي ولايا وحدهم

-اثير انت هك مع بابا نخطف روحي للدار نجيبلو دبشو و نطيبلو حاجة و نجي نشالله ما نبطاش

-باهي رد بالك على روحك عيش اختي

-ايثار ستنا تو نوصلك مالا علاه قاعد حذاكم انا عاللقل كيف تستحقو حاجة تلقاوني،اي فيسع نوصلك للفيلا و نتعدا لدارنا نبدل و نعاود نتعدالك نرجعو هنا،اثير تستحق حاجة؟

-لا عيشك اسامة

-عيشك اسامة والله من غيرك ندرا شكان يصير فينا

-ايثار باش تسكت ولا😒 اخرج اخرج كرهتوني في روحي بكلمة يعيشك اا بنتي احسبني خوك يعجبكشي تو

-ههه باه عيش وخي

هوما خارجين تعدا بجنب اثير قربلها وشوش في وذنها

-حبيت اسمي من شفايفك😍عسسل

خلاها ميتة بالحشمة و خرج😂وصل ايثار و تعدا لدارهم، دخلت بدلت دبشها فيسع حضرت عشا بوها و عندها طرف فلوس ملمدتهم هي و اثير حطتهم في ساكها باش تخلص بيهم الكلينيك،و بقات تلم في الدار..

في الوقت هذا اسيل هي و جود و نجد في الصالة يبرمجو و يكمبصو لجاد و شنو باش يعملو في الخطبة لمزاللها اقل من شهر،تسمع في تنوقيزت تاليفونها،رقم غريب عليها ما تعرفوش هزت مالكلمة لولا شكت في الصوت اما حبت تتأكد

-الو

-الو عسلامة

-اسيل معايا

-وي اسيل،سامحني صوتك مش غريب عليا و نشالله تطلع الي في بالي😕

-ههههههه اي هاكي هيا😂

-يااا امبوسيبل سيلييييين😄

-بشحمها و لحمها،مازلت تتفكرني

-و هو يصير ننساك،تي وينك يا مرا يا نكارة العشرة،هكا تو!سنين باش تتفكرني

-الله غالب يا وخيتي لهاتني الدنيا و مشاغلها و زيد رقمك ضاعلي

-مش مشكل هنا تلمينا مرة اخرى،وينك شعاملة والله ليك وحشة😘يا حسرة على ايامات الجمعية و الجو

-اي والله يا حسرة،وينك انت سافا

-الحمدالله،كيفه لقيت رفمي مالا؟

-هكاكا ولدي ما يحيرش،روحنا لتونس ويكاند جيت على بالي قلت نكلمها نتقابلو

-اي اكيييد،غدوة تكون عندي ما نفهم شي،مااصغرها الدنيا تفارقنا و كتب المكتوب عاودنا تقابلنا

-ريت ماهو حكمت ربي، اي عزيزتي ما نعطلكش اكثر اوكا رقمي عندك ابعثلي الادراس متع دارك غدوة الحي كان حياتنا القدرة نجيك😊

-صوتك متبدل شوية و حستك تاعبة، سافا؟

-الزمان دوار 😧غدوة نحكيلك بارديتاي عزيزتي،نخليك توا

-اوكي بونوي(دارت للبنات متحمسة)

- البنات غدوة جايتنا ضيفة هذي مرا نعرفها قبل ما نعاود نعرس ب الياس كانت صحبتي هي اكبر مني صحيح انا تراوها ماتعطيهاش عمرها

-مرحبا بيها..

ريقلت امورها و خرجت تشم في شوية هوا حتى يكلمها اسامة تخرجلو،شافتو من بعيد قاعد على طاولة جنب البيسين قدامو كدس اوراق و دوسيات مركز معلهم باين فيه يخدم و كالعادة رجالو دايرين بيه و مسركلين الفيلا الكل

تنهدت بخوف و مشاتلو ساق القدام و عشرة التالي

-سلام😔

ملي كلمها و طيشتلو هك الكلام و هو يرحي،خلوقو في خشمو بارد كيما عادتو،كلامها لكان كيف السم لتو يتعاود في وذنو شتتلو افكارو و ضيعلو تركيزو في كل شي بالسيف مركز في الخدمة لتكدست عليه سمع صوتها هز راسو كان تاعب عاللخر

-نعم تفظل😩

-ممكن نحكي معاك شوية😓

-مكش ترا فيا لاهي😏

-الموضوع اكيد😟

-نسمع فيك😒

-اول مرة و آخر مرة نطلب منك طلب،نحبك تخرج محمد خويا مالحبس،انت لدخلتو،والله لاهو خايب و راهو بللي يعمل ما عندو وين يوص...

قص عليها كلامها عقد حواجبو و طيش الستيلو بنطرة

-قداش من عام و هو يضرب فيك؟😡

-يبقى خويا

-لعلمك تراس الضرب لتو مازال على لحمك و مش لازم نفكرك وقتاه ريتو(يقصد وقت جاء باش يغتصبها)

-بللي يعمل فيا مستحيل نكرهو

داهش فيها،مستغرب من كلامها

-انا بويا كان يمد عليا يدو مستحيل نخليه عايش😲 (و باستهزاء)😏فما بالك خويا؟!

انفعلت و انهارت معادش فيها و كثر عليها الشي،دموعها خانتها و هبطت قدامو ما نجمتش تخللي في قلبها اكثر بكات بهستيريا كانت محتاجة تفرغ قلبها😢

(حطوااا جااام قبل ما تقرااااو)

الحلقة 44:

-عندو حق انا لحرمتو من امي،حرمتو من روحو،مللي جيت للدنيا و انا نشوف كان في دموعو،جيت في جنازة،في وقت عزاء..مستحيل نكره شخص انا دمرتلو حياتو و كنت سبب في فقدانو لاغلى حاجة عندو،مهما عمل يبقى خويا(تبسمت بوجيعة و مسحت دموعها بكف ايديها بطريقة طفولية،الطريقة لتهبلو و تخرجو من عقلو)الدنيا اقصر من اني نكره فيها عبد و ننقم عليه فما بالك لو هالانسان خويا لحمي و دمي!😔

بقا يخزرلها بنضرة غريبة هو بيدو مش فاهم شيحس كل شي طخلط عليه،هالفرخة باش تجيب آخرتو ديما موقفتلو مخو...

قام من بلاصتو نفخ بعصب و عدا يدو على شعرو😍قربلها،كانت خايفة ترعش من غير شي هو مغلغل عليها و طالعتلو منها للسماء كلامها لتو يتعاود في وذنو،كان لقا كيفاه وقتها راو خرجلها مالتاليفون و كلاها بطريحة..😂😂

قربلها برشا قريب يلصق فيها شدلها خدودها بيديه الزوز و طبس عليها شوية بحكم اطول منها 😝عينو الذابلة في عينها،انفاسو السخونة في وجها و ببحت صوت اقرب منها للهمس يحكي و يحرك في راسو على كامل وجها مرة يغمض عينو و مرة يحلها يحاول يتفادى انو يركز مع عينها برشا و يغوص فيهم😍و ينهار اكثر من هكا

-علمني كيفاه نحب و نعشق و نعبر على الي في داخلي روض الشيطان الي فيا و بدلني 😟و نعلمك انو الدنيا اقصر من انك توثق فيها..

حالتها حالة زاد كمل عليها،قربو منها بالدرجة اذيكا حسسها و حرك فيها برشا حاجات دوخها و فشلها،بحت صوتو برك رهوجتها و خلاتها تتنفس بالسيف..خوفها خلاها ترعش و تعجز انها تركز مع كلامو و تعيش اللحظة و تتمتع بقربو حتى لو غصب عليها و رغم عن كبرياءها،هو حالو ما تبعدش عليها و ممكن اكثر منها، احاسيس و مشاعر تخلطو عليه،رغبتو كبيرة غي انو يكون معاها،اما عاجز و كيما في كل مرة ما ينجم يكمل يعمل شي رغم انها مرتو حقو،الفرصة لتجيه زادا تخولو انو يعمل الي يحب عليه، اما احساسو بتأنيب الضمير في كل مرة كيف ينوي على حاجة يمنعو ،الاحساس الي في كل مرة يخليه يسيبها تحت رغبتو في انو ما يجيش يضغطش عليها و مستحيل انو يفرض روحو عليها بالقوة و بالسيف،يحب بارادتها هي و نتيجة لحبهم الي في داخلو عندو امل كبير في انو يكبر و يخرج للعالم و يرا النور😍❤ تكلم بصوت كلو حنية و رغبة

-اقنعني يا ايثار انو مازال في الدنيا هذي حد يحب معذبو،يحب الانسان لدمرلو حياتو و كرهو فيها،و انا بدوري نقنعك بعد الكلام الي باش يجي نهار ونقولهولك،الكلام لثقل قلبي و معادش انجم نكتمو اكثر من هكا،و الي على اثرو باش تاخو انت قرارك،قرارك لباش يخليني نتمسك بالدنيا و نعيشها ليك و على خاطرك انت وحدك😍وحدك وبسس...

هز راسو قربلها اكثر و اكثر طبع بوسة طوويلة على جبينها،قرب شفيفو لوذنها انفاسو السخونة حرقت رقبتها و قلبها🔥💓

-انت فهمتني و حاسة بيا،فاهمة كلامي ملييييح مليح خمم يا ايثار،في الحالتين باش تتحرق مع الشيطان في جهنم يا اما بنار العشق والا بنار الحقد خاطر ثامن المستحيلات اني نخليك لغيري،و احسنلك تتحرق بنار عشقي خيرلك😈

حنى راسو شوية دور يدو على خصرها و جبدها لصقها فيه،كورون سرا في بدنهم الزوز غمضو عينيهم هي مالخوف والصدمة الي في جرتهم عجزت انها تحس الاحساس و تعيش اللحظة حتى لو كان رغما عنها و هو مالمشاعر و الاحاسيس لتخلطو عليه و عاجز انو يسيطر عليهم،عدى خشمو و شفايفو على رقبتها و كأنو ياخذ في جرعة اكسيجين، جرعة يستمد منها قوتو و يقدر انو يحارب بيها الدنيا على خاطرها،طلع يدو لخرى و شدلها بيها ذقنها بحنية عاود باسها بوسة خفيفة على خشمها وخلاها ومشى..

خلاها واقفة في بلاصتها مصدومة مش فاهمة شي تصارع في روحها و مشاعرها، قلبها يدق حاستو باش ياقف، طاحت في القاعة غطت وجها بيدها و طرشقت بالبكاء😢😢

-علاه يتصرف معايا هكا ما فهمتوش متناقض كل مرة بفعل،مرة يحبني و مرة يكرهني،كيف كلامو هكا علاه وافق على جود؟يا ربي علاه قلبي هكا حاسة روحي باش تخرج😢ياا ربي ما تعلقليش قلبي بحاجة مش متاعي،ما تخلينيش بين يديه و تحت رحمتو والله الشخص الغالط،شيطان ما تزيدش تعلقني بيه يا ربي،ارحمني و اعطيني القوة...

الجزء الثاني 》

Chroniques.كرونيات

عندما يعشق الشيطان الجزء الاول

من الحلقة 11 إلى 44

تعليقات

إرسال تعليق

انتي نجمتي الجزء الثاني